ⴰⵢⵜ ⴱⵉⵛⴰ, ⵙⴳ ⵓⵣⵣⵏⵣ ⵏ ⵜⴰⴹⵓⴼⵜ ⴷ ⵜⴳⵍⴰⵢ ⴳ ⵡⵓⵙⵓⵏⵏ ⵙ ⵜⵏⴰⵔⴰ ⵏ ⵓⵀⵓⵍⴷⵉⵏⴳ ⴰⴼⵔⴽⴰⵏ ⴰⵙⵏⴰⵔⴰⵏ ⴰⵎⵇⵇⵔⴰⵏ

ⴽⵔⴰ ⵖ ⵉⵎⵙⴽⴰⵔⵏ ⵏ ⵜⴰⵡⵊⵉⵡⵉⵏ ⵜⵉⵙⵓⵙⵉⵢⵉⵏ ⴱⴷⴷⵏ ⵙ ⵉⵅⴼⴰⵡⵏ ⵏⵏⵙⵏ, ⵓⵔ ⴱⴷⴷⵏ ⴳ ⵢⴰⵏ ⵓⵙⵡⵉⵔ, ⵉⵙ ⵜⴳⴰ ⵜⴽⴰⵢⵍⴰⵍⵜ ⴷ ⵜⵎⵣⴰⵖⵜ ⴰⵣⵡⵍ ⵏ ⵜⵓⴷⵔⵜ ⵏⵏⵙⵏ, ⴰⵎ ⵢⴰⵜ ⵜⴳⵔⵓⵎⵎⴰ ⴳ ⵜⵙⴳⴳⵉⵡⵉⵏ ⴳ ⵙⵓⵙ , ⵜⴻⵜⵜⵡⴰⵙⵙⴰⵏ ⵜⵣⵏⵉⵜ ⴷ ⵉⴹⵕⴼⴰⵏ ⵏⵏⵙ ⵙ ⵉⵡⵔⵉⴽⵏ ⵉⴳⴰⵏ ⵓⵙⵍⵉⴷⵏ, ⴹⴰⵕⵜ ⴰⴷ ⵜⵖⵓⵣ ⴳ ⵓⵥⵕⵓ, ⵜⵙⵙⵓⵏⵖ ⴰⵣⵔⵉⵔⵉⴳ ⵉ ⵜⵓⴷⵔⵜ ⵏⵏⵙ, ⴰⵔ ⵜⴼⵜⵜⵓ ⵅⴼ ⵓⵏⴰⵔⵓⵣ ⴷ ⵜⴽⴰⵢⵍⴰⵍⵜ ⴰⴷ ⵜⴳ ⴳ ⵢⴰⵏ ⵡⴰⵙⵙ ⴰⵡⵔⵉⴽ ⵉⵜⵜⵡⴰⵙⵙⴰⵏⵏ, ⵉⵙ ⴰⴽⴽⵯ ⵜⵖⵉ ⴰⴼⵓⵙ ⵏ ⴽⵔⴰ ⵖ ⵜⴰⵡⵊⴰ ⴷ ⵉⵎⴷⴷⵓⴽⴽⵡⴰⵍ ⵏⵏⵙ, ⵎⴽⵍⵍⵉ ⵉⴳⴰ ⴷ ⵜⵓⵍⵍⵉⵙⵜ ⵏ ⵜⵎⵣⴰⵖⵜ ⵏ ⵃⵎⴰⴷ ⵓⵙⵄⵉⴷ ⴱⵉⵛⴰ, ⴷ ⵉⵎⴰⴷⵔⴰⵡⵏ ⵏⵏⵙ ⵏⵏⴰ ⴰⵙ ⵢⴰⵥⵏ ⵍⵃⵓⵙⴰⵢⵏ ⴷ ⴱⵕⴰⵀⵉⵎ ⵉⴷ ⵃⵍⵍⵉ.

ⵃⵎⴰⴷ ⵓⵙⵄⵉⴷ ⴱⵉⵛⴰ … ⵢⴰⵏ ⵣⵖ ⵉⵏⵎⵖⵓⵔⵏ ⵏ ⵜⵣⵏⵉⵜ, ⵉⵜⵜⵡⴰⵙⵙⴰⵏ ⵙ ‘’ⵓⵏⵎⴽⵔⵔⴰ’’ ⵉⵍⵓⵍ ⴳ ⵓⵙⴳⴳⵯⴰⵙ ⵏ 1920, ⵉⴳⵉⴳⵉⵍ ⴳ ⵜⵙⴳⴰ ⵏ ⴱⴰⴱⴰⵙ, ⵉⵣⴷⵉ ⴱⴰⵀⵔⴰ ⴷ ⵉⵏⵏⴰⵙ, ⵜⴰⵡⵉ ⵜⵜ ⴳⵉⵙ, ⵜⵙⵙⵏⴽⵔ ⵜ ⵉⴷ, ⵓⵔ ⵉⵣⵎⵔ ⴰⴷ ⵉⴽⵛⵎ ⵙ ⵜⵎⵣⴳⵉⴷ, ⵎⴰⵛⵛ ⵓⵢⴰ ⵓⵔ ⵉⴳⴷⵍ ⴰⴷ ⵜⵉⵍⵉ ⵜⴽⴰⵢⵍⴰⵍⵜ ⴷⴰⵔ ⵓⵎⵥⵢⴰⵏ ⴰⴷ, ⵜⴰⴽⴰⵢⵍⴰⵍⵜ ⴰⴷ ⵍⵍⵉ ⵔⴰⴷ ⵢⵉⵎⵔⵖⵓⵔ ⵜⴳ ⴰⵢⵜ ⴱⵉⵛⴰ ⴳ ⵢⵉⵅⴼ ⵏ ⵓⵀⵓⵍⴷⵉⵏⴳ ⴰⵏⵙⴱⴰⴱ ⴰⴼⵔⴽⴰⵏ ⴰⵎⵇⵇⵔⴰⵏ.

ⵉⵙⵙⵏⵜⵉ ⵃⵎⴰⴷ ⵓⵙⵄⵉⴷ ⴱⵉⵛⴰ ⵙ ⵜⵡⵓⵔⵉⵡⵉⵏ ⵏ ⵜⵉⵏⵙⴱⴰⴱⵉⵏ ⵎⵥⵥⵉⵢⵏⵉⵏ, ⵣⵓⵏ ⴷ ⵉⵔⴷⵏ, ⵜⴰⴹⵓⴼⵜ, ⴷ ⵡⴰⵜⴰⵢ ⴷ ⵙⵙⴽⴰⵕ ⴳ ⵡⵓⵙⵓⵏⵏ, ⴷ ⵓⵣⵡⵉⵏⵜⵉ ⵉⵥⵍⵉⵏ ⵜⵉⴼⴰⵡⵜ ⵏ ⵜⴳⵯⵎⵎⴰ, ⵢⵉⵡⵙ ⴰⵙ ⴳ ⵜⵙⴱⴱⴰⴱⵜ ⴰⴷ ⴰⴷ ⵜⴰⴼⵔⴰⵔⵜ ⵢⴰⵏ ⴳ ⴰⵢⵜ ⵜⵎⴰⵣⵉⵔⵜ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⵉⵟⵟⵏ, ⵜⴰⵎⵀⵍⵜ ⴰⴷ ⵉⵍⴰⵏ ⴰⵜⵉⴳ ⴷ ⵉⵔⵡⵉⵏ ⵅⴼ ⴽⵔⴰ ⵏ ⵉⵡⴷⴰⵏ ⵏⵏⴰ ⵓⵔ ⵉⵍⵎⴷⵏ, ⵔⴰⴷ ⵜⴰⵡⵉ ⴰⵎⴷⴷⴰⴽⴽⵯⵍ ⵏⵏⵙ ⵉⴷ ⵃⵍⵍⵉ ⴱⵕⴰⵀⵉⵎ ⵣⵖ ⵖⴰⵙ ⴰⵎⴰⵡⴰⵙ ⵙ ⵓⵎⴰⴷⵔⴰⵡ ⵔⴰⴷ ⵖⵓⵔⵙ ⵢⵉⵍⵉ ⵡⴰⵡⴰⵍ ⴷ ⵢⵉⵙⵎ ⵔⴰⴷ ⵜ ⵢⴰⵙⵉ ⵙ ⴷⴰⵔ ⵉⵎⵇⵇⵔⴰⵏⵏ ⴷ ⵉⵏⵎⵖⵓⵔⵏ ⴳ ⵜⵣⵏⵉⵜ ⵙ ⴷⴰⵔ ⴰⵢⵜ ⵙⵓⵙ ⴰⴽⴽⵯ.

ⵉⴽⴽⴰ ⵜⵜ ⵉⵏⵏ ⵃⵎⴰⴷ ⵙⵄⵉⴷ ⴰⵔ ⵉⵜⵜⵎⵓⵜⵜⵓⵢ ⵏⴳⵔ ⵡⵓⵙⵓⵏⵏ ⵏ ⵜⵣⵏⵉⵜ, ⴰⵔ ⵉⵙⵙⴰⵖ ⵉⵔⴷⵏ ⵙⴳ ⴷⴰⵔ ⵎⵉⴷⴷⵏ, ⴰⵔ ⵜ ⵉⵣⵣⵏⵣⴰ ⴳ ⵜⵙⴳⴳⵉⵡⵉⵏ ⵢⴰⴹⵏ, ⴷⴰⵜ ⴰⴷ ⴰⵙ ⵉⴼⴽ ⵢⴰⵏ ⵙⴳ ⵉⵎⴷⴷⵓⴽⴽⵯⴰⵍ ⵏⵏⵙ ⵢⴰⵏ ⵓⵃⴰⵏⵓ ⴳ ⵜⵣⵏⵉⵜ ⵢⴰⵥⵏ ⵉ ⴱⴰⴱ ⴰⴳⵍⵓ, ⵉⴽⴽⴰ ⵜⵜ ⵉⵏⵏ ⵍⵃⴰⵊⵊ ⵃⵎⴰⴷ ⵓⵙⵄⵉⴷ ⴰⵔ ⵉⵜⵜⵎⵓⵜⵜⵓⵢ ⵏⴳⵔ ⵎⵎⵓⴳⴰⴹⵓⵕ ⴷ ⵜⴳⵎⵎⵉ ⵜⵓⵎⵍⵉⵍⵜ ⴰⴷ ⵢⴰⵡⵉ ⵜⴰⵍⵣⴰⵣⵉⵏ (ⵙⵙⵍⵉⵄⵜ), ⵎⴽⵍⵍⵉ ⵉⵣⵣⵏⵣⴰ ⵏⵜⵜⴰ ⵓⵎⴰⴷⵔⴰⵡ ⵏⵏⵙ ⵉⴷ ⵃⵍⵉ ⴳ ⵜⵃⴰⵏⵓⵜ.

ⵉⵙⴷⵔⴰ ⵃⵎⴰⴷ ⵓⵙⵄⵉⴷ ⵉⵡⵉⵙ ⵏ ⵄⵎⵎⵉⵙ ⵍⵃⵉⵙⴰⵢⵏ ⴱⵉⵛⴰ ⴷ ⵓⵎⴷⴷⴰⴽⴽⵯⵍ ⵏⵏⵙ ⴱⵕⴰⵀⵉⵎ ⵉⴷ ⵃⵍⵍⵉ – ⵍⵍⵉ ⴷ ⵙⵓⵍ ⵉⵣⴷⵉ ⵢⵉⵙⵎ ⵏ ⴱⵉⵛⴰ – ⴳ ⵜⵙⴱⴱⴰⵜ ⵙ ⵓⵙⵖⵍ ⵏ ⵓⵣⴳⵏ, ⴰⵔ ⵙⵙⴰⵖⵏ ⵜⵉⵖⴰⵡⵙⵉⵡⵉⵏ ⵏ ⵡⵓⵜⵛⵉ ⵙ ⵓⴳⵓⴷⵉ ⴰⵔ ⵜⵏⵜ ⵣⵣⵏⵣⴰⵏ ⴳ ⵓⵃⴰⵏⵓ ⵏ ⵜⵣⵏⵉⵜ, ⴱⴹⵓⵏ ⵉⵍⵎⵎⴰ ⴰⵔⵔⴰⵣⵏ (ⵜⴰⵢⴰⴼⵓⵜ), ⴱⴹⴰⵏ ⵜⴰⵡⵓⵔⵉ ⵏⴳⵔⴰⵜⵙⵏ, ⵉⴽⴽⴰ ⵜⵜ ⵉⵏⵏ ⵃⵎⴰⴷ ⴰⵔ ⵉⵏⵏ ⵉⵜⵜⵖⵉⵎⵉ ⴳ ⵜⴳⵎⵎⵉ ⵜⵓⵎⵍⵉⵍⵜ, ⴰⵔ ⴰⵙⵏ ⴷ ⵉⵜⵜⴰⵣⵏ ⵜⴰⵍⵣⴰⵣⵉⵏ, ⵜⴳ ⵏⵜⵜⴰⵜ ⵜⵎⵙⴽⵔⵉⵜ ⵏ ⵍⵃⵓⵙⴰⵢⵏ ⴰⵎⵓⴳⴳⵓ ⴰⴽⴷ ⵉⵎⵙⴰⵖⵏ ⴳ ⵜⵃⴰⵏⵓⵜ, ⴱⵕⴰⵀⵉⵎ ⵉⴷ ⵃⵍⵍⵉ ⵏⵜⵜⴰ ⵉⵜⵜⵓⵙⵎⴰⴳⴰⵍ ⵙ ⵜⵣⴷⴰⵢⵉⵏ ⵜⵉⵎⴰⵜⴰⵢⵉⵏ ⴷ ⵎⵉⴷⴷⵏ, ⴰⵔ ⵉⵜⵜⵍⵍⵉ ⵙ ⵉⴳⴰⴷⴰⵣⵏ, ⵉⵙⵡⵓⴷⴷⵓ ⵜⵉⵏⵎⴰⵇⵇⴰⵙⵉⵏ.

ⵙⵖⴰⵏ ⴳ ⵜⵣⵏⵉⵜ ⵢⴰⵜ ⵜⵙⵉⴳⵜ ⵎⴰⵖ ⴰⵔ ⵙⴽⴰⵔⵏ ⵜⴰⴱⵍⵖⵜ (ⵍⴰⴱⵔⵉⴽ), ⴱⴹⵓⵏ ⵜⴰⵣⴷⴷⵓⵖⵜ ⴳ ⵜⴳⵎⵎⵉ ⵉⵣⵡⴰⵔⵏ ⵏⵏⴰ ⵙⵖⴰⵏ ⴳ ⵜⵓⴷⴷⵓⵔⵜ ⵔⵔⵎⵉⵇⵉ, ⴷⴰⵜ ⴰⴷ ⵉⵎⵎⴰⵜⵜⵉ ⵍⵃⴰⵊⵊ ⵃⵎⴰⴷ ⵙ ⵜⴳⵎⵎⵉ ⵢⴰⴹⵏ ⵢⴰⵊⵊ ⵜⵉⴳⵎⵎⵉ ⵜⴰⵎⵣⵡⴰⵔⵓⵜ ⵉ ⵉⵎⴰⴷⵔⴰⵡⵏ ⵏⵏⵙ.

ⴳ ⵢⴰⵜ ⵜⵉⵣⵉ, ⵉⵙⵖⴰ ⵍⵃⵓⵙⴰⵢⵏ ⵓⴱⵕⴰⵀⵉⵎ ⴰⵙⴰⵡⵡⵓⵔ ⵏ ‘’ⴰⴼⵉⵔⵓⵏ’’ ⴳ ⴷⴰⵔ ⵍⵃⵓⵙⴰⵢⵏ ⴰⵛⵏⴳⵍⵉ ⵍⵍⵉ ⵎⵉ ⵉⴳⴰ ⵡⵉⵏⵏⵙ, ⵎⵎⴰⵖⵏ ⵅⴼ ⵓⵙⵎⵓⵔⵙ ⵏ ⵓⵙⵏⴼⴰⵔ, ⵉⵍⴽⵎ ⵓⵙⴰⵡⵡⵓⵔ ⴰⵔⵔⴰⵣⵏ ⵉⵡⵡⵉⵏⴳⵉⵎⵏ, ⵉⵙⵣⵎⵔ ⵜⵏ ⴰⴷ ⴽⵛⵎⵏ ⵉ ⵜⵎⴳⵓⵔⵉ ⵜⴰⵎⴰⴷⴷⵓⵔⵜ ⴳ ⵢⵉⵎⵉ ⵏⵏⵙ ⴰⴱⴰⵔⴰⵡ, ⴰⵙⵏⴼⴰⵔ ⵏⵏⴰ ⵉⵙⵙⴰⵔⵓⵏ ⵉⵙⵏⴼⴰⵔⵏ ⴳ ⵢⵉⴳⵔ ⵏ ⵓⵃⵟⵟⵓ ⵏ ⵉⵙⵍⵎⴰⵏ ⴷ ⵉⵛⴰⴽⴰⵏ.

ⵜⵎⵎⴰⵜⵉ ⵜⴰⵡⵉⵜ ⵏⵏⵙⵏ ⵙ ⵜⵓⵚⴽⴰ ⵏ ⵜⵣⵓⵣⵏⵉⵏ ⵜⵉⴼⵔⴽⴰⵏⵉⵏ, ⵜⵣⵎⵔ ⵜⴳⵔⵓⵎⵎⴰ ⴳ ⵜⴰⵎⵜⵎⵔⴰⵡⵉⵏ ⵏ ⵜⴰⵙⵓⵜ ⴰⴷ ⵉⵣⵔⵉⵏ, ⴰⴷ ⵉⵡⴰⵍⴰ ⵢⵉⴳⵔ ⵏ ⵉⵙⵙⴰⵔⵓⵜⵏ ⵏⵏⵙ ⵙⴳ ⵜⵓⵚⴽⴰ ⵏ ⵜⴼⵔⴽⴰ ⴳ ⵓⵙⵓⴽ ⵏ ⵍⵃⴰⵙⴰⵏ ⵡⵉⵙ ⵙⵉⵏ, ⵍⵍⵉⵖ ⵔⴰⴷ ⵜⵎⵎⴰⵜⵜⵉ ⵙ ⵓⵙⵓⴽ ⵏ ⵃⴰⵢⵢ ⵙⵙⴰⵍⴰⵎ, ⵖⵉⵏⵏ ⴰⵖ ⵎⵇⵇⵓⵔⵏ ⵉⵙⵏⴼⴰⵔⵏ ⵏ ⵜⵓⵚⴽⴰ ⵏ ⵜⵣⴷⴷⵓⵖⵉⵏ ⵜⵣⵣⵉⴳⵣ ⴷⵉⴷⵙ ⵜⴼⵔⴽⴰ ⴳ ⵙⵓⵙ ⵜⴰⵎⵓ ⵜⵉⵙⴳⴳⵉⵡⵉⵏ ⵢⴰⴹⵏ.

ⵜⵉⵍⴰⵍ ⵏ ⴱⵉⵛⴰ ⵙⵙⵓⵜⵍⵏⵜ ⵓⵍⴰ ⵉ ⵓⴱⵟⵟⵓ ⵏ ⵜⵢⴰⴼⵓⵜⵉⵏ ⵏ ⵉⵣⴰⵜⵉⵎⵏ (ⵓⴽⵎⵉⴹⵏ), ⵉⴳ ⵓⵙⵔⵙⵉⵡ ⴰⵎⵣⵡⴰⵔⵓ ⵏⵏⴰ ⵅⴼ ⴱⴷⴷⵏ ⵉⴹⴼⵕ ⵉ ⵜⵔⵓⵎⵎⴰ ⵏ ‘’ⵛⵉⵍ’’ ⵜⵎⵎⴰⵜⵜⵉ ⵜⴰⵡⵉⵜ ⵏⵏⵙ ⵙ ⵜⵡⵉⵍⴰ ⵜⴰⴱⴰⵔⴰⵡⵜ ⵙ ⵢⵉⴳⵔ ⴰⴼⵔⴽⴰⵏ, ⴷ ⵓⵔ ⵜⵜⵓⵏ ⴰⴷ ⵙⵙⵡⵓⵔⵉⵏ ⵜⴰⵔⵡⴰ ⵏ ⵜⵎⴰⵣⵉⵔⵜ ⵏⵏⵙⵏ ⴷ ⵜⵡⵉⵙⵉ ⵏⵏⵙⵏ.

ⵜⵣⵎⵔ ⵜⵡⵊⴰ ⵏ ⴱⵉⵛⴰ ⴰⴷ ⵜⵙⴽⵔ ⵜⵉⵎⵙⵙⵓⵔⵉⵏ ⴷ ⵉⵙⵏⴼⴰⵔ ⵉⵎⵇⵇⵔⴰⵏⵏ, ⴷ ⵣⵣⵓⴳⴰⵣⵏⵜ ⵜⵡⵓⵔⵉⵡⵉⵏ ⵏⵏⵙⵏ ⴰⵢⵍⵍⵉⵖ ⵉⴳⴰ ⵉⵙⵎ ⵏⵏⵙ ⴰⵎⵣⵡⴰⵔ.

ⵉⵜⵜⵡⴰⵙⵙⵏ ⵅⴼ ⴱⵕⴰⵀⵉⵎ ⵉⴷ ⵃⵍⵍⵉ ⴰⵣⵎⵣⵔ (ⵜⵉⴽⴽⵉ ⵏ ⵜⴷⵔⵉⵎⵜ) ⵏⵏⵙ ⵉⴳⴳⵓⵜⵏ ⵅⴼ ⵜⵉⵏⵎⴰⵍ ⵜⵉⵇⵇⴱⵓⵔⵉⵏ ⴷ ⵓⵙⵙⵎⵖⵔ ⵏⵏⵙ ⵉ ⵉⵎⵣⵔⴰⵡⵏ ⵅⴼ ⵓⵃⵙⵙⵓ ⵏ ⵡⴰⵡⴰⵍ ⵏ ⵕⴱⴱⵉ ⴷ ⵓⵙⵡⵉⵏⴳⵎ ⴳⵉⵙ, ⴷ ⵓⵙⵙⵎⵖⵔ ⵏ ⵉⵎⴰⵔⴰⵡⵏ ⵏ ⵉⵎⵥⵢⴰⵏⵏ ⴰⴷ ⵉⵔⵉⵏ ⴰⵙⴳⴷ, ⵙⵎⴰⴳⵍⵏ ⵜⵏ ⵅⴼ ⵓⵃⵙⵙⵓ ⵏ ⵓⴷⵍⵉⵙ ⵏ ⵕⴱⴱⵉ, ⴱⵕⴰⵀⵉⵎ ⴰⵎⵙⵢⴰⴼⴰ ⴰⴼⵔⴽⴰⵏ, ⵎⴽⴰⵏⵏ ⴷ ⴳ ⵢⵉⴳⵔ ⵏ ⵜⵎⵃⵟⵟⵓⵟⵉⵏ ⴷ ⵓⴽⵎⵉⴹⵏ ⵜⴽⴽⴰ ⵜⵜ ⵉⵏⵏ ⵜⵉⵣⵡⵉⵔⵉ ⵏⵏⵙ ⴳ ⵢⴰⵜ ⵜⵎⵣⴳⵉⴷⴰ ⵜⴰⵎⵥⵢⴰⵏⵜ ⵉⴳⴰ ⴳⵉⵙ ⴰⴳⴳⴰⴳ, ⵎⵇⵇⴰⵔ ⵜⴰⴷⵔⴰⵡⵜ ⵏⵏⵙ ⴰⴽⴷ ⵃⵎⴰⴷ ⴱⵉⵛⴰ ⵜⵙⵙⴼⴰⵖ ⵜ ⵙⴳ ⵜⵎⵣⴳⵉⴷⴰ, ⵉⵖⴰⵎⴰ ⵓⴽⴰⵏ ⵙⵓⵍ ⴷ ⵉⵎⵉⵔⵉ ⵏ ⵡⴰⴳⴳⴰⴳⵏ ⴷ ⵉⵎⵣⵡⴰⵔⵏ ⴷ ⵉⵎⵣⵔⴰⵡⵏ ⵏ ⵍⵇⵓⵕⴰⵏ, ⴰⵔ ⴷⵉⴷⵙⵏ ⵉⵜⵜⴳⵉⵡⵉⵔ, ⵉⵙⵙⵏⵥⵉ ⵜⵏ, ⵉⵙⵎⴰⵍⵍⴰ ⵖⵉⴼⵙ, ⴰⵢⵍⵍⵉⵖ ⵉⵍⵍⴰ ⵢⴰⵏ ⵓⴽⴰⴱⴰⵕ ⴳ ⵡⵉⴷ ⵉⵃⵙⵙⵓⵏ ⵍⵇⵓⵕⴰⵏ ⴳⴰⵏ ⵜ ⴷ ⵓⵣⵓⵜⵔ, ⴷ ⴰⵔ ⵙⵔⵙ ⴽⴽⴰⵜⵏ ⴰⵡⴰⵍ, ⴰⵎ ⵢⴰⵏ ⵓⵎⴷⴷⴰⴽⴽⵯⵍ ⵉⵙⵎⵓⵏⵏ ⵏⴳⵔ ⵜⴷⵔⵉⵎⵜ ⴷ ⵓⵍⵍⵇⵇⵓ ⴳ ⵜⵓⴷⵔⵜ ⴷ ⵓⵙⴽⴰⵔ ⵏ ⵓⴼⵓⵍⴽⵉ.

ⵃⵎⴰⴷ ⵓⵙⵄⵉⴷ, ⴷ ⵍⵃⵓⵙⴰⵢⵏ ⴷ ⴱⵕⴰⵀⵉⵎ ⵙⴳ ⵉⵎⵣⵡⴰⵔ ⵉⵎⵎⴰⵖⵏ ⵙ ⵉⵅⴼⴰⵡⵏ ⵏⵏⵙⵏ ⴰⴷ ⴳⵉⵏ ⵉⵔⴳⴰⵣⵏ ⵉⴷⵎⵙⴰⵏⵏ ⴳ ⵙⵓⵙ, ⵣⵎⵔⵏ ⴰⴽⴷ ⵃⵎⴰⴷ ⵓⵙⵄⵉⴷ ⴰⴷ ⵖⵣⵏ ⴰⵙⵙⴰⵖⵏ ⵏⵏⵙⵏ ⴳ ⵡⴰⵔⵔⴰ ⵏ ⵜⴷⵎⵙⴰ ⵜⴰⵎⵖⵔⴰⴱⵉⵢⵜ, ⴷⴷⵔⵏ ⴳ ⵢⴰⵜ ⵜⵇⴱⵉⵍⵜ ⵓⵔ ⴳⵉⵙ ⵍⵍⵉⵏⵜ ⵜⴼⴰⴷⵉⵡⵉⵏ ⵏ ⵜⵏⵓⴼⵍⴰⵢⵜ, ⵎⵎⴰⵖⵏ ⵙⵡⵓⵔⵉⵏ ⴰⴷ ⵍⴽⵎⵏ ⴰⵢⵍⵍⵉ ⵖ ⵍⵍⴰⵏ ⵖⵉⵍⴰ ⴳ ⵜⵙⴽⴼⴰⵍ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ, ⵜⴽⴽⴰ ⵜⵜ ⵉⵏⵏ ⵜⵎⵜⵜⵉⵏⵜ ⵏ ⴱⵕⴰⵀⵉⵎ ⵉⴷ ⵃⵍⵍⵉ ⴷ ⴰⵏⵎⵎⴰⵍ ⵅⴼ ⵓⵣⵔⴰⴽ ⵏⵏⴰ ⴰⵙ ⵉⵙⵙⵓⵜⵍⵏ, ⵎⴰⵢⴰⵏⵏ ⴰⴼ ⵜⴳⴰ ⵜⵎⵜⵜⵉⵏⵜ ⵏⵏⵙ ⵜⴰⵎⴷⴷⵉⴷⵉⵜ ⴳ ⵡⴰⵢⵢⵓⵔ ⵏ ⵢⵓⵏⵢⵓ ⵏ ⵓⵙⴳⴳⵯⴰⵙ ⴰⴷ ⵉⵣⵔⵉⵏ.

ⵉⵖⴰⵎⴰ ⵍⵃⴰⵊⵊ ⴱⵕⴰⵀⵉⵎ ⴷ ⴰⵎⴷⴽⵉ ⵉ ⵜⵖⴰⵔⴰⵙⵜ ⵏⵏⵙ ⵜⴰⵚⵚⵓⴼⵉⵜ ⵙ ⵜⵉⵍⵉⵜ ⵏ ⵉⵎⴰⵙⵙⴰⵏⵏ ⴷ ⵜⴷⴰⴱⵓⵜⵉⵏ ⵏ ⴷⴷⵉⴽⵔ ⴳ ⵉⵣⵎⵓⵣⵣⴰ ⵉⵙⴳⴷⴰⵏⵏ ⵏ ⵉⵏⵎⵓⵇⵇⴰⵔⵏ ⵏⵏⴰ ⵙ ⴰⵔ ⵙⵙⴼⵓⴳⵍⵓⵏ ⴳ ⵓⴷⵔⴰⵔ ⴷ ⵓⵣⴰⵖⴰⵔ, ⴷ ⵉⴽⴽⴰ ⵜⵜ ⵉⵏⵏ ⵉⵍⵍⴰ ⴷⴰⵔⵙ ⵢⴰⵏ ⵓⴷⵖⴰⵔ ⵎⵇⵇⵓⵔⵏ ⵏⴳⵔ ⵉⵔⴳⴰⵣⵏ ⵏ ⵜⵎⴰⵙⵙⴰⵏⵜ ⴷ ⵜⵙⵔⵜⵉⵜ ⴳ ⵙⵓⵙ.

ⴱⵕⴰⵀⵉⵎ ⵉⴷ ⵃⵍⵍⵉ, ⵉⴼⵍ ⴷ ⵉ ⵜⴰⵔⵡⴰ ⵏⵏⵙ ⵜⵉⵎⵙⵙⵓⵔⵉⵏ ⵜⵉⴳⵯⵕⴰⴹ, ⴹⴰⵕⵜ ⵉⵙⵙⵏⵜⵉ ⴷ ⴰⵎⴰⵡⴰⵙ ⵉ ⵓⵙⴱⴱⴰⴱ, ⵉⵡⵉⵙ ⵏ ⵜⵎⴰⵣⵉⵔⵜ ⵏⵏⵙ ⵃⵎⴰⴷ ⵓⵙⵄⵉⴷ ⴷ ⵓⵎⴰⴷⵔⴰⵡ ⵏⵏⵙ ⴷ ⵉ ⵍⵃⵓⵙⴰⵢⵏ, ⵍⵍⵉⵖ ⵔⴰⴷ ⵉⵡⴰⵍⴰ ⵜⵉⵖⴰⵡⵙⵉⵡⵉⵏ ⴹⴰⵕⵜ ⵏⵏⵙ ⵉⵡⵉⵙ ⵏⵏⴰⵊⵎ ⵏⵏⴰ ⵉⴳⴰⵏ ⴰⵏⵎⵀⴰⵍ ⴰⵎⴰⵜⴰⵢ ⵉ ⵜⴳⵔⵓⵎⵎⴰ ‘’ ⵉⴷⵏⴰⴽⵓ’’ ⵏⵏⴰ ⵉⵣⵣⵓⴳⴰⵣⵏ ⵅⴼ ⵉⵥⵎⵓⵥⵥⴰⵍ ⵏ ⴱⴰⴱⴰⵙ.

ⵣⵉⵏⴰ ⵉⴷ ⵃⵍⵍⵉ, ⵉⵍⵍⵉⵙ, ⵏⵜⵜⴰⵜ ⵜⵏⴽⴹ ⵜⴰⴳⴳⵓⴳ ⵅⴼ ⵉⵙⵏⴼⴰⵔ ⵏ ⵜⵡⵊⴰ, ⴹⴰⵕⵜ ⵜⴹⴼⵕ ⵜⵉⵖⵔⵉ ⵏⵏⵙ ⴳ ⵜⵣⵏⵉⵜ, ⵜⵓⵎⵥ ⴰⵙⵍⵉⴽⵏ ⵏ ⵜⵓⵔⴰⴳⵜ ⴳ ⵜⵖⵉⵡⴰⵏⵜ ⵏ ⵛⵛⴰⵔⵉⵄⴰ ⴳ ⴰⵢⵜ ⵎⵍⵍⵓⵍ, ⴹⴰⵕⵜ ⵏⵏⵙ ⵜⴰⵎⵥ ⴰⵎⴰⵙⵟⵕ ⵏ ⵜⵡⵓⵔⵉⵡⵉⵏ, ⵙⴳ ⵜⵎⵔⵙⵍⵜ ⵜⴰⵙⴷⴰⵡⴰⵏⵜ ⵜⵓⵙⵍⵉⴳⵜ ⴳ ⵓⴳⴰⴷⵉⵔ, ⵎⴰⵛⵛ ⵙ ⵜⴷⵍⵙⴰ ⵜⴰⵣⵔⴼⴰⵏⵜ ⵜⴷⵃⵉ ⵜⵜ ⴰⴷ ⵜⵖⵔ ⵜⴰⵎⵥ ⴰⵙⵍⴽⵉⵏ ⵏ ⵜⵓⵔⴰⴳⵜ ⴳ ⵓⵙⵍⴳⵏ ⴰⵙⴳⴳⵯⴰⵙ ⵏ 2016, ⴷ ⵓⵎⴰⵙⵟⵕ ⴰⵙⴳⴳⵯⴰⵙ ⵏ 2018, ⵜⴳ ⵖⵉⵍⴰ ⴷ ⵜⴰⵎⴰⵙⵜⴰⵏⵜ ⵜⴳ ⴰⵡⴷ ⵜⴰⵎⴰⵔⵉⵜ ⵜⴰⴱⴰⵕⵍⴰⵎⴰⵏⵉⵜ ⴷ ⵜⵎⵛⵛⵉⵡⴰⵕⵜ (ⵜⴰⵏⵙⴼⴰⵡⵜ) ⴳ ⵓⵙⵇⵇⵉⵎ ⵏ ⵜⵎⵏⴰⴹⵜ ⴷ ⵜⴳⵔⴰⵡⵜ.

ⴰⴹⵕⵉⵚ: ⵎ.ⵍⵎⵙⵜⴰⵔⵉ

ⴰⵙⵓⵖⵍ: ⵄ.ⴱⵓⵜⴱⴰⵖⴰ