ⵃⴰⵍⵉⵎ ⵍⵎⴰⴷⴰⵏⵉ : ⵜⵎⴰⵣⵉⵖⵜ ⴷ ⵜⴰⵢⵎⵎⴰⵜ ⴷ ⵉⵎⴰⵏ ⴷ ⴱⵓⵃⴱⵍ, ⵙ ⵜⵉⵔⴰ ⵉ ⵖⴰ ⵜⴷⴷⴰⵔ, ⴰⴷ ⵜⵍⵇⵃ

ⵃⴰⵍⵉⵎ ⵍⵎⴰⴷⴰⵏⵉ ⵉⵊ ⵣⴳ ⵉⵣⵍⴰⵡⵉⵢⴰⵏ ⵉⵃⵓⴷⵔⵉⵢⴰⵏ ⵉⵜⴰⵍⵎⵏ ⴰⵡⴰⵍ, ⵉⵜⵜⴳ ⵜⵉⵣⵎⵎⴰⵔ ⵜⵉⵎⴰⵇⵔⴰⵏⵉⵏ ⴷⵉ ⵜⵉⵔⴰ ⵏ ⵓⵙⴼⵔⵓ, ⵜⵉⵎⴷⵢⴰⵣⵉⵏ ⵏⵏⵙ ⴷⴰⵢⵙⵏⵜ ⴰⵟⵟⴰⵚ ⵏ ⵍⴰⵍⵍⴰⵖ, ⴱⵖⴱⵖⵏⵜ ⵙ ⵜⵡⵍⴰⴼⵉⵏ ⵜⵓⴷⵢⵉⵣⵉⵏ, ⵜⵉⵎⵅⵙⴰ ⵏ ⵜⵎⴰⵣⵉⵖⵜ ⵉ ⵉⵊⵊⵉⵏ ⴰⵣⵍⴰⵡⵉ ⴰⴷ ⵣⵣⴰⵢⵙ ⵢⴰⵔⵉ, ⴰⴷ ⵜⵜ ⵉⵙⵙⴷⴷⵔ ⵎⴰⴽⵏⴰⵡ ⴷ ⵜⵓⵜⵍⴰⵢⵜ ⵜⴰⵏⴷⵢⴰⵣⵜ.

ⵏⵜⵜⴰ ⵢⴰⴽⵙⵉⵏ ⵜⵉⵔⴰ ⵏ ⵜⵎⴰⵣⵉⵖⵜ ⴷ ⴰⵎⵏⵓⵙ, ⴷⴳ ⵓⵎⵙⴰⵡⴰⵍ ⴰ ⵢⵇⵇⴰⵔ ⴱⵍⵉ « ⵜⵎⴰⵣⵉⵖⵜ ⴷ ⵜⴰⵢⵎⵎⴰⵜ ⴷ ⵉⵎⴰⵏ ⴷ ⴱⵓⵃⴱⵍ, ⵎⴰⵍⴰ ⵡⴰⵔ ⵣⵣⴰⵢⵙ ⵏⵓⵔⵉ ⵏⵛⵛⵉⵏ ⵉ ⵉⵍⵍⴰⵏ ⴷ ⴰⵢⵜ ⴱⴰⴱ ⵏⵏⵙ, ⵡⵉ ⵣⵣⴰⵢⵙ ⵖⴰ ⵢⴰⵔⵉⵏ ? ⵙ ⵜⵉⵔⴰ ⵉ ⵖⴰ ⵜⴷⴷⴰⵔ, ⴰⴷ ⵜⵍⵇⵃ ».

ⴰⵏⵣⵓⴼ ⵣⴰⴳⴽ ⵖⴰⵔ ⵜⵙⵏⵉⵡⵉⵏ ⵏ ⵓⵖⵎⵉⵙ “ⴰⵎⴰⴹⴰⵍ ⴰⵎⴰⵣⵉⵖ”, ⵎⵓⵅ ⵖⴰ ⵜⵙⵙⵉⴷⵙⴷ ⵉⵅⴼ ⵉⵏⴽ ⵉ ⵓⵎⵖⵔⵉ ⵏ ⵓⵖⵎⵉⵙ?

ⴰⵣⵓⵍ, ⴷ ⴰⵎⵣⵡⴰⵔ ⴰ ⵜⵇⴰⴷ ⴰⵙ ⵉ ⵓⵖⵎⵉⵙ « ⴰⵎⴰⴹⴰⵍ ⴰⵎⴰⵣⵉⵖ » ⵅⴼ ⵜⴰⵢⵏⵉⵜ ⵏⵏⵙ, ⴰ ⵜⵇⴰⴷ ⴰⴽ ⵓⵍⴰ ⵉ ⵛⴽ ⵜⴰⵡⵎⴰⵜ ⵅⴰⵢⵔⴷⴷⵉⵏ. ⴰⴷ ⵙⵙⵉⴷⵙⵖ ⵉⵅⴼ ⵉⵏⵓ ⵉ ⵓⵎⵖⵔⵉ ⵙ ⵎⵉⵏ ⵄⵏⵉⵖ; ⵏⵛⵛ ⵉⵙⵎ ⵉⵏⵓ ⵃⴰⵍⵉⵎ ⵍⵎⴰⴷⴰⵏⵉ, ⵜⵜⴰⵔⵉⵖ ⴰⵙⴼⵔⵓ, ⵜⵜⴰⵔⵉⵖ ⵓⵍⴰ ⴷⴳ ⵡⴰⵏⴰⵡⵏ ⵏⵏⵖⵏⵉ ⵏ ⵜⵙⴽⵍⴰ. ⵖⴰⵔⵉ ⴽⵕⴰⴹ ⵏ ⵢⴷⵍⵉⵙⵏ; ⵙⵉⵏ ⵏ ⵓⵙⴼⵔⵓ, ⵉⵊⵊ ⵏ ⵜⵏⴼⴰⵙ, ⴷ ⴰⵎⵃⴹⴰⵕ ⴳ ⵓⵎⴰⵙⵜⵔ: ⵜⴰⵙⴽⵍⴰ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ.

ⵎⴰ ⵜⵣⵎⵎⵔⴷ ⴰⴷ ⴰⵏⵖ ⵜⵙⵙⵉⵡⵍⴷ ⵅ ⵢⵉⵚⵓⵕⴰⴼ ⵉⵏⴽ ⵉⵎⵣⴳⵓⵔⴰ ⴳⵉ ⵜⵖⵔⵉ ⴷ ⵜⵉⵔⴰ ⵉ ⵜⴷⵢⴰⵣⵜ (poésie)?

ⵉⵚⵓⵕⴰⴼ ⵉⵏⵓ ⵉⵎⵣⵡⵓⵔⴰ, ⵙⵙⵏⵜⴰⵏ ⴷⴳ ⵓⵙⴳⴳⵯⴰⵙ ⵏ 2011, ⵙ ⵓⵎⵏⵜⵉⵍ ⵏ ⵜⵎⵙⵍⴰ ⵉ ⵍⵖⵏⵓⵊ ⵏ ⵉⵎⴰⵣⵉⵖⵏ, ⴰⵎⴽⵏⴰⵡ ⵅⴰⵍⵉⴷ ⵉⵣⵔⵉ, ⵡⴰⵍⵉⴷ ⵎⵉⵎⵓⵏ, ⵜⵉⵚⴹⵎⵉⵡⵉⵏ : ⴱⵏⵏⵄⵎⴰⵏ, ⴰⵢⵢⴰⵡⵏ, ⵉⵜⵔⴰⵏ… ⴷⴳ ⵓⵙⴳⴳⵯⴰⵙ ⵏ 2014 ⴼⵙⴰⵔⵖ ⵜⴰⵇⵙⵙⵉⵙⵜ : ⴷⵛⴰⵕ ⵉⵅⵍⴰⵏ ⵙ ⵜⵏⵉⵖⵜ, ⵣⵣⴰⵢⵙ ⵉ ⴷⴰⵢⵉ ⵙⵙⵏⴻⵏ ⵛⵡⴰⵢⵜ ⵉⵡⴷⴰⵏ, ⵣⵣⴰⵢⵙ ⵉ ⵙⵙⵏⵖ ⵓⵍⴰ ⴷ ⵏⵛⵛ ⵉⵣⵍⴰⵡⵉⵢⵢⵏ. ⴷⴳ ⵓⵙⴳⴳⵯⴰⵙ ⵏⵏⵉ ⵉⵙⵙⵉⵡⵍ ⴷ ⴰⴽⵉⴷⵉ ⵓⵣⵍⴰⵣⵉ ⴽⴰⵔⵉⵎ ⴽⵏⵏⵓⴼ, ⵉⵙⵎⵉⴳⵍ ⴰⵢⵉ, ⵉⵏⵏⴰ ⴰⵢⵉ : ⴱⴷⴷⵍ ⵜⵉⵔⴰ ⵏⵏⴽ, ⵓⵔ ⵜⵜⵖⵉⵎⴰ ⴷⵉ ⵜⵉⵔⴰ ⵏ ⵍⵖⵏⵓⵊ ⵡⴰⵀⴰ. ⵙⵙⵏⵏⵉ ⴰⵔⵣⵓⵖ ⵅⴼ ⵜⵉⵔⴰ ⵏⵏⵙ ⵄⵊⴱⵏⵜ ⴰⵢⵉ ⴰⵟⵟⴰⵚ, ⵓⵛⴰ ⴱⴷⴷⵍⵏⵜ ⵜⵉⵔⴰ ⵉⵏⵓ ⵖⴰⵔ ⵛⴰ ⵏ ⵜⵉⵔⴰ ⵏⵏⵖⵏⵉ, ⵣⵎⵎⴰⵔⵖ ⴰⴷ ⵉⵏⵉⵖ ⴷⴰⵢⵙⵏⵜ ⵜⵓⵎⵎⴷⵢⵣⵜ.

ⵇⵇⴰⵔⵏ ⵇⴰ ⴽⵓⵍ ⵜⴰⵔⵎⵉⵜ ⵖⴰⵔⵙ ⵜⵉⵎⵓⴽⵔⵉⵙⵉⵏ ⵉⵏⵙ… ⵎⵓⵅ ⴷ ⴰⵙ ⵉⴳⴰ “ⵃⴰⵍⵉⵎ ⵍⵎⴰⴷⴰⵏⵉ” ⵉⵚⵚⵓⵕⴼ ⵜⵉⵎⵓⴽⵔⵉⵙⵉⵏ ⵜⵉⵎⵣⴳⵓⵔⴰ ⵏ ⵜⴽⵍⵉ ⵉⵏⵙ ⴳⵉ ⵜⴷⵢⴰⵣⵜ?

ⵣⵣⴰⵜ ⵎⴰ ⴰⴷ ⵙⵙⵉⵍⵡⵖ ⵅⴼ ⵎⴰⵎⴽ ⴳⴳⵉⵖ ⵚⵚⵓⵕⴼⵖ ⵜⵉⵎⵓⴽⵔⵉⵙⵉⵏ, ⵉⵅⵙⵙ ⴰⴷ ⴷ ⵉⴷⴰⵔⵖ ⵜⵉⵎⵓⴽⵔⵉⵙⵉⵏ ⴰ ; ⵏⵛⵛⵉⵏ ⴷⴳ ⵓⵙⴼⵔⵓ ⴰⵎⴰⵣⵉⵖ ⵓⵔ ⵖⴰⵔⵏⵖ ⴱⵓ ⵉⵎⵖⵔⴰⵏ ⵡⴰ ⴷ ⴰⵎⵓⴽⵔⵉⵙ ⵉⵜⵜⵊⵊⴰ ⵛⴽ ⵓⵔ ⵜⴻⵜⵜⴰⵔⵉⴷ ⵛⴰ, ⴰⵚⵓⵕⴼ ⵉ ⴳⴳⵉⵖ ⵉ ⵓⵎⵅⵓⵎⴱⵍ ⴰ ⴷ ⴰⵎⵏⵓⵙ ⵏ ⵜⵎⴰⵣⵉⵖⵜ, ⵉⵅⵙⵙ ⴰⴷ ⵖⴰⵔⵙ ⵜⵉⵍⵉ ⵜⵙⴽⵍⴰ ⵏⵏⵙ, ⵜⵉⵔⴰ ⵏⵏⵙ, ⵎⵉⵏⵣⵉ ⴷⴳ ⵢⵉⵎⴰⵍ ⴰⵜⴰⵖ ⴰⴷ ⵉⵍⵉⵏ ⵛⴰ ⵏ ⵉⵎⵖⵔⴰ ⵉ ⵎⵉⵏ ⵉⵜⵜⵡⴰⵔⵓⵏ ⵙ ⵜⵎⴰⵣⵉⵖⵜ.

ⵄⴰⵡⴷ ⵉⵅⵙⵙ ⵓⵔ ⵏⴽⵙⵙⵉ ⴰⵎⵖⵔⵉ ⴷ ⴰⵎⵏⵓⵙ, ⵎⴰⵍⴰ ⵏⵅⵣⵣⴰⵔ ⵖⴰⵔⵙ, ⵓⵔ ⵏⵜⵜⴰⵔⵉ ⵛⴰ. ⴷⴳ ⵓⵎⵣⵡⴰⵔ ⵓⵍⴰ ⴷ ⵏⵛⵛ ⵜⵜⵓⵖⴰ ⵜⵜⴰⵔⵉⵖ ⵙ ⵓⵙⴽⴽⵉⵍ ⴰⵙⵔⵖⵉⵏ, ⴰⵎⵓⴽⵔⵉⵙ ⴰ ⵚⵚⵓⵕⴼⵖ ⵜ ⵙ ⵜⵖⵔⵉ, ⴷ ⵜⵔⵣⵣⵓⵜ, ⴰⵍ ⴰⵎⵉ ⴷⵡⵍⵖ ⵜⵜⴰⵔⵉⵖ ⵙ ⵉⵍⵓⴳⴰⵏⵏ ⵣⵣⴰⵜ ⵎⴰ ⴰⴷ ⴰⴷⴼⵖ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴷⵉ ⵜⵖⵉⵡⴰⵏⵜ ⵏ ⵙⵍⵡⴰⵏ.

ⴰⵎⵎⵓⴷ ⵉⵏⴽ ⴰⵎⵣⴳⴰⵔⵓ “ⴰⴷⴷⵔⵉⵡⵏ ⵏ ⵓⵥⵓⵢⵢⵜ” ⵉⴼⴼⵖ ⴳ ⵓⵙⴳⴳⵯⴰⵙ ⵏ 2020, ⴰⵎⵎⵏ ⵛⴽⴽ ⵜⵙⵙⵏⵜⵉⴷ ⵣⴷⴰⵜⵙ ⵙ ⵡⴰⵟⵟⴰⵚ ⵏ ⵢⵉⵙⴳⴳⵯⵓⵙⴰ, ⵎⴰ ⵜⵣⵎⵎⵔⴷ ⴰⴷ ⴰⵏⵖ ⵜⵙⵙⵉⵡⵍⴷ ⵛⵡⵉⵜ ⵅ ⵡⴰⵎⵎⵓⴷ ⴰ?

ⴰⵎⵓⴷ « ⴰⴷⴷⵔⵉⵡⵏ ⵏ ⵓⵥⵓⵢⵢⵜ » ⵉⵄⵉⵣⵣ ⵅⴰⴼⵉ ⴰⵟⵟⴰⵚ, ⵃⵓⵎⴰ ⴰⴷ ⴰⵔⵉⵖ ⵎⵉⵏ ⵜ ⵢⵉⴼⵏ ⵉⵅⵙⵙ ⴰⵢⵉ ⴰⵟⵟⴰⵚ ⵏ ⵉⵙⴳⴳⵯⵓⵙⴰ ⵏ ⵜⵉⵔⴰ, ⴷ ⵉⵊⵊ ⵏ ⵡⴰⵎⵓⴷ ⵉⵛⵛⵓⵕ ⵙ ⵜⵓⵎⵎⴷⵢⵣⵜ, ⵎⵉⵏ ⴷⴰⵢⵙ ⵢⵓⵔⴰⵏ ⵎⴰⵕⵕⴰ ⵉⵄⵉⵣⵣ ⵅⴰⴼⵉ, ⴰⵎⵓⴷ ⵉⴼⴼⵖ ⴷ ⴰⵡⴰⵔⵏ ⵉ ⵡⴰⵟⵟⴰⵚ ⵏ ⵓⵅⴰⵕⵕⵚ, ⵙⵎⵓⵏⵖ ⴷⴰⵢⵙ ⵎⵉⵏ ⵓⵔⵉⵖ ⵣⴳ 2014 ⴰⵍ 2020. ⴷⴰⵢⵙ 31 ⵏ ⵜⵇⵙⵙⵉⵙⵉⵏ, ⵓⵔⴰⵏⵜ ⵙ ⵓⵙⴽⴽⵉⵍ ⵏ ⵜⵍⴰⵜⵉⵏⵉⵜ, ⴷ ⵓⵙⴽⴽⵉⵍ ⵏ ⵜⵄⵕⴰⴱⵜ. ⵜⴰⵡⵍⴰⴼⵜ ⵏ ⵓⵖⴰⵎⵓⵙ ⵏⵙⵙ, ⵉⵙⵙⵓⵏⵖ ⵉⵜⵜ ⵎⵓⵃⵎⵎⴷ ⵟⵟⵢⵢⴱⵉ, ⴰⵖⴰⵎⵓⵙ ⵏⵏⵙ ⵉⴳⴳⴰ ⵜ ⵄⴱⴷⵍⵡⴰⵃⴷ ⵟⵟⵢⵢⴱⵉ. ⵙⵙⵉⴳⴳⵣⵖ ⵜ ⵖⴰⵔ ⵜⵙⵉⴳⴳⵣⵜ ⵏ ⵍⴰⵏⵡⴰⵕ ⴷⵉ ⵙⵍⵡⴰⵍ, ⵇⵉⴱⴰⵍ ⵉ ⵜⵙⴷⴰⵡⵉⵜ.

ⵎⵉⵏ ⵛⴽⴽ ⵉⵊⵊⵉⵏ ⴰⴷ ⵜⴰⵔⵉⴷ ⵙ ⵜⵎⴰⵣⵉⵖⵜ, ⴰⴷ ⵜⵜ ⵜⵙⵙⴷⴷⵔⴷ ⵎⴰⴽⵏⴰⵡ ⴷ ⵜⵓⵜⵍⴰⵢⵜ ⵜⴰⵏⴷⵢⴰⵣⵜ (langue poétique)?

ⴷ ⵜⵉⵎⵅⵙⴰ ⵏ ⵜⵎⴰⵣⵉⵖⵜ ⵉ ⴷⴰⵢⵉ ⵉⵊⵊⵉⵏ ⴰⴷ ⵣⵣⴰⵢⵙ ⴰⵔⵉⵖ, ⵎⴰⵏⴰⵢⴰ ⵉⵍⵍⴰ ⴰⵟⵟⴰⵚ ⴷⵉ ⵜⵉⵔⴰ ⵉⵏⵓ, ⵜⵎⴰⵣⵉⵖⵜ ⴷ ⵜⴰⵢⵎⵎⴰⵜ ⴷ ⵉⵎⴰⵏ ⴷ ⴱⵓⵃⴱⵍ, ⵎⴰⵍⴰ ⵡⴰⵔ ⵣⵣⴰⵢⵙ ⵏⵓⵔⵉ ⵏⵛⵛⵉⵏ ⵉ ⵉⵍⵍⴰⵏ ⴷ ⴰⵢⵜ ⴱⴰⴱ ⵏⵏⵙ, ⵡⵉ ⵣⵣⴰⵢⵙ ⵖⴰ ⵢⴰⵔⵉⵏ? ⵙ ⵜⵉⵔⴰ ⵉ ⵖⴰ ⵜⴷⴷⴰⵔ, ⴰⴷ ⵜⵍⵇⵃ.

ⵎⵉⵏ ⵜⵄⵏⴰ ⵜⵇⵙⵙⵉⵙⵜ ⵉ ⵅⴰⴼⴽ ⵉⵄⵉⵣⵣⵏ ⴰⵟⵟⴰⵚ ⴷⴳ ⵡⴰⵎⵎⵓⴷ ⵉⵏⴽ “ⴰⴷⴷⵔⵉⵡⵏ ⵏ ⵓⵥⵓⵢⵢⵜ”, ⵎⴰⵖⴰⵔ ⵉ ⵅⴰⴼⴽ ⵜⵄⵉⵣⵣ?

ⵎⴰⵎⴽ ⵜⵜⵓⵖⴰ ⵉⵣⵡⴰⵔⵖ ⵏⵏⵉⵖ, « ⴰⴷⴷⵔⵉⵡⵏ ⵏ ⵓⵥⵓⵢⵢⵜ » ⵉⵄⵉⵣⵣ ⵅⴰⴼⵉ, ⵙ ⵓⵢⴰ ⵉⵇⵙⵃ ⵃⵓⵎⴰ ⴰⴷ ⵙⵜⵉⵖ ⵉⵊⵊⵜ ⵏ ⵜⵇⵙⵙⵉⵙⵜ, ⵎⴰⵕⵕⴰ ⵎⵉⵏ ⴷⴰⵢⵙ ⵉⵄⵉⵣⵣ ⵅⴰⴼⵉ, ⵎⴰⵛⴰ ⴰⴷ ⵉⵅⴹⴰⵕⵖ ⵉⵊⵊⵜ, ⵏⵜⵜⴰⵜ ⴷ ⵜⴰⵇⵙⵙⵉⵙⵜ « ⵉⵜⵉⴷⴰⵔ ⵉⵛⵎ ⴷ ⵓⵛⴰⵍ » ⵉⵅⴹⴰⵕⵖ ⵜⵜ ⵉⴷ ⵎⵉⵏⵣⵉ ⴷⴰⵢⵙ ⴰⵟⵟⴰⵚ ⵏ ⵍⴰⵍⵍⴰⵖ, ⵜⴱⵖⴱⵖ ⵙ ⵜⵡⵍⴰⴼⵉⵏ ⵜⵓⴷⵢⵉⵣⵉⵏ, ⵉⵖⵔⴰ ⵜⵜ ⴽⴰⵔⵉⵎ ⴽⵏⵏⵓⴼ, ⵜⵄⵊⴱ ⴰⵙ ⴰⵟⵟⴰⵚ. ⵃⵓⵎⴰ ⴰⴷ ⵉⵡⵛ ⴰⵙⵍⴽⵏ ⴱⵍⵍⵉ ⵜⵛⵏⴰ, ⵉⵊⵊ ⵏ ⵓⵣⵍⴰⵡⵉ ⴰⵎ ⴽⴰⵔⵉⵎ ⴽⵏⵏⵓⴼ, ⵙⵙⵏ ⴱⵍⵍⵉ ⴰⵙⵍⴽⵏ ⵏⵏⵙ ⵉⵇⴰⴷ.

ⵎⵉⵏ ⵄⵏⴰⵏ ⵢⵉⵙⵏⵜⴰⵍ ⵉ ⵛⴽⴽ ⴷⴷ ⵉⵊⴱⴱⴷⵏ ⵖⴰⵔ ⵜⵉⵔⴰ ⵏ ⵜⴷⵢⴰⵣⵜ ? ⵎⵉⵏ ⵜⴻⵜⵜⵕⴰⵊⵉⴷ ⵣⵉ ⵜⵉⵔⴰ ⵏ ⵓⵙⵏⴼⵍⵓⵍ?

ⴰⵟⵟⴰⵚ ⵏ ⵉⵙⵏⵜⴰⵍ ⵉ ⴷⴰⵢⵉ ⴷ ⵉⵊⴱⴱⴷⵏ, ⵓⵊⴰⵔ ⵎⵉⵏ ⵉⵇⵇⵏⵏ ⵖⴰⵔ ⵜⵏⵜⵜⵉⵜ ⵏⵉⵖ ⵜⵓⵜⵍⴰⵢⵜ ⴷ ⵢⵉⵙⵏⵜⴰⵍ ⵏ ⵓⵄⵕⴰⵇ ⵎⵉⵏⵣⵉ ⵜⵜⵃⴰⴷⴰⵏ ⴰⵟⵟⴰⵚ ⵜⴰⵢⵛⵉⵜⵉⵏ ⵉⵏⵓ ! ⵜⵜⵕⴰⵊⵉⵖ ⵣⵉ ⵜⵉⵔⴰ ⵏ ⵓⵙⵏⴼⵍⵓⵍ ⴰⴷ ⴰⴼⵏⵜ ⴰⴱⵔⵉⴷ ⵖⴰⵔ ⵉⵎⵖⵔⴰ ⵉ ⵜⵛⵇⴰ ⵜⵎⴰⵣⵉⵖⵜ, ⵎⵉⵏⵣⵉ ⵢⵉⵏⵏⵉ ⵉ ⵏⵜⵜⵡⴰⵍⴰ ⵜⵛⵇⴰ ⵜⵏ ⵜⵎⴰⵣⵉⵖⵜ ⵓⵛⴰ ⵓⵔ ⵇⵇⴰⵔⵏ ⴰⵙⴼⵔⵓ ⵓⵍⴰ ⴷ ⵜⵎⴰⵣⵉⵖⵜ ⵇⵄ.

ⵎⵓⵅ ⵜⴻⵜⵜⵡⴰⵍⵉⴷ ⵜⴰⵔⵎⵉⵜ ⵜⴰⵏⴷⵢⴰⵣⵜ ⵜⴰⵔⵉⴼⵉⵜ ⵙ ⵡⵓⵙⵍⵉⴳ, ⴷ ⵜⵎⴰⵣⵉⵖⵜ ⵙ ⵓⵎⴰⵜⴰ?

ⵜⵉⵔⵎⵉⵜ ⵜⴰⵏⴷⵢⴰⵣⵜ ⵜⴰⵔⵉⴼⵉⵜ ⴰⵇⵇⴰ ⵜⴳⴳⵓⵔ ⵖⴰⵔ ⵣⵣⴰⵜ, ⵎⴽⵓⵍ ⵜⵡⴰⵍⴰ ⵉⵍⴰ ⵉⵙⴼⵓⴼⴼⵉ ⴷ ⵛⴰ ⵏ ⵡⴰⵎⵓⴷ, ⵎⴰⵛⴰ ⵡⴰⵅⵅⴰ ⴰⵎⵏⵏⵉ ⵉⵜⵜⵖⵉⵎⴰ ⵓⵢⵏⵏⵉ ⵢⵓⴷⵔⵓⵙ, ⵉⵅⵙⵙ ⴰⵏⵖ ⵄⴰⴷ ⵜⵉⵔⴰ, ⵃⵓⵎⴰ ⴰⴷ ⵏⴰⴼ ⵎⵉⵏ ⵓⵎⵉ ⵖⴰ ⵏⴳⴳ ⴰⵣⵖⴰⵏ. ⵙ ⵓⵎⴰⵜⴰ, ⵜⴰⴷⵢⴰⵣⵜ ⴰⵇⵇⴰ ⵜⵟⵟⴼ ⴰⴱⵔⵉⴷ ⵏⵏⵙ.

ⵉⵏⵏⴰ ⵚⴰⵎⵡⵉⵍ ⴱⵢⴰⵕⵏⴰⵢ (1915) ⴳ ⵓⵎⴰⴳⵔⴰⴷ ⵉⵏⵙ ⵅ ⵜⴷⵢⴰⵣⵜ ⵜⴰⵔⵉⴼⵉⵜ ⵇⴰ ⵜⵉⵎⵖⴰⵔⵉⵏ ⵜⵉⵔⵉⴼⵉⵢⵉⵏ ⵜⵓⵖⴰ ⵜⵏⵜ ⴷ ⵜⵉⵎⵙⵏⴼⵍⵓⵍⵉⵏ ⵏ ⵜⵉⴷⵜ ⴷⴳ ⵢⵉⴳⵔ ⵏ ⵜⴷⵢⴰⵣⵜ, ⵎⵉⵏ ⵜⵏⵜ ⵉⵊⵊⵉⵏ ⴰⴷ ⵅⵡⴰⵏⵜ ⵉⴳⵔ ⴰ?

ⴷ ⵜⵉⴷⵜ ⵎⵉⵏ ⵉⵏⵏⴰ ⴱⵢⴰⵕⵏⴰⵢ, ⴷ ⵜⴰⵎⵖⴰⵔⵜ ⵉ ⵜⵜⵓⵖⴰ ⵉⵜⵜⴳⴳⵏ ⵉⵣⵍⴰⵏ, ⵎⴰⵎⴽ ⵜⵏⵏⴰ ⵎⵉⵎⵓⵏⵜ ⵏ ⵙⵍⵡⴰⵏ ⴷⴳ ⵢⵉⵊⵊ ⵏ ⵓⵎⵙⴰⵡⴰⵍ: ⵏⵛⵛⵉⵏ ⵜⵜⵓⵖⴰ ⵅⵎⵉ ⵏⵜⵜⴳ ⵉⵣⵍⴰⵏ ⵏⵜⵜⵔⵓ.

ⵎⵉⵏ ⵜⵜ ⵉⵊⵊⵉⵏ ⴰⴷ ⵜⴳⵓⵔⴰ ⴷ ⴰⵙⵃⵇⴰⵕ ⵏ ⵡⴰⵎⵓⵏ, ⵜⴻⵜⵜⵙⴷⵃⴰ ⵖⴰ ⵉⴱⴰⵏⴻⵏ ⴷⴳ ⵡⵓⴷⵎ ⵏ ⵡⴰⵎⵓⵏ, ⵓⵍⴰ ⴷ ⴰⵔⴳⴰⵣⵏ ⴰⵇⵇⴰ ⴷⵉⵏ ⵢⵉⵏⵏⵉ ⵉⵏⵏⵓⴼⴼⴰⵔⵏ ⵙ ⵜⵉⴳⴳⵯⴷⵉ ⵏ ⵓⵙⵃⵇⴰⵕ ⵏⵉⵖ ⵅⵣⵣⴰⵔⵏ ⵖⴰⵔ ⵢⵉⵣⵍⴰⵏ ⵃⵕⴰⵎ, ⵎⴰⵏⵉ ⵄⴰⴷ ⵜⴰⵎⵖⴰⵔⵜ. ⴰⵎⵅⵓⵎⴱⵍ ⵏⵏⵖⵏⵉ ⵡⴰⵔ ⵏⵅⵣⵣⴰⵔ ⵖⴰⵔ ⵢⵉⵣⵍⴰⵏ ⴱⵍⵍⵉ ⴷ ⵜⵓⵙⵙⵏⴰ, ⴷ ⵜⵉⵖⵔⵉ, ⴷ ⵜⴰⵙⴽⵍⴰ..

ⴰⵡⴰⵔⵏ ⵉ ⵓⵙⵓⴼⵖ ⵉⵏⴽ ⵉ ⵡⴰⵎⵎⵓⴷ ⵡⵉⵙ ⵙⵉⵏ “ⵊⴰⵔ ⵓⴹⵉⵇⵇⵉ ⴷ ⵓⵍⴰⵖⵉ”, ⴷ ⵜⵡⵓⵔⵉ ⵜⵉⵙ ⴽⵕⴰⵟ “ⵜⴰⵎⵟⵟⵓⵜ ⵜⴰⵎⵇⵇⵔⴰⵏⵜ” ⴷⴳ ⵢⵉⴳⵔ ⵏ ⵜⵏⴼⴰⵙ, ⵎⴰ ⵓⵔ ⵜⵅⵕⵕⵚⴷ ⴰⴷ ⵜⵙⵙⵔⵙⴷ ⵜⵉⵔⵎⵉⵜⵉⵏ ⵏ ⵜⵉⵔⴰ ⴳⵉ ⵜⵡⵙⴰⵜⵉⵏ ⵜⵉⵙⴽⵍⴰⵏⵉⵏ ⵏⵏⵖⵏⵉ ⴰⵎ ⵡⵓⵏⴳⴰⵍ ⵙ ⵓⵎⴷⵢⴰ?

ⴰⵎⵏ ⵏⵏⵉⵖ ⵣⵣⴰⵜ, ⴽⵙⵉⵖ ⵜⵉⵔⴰ ⵏ ⵜⵎⴰⵣⵉⵖⵜ ⴷ ⴰⵎⵏⵓⵙ, ⵙ ⵓⵢⴰ ⵎⴰⵎⴽ ⴷ ⵙⵍⵓⵍⵖ ⴰⵏⴰⵡ ⵏⵏⵖⵏⵉ (ⵜⵉⵏⴼⴰⵙ) ⴱⵍⴰ ⴰⵙⴼⵔⵓ, ⴰⴷ ⴳⴳⵖ ⵜⵉⵣⵎⵎⴰⵔ ⵓⵍⴰ ⴷⴳ ⵡⴰⵏⴰⵡⵏ ⵏⵏⵖⵏⵉ, ⵓⵏⴳⴰⵍ ⴷ ⴰⵎⴷⵢⴰ ⵅⴰⵕⵕⵚⵖ ⴷⴰⵢⵙ, ⴰⵇⵇⴰ ⵜ ⵊⴰⵔ ⵜⵉⵟⵟⴰⵡⵉⵏ ⵉⵏⵓ, ⵉⵇⵇⵉⵎ ⴰⵎ ⴰⴷ ⵖⴰⵔⵙ ⴽⵙⵉⵖ ⴰⵖⴰⵏⵉⴱ ⵡⴰⵀⴰ, ⵏⵜⵜⴰ ⴷ ⵓⵙⵓⵖⵍ.

ⵎⴰⵏ ⴰⵖⴰⵡⴰⵙ ⵉⴷ ⴰⵙ ⴷⴷ ⵜⵙⵡⵊⴷⴻⴷ ⵉ ⵢⵉⵎⴰⵍ ⵏ ⵜⵉⵔⴰ ⵉⵏⴽ, ⴷ ⵜⵉⵔⴰ ⵙ ⵜⵎⴰⵣⵉⵖⵜ?

ⴰⵖⴰⵡⴰⵙ ⵉ ⵙⵡⵊⴷⵖ ⵉ ⵢⵉⵎⴰⵍ ⵏ ⵜⵉⵔⴰ ⵙ ⵜⵎⴰⵣⵉⵖⵜ, ⵉⵛⵛⵓⵕ ⵙ ⵓⵅⴰⵕⵕⵚ, ⵡⴰⵔ ⵅⵙⵖ ⵛⴰ ⴰⴷ ⵇⵇⵉⵎⵖ ⵎⵖⴰⵔ ⴷⵉ ⵜⵙⴽⵍⴰ, ⵜⵜⵅⴰⵕⵕⵚⵖ ⵓⵍⴰ ⴷⵉ ⵜⵡⵓⵔⵉⵡⵉⵏ ⵜⵉⵎⴰⵙⵙⴰⵏⵉⵏ, ⴰⵎⵛⵏⴰⵡ ⴰⵣⵖⴰⵏ ⵉ ⵎⵉⵏ ⵉⵜⵜⵡⴰⵔⵉⵏ ⴷ ⴰⵙⴼⵔⵓ, ⴰⵎⵛⵏⴰⵡ ⵜⴰⵔⵣⵣⵓⵜⵉⵏ ⴷⵉ ⵜⵙⵏⵉⵍⵙⵜ ⴷ ⵡⴰⵟⵟⴰⵚ ⵏⵏⵖⵏⵉ, ⵏⵙⵙⵉⵜⵉⵎ ⵣⵉ ⵜⴰⵍⴰ ⵡⴰⵔ ⵜⴻⵜⵜⵉⵣⵖ, ⴰⴷ ⵜⵇⵇⵉⵎ ⵍⴱⴷⴰ ⵜⴻⵜⵜⵏⵙⵙⴰⵙ.

ⵜⴰⵡⴰⵍⵜ ⵜⵉⵍⴻⵍⵍⵉⵜ..

ⴰⵔⵣⵣⵓⵖ ⴰⴷ ⵜⵜⵡⴰⵍⵉⵖ ⵜⴰⵙⴷⵍⵉⵙⵜ ⵜⴰⵔⵉⴼⵉⵢⵜ ⵜⵛⵛⵓⵕ ⵙ ⵢⴷⵍⵉⵙⵏ, ⴰⵔⵣⵣⵓⵖ ⴰⴷ ⵏⵛⵛⴰⵕ ⵍⵅⴰⵡⵉ ⵏⵏⵉ ⵖⴰⵔⵏⵖ ⵉⵇⵇⵉⵎⵏ.

ⵜⵜⴻⵜⵜⵔⵖ ⵣⵉ ⵜⵎⵖⴰⵔⵜ ⵉ ⵉⵜⵜⴰⵔⵉⵏ ⵡⴰⵔ ⵜⴻⵜⵜⵖⵉⵎⵉ ⴷⴳ ⵓⵙⵖⴷⵉ ⵏⵏⵙ, ⴰⴷ ⵜⵙⵡⵉⵣⴰ ⴰⴽⴷ ⵓⵖⵣⴷⵉⵙ ⵏ ⵡⴰⵔⴳⴰⵣ, ⵎⵉⵏⵣⵉ ⴷ ⵏⵜⵜⴰⵜ ⵉ ⵉⵍⵍⴰⵏ ⴷ ⵜⴰⵎⵙⵏⴼⵍⵓⵍⵜ ⵏ ⵜⵉⴷⵜ ⴰⵎⵏ ⵉⵏⵏⴰ ⵙⴰⵎⵡⵉⵍ ⴱⵢⴰⵕⵏⴰⵢ.

ⴰⵎⵙⴰⵡⴰⵍ : ⵅⴰⵢⵔⴷⴷⵉⵏ ⵍⵊⴰⵎⵄⵉ