ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙ ⵜⵎⵍⴷⴰ ⵏ ⵓⴽⵯⵜⵜⵓⵢ ⵡⵉⵙ 22 ⵏ ⵜⵍⴰⵍⵉⵜ ⵏ ⵓⵖⵎⵉⵙ “ⴰⵎⴰⴹⴰⵍ ⴰⵎⴰⵣⵉⵖ” ⵍⵍⵉ ⵉⵍⵍⴰⵏ ⵙⴳ 30 ⵎⴰⵢⵢⵓ 2001, ⵔⴰⴷ ⵉⵙⵏⵎⴰⵍⴰ ⵓⵖⵎⵉⵙ ⵏ “ⵓⵎⴰⴹⴰⵍ ⴰⵎⴰⵣⵉⵖ” ⴷ “ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ” ⵙ ⵜⵡⵉⵣⵉ ⴷ ⵜⵎⵙⵎⵓⵏⵜ ⵏ ⵜⵙⵍⵎⴰⴷⵉⵏ ⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ ⵏ ⴼⴰⵙ-ⵎⴽⵏⴰⵙ, ⴷ ⵜⵎⵙⵎⵓⵏⵜ “ⴰⵢⴰⴷⵉⵏⴰ” ⴳ ⵅⵏⵉⴼⵕⴰ ⵙ ⵓⵙⵏⴰⵍ ⵏ “ⵜⵎⵔⵙⵍⵜ ⵜⴰⵍⵉⵎⴰⵏⵉⵜ ⴼⵔⵉⴷⵉⵔⵉⵛ ⵏⵢⵓⵎⴰⵏ ⵉ ⵜⵍⴻⵍⵍⵉ”, ⵜⵓⵏⵖⵉⵍⵜ ⵜⵉⵙ ⵙⵏⴰⵜ ⵏ ⵓⵏⵎⵓⵇⵇⴰⵔ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ, ⴷⴷⵓ ⵜⵎⴰⵜⴰⵔⵜ: « ⴰⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴳⵎⵉ ⵜⴰⵏⴼⴳⴰⵏⵜ : ⵎⴰⵏ ⵜⴰⵣⴷⴰⵢⵜ ? »
ⵜⵏⵏⴰ ⵜⵙⵇⵇⵉⵎⵜ ⵏ ⵓⵙⵏⵎⴰⵍⴰ ⵎⴰⵙ ⵜⵙⵙⵏⵜⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵙⵍⵎⴷ ⴰⵎⵏⵣⵓ ⵙⴳ ⵛⵓⵜⴰⵏⴱⵉⵔ 2003, ⴷⴼⴼⵉⵔ ⵏ ⵙⵉⵏ ⵉⵙⴳⴳⵯⴰⵙⵏ ⴼ ⵉⵏⴰⵡ ⴰⴳⵍⴷⴰⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⴰⵊⴷⵉⵔ ⴳ ⵅⵏⵉⴼⵔⴰ, ⴷ ⵉⵖⴰⵡⴰⵙⵏ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉ ⵓⵙⵎⴰⵜⴰ ⵏⵏⵙ ⴳ ⵜⵉⵏⵎⴰⵍ ⵜⵉⵎⵣⵡⵓⵔⴰ ⴳ ⵓⵙⴳⴳⵯⴰⵙ ⵏ 2008, ⵎⴰⵛⵛ ⴰⵡⵜⵜⴰⵙ ⴰⴷ ⵓⵔ ⵉⵜⵜⵓⵙⴽⴰⵔ ⵎⵇⵇⴰⵔ ⵉⵍⵍⴰ ⵓⵙⵉⵙⵙⵏ ⴰⴷⵙⵜⴰⵔ ⵙ ⵜⵎⴰⵣⵉⵖⵜ ⴳ ⵢⵓⵍⵢⵓⵣ 2011.
ⵜⵉⵏⵉ ⵜⵙⵇⵇⵉⵎⵜ ⵏ ⵓⵙⵏⵎⴰⵍⴰ ⵎⵇⵇⴰⵔ ⵉⵍⵍⴰ ⵓⵙⵍⴳⵏ ⴰⵎⴰⴷⴷⴰⵙ 23.16 ⴼ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷ ⵓⵙⵍⴳⵏ ⴰⵙⴰⵜⵉ 17.51 ⴼ ⵓⵎⵓⴽⵏ ⵏ ⵢⵉⴳⵔ ⵏ ⵓⵙⵙⵍⵎⴷ, ⵎⵇⵇⴰⵔ ⵍⵍⴰⵏⵜ ⵜⵖⵜⴰⵙⵉⵏⵉⵏ ⴷ ⵉⵡⴰⵍⵉⵡⵉⵏ ⵏ ⴽⵉⴳⴰⵏ ⵏ ⵉⵎⴰⵡⵙⴰⵙⵏ ⴳ ⴽⵉⴳⴰⵏ ⵏ ⵜⵏⴱⴰⴹⵉⵏ, ⵎⴰⵛⵛ ⵜⵍⵍⴰ ⵓⴽⴰⵏ ⵙⵓⵍ ⵜⵎⵓⴽⵔⵉⵙⵜ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉⵖ ⵓⵔ ⵏⵥⴹⴰⵕ ⴰⴷ ⵏⵣⵔⵉ ⵓⵟⵟⵓⵏ ⵏ ⵎⵍⵢⵓⵏ ⴷ ⵓⵣⴳⵏ ⵙⴳ ⵍⵍⵓⵥ ⵉⴷ ⵍⵎⵏⴰⵢⵏ ⴷ ⵓⵣⴳⵏ ⵏ ⵓⵏⵍⵎⴰⴷ ⵍⵍⵉ ⵍⵍⴰⵏⵉⵏ ⴳ ⵜⴼⵔⴽⴰ ⵜⴰⵎⵣⵡⴰⵔⵓⵜ ⵏ ⵓⵙⵙⵍⵎⴷ, ⵖⵎⴽ ⵍⵍⵉ ⵉⵖⴰⵎⴰ ⵓⵟⵟⵓⵏ ⵏ ⵉⵙⵍⵎⴰⴷⵏ ⵉⴷⵔⵓⵙ ⴱⴰⵀⵔⴰ ⵍⵍⵉ ⵓⵔ ⵉⵣⵔⵉ 400 ⵏ ⵓⵙⵍⵎⴰⴷ ⴳ ⵓⵙⴳⴳⵯⴰⵙ !
ⴳ ⵜⵓⵏⵖⵉⵍⵜ ⵏⵏⵙ ⵜⵉⵙ ⵙⵏⴰⵜ, ⴳ ⵓⵏⵎⵓⵇⵇⴰⵔ ⴰⵏⴰⵎⵓⵔ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ, ⵔⴰⴷ ⵃⴰⴹⵕⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⵣⵉⵖⵜ ⴷ ⵉⵎⵙⴽⴰⵔⵏ ⵉⵣⵔⴼⴰⵏⵏ ⴷ ⵉⵖⵔⵎⴰⵏⵏ ⵙⴳ ⵎⴰⵕⵕⴰ ⵜⵉⵙⴳⴳⵉⵡⵉⵏ ⵏ ⵍⵎⵖⵔⵉⴱ, ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⴼ ⵜⵎⵓⴽⵔⵉⵙⵉⵏ ⴷ ⵜⴱⴱⴰⵢⴹⴰⵕⵉⵏ ⵜⵉⵎⵔⵙⵍⴰⵏⵉⵏ ⴷⴰⵜ ⵏ ⵓⵙⵎⵖⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴳ ⵓⵣⵎⵣ ⴳ ⵉⵍⵍⴰ ⵓⵙⵍⴳⵏ ⴰⵎⴰⴷⴷⴰⵙ ⵉⵥⵍⵉⵏ ⵙ ⵓⵙⵎⵀⵍ ⵏ ⵓⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵣⵣⴳⵉⵔ ⵏⵏⵙ, ⵖⵎⴽ ⴰⵏⵏ ⵓⵍⴰ ⵜⵉⵎⵓⴽⵔⵉⵙⵉⵏ ⵣⴷⵉⵏⵉⵏ ⵙ ⵜⵙⵏⵙⵉ ⵏ ⵓⵙⵍⴳⵏ ⵉⵣⵍⵉⵏ ⵓⵙⵎⵀⵍ ⵏ ⵓⴼⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵔⴰⴷ ⵢⵉⵍⵉ ⵓⵍⴰ ⵓⵎⴹⴰⴽⴰⵕ ⴼ ⵜⵡⵡⵓⵔⵉⵡⵉⵏ ⵍⵍⵉ ⵉⴷ ⵇⵇⴰⵏ ⴰⴷ ⵜⵜⵓⵙⴽⵉⵔⵏⵜ ⵃⵎⴰ ⴰⴷ ⵢⵉⵍⵉ ⵓⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖⵎⴽ ⴰⵏⵏ ⴷ ⵜⵎⵓⴽⵔⵉⵙⵜ ⵏ ⵉⵙⵓⴳⴰⵎ ⵉⵏⴼⴳⴰⵏ ⴷ ⵜⵎⵙⴰⵙⵜⵍⵜ, ⵖⵎⴽ ⴰⵏⵏ ⴷ ⵓⵙⵉⵜⵜⵉ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵙⵍⵎⴷ ⴰⵎⵏⵣⵓ ⴷ ⵜⴼⵔⴽⴰ ⵜⴰⵎⵣⵡⴰⵔⵓⵜ ⴷ ⵜⵉⵙ ⵙⵏⴰⵜ ⴳ ⵜⴽⵕⴹⴰ ⵏ ⵓⴱⵔⵉⴷ 2022-2026 ⵍⵍⵉ ⴷ ⵢⵉⵡⵉ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ.
ⵙⴳ ⵉⵡⵜⵜⴰⵙ ⵏ ⵓⵏⵎⵓⵇⵇⴰⵔ ⴰⴷ ⴰⵏⴰⵎⵓⵔ, ⴰⵙⴼⵔⴽ ⵏ ⵜⵏⴱⴰⴹⵉⵏ ⵜⵉⵙⴳⵎⴰⵏⵉⵏ ⴳ ⵍⵎⵖⵔⵉⴱ ⵙ ⵡⴰⵜⵉⴳ ⵏ ⵓⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⴳⴰⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵜⴳ ⵓⵍⴰ ⵉⵎⵉⵙⵙⵉⵕⵡⴰⵏ ⵏ ⵓⴼⵔⴰⴳ ⵏ ⵜⵉⵏⵎⵍ ⵜⴰⵎⵖⵔⵉⴱⵉⵜ, ⵖⵎⴽ ⴰⵏⵏ ⴷ ⵓⵔⵣⵣⵓ ⵏ ⵉⵎⴰⵙⵙⵏ ⴷ ⵜⴱⵔⵉⴷⵉⵏ ⵏ ⵓⵏⵄⴰⵕ ⴷⴰⵜ ⵏ ⵜⵏⴱⴰⴹⵟ ⵜⴰⵎⵖⵔⵉⴱⵉⵜ ⵃⵎⴰ ⴰⴷ ⵜⵔⵎⵙ ⵎⴰⵙ ⵉⴳⴰ ⵓⵙⵏⴼⴰⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵏ ⵓⵙⵏⴼⴰⵔ ⴰⵖⴰⵡⴰⵍ ⴷ ⵜⵎⵣⵡⴰⵔⵜ ⵉ ⵓⵙⵖⵓⴷⵓ ⵏ ⵜⵉⵏⵎⵍ ⵜⴰⴳⴷⵓⴷⴰⵏⵜ.
ⵔⴰⴷ ⵎⴹⴰⴽⴰⵕⵏ ⵉⵎⴷⵔⴰⵡⵏ ⵓⵍⴰ ⴼ ⵓⵣⵣⵔⴰⵢ ⵏ ⵜⵓⵎⴰⵢⵜ ⵏ ⵉⴷⵍⵉⵙⵏ ⴷ ⵉⵖⴰⵡⴰⵙⵏ ⵉⵏⵎⵍⴰⵏⵏ ⴳ ⵎⴰⴷ ⵉⵥⵍⵉⵏ ⵙ ⵡⴰⵍⴰⵙ ⵏ ⵜⵉⵔⵔⴰ ⵏ ⵓⵎⵣⵔⴰⵓⵢ ⵏ ⵍⵎⵖⵔⵉⴱ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵡⴰⵜⵉⴳ ⵏ ⵓⵍⵜⴰⵖ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵎⵓⵏ ⴰⵖⵔⵎⴰⵏ ⴷ ⵓⵎⵣⴰⵖ ⵏ ⵡⴰⵜⵉⴳⵏ ⵏ ⵜⵎⴰⵣⵉⵖⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ.
ⴰⵙⵓⵖⵍ: ⵕⴰⵛⵉⴷ ⵏⴰⵊⵉⴱ
