ⵃⵎⴰⴷ ⵚⴰⴱⵉⵕ ⴰⴽⴰⴷⵉⵎⵉ, ⴰⵎⴰⵙⵜⴰⵏ ⵏ ⵜⵓⵙⵙⵏⴰⴷⵖⴰⵔ

ⵉⵜⵜⵢⴰⵔⴰ ⵉⵢⵉ ⴰⴷ ⵎⵎⵉⴳⴳⵉⵔⵖ ⴳ ⵓⵙⴰⴽⴰ ⵉⵏⵓ ⴰⵎ ⴰⵎⵣⵔⴰⵡ ⴰⵎⵔⵣⵓ ⵙ ⵓⵙⵍⵎⴰⴷ ⴰⵎⵙⴷⴰⵡ ⵉⴳⴰⵏ ⵡⴰⵥ ⴷ ⵓⴱⴰⵍⵓⵍ, ⵏⵜⵜⴰ ⴷ ⵎⴰⵙⵙ ⴰⴷⵓⴽⵜⵓⵔ ⵃⵎⴰⴷ ⵚⴰⴱⵉⵕ ⵏⵏⴰ ⴰⵖ ⵉⵙⵙⵍⵎⴷⵏ ⴰⴽⴷ ⵓⵎⴷⴷⴰⴽⴽⵯⵍ ⵏⵏⵙ ⵃⵎⴰⴷ ⵍⵀⴰⵛⵉⵎⵉ ⵜⴰⵎⵜⵜⴰ ⵏⵏⴰ ⵢⴰⵥⵏ ⴰⵡⴷ ⵏⵜⵜⴰⵜ ⴰⴷ ⵜⴳ ⵜⴰⴱⴰⵍⵓⵍⵜ ⴳ ⵜⵣⵉⴳⵣⵜ ⵏ ⵓⵙⵎⵓⵜⵜⴳ ⴰⴽⴰⴷⵉⵎⵉ ⴳ ⵜⵙⴷⴰⵡⵉⵜ ⵜⴰⵎⵖⵔⵉⴱⵉⵜ: ⵏⵜⵜⴰⵜ ⴷ ⵜⴰⵟⵓⴱⵓⵏⵓⵎⵉⵜ, ⵏⵉⵖ ⵜⵓⵙⵙⵏⴰⴷⵖⴰⵔ. ⵏⵓⵛⴽⴰ ⵏⵏ ⴰⵎ ⵉⵎⵣⵔⴰⵡⵏ ⵉⵎⵔⵣⵓⵜⵏ ⵙ ⴽⵉⴳⴰⵏ ⵏ ⵓⵏⵏⵖⵣⵍ ⵙ ⵜⵉⵏⴰⵡⵉⵏ ⴷ ⵜⵙⵏⵙⵉⵡⵉⵏ ⵏ ⵎⴰⵙⵙ ⵃⵎⴰⴷ ⵚⴰⴱⵉⵕ, ⵎⴽⵍⵍⵉ ⵏⵏ ⵉⴳⴰ ⴰⵡⴷ ⵏⵜⵜⴰ ⴽⵉⴳⴰⵏ ⴷ ⵜⵓⴳⴳⴰⵙ ⵎⴽⵍⵍⵉ ⴱⴷⴷⴰ ⴰⴼⴰⴷ ⴰⴷ ⴰⵖ ⵉⵙⵙⵉⵔⵉ ⵜⴰⵎⵜⵜⴰ ⴰⴷ ⵜⵉⵣⵉ ⴰⵏⵏ ⵉⴷⵓⴼⴰ ⵏⵉⵜ ⴳ ⵉⵥⴰⵥⵓⵢⵏ ⵏ ⵜⵡⵓⵔⵉ ⵜⴰⵎⵙⵙⵓⴳⵓⵔⵜ ⴹⴰⵕⵜ ⵏ ⵓⴼⵓⴽⴽⵓ ⵏ ⵜⵎⵙⴽⵉⵔⵉⵏ ⵏⵏⵙ ⴰⵎ ⴰⵏⴱⴷⴰⴷ ⵏ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴳ ⵜⵙⴷⴰⵡⵉⵜ ⵏ ⵢⵉⴱⵏ ⵥⵓⵀⵕ.

ⴰⵔ ⵉⵏⵏ ⵉⴽⵛⵛⵎ ⵓⴷⵓⴽⵜⵓⵔ ⵃⵎⴰⴷ ⵚⴰⴱⵉⵕ ⵙ ⵜⴷⴰⵍⴰ ⵏⵜⵜⴰ ⴷ ⵜⵛⵛⴽⴰⵕⵜ ⵏ ⵢⵉⵍⵎ ⵉⴳⴰⵏ ⵜⵉⵏⵏⵉⵖⵜ, ⵉⴳ ⵜⵜ ⵉⵏⵏ ⴷⴷⵓ ⵜⴰⵢⵜ ⵏⵏⵙ, ⵜⴰⵎⵓ ⵎⴽⵍⵍⵉ ⴱⴷⴷⴰ ⵉⵙⵓⴳⴰⵎ ⵉⴱⴰⵍⵓⵍⵏ ⵅⴼ ⵜⵓⵙⵙⵏⴰⴷⵖⴰⵔ ⴷ ⴽⵔⴰ ⵏ ⵜⵏⵜⵜⴰⵍⵉⵏ ⵉⵍⵍⴰ ⴳ ⴽⵓ ⵜⴰⵏⵜⵜⴰⵍⵜ ⵢⴰⵜ ⵜⴼⵔⵜ ⵏⵉⵖ ⵢⴰⵜ ⵜⴽⴰⵕⴹⴰ ⵉⵥⵍⵉⵏ ⵙ ⵢⴰⵏ ⵡⴰⵙⵙⴰⵖ ⵙⴳ ⵡⴰⵙⵙⴰⵖⵏ ⵏ ⵢⵉⴷⵖⴰⵔⵏ ⴳ ⵓⵣⴷⴰⵡ ⵏ ⵜⵙⴳⴳⵉⵡⵉⵏ ⵏ ⵢⵉⵥⵥⵍⵎⴹ ⵏ ⵢⵉⴼⵔⵉⵇⵢⴰ, ⵓⵍⴰ ⵃⵜⵜⴰ ⵜⵉⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ. ⴰⵔ ⵉⵙⵙⵏⵜⵉ ⵓⵙⵍⵎⴰⴷ ⵜⵉⵔⵎⵜ ⵏⵏⵙ ⵏ ⵓⵜⵓⵢ ⵙ ⵢⴰⵏ ⵓⵙⴰⴷⴼ ⴰⵎⴰⵜⵓ ⵉⵥⵍⵉⵏ ⵙ ⴽⵔⴰ ⵏ ⵜⵎⵙⴰⵔⵜ ⵉⵣⴷⵉⵏ ⵙ ⵜⵣⵔⴰⵡⵜ ⵏ ⵜⵓⵙⵙⵏⴰⴷⵖⴰⵔ, ⵉⵙⵡⵓⵔⵉ ⵉⵍⵎⵎⴰ ⴳ ⵜⵉⵣⵉ ⵏⵏⴰ ⴷ ⵉⴷⴷⴰⵏ ⵙ ⵢⴰⵜ ⵜⵡⵉⵍⴰ ⵜⴰⵎⵢⴰⵖⵜ ⵜⴰⵏⵎⵙⴰⵡⴰⵍⵜ ⴰⴽⴷ ⵉⵎⵣⵔⴰⵡⵏ ⵅⴼ ⵜⵙⵏⵙⵉ ⵏ ⴰⵢⵍⵍⵉ ⵉⴼⴽⴰ ⵏ ⵉⵙⴷⴷⵉⵜⵏ ⵏ ⵡⴰⵙⵙⴰⵖⵏ ⵏ ⵓⴷⵖⴰⵔ ⵙⵡⴰ ⵡⵉⴷ ⵉⵜⵜⵓⵙⵙⴰⵏ ⵓⵍⴰ ⵡⵉⴷ ⵉⵜⵜⵓⵎⴹⴰⵍⵏ, ⵙ ⵜⵏⴼⵍ ⵜⵎⵙⵉⵔⴷⵜ ⵙ ⵢⴰⵏ ⵓⵙⴰⵔⵎ ⵖ ⴰⵔ ⵜⵜⵓⴳⵣⵣⴰⵢⵏ ⵢⵉⵙⵎⴰⵡⵏ ⵏ ⵓⴷⵖⴰⵔ ⵉⵜⵜⵓⴼⴽⴰⵏ. ⵎⴽⴰⴷ ⴰⵙ ⴰⵔ ⴷ ⵜⴻⵜⵜⵉⵍⵉ ⵜⵙⵏⵉⵍⵙⵜ ⵙ ⵜⵎⴰⵙⵙⴰⵏⵉⵏ ⵏⵏⵙ ⴰⴽⴽⵯ, ⵢⵉⵍⵉ ⴷ ⵓⵎⵣⵔⵓⵢ ⴷ ⵜⵓⵙⵙⵏⴰⴽⴰⵍ ⴷ ⵜⵎⴰⵙⵙⴰⵏⵜ ⵏ ⵜⴰⵏⵜⴰⵍⴰ ⴷ ⵉⵙⵎⵣⴰⵣⴰⵍⵏ ⵢⴰⴹⵏ…, ⵜⵉⵣⵉ ⵏⵏⴰ ⴷ ⵜⴼⴰⵡ ⵛⴰ ⵏ ⵜⴰⵏⵏⴰⵢⵜ ⵜⴰⵎⴰⵢⵏⵓⵜ ⵏⵉⵖ ⴽⵔⴰ ⵏ ⵜⵎⵔⵏⵓⵜ ⵏⵏⴰ ⵉⴼⴽⴰ ⴽⵔⴰ ⵏ ⵓⵎⵣⵔⴰⵡ ⵉⵣⴷⵉⵏ ⴷ ⵓⵙⵏⵜⵍ, ⴰⵔ ⵜⵜ ⵉⵜⵜⵣⵎⵎⴻⵎ ⵓⴷⵓⴽⵜⵓⵔ ⵃⵎⴰⴷ ⵚⴰⴱⵉⵕ ⴷ ⵓⵍⴳⴳⵓⴷ ⴳ ⵜⴼⵔⵜⵉⵏ ⵉⵕⵥⵎⵏ ⴷ ⵉⴼⵙⵔⵏ ⵙ ⴽⵉⴳⴰⵏ ⵏ ⵜⴰⵡⵉⵜ ⴷ ⵓⵙⵓⴷⵙ ⵖ ⵉⴳⴳⵉ ⵏ ⵏ ⵜⴷⴰⴱⵓⵜ ⵎⵏⵉⴷ ⵏⵏⵙ ⵏⵉⵜⵣⵓⵏ ⴷ ⵎⴽⵍⵍⵉ ⵙ ⵜⵜ ⵉⵏⵏ ⵉⴽⴽⴰ ⴰⵔ ⵜ ⵉⵙⴽⴰⵔ ⵕⵓⵍⴰⵏ ⴱⴰⵕⵜ ⴰⴽⴷ ⵉⵎⵣⵔⴰⵡⵏ ⵏⵏⵙ.

ⵉⵍⵓⵍ ⵓⴷⵓⴽⵜⵓⵔ ⵃⵎⴰⴷ ⵚⴰⴱⵉⵕ ⴰⵙⴳⴳⵯⴰⵙ ⵏ 1952 ⴳ ⵜⵙⴳⴰ ⵏ ⵎⵙⵓⴷⵔⴰ ⵏⵏⴰ ⵢⴰⵥⵏ ⵉ ⵉⵏⵣⴳⴳⴰⵏ, ⵉⵡⴰⵍⴰ ⵢⴰⵜ ⵜⵡⵊⴰ ⴳ ⵜⵙⴳⴰ ⵏ ⵓⵎⵙⵙⵔⴰ ⴳ ⵢⵉⴼⵔⴰⵏ ⵏ ⵡⴰⵟⵍⴰⵚ ⵎⵥⵥⵉⵢⵏ (ⴰⴳⵯⵍⵎⵉⵎ), ⵜⴰⵡⵊⴰ ⵏⵏⴰ ⵢⵓⵎⴰⵏ ⵍⴼⵇⵀⴰ ⴷ ⵉⵎⵓⵙⵏⴰⵡ ⴷ ⵉⴳⵔⵔⴰⵎⵏ. ⵎⴽⵍⵍⵉ ⴰⴽⴽⵯ ⵎⵢⴰⵔⵏⵜ ⵜⴰⵡⵊⵉⵡⵉⵏ ⵜⵉⵙⵓⵙⵉⵢⵉⵏ, ⵢⵓⴷⴼ ⵓⴷⵓⴽⵜⵓ ⵚⴰⴱⵉⵕ ⴳ ⵜⵎⵥⵉ ⵏⵏⵙ ⴰⵎ ⵉⵏⴳⴳⵯⴰ ⵙ ⵜⵎⵣⴳⵉⴷⴰ ⴰⴷ ⵉⵃⵙⵓ ⴰⵡⴰⵍⵏ ⵕⴱⴱⵉ, ⴹⴰⵕⵜ ⵏⵏⵙ ⵉⴽⵛⵎ ⵙ ⵜⵉⵏⵎⵍ ⵍⵎⵓⵡⴰⵃⵃⵉⴷⵉⵏ ⵉⵜⵜⵡⴰⵙⵙⴰⵏⵏ ⴳ ⵉⵏⵣⴳⴳⴰⵏ ⵙ ⵓⵎⵙⴰⴷⴰⵖ ⴷ ⵓⵍⵎⵎⵓⴷ ⴳ ⵜⵉⵏⵎⵍ ⵜⴰⵇⴱⵓⵔⵜ. ⵉⴹⴼⵕ ⵜⵉⵖⵔⵉ ⵏⵏⵙ ⴳ ⵓⵙⴰⴽⴰ ⴰⵎⵏⵣⵓ ⴳ ⵓⵙⵉⵏⴰⵏ ⵏ ⵓⵙⵎⵓⵜⵜⴳ ⵡⴰⵍⵉⵢ ⵍⵄⴰⵀⴷ ⴹⴰⵕⵜ ⵏⵏⵙ ⴰⵙⵉⵏⴰⵏ ⵏ ⵓⵙⵎⴷⵉ ⵢⵓⵙⴼ ⵓⵜⴰⵛⴼⵉⵏ ⵉⵜⵜⵡⴰⵙⵙⴰⵏⵏ ⵖ ⵔⴰⴷ ⵢⴰⵎⵥ ⴰⵙⵍⴽⵉⵏ ⵓⴱⴰⴽⴰⵍⵓⵕⵢⴰ ⴳ ⵜⵣⵓⵏⵉ ⵏ ⵜⵙⴽⵍⴰ ⵜⴰⵙⴱⵍⵢⵓⵏⵉⵜ, ⵍⵍⵉⵖ ⵔⴰⴷ ⵉⴽⵛⵎ ⵙ ⵓⵙⵔⵉⴷ ⵙ ⵜⵙⴷⴰⵡⵉⵜ ⵏ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⴳ ⵕⵕⴱⴰⵟⵉ ⵓⴹⴼⵓⵕ ⵏ ⵜⵖⵔⵉ ⴳ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵙⴱⵍⵢⵓⵏⵉⵢⵉⵏ ⵉⵙⵏⵉⵢ ⴰⵙⴰⴽⴰ ⵏⵏⵙ ⴰⴽⴰⴷⵉⵎⵉ ⵙ ⵜⵓⵔⴰⴳⵜ ⴳ ⵓⵙⴳⴳⵯⴰⵙ ⵏ 1977 ⵉⵙⴽⵔ ⴰⵔⵣⵣⵓ ⵏⵏⵙ ⵅⴼ ‘’ⵜⵓⴳⵓⵔⵉⵡⵉⵏ ⵜⵉⵙⴱⵍⵢⵓⵏⵉⵢⵉⵏ ⴳ ⵜⵛⵍⵃⵉⵜ ⵉⵜⵜⵓⵙⵎⵔⴰⵙⵏ ⴷⴰⵔ ⵉⴱⵃⵔⵉⵢⵏ’’. ⴰⵢⵍⵍⵉ ⵜ ⵢⵓⵊⵊⴰⵏ ⴰⴷ ⵢⵓⴷⴼ ⵜⵉⵏⵎⵍ ⵜⴰⵏⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵜⵓⵥⵍⴰⵢⵜ ⵏ ⵜⵓⵜⵍⴰⵢⵜ ⵜⴰⵙⴱⵍⵢⵓⵏⵉⵜ, ⵉⴹⴼⵕ ⴳ ⵜⵉⵣⵉ ⴰⵏⵏ ⵏⵉⵜ ⵜⵉⵖⵓⵔⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵉⵙⵎⴷ ⵜⵏⵜ ⵙ ⵢⴰⵜ ⵜⵡⵓⵔⵉ ⵏ ⵓⵔⵣⵣⵓ ⵉⵥⵍⵉⵏ ⴰⴷ ⵙⵔⵙ ⵢⴰⵎⵥ ⴰⴷⵉⴱⵍⵓⵎ ⵏ ⵜⵖⵓⵔⵉⵡⵉⵏ ⵜⵉⵎⴷⵔⴰ ⵅⴼ ‘’ⴰⵎⵛⴽⵛⴰⵎ ⴰⵎⵙⵏⵉⵍⵙ ⵏⴳⵔ ⴷⴷⴰⵔⵉⵊⴰ ⴷ ⵜⵙⴱⵍⵢⵓⵏⵉⵜ’’.

ⵉⵙⵡⵓⵔⵉ ⴳ ⵓⵙⴰⴽⴰ ⵏ ⵓⵙⵉⵏⴰⵏ ⵣⵖ ⵓⵙⴳⴳⵯⴰⵙ 1978 ⴰⵎ ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵙⴱⵍⵢⵓⵏⵉⵜ, ⵉⴹⴼⵕ ⴳ ⵜⵉⵣⵉ ⴰⵏⵏ ⵏⵉⵜ ⵜⵉⵖⵓⵔⵉⵡⵉⵏ ⵏⵏⵙ ⵃⵎⴰ ⴰⴷ ⵢⴰⵎⵥ ⴰⴷⵉⴱⵍⵓⵎ ⵏ ⴷⴷⵓⴽⵟⵓⵕⴰ ⴳ ⵕⵕⴱⴰⵟ ⵙ ⵢⴰⵏ ⵓⵔⵣⵣⵓ ⵅⴼ: ‘’ ⵜⴰⵙⵇⵇⵓⵍⵜ ⵏ ⵓⵙⵅⵉⵜⵔ ⴳ ⵜⵙⴽⵍⴰ ⵏ ⵓⵣⵎⵣ ⵏ ⵡⵓⵔⵖ ⴰⵙⴱⵍⵢⵓⵏⵉ’’ ⴰⵢⵍⵍⵉⵖ ⵙⵓⵍ ⵢⵓⵎⵥ ⴷⴷⵓⴽⵟⵓⵕⴰ ⴳ ⵓⵙⴳⴳⵯⴰⵙ 1989 ⵙ ⵢⴰⵜ ⵜⵎⴽⵔⵉⵙⵜ ⵉⵥⵍⵉⵏ ⵙ ⵜⵣⵔⴰⵡⵜ ⵜⴰⵙⵜⵕⴰⵜⵉⵊⵉⵢⵜ ⵏ ⵢⵉⵏⴰⵡ ⵏ ⵜⵙⴽⵍⴰ ⴳ ⵓⵣⵎⵣ ⵏ ⵡⵓⵔⵖ ⴰⵙⴱⵍⵢⵓⵏⵉ’’.

ⵉⵙⵡⵓⵔⵉ ⵓⴷⵓⴽⵜⵓⵔ ⴰⵎ ⴰⵙⵍⵎⴰⴷ ⴰⵎⵙⴷⴰⵡ ⴰⵎⵥⵍⴰⵢ ⴳ ⵜⵙⴽⵍⴰ ⴷ ⵜⵓⵜⵍⴰⵢⵜ ⵜⴰⵙⴱⵍⵢⵓⵏⵉⵜ ⴷ ⵓⵙⵓⵖⵍ, ⵉⴳ ⴰⵎⵔⵣⵓ ⴰⵎⵙⴰⵎⵓ ⵉⵙⵙⵏⵏ ⵜⵓⵜⵍⴰⵢⵉⵏ: ⵜⴰⵎⴰⵣⵉⵖⵜ, ⵜⴰⵄⵕⴰⴱⵜ, ⵜⴰⴼⵕⴰⵏⵙⵉⵙⵜ, ⴷ ⵜⵙⴱⵍⵢⵓⵏⵉⵜ ⴷ ⵜⴱⵓⵔⵜⵓⵖⴰⵍⵉⵜ. ⵉⵍⵍⴰⵍ ⵓⴷⵓⴽⵜⵓⵔ ⵚⴰⴱⵉⵕ ⵜⴰⵡⵓⵔⵉ ⵜⴰⵎⵙⵙⵓⴳⵓⵔⵜ ⴳ ⵜⵖⵉⵡⴰⵏⵜ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⵜⴰⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⵓⴳⴰⴷⵉⵔ ⴰⵎ ⴰⵎⴰⵔⵉ ⵏ ⵓⵏⴱⴷⴰⴷ ⵉ ⵢⴰⵜ ⵜⵉⵣⵉ ⵢⵓⵜⵉⵏ 16 ⵏ ⵓⵙⴳⴳⵯⴰⵙ, ⵎⴽⵍⵍⵉ ⵉⵡⴰⵍⴰ ⵜⴰⵎⴰⵙⴰⵢⵜ ⵏ ⵜⵏⴱⴷⴰⴷⵜ ⵏ ⵜⵖⵉⵡⴰⵏⵜ ⵉ ⵙⵉⵏ ⵉⵣⵎⴰⵣ ⵉⵙⵎⵉⴳⴰⵍⵏ ⵙⴳ 2005 ⴰⵔ 2014.

ⵢⵓⵔⴰ ⵓⴷⵓⴽⵜⵓⵔ ⵚⴰⴱⵉⵕ ⴳ ⵓⵙⴰⴽⴰ ⵏⵏⵙ ⴰⴽⴰⴷⵉⵎⵉ ⵜⵓⴳⵜⵜ ⵏ ⵉⵢⴰⴼⵓⵜⵏ ⵉⵔⵣⵣⵓⵜⵏ ⵉⴽⴰⴷⵉⵎⵉⵢⵏ ⵉⴳⴰⵏ ⵡⴰⵥ ⴰⴷ ⴳⵉⵙⵏ ⵏⵙⵙⴽⵜⵉ:

1- ⴰⵎⵣⵔⵓⵢ ⵏ ⵙⴰⵏⵜⴰⴽⵔⵓⵣ ⴰⴳⴰⴷⵉⵔ, ⴰⴹⵕⵉⵚ ⴰⴱⵔⴷⵇⵇⵉⵙ ⵙⴳ ⵜⴰⵙⵓⵜ ⵜⵉⵙ 16 ⵉ ⵓⵙⵔⴷⴰⵙ ⵓⵔ ⵉⵜⵜⵡⴰⵢⵙⵙⴰⵏⵏ.
2- ⴰⵙⵉⴼⵔⵡ ⴳ ⵢⵉⴳⵏⵏⴰ ⵏ ⵍⵎⵖⵔⵉⴱ, ⴰⵙⵓⵖⵍ ⵣⵖ ⵜⵙⴱⵍⵢⵓⵏⵉⵜ ⴽⵓⵜⵛⴰ ⵍⵓⴱⵉⵜ ⵙⴰⵔⵙⵓⵡⴰ.
3- ⴰⵎⴰⵡⴰⵍ ⴰⵙⴱⵍⵢⵓⵏⵉ – ⴰⵎⴰⵣⵉⵖ, ⴰⵎⴰⵣⵉⵖ – ⴰⵙⴱⵍⵢⵓⵏⵉ.
4- ⵜⴰⵏⵢⵓⴷⴷⵓⵜ ⵏ ⵙⵏⴰⵜ ⵜⵎⵙⵇⴰⴷⵉⵏ ⵜⵉⵙⴱⵍⵢⵓⵏⵉⵜⵉⵏ ⵖⵔ ⵎⵕⵕⴰⴽⵛ, ⴰⵙⵓⵖⵍ ⵣⵖ ⵜⵙⴱⵍⵢⵓⵏⵉⵜ.
5- ⵜⵉⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ ⴷⴰⵜ ⵏ ⵓⵎⵣⵔⵓⵢ ⴷ ⵢⵉⵥⵥⵍⵎⴹ ⵏ ⵢⵉⴼⵔⵉⵇⵢⴰ, ⴰⵎⴷⵢⴰ ⵏ ⵍⵎⵖⵔⵉⴱ.
6- ⵜⵉⵣⵔⴰⵡⵉⵏ ⵜⵉⵏⵣⵔⵓⴼⵉⵏ, ⵏ ⵅⵓⵍⵢⵓ ⴽⴰⵕⵓ ⴱⴰⵕⵓⵅⴰ, ⴰⵙⵓⵖⵍ ⵣⵖ ⵜⵙⴱⵍⵢⵓⵏⵉⵜ.
7- ⵓⵏⴰ ⵏ ⵜⵏⵣⵔⵓⴼⵜ, ⵏ ⴱⵉⴷⵔⵓ ⴳⵓⵎⵉⵣ ⵎⵓⵕⵉⵏⵓ, ⴰⵙⵓⵖⵍ ⵣⵖ ⵜⵙⴱⵍⵢⵓⵏⵉⵜ.

ⵉⵔⵏⵓ ⵉ ⵉⵙⴷⴷⵉⵜⵏ ⴰⴷ ⵏ ⵉⴷⵍⵉⵙⵏ ⵖⵓⵔ ⵉⵙⵏⵜⴰⵍ ⵉⴳⴰⵏ ⵡⴰⵥ ⵜⵉⵎⴰⴹ ⵏ ⵜⵣⵔⴰⵡⵉⵏ ⴷ ⵉⵎⴰⴳⵔⴰⴷⵏ ⵉⵎⴰⵙⵙⴰⵏⵏ ⵏⵏⵉ ⵢⵓⵔⴰ ⵓⴷⵓⴽⵜⵓⵔ ⵚⴰⴱⵉⵕ ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⴼⵕⴰⵏⵙⵉⵙⵜ ⴷ ⵜⵙⴱⵍⵢⵓⵏⵉⵜ ⴷ ⵜⴱⵔⴷⵇⵉⵣⵜ ⵖ ⴳⵉⵙ ⵍⵍⴰⵏⵜ ⵜⵎⴷⵢⴰⵣⵉⵏ ⴼⵓⵍⴽⵉⵏⵉⵏ (ⴰⵙⵍⵎⴰⴷ ⵚⴰⴱⵉⵕ ⵉⴳⴰ ⴰⵡⴷ ⴰⵎⴷⵢⴰⵣ) ⴰⵔ ⵏⵏ ⵏⵜⵜⴰⴼⵉ ⵎⴰⵢⴰⵏⵏ ⴰⴽⴽⵯ ⵉⵜⵜⵓⴼⵙⴰⵔ ⴳ ⵜⵡⵓⵔⵉⵡⵉⵏ ⵏ ⵉⵏⵎⵓⵇⵇⴰⵔⵏ ⴷ ⵜⵉⵏⴰⵡⵉⵏ ⵏⵏⴰ ⵖ ⵓⴷⵔⴰ ⵓⵍⴰ ⴳ ⵜⵙⵖⵓⵏⵉⵏ ⵉⵜⵜⵓⵣⵣⵔⴰⵢⵏ ⵏⵏⴰ ⴷ ⵙⵙⵓⴼⵓⵖⵏⵜ ⵜⵎⵔⵙⴰⴽ ⵜⵉⵎⵙⴷⴰⵡⵉⵎ ⴳ ⵓⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⴰⴷ ⴳⵉⵙⵏⵜ ⵏⵙⵙⴽⵯⵜⵉ:

– ⵜⴰⵙⵖⵓⵏⵜ « ⵜⵉⵣⵔⴰⵡⵉⵏ » ⵅⴼ ⵏⵉⵜ ⵉⴱⴷⴷ ⴳ ⵎⴰⴷ ⵉⵣⵔⵉⵏ, ⴷ ⵜⵙⵖⵓⵏⵜ « ⵜⵉⵖⵓⵔⵉⵡⵉⵏ » ⵏⵏⴰ ⵅⴼ ⵉⴱⴷⴷ ⵏⵜⵜⴰ ⴷ ⵓⵎⴷⴷⴰⴽⴽⵯⵍ ⵏⵏⵙ ⵎⵓⵃⵎⵎⴰⴷ ⵍⵅⵟⵟⴰⴱⵉ ⴷ ⵉⴷⴰⴱⵓⵜⵏ ⴰⴽⴽⵯ ⵉⵏⵖⵎⴰⵙⵏ ⴷ ⵉⴼⴼⵖⵏ ⴳ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵙⴱⵍⵢⵓⵏⵉⵢⵉⵏ ⴳ ⵓⴳⴰⴷⵉⵔ.

ⴰⴷⵓⴽⵜⵓⵔ ⵚⴰⴱⵉⵕ ⵉⵣⵡⴰⵔ ⵉⴽⴽⴰ ⵜⵜ ⵉⵏⵏ ⴷ ⴰⵏⵎⵀⴰⵍ ⵏ ⵓⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⵏ ⵓⵎⵣⴳⵓⵏ ⴰⵎⵙⴷⴰⵡ ⴳ ⵓⴳⴰⴷⵉⵔ، ⴰⴳⵎⴰⵎ ⵉⵎⵕⵡⵉ ⴳ ⵓⵙⵉⵔⴰ ⵏ ⵜⵎⵙⵎⵓⵏⵜ ⵙⵓⵙ ⵎⴰⵙⵙⴰ ⵉ ⵜⴳⵎⵉ ⵜⴰⴷⵍⵙⴰⵏⵜ, ⴷ ⵓⵏⵙⵙⵉⵏⵅⴼ ⵏ ⵓⵙⴳⵔⴰⵡ ⴰⵏⴰⵎⵓⵔ ⵉ ⵓⵙⵡⴰⵍⴰ ⴰⵙⴳⵎⴰⵏ. ⵙ ⵓⵙⵏⵉⵢ ⵏ ⵓⵙⴰⴽⴰ ⵏⵏⵙ ⴰⵣⵣⵓⵍⴰⵏ ⴷ ⵓⵎⴰⵙⵙⴰⵏ ⴰⴽⴰⴷⵉⵎⵉ ⴰⵏⴰⵎⵓⵔ ⵢⵓⵎⵥ ⵓⴷⵓⴽⵜⵓⵔ ⵃⵎⴰⴷ ⵚⴰⴱⵉⵕ ⵜⴰⵎⴰⴷⴰⵢⵜ ⵏ ⵓⴷⴰⴱⵓ ⵜⴰⴼⵙⵏⴰ ⵏ ⵓⵎⵏⴰⵢ ⴰⵙⴳⴳⵯⴰⵙ 2011, ⵓⵙⵓⵍ ⵉⴹⴼⵕ ⴰⴱⵔⵉⴷ ⵏⵏⵙ ⴰⵎⴰⵙⵙⴰⵏ ⴰⴽⴰⴷⵉⵎⵉⵖ ⵖ ⴽⵉⴳⴰⵏ ⵏ ⵉⵙⵡⵉⵔⵏ ⴰⴳⵏⵙ ⵏ ⵍⵎⵖⵔⵉⴱ ⵓⵍⴰ ⴱⵕⵕⴰ ⵏⵏⵙ.

ⴰⵙⵓⵊⴷ: ⵄⴰⴱⴷⵍⵡⴰⵃⵉⴷ ⴱⵓⵜⴱⴰⵖⴰ