ⴰⵙⵉⵡⴹ ⵏ “ⵜⴰⴹⴰ ⵜⴰⵎⵖⵔⴰⴱⵉⵜ “ ⵙ ⵎⴰⴷ ⵉⵥⵍⵉⵏ ⵙ ⵜⵉⵎⴰⵢⵏⵓⵜⵉⵏ ⵏ ⵓⴱⴰⵔⴰⵣ ⴰⵏⴰⵎⵓⵔ

ⵙⴳ ⵓⵙⴱⴷⴷⵉ ⵏⵏⵙ ⴰⵙⵙ ⵏ 8 ⵎⴰⵢ 2021, ⵜⴹⴼⵕ ⵜⴰⴹⴰ ⵜⴰⵎⵖⵔⴰⴱⵉⵜ ⵉ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ ⵜⵉⵎⴰⵢⵏⵓⵜⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵓⵙⵔⵉⴷ ⴰⴽⴷ ⵉⴳⵔ ⵏ ⵓⵙⵡⵓⵔⵉ ⵏⵏⵙ, ⴷ ⵙ ⵓⵎⵙⴰⵙⴰ ⴰⴽⴷ ⴰⵙⵍⴳⵏ ⵏⵏⵙ ⴰⴷⵙⵍⴰⵏ ⴷ ⵜⵙⵉⵍⴰ ⵏⵏⵙ ⵜⴰⵡⵏⴳⵉⵎⵜ, ⴷⴰ ⵜⴻⵜⵜⵍⴰⵖⵉ ⵉ ⵓⵎⵏⴰⴷ ⴰⵏⵎⴰⵜⴰⵢ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⴰⵢ ⴷ ⵉⴷⴷⴰⵏ:

1. ⴰⵙⵓⵜⴳ ⵏⵏⵙ ⵉ ⵓⵎⵙⴳⴷⴰⵍ ⴷⴰ ⵉⴹⴼⵕⵏ ⵜⴰⵍⴰⵍⵉⵜ ⵏ “ⵜⴰⴹⴰ ⵜⴰⵎⵖⵔⴰⴱⵉⵜ” ⴷ ⵓⵙⵏⵉⵎⵎⵔ ⵏⵏⵙ ⵉ ⴰⴽⴽⵯ ⵡⵉⴷ ⵉⵡⵙⵏⵉⵏ ⴳ ⵎⴰⵢⴰⵏ ⴳ ⵓⵙⵡⵉⵔ ⴰⵡⵏⴳⵉⵎ ⴷ ⵓⵏⵎⴰⵍⴰⵢ, ⴷ ⴰⵔ ⵜⴻⵜⵜⵍⴰⵖⵉ ⵉ ⵎⴰⵕⵕⴰ ⵉⵡⴷⴰⵏ ⵎⴰⵙⴷ ⴰⵙⵏⴼⴰⵕ ⵏⵏⵙ ⵢⵓⵜⵉ ⵜⵉⴳⵯⵎⴰⵏⵉⵢⵉⵏ ⵏⵏⵓⴽⵎⴰⵏⵉⵏ, ⴷ ⵉⵎⵣⴰⵔⴰⵢⵏ ⵉⴷⵢⵓⵍⵓⵊⵉⵜⵏ, ⴷ ⵉⵎⵏⵣⴰⵖⵏ ⵉⵙⵔⵜⴰⵏⵏ, ⵉⴷⴷⵖ ⴷⵉⴳⵙ ⴰⵢⵍⵍⵉ ⵜⴻⵜⵜⵍⴰⵖⵉ ⴽⵓ ⵢⴰⵜ ⴷ ⴽⵓ ⵢⴰⵏ ⵃⵎⴰ ⴰⴷ ⵎⵓⵏⵏ ⵅⴼ ⵜⴳⵯⵎⴰⵏⵉⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⴷ ⵓⵙⵎⵖⵔ ⵙ ⵜⵎⴰⴳⵉⵜ ⵏⵏⵙ, ⴰⵎⵎⴰⵙ ⵏⵏⵙ ⵜⴰⵎⴰⵣⵉⵖⵜ ⵜⴰⵎⴰ ⵏ ⵉⴼⵔⴷⵉⵙⵏ ⴷ ⵉⵎⵓⵖⵍⴰ ⵢⴰⴹⵏ, ⵎⵉⵏⵣⵉ ⵜⴳⴰ ⵢⴰⵜ ⵜⵎⴰⴳⵉⵜ ⵉⵙⵎⵖⵔⵏ ⵉⵙⵅ ⵏⵏⵙ, ⵜⴰⵎⵏⴰⵡⴰⵢⵜ ⵉⵏⵏⵓⵕⵥⵎⵏ ⵅⴼ ⵓⵙⵓⵜⵍ ⵏⵏⵙ ⴰⴷⵍⵙⴰⵏ ⴷ ⵓⵖⵔⵎⴰⵏ ⴰⵡⴷ ⵅⴼ ⵜⵉⴼⴼⵓⴳⵏⴰ ⴰⴽⴽⵯ.
2. ⴰⵙⵎⵖⵔ ⵏⵏⵙ ⵉ ⴰⵢⵍⵍⵉ ⵜⴳⴳ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⵉⴱⵉⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⴰⵔ ⵜⴻⵜⵜⴰⵏⵏⴰⵢ ⵎⴰⵙⴷ ⴰⵎⵓⵏ ⵅⴼ ⵜⵎⵖⵔⴰⴱⵉⵜ ⴷⴰ ⵉⵙⴷⵓⵙ ⵉⵏⵉⵔ ⴰⴳⵯⵏⵙⴰⵏ, ⵉⴳ ⵢⴰⵜ ⴳ ⵜⴱⵔⵉⴷⵉⵏ ⵏ ⵓⵎⵏⴰⵍⴰ ⵏ ⵉⵏⴰⵥⴰⵕⵏ ⵉⵙⴳⴰⵡⴰⵏⵏ ⴷ ⵉⵎⴰⴹⵍⴰⵏⵏ ⴷ ⵓⵙⴷⵓⵙ ⵏ ⵡⴰⵏⵙⴰ ⵏ ⵍⵎⵖⵔⵉⴱ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.
3. ⴰⵙⴷⴷⵉⴷ ⵏⵏⵙ ⵎⴰⵙⴷ ⴰⵎⵓⵏ ⵅⴼ ⵜⵎⵖⵔⵉⴱⵉⵜ ⴷ ⴰⵙⵎⵖⵔ ⵙ ⵓⵎⵣⵔⵓⵢ ⵏ ⵍⵎⵖⵔⵉⴱ ⵙ ⵜⴼⵔⴽⵉⵡⵉⵏ ⵏⵏⵙ ⴷ ⵜⵙⴳⵉⵡⵉⵏ ⵏⵏⵙ, ⴷ ⵓⴳⵍⴰ ⵏ ⵜⴰⵢⵙⵉ ⵏⵏⵙ ⵜⴰⴽⵎⴰⵎⵜ ⴷ ⵜⴰⵔⴰⴽⵎⴰⵎⵜ, ⵙ ⵓⵢⴰ ⴷⴰ ⵜⴹⴼⴼⵕ ⵜⴰⴹⴰ ⵙ ⵜⴰⵡⵉⵜ ⵜⴰⵎⵇⵔⴰⵏⵜ ⴰⵎⵙⴳⴷⴰⵍ ⵉⵍⵍⴰⵏ ⵅⴼ ⵡⴰⵏⵙⴰ ⴰⵎⵣⵔⴰⵢ “ⵉⵍⵉⵖ” ⴳ ⵜⴳⵔⴰⵡⵜ ⵏ ⵙⵉⴷⵉ ⵃⵎⴰⴷ ⵓⵎⵓⵙⴰ, ⵉⵜⵜⵓⵙⴷⵉⴷⴷⵉⵏ ⴳ ⵓⵙⵏⴼⴰⵕ ⵏ ⵓⵎⴰⵎⴽ ⵏ ⵜⵎⵔⵏⵉⵡⵜ ⵏⵏⴰ ⵜⴳⴳ ⵜⵙⵏⵓⵔⴰⵢⵜ ⵜⴰⵖⵔⵎⴰⵏⵜ. ⴷⴰ ⵜⴻⵜⵜⵍⴰⵖⵉ “ⵜⴰⴹⴰ ⵜⴰⵎⵖⵔⴰⴱⵉⵜ” ⴰⵙⵇⵇⵉⵎ ⴰⴳⵔⴰⵡⴰⵏ ⵏ “ⵙⵉⴷⵉ ⵃⵎⴰⴷ ⵓⵎⵓⵙⴰ” ⴰⴷ ⵉⴳⴳ ⴰⵙⵎⵙⴰⵙⴰ ⵏ ⵓⵙⵏⴼⴰⵕ ⵉⵜⵜⵓⵙⵏⴽⴰⴷⵏ ⴰⴽⴷ ⴰⴼⵔⴰⴳ ⵏ ⵡⴰⵏⵙⴰⵜⵏ ⴰⴽⴽⵯ ⵏ ⵜⴰⵢⵙⵉ ⵉⵎⵣⵔⴰⵢⵏ ⵏ ⵉⵍⵉⵖ ⴷ ⵓⵙⵉⴷⴼ ⵏⵏⵙ ⴳ ⵓⵙⴰⵜⵉ ⵏ ⵉⵙⵏⴼⴰⵕⵏ ⵉⵏⴳⵎⵓⵜⵏ ⵏ ⵜⴳⵔⴰⵡⵜ, ⵎⴽⵍⵍⵉ ⵜⵙⵙⵉⵎⵖⵓⵔ ⵜⴰⴷⵓⵢⵜ ⵜⴰⵏⴰⵎⵓⵔⵜ ⵏⵏⴰ ⴳⴳⵏ ⵉⵎⴰⵣⵣⴰⵍⵏ ⵓⵖⵔⵉⵎⵏ ⴷ ⵉⵎⵔⵣⵓⵜⵏ ⴰⴽⴷ ⵜⵎⵓⴳⴳⵉⵜⵉⵏ ⵜⵉⵙⵔⵜⴰⵏⵉⵏ ⴰⴽⵓⴷ ⵍⵍⵉ ⴷ ⵉⴼⴼⵖ ⵓⵍⴰⵖⵉ ⵏ ⵓⵙⵇⵇⵉⵎ ⴰⴳⵔⴰⵡⴰⵏ ⴷ ⵢⵉⵡⵉⵏ ⵜⵉⵍⵍⵉⵜ ⵏ ⵓⵙⵏⴼⴰⵕ ⴰⴷ.
4. ⴳ ⵜⵙⴳⴰ ⴰⴷ ⵏⵉⵜ, ⴷⴰ ⵜⴻⵜⵜⵖⴰⵙ “ⵜⴰⴹⴰ ⵜⴰⵎⵖⵔⴰⴱⵉⵜ” ⴳ ⵜⵖⵜⴰⵙⵜ ⵏ ⴽⵔⴰ ⵏ ⵉⵎⵙⵜⴳⴳⴰⵔⵏ ⴷ ⵢⵉⵡⵉⵏ ⴰⵙⵏⴼⵍ ⵏ ⵡⴰⵙⵙⴰⵖⵏ ⵏ ⵜⵉⵏⵎⴰⵍ ⵢⵓⵙⵉⵏⵉⵏ ⵜⴰⵎⴰⴳⵉⵜ ⵏ ⵢⵉⴳⵔ ⵏⵏⵙⵏⵜ ⴰⴷⵍⵙⴰⵏ ⴳ ⵜⵎⵏⴰⴹⵜ ⵏ ⴳⵯⵍⵎⵉⵎ ⵡⴰⴷ ⵏⵓⵏ, (ⵜⵉⵎⵎⵓⵍⴰⵢ, ⵉⴽⵉⵙⵍ ⴷ ⴰⵎⵃⵉⵔⵉⵛ), ⵎⴽⵍⵍⵉ ⵜⵜ ⵜⵙⵙⵓⵙⵎ ⵜⵉⴳⵉⵜ ⵏ ⵓⵎⴰⵡⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵍⵍⵉ ⵉⵙⴱⴷⴷⵏ ⴰⵣⵣⴳⵉⵔ ⵏ ⵜⵖⵜⴰⵙⵜ ⴰⴷ ⴹⴰⵕⵜ ⵏ ⵓⵏⵄⴰⵕ ⵏ ⵉⵎⴰⵣⵣⴰⵍⵏ ⵏ ⵡⴰⵎⵓⵏ ⵓⵖⵔⵉⵎ. ⴷ ⴰⵔ ⵜⴻⵜⵜⵍⴰⵖⵉ ⵙ ⵜⵎⵍⴷⴰ ⴰⴷ ⵎⴰⵙⴷ ⴰⵙⵓⵜⴳ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ ⴷⴰ ⵉⵙⵙⵏⵜⴰⵢ ⵙ ⵓⵙⵎⵖⵔ ⵏ ⵜⵎⴰⴳⵉⵜ ⵜⴰⴷⵖⵔⴰⵏⵜ, ⵜⴰⵏⵎⵏⴰⴹⵜ, ⴷ ⵜⵏⴰⵎⵓⵔⵜ. ⴰⴼⵔⴰⴳ ⵏ ⵡⴰⵙⵙⴰⵖⵏ ⵏ ⵉⴷⵖⴰⵔⵏ ⵉⴷⵖⵔⴰⵏⵏ, ⴷ ⵓⵙⴻⵙⵙⴰⵖ ⵏ ⵡⵉⵢⵢⴰⴹ ⵉ ⵜⵎⵔⵙⵉⵍⵉⵏ ⵜⵉⵎⴰⵢⵏⵓⵜⵉⵏ ⴷ ⵜⴰⵙⵓⵔⵉⴼⵜ ⵜⴰⴷⵙⵍⴰⵏⵜ ⵉ ⵓⵙⴷⵓⵙ ⵏ ⵓⵙⵢⴰⴼⴰ ⵙ ⵜⴳⵯⵎⴰⵏⵉⵜ ⵜⴰⵏⴰⵎⵓⵔⵜ.
5. ⴷⴰ ⵜⴻⵜⵜⵔⴰⵔ ⵜⴰⵖⴹⴼⵜ ⵏ ⵉⵎⵙⵜⴳⴳⴰⵔⵏ ⴳ ⵉⴳⵔⴰⵏ ⴰⴽⴽⵯ ⴰⴷ ⵡⵓⵍⵓⵏ ⵡⵉⴷ ⴳⴰⵏⵉⵏ ⵓⵙⵍⵉⴳⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵉⵔⵔⴰ ⵏ ⵜⵙⴽⴽⴰⵏⵉⵏ ⴷ ⵜⴼⵉⵍⵉⵏ ⵏ ⵜⵎⵔⵙⵉⵍⵉⵏ ⵍⵍⵉ ⵙⵡⵓⴷⴷⵓⵏ, ⴰⴼⴰⴷ ⴰⴷ ⴰⵏⴼⵏ ⵉ ⵜⵣⴳⴰⵍⵉⵏ ⵏ ⵜⵉⵙⵏⵎⴰⵔⵔⴰⵜⵉⵏ ⴷ ⵜⵉⵏⵊⵕⵓⵎⵉⵏ ⴷ ⵜⵉⵏ ⵏ ⵓⵎⴰⵡⴰⵍ ⴳ ⵓⵙⵓⵖⵍ ⵙ ⵜⵎⴰⵣⵉⵖⵜ.
6. ⴰⵙⵓⵜⴳ ⵏⵏⵙ ⵉ ⵓⵙⵎⵔⵙ ⵏ ⵉⵎⵙⵜⴳⴳⴰⵔⵏ ⵏ ⵜⵔⴰⴱⴱⵓⵜ ⵏ ⵍⵃⴰⵙⴰⵏⵉⵢⴰ ⵏ ⵓⴳⴰⴷⵉⵔ ⵉⵙⴽⴽⵉⵍⵏ ⵏ ⵜⵎⴰⵣⵉⵖⵜ ⵜⵉⴼⵉⵏⴰⵖ ⴳ ⵉⵔⵉⴽⵉⵜⵏ ⵏ ⵉⵎⵓⵔⴰⵔⵏ, ⴷ ⴰⵔ ⵜⴻⵜⵜⵍⴰⵖⵉ ⵜⵉⵔⵓⴱⴱⴰ ⵢⴰⴹⵏ ⵏ ⵜⴱⵔⵣⴰ ⵜⴰⵏⴰⵎⵓⵔⵜ ⴰⴷ ⴳⴳⵏⵜ ⴰⵎ ⵎⴽⵍⵍⵉ ⵜⴳⴳ ⵜⵔⴰⴱⴱⵓⵜ ⴰⴷ, ⵉⴷⴷⵖ ⵜⴰⵎⴰⵣⵉⵖⵜ ⴷ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⵉⵏ ⵉⵎⵖⵔⵉⴱⵉⵢⵏ ⵎⴰⵕⵕⴰ.
7. ⴰⵍⴰⵖⵉ ⵏⵏⵙ ⵉ ⵜⵏⵎⵓⵔⵉⵜⵉⵏ ⴷ ⵉⵏⵎⵓⵔⵉⵜⵏ ⴰⴽⴽⵯ ⴰⴷ ⵣⵎⵎⵉⵎⵏ ⵉⵅⴼⴰⵡⵏ ⵏⵏⵙⵏ ⴳ ⵜⵍⴳⴰⵎⵉⵏ ⵏ ⵓⵙⵜⴰⵢ ⵃⵎⴰ ⴰⴷ ⴳⴳⵏ ⴰⵣⵔⴼ ⵏⵏⵙⵏ ⴰⵎⵏⴹⴰⵡ ⴳ ⵜⴷⵔⴰⵡⵜ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⵙ ⵜⵖⴰⵔⴰⵙⵜ ⵏ ⵓⵙⵜⴰⵢ ⴷ ⵜⴷⵔⴰⵡⵜ ⴳ ⵜⵙⵉⵙⵜⴰⵏⵜ ⵏ ⵓⵙⵏⴼⵍ ⵏⵏⴰ ⵔⴰⵏ, ⵍⵍⵉ ⵓⵔ ⵉⵣⵎⵉⵔⵏ ⴰⴷ ⵢⵉⵍⵉ ⵖⴰⵙ ⵙ ⵉⵙⵜⴰⵢⵏ ⵓⵣⴷⵉⴳⵏ ⵉⵏⴰⴼⴰⵡⵏ, ⵎⴽⵍⵍⵉ ⵉⵍⵍⴰⵏ ⴳ ⵜⴷⵉⵎⵓⵇⵔⴰⵜⵉⵢⵉⵏ ⴰⴽⴽⵯ

ⴰⵙⵉⵔⴰ ⵏ ⵓⵣⵣⴳⵉⵔ
ⴰⵙⵍⵡⴰⵢ