ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵔⵙ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵖⴰⵡⴰⵙ ⴰⵎⵢⴰⵏⴰⵡ ⵏ ⵜⴷⵔⴰⵡⵜ ⵏⵏⵙ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵓⴷⵍⵉⵙ ⴳ ⵜⵡⴰⵍⴰ ⵏⵏⵙ ⵜⵉⵙⵙ 27 ⵍⵍⵉ ⵔⴰⴷ ⵢⵉⵍⵉ ⴳ ⵜⵖⵔⵎⵜ ⵏ ⵕⵕⴱⴰⵟ.
ⵉⵜⵜⵓⵥⵍⴰⵢ ⵡⴰⵙⵙ ⵏ ⵓⵙⵉⵎⵡⴰⵙ 03 ⵢⵓⵏⵢⵓ 2022 ⵙ ⵓⵙⵔⵓⵙ ⵏ ⵡⴰⵎⵎⴰⵙ ⵏ ⵓⵙⵓⵖⵍ ⴷ ⵓⵏⵜⴰⵎ ⴷ ⵜⵥⵕⵉⴳⵜ ⴳ ⵓⵖⴳⵯⵎⵎⵉ ⵏ ⵓⵙⵉⵏⴰⴳ ⵜⴰⵡⵓⵔⵉ ⵏⵏⵙ ⴰⵙⴰⴷⵎⵔ ⵉ ⵜⵓⵜⵔⵉⵡⵉⵏ ⵏ ⵓⵙⵓⵖⵍ ⴷⴰ ⵜⴻⵜⵜⵔⵏ ⵉⵡⴷⴰⵏ ⴷ ⵜⵎⵔⵙⴰⵍ, ⵔⴰⴷ ⵉⴳ ⵎⴰⵙⵙ ⵎⵓⵃⵎⵎⴰⴷ ⵍⵄⴹⵉⵎⴰⵜ ⴷ ⵙⴰⵍⵉⵎⴰ ⵍⴽⵓⵍⴰⵍⵉ ⵉⵎⴰⵙⴰⵢⵏ ⵅⴼ ⵓⵙⵉⵔⴰ, ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵡⴰⵙⵙ ⴰⵏⵏ ⵏⵉⵜ ⵢⴰⵜ ⵜⵉⵏⴰⵡⵜ ⵅⴼ » ⴰⵙⵓⵖⵍ ⴰⵣⵔⴼⴰⵏ ⵙ ⵜⵎⴰⵣⵉⵖⵜ, ⵜⵉⵔⵎⵉⵜⵉⵏ ⴷ ⵜⵎⵙⴰⵔⵉⵏ » ⴳ ⵜⵉⵙⵙ 15h30 ⴳ ⵓⵖⴳⵯⵎⵎⵉ ⵏ ⵓⵙⵉⵏⴰⴳ ⵍⵍⵉ ⵔⴰⴷ ⵉⵥⵕ ⵜⴰⴷⵔⴰⵡⵜ ⵏ ⴽⵓ ⵏ ⵙⴰⵍⵉⵎⴰ ⵍⴽⵓⵍⴰⵍⵉ ⴷ ⵎⵓⵃⵎⵎⴰⴷ ⵍⵄⴹⵉⵎⴰⵜ,ⵔⴰⴷ ⵜⵜ ⵉⵙⵡⵓⴷⴷⵓ ⵎⴰⵙⵙ ⵕⴰⵛⵉⴷ ⵍⵄⴱⴷⵍⵍⴰⵡⵉ.
ⴷ ⵔⴰⴷ ⵜⵉⵍⵉ ⵜⵉⵏⴰⵡⵜ ⵙ ⵓⵣⵡⵍ ⵏ ‘’ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵎⴰⴷⵔⴰⵡ ⴰⵙⵉⵍⴰⵏ ⵏ ⵓⵙⵎⵔⵙⵍ ⵏ ⵜⵎⴰⵣⵉⵖⵜ’’ ⴰⵙⵙ ⵏ ⵓⵙⵉⴹⵢⴰⵙ 04 ⵢⵓⵏⵢⵓ 2022 ⴳ ⵜⵉⵙⵙ 16h ⴳ ⵓⵖⴳⵯⵎⵎⵉ ⵏ ⵏ ⵓⵙⵉⵏⴰⴳ, ⵙ ⵓⵙⵡⵓⴷⴷⵓ ⵏ ⵎⴰⵙⵙ ⵍⵃⵓⵙⵉⵏ ⵎⵓⵊⴰⵀⵉⴷ, ⴷ ⵔⴰⴷ ⴳⵉⵙ ⵉⴷⵔⵓ ⵎⴰⵙⵙ ⵍⵃⵓⵙⵉⵏ ⴰⵎⵓⵥⴰⵢ ⵙ ⵜⴽⵛⵛⵓⵎⵜ ⵅⴼ ⵓⵙⵎⵔⵙⵍ ⵏ ⵜⵎⴰⵣⵉⵖⵜ: ⵉⵙⵡⵓⴷⴷⵓⵜⵏ ⴷ ⵉⵎⴰⵙⵙⵏ, ⵃⵎⴰⴷ ⵄⴰⵚⵉⴳⴹ ⵙ ⵓⵙⵏⵜⵍ ⵅⴼ ⵜⴷⵉⵏⴰⵎⵉⵜ ⵜⴰⵏⴰⵎⵓⵏⵜ ⴷ ⵜⵎⵍⴰⵍⵜ ⵏ ⵜⵎⵔⵙⴰⵍ ⴳ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⵎⴰⵙⵙ ⵄⵍⵉ ⴱⵏ ⵟⵟⴰⵍⴱ ⵔⴰⴷ ⵉⵙⵎⴽⵍ ⵜⴰⵎⵓⴽⵔⵉⵙⵜ ⵏ ⵜⴷⵔⴰⵡⵉⵏ ⵏ ⵓⵙⵉⵏⴰⴳ ⴳ ⵢⵉⴳⵔ ⵏ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴷ ⵜⵏⴰⵎⵓⵏⵉⵏ, ⵎⴽⵍⵍⵉ ⵔⴰⴷ ⵉⵙⴰⵡⵍ ⵄⴱⴹⵍⵍⴰ ⴱⵓⵣⵏⴷⴰⴳ ⵅⴼ ⵜⴷⵔⴰⵡⵉⵏ ⵏ ⵓⵙⵉⵏⴰⴳ ⴷ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵉⵙⵉⵏⴰⴳⵏ ⵉⵏⴰⴼⵍⵍⴰⵜⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ.
ⴰⵙⵙ ⵏ ⴰⵢⵏⴰⵙ 06 ⵢⵓⵏⵢⵓ 2022 ⵔⴰⴷ ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵜⵉⵙⵏⵎⴰⵍⴰⵢⵉⵏ ⴷ ⵉⵏⴳⵔⴰⵡⵏ ⵏ ⵓⵏⵏⵖⵎⵙ ⴷ ⵓⵏⵢⴰⵍⴽⴰⵎ ⴳ ⵜⵉⵙⵙ 11H ⵏ ⵜⵉⴼⴰⵡⵜ, ⵢⴰⵜ ⵜⵙⴰⵡⵔⵜ ⵉ ⵉⵎⵥⵢⴰⵏⵏ ⵅⴼ ⵓⵍⵎⵎⵓⴷ ⵏ ⵜⴼⵉⵏⴰⵖ ⵙ ⵜⴰⵜⵉⴽⵏⵓⵍⵓⵊⵉⵢⵜ ⵜⴰⵙⵏⵎⴰⵍⴰⵢⵜ ⴷ ⵓⵎⵢⴰⵡⴰⴹ, ⴷ ⵔⴰⴷ ⵉⵙⵏⴽⴷ ⴳ ⵜⵉⵙⵙ 15H ⵎⴰⵙⵙ ⵢⵓⵏⵙ ⵛⵛⵄⴱⵉ ⵜⴰⵥⵕⵉⴳⵜ ⵏ ‘’ ⵉⵎⵉⵙ ⴰⵎⵣⵣⵔⴰⵢ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ’’ ⵊⴰⵎⴰⵍ ⴼⴰⵔⵄⵉⵏ ⵔⴰⴷ ⵉⵙⵏⴽⴷ ⵏⵜⵜⴰ ‘’ⴰⵎⴰⵡⴰⵍ ⴰⵎⴰⵜⴰⵢ ⵉⵜⵜⵢⴰⵙⴰⵢⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ’’ ⵙ ⵓⵙⵡⵓⴷⴷⵓ ⵏ ⵎⴰⵙⵙⴰ ⴼⴰⴷⵡⴰ ⴰⵟⴰⵄ ⵍⵍⴰⵀ, ⵔⴰⴷ ⵜ ⵉⴷ ⵉⴹⴼⵕ ⴰⴼⵉⴷⵢⵓ ⵅⴼ ⵜⴼⵉⵏⴰⵖ ⴷ ⵓⵎⴰⴹⴰⵍ ⴰⵎⵓⵟⵟⵓⵏ.
ⴰⵙⵙ ⵏ ⵓⵙⵉⵏⴰⵙ 07 ⵢⵓⵏⵢⵓ 2022, ⵔⴰⴷ ⵉⵃⵢⵢⵍ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵜⵉⵏⴰⵥⵓⵕⵉⵏ ⴷ ⵜⴰⵍⵖⵉⵡⵉⵏ ⵜⵉⵙⴽⵍⴰⵏⵉⵏ ⴷ ⵓⴼⴰⵔⵙ ⴰⵙⵍⵉⵥⵉⵕ ⵢⴰⵜ ⵜⵙⴰⵡⵔⵜ ⵏ ⵜⵏⴼⵓⵙⵜ ⴳ ⵓⵜⵓⵢ ⵏ ⵎⴰⵙⵙ ⴼⵓⴰⴷ ⴰⵥⵕⵡⴰⵍⵏ ⴷ ⵓⵙⵏⴽⴷ ⵏ ⵜⵥⵕⵉⴳⵉⵏ ⴳⴳⵯⵔⴰⵏⵉⵏ ⵏ ⵡⴰⵎⵎⴰⵙ ⵙⴳ ⴷⴰⵔ ⵜⴰⵡⴼⵉⵇ ⵢⵓⵙⵓⴼ, ⵃⵎⴰⴷ ⵍⵎⵓⵏⴰⴷⵉ, ⴷⵔⵉⵙ ⴰⵥⴹⵓⴹ.
ⵎⴽⵍⵍⵉ ⵔⴰⴷ ⵉⵙⵏⵎⵉⵍⵉ ⵡⴰⵎⵎⴰⵙ ⵏ ⵓⵔⵣⵣⵓ ⴰⴷⵉⴷⴰⴽⵜⵉⴽ ⴷ ⵉⵖⴰⵡⴰⵙⵏ ⵉⵙⴳⵎⴰⵏⵏ ⴰⵙⵙ ⵏ ⵓⴽⵕⴰⵙ 08 ⵢⵓⵏⵢⵓ 2022 ⴳ ⵜⵉⵙⵙ 11H ⵏ ⵜⵉⴼⴰⵡⵓⵜ, ⵢⴰⵜ ⵜⵙⴰⵡⵔⵜ ⵏ ⵜⴼⵉⵏⴰⵖ ⵙ ⵓⵙⵎⵓⵙⵙⵓ ⵏ ⵎⴰⵙⵙ ⵎⵓⵚⵟⴰⴼⴰ ⵚⵚⵖⵉⵕ ⴷ ⴳ ⵜⵉⵙⵙ 15H ⵔⴰⴷ ⵉⵃⵢⵢⵍ ⵡⴰⵎⵎⴰⵙ ⵢⴰⵜ ⵜⵙⴰⵡⵔⵜ ⵏ ⵜⵏⴼⵓⵙⵜ ⵙ ⵓⵙⵎⵓⵙⵙⵓ ⵏ ⵎⴰⵙⵙ ⴽⴰⵎⴰⵍ ⵓⵇⵇⴰ, ⵎⴽⵍⵍⵉ ⵔⴰⴷ ⵉⵙⵏⴽⴷ ⴰⴷⵍⵉⵙ ⴰⵎⴰⵢⵏⵓ ⵏ ⵎⴰⵙⵙⴰ ⴼⴰⵟⵉⵎⴰ ⴰⴳⵏⴰⵡ ⴳ ⵓⵖⴳⵯⵎⵎⵉ ⵏ ⵓⵙⵉⵏⴰⴳ, ⴰⴷⵍⵉⵙ ⵉⵍⴰ ⵙ ⵓⵣⵡⵍ: »ⵜⴰⵎⴰⵣⵉⵖⵜ ⴳ ⵓⵙⵍⵎⴷ ⴰⵏⵎⵍⴰⵏ ⴳ ⵍⵎⵖⵔⵉⴱ ».
ⵙ ⵜⴷⵔⴰⵡⵜ ⵏ ⴼⴰⵟⵉⵎⴰ ⴰⴳⵏⴰⵡ, ⴷ ⵍⴱⵔⴽⴰⵏⵉ ⴱⵓⵛⵕⴰ, ⴽⴰⵎⴰⵍ ⵓⵇⵇⴰ, ⵎⵓⵚⵟⴰⴼⴰ ⵚⵚⵖⵉⵕ, ⵄⵍⵉ ⵎⵓⵔⵉⴼ, ⵄⴱⴹⵍⵍⴰ ⴱⵓⵣⵏⴷⴰⴳ, ⴰⵙⵡⵓⴷⴷⵓ ⴳ ⴷⴰⵔ ⵎⴰⵙⵙ ⵄⴱⴷⵙⵙⵍⴰⵎ ⵅⴰⵍⴰⴼⵉ.
ⴰⵙⵙ ⵏ ⵓⴽⵡⴰⵙ 09 ⵢⵓⵏⵢⵓ 2022, ⵔⴰⴷ ⵉⵙⵏⵎⵉⵍⵉ ⵡⴰⵎⵎⴰⵙ ⵏ ⵓⵎⵙⴰⵙⴰ ⵏ ⵜⵓⵜⵍⴰⵢⵜ ⵢⴰⵜ ⵜⵉⵏⴰⵡⵜ ⵅⴼ: » ⵜⴰⵎⵍⴰⵍⵜ ⵏ ⵜⵙⵏⵉⵔⵎⵜ ⴳ ⵓⵙⴷⵓⵙ ⵏ ⵓⴷⵖⴰⵔ ⵏ ⵜⵎⴰⵣⵉⵖⵜ ⴳ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ » ⵙ ⵜⴷⵔⴰⵡⵜ ⵏ ⵏ ⵎⴰⵙⵙ ⵅⴰⵍⵉⴷ ⵄⵏⵙⴰⵔ, ⵎⴰⵙⵙ ⵍⵃⵓⵙⴰⵢⵏ ⵍⵖⵍⴱⵜ, ⴰⵙⵡⵓⴷⴷⵓ ⴳ ⴷⴰⵔ ⵎⴰⵙⵙ ⵃⴰⵙⴰⵏ ⴰⴽⵢⵓⴹ ⴳ ⵜⵉⵣⵉ ⵜⵉⵙⵙ 11H ⵏ ⵜⵉⴼⴰⵡⵜ.
ⵔⴰⴷ ⵉⵙⵙⵉⵥⵍⵉ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵜⵉⵏⵜⵕⵓⴱⵓⵊⵉⵢⵉⵏ ⴷ ⵜⵙⵏⴰⵎⵓⵏⵉⵏ ⴰⵙⵙ ⵏ ⵓⵙⵉⵎⵡⴰⵙ 10 ⵢⵓⵏⵢⵓ ⵢⴰⵜ ⵜⵙⵇⵇⴰⵢⵎⵓⵜ ⵅⴼ: ⵜⵉⴼⵉⵔⴰⵙ ⵏ ⵉⵎⵎⵓⵜⵜⵓⵢⵏ ⴳ ⵡⴰⵎⵓⵏⵏ ⵉⵎⴰⵣⵉⵖⵏ » ⴳ ⵜⵉⵙⵙ 10H, ⵔⴰⴷ ⴳⵉⵙ ⴷⵔⵓⵏ ⵉⵎⵔⵣⵓⵜⵏ ⵏ ⵓⵙⵉⵏⴰⴳ.
ⵔⴰⴷ ⵜⴻⵜⵜⵓⵙⴽⴰⵔⵏⵜ ⵜⵉⵍⴰⵍ ⵏ ⵡⴰⵙⵙ ⵏ ⵓⵙⵉⴹⵢⴰⵙ 11 ⵢⵓⵏⵢⵓ ⵙⴳ ⴷⴰⵔ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵜⵉⵎⵣⵔⴰⵢ ⴷ ⵜⵡⵏⴹⴰⵏⵉⵏ, ⵍⵍⵉⵖ ⵔⴰⴷ ⴼⵙⵔⵏ ⵢⴰⵏ ⵓⵙⴰⵔⵓ ⵢⵓⵎⴰⵏ ⵜⵉⵡⵍⴰⴼⵉⵏ ⴷ ⵉⵙⴼⴽⴰ ⵉⵎⵢⴰⵏⴰⵡⵏ ⵅⴼ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵎⴰⵣⵉⵖⵜ, ⴷ ⵓⵙⵎⵏⵉⴷ ⵏ ⵜⵥⵕⵉⴳⵉⵏ ⵜⵉⵎⴰⵢⵏⵓⵜⵉⵏ ⵏ ⵡⴰⵎⴰⵙⵙ ⴰⵎ: ⵜⴰⵡⵍⴰⴼⵜ ⵏ ⵉⵎⴰⵣⵉⵖⵏ ⴳ ⵜⵉⵔⵔⴰ ⵜⴰⵏⴰⵎⵓⵔⵜ ⴷ ⵜⴱⵕⵕⴰⵏⵉⵜ » ⵜⵉⵥⵕⵉⴳⵉⵏ ⵏ ⵡⴰⵎⵎⴰⵙ ⴰⴳⵍⴷⴰⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵎⵏⵉⴷ ⵏ ⵚⴰⴱⴰⵃ ⵄⵍⵍⴰⵛ ⴷ ⵎⴱⴰⵕⴽ ⴰⵢⵜ ⵄⴷⴷⵉ, ⴷ ⵓⴷⵍⵉⵙ ⵏ »ⴰⴼⴰⵔⴰ ⴰⵎⵖⵔⴰⴱⵉ, ⵜⵉⵎⴽⵜⵉⵜ ⴷ ⵉⵙⵏⴼⴰⵍ », ⵜⵉⵥⵕⵉⴳⵉⵏ ⵏ ⵓⵙⵉⵏⴰⴳ ⴰⴳⵍⴷⴰⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵏⴽⴷ ⵏ ⵍⵎⵃⴼⵓⴹ ⴰⵙⵎⴰⵀⵔⵉ ⴷ ⵍⵃⵓⵙⵉⵏ ⴱⵓⴹⵍⵉⴱ, ⵢⵉⵍⵉ ⵓⴷⵍⵉⵙ ⵏ »ⵉⵖⵔⵎⴰⵏ ⵏ ⵡⴰⵟⵍⴰⵚ ⴰⵎⵇⵇⵔⴰⵏ » ⴰⵙⵓⵖⵍ ⵏ ⵃⴰⵙⴰⵏ ⴰⵎⵉⵍⵉ, ⵜⵉⵥⵕⵉⴳⵉⵏ ⵏ ⵓⵙⵉⵏⴰⴳ ⴰⴳⵍⴷⴰⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵎⵏⵉⴷ ⵏ ⵏ ⵎⴰⵙⵙ ⵏⵏⵓⵃⵉ, ⴳ ⵜⵉⵙⵙ 15H, ⴰⵙⵡⵓⴷⴷⵓ ⵏ ⵎⴰⵙⵙ ⵄⴱⵍⵄⵣⵉⵣ ⵟⵟⴰⵍⴱ.
ⵄⴰⴱⴷⵍⵡⴰⵃⴷ ⴱⵓⵜⴱⴰⵖⴰ
