ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴳ ⵢⴰⵏ ⵓⵣⵎⵣ ⵏ ⵄⵍⴰⵢⵏ 50 ⵏ ⵉⵙⴳⴳⵯⴰⵙⵏ ⵉⴼⴽⴰ ⵓⵙⵍⵎⴰⴷ ⴱⵕⴰⵀⵉⵎ ⴰⵅⵢⵢⴰⵟ ⴰⴷⴷⵓⵔ ⴰⵅⴰⵜⴰⵔ ⵉ ⵜⵏⴽⵔⴰ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵍⵍⵉ ⵉⴳⴰⵏ ⴰⵢⴷⴰ ⵏ ⴰⴽⴽⵯ ⵉⵎⵖⵔⴰⴱⵉⵢⵏ, ⵜⴰⵡⵓⵔⵉ ⵢⴰⴷ ⵜⵓⵊⵊⴰⵜ ⴰⴷ ⵉⴳ ⵢⴰⵏ ⴳ ⵉⵏⵎⵖⵓⵔⵏ ⵉⵎⵣⵡⵓⵔⴰ ⵏ ⵓⵎⵓⵙⵙⵓ ⴰⵎⴰⵣⵉⵖ.
ⵉⵍⵍⴰ ⴷⴰⵔ ⴱⵕⴰⵀⵉⵎ ⴰⵅⵢⵢⴰⵟ ⵢⴰⵏ ⵓⴷⵖⴰⵔ ⵉⵖⵓⴷⴰⵏ ⴷⴰⵔ ⵉⵎⵙⴽⴰⵔⵏ ⴳ ⵉⴳⵔⴰⵏ ⵏ ⵜⵙⵔⵜⵉⵜ ⴷ ⵜⴷⵍⵙⴰ ⴷ ⵡⴰⵎⵓⵏ ⵓⵖⵔⵉⵎ ⵓⵔⴷ ⴷⴰⵔ ⵡⵉⵍⵍⵉ ⴷ ⵢⵓⵛⴽⴰ ⵖ ⵜⴰⵏⵏⵢⵉⵏ ⵎⴰⵛ ⵃⵜⵜⴰ ⵡⵉⵍⵍⵉ ⴷ ⵉⵏⵣⵉ, ⵎⴰⵢⴰⴷ ⵢⵉⵡⵉⵜⵉⴷ ⴱⴰⵀⵔⴰ ⵜⵉⵙⵓⴳⵔⵉⵏ ⵏ ⵎⴰⵙⵙ ⴰⵅⵢⵢⴰⵟ ⴳ ⵎⴰⴷ ⵉⵥⵍⵉⵏ ⵙ ⵓⵎⵢⴰⵡⴰⴹ ⴷ ⵓⵏⵓⵕⵥⵎ ⵅⴼ ⴰⴽⴽⵯ ⵎⵉⴷⵏ.
ⵉⵏⵏⴰ ⵎⴰⵙⵙ ⵃⵎⴰⴷ ⴱⵓⴽⵓⵙ ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵢⴰⵜ ⵜⵓⴳⴳⴰ ⵎⴰⵙ ⴷ ⴰⵙⵍⵎⴰⴷ ⴱⵕⴰⵀⵉⵎ ⴰⵅⵢⵢⴰⵟ ⴰⴷ ⵉⵙⵔⵙⵏ ⵜⵉⵙⵉⵍⴰⵜⵉⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⵙⴳ ⵜⵓⴳⵉ ⵏ ⵜⵎⵙⴰⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵉⵙⵉⴳⵍ ⴷ ⵓⵙⵏⴼⵍ ⵏ ⵜⵓⵙⵙⵏⴰ ⵖ ⵏⵓⵡⴰⵏⴱⵉⵔ 1967 ⴷ ⵜⴰⵙⴷⴰⵡⵉⵜ ⵏ ⵓⵏⴱⴷⵓ ⴳ ⵓⵙⴳⴳⵯⴰⵙ 1979 ⴳ ⵓⴳⴰⴷⵉⵔ.
ⵉⵔⵏⵓ ⵉⵏⵏⴰ ⵎⴰⵙⵙ ⴱⵓⴽⵓⵙ ⴳ ⵢⴰⵜ ⵜⵙⴳⵓⵔⵉ ⵉ ⵢⵓⵙⵉⵜ « ⵎⴰⴱⴰⵎⴰⵣⵉⵖ » ⵎⴰⵙ ⵉⵜⵜⵢⴰⵡⵙⵙⴰⵏ ⵎⴰⵙⵙ ⴰⵅⵢⵢⴰⵟ ⵙ ⵓⵎⵙⴰⵡⴰⵍ ⴷ ⵉⵎⵢⴰⵙⵙⴰⵏ ⴷ ⴰⴽⴽⵯ ⵉⵎⵙⴽⴰⵔⵏ ⵉⵎⴰⵣⵉⵖⵏ ⴳ ⵜⵙⴳⵉⵡⵉⵏ ⵏ ⵍⵎⵖⵔⵉⴱ ⵙⵍⴰⵡⴰⵏ ⴰⴽⴽⵯ ⴳ ⵙⵓⵙ ⴷ ⵍⴰⵟⵍⴰⵙ ⴷ ⵔⵔⵉⴼ.
ⴳ ⵜⵙⴳⴰ ⵏⵏⵙ ⵉⵏⵏⴰ ⵓⵏⵙⵙⵉⵅⴼ ⵏ ⵓⵙⴰⴹⴰⴼ ⴰⵎⴰⵣⵉⵖ ⵏ ⵉⵣⵔⴼⴰⵏ ⴷ ⵜⵉⴷⵔⴼⵉⵏ ⵃⵎⴰⴷ ⵄⴰⵚⵉⴹ ⵎⴰⵙ ⵉⴳⴰ ⵎⴰⵙⵙ ⴱⵕⴰⵀⵉⵎ ⴰⵅⵢⵢⴰⵟ ⴳ « ⵉⵏⵎⵖⵓⵔⵏ ⵉⵎⵣⵡⵓⵔⴰ » ⵏ ⵓⵎⵓⵙⵙⵓ ⴰⵎⴰⵣⵉⵖ ⵖⵎⴽⵍⵍⵉ ⵉ ⵉⴳⴰ ⵢⴰⵏ ⵓⵎⵙⴽⴰⵔ ⵓⵖⵔⵉⵎ ⵉⵎⵓⵔⵙⵏ ⵍⵍⵉ ⴷⴰⵔ ⵜⵍⵍⴰ ⵜⴰⵥⴹⴰⵕⵜ ⵅⴼ ⵓⵙⵏⵎⴰⵍⴰ .
ⵉⵙⴷⴷⵉⴷ ⵎⴰⵙⵙ ⵄⴰⵚⵉⴹ ⵎⴰⵙ ⵉⵎⵓⵔⵙ ⵓⵙⵍⵎⴰⴷ ⴰⵅⵢⵢⴰⵟ ⴳ ⵎⴰⴷ ⵉⵥⵍⵉⵏ ⵙ ⵜⵡⵓⵔⵉⵡⵉⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⴷ ⵜⵓⴳⵉ ⵏ ⵢⴰⵏ ⵓⴷⵖⴰⵔ ⴰⵅⴰⵜⴰⵔ ⵉ ⵜⵎⵙⴰⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵉⵙⵉⴳⵍ ⴷ ⵓⵙⵏⴼⵍ ⵏ ⵜⵓⵙⵙⵏⴰ ⴳ ⵓⵥⵟⵟⴰ ⵏ ⵜⵎⵙⵎⵓⵏⵉⵏ ⵜⵉⵎⵖⵔⴰⴱⵢⵉⵏ.
ⴰⵎⵎⴰ ⵎⴰⵙⵙ ⵚⵚⴰⴼⵉ ⵎⵓⵎⵏ ⵄⵍⵉ ⵍⵍⵉ ⵉⴳⴰⵏ ⵢⴰⵏ ⵓⴳⵎⴰⵎ ⴰⵅⴰⵜⴰⵔ ⵜⵎⵙⴰⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵉⵙⵉⴳⵍ ⴷ ⵓⵙⵏⴼⵍ ⵏ ⵜⵓⵙⵙⵏⴰ ⵉⵏⵏⴰ ⵎⴰⵙ ⵉⴳⴰ ⵓⵙⵍⵎⴰⴷ ⴰⵅⵢⵢⴰⵟ « ⴰⵥⵕⵓ ⴰⵎⵣⵡⴰⵔⵓ » ⵍⵍⵉ ⵅⴼ ⵉⴱⴷ ⵓⵎⵓⵙⵙⵓ ⴰⵎⴰⵣⵉⵖ ⵖⵎⴽⵍⵍⵉ ⵉⴷⵔⴰ ⴳ ⵜⵡⵓⵔⵉⵡⵉⵏ ⵉⵖⵓⴷⴰⵏ ⴰⴼⴰⴷ ⴰⴷ ⵜⴳ ⵜⵎⴰⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⴳ ⵜⵎⵏⴹⴰⵡⵜ ⵏ 2011.
ⴳ ⵢⴰⵜ ⵜⵙⴳⵓⵔⵉ ⵓⵍⴰ ⵏⵜⵜⴰ ⴳ ⵜⴰⴷⴷⴰⵔⵜ ⵏⵏⵙ ⴳ ⵕⵕⴱⴰⵟ ⵉⵏⵏⴰ ⵎⴰⵙⵙ ⴰⵅⵢⵢⴰⵟ ⵍⵍⵉ ⵉⵣⵔⴰⵢⵏ ⵜⵉⵎⵙⵓⵜⴰⵍ ⵏ ⵜⵎⴰⴹⵓⵏⵜ ⴳ ⵉⵙⴳⴳⵯⴰⵙⵏ ⵉⴳⵔⴰⵏ ⵎⴰⵙ ⵉⵥⴹⴰⵕ ⵓⵎⵓⵙⵙⵓ ⴰⵎⴰⵣⵉⵖ ⵙⴳ ⵜⵓⴳⵉ ⵏ ⵜⵎⵙⴰⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵉⵙⵉⴳⵍ ⴷ ⵓⵙⵏⴼⵍ ⵏ ⵜⵓⵙⵙⵏⴰ ⴳ 1967 ⴰⴷ ⵉⵙⵢⴰⴼⴰ ⵢⴰⵏ ⵉⵏⴰⵡ ⴰⴷⵍⵙⴰⵏ ⴰⵏⴰⵎⵓⵔ ⵉⴱⴷⵏ ⵅⴼ ⵓⵃⵟⵟⵓ ⵏ ⵏ ⵜⵎⴰⵣⵉⵖⵜ ⵍⵍⵉ ⵉⴳⴰⵏ ⴰⵎⵎⴰⵙ ⵏ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ.
ⵉⵙⵙⴷⵉⴷ ⵎⴰⵙⵙ ⴰⵅⵢⵢⴰⵟ ⵎⴰⵙ ⵜⴱⴱⵉ ⵜⴳⵍⴷⵉⵜ ⵜⵉⵙⵓⵔⵉⴼⵉⵏ ⵜⵉⵅⴰⵜⴰⵔⵉⵏ ⴳ ⵉⴳⵔ ⵏ ⵜⵏⴽⵔⴰ ⵙ ⵜⵎⴰⴳⵉⵜ ⵜⴰⵎⴰⵖⵔⴰⴱⵉⵜ ⵉⵔⵏⵓ ⵉⵙⵙⴼⵓⵍⴽⵉ ⵜⴰⵖⵜⴰⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵉⵥⵍⵉⵏ ⵙ ⵓⵙⵓⴷⵓⴷ ⵏ ⵜⵎⴰⵣⵉⵖⵜ ⴰⵛⴽⵓ ⵜⴳⴰ ⴰⵢⴷⴰ ⵉⵛⵛⴰⵔⵏ ⵏ ⵉⵎⵖⵔⴰⴱⵉⵢⵏ ⴰⴽⴽⵯ ⴳ ⵓⴷⵓⵙⵜⵓⵔ 2011.
ⵉⵏⵏⴰ ⵓⵍⴰ ⵎⴰⵙ ⵉⵕⵥⵎ ⵓⵙⵓⴷⵓⴷ ⴰⴷ ⵜⵉⴼⵍⵡⵉⵏ ⵅⴼ ⴰⴽⴽⵯ ⵎⵉⴷⵏ ⵍⵍⵉ ⵉⵔⴰⵏ ⴰⴷ ⴼⴽⵏ ⴰⴷⴷⵓⵔ ⵉ ⵜⵎⴰⵣⵉⵖⵜ ⴳ ⵉⴳⵔⴰⵏ ⵏ ⵓⵙⵏⴼⵍⵓⵍ ⴷ ⵜⵉⵔⵔⴰ ⴷ ⵜⵡⵓⵔⵉ ⵜⴰⵎⵓⵏⵜ ⴷ ⵜⴳⵎⵉ ⵜⴰⵏⴼⴳⴰⵏⵜ ⴱⵍⴰ ⵜⵉⴽⵚⵚⴰⴹ .
ⵉⵙⴽⵜⵉⴷ ⵓⵙⵍⵎⴰⴷ ⴰⵅⵢⵢⴰⵟ ⵎⴰⵙ ⵉⵥⴹⴰⵕ ⵍⵎⵖⵔⵉⴱ ⵙ ⵜⵎⵓⵣⴰⵢⵜ ⵍⵍⵉ ⴷⴰⵔ ⵙ ⵉⵍⵍⴰⵏ ⴳ ⵉⴳⵔ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ ⵏ ⵜⵎⴰⵣⵉⵖⵜ ⴰⴷ ⵉⴳ « ⵜⴰⵍⴱⵔⵊⵜ » ⵍⵍⵉ ⵢⴰⴽⴽⴰⵏ ⵜⵉⴼⴰⵡⵜ ⵉ ⵜⵎⵉⵣⴰⵔ ⵏ ⵉⵥⵥⵍⵎⴹ ⵏ ⵓⴼⵔⵉⵇⵢⴰ ⴳ ⵉⴳⵔ ⴰⴷ.
ⵉⴳⴰ ⵓⵙⵍⵎⴰⴷ ⴰⵅⵢⵢⴰⵟ ⵍⵍⵉ ⴷ ⵉⵍⵓⵍⵏ ⴳ ⵓⵙⴳⴳⵯⴰⵙ 1941 ⴳ ⵜⵙⴳⴰ ⵏ ⴰⵢⵜ ⴱⴰⵀⴰ ⴳ ⵜⴰⵎⴰ ⵏ ⵓⴳⴰⴷⵉⵔ ⵍⵍⵉ ⵉⴷⴷⴰⵏ ⵙ ⵕⵕⴱⴰⵟ ⵉⵎⵥⵥⵉⵢ ⵙⵓⵍ ⵓⵡⵜⴰⵢ ⵏⵏⵙ ⵍⵍⵉⵖ ⵉⴹⴼⵕ ⵜⵉⵖⵔⵉ ⵏⵏⵙ ⵜⴰⵎⵏⵣⵓⵢⵜ ⴰⵔ ⵜⴰⵙⴷⴰⵡⵉⵜ,ⴳ ⵡⵉⵍⵍⵉ ⵉⵡⵙⵏ ⴳ ⵜⵓⴳⵉ ⵏ ⵜⵎⵙⵎⵓⵏⵜ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⴰⵙⴳⴳⵯⴰⵙ ⵏ 1979 ⵉⴳ ⵓⵍⴰ ⴰⵏⵙⵙⵉⵅⴼ ⵏ ⵓⴳⵔⴰⵡ ⵏ ⵓⵙⵏⵎⴰⵍⴰ ⵏ ⵜⵙⵓⵜⵍⵜⵉⵏ ⵏⵏⵙ ⵏ ⵉⵙⴳⴳⵯⴰⵙⵏ1980 ⴷ 1982 ⴷ 1988 ⴷ 1991 ,ⵖⵎⴽⵍⵍⵉ ⵉⵙⵔⵙ ⵜⴰⵙⵉⵍⴰ ⵏ ⵜⵔⴰⴱⴱⵓⵜ ⵜⴰⵎⵣⵡⴰⵔⵓⵜ ⵏ ⵓⵥⴰⵡⴰⵏ ⴰⵎⴰⵣⵉⵖ « ⵓⵙⵎⴰⵏ » ⴳ 1974.
ⵉⴽⴰⵜⵜⵏ ⵎⴰⵙⵙ ⴰⵅⵢⵢⴰⵟ ⵉⴳⴰ ⵓⵍⴰ ⴰⵏⵎⵀⴰⵍ ⵏ ⵜⵙⵖⵓⵏⵜ ⵜⴰⵎⵣⵡⴰⵔⵓⵜ « ⴰⵎⵓⴷ » ⵍⵍⵉ ⴷ ⵉⵙⵙⵓⴼⵖⵏ ⵓⵟⵟⵓⵏ ⴰⵎⵣⵡⴰⵔⵓ ⵏⵏⵙ ⴳ ⵉⴱⵔⵉⵔ ⵏ 1990 ⴷ ⵓⵏⵎⵀⴰⵍ ⵏ ⵓⵏⵖⵎⵉⵙ « ⵜⴰⵎⵓⵏⵜ » ⴳ ⴱⵕⴰⵢⵕ 1994 ⴷ ⵓⵎⵣⴷⴰⵢ ⴰⵏⴰⵎⵓⵔ ⴰⵎⵣⵡⴰⵔⵓ ⵏ ⵜⵎⵙⵎⵓⵏⵉⵏ ⵜⵉⵎⵖⵔⴰⴱⵉⵢⵉⵏ 1993-1996 ⴷ ⵓⵏⵙⵙⵉⵅⴼ ⵏ ⵍⴽⵓⵏⴳⵔⵉⵙ ⴰⴳⵔⴰⵖⵍⴰⵏ ⴰⵎⴰⵣⵉⵖ ⴳ ⵜⵎⴷⵉⵏⵜ ⵍⵢⵓⵏ ⴳ ⴼⵕⴰⵏⵚⴰ ⴳ 1999, ⴷ ⵓⴳⵎⴰⵎ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⵉⵥⵍⵉⵏ ⵙ ⵜⵖⴰⵡⵙⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵉⵙⴳⵎⴰⵏⵉⵏ ⴷ ⵓⵎⵢⴰⵡⴰⴹ ⴳ ⵓⵙⵉⵏⴰⴳ.
ⵉⵙⵙⵓⴼⵖⴷ ⵓⵍⴰ ⵎⵏⵏⴰⵡ ⵉⴷⵍⵉⵙⵏ ⵣⵓⵏⴷ « ⵜⴰⴱⵔⴰⵜ » ⴳ 1992 ⴷ «ⵎⴰⵅ ⵜⴰⵎⴰⵣⵉⵖⵜ ? » ⴳ 1994 ⴷ « ⵉⵔⴳⴰⵣⵏ ⵏ ⵜⵡⵓⵔⵉ ⵜⴰⵎⴰⵣⵉⵖⵜ ⵍⵍⵉ ⵉⵎⵎⵓⵜⵏ » ⴳ 2004 ⴷ « ⵜⴰⵎⴰⵣⵉⵖⵜ ⵜⴰⵎⴰⴳⵉⵜ ⵏⵏⵖ ⵜⴰⵏⴰⵎⵓⵔⵜ » ⴳ 2007, ⴷ « ⵜⴰⵏⴽⵔⴰ ⵜⴰⵎⵣⵉⵖⵜ ⵍⵍⵉ ⵎⵓ ⴷⴷⵔⵖ ⵜⴰⵍⵉⵍⵉⵜ ⴷ ⵜⵎⵔⵏⵉⵡⵜ ⵏⵏⵙ » ⴳ 2012.
ⵢⴰⵏ ⵉⵥⵕⴰⵏ ⵜⵉⵡⵓⵔⵉⵡⵉⵏ ⴰⴷ ⵍⵍⵉ ⵉⵙⴽⵔ ⵓⵙⵍⵎⴰⴷ ⴰⵅⵢⵢⴰⵟ ⴳ ⵄⵍⴰⵢⵏ 50 ⵏ ⵉⵙⴳⴳⵯⴰⵙⵏ ⵓⵔ ⵉⵥⴹⴰⵕ ⴰⴷ ⵉⵙⴰⵡⵍ ⵅⴼ ⴰⵎⵓⵙⵙⵓ ⴰⵎⴰⵣⵉⵖ ⴷ ⵓⴷⵖⴰⵔ ⵍⵍⵉ ⵜⵍⴽⵎ ⵜⵎⴰⵣⵉⵖⵜ ⴳ ⵜⵎⵏⴹⴰⵡⵜ ⵏ 2011, ⴱⵍⴰ ⴰⴷ ⵉⴱⴷⵔ ⵉⵙⵎ ⵏ ⵓⵎⵖⵏⴰⵙ ⴰⴷ ⴰⵅⴰⵜⴰⵔ.
ⵕⵕⴱⴰⵟ – (ⴱⵕⴰⵀⵉⵎ ⴱⵏⵃⵎⵎⵓ) – ⴰⵙⵏⴼⵍ ⵉⴳⴳⵯⵔⴰⵏ : 30 ⵖⵓⵛⵜ 2016 – La map
