ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⴼⵓⴳⵍⴰ ⵓⴳⴰⵍⵓⴼ ⴰⵎⵙⵙⵓⴳⵓⵔ ⴷ ⵓⵏⵖⵎⴰⵙ ⴳ ⵓⵖⵎⵉⵙ ‘’ⴰⵎⴰⴹⴰⵍ ⴰⵎⴰⵣⵉⵖ’’ ⵙ ⵓⴽⵜⵜⵓⵢ ⵏ ⵜⵍⴰⵍⵉⵜ ⵏⵏⵙ ⵡⵉⵙⵙ 21, ⴳ ⵜⵖⵔⵎⵜ ⵏ ⵕⵕⴱⴰⵟ, ⴰⵙⵉⵎⴰⵡⴰⵙ 27 ⵎⴰⵢⵢⵓ 2022.
ⵜⵍⵍⴰ ⴳ ⵓⵙⴼⵓⴳⵍⵓ ⵎⴰⵙⵙⴰ ⴰⵎⵉⵏⴰ ⴱⵏ ⵛⵛⵉⵅ ⵜⴰⵏⵎⵀⴰⵍⵜ ⵏ ⵜⵥⵕⵉⴳⵜ ⵏ ⵓⵖⵎⵉⵙ, ⵙ ⵜⵎⵍⴷⴰ ⴰⴷ ⵉⵜⵜⵓⵙⵏⵎⴰⵍⴰ ⵢⴰⵏ ⵓⵏⵎⵓⵇⵇⴰⵔ ⵜⵙⵙⵏⴽⴷ ⴳⵉⵙ ⴰⴷⵍⵉⵙ ⵏ ‘’ⵜⵎⴰⵣⵉⵖⵜ ⴳ ⵓⵙⵍⵎⴷ ⴰⵏⵎⵍⴰⵏ ⴳ ⵍⵎⵖⵔⵉⴱ’’ ⵉ ⵜⵎⴰⵔⴰⵜ ⵏⵏⵙ ⵎⴰⵙⵙⴰ ⴼⴰⵟⵉⵎⴰ ⴰⴳⵏⴰⵡ, ⵙ ⵓⵣⴷⴷⵓⵢ ⴰⴽⴷ ⵓⴳⵔⴰⵡ ⴰⵏⴰⵎⵓⵔ ⵉ ⵉⵎⵙⵙⵓⴳⵔⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵉⴳⵔⴰⵡⴰⵏⵏ.
ⵜⵙⵕⵥⵎ ⵜⵏⵖⵎⴰⵙⵜ ⴰⵎⵉⵏⴰ ⴱⵏ ⵛⵛⵉⵅ ⴰⵏⵎⵓⵇⵇⴰⵔ ⵙ ⵓⵡⵣⵍⴰⵏ ⵅⴼ ⵉⵏⵣⴳⵓⵎⵏ ⵏ ⵓⵖⵎⵉⵙ ‘’ ⴰⵎⴰⴹⴰⵍ ⴰⵎⴰⵣⵉⵖ’’ ⴷ ⵓⵙⴰⴽⴰ ⵏⵏⵙ ⴰⵖⵏⵙⴰⵏ ⴷ ⵓⴹⴼⵓⵕ ⵏⵏⵙ ⵉ ⵜⵎⵔⵏⵉⵡⵜ ⴳ ⵉⵣⵔⵉ ⵓⵙⴷⴰⵡ ⵏ ⵜⵎⴰⵣⵉⵖⵜ ⵣⴳ ⵓⴼⵓⵖ ⵏⵏⵙ ⴳ 30 ⵎⴰⵢⵢⵓ 2001, ⵎⴽⵍⵍⵉ ⵜⵙⵏⴽⴷ ⵓⵍⴰ ⵙ ⵎⴰⵙⵙⴰ ⴼⴰⵟⵉⵎⴰ ⴰⴳⵏⴰⵡ ⴷⴰ ⴼ ⵉⵜⵜⵓⵙⴽⴰⵔ ⵓⵙⴼⵓⴳⵍⵓ ⵙ ⵓⴷⵍⵉⵙ ⵏⵏⵙ, ⴷ ⵄⴱⴷⵙⵙⵍⴰⵎ ⵅⴰⵍⴰⴼⵉ, ⴰⵏⵎⵀⴰⵍ ⵏ ⵡⴰⵎⵎⴰⵙ ⵏ ⵉⵔⵣⵣⵓⵜⵏ ⵉⴷⵉⴷⴰⴽⵜⵉⴽⵉⵢⵏ ⴷ ⵉⵖⴰⵡⴰⵙⵏ ⵉⵙⴳⵎⴰⵏⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴷ ⵓⵎⵙⵙⵓⴳⵔ ⴰⵙⴳⵎⴰⵏ ⴷ ⵓⵎⴰⵣⵣⴰⵍ ⴰⵎⴰⵣⵉⵖ, ⴰⵏⵙⴱⴰⵢⵏⵓ ⵏ ⵓⵏⴳⵎⴰⵎ ⴰⵏⴰⵎⵓⵔ ⵏ ⵉⵎⵙⵙⵓⴳⵔⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵉⴳⵔⴰⵡⴰⵏⵏ ⵎⴰⵙⵙ ⵎⵓⵚⵟⴰⴼⴰ ⵓⵎⵎⵓⵛ, ⴹⴰⵕⵜ ⵏⵏⵙ ⵜⵙⵏⵉⵎⵎⵔ ⴰⵙⵍⵡⴰⵢ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ ⵅⴼ ⵜⵉⵏⴷⵉ ⴷⴰ ⵉⴼⴽⴰ ⵉ ⵓⵙⴷⴰⵡ ⵏ ⵜⵎⴰⵣⵉⵖⵜ ⴷ ⵓⵎⵓⵍⵍⵉ ⵏ ⵓⴳⵔⴰⵡ ⵏ ⵉⵍⴻⵍⵍⵉⵜⵏ ⵅⴼ ⵜⵉⴽⴽⵉ ⵏ ⵓⵙⵖⵉⵎ.
ⴰⵙⵍⵎⴰⴷ ⵙⵓⴼⵢⴰⵏ ⵉⵄⵣⵓⵣⵏ ⵙⴳ ⵓⵏⴳⵔⴰⵡ ⴰⵏⴰⵎⵓⵔ ⵏ ⵉ ⵉⵎⵙⵙⵓⴳⵔⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵏ ⵉⵍⴻⵍⵍⵉⵜⵏ, ⵉⵙⴷⴷⵉⴷ ⴰⵏⴰⵔⵓⵣ ⵏ ⵓⵏⴳⵎⴰⵎ ⴳ ⵜⵏⴱⴰⴹⵜ ⵜⴰⵎⴰⵢⵏⵓⵜ, ⴷⴰ ⵉⵙⴽⵔⵏ ⴳ ⵓⵙⴷⴰⵡ ⵏ ⵜⵎⴰⵣⵉⵖⵜ ⵙⴳ ⵉⵙⵉⵣⵡⵔⵏ ⵏⵏⵙ, ⵍⵍⵉⵖ ⵜⵙⵡⴰⵍⴰ ⵜⴰⵎⵖⵏⴰⵙⵜ ⴰⵎⵉⵏⴰ ⴱⵏ ⵛⵛⵉⵅ ⵜⴰⵎⵛⵛⵉⵡⵕⵜ ⵏ ⵜⵏⵙⵙⵉⵅⴼⵜ ⵏ ⵜⵏⴱⴰⴹⵜ ⴳ ⵉⵙⴽⴽⵉⵏⵏ ⵏ ⵜⵎⴰⵣⵉⵖⵜ.
ⴳ ⵜⵙⴳⴰ ⵏⵏⵙ, ⵉⵙⵙⵔⵖⵓⴷ ⵎⴰⵙⵙ ⵄⴱⴷⵙⵙⵍⴰⵎ ⵅⴰⵍⴰⴼⵉ, ⴰⵎⵉⵏⴰ ⴱⵏ ⵛⵛⵉⵅ ⵅⴼ ⵓⴼⵙⵏⴰ ⵏⵏⵙ ⴰⵎⴰⵢⵏⵓ, ⴹⴰⵕⵜ ⵏⵏⵙ ⵉⵙⵏⴽⴷ ⴰⵙⴰⴽⴰ ⵏ ⵜⵙⵍⵎⴰⴷⵜ ⴼⴰⵟⵉⵎⴰ ⴰⴳⵏⴰⵡ, ⵉⵙⵙⵉⵎⵖⵓⵔ ⵙ ⵜⵉⵔⵎⵉⵜ ⵏⵏⵙ ⵜⴰⵔⵣⵣⵓⵜ, ⵍⵍⵉ ⵖ ⵜⴳⴰ ⵜⴰⵙⵎⴰⵔⵜ ⵜⴰⵎⵣⵡⴰⵔⵓⵜ ⵏ ⵓⵖⴰⵡⴰⵙ ⵏ ⵜⵎⴰⵣⵉⵖⵜ, ⵜⴳ ⵜⴰⵎⵖⵏⴰⵙⵜ ⴱⵕⵕⴰ ⵏ ⵜⵎⵔⵙⵍⵜ, ⵜⵓⴳⴳⴰ ⴷ ⴳ ⵢⵉⴳⵔ ⴰⴷ ⴷⴰⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵏⵏⴰ ⵎⴰⵙ ⴷ ⴰⵔ ⵜⵙⵡⵓⵔⵉ ⵙ ⵢⵉⴼⵙⵙⵉ, ⵜⵙⵔⵙ ⵉⵖⴰⵡⴰⵙⵏ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ ⵉ ⵉⵎⵇⵇⵔⴰⵏⵏ ⴷ ⵉⵎⵥⵥⵢⴰⵏⵏ, ⵖⵉⵍⴰ ⴷⴰⵔ ⵜⵙⵡⵓⵔⵉ ⵅⴼ ⵓⵙⵏⴼⴰⵔ ⵏ ⵓⵍⵎⵎⵓⴷ ‘’ⴰⵎⵓⴽ’’ ⵍⵍⵉ ⵉⴳⴰⵏ ⴰⵎⴰⵡⴰⵢ ⵉ ⴽⵓ ⵡⴰⴷ ⵉⵔⴰⵏ ⴰⴷ ⵉⵍⵎⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴷ ⵢⴰⵏⵏⵉ ⵓⵙⵍⵎⴰⴷ ⵅⴰⵍⴰⴼⵉ ⵎⴰⵙ ⴷ ⴰⵙⵏⴽⴷ ⵏ ⵜⵖⵔⵉ ⴳ ⵓⴷⵍⵉⵙ ⴰⴷ ⵓⵔ ⵜⴳⵓⵎ, ⵉⵎⵎⵔ ⴰⴷ ⵜⵙⵉⵡⵍⵜ ⵅⴼ ⵎⴰⴷ ⴰⴽⴽⵯ ⵢⵉⵡⵉ, ⵢⵓⵔⵎ ⴰⴷ ⵉⵙⵏⴽⴷ ⵜⵉⵏⴷⵉ ⵏ ⵓⴷⵍⵉⵙ ⴷ ⵜⵎⵓⴽⵔⵉⵙⵜ ⵏⵏⵙ ⴷ ⵉⵙⴳⵣⵍⵏ ⵉⵎⴰⵜⴰⵢⵏ. ⵉⴳⴰ ⵜ ⴷ ⵓⵙⴰⵖⵓⵍ ⴰⵏⴰⵎⵓⵔ ⴷ ⵓⵎⴰⴹⵍⴰⵏ ⴳ ⵜⵙⵖⵥⵏⵜ ⵏ ⵜⵎⴰⵣⵉⵖⵜ ⴳ ⵓⵙⵍⵎⴷ, ⵍⵍⵉ ⵖ ⵢⵓⵎⴰ ⴰⴳⵣⵣⵓⵎ ⵉⵎⵉⵥⵉⵕ ⴰⴳⵔⵥⵍⴰⵢ, ⵉⴼⵙⵔ ⵜⴰⵎⵓⴽⵔⵉⵙⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵉⴱⴹⵓ ⵜⴰⵎⵓⴽⵔⵉⵙⵜ ⴰⴷ ⵙ ⵜⵉⵢⵢⴰⴹ ⵜⴰⵢⵢⴰⵡⵉⵏ, ⵜⵙⵏⴰⵍ ⵅⴼ ⵜⵎⵢⴰⴷⴰⵙⵜ ⵜⴰⵙⴳⵓⵎⴰⵏⵜ ⵜⴰⵖⵣⵓⵔⴰⵏⵜ, ⴷ ⵓⴷⵍⵉⵙ ⴷ ⵜⴰⵢⴰⴼⵓⵜⵏ ⵜⵣⵔⴰⵡⵉⵏ ⵍⵍⵉ ⵢⴰⴷ ⵜⵙⵢⴰⴼⴰ ⴷ ⵜⵙⵉⵙⵜⴰⵏⵜ ⵏ ⵓⴱⴰⵔⴰⵣ, ⵜⵙⵡⵓⵔⵉ ⵅⴼ ⵓⵙⴼⵙⵉ ⵏ ⵉⴹⵕⵉⵚⵏ ⴷⴰ ⵉⴳⴰⵏ ⴰⵙⴰⵜⵉ ⵏ ⵓⵙⵍⵎⴷ ⴰⵏⴰⵎⵓⵔ, ⵉⵍⴽⵎ ⴳ ⵜⵖⵔⵉ ⵏⵏⵙ ⵙ ⵜⵓⵥⵍⴰⵢⵜ ⵏ ⵜⵎⴰⵣⵉⵖⵜ ⵎⴽⵍⵍⵉ ⵙ ⵜⴳⴰ ⵜⵓⵜⵍⴰⵢⵜ ⵜⴰⵏⴰⵎⵓⵔⵜ ⴷ ⵜⵓⵜⵍⴰⵢⵜ ⵏ ⵓⵏⵢⴰⵍⴽⴰⵎ ⵓⵔ ⴷ ⵜⵉⵏ ⵍⵄⵎⵎⴰⵕⵜ. ⵜⵙⵖⴰⵡⵙⴰ ⵙ ⵜⵙⴽⴼⵍⵜ ⵙ ⵜⴰⵢⵢⴰⴹ ⵃⵎⴰ ⴰⴷ ⵜⵉⵡⴹ ⵉⵙⵡⵉⵔⵏ ⴷ ⵡⴰⵢⵢⴰⵡⵏ, ⵉⴳ ⵓⴷⵍⵉⵙ ⵓⵎⵓⵖ ⴰⴱⵉⴱⵍⵢⵓⴳⵕⴰⴼⵉ ⴳ ⵓⴱⴰⵔⴰⵣ ⴰⴷ.
ⵉⵙⵙⵎⵜⵔ ⵉ ⵓⵚⴽⵓ ⴰⵙⴽⵯⴼⵍⴰⵏ ⴳ ⵓⵙⵡⵉⵔ ⵏ ⵓⵎⴰⵡⴰⵍ ⴷ ⵜⴳⵓⵔⵉⵡⵉⵏ ⵜⵉⵎⴰⵢⵏⵓⵜⵉⵏ, ⴷ ⵜⴱⵔⵉⴷⵜ ⵍⵍⵉ ⵔⴰⴷ ⵜⵜⵢⴰⵊⵊ ⴰⴷ ⵜⴳ ⵜⵉⵔⵙⵍⵜ ⵏ ⵜⵎⵢⴰⴷⴰⵙⵜ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ ⴱⵍⴰ ⵏⵙⵙⵉⵏⴼ ⵜⵓⵥⵍⴰⵢⵜ ⵜⴰⵏⵎⵏⴰⴹⵜ, ⵉⵏⵏⴰ ⵅⴰⵍⴰⴼⵉ ⵎⴰⵙ ⴷ ⴰⴷⵍⵉⵙ ⴰⵔ ⵉⵙⵙⵏⴽⴰⴷ ⵉⴼⵔⵓⵔⵉⵜⵏ ⵉⵍⴰⵏ ⵜⵉⵏⴷⵉ ⴳ ⵉⵙⵡⵉⵔⵏ ⴰⴽⴽⵯ. ⴷ ⵓⴷⵍⵉⵙ ⴰⵔ ⵉⵙⵙⵉⵙⴼⵉⵡ ⴰⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵉⵎⵥⵥⵢⴰⵏⵏ, ⵉⴳ ⵜⵉⴼⴰⵡⵜ ⵉ ⵓⵙⵙⴼⵔⵓ ⴷ ⵓⵙⵙⵉⵙⴼⵉⵡ ⵏ ⵉⵎⵉⵙⵙⵏ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ.
ⴳ ⵜⵙⴳⴰ ⵏⵏⵙ, ⵉⵙⵙⵔⵖⵓⴷ ⵎⵓⵚⵟⴰⴼⴰ ⵓⵎⵎⵓⵛ, ⴰⵎⵉⵏⴰ ⴱⵏ ⵛⵛⵉⵅ ⵅⴼ ⵓⴹⴼⵓⵕ ⵏ ⵓⴼⵓⵖ ⵏ ⵓⵖⵎⵉⵙ ⴰⵎⴰⴷⴰⵍ ⴰⵎⴰⵣⵉⵖ ⴷ ⵜⵢⴰⴼⵓⵜ ⵏⵏⵙ ⵜⴰⵖⵏⵙⴰⵏⵜ, ⵉⵙⵙⵉⵎⵖⵓⵔ ⵙ ⵎⴰⵙⵙⴰ ⴼⴰⵟⵉⵎⴰ ⴰⴳⵏⴰⵡ ⵅⴼ ⵓⵔⵣⵣⵓ ⵏⵏⵙ, ⵉⵙⴰⵡⵍ ⵅⴼ ⵓⵙⴷⵉⴷⴷⵉⵢ ⵏ ⵓⵏⵖⵓⴱⵓ ⴽⵔⴰ ⵏ ⵡⴰⵢⵢⴰⵡⵏ ⵏ ⵜⵎⴰⵣⵉⵖⵜ, ⵉⵙⴷⴷⵉⴷ ⵅⴼ ⵓⴼⵙⵙⴰⵢ ⵎⴰⵙ ⵜ ⵉⴳⴰ ⵓⵙⵍⵎⴷ.
ⴳ ⵓⵙⵜⴰⵍ ⵏⵏⵙ ⵉ ⵓⴷⵍⵉⵙ ‘ⵜⴰⵎⴰⵣⵉⵖⵜ ⴳ ⵓⵙⵍⵎⴷ ⴷⵉ ⵍⵎⵖⵔⵉⴱ, ⵉⵙⵉⵜⴳ ⵜ ⵓⵎⵎⵓⵛ ⵉⵙ ⵉⴳⴰ ⴰⴷⵍⵉⵙ ⵉⵙⵎⴷⵏ, ⵙⵍⴰⵡⴰⵏ ⴰⴽⴽⵯ ⴹⴰⵕⵜ ⵏ 20 ⵏ ⵓⵙⴳⴳⵯⴰⵙ ⵅⴼ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵏⵜⵜⴰ ⴷ ⴰⵙⵜⴰⵍ ⵢⵓⵎⴰⵏ ⵉ ⵜⵉⵔⵎⵉⵜ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ ⴷⵉ ⵍⵎⵖⵔⵉⴱ, ⵉⵙⴰⵡⵍ ⵅⴼ ⵜⵉⵔⵎⵉⵜⵉⵏ ⴷⴰ ⵉⵙⴽⵔ ⵢⴰⵏ ⵓⵙⴳⵓⴷⵉ, ⵉⵙⴷⴷⵉⴷ ⵅⴼ ⵜⵉⵏⴷⵉ ⵏ ⵓⵏⵏⵓⵕⵥⵎ ⵅⴼ ⵜⵉⵔⵎⵉⵜⵉⵏ ⵜⵉⵎⵣⵡⴰⵔ ⴳ ⵢⵉⴳⵔ ⴰⴷⵅⴼ ⵓⵙⵡⵉⵔ ⴰⵎⴰⴹⵍⴰⵏ, ⵉⴱⴷⴷ ⵅⴼ ⵉⵎⵓⴽⵔⵉⵙⵏ ⴷⴰ ⵉⵙⴱⴰⵢⴹⵕⵏ ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵜⵓⵜⵍⴰⵢⵉⵏ ⵢⴰⴹⵏ ⴳ ⵍⵎⵖⵔⵉⴱ, ⵉⵏⵏⴰ ⵎⴰⵙ ⴷ ⴰⵎⵓⴽⵔⵉⵙ ⴰⴷ ⴷⴰ ⴰⵖ ⵉⵜⵜⴰⵡⵉⵙ ⵜⵎⵓⴽⵔⵉⵙⵜ ⵏ ⵓⴷⵍⵉⵙ, ⴷ ⵓⵙⵙⵉⵏⴼ ⵏ ⵛⴰ ⵏ ⵜⵏⵜⵍⴰⵢⵉⵏ ⴰⵎ ⵜⵉⵏ ⴼⵉⴳⵉⴳ, ⵉⵙⴰⵡⵍ ⵓⵎⵎⵓⵛ ⵅⴼ ⵓⵙⵓⵖⵏ ⵏ ⵓⴼⵔⴰⴳ ⵏ ⵜⵓⵥⵍⴰⵢⵉⵏ ⵜⵉⵏⵎⵏⴰⴹⵉⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵉⵙⴰⵡⵍ ⵅⴼ ⵓⵎⴰⵟⵍ ⵏ ⵜⵎⵀⵍⵜ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ, ⵉⴳ ⵏⵡⵉⵔⵔⵉ ⵙ ⵉⵙⵉⵟⵟⵏ ⵉⵎⴰⴷⴷⵓⴷⵏ, ⵏⵙⵙⴹⴼⵕ ⵓⵍⴰ ⴰⴽⵓⴷ ⵏ ⵓⵙⵍⵎⴷ, ⴷ ⵡⴰⵔ ⵜⵉⵍⵉⵜ ⵏ ⵜⵎⵙⵙⴽⵜⵉⵜ ⵜⴰⵙⵏⵎⴰⵍⴰⵢⵜ.
ⵉⴼⵙⵔ ⵓⵎⵎⵓⵛ ⴰⵙⵏⵜⵔ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵜⵜⵔ ⵜⴰⵎⴰⵡⴰⵙⵜ ⴰⴷ ⵜⴼⵙⵉ ⵜⴰⵎⵓⴽⵔⵉⵙⵜ ⴰⴷ, ⴷ ⵓⵃⵉⵢⵢⵍ ⵏ ⵜⴷⴰⵍⴰ ⵏ ⵓⵙⵍⵎⴰⴷ ⵏ ⵜⵎⴰⵣⵉⵖⵜ, ⴷ ⵓⵖⵕⵕⴹ ⵏ ⵜⵉⵣⵉ ⵏ ⵓⵙⵍⵎⴷ, ⵡⴰⵅⵅⴰ ⵓⵎⵎⵉⵥⵏ ⴷ ⵉⵙⴳⵓⴷⵉⵢⵏ ⴷⴰ ⵉⵍⵍⴰⵏ, ⵎⴰⵛⵛ ⵜⵓⵜⵍⴰⵢⵜ ⴰⴷ ⵜⵙⵖⴰⵡⵙⴰ ⵙ ⵓⵣⵣⵉⴳⵣ ⵏⵏⵙ, ⴷ ⴳ ⵓⵙⴰⵜⵉ ⵏ ⵉⵙⵖⵍⴰⴼ, ⵉⵙⴷⴷⵉⴷ ⵅⴼ ⵓⵙⵓⵖⵏ ⵏ ⵡⴰⵍⴰⵙ ⵏ ⵜⴰⵢⵎⵓⵏⵜ ⵉⵙⵏⵎⴰⵍⴰⵏ ⴰⵙⵍⵎⴷ ⵏ ⵜⵎⴰⵣⵉⵖⵜ, ⴷ ⵓⵙⵍⵎⴷ ⵏⵏⵙ ⵖ ⵉⵙⵡⵉⵔⵏ ⴰⴽⴽⵯ ⵖ ⵓⴳⵏⵙ ⵏ ⵡⴰⵎⵓⵔ ⴷ ⵉ ⵜⴰⵔⵡⴰ ⵏ ⵉⵎⵖⵕⴰⴱⵉⵢⵏ ⵏ ⴱⵕⵕⴰ, ⴷ ⴳ ⵉⵙⴰⴽⴰⵜⵏ ⵏ ⵓⵙⵍⵎⴷ ⵓⵙⵍⵉⴳ ⴷ ⵉⴽⴰⴱⴰⵕⵏ ⵉⴱⵕⵕⴰⵏⵉⵢⵏ, ⴷ ⵓⵙⵡⵓⵔⵉ ⵏ ⵉⵙⵍⵎⴰⴷⵏ ⵢⴰⴹⵏ ⴷ ⵓⵃⵉⵢⵢⵍ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⵃⵎⴰ ⴰⴷ ⵢⵉⵍⵉ ⵓⵙⵖⵓⴷⵓ ⵏ ⵓⵙⵍⵎⴷ, ⴷ ⵓⵙⴷⵖⵉ ⵏ ⵉⴷⵍⵉⵙⵏ ⵉⵏⵎⵍⴰⵏⵏ ⵙ ⴰⵢⵍⵍⵉ ⴷ ⵉⵎⵙⴰⵙⴰⵏ ⴷ ⵓⵡⵏⵏⵉ ⵏ ⵜⵎⵏⴹⴰⵡⵜ ⴷ ⵜⵓⵙⵙⵏⴰ ⵜⴰⵎⵖⵔⵉⴱⵉⵜ, ⴷ ⵜⵙⵖⵥⵏⵜ ⵏ ⵡⴰⵙⵙ ⵏ ⵢⵉⵏⴰⵡ ⵏ ⵓⵊⴷⵉⵔ ⴰⵙⵙ ⴰⵏⴰⵎⵓⵔ ⴰⴷ ⵙⵔⵙ ⵏⵙⴼⵓⴳⵍⵓ ⵙ ⵜⵉⵍⴰⵍ ⵜⵉⵎⴰⵣⵉⵖⵉⵏ ⵉⵎⵎⴰⵍⵏ ⵙ ⵜⴷⵓⴳⴰⵎⵜ ⵏ ⵡⴰⵙⵙ ⵉ ⵉⵎⴰⵣⵉⵖⵏ ⴰⴽⴽⵯ.
ⵜⵙⵏⵉⵎⵎⵔ ⵜⵙⵍⵎⴰⴷⵜ ⴼⴰⵟⵉⵎⴰ ⴰⴳⵏⴰⵡ ⴰⵖⵎⵉⵙ ‘’ⴰⵎⴰⴹⴰⵍ ⴰⵎⴰⵣⵉⵖ’’ ⴷ ⵎⴰⵙⵙⴰ ⴰⵎⵉⵏⴰ ⴱⵏ ⵛⵛⵉⵅ ⵅⴼ ⵜⵙⵏⵜⴰⵢⵜ ⴰⴷ, ⵜⵙⴷⴷⵉⴷ ⵅⴼ ⵜⵉⵔⴰⵜ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ ⴷⴰ ⵢⵓⵊⵊⴰⵏ ⵜⴰⵎⴰⵣⵉⵖⵜ ⴰⴷ ⵜⵉⵡⴹ ⴰⵙⵡⵉⵔ ⵏⵖⵉⵍⴰ ⴷ, ⵜⵏⵏⴰ ⵎⴰⵙ ⴷ ⴰⵙⵍⵎⴷ ⵏ ⵜⵎⴰⵣⵉⵖⵜ ⵎⵓⵏⵏ ⴷⵉⴷⵙ ⵉⵎⵓⴽⵔⵉⵙⵏ, ⵎⴰⵛⵛ ⴷⴰⵔⵙ ⵖⵉⵍⴰ ⴷ ⵜⴰⴱⵉⴷⴰⴳⵓⵊⵉⵢⵜ ⴷ ⵓⴷⵍⵉⵙ ⴰⵏⵎⵍⴰⵏ ⴷ ⵜⴷⵉⴷⴰⴽⵜⵉⴽⵉⵜ ⴷ ⵓⵙⵍⵎⴰⴷ ⵏⵏⵙ, ⵜⴰⵎⴰⵖⵉⵔⵜ ⵜⵍⴽⵎ ⵢⴰⵏ ⵓⵙⴰⴽⴰ ⵉⴼⵓⵍⴽⵉⵏ, ⵜⵉⵍⵉ ⴳ ⵉⴼⴰⵙⵙⵏ ⵉⵏⴼⵍⴰⵙ, ⵜⵙⴳⵓⴷⵉ ⵜⵉⵔⵎⵉⵜ ⵎⵇⵇⵓⵔⵏ ⴳ ⵢⴰⵜ ⵜⵉⵣⵉ ⵜⴰⵏⴰⵎⵎⴰⵙⵜ, ⵜⵙⴷⴷⵉⴷ ⵎⴰⵙ ⴷ ⴰⵔⵣⵣⵓ ⴰⴷ ⵉⴳⴰⵏ ⴰⴼⵙⵙⴰⵢ ⴰⴷ ⵏⴷⴷⵓ ⵖⵔ ⴷⴰⵜ, ⵎⴽⵍⵍⵉ ⴷ ⵉⵇⵇⴰⵏ ⵅⴼ ⵜⵣⵎⵎⴰⵔ ⵜⵉⵄⵔⵔⵉⵎⵉⵏ ⴰⵍⵜⴰⵖ ⵏⵏⵙⵏⵜ ⴳ ⵓⵙⵏⴼⴰⵔ ⴰⴷ ⴰⵏⴰⵎⵓⵔ.
ⴰⵏⵇⵇⵉⵙ: ⵄⴰⴱⴷⵍⵡⴰⵃⵉⴷ ⴱⵓⵜⴱⴰⵖⴰ
