ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙⴳ ⵜⵥⵕⵉⴳⵉⵏ ⵏ ⵜⵣⵍⵖⴰ ⵏ ⵜⵉⵔⵔⴰ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵙⵙⴼⵓⵖ ⴷ ⵓⵙⵍⵎⴰⴷ ⴷ ⵓⵎⴰⵔⴰ ⴷ ⵓⵎⴰⴼⵔⴰⵏ ⵎⴰⵙⵙ ⵍⵃⵙⵏ ⵣⴰⵀⵓⵔ ⵢⴰⵏ ⵓⴷⵍⵉⵙ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ, ⵉⵥⵍⵉⵏ ⵙ ⵜⵣⵔⴰⵡⵉⵏ ⴼ ⵜⵙⴽⵍⴰ ⵜⴰⵎⴰⵣⵉⵖⵜ, ⴳⵉⵙ ⵎⴰⴷ ⵉⴳⴰⵏ 312 ⵏ ⵜⵙⵏⴰ. ⴰⵣⵡⵍ ⵏⵏⵙ: ⵜⴰⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ ⴳ ⵍⵎⵖⵔⵉⴱ: ⵜⴰⵍⴰⵍⵉⵜ, 1967-2000.
ⵉⵥⵍⵉ ⵓⴷⵍⵉⵙ ⴰⴷ ⵙ ⵜⵖⵔⵉ ⵏ ⵡⴰⵏⴰⵡⵏ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵍⵍⴰⵏⵉⵏ ⴳⵔ ⵓⵙⴳⴳⵯⴰⵙ ⵏ 1967 ⴷ 2000, ⵜⴰⴼⵔⴽⴰ ⵏ ⵡⴰⴽⵓⴷ ⵉⵍⵍⴰⵏ ⴷⴰⵜ ⵏ ⵓⵙⵉⵙⵙⵏ ⴰⵎⴰⴷⴷⵓⴷ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ. ⵜⴰⴼⵔⴽⴰ ⴰⴷ ⵍⵍⵉⵖ ⵥⴹⴰⵕⵏ ⵉⵏⴱⴷⴰⴷⵏ ⴷ ⵉⵎⵖⵏⴰⵙⵏ ⵏ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⴰⴷ ⵙⴽⵔⵏ ⵢⴰⵏ ⵓⵙⴳⵓⴷⵉ ⵉⴳⴳⵓⵜⵏ ⴳ ⵢⵉⴳⵔ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⴳ ⵎⴰⴷ ⵉⵥⵍⵉⵏ ⵙ ⵓⵙⵎⵓⵏ ⵏ ⵡⴰⵏⴰⵡⵏ ⵉⵎⵉⵡⴰⵏⵏ ⴷ ⵜⵖⵓⵕⵉⵡⵉⵏ ⴷ ⵉⵔⵣⵣⵓⵜⵏ ⴷ ⵓⵙⵏⴼⵍⵓⵍ, ⵖⵎⴽ ⴰⵏⵏ ⵓⵍⴰ ⴷ ⵓⵙⵎⴰⵢⵏⵓ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵙ ⵓⵙⵏⴼⵍⵓⵍ ⵏ ⵡⴰⵏⴰⵡⵏ ⵉⵙⴽⵍⴰⵏⵏ ⴷ ⵡⵉⵏ ⵜⵉⵔⵔⴰ ⵜⴰⵙⴽⵍⴰⵏⵜ ⵍⵍⵉ ⴰⴷ ⵓⵔ ⵍⵍⵉⵏⵉⵏ ⴳ ⵎⴰⴷ ⵉⵣⵔⵉⵏ.
ⴰⴷⵍⵉⵙ ⴰⴷ ⵏ ⵓⴼⵔⴰⵏ ⴰⵙⴽⵍⴰⵏ, ⴰⵔ ⵢⴰⴽⴽⴰ ⵉ ⵉⵎⵖⵔⵉ ⵉⵙⵉⵙⴼⵉⵡⵏ ⴳⴳⵓⵜⵏⵉⵏ ⴼ ⵜⴼⵔⴽⴰ ⴰⴷ, ⵍⵍⵉ ⵉⴳⴰⵏ ⵜⴰⵎⵙⴽⴰⵔⵜ ⵜⴰⵜⵔⴰⵔⵜ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ. ⵎⴰ ⴰⴷ ⵓⵔ ⴰⵔ ⵉⵜⵜⵉⵏⵉ ⵎⴰⵙ ⵜⵙⵙⵏⵜⵉ ⵜⵙⴽⵍⴰ ⵜⴰⵎⴰⵣⵉⵖⵜ ⵙⴳ ⵜⵣⵡⵉⵔⵉ ⵏ ⵓⵙⴳⴳⵯⴰⵙ ⴰⵏⵏ, ⴰⵎⴰⴷⴰⵏ ⴰⵎⴰⵣⵉⵖ ⵢⵓⵔⴰ ⴷ ⴰⵔ ⵉⵜⵜⴰⵔⴰ ⵙ ⵜⵓⵜⵍⴰⵢⵜ ⵏⵏⵙ ⵓⵍⴰ ⵜⵓⵜⵍⴰⵢⵉⵏ ⵏ ⵡⵉⵢⵢⴰⴹ ⵙⴳ ⵜⴰⵙⵓⵜⵉⵏ ⴳⴳⵓⵜⵏⵉⵏ ⵣⵔⵉⵏⵉⵏ, ⵢⵓⵔⴰ ⵙⴳ ⵎⴰⴷ ⵢⵓⴼⴰ ⴰⵙⴽⴽⵉⵍ ⵉⵥⵍⵉⵏ ⵙ ⵜⵓⵜⵍⴰⵢⵜ ⵏⵏⵙ, ⴰⵙⴽⴽⵉⵍ ⵏ ⵜⴼⵉⵏⴰⵖ. ⵙⵓⵍ ⵓⴽⴰⵏ ⴰⵖ ⵎⵎⴰⵍⴰⵏ ⵉⵔⵣⵣⵓⵜⵏ ⵏ ⵓⵎⵣⵔⵓⵢ ⵜⵉⵎⵉⵜⴰⵔ ⵏ ⵜⵉⵔⵔⴰ ⴰⴷ ⵙ ⵜⵉⵢⴰⴼⵓⵜⵉⵏ ⵜⵜⵉⵍⵉⵏⵉⵏ ⴰⵣⵎⵣ ⴰⵔ ⵡⴰⵢⵢⴰⴹ.
ⴳ ⵓⴷⵍⵉⵙ ⴰⴷ, ⵉⵎⵎⴰⵖ ⵓⵎⵔⵣⵓ ⴰⴷ ⴰⵖ ⵉⴼⴽ ⵜⵓⴳⵜ ⵏ ⵉⵙⵉⵙⴼⵉⵡⵏ ⴼ ⵉⴹⵕⵉⵚⵏ ⵏ ⵜⵙⴽⵍⴰ ⴷ ⵓⴼⵔⴰⵏ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵍⵍⵉ ⵜⵜⵓⵣⵓⵣⵣⴰⵔⵏⵉⵏ ⴳ ⴽⵉⴳⴰⵏ ⵏ ⵉⵖⵎⵉⵙⵏ ⴷ ⵜⵙⵖⵓⵏⵉⵏ ⴷ ⵜⵣⵔⴰⵡⵉⵏ ⴷ ⵉⴷⵍⵉⵙⵏ. ⴰⵙⴳⵓⴷⵉ ⴰⴷ ⵏ ⵜⵉⵔⵔⴰ ⵉⴳⴳⵓⵜⵏ, ⵇⵇⴰⵏⵏⴷ ⵙⵓⵍ ⴰⴷ ⵉⵍⵉⵏ ⴽⵉⴳⴰⵏ ⵏ ⵜⵓⴳⴳⵯⴰⵙ ⵜⵉⵎⴳⵔⴰ ⵃⵎⴰ ⴰⴷ ⵢⵉⵍⵉ ⵓⵙⵎⵓⵏ ⵏⵏⵙ ⵉⵙⵎⴷⵏ ⵖⵎⴽ ⴰⵏⵏ ⵓⵍⴰ ⵜⵉⵖⵔⵉ ⴷ ⵓⵙⵎⵔⵙ ⵏⵏⵙ.
ⵜⵣⴷⵉ ⵜⵙⴽⵍⴰ ⵜⴰⵎⴰⵣⵉⵖⵜ ⴷ ⵎⴰⴷ ⵓⵔⴰⵏ ⵉⵔⴳⵔⴰⴳⵏ ⵍⵍⵉ ⵎⵎⴰⵖⵏⵉⵏ ⴰⴷ ⵙⵏⴼⵍⵏ ⵙⵙⵓⵖⵍⵏ ⵜⵓⴳⵜ ⵏ ⵜⵉⵔⵔⴰ ⵍⵍⴰⵏⵉⵏ ⴳ ⵉⴳⵔⴰⵏ ⵏ ⵓⵙⴳⴷ, ⴰⵢⵍⵍⵉⵖ ⴷⴰⵔⵏⵖ ⵉⵍⵍⴰ ⵢⴰⵏ ⵡⴰⵢⴷⴰ ⵉⴳⴳⵓⵜⵏ ⴳ ⵓⵎⵏⵉⴷ ⴰⴷ, ⵙ ⵜⵉⵎⵎⴰⴷ ⵏⵏⵙ ⵉⵜⵜⵢⵓⵔⴰⵏ ⴽⵓⵍⵍⵓ ⵙ ⵓⵙⴽⴽⵉⵍ ⴰⵕⴰⵎⵉ, ⵉⵍⵍⴰ ⵎⴰⴷ ⴳⵉⵙ ⵏⵏⵙⵏ, ⴷ ⵉⴼⴰⵡ ⵎⴰⵙ ⵙⵓⵍ ⵍⵍⴰⵏⵜ ⴽⵉⴳⴰⵏ ⵜⵖⴰⵡⵙⵉⵡⵉⵏ ⴳ ⵜⵙⴷⵍⵉⵙⵉⵏ ⵜⵓⵙⵍⵉⴳⵉⵏ, ⵖⵎⴽ ⴰⵏⵏ ⴷⴰⵔ ⵜⵎⵔⵙⴰⵍ ⵥⵍⵉⵏⵉⵏ. ⴳ ⵓⵎⵏⵉⴷ ⴰⴷ, ⴰⵔ ⵏⵙⴰⵡⴰⵍ ⵓⵍⴰ ⴼ ⵎⴰⵕⵕⴰ ⵎⴰⴷ ⵓⵔⴰⵏ ⵉⵎⵔⵣⵓⵜⵏ ⵉⴱⵕⵕⴰⵏⵉⵢⵏ ⴳⴰⵏⵉⵏ ⴰⵢⵜ ⴼⵕⴰⵏⵚⴰ ⴷ ⵚⴱⴰⵏⵢⴰ ⴰⵎ: ⵛⴰⵕⵍ ⴹⵓⴼⵓⴽⵓ ⴷ ⵍⵢⵓⴱⵓⵍⴹ ⵊⵓⵙⵜⵉⵏⴰⵔ ⴷ ⴰⵏⴹⵕⵉ ⴱⴰⵚⵚⵉ ⴷ ⵉⵎⵉⵍ ⵍⴰⵡⵓⵚⵟ ⴷ ⵡⵉⵢⵢⴰⴹ…, ⵖⵡⵉⴷ ⵓⵔⴰⵏ ⴽⵉⴳⴰⵏ ⵙⵎⵓⵏⵏ ⴽⵉⴳⴰⵏ ⵏ ⵜⵉⵔⵔⴰ ⴳ ⵍⵍⴰⵏ ⵉⵎⴰⵡⴰⵍⵏ ⴷ ⵜⵏⴼⵓⵙⵉⵏ ⴷ ⵜⵎⴷⵢⴰⵣⵉⵏ ⴷ ⵜⵣⵔⴰⵡⵉⵏ….ⴰⵢⴷⴰ ⴰⴷ ⵓⵍⴰ ⵏⵜⵜⴰⵏ, ⵉⵇⵇⴰⵏⴷ ⵓⵙⵎⵓⵏ ⵏⵏⵙ ⴷ ⵓⵍⴳⴳⵓⴷ.
ⴰⵔ ⵉⵜⵜⵉⵏⵉ ⵓⵎⵔⵣⵓ ⵏⵏⵖ ⴳ ⵓⴷⵍⵉⵙ ⴰⴷ ⵎⴰⵙ ⴷ ⵜⴰⵍⴰⵍⵉⵜ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ ⵜⵣⴷⵉ ⴷ ⵜⵍⴰⵍⵉⵜ ⵏ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⴳ ⵍⵎⵖⵔⵉⴱ, ⴳ ⵓⵙⴳⴳⵯⴰⵙ ⵏ 1967 ⴰⵙⴳⴳⵯⴰⵙ ⴳ ⵉⵍⵍⴰ ⵓⵙⴽⵔ ⵏ ⵜⵎⵙⵎⵓⵏⵜ ⵜⴰⵎⴰⵣⵉⵖⵜ ⵜⴰⵎⵣⵡⴰⵔⵓⵜ: ⴰⴷ ⵜⵜ ⵉⴳⴰⵏ ⴷ ⵓⴳⵔⴰⵡ ⵏ ⵍⵎⵖⵔⵉⴱ ⵉ ⵓⵙⵉⴳⴳⵍ ⴷ ⵉⵙⵏⴼⵍⵏ ⵏ ⵜⵓⵙⵙⵏⴰ, ⵜⵥⴹⴰⵕ ⵜⵙⴽⵍⴰ ⵜⴰⵎⴰⵣⵉⵖⵜ ⴰⴷ ⵜⵣⴳⵔ ⵙ ⵜⴼⵔⴽⴰ ⵏ ⵜⵎⴰⵜⵔⴰⵔⵜ ⵜⴰⵙⴽⵍⴰⵏⵜ, ⴳ ⵜⴼⵔⴽⴰ ⵍⵍⵉⵖ ⵏⵏ ⵜⵉⵜⵜⵉ ⴼ ⵜⵉⵔⵔⴰ ⴳ ⵢⵉⴳⵔ ⵏ ⵓⵙⴳⴷ ⴷ ⵜⵉⵔⵔⴰ ⵏ ⵜⵏⴼⵓⵙⵉⵏ ⴷ ⵓⵎⵉⵏ, ⵜⴽⵛⵎ ⵜⵉⵔⵎⵉⵜⵉⵏ ⵢⴰⴹⵏⵉⵏ ⴳⴰⵏⵉⵏ ⵜⵉⵎⴰⵢⵏⵓⵜⵉⵏ ⴰⵎ ⴰⵎⵣⴳⵓⵏ ⵍⵍⵉⵖ ⴷ ⵉⵙⵙⴼⵓⵖ ⵓⵎⴰⵔⴰ ⵚⵚⴰⴼⵉ ⵎⵓⵎⵏ ⵄⵍⵉ ⴰⴹⵕⵉⵚ ⴰⵎⵣⵡⴰⵔⵓ ⵏ ⵓⵎⵣⴳⵓⵏ ⵍⵍⵉ ⵉⴳⴰⵏ ⵙ ⵓⵣⵡⵍ:”ⵓⵙⵙⴰⵏ ⵚⵎⵎⵉⴹⵏⵉⵏ” ⴳ 1983, ⵖⵎⴽ ⵍⵍⵉ ⴷ ⵉⵙⵙⴼⵓⵖ ⵓⵎⴰⵔⴰ ⵃⴰⵙⴰⵏ ⵉⴷⴱⵍⵇⴰⵙⵎ ⵜⴰⴷⴰⵍⴰ ⵏ ⵜⵓⵍⵍⵉⵙⵜ ⵍⵍⵉ ⵉⴳⴰⵏ ⵙ ⵓⵣⵡⵍ: “ⵉⵎⴰⵔⴰⵢⵏ” ⴳ 1988. ⵖⵎⴽ ⵍⵍⵉ ⵉⵥⴹⴰⵕ ⵓⵎⴷⵢⴰⵣ ⴰⵅⴰⵜⴰⵔ ⵄⵍⵉ ⵚⴰⴷⵇⵉ ⴰⵣⴰⵢⴽⵓ ⴰⴷ ⵉⵙⵙⵏⵜⵉ ⵢⴰⵏ ⵓⵎⵓⵙⵙⵓ ⴰⵎⴰⵜⵔⴰⵔ ⴳ ⵢⵉⴳⵔ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ ⵙ ⵜⵓⵡⵛⴽⵉⵏⵜ ⵏⵏⵙ: ”ⵜⵉⵎⵉⵜⴰⵜ” ⵍⵍⵉⴷ ⵉⴼⴼⵖⵏ ⴳ ⵓⵙⴳⴳⵯⴰⵙ ⵏ 1988.
ⴰⴷⵍⵉⵙ ⴰⴷ ⴰⵎⴳⴳⴰⵔⵓ ⴷⴰⵔ ⵎⴰⵙⵙ ⵣⴰⵀⵓⵔ, ⵉⴳⴰ ⵉ ⵜⵖⵔⵉ ⵙⴳ ⵉⵎⵣⵔⴰⵡⵏ ⴷ ⵡⵉⴷⴰ ⵔⴰⵏⵉⵏ ⴰⴷ ⵙⵙⵏⵏ ⵓⴳⴳⴰⵔ ⴼ ⵜⵍⴰⵍⵉⵜ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ, ⴰⵛⴽⵓ ⴰⵔ ⵉⵙⵙⵉⵙⴼⵉⵡ ⵜⴰⴼⵔⴽⴰ ⴰⴷ ⵜⴰⵎⵣⵡⴰⵔⵓⵜ ⵉⵍⵍⴰⵏ ⴷⴰⵜ ⵏ ⵓⴱⵓⵖⵍⴰ ⵏ ⵜⵙⴽⵍⴰ ⴰⴷ. ⵉⵣⵓⵣⵣⵔ ⵓⵍⴰ ⵢⴰⵜ ⵜⴷⵍⵙⴰ ⵉⵣⴷⵉⵏ ⴷ ⵜⵉⵔⵔⴰ ⵏ ⵓⵎⵣⵔⵓⵢ ⵏ ⵜⵙⴽⵍⴰ ⵜⴰⵎⴰⵣⵉⵖⵜ.
- ⵕⴰⵛⵉⴷ ⵏⴰⵊⵉⴱ
