ⴰⵣⵔⴼ ⵏ ⵜⵎⴰⵣⵉⵖⵜ .. ⵇⵇⵍ ⴰ ⵍⴰⵥ ⴰⵔ ⴷ ⵏⵙⵔⵓⵜ

“ⴰⵡⴰⵍ ⵎⵉ ⵜⵜⵙⵍⵍⴰⵏ ⵎⴷⴷⵏ” ⵉⵔⵡⴰⵙ ⵉⴷ ⵉⵏⵣⵉ ⴰ ⴰⴷ ⵢⵓⵡⵉⵏ ⵅⴼ ⵓⵣⵔⴼ ⵏ ⵜⵎⴰⵣⵉⵖⵜ ⴰⵙⵙ ⴰ, ⴷ ⵏⴽⴽⵯⵏⵉ ⵉⴱⴷⴷⴰⵏ ⵅⴼ ⵜⵉⴳⵔⴰ ⵏ ⵜⵉⵣⵉ ⵉⵜⵜⵓⴼⴽⴰⵏ ⵉ ⵜⴼⵔⴽⵉⵡⵜ ⵜⴰⵎⵣⵡⴰⵔⵓⵜ ⵉ ⵓⵙⵡⵓⵔⵉ ⵙ ⴽⵉⴳⴰⵏ ⵏ ⵉⵎⴰⴳⵔⴰⴷⵏ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16, ⵉⵥⵍⵉⵏ ⵙ ⵓⵙⵔⵙ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵉ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⴰⵎⴰⵎⴽⵉⵜ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵓⵙⵙⵍⵎⴷ, ⴷ ⵢⵉⴳⵔⴰⵏ ⵉⵣⵡⴰⵔⵏ ⴳ ⵜⵓⴷⵔⵜ ⵜⴰⵎⴰⵜⴰⵢⵜ, ⵜⵉⵣⵉ ⴰⴷ ⵉⵙⵔⵙ ⵓⵙⵍⴳⵏ ⴰⴳⵏⵙⵓ ⵏ ⵓⵣⵎⵣ ⵏ ⵙⵎⵎⵓⵙ ⵉⵙⴳⴳⵯⴰⵙⵏ ⴳ ⵓⵙⵉⴳⵓⵜ ⵙⴳ ⵡⴰⴽⵓⴷ ⵏ ⵓⴼⵙⴰⵔ ⵏⵏⵙ ⴳ ⵓⵖⵎⵉⵙ ⴰⵎⴰⴷⴷⵓⴷ. ⵜⵉⵍⴰⵡⵜ ⴰⵔ ⵜⵎⵎⴰⵍ ⵎⴰⵙ ⴷ ⴰⵎⴰⵟⵍ ⵍⵍⵉ ⵏⵏ ⵉⴽⴽⴰ ⴳ ⵡⵓⴼⵓⵖ ⵏⵏⵙ ⵉⵔⴰ ⴰⴷ ⴰⵙ ⵢⴰⵍⵙ ⴳ ⵓⵙⵔⴰⵙ ⵏⵏⵙ, ⵜⵉⵣⵉ ⴰⴷ ⵉⵙⵎⴷⵏ ⵜⴰⵎ ⵉⵙⴳⴳⵯⴰⵙⵏ ⵙⴳ ⵓⵙⵡⵓⵔⵉ ⵙ ⵓⴷⵓⵙⵜⵓⵔ ⴰⵎⴰⵢⵏⵓ ⴳ 2961/2011, ⵏⵏⴰ ⴷ ⵢⵓⵡⵉⵏ ⵅⴼ ⵓⵙⵏⵚⵚⴱ ⵏ ⵜⵎⴰⵣⵉⵖⵜ ⵜⴰⵎⴰ ⵏ ⵜⵄⵔⴰⴱⵜ, ⴷⵖⵉ ⴳ ⵜⵙⵎⴷ ⵜⵉⵣⵉ ⵏ ⵜⴼⵔⴽⵉⵡⵜ ⵉⵣⵡⴰⵔⵏ, ⵖⵓⵔⵏⵖ ⴰⵣⵔⴼ ⴰⴷ ⴰⵙ ⵏⵣⵣⵔⵢ, ⵏⵙⵏⵉⵖⵙ ⵎⴰⴷ ⵉⴳⴳⵣⵏ ⴰⴷ ⵢⵉⵍⵉ ⴳ ⵜⵉⵍⴰⵡⵜ, ⵓⵍⴰ ⵎⴰⴷ ⵉⵙⵓⵍⵏ ⵢⵓⴳⵍ ⴰⵔ ⵉⵜⵜⵍⵍⵢ, ⵃⵎⴰ ⴰⴷ ⵏⵉⵥⵉⵕ ⴰⵔ ⵎⴰⵏⵉ ⵜⵖⵉ ⵜⵏⴱⴰⴹⵜ ⴰⴷ ⵜⵙⵙⵓⴼⵓ ⴰⵡⴰⵍ ⵏⵏⵙ ⴳ ⵓⵣⵣⵔⵉⴳ ⵏ ⵓⵙⵍⴳⵏ, ⵜⴼⴽ ⵓⴷⴷⵓⵔ ⵜⵓⴽⵍⴰⵍ ⵜⵎⴰⵣⵉⵖⵜ ⴳ ⵡⴰⵎⵓⵔ.

ⴳ ⵓⵎⴰⴳⵔⴰⴷ ⴰ, ⵓⵔ ⵏⵏⵉⵖ ⴰⴷ ⵓⵖⵓⵍⵖ ⵙ ⵓⵎⵔⴰⵔⴰ ⵏ ⵡⴰⵡⴰⵍ ⵙ ⵜⵉⵣⵡⵓⵔⵉ, ⵅⴼ ⵎⴰⵙ ⵉⵍⵍⴰ ⵓⵙⵍⴳⵏ ⴰⵎⴰⴷⴷⴰⵙ 26.16 ⴳ ⵓⵙⵡⵉⵔ ⵏ ⵉⵏⴰⵔⵓⵣⵏ, ⵎⴰⵛ ⵇⴰⴷ ⵏⵙⵏⵉⵖⵙ ⴽⵉⴳⴰⵏ, ⵏⵖⵙ, ⵏⵉⵏⵉⴳ ⵅⴼ ⵎⴰⴷ ⵏⵏ ⵢⵓⵡⴹ ⵓⵙⵓⴳⴳⵣ ⵏ ⵉⵎⵏⵏⵉⵜⵏ ⵏ ⵓⵙⵍⴳⵏ ⴰⵎⴰⴷⴷⴰⵙ, ⵏⵏⴰ ⵉⵍⴰⵇ ⴰⴷ ⵉⵙⵙⵏ ⵢⵉⵍⵉ ⵓⵙⵡⵓⵔⵉ ⴰⴳⵏⵙⵓ ⵏ ⵙⵎⵎⵓⵙ ⵉⵙⴳⴳⵯⴰⵙⵏ ⵙⴳ ⵡⴰⴽⵓⴷ ⵏ ⵓⴼⵙⴰⵔ ⵏⵏⵙ, ⵏⵏⵉⵍ ⵎⴰⴷ ⵜⵓⵡⵉ ⵜⴳⴳⵓⵔⵜ ⵜⵉⵙⵙ ⵜⵥⴰⵜ, ⵉⵥⵍⵉⵏ ⵙ “ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵉⵎⴰⵙⵙⵏ ⵏ ⵓⵟⴼⵓⵕ ⵏⵏⵙ”, ⵜⵉⵣⵉ ⵉⵏⵏⴰⵏ ⴰⴷ ⵉⵙⵎⴷ ⴰⵙⵙ ⵏ 13/09/2974 ⵉⵎⵙⴰⵙⴰⵏ ⴷ 26/09/2024, ⵏⵙⵙⵉⴽⵣ ⴰⵏⴱⵓⵜⵜⵍ ⵉⵍⵍⴰⵏ ⴳ ⵓⵣⵣⵔⵉⴳ ⵏ ⵓⵙⵍⴳⵏ ⴳ ⵎⴰⴳⴰⵏ ⵉⴳⵔ.

ⴳ ⵢⵉⴳⵔ ⵏ ⵓⵙⵍⵎⴷ

“ⵉⴳⴰ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵣⵔⴼ ⵉ ⵉⵎⵖⵔⴰⴱⵉⵢⵏ ⴰⴽⴽⵯ ⵎⵉⵏ ⴰⵙⵏⵓⵃⵢⵓ” ⵏⵏⵉⵍ ⵎⴰⵅⴼ ⴷ ⵢⵓⵡⵉ ⵓⵎⴰⴳⵔⴰⴷ ⵡⵉⵙⵙ 3 ⴳ ⵓⵙⵍⴳⵏ ⴰⵎⴰⴷⴷⴰⵙ, ⵉⴳ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵓⵙⵍⵎⴷ ⵢⴰⵜ ⴳ ⵜⵉⵔⵙⴰⵍ ⵏⵏⵙ ⵜⵉⴷⵙⵍⴰⵏⵉⵏ, ⵢⴰⵡⵉⴷ ⵓⵎⴰⴳⵔⴰⴷ ⵡⵉⵙⵙ 4 ⵅⴼ ⵜⴰⵛⵛⵉⵍⵜ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵜⵎⴰⵎⴽⵜ ⵜⴰⵎⴹⴼⵓⵕⵜ ⴳ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵢⵉⴳⵔⴰⵏ ⵉⵎⴰⵜⴰⵢⵏ ⴷ ⵡⵓⵙⵍⵉⴳⵏ.

ⵉⵍⴰⵇ ⴰⴷ ⵉⵙⵙⵓⴷⵓ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵓⵏⴳⵔⴰⵡ ⵏ ⵓⵙⵍⵎⴷ ⵙ ⴷⴰⵜ, ⵍⵍⵉ ⴳ ⴷ ⵉⴼⴼⵓⵖ ⵓⵙⵍⴳⵏ ⴰⵎⴰⴷⴷⴰⵙ,  ⵙ ⵎⴰⵙ ⵉⵙⵙⵏⵜⵉ ⵓⵙⵍⵎⴷ ⵏ ⵜⵎⴰⵣⵉⵖⵜ ⴳ ⵓⵙⵍⵎⴷ ⴰⵎⵏⵣⵓ ⵙⴳ ⵓⵙⴳⴳⵯⴰⵙ ⵏ 2953/2003, ⴹⴼⵉⵕ ⵢⵉⵏⴰⵡ ⴰⴳⵍⴷⴰⵏ ⵏ ⵓⵊⴷⵉⵔ ⵉⵙⵔⵙⵏ ⵜⵉⵔⵙⴰⵍ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⵣⵉⵖⵜ, ⵎⴰⴽⴰ ⵏⵏ ⵜⵉⵍⴰⵡⵜ ⴰⵔ ⵜⵎⵎⴰⵍ ⵎⴰⵙ ⵓⵔ ⵜⵍⵍⵉ ⴰⵡⴷ ⵢⴰⵜ ⵜⵙⵜⵔⴰⵜⵉⵊⵉⵜ ⵅⴼ ⵓⵙⵎⴰⴷ ⵏⵏⵙ, ⴰⴷ ⴷⵖⵉ, ⵉⵇⵉⵎⴰ ⵓⵙⵍⵎⴷ ⵏ ⵜⵎⴰⵣⵉⵖⵜ ⵉⴳⴰ ⵜⵉⵔⵎⵉⵜ ⵉⴷⵔⵓⵙⵏ ⴳ ⵎⵏⵏⴰⵡ ⵏ ⵜⵎⴰⵔⵙⴰⵍ, ⴱⵍⴰ ⵏⵙⴰⵡⵍ ⵅⴼ ⵜⴼⵉⴽⴽⴰⵛ ⵜ ⵉⴽⴽⴰⵜⵏ ⴷ ⵉⵎⵓⴽⵔⵉⵙⵏ ⵜⵜⵉⴷⵉⵔⵏ ⵉⵙⵍⵎⴰⴷⵏ ⵏⵏⵙ, ⴷ ⵎⴰⵙ ⵓⵔⵜⴰ ⵜⵙⵙⵏⵜⵉ ⴰⵡⴷ ⴷⵖⵉ ⴳ ⵓⵙⵍⵎⴷ ⴰⵎⵣⵡⴰⵔⵓ, ⵓⵍⴰ ⵉⵙⵡⵉⵔⵏ ⵏ ⵓⵙⵎⵓⵜⵜⴳ ⴷ ⵓⵙⵎⴷⵉ, ⴰⵢⵏⵏⴰ ⵉⵎⵎⴰⵍⴰⵏ ⵎⴰⵙ ⴷ ⴰⵡⴰⵏⴽ ⵓⵔ ⵉⵙⵙⵓⴼⵉ ⴰⵡⴰⵍ ⵏⵏⵙ ⵏⵏⵉⵍ ⵎⴰⴷ ⵢⵓⵡⵉ ⵓⵙⵍⴳⵏ.

ⴳ ⵎⴰⴷ ⵉⵥⵍⵉⵏ ⵙ ⵓⵙⵍⵎⴷ ⵓⵙⵍⵉⴳ, ⵜⵉⵣⵉ ⵍⵍⵉⴳ ⵉⵍⵍⴰ ⵅⴼ ⵜⵎⴰⵡⴰⵙⵜ ⵜⴰⵖⵓⵍ ⵜⵣⵓⵔⵉ ⴰⴷ ⵜⴱⴷⴷ ⵅⴼ ⵜⵙⵏⵙⵉ ⵏ ⵓⵙⵍⴳⵏ ⵙ ⵜⵓⵛⵛⵉⵍⵜ ⵏ ⵓⵙⵉⴹⴼ ⵏ ⵜⵎⴰⵣⵉⵖⵜ ⴳ ⵜⵖⴰⵔⴰⵙⵉⵏ ⵏ ⵓⵙⵍⵎⴷ ⵙⵡⴰ ⵢⵉⴳⵔ ⴰⵎⴰⵜⴰⵢ ⵓⵍⴰ ⵓⵙⵍⵉⴳ, ⵜⵙⵙⵓⴼⵖ ⴷ ⵜⴰⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵜⵓⵏⵏⵉⴹⵜ 200ⴳ24 ⴳ ⵓⵙⴰⴽⵓⴷ 21/06/2974 ⵉⵎⵙⴰⵙⴰⵏ ⴷ 05/07/2024, ⵜⴳ ⴰⵙⵍⵎⴷ ⵏ ⵜⵎⴰⵣⵉⵖⵜ ⴷ ⴰⵙⵜⴰⵢ, ⴰⵢⵏⵏⴰ ⵉⴽⴽⴰⵜⵏ ⴳ ⵓⴹⵕⵉⵚ ⵏ ⵓⵙⵍⴳⵏ, ⴰⴷ ⵉⵜⵜⵓⴼⴽ ⵓⵙⵜⴰⵢ ⵏ ⵜⵖⵔⵉ ⵏ ⵜⵎⴰⵣⵉⵖⵜ ⵉ ⵜⵎⵔⵙⴰⵍ ⵜⵓⵙⵍⵉⴳⵉⵏ ⵏⵏⴰ ⵉⵔⴰⵏ, ⵜⵉⵏⵏⴰ ⵓⵔ ⵉⵔⵉⵏ ⴱⵍⴰⵛ, ⵇⴰⴷ ⵉⵙⵙⵉⵜⵎ ⴰⵙⵉⴷⴼ ⴰⴷ, ⵉⵚⴽⵓ ⵅⴼ ⵢⵉⵔⵉ ⵏ ⴽⵓ ⵜⵉⵎⵔⵙⵍⵜ, ⵉⵙⴽⴹⵓⴹⴼ ⵜⵙⴰⴽⵙⴰⵍⵜ ⵏ ⵜⵓⵜⵍⴰⵢⵉⵏ ⴳ ⵓⵏⴳⵔⴰⵡ ⵏ ⵓⵙⵍⵎⴷ. ⴱⵍⴰ ⵜⵓⵛⵛⵉⵍⵜ, ⵇⴰⴷ ⵉⵜⵜⵢⴰⴽⵙ ⵓⵣⵔⴼ ⵉ ⴽⵉⴳⴰⵏ ⵏ ⵉⵏⵍⵎⴰⴷⵏ ⵏ ⵡⴰⴷ ⵍⵎⴷⵏ ⵜⵓⵜⵍⴰⵢⵜ ⵏⵙⵏ ⵜⵓⵏⵚⵉⴱⵜ.

ⴳ ⵢⵉⴳⵔ ⵏ ⵓⵣⵣⵔⴰⴼ ⴷ ⵓⵙⵏⵎⴰⵍⴰ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ

ⵉⵙⵙⵓⵜⵔ ⵓⵙⵎⵀⵍ ⵏ ⵓⴷⵔⵉⵣ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴳ ⵢⵉⴳⵔ ⵏ ⵓⵣⵣⵔⴰⴼ, ⴷ ⵓⵙⵏⵎⴰⵍⴰ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⴰⵙⵙⵎⵔⵙ ⵏⵏⵙ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵔⴰⴱⵜ ⴳ ⵜⵡⵓⵔⵉⵡⵉⵏ ⵏ ⵜⵖⵉⵎⴰⵜⵉⵏ ⵜⵉⴳⴷⵓⴷⵉⵏ ⵏ ⵓⴱⵕⵍⴰⵎⴰⵏ, ⴷ ⵉⵏⴳⵎⴰⵎ ⵏⵏⵙ, ⵢⵉⵍⵉ ⵓⵙⵓⵖⵍ ⴰⴷⵖⵢⴰⵏ ⵙⵉⵙ, ⴷ ⵙⴳⵉⵙ, ⵢⴰⵡⵉⴷ ⵓⵎⴰⴳⵔⴰⴷ ⵡⵉⵙⵙ 10 ⵅⴼ ⵓⵣⵓⵣⵣⵔ ⵓⵙⵔⵉⴷ ⵏ ⵜⵖⵉⵎⵉⵜⵉⵏ ⵏ ⵓⴱⵕⵍⴰⵎⴰⵏ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ, ⴳ ⵜⴱⴰⴷⵓⵜⵉⵏ ⴷ ⵉⵏⵣⵡⴰⵢⵏ ⵉⴳⴷⵓⴷⴰⵏⵏ ⵉⵎⴰⵣⵉⵖⵏ, ⵎⵓⵏⵏⵜ ⴷ ⵓⵙⵓⵖⵍ ⴰⴷⵖⵢⴰⵏ ⵉ ⵜⵡⵓⵔⵉⵡⵉⵏ ⵏⵏⵙⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.

ⵎⵇⵇⴰⵔ ⵜⵙⵙⵏⵜⵉ ⵜⵙⵓⵖⵍⵜ ⵜⴰⴷⵖⵢⴰⵏⵜ ⴳ ⵜⵖⵉⵎⴰⵜⵉⵏ ⵜⵉⴱⵕⵍⴰⵎⴰⵏⵉⵏ, ⴷ ⵓⵣⵓⵣⵣⵔ ⵏⵙⵏⵜ ⴳ ⵜⴱⴰⴷⵓⵜⵉⵏ ⴷ ⵉⵏⵣⵡⴰⵢⵏ ⵏ ⵜⵎⴰⵣⵉⵖⵜ, ⵜⵙⵓⵍ ⵜⵙⵓⵔⵉⴼⵜ ⴰ ⵜⵙⵙⵏ ⴽⵉⴳⴰⵏ ⵏ ⵜⴼⵉⴽⴽⴰⵛ, ⴷⵔⵓⵙⵏ ⵉⵙⵓⴳⴰⵎ ⵉⵎⵥⵍⴰⵢ, ⵓⵍⴰ ⵉⵍⵍⴰ ⵓⵙⵎⵓⵜⵜⴳ ⵉⴳⴰⵏ ⵉ ⵉⵎⵙⵙⵓⵖⵍⵏ ⴳ ⵢⵉⴳⵔ ⴰⴷ, ⴳ ⵜⵙⴳⴰ ⵢⴰⴹⵏ ⵜⵜⵓⴼⴽⴰⵏ ⴽⵉⴳⴰⵏ ⵏ ⵉⵙⵇⵙⵉⵜⵏ ⵅⴼ ⵓⵡⵜⵜⴰⵙ ⵏ ⵓⵙⵡⵓⵔⵉ ⵙ ⵜⴰⵏⵜⴰⵍⴰⵢⵉⵏ (ⵜⴰⵛⵍⵃⵉⵜ, ⵜⴰⵎⴰⵣⵉⵖⵜ, ⵜⴰⵔⵉⴼⵉⵜ) ⴳ ⵓⴷⵖⴰⵔ ⵏ ⵜⵓⵜⵍⴰⵢⵜ ⵜⴰⵏⴰⵡⴰⵢⵜ, ⵏⵏⴰ ⵉⵙⵎⴰⵏⵏ, ⵜⵉⵥⴹⵉⵕ ⴰⴷ ⵜⵙⴷⵓⵙ ⴰⵎⵢⴰⵡⴰⴹ ⴷ ⵓⵙⵙⴼⵔⵓ ⴰⵙⵍⴳⴰⵏ. ⴰⵙⵡⵓⵔⵉ ⵙ ⵜⴰⵏⵜⴰⵍⴰⵢⵉⵏ ⴰⴷ ⵉⵡⵜ ⵜⵉⴼⵉⴽⴽⵛⵜ, ⵉⵙⵏⴱⵓⵜⵜⵍ ⴰⵙⵓⵖⵍ ⴷ ⵓⵣⵣⵔⴰⴼ ⵢⴰⵡⵉⴷ ⴰⵙⵏⵓⵃⵢⴰ ⴳ ⵓⵔⵎⴰⵙ ⴷ ⵓⵙⵏⵉⵙ.

ⴳ ⵜⵙⴳⴰ ⵢⴰⴹⵏ, ⵜⵓⵡⵉ ⴷ ⵜⵙⴷⴷⴰⵔⵜ ⵜⵉⵙⵙ ⵙⵏⴰⵜ ⴳ ⵓⵎⴰⴳⵔⴰⴷ 10 ⵅⴼ ⵡⵓⴼⵓⵖ ⵏ ⵜⵓⵏⵖⵉⵍⵜ ⵏ ⵓⵖⵎⵉⵙ ⴰⵎⴰⴷⴷⵓⴷ ⵏ ⵓⴱⵕⵍⴰⵎⴰⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵎⴽⵏⵏⴰ ⴷ ⵉⵙⵙⵓⵜⵓⵔ ⵓⵎⴰⴳⵔⴰⴷ 11 ⵙ ⵓⴼⵙⴰⵔ ⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵎⴰⴷⴷⴰⵙⵏ, ⵓⵍⴰ ⵉⵏⵇⵇⵉⵙⵏ ⴷ ⵓⵎⴷⵉⵡⵍ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴳ ⵓⵖⵎⵉⵙ ⴰⵎⴰⴷⴷⵓⴷ, ⵉⵥⵍⵉⵏ ⵙ ⵜⴳⵔⴰⵡⵉⵏ ⴰⴷ, ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⵇⵇⴰⵔ ⵜⵜⵓⴼⴽⴰ ⵜⵉⵣⵉ ⵓⴳⴳⴰⵔ ⵉ ⵉⵙⴱⴷⴰⴷⵏ ⴰⴷ, ⵜⵓⵡⴹ ⵎⵔⴰⵡ ⴰⵔ ⵙⵎⵎⵓⵙ ⴷ ⵎⵔⴰⵡ ⵏ ⵉⵙⴳⴳⵯⴰⵙⵏ, ⵎⴰⵛ ⴰⵙⵏⴱⵓⵜⵜⵍ ⵉⵜⵜⵓⴳⴰⵏ ⵉ ⵉⵙⴱⴷⴰⴷⵏ ⵎⵉ ⵜⵙⵎⴷ ⵜⵉⵣⵉ ⴷ ⵜⴰⵎⴰⵜⴰⵔⵜ ⵉⵙⵙⵉⵡⵉⴷ ⵅⴼ ⵉⵎⴰⵍ ⵏ ⵜⴰⵎⵣⵉⵖⵜ ⴳ ⵜⵡⵓⵔⵉ ⵜⵓⵣⵔⵉⴼⵜ.

ⵎⴽ ⵓⵔ ⵉⵙⵙⵓⴼⵉ ⵓⴱⵕⵍⴰⵎⴰⵏ ⵙ ⵜⵎⵚⵕⵉⵜⵉⵏ ⵏⵏⵙ, ⴷ ⵏⵜⵜⴰ ⵉⴳⴰⵏ ⵜⴰⵏⴱⴰⴹⵜ ⵏ ⵓⵙⵣⵔⴼ ⵜⴰⵏⴰⴼⵍⵍⴰⵜ ⴳ ⵜⵎⴰⵣⵉⵔⵜ, ⴰⵡⴰⵍ ⵏⵏⵙ ⴳ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏ ⵉⵙⵍⴳⴰⵏⵏ ⴷ ⵉⵙⵔⵓⵙ ⵙ ⵉⵖⴼ ⵏⵏⵙ, ⴰⴳⵏⵙⵓ ⵏ ⵜⵉⵣⵉ ⵏⵏⴰ ⵢⴰⴽⴽⴰ ⵉ ⵓⵙⵓⴳⴳⵣ ⵏⵏⵙⵏ, ⵎⴰⵙ ⵏⵔⴰ ⴰⴷ ⵏⵇⵇⵍ ⴰⴷ ⵜ ⴳⵉⵏⵜ ⵜⵎⵔⵙⴰⵍ ⵢⴰⴹⵏ?

ⴳ ⵢⵉⴳⵔ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ

ⴳ ⵢⵉⴳⵔ ⵏ ⵓⵙⵏⵖⵎⵙ, ⵙⵓⵍⵏⵜ ⵜⵎⵔⵙⴰⵍ ⵜⵉⵏⵖⵎⴰⵙⵉⵏ ⴰⴳⴳⵓⴳⵏⵜ ⵅⴼ ⵉⵡⵜⵜⴰⵙⵏ ⵉⵜⵜⵓⵙⵔⴰⵙⵏ, ⵎⵇⵇⴰⵔ ⵜⵙⵙⴼⵔⴰ ⵜⴳⴳⵓⵔⵜ ⵜⵉⵙⵙ ⴽⴽⵓⵥⵜ ⴳ ⵓⵙⵍⴳⵏ ⴰⵎⴰⴷⴷⴰⵙ ⴳ ⵓⵙⵉⴹⴼ ⵏ ⵜⵎⴰⵣⵉⵖⵜ ⴳ ⵎⴰⵜⵜⴰ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⵎⴰⵜⴰⵢⵏ ⵓⵍⴰ ⵓⵙⵍⵉⴳⵏ, ⵙ ⵡⴰⵏⴰⵡⵏ ⵏⵙⵏ ⴰⴽⴽⵯ, ⵉⵎⴽⵉⵏⵏⴰ ⴷ ⵢⵓⵡⵉ ⵅⴼ ⴰⴷ ⵉⵙⵡⵓⵔⵉ ⵓⵡⴰⵏⴽ ⵅⴼ ⵓⵙⵓⵊⴷ ⴷ ⵓⵙⵎⵓⵜⵜⴳ ⴷ ⵓⵙⵖⵔⵜ ⵏ ⵉⵙⴳⵓⵎⵏ ⵉⵏⴼⴳⴰⵏⵏ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵓⵙⵏⵖⵎⵙ, ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ,  ⴷ ⴰⴷ ⵉⵜⵜⵉⵍⵉ ⵓⵡⵇⵇⵔ ⵏ ⵓⵙⵖⵍ ⵏ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ ⵉⵙⵖⵍⵏ ⵏ ⵓⴱⵟⵟⵓ ⵏ ⵓⵙⵏⴰⵍ ⴰⴳⴷⵓⴷⴰⵏ ⵉ ⵉⵢⴰⴼⵓⵜⵏ ⵉⵙⵍⵉⵥⵕⵉⵏ, ⴳ ⵍⵍⴰⵏ ⵉⵙⵓⵔⴰ ⵏ ⵙⵙⵉⵏⵉⵎⴰ, ⴷ ⵡⵉⵏ ⵜⵉⵍⵉⴼⵉⵣⵢⵓⵏ, ⴷ ⵡⵉⵢⵢⴰⴹ ⴳ ⵜⵡⵓⵔⵉⵡⵉⵏ ⵜⵉⵏⴰⵥⵓⵕⵉⵏ, ⴷ ⵜⵏⵖⵎⴰⵙⵜ ⵜⴰⵎⵉⵔⴰⵢⵜ ⴷ ⵜⵎⵓⵟⵟⵓⵏⵜ.

ⴰⵕⵥⵥⵓⵎ ⵏ ⵜⴱⴰⴷⵓⵜ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ  2960/2010, ⵉⴳⴰ ⵢⴰⵜ ⵜⵙⵓⵔⵉⴼⵜ ⵉⵥⵉⵍⵏ ⴳ ⵢⵉⵍⵉ ⵏ ⵜⴰⵎⴰⵣⵉⵖⵜ ⴳ ⵓⵙⵏⵖⵍⵙ ⴰⵙⵍⵉⵥⵕⵉ, ⵎⴰⵛ ⴰⵔ ⴷⵖⵉ ⵓⵔⵜⴰ ⵜⵓⵡⵉⴹ ⴰⵣⵓⵣⵣⵔ ⵉⵣⴷⵉⵏ ⴳ 24 ⵏ ⵜⵙⵔⴰⴳⵜ, ⴰⵙⵏⴱⵓⵜⵜⵍ ⴰ ⴳ ⴰⴷ ⵜⴰⵡⴰⴹ ⴰⵣⵓⵣⵣⵔ ⵉⵣⴷⵉⵏ ⴷⴰ ⵉⵎⵎⴰⵍ ⵜⴰⴷⵔⵙⵉ ⵉⵍⵍⴰⵏ ⴳ ⵉⵙⵓⴳⵉⵎ ⴷ ⵜⵉⵔⵉⵜ ⵜⴰⵙⵔⵜⴰⵏⵜ ⵉ ⵓⵙⴱⵖⵍⵓ ⵏ ⵜⴱⴰⴷⵓⵜ ⴰⴷ, ⵎⴳⴰⵍ ⵎⴰⴷ ⵢⵓⵡⵉ ⵓⵙⵍⴳⵏ ⴰⵎⴰⴷⴷⴰⵙ, ⵎⴰ ⵜⵉⴱⴰⴷⵓⵜⵉⵏ ⵜⵉⴳⴷⵓⴷⴰⵏⵉⵏ ⵢⴰⴹⵏ ⵙⵙⵉⴽⵉⵏⵜ ⴰⵡⵇⵇⵔ ⵏ ⵉⵍⵓⴳⵏ ⵏ ⵡⴰⴳⴳⵯⴰⵜⵏ ⵏⵙⵏⵜ, ⴳ ⵎⴰⴷ ⵉⵥⵍⵉⵏ ⵙ ⵓⵣⵓⵣⵣⵔ ⵙ ⵜⵎⴰⵣⵉⵖⵜ, ⵙ ⵎⴰⵙ ⵙⵓⵍⵏ ⴷⵔⵓⵙⵏ ⴽⵉⴳⴰⵏ ⵉⵖⴰⵡⴰⵙⵏ ⵉⵙⴰⵡⴰⵍⵏ ⵙ ⵜⵎⴰⵣⵉⵖⵜ, ⵓⵔ ⵜⴰ ⴳⵉⵏ ⵏⵏⵉⵍ ⵎⴰⵙ ⵉⵇⵇⵍ ⵓⴳⴷⵓⴷ, ⴰⵙⵇⵙⵉ ⵉⵜⵜⵓⴼⴽⴰⵏ ⴷⴰ, ⵎⴰⵏⵉ ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵉⵕ ⵏⵏⴰ ⵎⵉ ⵉⴼⴽⴰ ⵓⵙⵍⴳⵏ ⴰⵎⴰⴷⴷⴰⵙ ⴰⴷ ⵜⵙⴽⵔ, ⴳ ⵓⵙⵏⵜⵉ ⵏ ⵜⵥⵍⴰⵢⵉⵏ ⵏⵏⵙ, ⵉⵙⵡⵓⴷⴷⵓⵜⵏ ⵉⴽⵙⴰⵏ ⵉ ⵜⵙⵏⵙⵉ ⵏ ⵉⵙⴱⴷⴰⴷⵏ ⵏⵏⵙ?

ⴳ ⵎⴰⴷ ⵉⵥⵍⵉⵏ ⵙ ⵓⵙⵏⵖⵎⵙ ⴰⵎⵓⴹⴹⵓⵏ, ⵓⵔ ⵉⵥⵕⵉ ⴽⴰⵏ ⵜⵙⵓⵔⵉⴼⵜ ⵉⵅⴰⵜⵔⵏ ⴳ ⵓⵙⵉⴷⴼ ⵏ ⵜⵎⴰⵣⵉⵖⵜ, ⵙ ⵓⵎⴰⵜⴰ, ⵙⵓⵍⵏ ⵡⴰⵏⵙⴰⵜⵏ ⵉⵍⵉⴽⵜⵔⵓⵏⵉⵢⵏ ⴷⴰ ⵜⵜⵓⴼⵙⴰⵔⵏ ⵙ ⵜⵄⵔⴰⴱⵜ ⴷ ⵜⵓⵜⵍⴰⵢⵏ ⵜⵉⴱⵕⵕⴰⵏⵉⵢⵉⵏ. ⵜⵕⵥⵎ ⵜⵙⵏⵓⵔⴰⵢⵜ ⵜⴰⵎⵖⵔⴰⴱⵉⵜ ⵉ ⵉⵏⵖⵎⵉⵙⵏ (MAP) ⵜⵓⵖⵉⵍⵜ ⵏ ⵡⴰⵏⵙⴰ ⴰⵍⵉⴽⵜⵔⵓⵏⵉⵢ ⵙ ⵜⵎⴰⵣⵉⵖⵜ, ⵎⴰⵛ ⵉⵙⵓⵍ ⵉⴷⵔⵓⵙ ⴽⵉⴳⴰⵏ ⵓⵙⵜⵔⴰⵔ ⴷ ⵓⴼⵙⴰⵔ ⵙ ⵓⵎⵣⴰⵣⴰⵍ ⴷ ⵜⵓⵖⵉⵍⵉⵏ ⵏ ⵜⵓⵜⵍⴰⵢⵉⵏ ⵢⴰⴹⵏ, ⵜⴰⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵓⵏⵣⵡⴰⵢ ⴷ ⵜⵉⵍⵉⴼⵉⵣⵢⵓⵏ (SNRT) ⴷ ⵜⴰⴱⴷⵓⵜ ⵜⵉⵙⵙ ⵙⵏⴰⵜ (2M) ⵎⴰⵇⵇⴰⵔ ⴷⴰ ⵙⵙⵏⴽⴰⴷⵏⵜ ⴽⴰⵏ ⵉⵖⴰⵡⴰⵙⵏ ⵏ ⵜⵎⴰⵣⵉⵖⵜ, ⵕⵥⵎⵏⵜ ⵜⴰⴷⴽⴽⵯⴰⵏⵉⵏ ⵜⵉⵎⵓⴹⴹⵓⵏⵉⵏ ⵏⵙⵏⵜ ⵜⵉⵎⴰⵢⵏⵓⵜⵉⵏ ⵙ ⵙⵏⴰⵜ ⵜⵖⵓⵍⵉⵏ ⵜⴰⵄⵔⴰⴱⵜ ⴷ ⵜⴼⵔⴰⵏⵙⵉⵙⵜ ⴷⴰⵢ, ⵏⵅⵍⵏⵜ ⴰⴽⴽⵯ ⵜⵓⵖⵉⵍⵜ ⵜⴰⵎⴰⵣⵉⵖⵜ. ⴰⵡⴷ ⵉⵏⵙⴰⵜⵏ ⵉⵎⵉⴽⵜⵕⵓⵏⵉⵢⵏ ⵢⴰⴹⵏ ⵉⵙⵙⴽⵔⵏ ⵜⵓⵖⵉⵍⵜ ⵉ ⵡⴰⵏⵙⴰ ⵏⵏⵙ, ⵙ ⵜⵎⴰⵣⵉⵖⵜ, ⴷⴰ ⵉⵜⵇⵇⵉⵎⴰ ⵓⵙⵜⵔⴰⵔ ⴷ ⵓⴼⵙⴰⵔ ⵉⴷⵔⵓⵙ.

ⴰⵔ ⴷⵖⵉ, ⵓⵔ ⵉⵍⵍⵉ ⵙ ⵜⵉⴷⵜ ⵓⵡⵇⵇⵔ ⵏ ⵓⵙⵖⵍ ⵏ ⵓⵙⵙⵎⵔⵙ ⵏ ⵜⵎⴰⵣⵉⵖⵜ ⴳⵔ ⵉⵙⵖⵍⵏ ⵏ ⵓⴱⵟⵟⵓ ⵏ ⵓⵙⵏⴰⵍ ⴰⴳⴷⵓⴷⴰⵏ ⵉⵜⵜⵓⴼⴽⴰⵏ ⵉ ⵉⵢⴰⴼⵓⵜⵏ ⵉⵎⵙⵍⵉⵥⵉⵕⵏ, ⵉⵎⴽⵉⵏⵏⴰ ⵅⴼ ⴷ ⵢⵓⵡⵉ ⵓⵎⵏⵏⵉ 14 ⴳ ⵓⵙⵍⴳⵏ ⴰⵎⴰⴷⴷⴰⵙ.

ⴳ ⵉⴳⵔⴰⵏ ⵏ ⵓⵙⵏⴼⵍⵓⵍ ⴰⴷⵍⵙⴰⵏ ⴷ ⵓⵏⴰⵥⵓⵕ

ⵉⴳⴰ ⵓⵡⵜⵜⴰⵙ ⵏ ⵓⵙⵉⴹⴼ ⵏ ⵜⵎⴰⵣⵉⵖⵜ ⴳ ⵢⵉⴳⵔⴰⵏ ⵏ ⵓⵙⵏⴼⵍⵓⵍ ⴰⴷⵍⵙⴰⵏ ⴷ ⵓⵏⴰⵥⵓⵕ, ⵉⵎⴽⵏⵏⴰ ⴷ ⵖⵉⴼⵙ ⵜⵓⵡⵉ ⵜⴳⴳⵓⵔⵜ ⵜⵉⵙ ⵙⵎⵎⵓⵙⵜ ⴳ ⵓⵙⵍⴳⵏ, ⴰⴷ ⵢⴰⵡⵙ ⵙ ⵓⵙⵙⴱⵖⵙ ⴷ ⵓⵙⵏⴰⵍ ⵉ ⵉⵙⵏⴼⵍⵓⵍⵏ ⴷ ⵉⵢⴰⴼⵓⵜⵏ ⵓⵍⴰ ⵉⵏⵎⵓⴳⴳⴰⵔ ⵉⵏⴰⵥⵓⵕⵏ ⴷ ⵉⴷⵍⵙⴰⵏⵏ ⵏ ⵜⵎⴰⵣⵉⵖⵜ, ⴷ ⵓⵙⵡⵓⵔⵉ ⵅⴼ ⵓⵙⵓⵜⴳ ⵏ ⵡⴰⵢⴷⴰ ⴰⵖⵔⵎⴰⵏ ⴷ ⵓⴷⵍⵙⴰⵏ ⴰⵎⴰⵣⵉⵖ ⵍⵍⵉ ⵉⴳⴰⵏ ⴰⴷⴳⴰⵔ ⴰⵔⴽⵎⴰⵎ ⵉⵙⵙⴰⵔⵏ ⴳⵔ ⵉⵎⵖⵔⵉⴱⵉⵢⵏ ⴰⴽⴽⵯ ⴱⵍⴰ ⴰⵙⵏⴰⵃⵢⴰ.

ⴳ ⵢⴰⵜ ⵜⵙⵓⵔⵉⴼⵜ ⵏ ⵓⵙⴷⵓⵙ ⵏ ⵜⵎⵔⵉⵙⵜ ⴰⴷ, ⵙ ⵓⵊⵎⵉⵍ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵙⵔⵏⵓ ⵕⴱⴱⵉ, ⴰⵙⵙ ⵏ 20 ⴰⴱⵔⵉⵍ 2973, ⵉⵎⵙⴰⵙⴰⵏ ⴷ 03 ⵎⴰⵢⵓ 2023, ⵍⵍⵉⴳ ⵉⵙⵙⴽⵔ ⴳ ⵉⵖⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ, ⴷ ⵡⴰⵙⵙ ⵏ ⵓⵙⵓⵏⴼⵓ ⴰⵎⴰⴷⴷⴰⴷ, ⵜⴳⴰ ⵜⵖⵜⴰⵙⵜ ⴰⴷ ⵜⴰⴳⵍⴷⴰⵏⵜ ⵅⴼ ⵓⵙⵏⵚⴱ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⵙⵓⵔⵉⴼⵜ ⵉⴷⵓⵙⵏ ⵉⵎⵎⴰⵍⵏ ⵜⴰⵖⴷⴼⵜ ⵏⵏⴰ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⵉ ⵎⴰⴷ ⴰⴽⴽⵯ ⵉⴳⵏ ⵜⴰⵖⴰⵡⵙⴰ ⵜⴰⵎⴰⵣⵉⵖⵜ, ⵉⵍⴰⵇ ⵜⴰⵙⵓⵔⵉⴼⵜ ⵜⴰⴳⵍⴷⴰⵏⵜ ⴰ, ⴰⴷ ⵜⴳⴳⵣ ⴰⴷ ⵉⵜⵜⵓⵙⵎⵔⴰⵙ ⵓⵙⴰⴽⵓⴷ ⴰⵎⴰⵣⵉⵖ ⴳ ⵜⵓⴷⵔⵜ ⵜⴰⵎⴰⵜⴰⵢⵜ ⵓⵔ ⴷ ⵅⵙ ⵜⴰⴼⵓⴳⵍⴰ.

ⵉⵢⴰⴼⵓⵜⵏ ⵉⴷⵍⵙⴰⵏⵏ ⴷ ⵉⵏⴰⵥⵓⵕⵏ ⵏ ⵜⵎⴰⵣⵉⵖⵜ ⵜⵍⴰ ⴰⵡⵜⵜⵓ, ⵉⴷⵔⵓⵙ ⴰⵙ ⵡⴰⵏⵏⴰⵍ ⴰⵥⵕⴼⴰⵏ ⴷ ⵓⵎⵔⵙⴰⵍ, ⴰⵙⴱⵓⵖⵍⵓ ⵏⵏⵙ ⵉⵜⵜⵓⵚⴽⴰ ⵅⴼ ⴰⴷ ⵢⵉⵍⵉ ⵡⴰⵏⵏⴰⵍ ⵉⵍⴰⵇⵏ ⴷ ⵉⵙⵓⴳⵉⵎ ⵓⵛⵛⵉⵍⵏ, ⴰⴼⴰⴷ ⴰⴷ ⵜⴰⴼ ⵜⵎⴰⵣⵉⵖⵜ ⴰⴷⵖⴰⵔ ⵜⵓⴽⵍⴰⵍ ⴳ ⵜⵓⴷⵔⵜ ⵜⴰⴷⵍⵙⴰⵏⵜ ⴷ ⵜⵏⴰⵥⵓⵕⵜ ⵜⴰⵏⴰⵎⵓⵔⵜ.

ⴳ ⵜⵎⵙⵙⵓⴳⴰⵔ ⴷ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ

ⵉⴼⵔⵔⵣ ⵓⵙⴳⵍⵏ ⴳ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⵙⵍⴽⵉⵏⵏ ⴷ ⵉⵙⵡⵓⵔⵉⵜⵏ ⵉⵎⴰⴷⴷⴰⴷⵏ, ⵜⴹⴽⵍ ⵜⴳⴳⵓⵔⵜ ⴰⴷ ⵅⴼ ⵜⵎⵙⵙⵓⴳⴰⵔ ⴷ ⵜⵎⵔⵙⴰⵍⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ, ⵓⵍⴰ ⵜⵉⵏⵓⴼⴰ ⵜⵉⴳⴷⵓⴷⴰⵏⵉⵏ, ⵜⵉⵍⵉⵜ ⵏ ⵜⵓⵚⴽⵉⵡⵉⵏ ⵏ ⵓⵙⵏⵓⴱⴳ ⴷ ⵓⵎⵍⴰⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴳⵉⵏⵜ ⵜⵉⵡⵓⵔⵉⵡⵉⵏ ⵏ ⵓⵎⵢⴰⵡⴰⴹ ⴳ ⵡⴰⵎⵎⴰⵙⵏ ⵏⵙⵏⵜ ⵙ ⵜⵓⵜⵍⴰⵢⵜ ⴰⴷ, ⵉⵎⴽⵉⵏⵏⴰ ⴷ ⵜⵓⵡⵉ ⵜⴳⴳⵓⵔⵜ ⴰⴷ ⵅⴼ ⵓⵙⵎⵓⵜⵜⴳ ⵏ ⵉⵎⵙⵖⴰⵏⵏ ⴳ ⵓⵎⵢⴰⵡⴰⴹ ⵙ ⵜⵎⴰⵣⵉⵖⵜ, ⴷ ⵓⵙⵙⵎⵔⵙ ⵏⵏⵙ ⴳ ⵜⵡⵓⵔⵉⵡⵉⵏ ⵜⵉⴳⴷⵓⴷⴰⵏⵉⵏ, ⵃⵎⴰ ⴰⴷ ⴰⴼⵉⵏ ⵉⵏⵎⵓⵔⴰⵏ ⴰⴷ ⵙⵡⵓⵔⵉⵏ, ⵎⵙⴰⵡⴰⴹⵏ ⴷ ⵜⵎⵙⵙⵓⴳⵓⵔⵜ ⵙ ⵡⴰⵡⴰⵍ ⵏⵙⵏ, ⴰⴷ ⵓⵔ ⵜⵜⵏⴱⵓⵜⵜⵓⵍⵏ ⴳ ⵜⵓⵜⵍⴰⵢⵉⵏ ⵢⴰⴹⵏ ⴽⵓ ⵢⴰⵙⵙ.

ⵉⴳ ⵏⴱⴷⵔ ⵉⵏⵣⵉ ⴰⴷ “ⵣⵣⵓⵔ ⵍⵇⵇⵎ ⵉ ⴼⵥⵥ” ⵇⴰⴷ ⵏⵙⵇⵙⴰ ⵉⵙ ⵉⵍⴰⵇ ⴰⴷ ⵉⵙⵔⵙ ⵓⵙⵍⴳⵏ ⴰⵎⵏⵏⵉ 21, ⴷ ⵢⵓⵡⵉⵏ ⵅⴼ ⵜⵉⵔⵔⴰ ⵙ ⵜⵎⴰⵣⵉⵖⵜ ⴳ ⵜⵏⵎⵎⴰⵏⵉⵏ ⴷ ⵡⴰⵔⵔⴰⵜⵏ ⵉⵎⴰⴷⴷⴰⴷⵏ, ⵣⵓⵏ ⴷ ⵜⴰⴽⵕⴹⴰ ⵜⴰⵏⵎⵓⵔⵜ ⵉ ⵜⵎⴰⴳⵉⵜ, ⵜⴰⵎⴰⵖⵓⵏⵜ ⵏ ⵢⵉⵡⵍ, ⴰⵎⵣⵣⵔⵉ ⵏ ⵉⵡⵜⵜⴰ, ⵜⵓⵔⴰⴳⵜ ⵏ ⵓⵃⵔⴰⵢ, ⵓⵍⴰ ⴰⵏⴰⵡⵏ ⵏ ⵜⴽⵕⴹⵉⵡⵉⵏ ⵜⵓⴷⵎⴰⵡⴰⵏⵉⵏ ⴷ ⵉⵙⵍⴽⵉⵏⵏ ⵜⴰⴽⴽⴰ ⵜⵎⵙⵙⵓⴳⵓⵔⵜ, ⴳ ⵉⵎⵏⵏⵉⵜⵏ ⵎⵉ ⵜⵜⵓⴼⴽⴰ ⴳ ⵓⵙⵎⵀⵍ ⵜⵉⵣⵉ ⵏ ⵡⴰⴳⵏⵙⵓ ⵏ ⵎⵔⴰⵡ ⵉⵙⴳⴳⵯⴰⵙⵏ, ⵜⵜⴰ ⵜⵜⵓⴼⴽⴰ ⴰⵙ ⵜⵉⵣⵉ ⵏ ⵡⴰⴳⵏⵙⵓ ⵏ ⵙⵎⵎⵓⵙ ⴷ ⵎⵔⴰⵡ ⵏ ⵉⵙⴳⴳⵯⴰⵙⵏ ⵉ ⵓⵎⵏⵏⵉ 23 ⴷ ⵢⵓⵡⵉⵏ ⵅⴼ ⵡⴰⵔⵔⴰⵏⵜ ⵓⵛⵛⵉⵍⵏ ⵙ ⵜⵀⵢⵢⴰⴷ ⴰⵔⵔⴰⵜⵏ ⵉⵎⴰⴷⴷⴰⴷⵏ ⵅⴼ ⵉⵙⴰⵡⵍ ⵓⵎⵏⵏⵉ 21, ⵙⴳ ⴳⵉⵙⵏ ⴰⵔⵔⴰⵜⵏ ⴷ ⵉⵙⵍⴽⵉⵏⵏ ⵙⴽⴰⵔⵏ ⵏⵖ ⴷⴰ ⵜⵏ ⴰⴽⴽⴰⵏ ⵉⵎⵙⵙⵓⵔⵜⴰ ⵏ ⵡⴰⴷⴷⴰⴷ ⵓⵖⵔⵉⵎ? ⵎⴰⵏⵉⴽ ⵙ ⵇⴰⴷ ⵢⵉⵍⵉ ⵓⵢⴰ ⵉⴳ ⵇⵇⵍⵏⵜ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⵙ ⵜⵉⴳⵔⴰ ⵏ ⵜⵉⵣⵉ ⵉⵜⵜⵓⴽⴰⵏ ⵉ ⵓⵎⵏⵏⵉ 23? ⵎⴰⵏ ⵉⵎⴽ ⵙ ⵏⴻⵏⵏⴰ ⴰⴷ ⵏⵀⵢⵢⴰ ⵜⴰⴽⵕⴹⴰ ⵜⴰⵏⴰⵎⵓⵔⵜ ⵏ ⵜⵎⴰⴳⵉⵜ ⵙ ⵜⵎⴰⵣⵉⵖⵜ, ⴰⵢⵏⵏⴰ ⵉⵙⵓⵍ ⵡⴰⴷⴷⴰⴷ ⵓⵖⵔⵉⵎ ⴷⴰ ⵢⴰⴽⴽⴰ ⴰⵔⵔⴰⵜⵏ ⴷ ⵉⵙⵍⴽⵉⵏⵏ ⵏⵏⵙ  ⴱⵍⴰ ⵜⴰⵎⴰⵣⵉⵖⵜ?

ⵙ ⵎⴰⵙ ⴳⴰⵏ ⵉⴷⵔⵉⵎⵏ ⵢⴰⵏ ⵉⵏⵉⴳⵍ ⴰⴱⴰⴹⴰⵏ, ⴷ ⵉⵎⵉⵙⵙ ⵏ ⵓⵙⵡⵓⵔⵉ ⴰⴽⵓⵢⴰⵙⵙ, ⵉⵍⵍⴰ ⵅⴼ ⵓⴱⴰⵏⴽ ⵏ ⵍⵎⵖⵔⵉⴱ ⴰⴷ ⵉⴳ ⵜⵉⵣⵎⵎⴰⵔ ⴰⴷ ⵉⵙⴷⴷⵔⴼ ⴳ ⵓⵙⵓⴳⴳⵣ ⵏ ⵉⵙⴱⴷⴰⴷ ⵏ ⵓⵙⵍⴳⵏ, ⵉⵙⵡⵓⵔⵉ ⵅⴼ ⵓⵙⵉⴹⴼ ⵏ ⵜⵎⴰⵣⵉⵖⵜ ⴳ ⵉⴷⵔⵉⵎⵏ, ⵎⴰⵛ ⵉⵙⵓⵍ ⵉⵟⵟⴼ ⴳ ⵓⵙⵙⵉⴽⵢ ⵏⵏⵙ, ⵎⴰⵇⵇⴰⵔ ⵉⵣⵔⵉ ⵓⵣⴳⵏ ⵏ ⵜⵉⵣⵉ ⵏⵏⴰ ⵉⵙⵔⵙ ⵓⵙⵍⴳⵏ, ⵎⴰⵇⵇⴰⵔ ⵉ ⵉⵙⵙⵏⵜⵉ ⴳ ⵓⵜⵜⵃⵉ ⵏ ⵉⴷⵔⵉⵎⵏ ⵉⵎⴽⵜⴰⵢⵏ ⵉⵜⵜⵢⴰⵔⴰⵏ ⵙ ⵜⵎⴰⵣⵉⵖⵜ, ⵉⵙⵙⵎⵔⵙ ⵜⵜ ⴳ ⵓⵙⵏⴽⴷ ⵏ ⵜⵓⵡⵔⵉⵇⵇⵉⵏ ⵏ ⵍⴱⴰⵏⴽ ⵜⵉⵎⴰⵢⵏⵓⵜⵉⵏ.

ⴳ ⵎⴰⴷ ⵉⵣⴷⵉⵏ ⴷ ⵡⴰⵏⵙⴰⵜⵏ ⵉⵍⵉⴽⵜⵔⵓⵏⵉⵢⵏ, ⵙⵓⵡⵍ ⵡⴰⵏⵙⴰⵜⵏ ⵏ ⵜⵎⵙⵙⵓⴳⴰⵔ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴳ ⵜⵉⵔⵎⵉⵜⵉⵏ ⵜⵉⵎⵣⵡⵓⵔⴰ, ⵓⵔⵜⴰ ⵓⵡⵉⴹⵏ ⴰⵙⵡⵉⵔ ⵏ ⵉⵏⴰⵔⵓⵣⵏ, ⵓⵔⵜⴰ ⴳⵉⵏⵜ ⵜⵓⴳⴳⴰⵙ ⵉⵜⵜⵓⴳⴰⵏ ⴳ ⵓⵙⴰⵜⵉ ⴷⴷⵖ, ⴷ ⵓⵔⵜⴰ ⵜⵙⵎⵉⴷ ⵜⵉⵔⵎⵉⵜ ⵉ ⵜⵎⵔⵙⴰⵍ ⴰⴽⴽⵯ, ⵡⴰⵅⵅⴰ ⵜⵙⵙⵏⵜⵉ ⴳ ⵢⴰⵏ ⵙⵏⴰⵜ, ⵜⵓⴳⴳⵜ ⵏ ⵜⵎⵔⵙⴰⵍ ⵓⵔⵜⴰ ⵜⵉⴷ ⵉⵜⵜⵙⵏ ⴰⵖⵏⵜ.

ⴳ ⵉⵙⴰⵢⵔⵓⵔⵏ ⵉⴳⴷⵓⴷⴰⵏⵏ

ⵢⴰⵖⵓⵍ ⵓⵙⴽⴽⵉⵍ ⴰⵎⴰⵣⵉⵖ ⵢⴰⵖ ⴽⵉⴳⴰⵏ ⵉⵙⴰⵢⵔⵓⵔⵏ ⵉⴳⴷⵓⴷⴰⵏⵏ, ⵙⴳ ⵎⴰⴷ ⵢⵓⵡⵉ ⵓⵙⵍⴳⵏ ⴳ ⵜⴳⴳⵓⵔⵜ ⵏⵏⵙ ⵜⵉⵙ ⵙⴰⵜ ⵅⴼ ⵓⵙⵙⵎⵔⵙ ⵏ ⵜⵎⴰⵣⵉⵖⵜ, ⵜⴰⵎⴰ ⵏ ⵜⵄⵔⴰⴱⵜ, ⴳ ⵜⴼⵉⵍⵉⵏ ⴷ ⵜⵎⵉⵜⴰⵔ ⵏ ⵓⵙⵎⵍ, ⵉⵍⵍⴰⵏ ⴳ ⵉⵎⴰⵡⵏ ⴷ ⵓⴳⵏⵙⵓ ⵏ ⵎⴰⴳⴰⵏ ⵜⴰⵎⵙⵙⵓⴳⵓⵔⵜ, ⴷ ⵜⵎⵔⵙⴰⵍ ⴷ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ, ⵓⵍⴰ ⴳ ⵉⵎⴰⵙⵙⵏ ⵏ ⵡⴰⵙⵙⴰⵢ ⵉⵜⵜⴳⵏ ⵜⵉⵡⵓⵔⵉⵡⵉⵏ ⵜⵉⴳⴷⵓⴷⴰⵏⵉⵏ ⵏⵖ ⵜⵉⴷ ⵉⵟⴼⴰⵕⵏ ⵉ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ, ⵙ ⵡⴰⵏⴰⵡⵏ ⵏⵙⵏ ⴰⴽⴽⵯ. ⵎⵇⵇⴰⵔ ⵙⵓⵍⵏⵜ ⴽⵉⴳⴰⵏ ⵏ ⵜⵎⵔⵙⴰⵍ ⵣⵓⵏ ⵓⵔ ⵥⵕⵉⵏⵜ ⴰⵙⵍⴳⵏ ⴰⴷ ⵉⵙ ⵉⵍⵍⴰ, ⵜⵉⵢⵢⴰⴹ ⵓⵡⵉⵏ ⵜⵜ ⴳ ⵓⵍⵖⴰⵏ ⵜⵜⵓⵏ ⵜⵓⵎⴰⵢⵜ, ⵓⵔ ⵙⵙⵉⵏ ⵅⵙ ⴰⴷ ⵉⵍⵉⵏⵜ ⵜⴼⵉⵏⴰⵖ, ⴱⵍⴰ ⵣⵣⵔⵉⵏ ⵅⴼ ⵉⵣⴳⴳⴰⵍⵏ ⴷ ⵜⵓⵎⴰⵢⵜ ⵏⵏⵙ, ⴰⴷ ⴷⴰⵢ ⵉⵍⵉⵏⵜ ⵜⴼⵉⵏⴰⵖ, ⵓⴽⴰⵏ ⵇⵇⵉⵎⵏ ⵉⴹⵕⵉⵚⵏ ⵙ ⵜⵄⵔⴰⴱⵜ, ⵏⵖ ⵜⴰⴼⵔⴰⵏⵙⵉⵙⵜ, ⵏⵖ ⴰⴽⴽⵯ ⴽⴰⵏ ⵉⵅⵔⴱⵉⵇⵏ ⵓⵔ ⵉⵜⵜⵓⵖⵔⴰⵏ, ⴰⵢⵏⵏⴰ ⵉⵎⵎⴰⵍⵏ ⵉⵙ ⵙⵓⵍⵏ ⵜⵜⴼⵏ ⴳ ⴳⴰⵔ ⵜⴰⵏⵏⴰⵢⵜ “ⵅⵙ ⵜⴰⵎⴰⵣⵉⵖⵜ ⴰⵢⵏⵏⴰⵖ”.

ⵉⵙ ⵜⵏⵏⴰ ⴰⵡⴷ ⵢⴰⵜ ⵜⵎⵔⵙⵍⵜ ⵜⴰⴳⴷⵓⴷⴰⵏⵜ ⴰⴷ ⵜⴰⵊⵊ ⴰⵣⴳⴳⴰⵍ ⴳ ⵢⵉⵙⵎ ⵏⵏⵙ ⵏⵖ ⴳ ⵜⵉⵔⵔⴰ ⵉⵍⵍⴰⵏ ⵉⵎⵉ ⵏⵖ ⴰⴳⵏⵙⵓ ⵏⵏⵙ, ⵎⵔ ⴷ ⵜⵓⵜⵍⴰⵢⵜ ⵜⴰⵄⵔⴰⴱⵜ ⵏⵖ ⵜⴰⴼⵔⴰⵏⵙⵉⵙⵜ ⴰⴳ ⵉⵍⵍⴰ? ⵙ ⵓⵙⴷⴷⵉⴷ, ⵓⵀⵓ, ⵓⵔ ⵜⵏⵏⵉ ⴰⴷ ⵜⴰⵊⵊ, ⴳ ⵜⵓⵜⵍⴰⵢⵉⵏ ⴰⴷ ⴷⴰ ⵣⵣⵔⴰⵢⵏ ⵅⴼ ⵓⵙⴽⴽⵉⵍ ⴷⴰⵜ ⵜⴳⵓⵔⵉ, ⴰⵛⴽⵓ ⵉⵣⴳⴳⴰⵍⵏ ⴷⴰ ⴰⵙ ⵜⵜⴽⵙⵏ ⴰⵜⵉⴳ ⴷ ⵡⵓⴷⴷⵓⵔ, ⵎⴰⵛ ⵉⴳ ⴷ ⵜⴰⵎⴰⵣⵉⵖⵜ ⴷⴰ ⵏⵜⵜⴰⴼⴰ ⴰⵙⵙⵓⵔⴼ ⵉⵣⵔⵢ ⵉⵣⴳⴳⴰⵍⵏ ⵉⵙⵏⵉⵍⵙⵏ ⴷ ⵓⵙⵏⵎⴰⵔⵔⴰ, ⴰⵎⵓⴽⵔⵉⵙ ⴰⴷ, ⵉⴳⴰ ⴰⵍⵓⴳⵏ ⵓⵔ ⴷ ⵉⵎⵥⵍⵉ, ⵣⵓⵏ ⵓⵔ ⵜⵍⵉ ⵜⴰⵎⵣⵉⵖⵜ ⵏⵜⵜⴰⵜ ⴳ ⵓⵙⵡⵉⵔ ⵏ ⵓⵡⵇⵇⵔ ⴷ ⵓⵙⵙⵎⵖⵔ.

ⵉⵍⴰⵇ ⴰⴷ ⵢⴰⵙⵉ ⵓⵡⴰⵏⴽ ⴷ ⵜⵎⵔⵙⴰⵍ ⵏⵏⵙ ⵜⴰⵎⴰⵙⵙⴰⵢⵜ ⵅⴼ ⵓⴹⴰⴽⴰⵍ ⵏ ⵓⵙⵏⵎⴰⵔⵔⴰ ⵏ ⵉⴹⵕⵉⵚⵏ ⵉⵎⴰⵣⵉⵖⵏ ⴳ ⵉⵙⴰⵢⵔⵓⵔⵏ ⵉⴳⴷⵓⴷⴰⵏⵏ, ⴷ ⴰⴷ ⵜⵙⵡⵓⵔⵉ ⵙ ⵓⵛⵛⵓⵉⵍ ⵅⴼ ⵓⵣⵣⵔⴰⵢ ⴷ ⵡⵓⵖⵓⵍ ⵙ ⵓⵙⵏⵉⵖⵙ ⵉ ⵉⴹⵕⵉⵚⵏ ⵉⵜⵜⵢⴰⵔⴰⵏ ⵙ ⵜⵎⴰⵣⵉⵖⵜ, ⴰⵙⵍⴳⵏ ⴰⵎⴰⴷⴷⴰⵙ ⵓⵔ ⴷ ⵅⵙ ⴰⵙⵉⴷⴼ ⵏ ⵜⵉⴼⵉⵏⴰⵖ ⴰⵅⴼ ⴷ ⵢⵓⵡⵢ, ⵉⵍⴰⵇ ⵓⵍⴰ ⴰⴷ ⵏⴰⴽⵉ ⵎⴰⵙ ⴷ ⴰⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⵙⴰⵢⵔⵓⵔⵏ ⵓⵔ ⵜⴳⵉ ⵜⴰⵎⵏⵜⵉⵍⵜ ⵜⴰⵔⵉⵎⴰⵏⵜ, ⵎⴰⵛ ⵜⴳⴰ ⵉⵎⵥ ⵉⴷⵓⵙⵏ ⴳ ⵜⵎⴰⴳⵉⵜ ⴳ ⵜⵓⵙⵙⵏⴰ ⵏⵏⵖ ⵜⴰⵥⵓⵕⴰⵏⵜ.

ⴳ ⵢⵉⴳⵔ ⵏ ⵜⵣⵔⴼⵜ

ⵉⴹⴽⵍ ⵓⵙⵍⴳⵏ ⴰⴷ ⴰⵎⴰⴷⴷⴰⵙ ⴰⵣⵔⴼ ⴳ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⴼⵔⴽⵉⵡⵉⵏ ⴰⴽⴽⵯ ⵏ ⵡⴰⵎⵎⴰⴽⵏ ⵉⵏⵣⵔⴰⴼⵏ, ⵙⴳ ⵓⵔⵣⵣⵓ, ⴷ ⵓⵏⵄⴰⵕ, ⴰⵔ ⴰⵙⴼⵍⴷ ⵙ ⵉⴱⴹⴰⵢⵏ, ⴷ ⵡⴰⵎⵎⴰⴽⵏ ⵏ ⵓⵙⵉⵡⴹ ⴷ ⵜⵕⵥⵉⵡⵉⵏ ⴷ ⵓⵣⵣⴳⵉⵔ, ⵎⴰⵛ ⵜⵉⴼⴽⵉ ⵏ ⵓⵣⵔⴼ ⵜⵙⵓⵍ ⵜⴷⵔⵓⵙ ⴰⵔ ⵜⵜⵏⴱⵓⵜⵜⵓⵍ ⴳ ⵜⵉⵍⴰⵡⵜ,  ⴰⵏⴱⵓⵜⵜⵍ ⴰⴷ ⴳ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ ⴷⴰ ⵉⵙⵙⵡⵉⴷ ⴳ ⵓⵙⴽⴽⵉⵏ ⵏ ⵓⵣⵔⴼ ⵏ ⵉⵎⵚⵕⴰⴹ ⴳ ⵓⵙⵏⴱⴹⴰⵢ ⴰⵣⵔⴼⴰⵏ ⵙ ⵜⵓⵜⵍⴰⵢⵜ ⵏⵙⵏ ⵜⴰⵢⵎⵎⴰⵜ, ⵉⵙⵓⵍ ⵉⴳⴳⵓⵜ ⵎⴰⴳ ⵜⵜⵎⵙⴰⵡⴰⴹⵏ ⵉⵎⵚⵕⴰⴹ ⵛⵛⵉⵍ ⴰⵙⵏ ⵙ ⵜⵄⵔⴰⴱⵜ, ⴰⵢⵏⵏⴰ ⵜⵏ ⵓⵔ ⵉⵜⵜⴰⵊⵊⴰⵏ ⴰⴷ ⵉⵖⵉⵢⵏ ⴰⴷ ⵔⴰⵔⵏ ⵅⴼ ⵉⵣⵔⴼⴰⵏ ⵏⵙⵏ.

ⴳ ⵜⵙⴳⴰ ⴷⴷⵖ, ⵉⵏⴽⵔ ⵡⴰⵡⴰⵍ ⵅⴼ ⵜⴰⵏⴰⴼⵜ ⵏ ⵓⵙⵓⵖⵍ, ⴷ ⵉⵙ ⵉⵣⵔⵢ ⴰⴷ ⵜⴳ ⵜⴰⵎⵣⵉⵖⵜ ⵜⵓⵜⵍⴰⵢⵜ ⵉⵜⵜⵔⵏ ⴰⵙⵓⵖⵍ, ⵏⵏⵉⵍ ⵡⴰⴷⴷⴰⴷ ⵏⵏⵙ ⴰⴷⵓⵙⵜⵓⵔⵉⵢ, ⴷ ⵏⵜⵜⴰⵜ ⵉⴳⵏⴰ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵜⴰⵎⴰⴷⴷⵓⴷⵜ, ⵉⵙ ⴷ ⵢⵓⵙⴰ ⴰⴽⴽⵯ ⴰⴷ ⵏⵙⵙⴽⵔ ⴰⵙⵓⵖⵍ ⵉ ⵓⵏⵎⵓⵔⵉ ⵉⵙⴰⵡⴰⵍⵏ ⵜⵓⵜⵍⴰⵢⵜ ⵏⵏⵙ ⵜⴰⵎⴰⴷⴷⵓⴷⵜ, ⵣⵓⵏ ⵉⴳⴰ ⵓⴱⵕⵕⴰ! ⵉⵅⵙⵙⴰ ⴰⴷ ⵉⵣⵡⵓⵔ ⵓⵙⵎⵓⵜⵜⴳ ⵉⴳⴰⵏ ⵉ ⵉⵏⴱⴹⴰ ⴷ ⵉⵎⵙⵖⴰⵏⵏ ⵏ ⵜⵙⵏⴱⴹⴰⵢⵉⵏ ⴳ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙ ⵓⵡⵜⵜⴰⵙ ⵏ ⵜⴰⵏⴰⴼⵜ ⵏ ⵜⴼⴰⴷⵉⵡⵉⵏ ⵏ ⵓⵙⵏⴱⴹⴰⵢ ⴰⵣⵔⴼⴰⵏ.

ⵉⵍⵍⴰ ⵅⴼ ⵜⵏⴱⴹⴰⵢⵜ ⴰⴷ ⵜⴳ ⵜⴰⵎⵣⵡⴰⵔⵓⵜ ⴳ  ⵓⵙⵏⵉⵙ  ⵏ ⵓⵙⵍⴳⵏ ⴷ ⵓⵡⵇⵇⵔ ⵏ ⵉⵣⵔⴼⴰⵏ, ⴳ ⵍⵍⴰⵏ ⵉⵣⵔⴼⴰⵏ ⵉⵙⵏⵉⵍⵙⵏ, ⴰⵢⵏⵏⴰ ⵏ ⵓⵏⴱⵓⵜⵜⵍ ⵉⵍⵍⴰⵏ ⴳ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏ ⵓⵙⵍⴳⵏ ⵉ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵣⵔⴼⵜ, ⵙ ⵎⴰⵙ ⵜⴳⴰ ⵜⵉⵎⵃⴹⵉⵜ ⵏ ⵓⵙⵍⴳⵏ, ⴷⴰ ⵉⵎⵎⴰⵍ ⵎⴰⵙ ⵓⵔ ⵉⴼⵍⵍⵉⵙ ⵓⵡⴰⵏⴽ ⴳ ⵓⵙⵙⵏⵊⵎ ⵏ ⵓⵡⵇⵇⵔ ⵏ ⵜⵎⴰⵖⵓⵏⵉⵏ ⵜⵉⴷⵓⵙⵜⵓⵔⵉⵢⵉⵏ, ⴷ ⵜⴰⵏⴰⴼⵜ ⵏ ⵜⵣⵔⴼⵜ ⵜⴰⵙⴰⴽⵙⴰⵍⵜ ⵉ ⵉⵏⵎⵓⵔⴰⵏ ⴰⴽⴽⵯ, ⵙ ⵜⵓⵇⵇⵏ ⵡⴰⵍⵏ ⵅⴼ ⵡⴰⵡⴰⵍ ⵙⴰⵡⴰⵍⵏ.

ⴳ ⵜⵉⴳⵔⴰ

ⵉⴳⴰ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⵜⴰⵙⵓⵔⵉⴼⵜ ⵜⴰⵎⵣⵔⵓⵢⴰⵏⵜ ⵙ ⴰⵙⵎⵀⵍ ⵏ ⵓⵙⵏⵚⴱ ⵏ ⵜⵎⴰⵣⵉⵖⵜ, ⴹⴼⵉⵕ ⵓⴷⵓⵙⵜⵓⵔ 2961/2011, ⵎⵇⵇⴰⵔ ⵉⵙⵓⵍ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵉⵜⵙⵙⵏ ⵉⵙⴱⴷⴰⴷ ⵏⵏⵙ, ⵎⴰⵛ ⵉⵙⵓⵍ ⵓⴹⵕⵉⵚ ⴰⵙⵍⴳⴰⵏ ⵢⴰⴳⴳⵓⴳ ⴽⵉⴳⴰⵏ ⵅⴼ ⵜⵡⵓⵔⵉ ⵉⵍⵍⴰⵏ ⴳ ⵜⵉⵍⴰⵡⵜ, ⵙⵡⴰ ⴳ ⵓⵙⵍⵎⴷ, ⴰⵙⵏⵖⵎⵙ, ⵜⵉⵎⵔⵙⵍⵜ, ⵉⵙⴰⵢⵔⵓⵔⵏ ⵉⴳⴷⵓⴷⴰⵏⵏ, ⵓⵍⴰ ⵜⴰⵣⵔⴼⵜ, ⴰⵙⵉⴷⴼ ⵉⵜⵜⵓⴳⴰⵏ ⴰⵔ ⴷⵖⵉ ⵓⵔⵜⴰ ⵢⵓⵡⵉⴹ ⴰⵙⵡⵉⵔ ⵏ ⵉⵏⴰⵔⵓⵣⵏ, ⵜⵉⴼⵉⴽⴽⴰⵛ ⵉⴳⴳⵓⴷⵉⵏ ⴷ ⵓⵙⵏⴱⵓⵜⵜⵍ ⵏ ⵓⵣⵣⴳⵉⵔ ⴰⵔ ⵢⴰⴽⴽⴰ ⵉⵙⵇⵙⵉⵜⵏ ⵅⴼ ⵢⵉⵔⵉ ⴰⵙⵔⵜⴰⵏ ⴳ ⵓⵙⵉⴷⴼ ⵏ ⵜⵎⴰⵣⵉⵖⵜ, ⴽⴰⵙ ⵜⵜⵙⵎⵓⵔ ⵜⵉⵣⵉ ⵉⵜⵜⵓⴼⴽⴰⵏ, ⵉⵜⵜⵅⵉⵜⵉⵔ ⵓⵙⵉⵔⵎ ⴳ ⵓⵙⵏⴼⵍ ⵏ ⵉⴹⵕⵉⵚⵏ ⴰⴷ ⵉⵙⵍⴳⴰⵏⵏ ⵙ ⵜⵉⵍⴰⵡⵜ ⵉⵍⴰⵇⵇⵏ ⵉ ⵜⵎⴰⵣⵉⵖⵜ, ⵉⴳⴰⵏ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴳ ⵍⵎⵖⵔⵉⴱ.

ⴰⵙⵏⴱⵓⵜⵜⵍ ⵏ ⵓⵙⵡⵓⵔⵉ ⵙ ⵉⵙⴱⴷⴰⴷⵏ ⵏ ⵓⵙⵍⴳⵏ ⴰⵎⴰⴷⴷⴰⵙ ⵎⵉ ⵜⵙⵎⴷ ⵜⵉⵣⵉ ⵉⵣⵡⴰⵔⵏ, ⴹⴼⵉⵕ ⵙⵎⵎⵓⵙ ⵉⵙⴳⴳⵯⴰⵙⵏ ⵅⴼ ⵓⴼⵙⴰⵔ ⵏⵏⵙ ⴳ ⵓⵖⵎⵉⵙ ⴰⵎⴰⴷⴷⵓⴷ, ⴷⴰ ⵉⵙⴷⴷⵉⴷ ⵅⴼ ⵡⴰⵔⴽⴽⵓⵍ ⵉⵍⵍⴰⵏ ⴳ ⴽⵉⴳⴰⵏ ⵏ ⵜⵎⵔⵙⴰⵏ, ⵉⵙⵢⵓⴼⵏ ⴰⴷ ⵇⵇⵍⵏⵜ ⴰⵔ ⵜⵉⴳⵔⴰ ⵏ ⵜⵉⵣⵉ ⵃⵎⴰ ⴰⴷ ⵙⵙⵏⵜⵉⵏⵜ ⴳ ⵓⵣⵣⴳⵉⵔ ⵏ ⵎⴰⵅⴼ ⴷ ⵢⵓⵡⵉ ⵓⵙⵍⴳⵏ. ⴰⵎⵏⵏⵉ 31 ⵉⵙⵙⴼⵔⴰ ⵅⴼ ⵉⵎⴰⴳⵔⴰⴷⵏ ⵏⵏⴰ ⵙ ⵉⵅⵙⵙⴰ ⴰⴷ ⵢⵉⵍⵉ ⵓⵙⵡⵓⵔⵉ ⵙ ⵉⵙⴱⴷⴰⴷⵏ  ⴰⴳⵏⵙⵓ ⵏ ⵙⵎⵎⵓⵙ ⵉⵙⴳⴳⵯⴰⵙⵏ ⴳ ⵓⵙⵉⴳⵓⵜ, ⵙ ⴳ ⵎⴰⴷ ⵉⵜⵜⵓⴼⵙⴰⵜ ⵓⵙⵍⴳⵏ, ⵎⵇⵇⴰⵔ ⵜⵙⵓⵍ ⵜⵉⵣⵉ ⵉⵜⵜⵓⴼⴽⴰⵏ ⵉⵎⵏⵏⵉⵜⵏ ⵢⴰⴹⵏ ⵜⵖⵣⵣⵉⴼ, ⵜⵓⵡⴹ ⴰⵔ ⴰⴳⵏⵙⵓ ⵏ ⵎⵔⴰⵡ ⴷ ⵓⴳⵏⵙⵓ ⵏ ⵙⵎⵎⵓⵙ ⴷ ⵎⵔⴰⵡ ⵙ ⵓⵙⵉⴳⵓⵜ, ⴷⵖⵉ,  ⴳ ⵜⵙⵎⴷ ⵜⵉⵣⵉ ⵉⵣⵡⴰⵔⵏ, ⵉⵣⵔⵢ ⵓⵣⴳⵏ ⴳ ⵜⵉⵣⵉ ⵜⵉⵙⵙ ⵙⵏⴰⵜ, ⴷ ⵡⵓⵙⵙ ⴽⵕⴰⴹ ⴳ ⵜⵉⵣⵉ ⵉⴳⴳⵔⴰⵏ, ⵜⵉⵎⵉⵜⴰⵔ ⵉⵍⵍⴰⵏ ⴳ ⵜⵉⵍⴰⵡⵜ ⴰⵔ ⵎⵎⴰⵍⵏⵜ ⴰⵢⵍⵍⵉ ⵅⴼ ⴷ ⵢⵓⵡⵉ ⵢⵉⵏⵣⵉ ⴰⴷ “ⴱⴰⵢⵏⵜ ⵜⴰⴽⵯⵥⵉⵏ ⵙⴳ ⵜⵉⵣⵡⴰⵔⵏⵉⵏ”, ⵉⵏⵎⵎⴰⵍⵏ ⵏ ⴷⵖⵉ ⴰⵔ ⵎⵎⴰⵍⵏ ⴰⵏⴱⵓⵜⵜⵍ ⴰⵔⵓⵏⵜⵉⵍ, ⴰⵔ ⵙⵙⵓⵜⵓⵔⵏ ⴰⵙⴷⴷⵔⴼ ⴳ ⵢⵉⵙⵢ ⵏ ⵜⵙⵔⵜⵉⵢⵉⵏ ⵏ ⵓⵙⵏⵃⵢⵓ ⵜⵓⵎⵏⵉⴳⵉⵏ, ⵃⵎⴰ ⴰⴷ ⵓⵔ ⵏⴰⵍⵙ ⵉ ⵓⵙⵏⴱⵓⵜⵜⵍ, ⵏⴹⴽⵍ ⴰⵣⵣⴳⵉⵔ ⵏ ⵎⴰⴷ ⵉⵙⵓⵍⵏ ⴳ ⵉⵙⴱⴷⴰⴷⵏ ⵏ ⵓⵙⵍⴳⵏ ⴰⴳⵏⵙⵓ ⵏ ⵜⵉⵣⵉ ⴰⵙⵏ ⵉⵜⵜⵓⴼⴽⴰⵏ, ⴰⴷ ⵓⵔ ⵉⵜⵜⵇⵍ ⵍⴰⵥ ⵙ ⵓⵔⵡⴰ ⵉⵎⴽⵉⵍⵍⵉ ⵅⴼ ⴷ ⵢⵓⵡⵢ ⵉⵏⵣⵉ.

ⴷⴰ ⵏⵙⵇⵙⴰ, ⵎⴰⵏⵉ ⵜⴰⵢⵎⵓⵏⵜ ⵜⴰⵎⴰⵡⵙⴰⵙⵜ ⵉⴷⵓⵎⵏ ⵎⵉ ⵉⴽⴰ ⵓⵙⵍⴳⵏ ⴳ ⵓⵎⵏⵏⵉ 34 ⵜⵎⴰⵙⵙⴰⵢⵜ ⵏ ⵓⴹⴼⵓⵕ ⴷ ⵓⵙⵜⴰⵍ ⵉ ⵓⵙⵉⴹⴼ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ?