ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⵙⵎⵎⴰⵍ ⵏ ⵜⴽⵓⵏⴼⵉⴷⵉⵕⴰⵍⵉⵜ ⵜⴰⵎⵓⵏⵜ ⵏ ⵉⴼⴼⵓⵙ
ⴷⴼⴼⵉⵔ ⵏ ⵓⵙⵏⵎⴰⵍⴰ ⵏ ⵡⴰⵙⵙ ⴰⵏⵎⵍⴰⵏ ⵉ ⵢⵉⵙⵓⵜⴰⵢ ⵏ ⵜⵎⵙⵎⵓⵏⵉⵏ ⵏ ⵜⴽⵓⵏⴼⵉⴷⵉⵕⴰⵍⵉⵜ
ⵜⵙⵏⵎⴰⵍⴰ ⵜⴽⵓⵏⴼⵉⴷⵉⵕⴰⵍⵉⵜ ⵜⴰⵎⵓⵏⵜ ⵏ ⵉⴼⴼⵓⵙ ⴰⵙⵙ ⵏ: 29 ⵢⵓⵏⵢⵓ 2024 ⴳ ⵓⴳⴰⴷⵉⵔ ⵢⴰⵏ ⵡⴰⵙⵙ ⴰⵏⵎⵍⴰⵏ ⵉⵥⵍⵉⵏ ⵉ ⵢⵉⵙⵓⵏⴰⵢ ⵏ ⵜⵎⵙⵎⵓⵏⵉⵏ ⵢⴰⵎⵓⵏ ⴳ ⵜⴽⵓⵏⴼⵉⴷⵉⵕⴰⵍⵉⵜ. ⴹⴰⵕⵜ ⵏ ⵓⵙⵙⴼⵍⴷ ⵉ ⵜⵉⵏⴰⵡⵉⵏ ⵉⵜⵜⵓⵢⵙⴽⴰⵔⵏ ⴷ ⵓⵎⵢⴰⵏⵏⴰ ⵅⴼ ⵜⴱⵔⵉⴷⵉⵏ ⵏ ⵜⵡⵓⵔⵉ ⵏ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴳ ⵉⵙⵡⵉⵔⵏ ⴰⵙⴳⴰⵡⴰⵏ ⴷ ⵓⵏⴰⵎⵓⵔ, ⵜⴹⵉ ⴷ ⵜⴽⵓⵏⴼⵉⴷⵉⵕⴰⵍⵉⵜ ⴰⵙⵎⵎⴰⵍ ⴰⴷ:
- ⴰⵔ ⵜⴻⵜⵜⵏⴽⴰⴹ ⴽⵉⴳⴰⵏ ⵙ ⵜⵓⴽⵢⴰ ⵉⵜⵜⵡⴰⵜⵙⵏ ⵏ ⵓⵎⵣⴰⵣ ⴰⵙⴰⵍⴰⴼⵉ ⴱⵓ ⵜⵉⵍⵍⴰⵙ ⴷ ⵓⵄⵕⵓⴱⵉ ⵉⴳⴰⵏ ⵎⴳⴰⵍ ⵏ ⵉⵙⴷⴷⵓⴳⵯⵎⵏ ⵏ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⴷ ⵉⵏⵓⵥⴰⵕ, ⵎⴽ ⴰⵏⵏ ⵉⴳⴰ ⵎⴳⴰⵍ ⵉ ⵜⵓⵜⵍⴰⵢⵜ ⵜⵎⴰⵣⵉⵖⵜ ⴷ ⵉⵙⴷⴷⵓⴳⵯⵎⵏ ⵏⵏⵙ ⵉⵖⵔⵎⴰⵏⵏ ⴷ ⵉⵎⴰⵙⵙⴰⵏⵏ (ⴰⵙⴳⴳⵯⴰⵙ ⴰⵎⴰⵣⵉⵖ – ⵉⵏⵎⵓⵇⵇⴰⵔⵏ ⵏ ⵜⵎⴰⵣⵉⵖⵜ – ⵜⵉⴼⵓⴳⵍⵉⵡⵉⵏ ⵏ ⴱⵓⵢⵍⵎⴰⵡⵏ), ⵎⴰⵢⴰ ⴷ ⵉⴳⴰⵏ ⵎⴳⴰⵍ ⵏ ⵜⵎⵏⴹⴰⵡⵜ, ⵎⴽ ⵍⵍⵉ ⵜⵙⵙⵎⵣⴰⵖ ⵅⴼ ⵓⵙⵢⴰⴼⵓ ⵏ ⵜⵉⵏⵎⴰⵍ ⵜⵉⵇⵇⴱⵓⵕⵉⵏ ⴳ ⵙⵓⵙ ⴼ ⵓⵙⵙⵉⴷⴼ ⵏ ⵓⵙⴰⴽⴰ ⴰⵎⴰⵢⵏⵓ ⴷ ⵜⵎⵍⵙⵉⵜ ⵜⴰⵙⴰⵍⴰⴼⵉⵜ ⵜⴰⵏⴽⵛⴰⵎⵜ ⵅⴼ ⵡⴰⵎⵓⵏ ⴰⵎⵕⵕⵓⴽⵉ (ⴰⵙⵙⴼⵙⵔ ⵏ ⵜⵔⴱⴰⵜⵉⵏ ⵏ ⵜⵉⵏⵍⵎ ⵜⴰⵇⵇⴱⵓⵕⵜ ⵙ ⵜⵎⵍⵙⵉⵜ ⵜⴰⵏⴽⵛⴰⵎⵜ) ⴰⵢⵍⵍⵉ ⵉⵙⴷⵉⴷⴷⵉⵏ ⴰⵏⴰⵎⴽ ⵏ ⵜⵖⴰⵔⴰⵙⵜ ⵏ ⵎⴰⵍⵉⴽ ⵍⵍⵉ ⵅⴼ ⵣⵣⵓⴳⴰⵣⵏ ⵡⴰⴳⴳⴰⴳⵏ ⵏ ⵜⵉⵏⵎⴰⵍ ⵜⵉⵇⵇⴱⵓⵕⵉⵏ ⴳ ⵙⵓⵙ, ⵎⴽ ⵍⵍⵉ ⵉⵙⴷⵉⴷⴷⵉ ⴰⴼⵔⴰ ⵏ ⵜⴼⵍⵙⵜ ⵏ ⴰⵢⵜ ⵜⵎⴰⵣⵉⵔⵜ.
- ⴰⵔ ⵜⵜⵣⵎⵎⵉⵎ ⵜⴽⵓⵏⴼⵉⴷⵉⵕⴰⵍⵉⵜ ⴰⵙⵏⴱⵓⵜⵜⵍ ⵏ ⵜⵏⴱⴰⴹⵜ ⵅⴼ ⵓⵙⵎⵀⵍ ⵏ ⵓⵙⵓⴷⴻⴷ ⵏ ⵜⵎⴰⵣⵉⵖⵜ, ⴷ ⴰⵔ ⵜⴻⵜⵜⵏⴽⴰⴹ ⵙ ⵉⵙⴳⴳⵉⵔⵏ ⴷ ⵓⵙⵏⴱⵓⵜⵜⵍ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵅⴼ ⵓⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⴰⵔ ⵜⴻⵜⵜⴰⵔ ⵙ ⵓⵖⴰⵡⵍ ⵏ ⵓⵣⵣⴳⵉⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵏ ⵜⵎⴰⵣⵉⵖⵜ.
- ⴰⵔ ⵜⴰⵇⵇⵔⴰ ⴰⴷ ⵢⵉⵍⵉ ⵓⵣⵔⴽⴽⵉ ⵉ ⵡⴰⵙⵙⴰⵖⵏ ⵏ ⵉⴷⵖⴰⵔⵏ ⵉⵎⴰⵣⵉⵖⵏ, ⵎⴽ ⵍⵍⵉ ⵜⴻⵜⵜⴰⵔ ⴳ ⵜⵎⵙⵎⵓⵏⵉⵏ ⵜⵉⴷⵖⴰⵔⴰⵏⵉⵏ ⴰⴷ ⵖⴰⵡⵍⵏⵜ ⵙ ⵓⵃⵟⵟⵓ ⵏⵏⵙⵏ ⵣⵖ ⵓⵙⴼⵙⴰ ⴷ ⵓⵙⵄⵕⵕⴱ (ⵜⴰⴳⵔⴰⵡⵜ ⵏ ⵜⵖⴰⵣⵓⵜ ⵙ ⵓⵎⴷⵢⴰ).
- ⴰⵔ ⵜⴰⵇⵇⵔⴰ ⴰⴷ ⵢⵉⵍⵉ ⵓⵙⵖⵜⵙ ⵙ ⵜⵓⴳⵔⵉⵡⵜ ⵏ ⵜⵓⵡⵊⴰ ⵢⴰⴽⴽⴰⵏ ⴰⵣⵔⴽⴽⵉ ⵉ ⵜⵓⵥⵍⴰⵢⵜ ⵏ ⵡⴰⵎⵓⵏ ⴰⵎⵕⵕⵓⴽⵉ ⴰⵜⵔⴰⵔ ⴷ ⵜⵙⵖⵣⵏⵜ ⵅⴼ ⵜⵎⴰⴳⵍⴰⵢⵜ ⵏ ⵡⴰⴳⴳⴰⴳⵏ ⵉⵏⴰⵎⵓⵔⵏ ⵉⵜⵔⴰⵔⵏ ⵉⴼⴰⵡⵏ ⴷ ⵓⵏⵏⵓⵕⵥⵎ ⵅⴼ ⵜⵔⵎⵉⵡⵉⵏ ⵜⵉⵏⴰⴼⴳⴰⵏⵉⵏ ⵢⴰⴹⵏⵉⵏ.
- ⴰⵔ ⵜⵙⵙⵎⵉⵔ ⵎⴰ ⵙ ⵜⵍⵍⴰ ⵜⴰⵎⴰ ⵏ ⵉⴼⵕⴹⵉⵚⵏ ⴰⴽⴽⵯ ⵏ ⵓⵎⵓⵙⵙⵓ ⴰⵎⴰⵣⵉⵖ ⴷ ⵎⴰ ⵙ ⵔⴰⴷ ⵜⵙⵖⵏⵙⴰ ⵓⴳⴳⵯⴰⵔ ⵏ ⵎⴰⴷ ⵉⵣⵔⵉⵏ ⵅⴼ ⴰⴷ ⵢⵉⵍⵉ ⵓⵃⵟⵟⵓ ⵏ ⵓⵎⵎⵉⵥⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⵜⴰⴼⴰ ⴰⴷ ⵢⵉⵍⵉ ⵓⵙⵎⴰⵣⵖ ⵏ ⵜⴰⵎⵓⵔⵜ ⵙ ⵉⴼⵕⴹⵉⵚⵏ ⵏⵏⵙ ⴰⴽⴽⵯ ⵉⵖⵔⵎⴰⵏⵏ, ⵎⴳⴰⵍ ⵏ ⵉⵎⵣⴰⵣⵏ ⴳⴰⵏⵉⵏ ⵉⵏⵎⴳⴰⵍⵏ ⵉ ⵢⵓⵙⵡⵉⵏⴳⵎ ⴰⵎⵕⵕⵓⴽⵉ ⴷ ⵓⴼⵔⴰ ⵏ ⵜⴼⵍⵙⵜ ⵜⴰⵎⵕⵕⵓⴽⵉⵜ.
- ⴰⵔ ⵜⴰⵇⵇⵔⴰ ⵉ ⵢⵉⴼⵕⴹⵉⵚⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⴰⴷ ⵃⵉⵢⵢⵍⵏ ⵢⴰⵏ ⵓⴳⵔⴰⵡ ⴰⵏⴰⵎⵓⵔ ⴰⵎⴰⵣⵉⵖ ⵉⵔⴰⵏ ⴰⴷ ⵉⵙⵙⵉⴽⵣ ⵜⴰⵙⵜⵕⴰⵜⵉⵊⵉⵜ ⵜⴰⵎⴰⵢⵏⵓⵜ ⴷ ⵉⵎⵙⴰⵙⴰⵏ ⴷ ⵎⴰⴷ ⴷ ⵉⴳⴳⵯⵔⴰⵏ ⴳ ⵜⴰⵎⵓⵔⵜ ⵏⵏⵖ ⴷ ⵜⵎⵓⵔⴰ ⵜⵉⵏⴰⵔⴰⴳⵉⵏ.
ⵣⵣⵖ ⵓⵎⴰⵔⵉⵙ
