ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
« ⵜⴰⵎⴰⵣⵉⵖⵜ ⴷ ⵉⵙⵇⵙⵉⵜⵏ ⵏ ⵉⵎⴰⵍ » ⵜⵉⵏⴰⵡⵜ ⴰⴷ ⵔⴰⴷ ⴽⵉⵣ ⴰⵡⵙⵏ ⵉⵡⵔⵉⴽⵏ ⴷ ⵉⵎⵔⵙⴰⵍ ⴷ ⵜⵎⵔⵙⴰⵍ ⵏ ⵜⵎⴰⵣⵉⵖⵜ ⴷ ⴽⵔⴰ ⴳ ⵉⵇⴱⵓⵔⵏ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵏⴰ ⵜⴰⵎⴰⵣⵉⵖⵜ ⴷ ⵉ ⵙⵍⵡⴰⵢⵏ ⵏ ⵜⵉⵎⵔⵙⴰⵍ ⵣⴷⵉⵏⵉⵏ ⴷ ⵜⵎⴰⵣⵉⵖⵜ.
ⴰⵙ ⵏ ⴰⵚⵉⴹⵢⴰⵙ 17 ⵢⵓⵍⵢⵓⵣ ⵜⵉⵣⵉ ⵜⵉⵙ ⴽⵔⴰⵟ ⵏ ⵜⴰⵣⵡⵉⵜ ⴳ ⵓⴷⵖⴰⵔ ⵏ ⵜⴰⵙⴷⵍⵉⵙⵜ ⵜⴰⵏⴰⵎⵓⵔⵜ ⴳ ⵕⴱⴰⵟ.
ⵜⵉⵕⵉⵕⴹⵜ ⵏ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵜⴰⵎⴰⵣⵉⵖⵜ ⴷ ⵉⵙⵇⵙⵉⵜⵏ ⵏ ⵉⵎⴰⵍ
ⵎⵇⵇⴰⵔ ⵣⵔⵉⵏ ⵎⵔⴰⵡ ⵉⵙⴳⴳⵯⴰⵙⵏ ⴼ ⵓⵙⵜⴰⵢ ⵏ ⵉⵎⵖⵔⵉⴱⵉⵢⵏ ⵏ ⵓⴷⵓⵙⵜⵓⵔ ⵏ 1 ⵢⵓⵍⵢⵓⵣ ⵏ ⵓⵙⴳⴳⵯⴰⵙ ⵏ 2011, ⵍⵍⵉ ⵉⵏⵏⴰⵏ ⴳ ⵓⵎⴰⴳⵔⴰⴷ ⵏⵏⵙ ⵡⵉⵙ ⵙⵎⵎⵓⵙ ⵎⴰⵙ ⵜⴳⴰ ⵜⵎⴰⵣⵉⵖⵜ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵉⵖⴰⵎⴰ ⵓⴽⴰⵏ ⵓⴽⴰⴱⴰⵕ ⵏ ⵢⵉⵙⴽⵉⵍ ⵏ ⵜⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⵉⴼⴰⵡⵏ ⴳ ⵜⵓⴷⵔⵜ ⵜⴰⵎⴰⵜⴰⵢⵜ ⴰⵔ ⵉⵣⵣⵉⴳⵉⵣ ⵜⴰⵡⴰⴷⴰ ⵏ ⴱⵓⵜⴳⵔⴰ ⴳ ⵓⵎⵏⵉⴷ ⵏ ⵉⵎⵙⴼⴰⵍⵏ; ⴷ ⵓⵖⵓⵍ ⵙ ⵜⵖⵔⴷⵉⵏ ⵖⵔ ⵡⴰⵔⵉⵎⵙⴼⴰⵍⵏ ⵖ ⵉⵎⵖⵏⴰⵙⵏ ⵉⵎⴰⵣⵉⵖⵏ ⴷ ⴽⵓ ⵉⴷⵉⵎⵓⵇⵔⴰⵟⵉⵢⵏ ⵔⴰⵏⵉⵏ ⵉⵙⴽⵉⵍ ⴰⵣⵔⴼⴰⵏ ⵏ ⵜⵎⴰⵣⵉⵖⵜ ⵙ ⵎⴰⵕⵕⴰ ⵉⵎⵏⴰⴷⵏ ⵏⵏⵙ.
ⵎⵇⵇⴰⵔ ⵜⴻⵟⵟⴰⴼ ⵜⴻⵜⴳⴰⵔⵜ ⵜⴰⴷⵙⵜⴰⵔⵜ ⴷ ⵓⵙⵍⴳⵏ ⴰⵎⴰⴷⴷⴰⵙ ⴼ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴰⵜⵉⴳ ⴰⵙⵜⵔⴰⵜⵉⵊⵉ ⴳ ⴽⵓ ⵉⵙⵡⵉⵔⵏ ⵉ ⵜⵎⴰⵣⵉⵔⵜ ⵏⵏⵖ, ⵎⴰⵛⴰ ⵙⵖⴰⵡⵙⴰⵏ ⵓⴽⴰⵏ ⵙⵓⵍ ⵙ ⵡⴰⵡⵏⴰⴹ ⴰⵙⵔⵜⴰⵏ ⵍⵍⵉ ⵔⴰⴷ ⵜⵏ ⵉⵃⴹⵓ ⴷ ⵢⴰⵜ ⵜⴱⵖⵙⵜ ⵖ ⵜⵖⵜⴰⵙⵜ ⴷ ⵜⵎⴰⵙⴰⵢⵜ ⵖ ⵜⵎⵙⴽⵔⵜ ⴷ ⵓⵣⴷⴰⵢ ⵊⴰⵔ ⵜⵉⵔⵉⵜⵉⵏ ⴷ ⵜⵎⵙⴽⴰⵔ. ⴽⵉⴳⴰⵏ ⵏ ⵉⴷ ⴱⴰⴱ ⵏ ⵜⵙⵔⵜⵉⵜ ⴷⴰ ⵓⴽⴰ ⵜⵜⵏⵢⴰⵍⴽⴰⵎⵏ ⴷ ⵓⵙⵏⵜⵍ ⵙ ⴽⵉⴳⴰⵏ ⵏ ⵜⵎⴽⵢⴰⴷⵜ ⴷ ⵜⵉⵔⵎⵉⵜⵉⵏ ⴷ ⵜⵎⴰⵖⵜ ⴼ ⵉⴷⵖⴰⵔⵏ, ⵖⵎⴽ ⴰⵏⵏ ⵓⵍⴰ ⴷ ⵉⴷ ⴱⴰⴱ ⵏ ⵡⴰⵎⵓⵏ ⴰⵖⵔⵎⴰⵏ.
ⴳ 2019, ⵍⵍⵉⵖ ⵉⵍⵍⴰ ⵓⵙⵖⵣⵏ ⵏ ⵓⵙⵍⴳⵏ ⴰⵎⴰⴷⴷⴰⵙ 26/16 ⴼ ⵓⵙⵔⵙ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵓⵙⵙⵍⵎⴷ ⴷ ⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵜⵉⵎⵣⵡⵓⵔⴰ, ⵇⵍⵏ ⵉⵎⵖⵔⵉⴱⵉⵢⵉⵏ ⴰⴷ ⵢⵉⵍⵉ ⵢⴰⵏ ⵓⵙⵏⴼⵍ ⵓⵎⵏⵉⴳ ⴳ ⵓⵏⵢⴰⵍⴽⴰⵎ ⵏ ⵜⵏⴱⴰⴹⵜ ⴰⴽⴷ ⵜⴰⵎⵙⴰⵔⵜ ⵜⴰⵎⴰⵣⵉⵖⵜ, ⵎⴰⵛⴰ ⵉⵜⵜⵓⵏⵏⴰ ⴰⵙⵏ ⴰⴷ ⵜⵜⵇⵍⵏ ⴰⵔ ⴷⴷ ⵉⴼⴼⵓⵖ ⵓⵙⵍⴳⵏ ⴰⵎⴰⴷⴷⴰⵙ 16/04 ⵉⵥⵍⵉⵏ ⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⵃⵎⴰ ⴰⴷ ⵉⵙⴷⵔⴼⵉ ⵜⵉⵔⴰⵜⵉⵏ.
ⵍⵍⵉⵖ ⵉⵜⵜⵓⵙⴽⴰⵔ ⵎⴰ ⴰⵏⵏ ⵙ ⵓⵙⵖⵣⵏ ⵏ ⵓⵎⵕⵚⵓⵎ 2.60.600 ⴼ ⵓⵙⵏⵎⴰⵍⴰ ⵏ ⵜⵙⵇⵇⵉⵎⵜ ⵜⴰⵎⴰⵡⵙⴰⵙⵜ ⵉⵙⵓⵍⵏ ⵉⵜⵜⵓⵙⵎⴰⴳⴰⵍⵏ ⵙ ⵓⴹⴼⵕ ⴷ ⵓⵣⵣⵔⴰⵢ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⵎⴰⵎⴽⵉⵏ ⵏ ⵓⵙⵡⵓⵔⵉ ⵏⵏⵙ, ⵖⴰⵎⴰⵏⵜ ⵜⵖⴰⵡⵙⵉⵡⵉⵏ ⵖⵎⴽ ⵍⵍⵉ ⴳⴰⵏⵜ, ⵓⵔ ⵣⵣⵉⴳⵣⵏⵜ ⵖⴰⵙ ⵙ ⵉⵎⵉⴽⴽ, ⵉⵖⴰⵎⴰ ⵓⵙⴷⴰⵡ ⴰⴷ ⵖ ⵉⵖⴰⵡⴰⵙⵏ ⵉⵎⴰⵡⵙⴰⵙⵏ ⴼ ⵓⵔ ⵉⵍⵍⵉ ⵓⵎⵢⴰⵡⴰⴹ ⵃⵎⴰ ⴰⴷ ⵉⵍⵉⵏ ⴷⴰⵔ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ, ⴹⴼⵕⵏ ⵉⵙ ⵣⵣⵉⴳⵣⵏ ⵏⵖ ⵓⵀⵓ.
ⵜⴰⵎⵓⴽⵔⵉⵙⵜ ⵏ ⵓⵎⵢⴰⵡⴰⴹ ⴼ ⵜⵎⵙⴰⵔⵉⵏ ⵏ ⵓⵙⵡⵓⴷⴷⵓ ⵓⵏⴱⵉⴹ ⵏ ⵓⵙⴷⴰⵡ, ⵜⵙⴽⵔ ⵖ ⵜⵙⵇⵇⵉⵎⵜ ⵜⴰⵜⵉⵇⵏⵉⵜ ⵉⵜⵜⵓⵙⵎⴰⴳⴰⵍⵏ ⵙ ⵓⴹⴼⵕ ⴷ ⵓⵣⵣⵔⴰⵢ ⴷ ⵜⵉⴹⴰⴼ ⵏ ⵜⵡⵡⵓⵔⵉ ⵏ ⵜⵏⴱⴰⴹⵜ ⴷ ⵓⵙⴽⵛⵎ ⵏ ⵜⵎⴰⵣⵉⵖⵜ, ⵢⴰⵏ ⵉⵎⵉⵙⵙ ⵏ ⵓⵙⵏⵎⴰⵍⴰ ⵎⵓ ⵓⵔ ⵜⵜⵓⵙⵙⴰⵏ ⵜⵎⴰⴳⵉⵜ ⵏⵏⵙ, ⵖⵎⴽ ⵍⵍⵉ ⵓⵔ ⴳⵉⵙ ⵍⵍⵉⵏⵜ ⵜⴼⴰⴷⵉⵡⵉⵏ ⴷⵔⵓⵙⵏⵉⵏ ⵏ ⵓⵏⴱⴰⴹ ⵉⵥⵉⵍⵏ ⵙ ⵜⵎⴰⴼⴰⵡⵜ ⴷ ⵓⵙⴷⵔⵓ ⵏ ⵉⵎⵙⴽⴰⵔⵏ ⵉⵖⵔⵎⴰⵏⵏ ⴷ ⵓⵣⴷⴰⵢ ⵊⴰⵔ ⵜⵎⴰⵙⴰⵢⵜ ⴷ ⵓⵚⵉⴹⵏ, ⴰⵢⵍⵍⵉ ⵢⵓⵊⵊⴰⵏ ⴰⴷ ⵓⵔ ⵢⵉⵍⵉ ⵓⵅⵎⵎⴻⵎ ⵖ ⵎⴰⴷ ⵜⵙⵙⴼⵓⵖ ⵙⴳ ⵜⵉⵣⵉ ⴰⵔ ⵜⴰⵢⵢⴰⴹ.
ⵉⵙⵎⴰⵟⵍ ⵓⵙⵓⵔⵙ ⴰⴷ ⴼ ⵉⵍⵍⴰ ⵓⵖⵉⵍⵓⴼ ⵜⴰⵣⵣⵉⴳⵣⵜ ⵏ ⵢⵉⵙⴽⵉⵍ ⵏ ⵜⵎⴰⵣⵉⵖⵜ, ⵉⵙ ⴰⴽⴽⵯ ⵉⵍⵍⴰ ⵓⵖⵓⵍ ⵖ ⴽⵉⴳⴰⵏ ⵏ ⵉⴳⵔⴰⵏ ⵍⵍⵉ ⴷⴷⴰⵔ ⵜⴰⵣⴷⴰⵢⵜ, ⵢⵉⵍⵉ ⴳⵉⵙⵏ ⵓⵙⴷⴰⵡ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉ ⵓⴽⴰⵏ ⵉⵜⵜⴰⴼⴰⵏ ⵜⵉⴱⴱⴰⵢⴹⴰⵕⵉⵏ ⴷ ⵓⵙⵡⵓⴷⴷⵓ ⴰⵏⵉⵎⴰⵏ ⵙⴳ ⴽⵔⴰ ⵏ ⵉⵎⵙⵜⴳⴳⴰⵔⵏ ⴳ ⵜⵎⴰⵡⴰⵙⵜ ⵉⵍⵍⴰⵏ ⴼ ⵢⵉⴳⵔ ⴰⴷ ⵖ ⵜⵎⵙⵙⵓⴳⵓⵔⵜ ⵜⴰⵏⴰⵎⵎⴰⵙⵜ ⵏⵖ ⵜⵉⴽⴰⴷⵉⵎⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵎⵀⵍⵉⵡⵉⵏ ⵏⵖ ⵜⵉⵏⵎⴰⵍ.
ⵉⴼⴰⵡ ⵎⴰⵙ ⴷ ⴰⵙⴷⴰⵡ ⵏ ⵓⵙⴷⴷⴻⴷ ⵏ ⵜⵎⴰⵣⵉⵖⵜ ⴷ ⵓⵙⵎⵔⵙⵍ ⵏⵏⵙ ⵉⵙⵖⴰⵡⵙⴰ ⵙ ⵓⵙⵍⴻⵍⵍⵉ ⵏ ⴽⵔⴰ ⵏ ⵉⵎⵙⵔⵜⴰⵏⵏ ⵙⴳ ⵉⵎⴰⵏⴷⵉⵡⵏ ⵍⵍⵉ ⴷ ⵉⵡⵉⵏⵉⵏ ⵜⵓⵙⵙⵔⴰ ⴷ ⵓⵙⵉⵜⵜⵉ ⵏ ⵜⵎⴰⵣⵉⵖⵜ ⴳ ⵜⵉⵍⴰⵡⵜ ⵙ ⴽⵔⴰ ⵏ ⵜⵎⵏⵜⵉⵍⵉⵏ, ⵉⴼⴰⵡ ⴳⵉⵙⵏⵜ ⵜⵉⴽⵚⵚⴰⴹ ⴰⴷ ⵓⵔ ⵜⴳ ⵜⵎⴰⵣⵉⵖⵜ ⵜⴰⴽⵏⴰ ⵏ ⵜⵎⴰⵣⵉⵖⵜ, ⵉⵜⵜⵓⵃⴹⴰ ⴳⵉⵙⵏⵜ ⵎⴰⴷ ⵉⵣⴷⵉⵏ ⵙ ⵉⵙⵏⴼⴰⵔⵏ ⵉⵙⵔⵜⴰⵏⵏ ⵣⵔⵉⵏⵉⵏ ⵉⵡⵜⵜⴰ, ⵍⵍⵉ ⵓⵔ ⴼⵔⴽⵏⵉⵏ ⵙ ⵓⵎⵣⵔⴰⵢ ⴷ ⵜⴷⵉⵎⵓⴽⵔⴰⵟⵉⵜ ⴰⴱⵍⴰ ⵙ ⵜⵉⵃⴹⵉⵜ.
ⵖⵎⴽ ⵍⵍⵉ ⵉⵙⵖⴰⵡⵙⴰ ⵓⵙⴷⴰⵡ ⵙ ⵉⵎⵙⴽⴰⵔⵏ ⵉⵖⵔⵎⴰⵏⵏ ⴷ ⵉⵙⵔⵜⴰⵏⵏ ⴼⵔⴽⵏⵉⵏ ⵙ ⵡⴰⵜⵉⴳ ⵏ ⵜⵎⴰⵣⵉⵖⵜ ⴳ ⵓⵎⵙⵓⵔⵓⴼ ⵏ ⵜⵎⵓⵔⵜ ⴷ ⵉⵅⴼ ⵏⵏⵙ ⴷ ⵓⵙⴷⵓⵙ ⵏ ⵜⵎⵢⵉⴷⵉⵔⵜ ⵉⵛⵛⴰⵔⵏ ⴷ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵜⵔⵙⵍⵜ ⵉⵙⵜⴰⵡⵀⵎⵎⴰⵏ ⴳ ⵓⵙⴽⵔ ⵏ ⵜⴳⵎⵉ ⴷ ⵜⵏⴼⵍⵉⵜ.
ⵉⴳⴰ ⵓⵏⵎⵓⵇⵇⴰⵔ ⵏⵏⵖ ⵏ ⵡⴰⵙⵙ ⴰⴷ ⵜⴰⵎⵍⴷⴰ ⵏ ⵓⵣⵣⵔⴰⵢ ⵏ ⵜⵢⴰⴼⵓⵜ ⵏ ⵓⵙⵡⵓⴷⴷⵓ ⵏ ⵓⵙⴷⴰⵡ ⴰⴷ ⴷ ⵓⴷⵔⵉⵣ ⵏⵏⵙ ⴼ ⵉⵎⴰⵍ ⵏ ⵜⵣⵣⵉⴳⵣⵜ ⵏ ⵓⵙⴷⴷⴻⴷ ⴷ ⵓⵙⵎⵔⵙⵍ ⵏ ⵜⵎⴰⵣⵉⵖⵜ, ⵖⵎⴽ ⵍⵍⵉ ⵉⴳⴰ ⵉⵥⵕⵉ ⵙ ⵉⵎⴰⵍ. ⵉⵥⴹⴰⵕ ⵓⵣⴽⴽⴰ ⴰⴷ ⵉⵥⵉⵍ ⵙ ⵜⵉⵔⴰⵜ ⵏⵏⵓⵏ ⵖ ⵜⵣⵣⵉⴳⵣⵜ ⵙ ⵓⵙⴷⴰⵡ ⴰⴷ ⵎⵇⵇⴰⵔ ⵍⵍⴰⵏ ⵉⵛⵍⵍⵉⵇⵏ ⵏ ⵜⵏⵣⴱⴰⵢⵜ ⴷ ⵡⴰⴳⴳⴰⴹⵏ ⵏ ⵓⵖⵓⵍ.
