ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴳ ⵓⵙⴰⵜⵉ ⵏ ⵢⵉⵡⵉⵣ ⴰⴳⵍⴷⴰⵏ ⵢⴰⵜⵜⵓⵢⵏ ⴷ ⵉⴹⴼⵕⵏ ⵙ ⵜⵎⴰⵣⵉⵖⵜ, ⵍⵍⵉⵖ ⵜⴳⴰ ⴰⴼⵔⴷⵉⵙ ⴰⴷⵙⵍⴰⵏ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⵜⴰⵕⵚⵍⵉⵜ ⵜⴰⴱⵖⵓⵔⵜ ⵙ ⵉⵎⵓⵖⵍⵏ ⵏⵏⵙ ⵉⵎⵢⴰⵏⴰⵡⵏ ⴷ ⵡⴰⵢⴷⴰ ⵉⵛⵛⴰⵔⵏ ⵉ ⴽⵓ ⵉⵎⵖⵔⴰⴱⵉⵢⵏ ⵙ ⵜⵉⵔⵏⵉ, ⴷ ⵙ ⵓⵎⵙⴰⵙⴰ ⵙ ⵉⴱⴹⵉⵢⵏ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵙⵍⴰⵡⴰⵏ ⴰⴽⴽⵯ ⴰⵎⴰⴳⵔⴰⴷ ⵡⵉⵙ 5 ⵏⵏⴰ ⵉⵙⴽⵔⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ ⴳ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵙ ⵓⵎⵙⴰⵙⴰ ⴰⴽⴷ ⵉⵙⴱⴷⴰⴷⵏ ⵏ ⵉⴹⵕⵉⵚ ⵓⵣⵔⵉⴼⵏ ⴷ ⵉⴼⴼⵖⵏ ⴳ ⵓⵙⴽⴽⵉⵏ ⵏ ⵓⵙⵎⵀⵍ ⵏ ⵓⴷⵔⵉⵣ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷ ⵙ ⵓⵙⵏⴰⵍ ⵅⴼ ⵉⵙⴱⴷⴰⴷⵏ ⵏ ⵜⵎⵜⵜⴰ 31 ⵙⴳ ⵓⵙⵍⴳⵏ ⴰⵙⴰⵜⵉ ⵓⵟⵟⵓⵏ 51-17 ⵉⵣⴷⵉⵏ ⵙ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵣⵓⴳⵣ ⵏ ⵉⵡⵜⵜⴰⵙⵏ ⵏ ⵜⴽⴰⵕⴹⴰ ⵏ ⵓⴱⵔⵉⴷ 2022-2026.
ⵉⵙⵙⴳⵎⴹ ⵎⴰⵙⵙ ⴰⵏⵎⵀⴰⵍ ⴰⵙⴳⴰⵡⴰⵏ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⴳ ⴱⵓⵊⴷⵓⵔ ⴳ ⵜⴷⴰⵍⴰ ⵏ ⵜⵉⵍⴰⵍ ⴳ ⵜⵉⵏⵎⵍ ⵜⴰⵎⵏⵣⵓⵜ ⵅⴰⵢⵢⴰ ⵄⴱⴷⵍⵄⵣⵉⵣ, ⵜⴰⵎⵢⴰⵇⵇⴰⵏⵜ ⵏ ⵓⴷⵔⴰⵡ ⴷ ⵓⵎⵢⴰⵡⴰⵙ ⴷ ⵜⵎⵙⵎⵓⵏⵜ ⵜⴰⵙⴳⴰⵡⴰⵏⵜ ⵏ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴰⵎⵙⴰⵔⵜ ⴰⴷ ⵜⵥⵕⴰ ⵜⵉⵍⵉⵜ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴰⴼⵓⵜ ⵏ ⵜⵖⴰⵡⵙⵉⵡⵉⵏ ⵜⵓⵍⴳⵉⵏⵉⵏ ⴷ ⵓⵏⵢⴰⵍⴽⴰⵎ ⴷ ⵓⴷⵔⴰⵡ, ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⵙⵉⵔⴰ ⴰⵎⵙⵡⵓⴷⴷⵓ ⵏ ⵜⵎⵙⵎⵓⵏⵜ ⴷ ⵎⴰⵙⵙ ⴰⵏⵎⵀⴰⵍ ⵏ ⵜⵎⵔⵙⵍⵜ ⵉⵙⴳⴷⵍⵏ ⵉ ⵓⵙⴼⵓⴳⵍⵓ ⵏ ⵓⵙⴳⵎⴹ.
ⵜⵡⴰⵜⵜⵙ ⵜⵎⵢⴰⵇⵇⴰⵏⵜ ⴰⴷ ⵏ ⵓⵙⴰⵜⵉ, ⴰⵙⵔⵓⵙ ⵏ ⵢⴰⵏ ⵓⵙⴰⵜⵉ ⴰⵎⴰⵜⴰⵢ ⵏ ⵓⵎⵢⴰⵡⴰⵙ ⴷ ⵓⴷⵔⴰⵡ ⴳⵔ ⵜⵎⵀⵍⴰ ⴷ ⵜⵎⵙⵎⵓⵏⵜ ⴳ ⵢⵉⴳⵔ ⵏ ⵓⵙⵎⵓⵜⵜⴳ ⴰⵙⵓⵍⴰⵏ, ⴷ ⵓⵏⵏⵓⵕⵥⵎ ⴰⵥⵓⵕⴰⵏ ⴷ ⵓⵙⴽⵍⴰⵏ ⴷ ⵓⴷⵍⵙⴰⵏ, ⵉ ⵡⴰⵡⴰⴹ ⵏ ⵓⵙⵎⴰⴷ ⴳⵔⴰⵜⵙⵏ ⴰⴼⴰⴷ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵎⵍⴰⵍⵜ ⵏ ⵓⵙⴳⵎⵉ ⴷ ⵓⵙⵍⵎⴷ ⴷ ⵓⵙⴷⵓⵙ ⵏ ⵜⵉⵏⴷⵉⵜⵉⵏ ⵏ ⵜⵎⵓⵔⵉ ⴳ ⵜⵓⵥⵥⵓⵎⵜ ⵏ ⵉⵏⵍⵎⴰⴷⵏ ⴳ ⵡⴰⵎⵎⴰⵙ ⴰⵏⵎⵍⴰⵏ.
ⵎⴽⵍⵍⵉ ⵉⵜⵜⵓⵙⴽⴰⵔ ⵓⵙⵡⵓⵜⵜⵓ ⵏ ⵢⵉⴳⵔⴰⵏ ⵏ ⵓⵎⵢⴰⵡⴰⵙ ⴷ ⵓⴷⵔⴰⵡ, ⵔⴰⴷ ⵙⵡⵓⵔⵉⵏ ⵉⴳⵎⴰⵎⵏ ⵅⴼ ⵓⵙⵔⵓⵙ ⴷ ⵓⵣⵣⴳⵉⵔ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵙⴳ:
– ⴰⵙⵙⵔⵇⴱ ⵏ ⵜⵙⵜⴰⵏⵢⵉⵏ ⵜⵉⴷⵍⵙⴰⵏⵉⵏ ⵜⵉⵎⵙⵏⴼⵍⴰⵍ ⵓⵙⵖⵓⴷⵓ ⵏⵏⵙⵏⵜ;
– ⴰⵙⵔⵓⵙ ⵏ ⵉⵖⴰⵡⴰⵙⵏ ⵏ ⵢⵙⵎⵓⵙⵙⵓ ⴰⴷⵍⵙⴰⵏ ⵏⵏⴰ ⵉⵜⵜⵙⵓⵜⵓⵍⵏ ⵅⴼ ⵓⵙⵙⵔⵇⴱ ⵏ ⵜⵉⵍⴰⵍ ⵏ ⵓⵏⵏⵓⵕⵥⵎ ⵉⵣⴷⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ;
– ⴰⵏⵏⴰⵍ ⵏ ⵓⵙⵎⵓⵜⵜⴳ ⴷ ⵓⵙⵎⵓⵜⵜⴳ ⴰⵙⵓⵍⴰⵏ ⵉ ⵜⵏⴰⴼⵓⵜ ⵏ ⵉⵙⵍⵎⵣⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ;
– ⴰⵙⵏⵎⴰⵍⴰ ⵏ ⵜⵙⴰⵡⵔⵉⵏ ⵏ ⵡⵓⵜⵓⵢ ⵉ ⵜⵏⴰⴼⵓⵜ ⵏ ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⴳ ⵓⵙⵏⵜⵍ ⵏ ⵓⴷⵔⴰⵡ;
– ⴰⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴷ ⵜⵉⵍⴰⵍ ⵜⵉⴷⵍⵙⴰⵏⵉⵏ ⵉⵣⴷⵉⵏ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴳⵯⵏⵙ ⵏ ⵉⵙⴰⵢⵔⴰⵔⵏ ⵏ ⵜⵎⵔⵙⴰⵍ ⵏ ⵓⵙⵍⵎⴷ;
ⵜⵉⵏⴷⵉ ⵏ ⵓⴷⵔⴰⵡ ⴰⴷ ⵍⵍⵉⵖ ⵉⴳⴰ ⴰⴷⵔⴰⵡ ⴰⵎⵣⵡⴰⵔⵓ ⴳ ⵡⴰⵏⴰⵡ ⵏⵏⵙ ⴷ ⵢⴰⵜ ⵜⵏⵙⵎⵓⵏⵜ ⵜⴰⵣⵣⵓⵍⴰⵏⵜ ⴳ ⵜⵙⴳⴰ ⵙ ⵓⵎⵙⴰⵙⴰ ⴷ ⵜⵎⴰⵢⵏⵓⵜⵉⵏ ⵏ ⵓⵎⵓⴽⵏ ⴰⵙⴳⵎⴰⵏ ⴷ ⵡⴰⵏⵏⴰⵍ ⵏ ⵓⵣⵓⴳⵣ ⵓⵎⵀⵉⵍ ⵏ ⵜⴽⴰⵕⴹⴰ ⵏ ⵓⴱⵔⵉⴷ 2022-2026.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
