ⴰⵣⵡⴰⴳ

ⵜⵓⵛⴽⴰ ⴷ ⵙⵔⵉ ⵜⵡⴰⵔⴳⵉⵜ ⵏ ⵡⴰⴹⴰⵏ ⵖⵣzⵉⴼⵏⵉⵏ ⴳ ⵓⵣⴰⵍ ⵉⵔⵖⴰⵏ. ⵜⵔⵖⴰ ⵜⴰⴼⵓⴽⵜ ⵍⵍⵉⵖ t ⵉⵏⵏ ⵥⵕⵉⵖ ⴰⵔ ⴷ ⴷⴰⵔⵉ ⵉⵜⵜⴰⵣⵣⴰⵍ ⵉⵙⵡⴰ ⴽⵓⵍⵍⵓ ⵙ ⵜⵉⴷⵉ. ⴰⵡⴰⵍ ⴷ ⵉⵍⵓⴼⵙⵙⴰ ⵎⵓⵏⵏ ⴷ ⵏⵉⵜ ⵍⵍⵉⵖ ⵉⵏⵏⴰ:

• ⵚⴰⴼⵉ ⴰ ⵄⴰⴱⴷ ⵍⵄⴰⵍⵉ … ⵜⴰⵡⵔⴳⵉⵜ ⵏⵏⵖ ⵜⴰⴳ ⵙⵓⵍ ⵜⵉⴷⵜ.

ⵓⵍⵖ ⴷ ⵜⴰⵖⵙⵙⴰ ⵉⵏⵓ ⵉⵥⴹⴰⵢⵉⵏ ⵙ ⵜⵡⴰⵔⴳⵉⵡⵉⵏ ⴱⴰⵛ ⴰⴷ dⵉⵙ ⴷⵔⵓⵖ ⵜⵓⵎⵔⵜ ⴰⵏⵏ, ⵙⵇⵇⵙⴰⵖ ⵜ ⵖⴰⵔ ⵙ ⵡⴰⵍⵍⵏ. ⵉⵙⵖⵓⵢⵢⵉ ⴷⴰⵖ. ⵙⵇⵇⵙⴰⵖ ⵜ ⴷⴰⵖ ⵙ ⵜⴳⵓⵔⵉ ⵏⵏⵖ ⵍⵍⵉ ⴱⴷⴷⴰ ⵏⵜⵜⵉⵏ:

• ⵔⴰⴷ ⵏⵣⵓⴳ

ⵓⵔ ⵜⵔⴰ ⵜⵓⵎⵔⵜ ⴰd ⵜ ⵜⴼⴼⴰⵖ ⵉⴳⵉ ⵏ ⵜⵙⵔⴰⴳⵜ. ⴰⵔ ⵉⵙⴼⵔⵓ ⵎⴰⵏⵉⴽ ⴰⵙ ⵉⵎⴰⵇⵇⴰⵔ ⴷ ⵎⴰⵙⵙ ⴱⵕⴰⵀⵉⵎ, ⴱⴰⴱ ⵏ ⵓⵏⴼⵍuⴽ. ⴷ ⵉⵎⵣⵡⴰⴳⵏ ⴰⵏⵏ ⵢⴰⴹⵏⵉⵏ ⵍⵍⵉ ⵔⴰⴷ d ⵏⴷⵔⵓ ⴰⵣⵡⴰⴳ, ⴷ ⵓⵏⵎⵖⵓⵔ ⴰⵅⴰⵜⴰⵔ ⵍⵍⵉ ⵔⴰⴷ ⵉⴱⴷⴷ i ⵓⵣⵡⴰⴳ ⴰⵏⵏ, ⴷ ⵏⵜⵜⴰⵏ ⴰ ⵔⴰⴷ ⵏⵏ ⵉⵡⴰⵍⴰ ⵉⴷⴱⴰⴱ ⵍⴰⵎⴰⵏ. ⴷ ⵏⵜⵜⴰ ⴰⵔ ⴰⴷ ⵢⴰⵎⵥ ⵎⴰd iⴳⴳⵓⵜⵏ ⴳ ⵉⴷⵔⵉⵎⵏ. ⴰⵎⵎⴰ ⴱⴰⴱ ⵏ ⵓⵏⴼⵍⵓⴽ ⵓⵔ ⴰⴷ ⵢⴰⵎⵥ ⴰⴱⵍⴰ ⵎⴰⴷ ⵉⴷⵔⵓⵙⵏ ⴳ ⵉⴷⵔⵉⵎⵏ. ⵏⵏⵉⵖ ⴰⵙ:

• ⵎⵏⵛⴽ ⵏ ⵉⴷⵔⵉⵎⵏ ⴰⵔ ⴰⴷ ⴰⵖ ⵉⵅⵚⵚⵉ ⴰ ⵕⴰⵛⵉⴷ… ⵜⵙⵙⵏⵜ ⵓⴽⴰⵏ ⵉⵙ ⵉⴷⵔⵓⵙ ⴰⵢⵍⵍⵉ ⵟⵟⴰⴼⵖ.

ⵢⵓⵜ ⴰⴼⵓⵙ ⵙ ⵓⴼⵓⵙ ⴰⵔ ⵉⴹⵚⵚⴰ ⵉⵏⵏⴰ:

• ⴰⴷ ⵓⵔ ⵜⴰⵙⵉⵜ ⴰⵏⵣⴳⵓⵎ, ⴰⵢⵍⵍⵉ ⴷⴰⵔⴽ ⵉⴳⵯⴷⴰ.

ⵜⴽⵛⵎ iⵢⵉ ⴷ ⵜⵓⵎⵔⵜ ⵜⴰⵍⵍⵉ ⵉⵏⵇⵇⴰⵏ ⴰⴼⴳⴰⵏ, ⵢⴰⵜ ⵜⵓⵎⵔⵜ ⵏ ⵓⴼⴳⴰⵏ ⵉⵛⴱⵄⴰⵏ ⵓⵔ ⵜ ⵙⵓⵍ ⵉⵅⵚⵚⴰ ⵢⴰⵜ. ⴰⵢⵍⵍⵉⵖ ⴰⴽⴽⵯ ⵔⵉⵖ ⴰⴷ ⴰⵢⵍⵍⵖ. ⵏⵓⵣⵣⵍ ⵙ ⵓⵙⵏⵙⵓ ⵉⵄⵉⴼⵏ ⵍⵍⵉⵖ ⵏⴳⴳⵯⵣ ⵏⵙⵎⵓⵏ ⵉⴱⵔⴷⴰⵏ ⵏⵏⵖ ⵏⴼⴼⵖ ⵙ ⵜⴰⵣⵣⵍⴰ.

ⵉⴼⴹ ⵏ ⴷⴷⵔⴰⵀⵎ ⵉ ⵢⴰⵏ ⴳⵉⵜⵏⵖ ⴰⵜⵉⴳ ⵉⴼⵓⵍⴽⵉⵏ, ⵡⵉⵍⵍⵉ ⵉⴼⵔⴰⵏ ⴰⴳⵏⴰⵔ ⵏ ⵢⵉⴼⴹ ⵏ ⴷⴷⵔⴰⵀⵎ ⵜⵜⵓⵛⵎⴰⵜⵏ. ⵏⵏⵉⵖ ⵉ ⵕⴰⵛⵉⴷ ⵍⵍⵉⵖ ⵏⵓⵖⴷ ⴳ ⵓⵎⵍⴰⵍ ⵏ ⵜⴰⵖⴰⵔⵜ ⵉⵍⵍⴰⵙⵏ:

• ⵔⴰⴷ ⵚⴽⵓⵖ ⵜⴰⴷⴷⴰⵔⵜ ⵜⴰⵎⵇⵇⵔⴰⵏⵜ ⴳ ⵜⵎⴰⵣⵉⵔⵜ, ⵚⴽⵓⵖ ⴰⵡⴷ ⵜⵉⵏⵎⵍ ⵉ iⵎⵥⵢⴰⵏⵏ….

ⵉⵍⵍ ⵉⵀⴰⵊ, ⵜⴰⴹⴹⴰⵏⴳⵉⵡⵉⵏ ⵏⵏⵙ ⴰⵔ ⵙⵉⵡⵉⴷⵏⵜ. ⵕⴰⵛⵉⴷ ⴰⵔ ⵉⵙⵎⵓⵇⵇⵓⵍ ⴳ ⵉⵜⵔⴰⵏ ⵙ ⵜⵡⴰⵍⵍⵉⵏ ⵏⵏⵙ ⵉⵙⵉⵔⴽⵙⵉⵙⵏ ⵉⵏⵏⴰ:

• ⵓⵔ ⵙⴰⵔ ⴷ ⵓⵔⵉⵖ ⵙ ⵜⵎⴰⵣⵉⵔⵜ ⴰⴷ.

ⴰⴷ ⵏⴳ ⵣⵓⵏ ⴷ ⵓⵙⵎⴰⵏ ⵙ ⴷⴰⵔ ⵜⵉⴼⴰⵡⴰⵜ, ⵎⴰ ⴰⵏⵏ ⴰⴷ ⴰⵖ ⵏⵏⴰⵏ, ⵀⴰ ⴷ ⴰⴼⴳⴰⵏ ⴰⵔ ⵉⵜⵜⴰⵣⵣal. ⵎⴰ ⴰⵏⵏ ⴰd iⵢⵉ ⵢⵓⵊⵊⴰⵏ ⴰⴷ ⴽⵓⵍⵍⵓ ⴳⵄ ⵜⴰⴷⵓⵙⵉ, ⵓⵔ ⴳⵉⵖ ⵡⴰⵃⴷⴰⵢ ⴰⵢⵏⵏⴰ iⵢⵉ ⵉⵊⵕⴰⵏ ⵔⴰⴷ ⴽⵓⵍⵍⵓ ⵉⵊⵕⵓ ⵉ ⵓⴼⴳⴰⵏ ⴰⴷ ⴷ ⴳⴰⵔ ⵜⴰⵎⵜⵜⴰⵏⵜ ⵉⵖ ⵉⵎⵎⵓⵜ ⵢⴰⵏ ⵉ ⵡⴰⴹⵓ ⵏⵏⵙ. ⵜⴰⵣⵣⵍⴰ ⴳ ⵉⴳⴳⵉ ⵏ ⵓⵎⵍⴰⵍ ⵜⴳⴰ ⵜⴰⵙⵎⴳⵍⵜ, (ⵙⵉⵣⵉⴼⵢⴰ) ⵜⵥⴹⴰⵢ, ⵎⴰⵛ ⵉⴹⴰⵕⵏ ⵉⵏⵓ ⵣⵓⵏⴷ ⵔⵔⵉⵛ ⴳ ⵜⵉⵣⵉ ⴰⵏⵏ. ⵜⴰⴹⴹⴰⵏⴳⵉⵡⵉⵏ ⵔⵡⵉⵏ ⵜⵜ ⴰⴽⵔⴱⴰy ⵉⵏⵓ, ⵀⴰⴷ ⴽⵔⴰ ⵏ ⵉⴼⴰsⵙⵏ ⵉⵡⵙⵏ iⵢⵉ ⴰⴷ ⵖⵍⵉⵖ ⵙ ⵓⵏⴼⵍⵓⴽ. ⵙⵡⵉⵏⴳⵎⵖ:

• ⵓⵔ ⴰⴷ ⴰⴽ ⵢⴰⵡⵙ ⴰⴱⵍⴰ ⵡⴰⵍⵍⵉ ⴼ ⵜⵣⵔⵉ.

ⵉⵄⵎⵎⵕ ⵓⵏⴼⵍⵓⴽ ⵓⴳⴳⴰⵔ ⵏ ⵓⴳⵏⴰr ⴷ ⵎⵔⴰⵡ ⴰⴷ ⴳⵉⵙ ⵏⴳⴰ ⵏⵎⵎⵔ ⴱⴰⵀⵔⴰ, ⵜⴰⵡⵔⴳⵉⵜ ⵏⵏⵖ ⴰⵔ ⵜⴻⵜⵜⵉⵎⵖⵓⵔ ⵀⴰ ⵎⴰⴷ ⵉⵙⵄⵢⵢⵉⴹⵏ (ⵓⵕⵓⴱⴱⴰ…ⵓⵕⵓⴱⴱⴰ). ⵉⴹⴹⵕ ⵉⴼⵙⵙⵉ ⴳ ⵓⵏⴼⵍⵓⴽ ⵍⵍⵉⵖ ⴷ ⵜⵓⵛⴽⴰ ⵢⴰⵜ ⵜaⴹⴹⵉⵏⴳⴰ ⵜⵔⴰⵔ ⴷ ⴰⵏⴼⵍⵓⴽ ⵙ ⵉⵍⵍⵉⵖ ⵜⵜ ⵉⵏⵏ ⵉⴽⴽⴰ. ⴰⴽⵯⵉⵏ ⵢⴰⵏ ⵎⵏⴰⵡ ⴰⵔ ⴷⴰⵖ ⵜⵜⵃⴰⵢⵏ ⴰⵏⴼⵍⵓⴽ ⵙ ⵢⵉⵍⵍ. ⵎⴰⵛ ⵜⵓⵛⴽⴰ ⴷ ⵜⵉⵙⵙ ⵙⵏⴰⵜ ⵜaⴹⴹaⵏⴳⵉⵡⵉⵏ ⵜⵔⴰⵔ ⴷ ⴰⵏⴼⵍⵓⴽ ⵙ ⵓⴷⵖⴰⵔ ⵏⵏⵙ ⵉⵙⴰⵡⵍ ⵎⴰⵙⵙ ⴱⵕⴰⵀⵉⵎ ⵙ ⵓⵙⵖⵓⵢⵢⵉ ⵉⵏⵏⴰ:

• ⴰⵡⵙⴰⵜ ⵙ ⵉⴼⴰⵙⵙⵏ ⵏⵏⵓⵏ ⵓⵏⴼⵍⵓⴽ ⴰⴷ ⵉⵣⵉⴳⵣ.

ⵏⴰⵡⵙ ⵙ ⵢⴰⵜ ⵜⵉⴽⴽⵍⵜ, ⴰⵏⴼⵍⵓⴽ ⵉⴽⴽⵙ ⵏⵏ ⵉⵎⵉⴽⴽ ⵙⵉⵖ ⵏⵏ ⵏⴰⵏⵏi ⵢⴰⵜ ⵜⴰⴹⴹⵉⵏⴳⴰ ⵉⵎⵇⵇⵓⵔⵏ ⵎⴰ ⴰⵏⵏ ⴰⴷ ⴰⵖ ⵢⵓⵊⵊⴰⵏ ⴰⴷ ⴽⵓⵍⵍⵓ ⵏⵙⵀⵓ ⵉⴱⴱⵉ ⴳⵉⵏⵖ ⵡⴰⵡⴰⵍ. ⵜⵔⵓⵔ ⴰⵖ ⴷ ⴰⵔ ⴰⵎⵍⴰⵍ, ⴰⵔ ⵏⵙⴽⴰⵔ ⵖⵉⴽⴰnⵏ ⴰⵢⵍⵍⵉⵖ ⵉⴼⴼⵓ ⵍⵃⴰⵍ.

ⵣⵔⵉⵏ ⵓⵙⵙⴰⵏ ⵎⵢⴰⵔⵖ ⵉⵍⵍ, ⵎⵢⵓⵔⵖ ⴳⵉs ⵜⴰⴳⵯⵎⵔⵜ ⴰⵢⵢⵍⵉⵖ ⵙⵙⵏⵖ ⵎⴰⵏⵓg ⴰⴷ ⵉⵜⵜⵀⴰⵊ ⴷ ⵎⴰⵏ ⴰⴽⵓⴷ ⴰⴷ ⵉⵜⵜⵔⵃⴰⵎ ⴽⵯⵜⵉⵖ ⴷ ⵏⵉⵜ ⵎⴰⵙⵙ ⴱⵕⴰⵀⵉⵎ…

ⴰⵙⵓⵖⵍ: ⵊⴰⵎⵄ ⴰⵏⴳⵯⵎⴰⵔ   –   النص الأصلي باللغة العربية لـ مبارك اباعزي