ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵖⵍⴰⴼ ⵏ ⵓⵙⵎⵀⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ
ⵖⵔ ⵎⴰⵙⵙ: ⵕⴰⵛⵉⴷ ⵕⴰⵃⴰ
ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ
ⵉ:
- ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ
- ⵎⴰⵙⵙ ⵄⴰⴱⴷ ⵍⵍⴰⵟⵉⴼ ⵡⴰⵀⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ
- ⵎⴰⵙⵙ ⵎⵓⵃⴰⵎⵎⴰⴷ ⵄⴰⴱⴷ ⵏⵏⴰⴱⴰⵡⵉ, ⴰⵏⵙⵙⵉⵅⴼ ⴰⵎⵣⵡⴰⵔⵓ ⵏ ⵜⵙⵏⴱⴹⴰⵢⵜ ⵏ ⵜⵕⵥⵉ, ⴰⵏⵙⵙⵉⵅⴼ ⴰⵎⴰⵔⵉ ⵏ ⵓⵙⵇⵇⵉⵎ ⴰⵎⴰⵜⵜⵓⵢ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ
- ⵎⴰⵙⵙ ⵍⵃⵙⵏ ⴷⴷⴰⴽⵉ, ⴰⵏⵙⵙⵉⵅⴼ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ
- ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ
- ⵎⴰⵙⵙ ⵏⵏⵄⵎⴰ ⵎⵉⵢⵢⴰⵕ,ⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ
- ⵎⴰⵙⵙⴰ ⴰⵎⵉⵏⴰ ⴱⵓⵄⵉⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ
ⵙ ⵓⵎⵙⴰⵙⴰ ⴷ ⵜⵉⵢⵢⴰⴼⵓⵜⵉⵏ ⴷ ⵉⵙⵖⵍⴰⴼ ⴷ ⵜⵎⴰⵜⴰⵔⵜ: “ⴰⵙⵎⵀⵍⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ”, ⵍⵍⵉ ⵉⵥⵍⵉⵏ ⵜⵓⵏⵖⵉⵍⵜ ⵜⵉⵙ ⴽⵕⴰⴹⵜ ⵏ ⵓⵏⵎⵓⵇⵇⴰⵔ ⴰⵏⴰⵎⵓⵔ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ, ⵉⵜⵜⵓⵙⵏⵎⴰⵍⴰⵏ ⴳ ⵜⵖⵔⵎⵜ ⵏ ⵕⵕⴱⴰⵟ ⴳ ⵓⵙⴰⵢⵔⴰⵔ ⵏ ⵉⵎⴰⵙⵜⴰⵏⵏ ⴰⵙⵙ ⵏ 31 ⵎⴰⵢ 2024/2974, ⵙⴳ ⵓⵖⵎⵉⵙ ⴰⵎⴰⴹⴰⵍ ⴰⵎⴰⵣⵉⴳ ⴷ ⵜⴳⵔⴰⵡⵜ ⵏ ⵉⵎⴰⵙⴰⵜⴰⵏⵏ ⴳ ⵕⵕⴱⴰⵟ, ⴰⵙⵏⴰⵍ ⵏ ⵜⵎⴰⴷⴷⴰⵙⵜ ⵏ ⴼⵔⵉⴷⵉⵛ ⵏⵓⵎⴰⵏ ⵉ ⵜⵍⴻⵍⵍⵉ, ⴷ ⵓⵎⵓⵢⴰⵡⴰⵙ ⴰⴽⴷ ⴰⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ.
ⵜⵥⵍⵉ ⵜⵓⵏⵖⵉⵍⵜ ⵜⵉⵙ ⴽⵕⴰⴹⵜ ⵏ ⵓⵏⵎⵓⵇⵇⴰⵔ ⵙ ⵜⵉⵍⵉⵜ ⵏ ⴽⵉⴳⴰⵏ ⵏ ⵉⵎⴰⵙⵜⴰⵏⵏ ⴷ ⵉⵎⵖⵏⴰⵙⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⴷ ⵓⵎⵓⵙⵙⵓ ⴰⵣⵔⴼⴰⵏ, ⵉⴳ ⵜⴰⵎⵍⴷⴰ ⵏ ⵓⵎⴹⴰⴽⴰⵕ ⵏ ⵜⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⵙⵍⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵜⵣⵔⴼⵜ, ⴷ ⵓⵙⵙⵏ ⵏ ⵎⴰⵕⵕⴰ ⵜⵉⴱⴱⴰⵢⴹⴰⵕⵉⵏ ⴷⴰⵔ ⵏ ⵜⵉⵍⵉⵜ ⵏ ⵜⵎⴰⵣⵉⵖⵜ ⴳ ⵓⵏⴳⵔⴰⵡ ⵏ ⵜⵣⵔⴼⵜ, ⵎⵇⵇⴰⵔ ⵉⵍⵍⴰ ⵓⵙⵍⴳⵏ ⴰⵎⴰⴷⴷⴰⵙ ⵉⵣⴷⵉⵏ ⵙ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ 5 ⵉⵙⴳⴳⴰⵙⵏ.
ⵙ ⵜⵎⴰⵙⴰⵢⵜ ⵍⵍⵉ ⴼⵍⵍⴰⵖ ⵉⵍⵍⴰⵏ ⵍⵍⵉⵖ ⵏⵙⵏⵎⴰⵍⴰ ⴰⵏⵎⵓⵇⵇⴰⵔ ⴰⵏⴰⵎⵓⵔ ⵡⵉⵙ ⴽⵕⴰⴹ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ, ⵉⴳⴰ ⴰⵖ ⵜⵓⵎⵔⵜ ⴰⴷ ⴷⵉⴷⵓⵏ ⵏⴷⵔⵓ ⵉⵙⵖⵍⴰⴼ ⴰⴷ, ⵍⵍⵉ ⴳⴰⵏⵉⵏ ⵙⴳ ⵜⵉⵎⵣⵡⵓⵔⴰ ⵏ ⵓⵙⵖⵉⵡⵙ ⵉ ⵓⵙⵎⵀⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ, ⵜⵉⵎⵔⵙⵍⵜ ⵏⵏⵓⵏ ⵜⵓⵏⴱⵉⴹⵜ ⴷ ⵜⴷⵙⵜⴰⵔⵜ ⴷⴰⵔⵙ ⵜⵉⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⵎⵖⵔ ⵏ ⵜⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ, ⴳ ⵜⵉⴼⴰⵡⵜ ⵏ ⵉⵙⵖⵍⴰⴼ ⴰⴷ, ⵉⵥⴹⴰⵕ ⴰⴷ ⵢⵉⵍⵉ ⵓⵙⵎⵖⵔ ⵏ ⴽⵓ ⵎⴰ ⴷⴰⵔ ⵜⴰⵣⴷⴰⵢⵜ ⴷ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ, ⵉⴳ ⴰⵙⵖⵍ ⵉ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴰⵎ ⵎⴰⴷ ⵉⵍⵍⴰⵏ ⴳ ⵉⴳⵔⴰⵏ ⵢⴰⴹⵏⵉⵏ.
ⴳ ⵓⵙⴰⵜⵉ ⴰⴷ, ⵜⵜⵓⴱⴹⴰⵏ ⵉⵙⵖⵍⴰⴼ ⵏ ⵓⵏⵎⵓⵇⵇⴰⵔ ⵙ ⵡⵉⴷ ⴳⴰⵏⵉⵏ ⵉⵎⴰⵜⴰⵢⵏ ⴷ ⵡⵉⴷ ⴳⴰⵏⵉⵏ ⵉⵎⵥⵍⴰⵢ.
* ⵉⵙⵖⵍⴰⴼ ⵉⵎⴰⵜⴰⵢⵏ:
1- ⴰⴹⴼⵕ ⵏ ⵓⵣⵣⴳⵉⵔ ⵏ ⵉⵙⵖⵍⴰⵍ ⵏ ⵜⵎⵜⵜⵉⵏ ⵎⵓⵏⵏⵉⵏ ⵜⵜⵓⴼⴽⴰⵏⵉⵏ ⵉ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵜⵣⵔⴼⵜ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵣⴷⵉⵏⵉⵏ ⴷ ⵓⵚⵕⴰⴹ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵙⵏⴱⴹⴰⵢⵉⵏ ⵏ ⵍⵎⵖⵔⵉⴱ.
2- ⴰⵙⵔⵙ ⵏ ⵉⵖⴰⵡⴰⵙⵏ ⵉⵖⴰⵡⴰⵍⵏⵏ ⵉ ⵓⵙⵎⵀⵍ ⵏ ⵓⵙⵍⴳⵏ ⴰⵎⴰⴷⴷⴰⵙ ⵉⵥⵍⵉⵏ ⵙ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⵡⵉⴷⴰ ⵣⴷⵉⵏⵉⵏ ⵙ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵓⵏⴳⵔⴰⵡ ⵏ ⵜⵣⵔⴼⵜ ⵜⴰⵎⵖⵔⵉⴱⵉⵜ.
3- ⵉⵎⵉⵥ ⴳ ⵓⵣⵔⴼ ⴰⵎⴰⵣⵉⵖ ⴷ ⴰⵖⴱⴰⵍⵓ ⵙⴳ ⵉⵖⴱⵓⵍⴰ ⵏ ⵓⵣⵣⵔⴰⴷ ⵉ ⵓⵙⵉⴷⴼ ⵏ ⵡⴰⵜⵉⴳⵏ ⴷ ⵜⵓⵎⴰⵢⵜ ⵏⵏⵙ ⴳ ⵓⵏⴳⵔⴰⵡ ⴰⵣⵔⴰⴼⴰⵏ ⴰⵎⵖⵔⵉⴱⵉ.
4- ⴰⵙⵖⵓⴷⵓ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⵏ ⵜⵓⵡⵊⴰ ⵉ ⵉⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵜⵉⵎⴰⵣⵉⵖⵉⵏ.
* ⵉⵙⵖⵍⴰⴼ ⵉⵎⵥⵍⴰⵢ:
- ⴰⴷ ⵜⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵛⵛⵉⵍⵜ ⴳ ⵉⴱⵔⴷⴰⵏ ⵏ ⵓⵙⵎⵓⵜⵜⴳ ⵏ ⵎⴰⵔⴰⵢ ⵉⵙⴰⵜⵉⵢⵏ ⴷ ⵉⵙⵖⵡⴰⵏⵏ ⵏ ⵜⵎⴰⵡⴰⵙⵜ ⵏ ⵜⵣⵔⴼⵜ.
- ⴰⵣⵓⵛⵛⵍ ⵏ ⵓⵙⵓⵖⵍ ⵏ ⵉⵙⵍⴳⵏⵏ ⵏ ⵍⵎⵖⵔⵉⴱ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴻⵜⴳⴰⵜⵉⵏ ⵜⵉⵎⴰⴷⴷⵓⴷⵉ, ⴷ ⵓⵙⵓⵖⵍ ⴰⴷⵖⵢⴰⵏ ⵏ ⵎⴰⵕⵕⴰ ⵜⵉⴼⵔⴽⵡⵉⵏ ⵏ ⵓⵚⵕⴰⴹ.
- ⴰⵙⵖⵉⵡⵙ ⵏ ⵉⵙⵎⵓⵜⵜⴳⵏ ⵉⵙⵓⵍⴰⵏⵏ ⵣⴷⵉⵏⵉⵏ ⴷ ⵎⴰ ⴰⵏⵏ ⵉ ⵚⴰⵃⴰ ⵏ ⵉⵎⵙⵖⴰⵏⵏ ⴷ ⵉⵙⴰⵜⵉⵢⵏ ⵏ ⵜⵎⴰⵡⴰⵙⵜ ⵏ ⵜⵣⵔⴼⵜ.
- ⴰⵣⴷⴰⵢ ⵏ ⵓⵚⵕⴰⴹ ⴰⵣⵔⴼⴰⵏ ⴷ ⵓⵡⵇⵇⵔ ⵏ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉⵖ ⴳⴰⵏ ⵉⵏⵎⵓⵔⴰⵏ ⵢⴰⵏ ⴷⴰⵜ ⵏ ⵜⵣⵔⴼⵜ ⵉⵖ ⵓⵔ ⵜⴳⵉ ⵜⵣⵣⵓⵍⵜ ⵜⴰⵣⵔⴼⴰⵏⵜ ⵜⴰⴱⴱⴰⵢⴹⴰⵕⵜ ⴷⴰⵜ ⵏ ⵢⵉⵙⴽⵉⵍ ⴰⴷ.
5- ⴰⵙⵖⵣⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵓⵜⵍⴰⵢⵜ ⵏ ⵓⵚⵕⴰⴹ ⴳ ⵎⴰⵕⵕⴰ ⵉⵙⵡⵉⵔⵏ ⵏ ⵓⵚⵕⴰⴹ ⵙⴳ ⵉⵎⵉⵥ ⴰⵔ ⴰⵔⵣⵣⵓ ⴷ ⵜⵥⵕⵉⴳⵜ ⵏ ⵉⴱⴹⵉⵢⵏ ⴷⴰⵜ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵉⵖ ⵉⴳⴰ ⵍⵃⴰⵍ ⵉⵏⵎⵓⵔⴰⵏ ⵙⴰⵡⴰⵍⵏⵉⵏ ⵜⴰⵎⴰⵣⵉⵖⵜ.
6- ⴰⵣⵣⵔⴰⵢ ⴷ ⵓⵙⵏⴼⵎ ⵏ ⵎⴰⵕⵕⴰ ⵉⵣⵣⵔⴰⴼⵏ ⵀⵎⵎⴰⵏⵉⵏ ⵉⵏⴳⵔⴰⵡⵏ ⵏ ⵜⵣⵔⴼⵜ ⵙⵍⴰⵡⴰⵏ ⴰⴽⴽⵯ ⵡⵉⵍⵍⵉ ⵎⵣⴰⵣⴰⵍⵏⵉⵏ ⴷ ⵓⵡⵇⵇⵔ ⵏ ⵜⵓⵜⵍⴰⵢⵜ ⵏ ⵉⵎⵚⴰⵕⴰⴹⵏ, ⴰⵎ ⴰⵎⵏⵏⵉ 14 ⵏ ⵓⵙⵍⴳⵏ ⵏ ⵓⵏⴳⵔⴰⵡ ⴰⵣⵔⴼⴰⵏ ⴰⵎⵖⵔⵉⴱⵉ ⵍⵍⵉ ⵉⵜⵜⵉⵏⵉⵏ ⵎⴰⵙ ⵜⴳⴰ ⵜⴰⵄⵕⴰⴱⵜ ⵜⵓⵜⵍⴰⵢⵜ ⵏ ⵓⵙⵏⵓⴱⴳ ⴷ ⵓⵔⵣⵣⵓ ⴷ ⵓⵎⵚⴰⵕⴰ ⵙ ⵓⵎⴰⵜⴰ ⴱⵍⴰ ⵉⵍⵍⴰ ⵓⵡⵇⵇⵔ ⵏ ⵜⵓⵎⴰⵢⵜ ⵏ ⵓⴷⵓⵙⵜⵓⵔ ⵏ ⵍⵎⵖⵔⵉⴱ.
- ⴰⵙⵙⴽⵛⵎ ⵏ ⵓⵎⵏⴰⴷ ⴰⵎⴰⵣⵉⵖ ⴳ ⵓⵙⵎⵓⵜⵜⴳ ⵏ ⵜⴰⵙⵓⵜⵉⵏ ⵏ ⵉⵎⴰⵍ ⴳ ⵉⵏⴱⴹⴰ ⴷ ⵉⵎⴰⵙⵜⴰⵏⵏ ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵔⵙⴰⵍ ⵜⵉⵏⴰⵎⵓⵔⵉⵏ.
ⵏⴻⵏⵏⵓⵔⵣ , ⴳ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⴰⴷ ⵜⵏⵢⴰⵍⴽⴰⵎ ⴷ ⵉⵙⵖⵍⴰⴼ ⴰⴷ, ⵉ ⵓⵙⵔⵙ ⵏ ⵓⵖⴰⵡⴰⵙ ⴰⵎⵔⵙⵍⴰⵏ ⵉ ⵓⵙⵎⵖⵔ ⵏ ⵜⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ, ⵍⵍⵉⵖ ⵜⴳⴰ ⴰⵢⴷⴰ ⵉⵛⵛⴰⵔⵏ ⵏ ⵎⴰⵕⵕⴰ ⵉⵎⵖⵔⵉⴱⵉⵢⵏ.
ⵏⵇⵇⵍ ⵙ ⵜⵎⵔⴰⵔⵓⵔⵜ ⵏⵏⵓⵏ, ⴰⵙⵓⵜⴳ ⴷ ⵓⵡⵇⵇⵔ ⵏⵏⵖ ⵉ ⴽⵯⵏⵏⵉ
ⵕⴰⵛⵉⴷ ⵕⴰⵃⴰ
ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ
