ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵎⴰⵢⵏⵓ ⵍⵎⵖⵔⵉⴱ, ⴰⵙⵙ ⵏ ⵓⵙⵉⵏⴰⵙ ⵎⵏⵉⴷ ⵏ ⵜⵙⵓⵜⵍⵜ ⵜⵉⵙ 78 ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ, ⴰⵙⴷⴷⵉⴷ ⵏ ⵓⵙⵀⵔⵛ ⵙ ⴽⵓ ⵜⴰⴷⵓⵜ ⵅⴼ ⵉⵏⴰⴳⵍⵉⵡⵏ ⵏ ⵓⵙⴳⴷ ⴷ ⵉⴷⵍⵉⵙⵏ ⵉⴼⵓⵥⴰⵕⵏ.
ⴳ ⵜⴳⵓⵔⵉ ⵏⵏⵙ ⵙ ⵢⵉⵙⵎ ⵏ ⵍⵎⵖⵔⵉⴱ ⴳ ⵓⵎⴹⴰⴽⴰⵔ ⴰⵎⴰⵜⴰⵢ ⵏ ⵜⵙⵓⵜⵍⵜ ⵜⵉⵙ 78 ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ, ⵉⵙⵎⴰⵢⵏⵓ ⵓⵎⵙⵇⴰⴷ ⴰⵙⵎⴷⴰⵢ ⴰⵎⵖⵍⴰⵍ ⵏ ⵍⵎⵖⵔⵉⴱ ⵖⵓⵔ ⵜⵎⵜⵜⴰ ⵉⵎⵓⵏⵏ, ⵄⵓⵎⴰⵕ ⵀⵉⵍⴰⵍ, ⴰⵙⴷⴷⵉⴷ ⵏ ⵜⴳⵍⴷⵉⵜ ⴰⵎⴽⵕⴰⵥ ⵙ ⵓⵙⵍⵓⴼ ⴷ ⵓⵙⵊⴷⵔ ⵏ ⵍⵇⵕⴰⵏ, « ⵏⵏⴰ ⵉⵙⵍⵍⵉⵏ ⵉⵙⵢⴰⴼⴰⵜⵏ ⵏ ⵓⴳⴳⴰⵔ ⵏ ⵎⵍⵢⴰⵕ ⵏ ⵓⵎⵓⵙⵍⵎ ⴳ ⵓⵎⴰⴹⴰⵍ » ⴷ ⵉⴳ ⵜⵉⵕⵥⵉ ⵏ ⵢⴰⵏ ⵙⴳ ⵉⵍⵓⴳⵏⵏ ⵉⴼⵔⴰⵔⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉⵏⵏⴰ ⵓⴷⵉⴱⵍⵓⵎⴰⴷⵉ ⵎⴰⵙ ⴷ ⵉⵇⵇⴰⵏ ⵅⴼ ⵉⵡⴰⵏⴽⵏ ⵉⵎⵏⵜⴰⵢⵏ ⴰⴷ ⵙⴽⵔⵏ ⵙ ⵉⵙⵡⵓⴷⴷⵓⵜⵏ ⴷ ⵉⵇⵇⴰⵏⵏ ⵉ ⵓⵙⴱⴷⴷⵉ ⵏ ⵜⵉⵕⵥⵉ ⴰⴷ.
ⵎⴽⵍⵍⵉ ⵉⵙⵙⵉⵙⴼⵉⵡ ⵅⴼ : « ⵓⵎⵏⵓⵙ ⵏ ⵜⴳⵍⴷⵉⵜ ⵉⴷⵔⴰⵏ » ⵙⴳ ⵜⵍⴽⴰⵎⵉⵏ ⵏ ⵓⵙⵙⴰⴳⵓⴳ ⵏ ⵓⵣⵓⵣⵣⵔ ⵏ ⵢⵉⵏⴰⵡ ⵏ ⵓⴽⵙⴰⵏ, ⵙⵍⴰⵡⴰⵏ ⴰⴽⴽⵯ ⵙⴳ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ ⴰⵏⴰⵎⵓⵏ, ⵉⵙⵎⴰⵏⴰⵔ ⵎⴰⵙ ⴷ ⵉⵏⴰⵡ ⴰⴷ ⴷⴰ ⵉⵜⵜⴰⵡⵙ ⴳ ⵓⵥⵥⵓ ⵏ ⵜⴱⴹⴰⵢ ⴰⴳⵯⵏⵙ ⵏ ⵡⴰⵎⵓⵏⵏ ⴷ ⴳⵔ ⵜⴷⵍⵙⵉⵡⵉⵏ ⴷ ⵉⵡⴰⵏⴽⵏ ⴷ ⵓⵏⵖⴰⵍ ⵏ ⵓⵡⵛⵛⵏ ⵓⴽⵕⵉⴹ.
ⵉⴱⴷⵔ ⵜⴰⴱⵔⴰⵜ ⵢⴰⵜⵜⵓⵢⵏ ⵏⵏⴰ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵉⵎⴰⴷⵔⴰⵡⵏ ⴳ ⵜⵙⵓⵜⵍⵜ ⵜⵉⵙ ⵜⵥⴰ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵓⵎⵓⵍⵍⵉ ⵏ ⵜⵖⵔⵎⵉⵡⵉⵏ ⵏⵏⴰ ⵜⵙⴳⴷⵍ ⵜⵖⵔⵎⵜ ⵏ ⴼⴰⵙ ⵓⵙⵙⴰⵏ ⵏ 22 ⴷ 23 ⵏⵓⵡⴰⵏⴱⵉⵔ 2022. ⴳ ⵜⴱⵔⴰⵜ, ⴰⴷ ⵉⵏⵏⴰ ⵓⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ: » ⵓⵔ ⵜⵜ ⵉⵏⵏ ⵊⵊⵓ ⵜⴽⴽⵉ ⵜⵖⵔⵎⴰ ⵏⵏⵖ ⵜⴳⴰ ⵜⴰⵎⴳⴳⴰⵏⵉⵜ ⵉ ⵓⴳⵓⴷⵉ ⴰⴷ ⵉⵅⴰⵜⵔⵏ ⵏ ⵉⵎⵉⵣⵉⵢⵏ, ⴷ ⵓⵔ ⵊⵊⵓ ⵜⵜ ⵉⵏⵏ ⵜⴽⴽⵓ ⵜⵓⴷⵔⵜ ⵉⵛⵛⴰⵔⵏ ⴰⴷ ⵉⵎⵏⴰⵍⴰ ⵣⵓⵏ ⴷ ⴰⵢⵍⵍⵉ ⵉⵜⵜⵎⵏⴰⵍⴰ ⴰⵙⵙ ⴰⴷ ⵙⴳ ⵉⵙⴷⵉⴷⴷⵉⵢⵏ ⵙ ⵜⵡⵉⵍⴰ ⵜⴰⴽⵓⵢⴰⵙⵜ, ⴷ ⵉⴷⵔⵓⵙ ⵎⴰⵖ ⵜⵍⵍⴰ ⵜⵓⵔⴷⴰ ⴷ ⵓⵏⵣⵣⵓⵍ ⵖ ⵡⴰⵢⵢⴰⴹ ⵣⵓⵏⴷ ⴰⵙⵙ ⴰⴷ, ⴷ ⵉⵙ ⴰⴽⴽⵯ ⵉⴷⵔⵓⵙ ⵓⵙⵎⵔⵙ ⵏ ⴽⵓ ⴰⵙⵔⴰⴳ ⵉⵜⵜⵓⵙⴽⴰⵔⵏ ⵉ ⵡⴰⵏⵣⴰⵍ ⵏ ⵓⵙⵢⴰⴼⴰⵜⵏ ⴷ ⵜⴽⵚⵚⴰⴹ ⴷ ⵓⴽⵙⴰⵏ ⴷ ⵓⵏⴼⵓⴼⴷ ⵏⵏⵙ ⵣⵓⵏⴷ ⴰⵙⵙ ⴰⴷ »
ⵉ ⵓⵎⵏⴰⵍⴰ ⵏ ⵢⵉⵏⴰⵡ ⵏ ⵓⵏⴽⴰⴹ, ⵉⴹⴼⵕ ⵎⴰⵙⵙ ⵀⵉⵍⴰⵍ, ⵉⵙⵎⵏⵉⴷ ⵍⵎⵖⵔⵉⴱ ⴳ ⵢⵓⵍⵢⵓⵣ ⵉⵣⵔⵉⵏ ⵜⴰⵖⵜⴰⵙⵜ ⵏⵏⴰ ⵉⵜⵜⵓⵙⴽⴰⵔⵏ ⵙ ⵓⵎⵙⴰⵙⴰ ⵙⴳ ⴷⴰⵔ ⵉⵡⴰⵏⴽⵏ ⵉⵏⴳⵎⴰⵎⵏ ⴳ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ, ⵉⵙⵙⵀⵔⵛ ⴰⵙⵍⵓⴼ ⵏ ⵉⴷⵍⵉⵙⵏ ⵉⴼⵓⵥⴰⵕⵏ, ⴷ ⵉⵙⵜⵉ ⴳ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⵜⵉⵡⵓⵔⵉⵡⵉⵏ ⴰⴷ ⵙⴳ ⵜⵉⵕⵣⵉ ⵏ ⵓⵙⵍⴳⵏ ⴰⴳⵔⴰⵖⵍⴰⵏ, ⵉⵔⵏⵓ ⵎⴰⵙ ⴷ ⵜⴰⵖⵜⴰⵙⵜ ⵉⵖⵔⴰ ⵓⵍⴰ ⵉ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵙ ⵓⵙⵏⵎⵉⵍⵉ ⵏ ⵓⴳⵔⴰⵡ ⴰⵎⵣⵡⴰⵔⵓ ⵅⴼ ⵢⵉⵏⴰⵡ ⵏ ⵓⵏⴽⴰⴹ ⵏ ⵓⴽⵙⴰⵏ ⴳ ⵓⵙⴳⴳⵯⴰⵙ ⵏ 2025.
ⴳ ⵓⵎⵏⴰⴹ ⴰⴷ ⵏⵉⵜ, ⵉⵙⴰⵡⵍ ⵓⵎⵙⵇⴰⴷ ⵎⴰⵙ ⴷ ⵍⵎⵖⵔⵉⴱ, ⴷ ⵙ ⵓⴼⵔⴰⴽ ⵏⵏⵙ ⵙ ⵜⵉⵏⴷⵉ ⵏ ⵜⵎⵍⴰⵍⵜ ⵏⵏⴰ ⵜⴻⵜⵜⵓⵔⴰⵔ ⵜⵓⵏⵏⵓⵏⵜ ⴳ ⵓⵎⵢⴰⴷⴰⵙ ⴳⵔ ⵜⵎⵜⵜⴰ ⴷ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵓⴼⵔⴰ ⴷ ⵓⵎⵙⵓⵔⵓⴼ, ⵉⵙⵎⵏⵉⴷ ⴰⵙⴷⴰⵡ ⵏ ⵓⵏⴰⴽⴰⴷ ⵉⵛⵛⴰⵔⵏ ⴰⴽⴷ ⴽⵓ ⵚⴱⴰⵏⵢⴰ ⴷ ⵍⴱⵓⵔⵜⵓⵖⴰⵍ, ⵉ ⵓⵙⴷⴰⵍ ⵏ ⵜⵎⴳⴳⵓⵔⴰ ⵏ ⵓⴽⵔⵡⴰⵙ ⵏ ⵓⵎⴰⴹⴰⵍ ⵉ ⵜⵡⵊⵊⴰ ⵏ ⵓⴹⴰⵕ 2030.
ⵉⴱⴷⵔ ⵎⴰⵙ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉⴳⴰ ⴰⵏⴰⴽⴰⴷ ⴰⴷ ⵉⵙ ⵊⵊⵓ ⵓⵔ ⵉⵍⵍⵉ, ⵉⵙⵎⵓⵏ ⴳⵔ ⵙⵏⴰⵜ ⵜⵎⵏⵥⴰⵡⵉⵏ ⴷ ⵜⵖⵔⵎⵉⵡⵉⵏ, ⴰⴼⵔⵉⵇⵢⴰ ⴷ ⵓⵕⵓⴱⴰ, ⴷ ⵉⵙⵎⵓⵏ ⵉⴳⴷⵎⴰⵏ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⴷ ⵢⴰⵙⵉ ⵜⵉⴽⴰⵢⵍⴰⵍⵉⵏ ⴷ ⵢⵉⴷⵉⵔⵏ ⵏ ⵉⵎⴰⴷⴰⵏⵏ ⵏ ⵜⵙⴳⴰ, ⵉ ⵓⴳⴳⴰⵔ ⵏ ⵓⵎⵢⴰⵡⴰⵙ ⴷ ⵓⵏⵢⴰⵍⴽⴰⵎ ⴷ ⵓⵏⵔⴰⵎⴰⵙ.
ⴰⵙⵓⵖⵍ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ
