ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙ ⵓⵣⵣⵉⴳⵣ ⵅⴼ ⵜⴱⵔⵉⴷⵜ ⵏⵏⵙ ⴳ ⵓⴹⴼⴼⵓⵕ ⴷ ⵓⵙⵜⴰⵍ ⵏ ⵜⵎⵀⵍⵜ ⵏ ⵓⵙⵜⴰⵢ ⵏ ⵡⴰⵙⵙ ⵏ 8 ⵛⵓⵜⴰⵏⴱⵉⵔ 2021 ⴷ ⵓⴼⵓⵖⵏ ⵏⵏⵙ ⵉⵙⵔⵜⴰⵏⵏ, ⵜⴹⴼⵕ ⵜⴰⴹⴰ ⵜⴰⵎⵖⵔⴰⴱⵉⵜ ⵏ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ ⵉⵜⵜⵡⴰⵙⵙⴰⵏⵏ ⵙ « ⵜⴰⴹⴰ ⵜⴰⵎⵖⵔⴰⴱⵉⵜ » ⵉⵎⵛⴰⵡⵕⵏ ⵏ ⵓⵎⵙⵉⵍⵖ ⵏ ⵜⵏⴱⴰⴹⵜ ⴷ ⵜⵢⴰⴼⵓⵜⵉⵏ ⵜⵜ ⵉⴷ ⵉⵡⴰⵍⴰⵏ, ⵎⴽⵍⵍⵉ ⵉⴹⴼⵕ ⵜⵓⵎⴰⵢⵉⵏ ⵏ ⵜⵙⴳⵓⵔⵉ ⵜⵓⵏⴱⵉⴹⵜ ⴷⴰ ⵉⴳⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⵏⵉⴷ ⵏ ⵓⴱⵕⵍⴰⵎⴰⵏ. ⵙ ⵓⵢⴰ ⴷⴰ ⵜⴻⵜⵜⵍⴰⵖⵉ ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ ⴰⵢ ⴷ ⵉⴷⴷⴰⵏ :
1. ⴰⵙⵓⵜⴳ ⵏⵏⵙ ⵙ ⵉⵣⵎⴰⵣ ⵉⵎⵏⵍⵍⵉⵜⵏ ⵍⵍⵉ ⵉⴽⴽⴰ ⵡⴰⴽⵓⴷ ⵏ ⵉⵎⵛⴰⵡⵕⵏ ⵏ ⵓⵎⵙⵉⵍⵖ ⵏ ⵜⵏⴱⴰⴹⵜ, ⴷ ⵜⵎⵥⵍⴰ ⵍⵍⵉ ⵅⴼ ⵉⴱⴷⴷ ⵓⵙⵜⴰⵢ ⵏ ⵉⴽⴰⴱⴰⵕⵏ ⵏ ⵜⵓⴳⵜ ⵜⵓⵏⴱⵉⴹⵜ ⵉⴷⴷⵖ ⵜⴻⵜⵜⵡⴰⴳⴳ ⴳ ⴽⵕⴰⴹ ⵉⴽⴰⴱⴰⵕⵏ ⴷⴰ ⵎⵉ ⴼⴽⴰⵏ ⵉⵎⵖⵔⵉⴱⵉⵢⵏ ⵜⵉⵙⴽⵯⴼⴰⵍ ⵣⵡⴰⵔⵏⵉⵏ.
2. ⴰⵙⵎⵖⵔ ⵏⵏⵙ ⵙ ⵓⵏⵣⵡⵉ ⴰⵎⴰⵜⴰⵢ ⵉⴷⵍⵏ ⵜⵉⴼⵔⴽⵜ ⵏ ⴹⴰⵕⵜ ⵏ ⵜⵢⴰⴼⵓⵜⵉⵏ ⵏ ⵓⵙⵜⴰⵢ, ⵙ ⵎⴰⴷ ⵉⵥⵍⵉⵏ ⵙ ⵜⵓⴼⵔⴰⵢⵜ ⵏ ⵜⵎⵙⵜⴳⴳⴰⵔⵜ ⵏ ⵉⴽⴰⴱⴰⵕⵏ ⵉⵎⵔⵣⵓⵜⵏ ⴳ ⵉⵙⵜⴰⵢⵏ ⴰⴷ, ⴰⵡⴷ ⴰⵙⵡⵉⵔ ⴰⵙⵔⵜⴰⵏ ⵢⴰⵜⵜⵓⵢⵏ ⵏⵏⴰ ⵉⴳⴰⵏ ⴰⴼⵔⵉⵙ ⴰⵅⴰⵜⴰⵔ ⵏ ⵜⵎⵙⴽⵉⵔⵜ ⵏ ⵉⴽⴰⴱⴰⵕⵏ ⵓⵔ ⵉⵔⵣⴰⵏ ⵙ ⵜⴼⵍⵙⵜ ⵏ ⵉⵎⵙⵜⴰⵢⵏ; ⴷ ⵉⵖ ⵉⵟⵟⴼ ⵓⵙⴽⴽⵉⵏ ⴰⴷ ⵉⵏⵓⵎⴰⴽ, ⴷⴰ ⵉⵎⵎⴰⵍ ⵎⴰⵙⴷ ⴰⵎⴰⵏⵏⴰⵢ ⵏⵏⵖ ⴰⵙⵔⵜⴰⵏ ⵢⵉⵡⴹ ⴰⵙⵡⵉⵔ ⵢⴰⵜⵜⵓⵢⵏ.
3. ⴰⵙⵓⵜⴳ ⵏⵏⵙ ⵙ ⵡⴰⵏⵙⴰ ⴷ ⵓⴽⵙⴰⵢ ⵏ ⵜⵎⴰⵣⵉⵖⵜ ⴳ ⵓⵖⴰⵡⴰⵙ ⵓⵏⴱⵉⴹ, ⵉⴷⴷⵖ ⵜⴽⵛⵎ ⴳ ⵎⵔⴰⵡ ⵉⵙⵖⵡⴰⵏ ⵏ ⵜⵏⴱⴰⴹⵜ, ⴷ ⵜⵙⵓⵍⴰⵏⵜ ⵏ ⵓⵙⵓⵖⵏ ⵏ ⵓⵙⵔⵙ ⵏ ⵢⴰⵜ ⵜⴼⵏⵉⵇⵜ ⵉⵥⵍⵉⵏ ⵙ ⵜⵏⴰⵍⵉⵜ ⵏ ⵓⵙⵙⵥⵕⴼ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴰⵡⴷ ⵜⵓⴳⵉ ⵏ ⵜⵙⵇⵇⵉⵎⵜ ⵜⴰⵏⵙⵙⴼⴰⵡⵜ ⵜⴰⵏⴰⵎⵓⵔⵜ ⴷ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵉ ⵓⴹⴼⴼⵓⵕ ⵏ ⵓⵣⵣⵓⴳⵣ ⴰⴷ.
4. ⴷⴰ ⵜⴻⵜⵜⴰⵏⵏⴰⵢ ⵉⵙⵖⵡⴰⵏ ⵓⵏⴱⵉⴹⵏ ⵉⵣⴷⵉⵏ ⴷ ⵜⵎⴰⵣⵉⵖⵜ, ⴰⵙⵎⴰⵢⵏⵓ ⴳ ⵓⵙⵡⵓⴷⴷⵓ ⵏ ⵓⵙⴷⴰⵡ ⴰⵎⴰⵣⵉⵖ ⴷⴰⵔ ⵜⵏⴱⴰⴹⵉⵏ ⵉⵍⵍⴰⵏ ⵙⴳ ⴰⵍⵖⵓ ⴰⴳⵍⴷⴰⵏ ⵅⴼ ⵜⵙⵔⵜⵉⵜ ⵜⴰⵏⴰⵎⵓⵔⵜ ⵜⴰⵎⴰⵢⵏⵓⵜ ⵜⴰⵏⵉⵍⴰⵏ ⵜⵎⴰⵣⵉⵖⵜ ⴰⵙⴳⴳⵯⴰⵙ ⵏ 2001. ⴰⵎⵣⵡⴰⵔⵓ,ⴰⵙⵎⴰⵢⵏⵓ ⵏ ⵜⵔⵙⵍⵜ ⵏⵏⵙ; ⵡⵉⵙⵙ ⵙⵉⵏ, ⴰⵣⴷⴷⵓⵢ ⵏ ⵉⵙⵖⵡⴰⵏ ⵙ ⵜⴷⵔⵉⵎⵜ ⵍⵍⵉ ⴰⵙⵏ ⵉⵜⵜⵓⵥⵍⴰⵢⵏ, ⵡⵉⵙⵙ ⴽⵕⴰⴹ, ⵜⴰⵎⵓⵣⵔⵜ ⵜⴰⵎⵓⴳⴳⵉⵜ ⴷⴰⵔ ⵍⵍⴰⵏⵜ ⵜⵣⵎⵎⴰⵔ ⵏ ⵓⴹⴼⴼⵓⵕ ⴷ ⵓⵣⴳⴳⵉⵔ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵏⵎⵏⴰⴹ, ⴰⵎⴳⴳⴰⵔⵓ, ⵜⵉⵏⵏⵓⴱⴹⴰ ⵉⵍⵍⴰⵏ ⴳ ⵓⵙⵡⵉⵔ ⵏ ⵓⵏⴰⵥⴰⵕ.
5. ⴷⴰ ⵜⵥⵕⵕⴰ ⵎⴰⵙⴷ ⵜⵉⵖⵉⵙⵜ ⵜⴰⵎⴳⵔⵓⵜ ⵏ ⵉⵎⵖⵔⵉⴱⵉⵢⵏ ⵙ ⵜⵎⵓⵣⵔⵜ ⵏ ⵓⴳⵍⵍⵉⴷ, ⵜⵣⵎⵔ ⴰⴷ ⵜⵙⴰⵜⵜⵓⵢ ⵉⵏⴰⵥⴰⵕⵏ ⵉⵊⵢⵓⵙⵜⵔⴰⵜⵉⵊⵉⵢⵏ ⵏ ⵜⵎⴰⵣⵉⵔⵜ, ⵢⵉⵣⵎⵔ ⴰⵡⴷ ⴰⴷ ⵉⴱⴷⴷ ⴷⴰⵜ ⵏ ⵜⵎⵣⵉⵜⵉⵡⵉⵏ ⵏ ⵡⴰⴽⵓⴷ ⵏ ⵡⴰⵔⵙⵍⴽⵏ ⵍⵍⵉ ⵜⵍⴽⵎ ⵜⵉⴼⴼⵓⴳⵏⴰ, ⵎⴽⵍⵍⵉ ⵜⵙⴷⴷⵉⴷ (ⵜⵉⵖⵉⵙⵜ ⵜⴰⵎⴳⵔⵓⵜ ⵏ ⵉⵎⵖⵔⵉⴱⵉⵢⵏ) ⴳ ⵓⵙⵡⵓⴷⴷⵓ ⵉⵎⵓⵔⵙⵏ ⵉ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⴰⵢⵍⵍⵉ ⵜ ⵉⴷ ⵉⴹⴼⵕⵏ.
ⴰⵙⵉⵔⴰ ⵏ ⵓⵣⵣⴳⵉⵔ:
ⴰⵙⵍⵡⴰⵢ: ⵄⴱⴷⵍⵍⴰⵀ ⵃⵉⵜⵜⵓⵙ
