ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙⵎⴷⵏ ⵜⴰⴷⴳⴳⵯⴰⵜ ⵏ ⵢⵉⴹⴳⴰⵎ 19 ⵎⴰⵢⵢⵓ 2024 ⵉⵎⵓⵙⵙⵓⵜⵏ ⵏ ⵜⵙⵓⵜⵍⵜ ⵜⵉⵙ 29 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⵏⵏⴰ ⵜⵙⵏⵎⴰⵍⴰ, ⴷⴷⵓ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⴼⵔⴳ ⵕⴱⴱⵉ, ⵜⵎⴰⵡⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵏⵢⴰⵍⴽⴰⵎ ⵙ ⵜⵓⵛⵛⵔⴽⴰ ⴷ ⵍⵡⵉⵍⴰⵢⴰ ⵏ ⵜⵎⵏⴰⴹⵜ ⵏ ⵕⵕⴱⴰⵟ ⵙⵍⴰ ⵍⵇⵏⵉⵟⵕⴰ, ⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵕⵕⴱⴰⵟ ⵙⵍⴰ ⵍⵇⵏⵉⵟⵕⴰ ⴷ ⵜⴳⵔⴰⵡⵜ ⵏ ⵕⵕⴱⴰⵟ.
ⵜⵥⵍⵉ ⵜⵙⵓⵜⵍⵜ ⴰⴷ ⵙ ⵓⵙⴱⵔⵔⴽ ⵏ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵓⵙⴳⵎⵉ ⴷ ⵜⵎⴰⵙⵙⴰⵏⵜ ⴷ ⵜⴷⵍⵙⴰ (ⵢⵓⵏⵉⵙⴽⵓ) ⴰⵎ ⵉⵏⴱⴳⵉ ⴰⵍⴰⵍⵍⵓ, ⵉⴳ ⵓⵙⴱⵔⵔⴽ ⴰⴷ ⵜⴰⵢⴰⴼⵓⵜ ⵏ ⵓⵎⵢⴰⵡⴰⵙ ⵢⵓⴼⴰⵏ ⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵜⵎⴰⴷⴷⴰⵙⵜ ⴰⴷ ⵜⴰⴳⵔⴰⵖⵍⴰⵏⵜ, ⴷ ⴳ ⵓⵎⵏⴰⴹ ⵏⵏⴰ ⵉⵥⵕⵕⴰⵏ ⵢⴰⵜ ⵜⴳⵔⵓⵎⵎⴰ ⵏ ⵜⵢⴰⴼⵓⵜⵉⵏ ⵏⵏⴰ ⵉⵎⵎⴰⵍⵏ ⵜⵉⵏⴷⵉ ⵏ ⵓⵙⴰⵜⵉⴳ ⵏ ⵢⴰⵜ ⵜⴳⵔⵓⵎⵎⴰ ⵏ ⵉⴼⵔⴷⵉⵙⵏ ⵉⴷⵍⵙⴰⵏⵏ ⵉⵎⵖⵔⴰⴱⵉⵢⵏ ⵖⵓⵔ ⴰⵎⵏⴰⴷ ⴰⵏⴼⴳⴰⵏ.
ⵜⵥⵕⴰ ⵜⵙⵓⵜⵍⵜ ⵜⴰⴷⵔⴰⵡⵜ ⵏ 743 ⵏ ⵓⵎⵙⴼⵙⵔ, ⵖ ⵍⵍⴰⵏ 290 ⵙ ⵜⴷⵔⴰⵡⵜ ⵜⵓⵙⵔⵉⴷⵜ, ⴷ 453 ⵙ ⵜⴷⵔⴰⵡⵜ ⵜⴰⵔⵓⵙⵔⵉⴷⵜ, ⵙⵎⴷⵢⴰⵏ 48 ⵏ ⵓⵡⴰⵏⴽ, ⵙⵙⵎⵏⵉⴷⵏ ⴰⴼⵙⵔ ⵏ ⵓⵏⵜⴰⵎ ⴰⵎⵢⴰⵏⴰⵡ, ⵢⵓⵜⵉ ⴳⵉⵙ ⵡⵓⵟⵟⵓⵏ ⵏ ⵉⵣⵡⵍⵏ 100.000, ⵓⵎⴰⵏ ⵜⵓⴳⵜⵜ ⵏ ⵢⵉⴳⵔⴰⵏ ⵉⵡⵙⵙⴰⵏⵏ ⵎⵣⴰⵔⴰⵢⵏⵉⵏ, ⴷ ⵡⴰⵏⴰⵡⵏ ⵉⵙⵏⴼⵍⵓⵍⵏ ⵎⵢⴰⵏⴰⵡⵏⵉⵏ.
ⴳ ⵓⵙⵡⵉⵔ ⵏ ⵓⵙⵖⵉⵡⵙ ⴰⴷⵍⵙⴰⵏ ⵜⴻⵜⵜⵢⴰⵙⵙⴰⵏ ⵙ ⵓⵙⴳⵓⴷⵉ ⴷ ⵓⵎⵢⴰⵏⴰⵡ ⵙ ⵢⴰⵜ ⵜⵡⵍⴰⴼⵜ ⵜⵓⵊⵊⴰ ⵉⵙⴰⵢⵔⴰⵔⵏ ⵏ ⵓⵙⴼⵙⵔ ⴰⴷ ⴰⵖⵓⵍⵏ ⴷ ⵢⴰⵏ ⵓⵏⵎⵓⵇⵇⴰⵔ ⴰⵡⵏⴳⵉⵎ ⴷ ⵓⵙⵏⴼⵍⵓⵍⴰⵏ ⵉⵡⵙⵏ ⴳⵉⵙ ⵉⵎⵙⵡⵉⵏⴳⵉⵎⵏ ⴷ ⵉⵎⵔⵣⵓⵜⵏ ⴷ ⵉⵎⵏⴳⴰⵍⵏ ⴷ ⵉⵎⴷⵢⴰⵣⵏ, ⵍⵍⵉⵖ ⵍⴽⵎⵏⵜ ⵜⵉⵍⴰⵍ ⵓⴳⴳⴰⵔ ⵏ 1480 ⵏ ⵜⵙⴷⴷⴰⵔⵜ ⵜⴰⴷⵍⵙⴰⵏⵜ, ⴳⵉⵙ 320 ⵏ ⵜⵙⴷⴷⴰⵔⵜ ⵙ ⵓⵙⵏⵎⴰⵍⴰ ⵓⵙⵔⵉⴷ ⵙⴳ ⴷⴰⵔ ⵜⵎⴰⵡⴰⵙⵜ ⵏⵉⵖ ⵙ ⵜⵓⵛⵛⵔⴽⴰ ⴰⴽⴷ ⵡⴰⵎⵎⴰⵙⵏ ⵏ ⵓⵔⵣⵣⵓ ⴷ ⵓⵏⴱⵉⴹⵏ ⵏⵏⴰ ⵉⴷⵔⴰⵏ, ⵍⴽⵎⵏ ⵉⵏⴽⵛⴰⵎⵏ ⵉⵎⴷⵔⴰⵡⵏ ⴳ ⵓⵣⵓⴳⵣ ⵏ ⵓⵙⵖⵉⵡⵙ ⴰⴷⵍⵙⴰⵏ ⵓⴳⴳⴰⵔ ⵏ 3703 ⴳ ⵏⵉⵜ ⵍⵍⴰⵏ ⵉⵏⴽⵛⴰⵎⵏ ⵏ ⵓⵖⴰⵡⴰⵙ ⵏ ⵜⵎⴰⵡⴰⵙⵜ ⵏⵏⴰ ⵉⵍⴽⵎⵏ 885 ⵏ ⵓⵎⴰⴷⵔⴰⵡ.
ⵙ ⵎⴰⴷ ⵉⵥⵍⵉⵏ ⵙ ⵜⴳⵔⵓⵎⵎⴰ ⵏ ⵜⵎⵥⵉ ⵜⵙⵙⵎⵏⵉⴷ ⵜⵙⵓⵜⵍⵜ ⴰⴷ ⵢⴰⵏ ⵓⴼⵙⵔ ⴰⵙⴷⵍⵙⴰⵏ ⴷ ⵓⵎⵙⵓⵔⴰⵔ ⴷⴷⵓ ⵜⵎⴰⵜⴰⵔⵜ: ⵜⵓⵎⵔⵜ ⵙ ⵉⴽⵯⵍⴰⵏ, ⵉⵡⴰⵜⵜⵙ ⵜⵉⴳⵎⵉ ⵏ ⵜⵓⵙⵙⵏⵉⵡⵉⵏ ⴷ ⵓⵙⴱⵓⵖⵍⵓ ⵏ ⵓⵎⵍⴰⵏ ⵙⴳ ⵢⴰⵏ ⵓⵖⴰⵡⴰⵙ ⵏⵏⴰ ⵢⵓⵎⴰⵏ ⵓⴳⴳⴰⵔ 10000 ⵏ ⵜⵙⴰⵡⵔⵜ.
ⴳ ⵢⴰⵜ ⵜⵙⵏⵜⴰⵢⵜ ⵏⵏⴰ ⵊⵊⵓ ⵓⵔ ⵉⵍⵍⵉⵏ, ⵜⵥⵍⵉ ⵜⵙⵓⵜⵍⵜ ⵢⴰⵏ ⵓⵙⴰⵢⵔⴰⵔ ⴰⵎⴰⵢⵏⵓ ⵏ ⵉⵙⵏⴼⵍⵓⵍⵏ ⵏ ⵡⵉⴷ ⵜⵜⵢⴰⵡⵙⵙⴰⵏⵏⵉⵏ ⴳ ⵉⵎⵙⵙⵓⵏⵖⵏ ⴷ ⵉⵎⵙⵏⴼⵍⵓⵍⵏ ⵏ ⵜⵓⵍⵍⵉⵙⵉⵏ ⵏ ⵓⵎⴰⴹⴰⵍ ⵏ ⵎⴰⵕⴼⵍ ⴷ ⵡⴰⴷⵉⵙⵉ Marvel & DC, ⵉⵥⵕⴰ ⵓⵙⴰⵢⵔⴰⵔ ⴰⴷ ⴰⵙⵏⵎⴰⵍⴰ ⵏ ⵡⵓⴳⴳⴰⵔ ⵏ 51 ⵏ ⵓⵎⵓⵙⵙⵓ ⵙⵙⴱⵖⵔⵏ ⴳⵉⵙ ⵙ ⵜⵡⵍⴰⴼⵜ ⵜⵓⵙⵔⵉⴷⵜ ⵓⴳⴳⴰⵔ ⵏ 15000 ⵏ ⵓⵎⵙⵙⴱⵖⵔ ⴳ ⵜⵉⵣⵉ ⴰⴽⴽⵯ ⵏ ⵓⵙⴼⵙⵔ.
ⴳ ⵎⴰⴷ ⵉⵥⵍⵉⵏ ⵙ ⵓⵖⴰⵎⵓⵙ ⴰⵏⵖⵎⴰⵙ ⵏ ⵜⵙⵓⵜⵍⵜ ⴰⴷ ⵉⵜⵜⵓⵙⴽⴰⵔ ⴳ ⵓⵙⴰⵜⵉ ⵏ ⵉⴷⵔⴰⵡⵏ ⵉⵏⵖⵎⴰⵙⵏ ⴰⴽⴷ 68 ⵏ ⵜⵎⵔⵙⵍⵜ ⵜⴰⵏⵖⵎⴰⵙⵜ ⵉⵜⵜⵓⵥⵕⴰⵏ ⴷ ⵉⵜⵜⵓⵙⵍⵍⴰⵏ ⴷ ⵉⵜⵜⵢⴰⵡⵖⵔⴰⵏ, ⵡⵉⵏ ⵜⵏⴼⵓⵍⵜ ⴷ ⵓⵍⵉⴽⵟⵕⵓⵏⵉ, ⵙⴳ ⵍⵎⵖⵔⵉⴱ ⴷ ⴱⵕⵕⴰ.
ⵙ ⵉⵙⴼⴽⴰ ⴰⴷ ⵏ ⵓⵙⵉⴹⵏ ⵉⵅⴰⵜⴰⵔⵏ, ⵜⵣⵣⴳⵔ ⵜⵙⵓⵜⵍⵜ 29 ⵢⴰⵏ ⵓⵙⵔⵙ ⴰⵎⴰⵢⵏⵓ ⴳ ⵓⵙⴰⴽⴰ ⵏ ⵜⵎⵙⴰⵔⵜ ⴰⴷ ⵜⴰⴷⵍⵙⴰⵏⵜ ⵏⵏⴰ ⵉⵙⵙⵏⵥⵓⵏ ⴳ ⴽⵓ ⵜⴰⵙⵓⵜⵍⵜ ⵅⴼ ⵜⵉⵏⴷⵉ ⴷ ⵓⵙⵖⴰⵡⵙⴰ ⵏ ⵜⵓⴳⴳⴰⵙ ⵜⵜⵢⴰⵡⴼⴽⴰⵏⵉⵏ, ⴰⴼⴰⴷ ⴰⴷ ⵢⴰⵥ ⵓⴷⵍⵉⵙ ⵉ ⵉⵏⵎⵓⵔⴰⵏ, ⵎⴽⵍⵍⵉ ⵉⵙⵙⵏⵥⵓ ⵅⴼ ⵓⵙⵓⴼⵓ ⵏⵏⴰ ⵉⵎⵎⴰⵍ ⵓⴳⴷⵓⴷ ⵏ ⵓⵙⴼⵙⵔ, ⵎⴰⵢⴰⴷ ⴰⵔ ⵜ ⵎⵎⴰⵍⵏ ⵡⵓⵟⵜⵓⵏⵏ ⵉⵅⴰⵜⴰⵔⵏ ⵏⵏⴰ ⴷ ⵉⴳⴳⵓⴷⵉⵏ ⵙ ⵓⵙⴰⵢⵔⴰⵔ ⵏ ⵓⵙⴼⵙⵔ, ⴷ ⵏⵏⴰ ⵉⵣⵣⵔⵉⵏ 316 ⵏ ⵢⵉⴼⴹ ⵏ ⵓⵔⵣⴰⴼ ⵙ ⵡⵓⵍⵓⵢ ⵏ 32%.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
