ⴰⵏⵎⵓⵇⵇⴰⵔ ⵏ ⵜⵖⵓⵔⵉ ⵅⴼ ⵢⵉⵎⵔⵙⵉ « ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵉⵖⵉⵙⵜ ⵜⴰⵎⵍⵥⴰⵢⵜ: ⵜⵉⵍⴰⵡⵜ ⴷ ⵉⴷⵉⵔⵏ »

ⵉⵙⵏⵎⴰⵍⴰ ⵡⴰⵎⵎⴰⵙ ⵜⵉⵙⴰⵍ ⵏ ⵓⵙⵓⵖⵍ ⴷ ⵜⵥⵕⵉⴳⵜ ⴷ ⵓⵙⵏⴼⵍⵓⵍ ⴰⵎⵓⵟⵟⵓⵏ ⴰⵎⴰⵣⵉⵖ ⵢⴰⵏ ⵓⵏⵎⵓⵇⵇⴰⵔ ⵏ ⵜⵖⵓⵔⵉ ⵅⴼ ⵢⵉⵎⵔⵙⵉ  » ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵉⵖⵉⵙⵜ ⵜⴰⵎⵍⵥⴰⵢⵜ: ⵜⵉⵍⴰⵡⵜ ⴷ ⵉⴷⵉⵔⵏ », ⴰⵙⵙ ⵏ ⵓⵙⴰⵎⴰⵙ 16 ⵛⵓⵜⴰⵏⴱⵉⵔ 2974, ⴳ ⵓⵙⴰⵢⵔⴰⵔ ⴱⴰⵢⵎⵓⵃ, ⴳ ⵜⵖⵔⵎⵜ ⵏ ⵜⵣⵏⵉⵜ.

ⵉⴷⴷⴰ ⴷ ⵓⵏⵎⵓⵇⵇⴰⵔ ⴰⴷ ⵉⵎⵙⴰⵙⴰⵏ ⴰⴽⴷ ⵜⵎⵙⴽⵉⵔⵜ ⵏ ⵡⴰⵎⵎⴰⵙ ⵜⵜ ⵉⴳⴰⵏ ⴷ ⴰⴷ ⵉⵙⴱⵓⵖⵍⵓ ⴰⵥⵏⵥⵕ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⴰⴷ ⵜⵉⵍⵉ ⵙ ⵡⵓⴷⵎ ⵉⵙⵓⴳⵔⵏ ⴳ ⵉⵎⴰⵙⵙⵏ ⵉⵎⵓⵟⵟⵓⵏⵏ. ⴰⵏⵎⵓⵇⵇⴰⵔ ⴰⴷ, ⵉⵡⴰⵜⵙ ⴰⴷ ⵉⴳⵔ ⴰⵙⵉⴷⴷ ⵅⴼ ⵜⵉⵍⴰⵡⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵎⵢⴰⵙⵙⴰ ⵏⵏⵙ ⴰⴽⴷ ⵜⵉⵜⵉⵇⵏⵉⵢⵉⵏ ⵏ ⵜⵉⵖⵉⵙⵜ ⵜⴰⵎⵍⵥⴰⵢⵜ, ⵙ ⵓⵙⴷⵉⴽⵏ ⵅⴼ ⵜⵎⴰⵎⴽⵜ ⵙ ⵔⴰⴷ ⵜⴱⵖⵔ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⵣⵣⵉⴳⵣⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⴷ ⵉⵣⵎⵣⵣⴰ ⵏⵏⴰ ⴰⴽⴽⴰⵏⵜ. ⵏⵏⵉⴳ ⵅⴼ ⵜⵉⴽⴽⵉ ⵏ ⵉⵙⵖⵍⴰⴼ ⵏⵏ ⵉⵙⵙⵉⴳⴳⵏ ⵉⴷⵉⵔⵏ ⵏ ⵓⵙⵎⵔⵙ ⵉⵕⵡⴰⵏ ⵏ ⵜⵉⵜⵉⵇⵏⵉⵢⵉⵏ ⵏ ⵜⵉⵖⵉⵙⵜ ⵜⴰⵎⵍⵥⴰⵢⵜ ⴷ ⵉⵎⴰⵙⵙⵏ ⵏ ⵓⵙⴷⵓⵙ ⵏⵏⵙ ⴰⴼⴰⴷ ⴰⴷ ⴷ ⵉⵏⵏⴰⵍ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.

ⴰⵏⵎⵓⵇⵇⴰⵔ ⴰⴷ, ⴷⵔⵓⵏ ⴳⵉⵙ ⵉⵎⵔⵣⵓⵜⵏ ⴷ ⵉⵎⵥⵍⴰⵢⵏ ⴷ ⵉⵎⵏⵜⴰⵢⵏ ⵜⵜ ⵢⵉⵡⵉⵏ ⴳ ⵉⴳⵔⴰⵏ ⵉⵣⴷⵉⵏ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵉⵜⵉⵇⵏⵉⵢⵉⵏ ⵏ ⵜⵖⵉⵙⵜ ⵜⴰⵎⵍⵥⴰⵢⵜ. ⴳ ⴱⴷⴷⵏ ⵉⵎⴷⵔⴰⵡⵏ ⵅⴼ ⵜⵉⵍⴰⵡⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⴰⴷ ⴷ ⵜⵙⵉⵡⴰⵖ ⴰⵙ ⵉⵎⴷⴷⵉⵏ. ⴳ ⵜⴳⵉⵡⵔⵜ ⵜⴰⵎⵣⵡⴰⵔⵓⵜ ⵏ ⵓⵏⵎⵓⵇⵇⴰⵔ, ⵜⵜⵡⴰⵙⵏⴽⴷⵏ ⴳⵉⵙ ⴽⵕⴰⴹ ⵉⴼⵙⴰⵔⵏ. ⴰⵎⵣⵡⴰⵔⵓ ⵏⵏⵙⵏ ⵉⵙⵙⵏⴽⴷ ⵜ ⵎⴰⵙⵙ ⵙⴰⵄⵉⴷ ⵍⴼⵔⴷⴰⵡⵙ ⵉⴳⴰⵏ ⴰⵎⵜⵡⴰⵍ ⵏ ⵓⵡⴰⵏⴽ, ⵉⴳ ⴰⵎⵔⵣⵓ ⴳ ⵉⵕⵓⴱⵓⵜⵏ ⴷ ⵉⵙⵓⴽⴰⵏ ⵉⵎⵉⵖⵉⵙⵏ; ⵅⴼ « ⵜⴰⵜⵉⴽⵏⵓⵍⵓⵊⵉⵜ ⵏ OCR ⴷ ⵜⵉⵍⴰⵍⵜ ⵏⵏⵙ ⴳ ⵓⵙⴷⵓⵙ ⵏ ⵜⵉⵍⵉⵜ ⵏ ⵜⴼⵉⵏⴰⵖ ⴳ ⵢⵉⴳⵔ ⴰⵎⵓⵟⵟⵓⵏ ». ⴰⴼⵙⴰⵔ ⵡⵉⵙ ⵙⵉⵏ ⵏ ⵎⴰⵙⵙ ⴱⵕⴰⵀⵉⵎ ⵙⵙⵄⵉⴷⵉ ⵉⴳⴰⵏ ⴰⵎⵙⵙⵓⴳⵓⵔ ⴳ ⵡⵉⴽⵉⴱⵉⴷⵢⴰ ⵜⴰⵎⴰⵣⵉⵖⵜ, ⵢⵉⵡⵉ ⴷ ⵅⴼ « ⵜⵉⵍⴰⵍⵜ ⵏ ⵡⵉⴽⵉⴱⵉⴷⵢⴰ ⴳ ⵓⵙⴷⵓⵙ ⵏ ⵜⵎⴰⵣⵉⵖⵜ ⴳ ⵢⵉⴳⵔ ⵏ ⵜⵖⵉⵙⵜ ⵜⴰⵎⵍⵥⴰⵢⵜ ». ⴳ ⵓⴼⵙⴰⵔ ⵡⵉⵙ ⴽⵕⴰⴹ, ⵉⵙⴰⵡⵍ ⵎⴰⵙⵙ ⵙⴰⵄⵉⴷ ⵟⵟⴰⵍⵉⴱⵉ ⵉⴳⴰⵏ ⴰⵎⵙⵖⵉⵡⵙ ⴰⵙⵏⵎⴰⵍⴰⵢ ⵅⴼ « ⴰⴼⴰⵔⵙ ⴰⵎⵥⴰⵡⴰⵏ ⴰⵎⴰⵣⵉⵖ ⴷ ⵉⵎⴰⵙⵙⵏ ⵏ ⵜⵖⵉⵙⵜ ⵜⴰⵎⵍⵥⴰⵢⵜ ». ⴳ ⵎⴰ ⴰⴷ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⵏⵎⵓⵇⵇⴰⵔ, ⵉⵙⴽⵔ ⵜ ⵎⴰⵙⵙ ⵎⵓⵃⵎⵎⴰⴷ ⴱⵓⵜⴰⵏⵓⵜ ⵉⴳⴰⵏ ⴰⴳⵎⴰⵎ ⴳ ⵡⴰⵎⵎⴰⵙ ⵏ ⵜⵉⵙⴰⵍ.

ⴳ ⵜⴳⵉⵡⵔⵜ ⵜⵉⵙ ⵙⵏⴰⵜ ⵏ ⵓⵏⵎⵓⵇⵇⴰⵔ, ⵉⵍⵍⴰ ⵓⵙⵏⴽⴷ ⴷ ⵓⴱⵔⵔⵃ ⵙ ⵓⵕⵥⵥⵓⵎ ⴰⵎⴰⴷⴷⵓⴷ ⵏ ⵓⵙⵉⵜ tifinagh OCR ⵏⵏⴰ ⵉⵙⴽⵔ ⵡⴰⵎⵎⴰⵙ ⵜⵉⵙⴰⵍ, ⵉⴱⴷⴷ ⴼⵍⵍⴰⵙ ⵓⵎⵜⵡⴰⵍ ⵙⴰⵄⵉⴷ ⵍⴼⵔⴷⴰⵡⵙ. ⴰⵙⵉⵜ ⴰⴷ, ⵢⵉⵡⵉ ⵅⴼ ⵜⴰⵜⵉⵇⵏⵉⵜ ⵏ ⵢⵉⴽⵣ ⴰⵎⵡⴰⵍⴰⵏ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⵏⵏⴰ ⵉⵜⵜⴰⵊⵊⴰⵏ ⴰⵙⵎⵔⴰⵙ ⴰⴷ ⵉⵙⵎⵓⵜⵜⵉ ⵜⵓⴳⵜⵜ ⵏ ⵡⴰⵔⵔⴰⵜⵏ (pdf, png, jpg…) ⵖⵔ ⵜⵉⵔⵔⴰ.

ⵙⵎⴷⵏⵜ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⵙ ⵢⴰⵜ ⵜⴳⵉⵡⵔⵜ ⵏ ⵜⵉⴽⴽⵉ ⵏ ⵜⵏⴰⵟⵟⵓⴼⵉⵏ ⴷ ⵉⵙⵖⵍⴰⴼ ⴷ ⵢⵉⵡⵉⵏ ⵅⴼ ⵙⵎⵎⵓⵙⵜ ⵜⵏⵇⵇⴰⴹ ⵜⵉⴷⵙⵍⴰⵏⵉⵏ:

• ⴰⴷ ⵢⵉⵍⵉ ⵡⴰⵡⵡⴰⵙ ⴳ ⵓⵙⴽⴽⵉⵔ ⴷ ⵜⵙⵉⵍⴰⵡⵜ ⴷ ⵓⵙⵏⵢⵓⴷⴷⵓ ⵏ ⵢⴰⵜ ⵜⵙⵉⵍⴰ ⵏ ⵉⵙⴼⴽⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵎⵉ ⵉⵕⵥⵎ ⵓⵙⴰⴳⵎ, ⵜⴳ ⵜⵉⵏ ⵎⵏⵏⴰⵡ ⵉⵎⴰⵙⵙⵏ;
• ⴰⴷ ⵉⵜⵜⵡⴰⵥⵍⴰⵢ ⵓⵥⵕⴼ ⵉⴷⴷⵣⵏ, ⵙⴳ ⴷⴰⵔ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⵜⵉⵎⵥⵍⴰⵢⵉⵏ, ⵉ ⵉⵙⵖⵏⵓⵜⵏ ⵉⵎⵏⴰⴷⵏ ⴰⴷ ⵙⴷⵓⵙⵏ ⵜⵉⵍⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⴰⵎⵓⵟⵟⵓⵏ ⴷ ⵜⵉⵜⵉⵇⵏⵉⵢⵉⵏ ⵏ ⵜⵖⵉⵙⵜ ⵜⴰⵎⵍⵥⴰⵢⵜ;
• ⴰⴷ ⵜⵉⵍⵉ ⵜⵡⵓⵔⵉ ⵅⴼ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵉⵏ ⵏ ⵓⴷⵔⴰⵡ ⴰⴽⴷ ⵉⵙⵓⵜⴰⵢ ⵉⵎⵎⵔⵡⴰⵙⵏ ⴰⴼⴰⴷ ⴰⴷ ⵜⵜⵡⴰⵙⴽⵔⵏ ⵉⵙⵖⵏⵓⵜⵏ ⵉⵎⴰⵣⴰⵔⵏ ⵉⴳⴰⵏ ⵡⵉⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵙⵎⵓⵟⵟⵓⵏⵜ;
• ⴰⴷ ⵜⵉⵍⵉ ⵜⵙⵉⵍⴰⵡⵜ ⴷ ⵓⵣⵓⵣⵣⵔ ⵏ ⵜⴼⵍⵙⴰⴼⵜ ⵏ ⵓⴱⵟⵟⵓ ⴷ ⵜⴷⵔⴰⵡⵜ ⴰⴼⴰⴷ ⴰⴷ ⵜⵣⵣⵓⴳⴰⵣ ⵜⵡⵓⵔⵉ ⵏ ⵓⵙⴱⵓⵖⵍⵓ ⴷ ⵓⵥⵏⵥⵕ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⴰⵎⵓⵟⵟⵓⵏ;
• ⴰⴷ ⵢⵉⵍⵉ ⵡⴰⴽⴰⵎ ⴷ ⵓⵙⴱⵖⵙ ⵏ ⵓⵙⵏⴼⵍⵓⵍ ⴷ ⵉⵙⵍⵍⵡⵉ ⴳ ⵉⴳⵔⴰⵏ ⵉⵇⵇⵏⵏ ⵖⵔ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵉⵜⵉⵇⵏⵉⵢⵉⵏ ⵏ ⵜⵖⵉⵙⵜ ⵜⴰⵎⵍⵥⴰⵢⵜ.