ⴰⵙⵡⵓⵔⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ ⵓⵙⵏⵜⵍ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ ⴷ ⵉⵎⵣⵡⴰⴳⵏ ⴳ ⵍⵎⵖⵔⵉⴱ

ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵉⵡⴰⵜⵜⵙⵏ ⴰⴷ ⵜⵙⴷⵓⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⵏⵜ ⵏ ⵜⵏⴼⵔⵓⵏⵜ, ⵉⵙⵏⵓⴱⴳ ⵓⵙⵉⵏⴰⴳ ⵏ ⵕⵕⴱⴰⵟ – ⴷⵔⵉⵙ ⴱⵏⵣⴽⵔⵉ – ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵙⵏⴰⵜ ⵜⵙⵓⵜⵍⵉⵏ ⵏ ⵓⵙⵎⵓⵜⵜⴳ ⵏ ⵜⵙⵎⴰⵜⵜⴰⴳⵉⵏ ⴷ ⵉⵙⵎⴰⵜⵜⴰⴳⵏ ⵅⴼ « ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵉⵙⵓⵔⵙⵏ ⵏ ⵜⵎⵣⵡⴰⴳⵜ: ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⴰⵜⵉ ⴰⵏⴰⵎⵓⵔ ⵏ ⵓⴼⵔⴰⴳ », ⵙⴳ ⵜⵉⵣⵡⵉⵔⵉ ⵏ ⵉⵎⴰⵍⴰⵙⵙ. ⵜⵉⵙⵓⵜⵍⵉⵏ ⴰⴷ ⴷ ⵜⵉⵎⵣⵡⵓⵔⴰ ⵏⵏⵉ ⵉⵜⵜⵓⵙⴽⴰⵔⵏ ⵅⴼ ⵓⵙⵏⵜⵍ ⵏ ⵜⵎⵣⵡⴰⴳⵜ ⴳ ⵓⵙⴰⵜⵉ ⵏ ⵓⵙⵎⵀⵍ ⵏ ⵜⵎⴷⵔⴰⵡⵜ ⴰⴷ.

ⵜⵡⴰⵜⵜⵙ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ, ⵏⵏⴰ ⵉⵕⵥⵎⵏ ⵜⵉⵡⵓⵔⵉⵡⵉⵏ ⵏⵏⵙ ⴰⵙⵙ ⵏ ⵓⵢⵏⴰⵙ 24 ⴱⵕⴰⵢⵕ, ⴰⴷ ⵜⵏⴰⵡⵍ ⴰⵙⴰⵜⵉ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ ⴷ ⵉⵎⵣⵡⴰⴳⵏ ⴳ ⵍⵎⵖⵔⵉⴱ, ⵎⴽⴷⴰ ⵜ ⵜⵙⴷⵓⵙ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵇⴰⵃ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ ⴷ ⵓⴼⵔⵉⴷⵏ ⵏ ⵜⵡⵊⵉⵡⵉⵏ ⵏⵏⵙⵏ ⴷ ⵓⵎⵉⵔⵓ ⴰⵎⴰⴹⵍⴰⵏ ⵏ ⵓⵙⵏⴼⵜⵎⵣⵡⴰⴳⵜ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⵏⵏⵉ ⴷ ⴷⴰⵔ ⴰⵣⴷⴰⵢ. ⵉⴳ ⵓⵙⵎⵓⵜⵜⴳ ⴰⴷ ⵉ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ ⴰⵙⵓⵍⴼ ⵏ ⵓⵎⴹⴰⴽⴰⵕ ⵏ ⵜⵏⵥⴰⵕ ⵉⵣⴷⵉⵏ ⴷ ⵓⴼⵔⴰⴳ ⵏ ⵜⵎⵣⵡⴰⴳⵉⵏ ⴷ ⵉⵎⵣⵡⴰⴳⵏ ⴰⴽⴷ ⵜⵎⵔⵙⵍⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⴷ ⵉⵣⵎⴰⵣ ⵏ ⵓⵙⴷⵓⵙ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵉⵎⵙⴰⵙⴰⵏ ⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ.

ⵏⵏⵓⵎⵙⵏⵜ ⵜⵡⵓⵔⵉⵡⵉⵏ ⵏ ⵓⵙⵎⵓⵜⵜⴳ ⴰⴷ ⵅⴼ ⵉⵙⵏⵜⴰⵍ ⵉⴷⵙⵍⴰⵏⵏ, ⵏⵜⵜⵏⵉ ⴷ : ⴰⵙⴰⵜⵉ ⴰⵎⵙⵙⴰⵖⵓⵍ ⵉⵣⴷⵉⵏ ⴷ ⵜⵎⵙⴰⵔⵜ ⵏ ⵜⵎⵣⵡⴰⴳⵜ ; ⵜⵉⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵓⵎⵢⴰⵖ ⵏ ⵜⴳⵍⴷⵉⵜ ⴰⴽⴷ ⵉⵎⴰⵙⵙⵏ ⵉⵎⵖⵓⵏⵏ ; ⵜⴰⵎⵣⵡⴰⴳⵜ ⴳ ⵍⵎⵖⵔⵉⴱ ⴷ ⵓⴼⵔⴰⴳ ⵏ ⵉⴱⵕⵕⴰⵏⵉⵢⵏ, ⴷ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⵎⵣⵡⴰⴳⵜ ⴷ ⵜⵓⵔⴳⵙⴰ. ⵔⴰⴷ ⴷⵔⵓⵏ ⴳ ⵓⵙⵎⵓⵜⵜⴳ ⴰⵎⵣⵡⴰⵔⵓ 20 ⵏ ⵉⴼⵙⵢⴰⵏⵏ ⴷ ⵜⴼⵙⵢⴰⵏⵉⵏ ⵉⵜⵜⵡⴰⵙⵎⴳⴰⵍⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ.

ⴰⵎⴽ ⵉⵜⵜⵡⴰⴱⴷⴰⵔ ⵢⴰⴷ, ⵢⴰⵎⵓ ⵓⵙⵎⵓⵜⵜⴳ ⴰⴷ ⴳ ⵓⵙⴰⵜⵉ ⵏ ⵓⵣⴷⴰⵢ ⵏ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⵔⵙⵍⴰⵏ, ⵉⵜⵜⵓⵙⴳⵎⴹⵏ ⵏⴳⵔ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵎⴰⵜⵔ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ 14 ⵛⵓⵜⴰⵏⴱⵉⵔ 2022, ⵉⵥⵍⵉⵏ ⵙ ⵢⵉⴳⵔⴰⵏ ⵏ ⵓⵙⵎⵓⵜⵜⴳ ⴷ ⵓⵙⴷⵓⵙ ⵏ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⵏⵜ ⵏ ⵜⵏⴼⵔⵓⵏⵜ.

ⵉ ⵓⵙⴽⵜⵉ, ⵜⵡⴰⵜⵜⵙ ⵜⵎⵢⴰⵇⵇⴰⵏⵜ ⴰⴷ, ⵏⵏⴰ ⵉⵙⵙⵕⵚⴰⵏ ⴰⵏⵏⴰⵍⵏ ⵏ ⵓⵎⵢⴰⵡⴰⵙ ⴰⵎⵔⵙⴰⵍ ⴰⵙⵓⵍⴰⵏ, ⴰⵙⴱⵓⵖⵍⵓ ⵏ ⵜⵡⵓⵔⵉ ⵉⵛⵛⴰⵕⵏ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵓⴼⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴱⵔⵉⴷⵉⵏ ⵏ ⵓⵙⴰⵏⵓⵏ ⴷ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⵃⵎⴰ ⴰⴷ ⵜⴳ ⵜⴰⵙⴰⵖⵓⵍⵜ ⴷ ⵓⵙⵎⵎⴰⵍ ⵉⵙⵙⵓⵜⵉⵢⵏ ⵉ ⵜⵙⵎⵉⴳⴰⵍ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵜⵜⵓⵎⴰⴳⵍⵏ ⵙ ⵓⵙⵎⵀⵍ ⵏ ⵉⵙⵍⴳⵏⵏ, ⴷ ⵡⴰⵏⵏⴰⵍ ⵏ ⵜⵓⴳⴳⴰⵣ ⵏⵏⴰ ⵜⵜⴳⴳⴰ ⵜⵎⵔⵙⵍⵜ ⵏ ⵜⵏⴼⵔⵓⵜ ⵉ ⵓⵙⴷⵓⵙ ⵏ ⵜⵎⵙⴽⵔⵉⵏ ⵜⵉⵣⵣⵓⵍⴰⵏⵉⵏ ⴷ ⵉⴽⵛⵛⵓⵎⵏ ⵏ ⵓⴱⴰⵔⴰⵣ ⵙ ⵓⵎⵙⴰⵙⴰ ⴰⴽⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.