ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵙⵓⴼⵖ ⴷ ⵓⵎⴰⵔⴰ ⵄⵓⵎⴰⵕ ⴰⵢⵜ ⵙⵄⵉⴷ ⵜⴰⴳⵔⵓⵎⵎⴰ ⵏⵏⵙ ⵏ ⵜⵓⵍⵍⵉⵙⵉⵏ ⵜⴰⵎⵣⵡⴰⵔⵓⵜ ⴳ ⵜⵓⵥⵥⵓⵎⵜ ⵏ ⵢⵉⵎⴰⵍⴰⵙ ⴰⴷ ⴷⴰⵔ ⵜⵙⵉⴳⴳⵣⵜ ⵜⴰⵏⴰⵎⵎⴰⵙⵜ ⵙⵓⵙ ⴰⵢⵜ ⵎⵍⵍⵓⵍ. ⵢⴰⵜ ⵜⴳⵔⵓⵎⵎⴰ ⵏ ⵜⵓⵍⵍⵉⵙⵉⵏ ⵉⵜⵜⵢⵓⵔⴰⵏ ⵙ ⵜⵎⴰⵣⵉⵖⵜ ⵙ ⵓⵙⴽⴽⵉⵍ ⴰⵍⴰⵜⵉⵏⵉ, ⴳ ⵓⴽⵙⴰⵢ ⴰⵎⵊⴰⵀⴷⵉ, ⵜⵓⵎⴰ ⵢⴰⵜ ⴷ ⵎⵔⴰⵡ ⵏ ⵜⵓⵍⵍⵉⵙⵜ ⵉⵖⵣⵣⵉⴼⵏ ⴳ ⵎⴰⴷ ⵢⴰⵥⵏ 123 ⵏ ⵜⵙⵏⴰ. ⵉⵎⵎⵔⴽⵙ ⴳⵉⵙ ⵓⵡⵡⵉⵏⴳⵎ ⵙ ⵜⵉⵍⴰⵡⵜ, ⴷ ⵓⵣⵣⴱⵔⵣ ⵙ ⵜⴰⴹⵚⴰ, ⵏⴽⴹⵏ ⵉⴼⵔⵓⵔⵉⵜⵏ ⵏ ⵓⵙⵏⴼⵍⵓⵍ ⴰⴷ ⴰⵙⴽⵍⴰⵏ ⴳ ⵓⵔⵣⵣⵓ ⴰⵙⵓⵍⴰⵏ ⴷ ⵉⵜⵜⵓⵙⵎⴰⵢⵏⵓⵏ ⴳ ⵜⵖⴰⵔⴰⵙⵉⵏ ⵏ ⵓⵏⵄⴰⵕ ⵅⴼ ⵉⵣⵔⴼⴰⵏ ⵏ ⵜⵎⵖⴰⵔⵜ ⵙ ⵓⴼⵔⵉⵙ ⴰⵎⴰⵜⵓ, ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ ⴳ ⵉⵎⴰⴹⴰⵍⵏ ⵉⵜⵜⵓⵙⵙⵉⵏⴼⵏ ⴷ ⵉⵜⵜⵡⴰⵜⵜⵓⵏ ⵙ ⵓⴼⵔⵓⵙ ⵓⵥⵍⴰⵢ.
ⵉⵙⵡⴰ ⴷ ⵓⵣⵡⵍ ⵏ ⵜⴳⵔⵓⵎⵎⴰ ⴰⴷ ⵜⵓⵍⵍⵉⵙⵉⵏ ⵏ ⵎⴰⵙⵙ ⵄⵓⵎⴰⵕ ⴰⵢⵜ ⵙⵄⵉⴷ ⴳ ⵢⴰⵜ ⵙⴳ ⵜⵓⵍⵍⵉⵙⵉⵏ ⵏⵉⵜ ⴳⵉⵙ ⵉⵍⵍⴰⵏ, ⵢⵉⵍⵉ ⵖⵓⵔⵙ ⵓⵣⵡⵍ ⴰⵏⵏ ⵏⵉⵜ, ⵏⵏⴰ ⵉⵜⵜⴰⵍⵙⵏ ⵅⴼ ⴽⵔⴰ ⵏ ⵜⵎⵙⴰⵔⵉⵏ ⵏ ⵜⵉⵍⴰⵡⵜ ⵙ ⵉⵙⵓⴼⴰⵔ ⵉⵙⴽⵍⴰⵏⵏ ⵉⴼⵊⵊⵉⵊⵏ ⵏ ⵢⴰⵜ ⵜⵎⵥⵢⴰⵏⵜ ⵜⴰⴳⵓⵊⵉⵍⵜ ⵜⵙⵏⴼⵍ ⴰⵙⵙⴰⵖ ⵏⵏⵙ ⵣⵖ ⵄⵉⵛⴰ ⵙ ⵎⵓⵃⴰ ⴰⴼⴰⴷ ⴰⴷ ⵜⴷⴷⵔ ⴳ ⵓⴼⵔⴰ ⵜⵓⵥⵥⵓⵎⵜ ⵏ ⵢⴰⵏ ⵓⵎⴰⴹⴰⵍ ⴰⵡⵜⵎⴰⵏ ⵓⵔ ⴰⵙ ⵜⵏⵏⵉ ⴰⵎⴰⵔ. ⴷ ⴰⴼⴰⴷ ⴰⴷ ⵜⵏⵊⵎ ⴳ ⵉⵅⴱⴰⵛⵏ ⵏ ⵓⴼⴳⴰⵏ, ⴷ ⴰⴷ ⴷ ⵜⴱⴱⵉ ⵉⵣⵔⴼⴰⵏ ⵏⵏⵙ ⵙ ⵢⵉⵅⴼ ⵏⵏⵙ.
ⵉⵡⴰⵍⴰ ⵎⴰⵙⵙ ⵄⵓⵎⴰⵕ ⴷⴷⵔⵉⵡⵛ ⴰⵙⵎⵏⵉⴷ ⵏ ⵜⴳⵔⵓⵎⵎⴰ ⵏ ⵜⵓⵍⵍⵉⵙⵉⵏ » ⵜⵉⵎⵎⵓⵖⵔⴰ ⵏ ⵜⵎⵖⴰⵔⵜ » ⴷ ⵉⵜⵜⵓⵙⵎⴰⴳⴰⵍ ⵓⵎⴰⵔⴰ ⵃⴰⵎⵉⴷ ⵟⵟⴰⵍⵉⴱⵉ ⵙ « ⵜⴳⵓⵔⵉ ⵏ ⵜⵓⴳⴳⴰ » ⴹⴰⵕⵜ ⵏ ⵓⵙⵎⵏⵉⴷ, ⵉⵡⴰⵍⴰ ⵏⵜⵜⴰ ⵓⵏⴰⵥⵓⵕ ⵎⵓⵃⵎⵎⴰⴷ ⵍⵃⴰⵙⴰⵏⵉ ⴰⵎⴰⵎⴽ ⵏ ⵜⵖⴰⵔⵉⴼⵜ ⴷⴰ ⵢⵓⵎⴰⵏ ⵢⴰⵜ ⵜⴼⵉⵍⵜ ⵜⴰⵏⴰⵥⵓⵕⵜ ⵏ ⵓⵏⴰⵥⵓⵕ ⵎⵓⵃⴰ ⵎⵍⵍⴰⵍ. ⵎⴽⵍⵍⵉ ⵜⴻⵜⵜⵓⵙⵎⴰⴳⴰⵍⵏ ⵉⵙⵍⵎⴰⴷⵏ ⵅⴰⵍⵉⴷ ⵄⴱⵕⵓⵛ ⴷ ⵄⴱⴷⵍⵄⴰⵍⵉ ⴰⵢⵜ ⵄⴷⴷⵉ ⵙ ⵜⵎⵙⴽⵉⵔⵜ ⵏ ⵓⵣⵣⵔⴰⵢ ⴷ ⵓⵙⵏⵖⴷ ⵉⴷⵏⵉⵍⵙⵏ ⵉ ⵡⵓⴳⵔⵉⵡⵏ ⵏ ⵜⵓⵍⵍⵉⵙⵉⵏ. ⵙ ⵜⵓⴳⴳⴰⵙ ⵏ ⵜⵔⴰⴱⴱⵓⵜ ⴰⴷ, ⵉⵣⵎⵔ ⵓⴳⴷⵓⴷ ⵏ ⵉⵎⵖⵔⵉⵜⵏ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⴰⴷ ⴷⴰⵔⵙⵏ ⵢⵉⵍⵉ ⵢⴰⵏ ⵓⴼⴰⵔⵙ ⴰⵙⴽⵍⴰⵏ ⴰⵎⵃⵓⵣ ⵉⴼⵊⵊⵉⵊⵏ.
ⵉⵥⵕⴰ ⵓⵎⴰⵔⴰ ⵄⵓⵎⴰⵕ ⴰⵢⵜ ⵙⵄⵉⴷ ⵜⵉⴼⴰⵡⵜ ⴳ ⵜⵓⵥⵥⵓⵎⵜ ⵏ ⵓⵏⴱⴷⵓ ⵏ 1978 ⴳ ⵜⴳⴰⴷⵉⵔⵜ ⵏ ⵉⵎⴳⵓⵏⵏ ⴳ ⵢⵉⴼⴼⵓⵙ ⴰⴳⵎⵎⵓⴹ ⴰⵎⵖⵔⵉⴱⵉ. ⵢⵓⵎⵥ ⴽⵕⴰⴹⵜ ⵜⵓⵔⴰⴳⵉⵏ, ⵜⴰⵎⵣⵡⴰⵔⵓⵜ ⴳ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴳ ⴼⴰⵙ, ⵜⵉⵙ ⵙⵏⴰⵜ ⴳ ⵜⵙⴽⵍⴰ ⵜⴰⴼⵕⴰⵏⵙⵉⵙⵜ ⴳ ⵓⴳⴰⴷⵉⵔ, ⵜⵉⵙ ⴽⵕⴰⴹⵜ ⵏⵜⵜⴰⵜ ⴳ ⵜⵙⴽⵍⴰ ⵜⵉⵏⴳⵍⵉⵣⵜ ⴳ ⴰⵢⵜ ⵎⵍⵍⵓⵍ. ⵎⴽⵍⵍⵉ ⵢⵓⵎⵥ ⴰⵎⴰⵚⵟⵕ ⴳ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⴳⴰⴷⵉⵔ ⴰⵙⴳⴳⵯⴰⵙ ⵏ 2018, ⵉⴹⴼⵕ ⵖⵉⵍⴰ ⴷ ⵜⵉⵖⵔⵉ ⵏⵏⵙ ⴳ ⵓⵙⴳⴳⵯⴰⵙ ⵡⵉⵙ ⵙⵉⵏ ⴳ ⵓⵙⴰⴽⴰ ⵏ ⵓⴷⵓⴽⵟⵓⵕⴰ, ⴰⵔ ⵜⵜ ⵉⵜⵜⵃⵢⵢⴰⵍ ⴳ ⵜⵙⴷⴰⵡⵉⵜ ⵏ ⵙⵉⴷⵉ ⵎⵓⵃⵎⵎⴰⴷ ⴱⵏ ⵄⴱⴹⵍⵍⴰⵀ ⴳ ⴼⴰⵙ ⴳ ⵓⵙⵏⵜⵍ ⵏ ⵜⵎⵍⴰⵍⵜ ⵏ ⵜⵓⵔⴰⵔⵜ ⵜⴰⵎⴰⵣⵉⵖⵜ ⴳ ⵓⵙⴳⵎⵉ.
ⵉⵙⵙⵓⴼⵖ ⴰⵙ ⴷ ⵓⵏⵎⵓⴳⴳⴰⵔ ⵏ ⵓⵊⴷⴷⵉⴳ ⴳ ⵉⵎⴳⵓⵏⵏ ⴰⵙⴳⴳⵯⴰⵙ ⵏ 2008 ⵜⴰⵡⵛⴽⵉⵏⵜ ⵏ ⵜⵎⴷⵢⴰⵣⵉⵏ ⵙ ⵓⵣⵡⵍ « ⵜⴰⴱⵔⴰⵜ ⵏ ⵓⵙⴳⵎⵉ ». ⴹⴰⵕⵜ ⵏⵏⵙ ⵜⴰⵡⵛⴽⵉⵏⵜ ⵏ ⵜⵣⵍⴰⵜⵉⵏ ⴷ ⵉⴼⴼⵖⵏ ⴰⵙⴳⴳⵯⴰⵙ ⵏ 2010 ⵙⴳ ⴷⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⴰⵙⴳⴳⵯⴰⵙ ⵏ 2014 ⵉⴹⵉ ⴷ ⵢⴰⵜ ⵜⵣⵔⴰⵡⵜ ⵅⴼ ⵉⵣⵍⵉ ⴰⵙⴳⵎⴰⵏ ⴰⵎⴰⵣⵉⵖ ⴷ ⵜⵎⵍⴰⵍⵜ ⵏⵏⵙ ⴳ ⵓⵙⴳⵎⵉ ⴷ ⵜⵉⵏⴷⵉⵜⵉⵏ.
ⵉⴼⵓⵍⴽⵉ ⵉⵖ ⴷ ⵏⵙⵙⴽⵯⵜⵉ, ⵎⴰⵙ ⴷ ⵄⵓⵎⴰⵕ ⴰⵢⵜ ⵙⵄⵉⴷ ⵉⴳⴰ ⵢⴰⵏ ⴳ ⵡⵓⴷⵎⴰⵡⵏ ⵉⵏⴰⵥⵓⵕⵏ ⵉⵜⵜⵡⴰⵙⵙⴰⵏⵏ ⴳ ⵢⵓⴼⴼⵓⵙ ⴰⴳⵎⵎⵓⴹ. ⵖⵓⵔⵙ ⴽⵕⴰⴹ ⵡⴰⵍⴱⵓⵎⵏ ⴳ ⵢⵉⴳⵔ ⵏ ⵡⵓⵔⴰⵔ ⴰⵎⴰⵣⵉⵖ, ⴷ ⵓⵍⴰ ⴳ ⵜⵥⵓⵕⵉ ⵜⴰⵎⵙⵉⵍⵖⵜ, ⴷⴰⵔⵙ ⴽⵉⴳⴰⵏ ⵏ ⵜⴼⵉⵍⵉⵏ ⴷ ⵡⵓⵏⵓⵖⵏ ⵏⵏⴰ ⴷ ⵉⵙⵡⴰⵏ ⴳ ⵉⵎⵓⵖⵍⵉⵜⵏ ⵏ ⵢⵉⴳⵔ ⴰⵊⵢⵓⴳⵕⴰⴼⵉ ⵏ ⴷⴰⴷⵙ ⵉⵎⴳⵓⵏⵏ, ⴷ ⵓⵎⴰⴹⴰⵍ ⵓⵥⵏⵉⴳ ⵙ ⵓⵎⴰⵜⴰ.
ⵄⵓⵎⴰⵕ ⴰⵢⵜ ⵙⵄⵉⴷ ⵖⵉⵍⴰ ⴷ ⵏⵜⵜⴰ ⴷ ⴰⵙⵍⵎⴰⴷ ⴳ ⵜⵎⵔⵙⵍⵜ ⵏ ⵓⵏⵏⵓⵕⵥⵎ ⴰⵏⴰⵥⵓⵕ ⴷ ⵓⵙⴽⵍⴰⵏ, ⴳ ⵓⵙⴰⵜⵉ ⵏ ⵓⵙⵏⴼⴰⵔ ⴰⵎⴰⵢⵏⵓ ⵏⵏⴰ ⴳ ⵜⵡⴰⵜⵙ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴰⴷ ⵜⵙⵙⴽⵛⵎ ⵜⵉⵥⵓⵕⵉⵡⵉⵏ ⵙ ⵜⵉⵏⵎⴰⵍ ⵜⵉⵎⵏⵣⴰ, ⵎⴽⵍⵍⵉ ⴳⵉⵙ ⵉⵙⵙⵍⵎⴰⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⵖⴰⵔⴰⵙⵜ ⵏ ⵜⵥⵓⵕⵉ ⴳ ⵜⵎⵔⵙⵍⵜ ⴰⴷ ⵉⵍⵍⴰⵏ ⴳ ⵜⴰⵍⴱⵕⵊⵜ ⴳ ⵓⴳⴰⴷⵉⵔ. ⵙ ⵜⵥⵕⵉⴳⵜ ⴰⴷ, ⵔⴰⴷ ⵉⵙⵙⴷⵓⵙ ⵎⴰⵙⵙ ⵄⵓⵎⴰⵕ ⴰⵙⴳⵓⴷⵉ ⴳ ⵡⴰⵏⴰⵡ ⵏ ⵜⵓⵍⵍⵉⵙⵜ ⵜⴰⵎⴰⵣⵉⵖⵜ ⵏⵏⴰ ⵙⵓⵍ ⵉⵙⵖⴰⵡⵙⴰⵏ ⵙ ⴽⵉⴳⴰⵏ ⵏ ⵜⵥⵕⵉⴳⵉⵏ ⵉⵖ ⵜ ⵏⵣⵎⵣⴰⵣⴰⵍ ⴷ ⵜⵎⴷⵢⴰⵣⵜ.
ⴰⵙⵓⵊⴷ: ⵄⴰⴱⴷⵍⵡⴰⵃⵉⴷ ⴱⵓⵜⴱⴰⵖⴰ
