ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵙⵉⵎⵖⵓⵔ ⵓⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵓⴱⴰⵏⴽ ⴰⴳⵔⴰⵖⵍⴰⵏ, ⴰⵊⴰⵢ ⴱⴰⵏⴳⴰ, ⴰⵙⵙ ⴰⴷ ⵏ ⵓⵙⵉⵎⵡⴰⵙ ⵙ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ, ⴷ ⵓⵍⴰ ⵜⴰⵣⵡⴰⵔⵜ ⴷ ⵜⵎⵔⵉⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵜⵏⴽⵔⴰ ⵙ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵉⵎⵖⵔⴰⴱⵉⵢⵏ.
ⵉⵏⵏⴰ ⵎⴰⵙⵙ ⴱⴰⵏⴳⴰ ⴳ ⵢⴰⵜ ⵜⵙⴳⵓⵔⵉ ⵉ ⵜⵏⵖⵎⴰⵙⵜ ⴳ ⵜⵎⵔⴰ ⵏ ⵓⵙⴱⵔⵔⴽ ⵙⵉⵙ ⵉⵥⵍⵉⵏ ⴳ ⵜⴰⵎⴰ ⵏ ⵜⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵓⴼⵏⵉⵇ ⵏ ⵓⵥⵕⴼ ⴰⴳⵔⴰⵖⵍⴰⵏ, ⴽⵔⵉⵙⵜⴰⵍⵉⵏⴰ ⵊⵓⵔⵊⵉⴼⴰ, ⵙⴳ ⴷⴰⵔ ⴱⴰⴱ ⵏ ⵡⴰⴷⴷⵓⵔ » ⴷⴰ ⵙⵙⵉⵎⵖⵓⵔⵖ ⵙ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⵙ ⵜⵏⴽⵔⴰ ⵙ ⵓⴼⵔⴰⴳ ⴰⵏⴰⵎⵓⵏ ⴳ ⵜⴳⵍⴼⵉⵜ ».
ⵉⵙⵙⴼⵔⴰ ⵎⴰⵙⵙ ⴱⴰⵏⴳⴰ ⴰⴱⵓⵔⵣ ⵏⵏⵙ ⵙ ⵓⵙⴱⵔⵔⴽ ⵙⵉⵙⵖ ⵉⵜⵜⵓⵥⵍⴰⵢⵏ ⵙⴳ ⴷⴰⵔ ⴱⴰⴱ ⵏ ⵡⴰⴷⴷⵓⵔ, ⵉⵙⵉⵡⵍ ⵅⴼ ⵓⴽⵓⵜⵜⵓ ⵏⵏⵙ ⵙ ⵓⵙⴱⵔⵔⴽ ⵉⵔⵖⴰⵏ ⵏⵏⴰ ⵉⵥⵍⵉ ⵍⵎⵖⵔⵉⴱ ⵉ ⵉⵎⴰⴷⵔⴰⵡⵏ ⴳ ⵜⵙⵎⵓⵏⴰⵢ ⵜⵉⵙⴳⵯⵙⴰⵏⵉⵏ ⵏ ⵓⴼⵏⵉⵇ ⵏ ⵓⵥⵕⴼ ⴷ ⵉⴱⴰⵏⴽⵏ ⵉⴳⵔⴰⵖⵍⴰⵏⵏ ⵉⵜⵜⵓⵙⵏⵎⴰⵍⴰⵏ ⴳ ⵎⵕⵕⴰⴽⵛ ⵙⴳ 09 ⴰⵔ 15 ⴽⵟⵓⴱⵕ.
ⵉⵙⵎⴰⵢⵏⵓ ⵎⴰⵙⵙ ⴱⴰⵏⴳⴰ ⴰⵏⵏⴰⵍ ⵏ ⵓⴱⴰⵏⴽ ⴰⴳⵔⴰⵖⵍⴰⵏ ⵉ ⵍⵎⵖⵔⵉⴱ ⴳ ⵜⵉⵣⵉ ⵏ ⴹⴰⵕⵜ ⵏ ⵓⵏⴷⵢⴷⵉ.
ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵜⴰⴷⴳⴳⵯⴰⵜ ⵏ ⵡⴰⵙⵙ ⵏ ⵓⵙⵉⵎⵡⴰⵙ ⴳ ⵕⵕⴱⴰⵟ, ⴰⵏⵏⵓⵕⵥⵎ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵙⴳ ⵓⵙⴳⴳⵯⴰⵙ ⵓⵣⵔⵉⴼ ⵡⵉⵙ ⴽⵕⴰⴹ ⵙⴳ ⵓⵣⵎⵣ ⵓⵣⵔⵉⴼ ⵡⵉⵙ ⵢⴰⵏ ⴷ ⵎⵔⴰⵡ, ⵢⴰⵣⵏ ⴱⴰⴱ ⵏ ⵡⴰⴷⴷⵓⵔ ⵙ ⵜⵎⵍⴷⴰ ⴰⴷ ⵢⴰⵏ ⵢⵉⵏⴰⵡ ⵉ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵓⴱⴰⵏⴽ ⴰⴳⵔⴰⵖⵍⴰⵏ ⴷ ⵜⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵓⴼⵏⵉⵇ ⵏ ⵓⵥⵕⴼ ⴰⴳⵔⴰⵖⵍⴰⵏ ⵏⵏⴰ ⵉⴷⵔⴰⵏ ⴳ ⵜⵙⵎⵓⵏⴰⵢ ⵜⵉⵙⴳⵯⵙⴰⵏⵉⵏ ⵏ ⵙⵏⴰⵜ ⵜⵎⵔⵙⴰⵍ ⵜⵉⵥⵕⴼⴰⵏⵉⵏ.
ⴰⵙⵓⵖⵍ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ.
