ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵏⵎⴰⵍⴰ ⵓⵎⴰⵡⵙⴰⵙ ⵏ ⵜⴳⴰⵢⴽⴰ (ⵜⴼⵍⵍⴰⵃⵜ) ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵎⵓⵃⵎⵎⴰⴷ ⵚⴰⴷⵉⵇⵉ, ⵉⴹⴳⴰⵎ ⵏ ⵓⵙⵉⵎⵡⴰⵙ ⴳ ⵍⵉⴱⵉⵔⵢⴰ, ⵉⵏⵎⵓⵇⵇⴰⵔⵏ ⵉⵙⵉⵏⵔⴰⵏⵏ ⴷ ⵜⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⵙⴳⵎⵉⵍⵜ (Aquaculture) ⴳ ⵍⵉⴱⵉⵔⵢⴰ, ⵉⵎⴰ ⵎⵉⵜⵉⵀ ⴳⵍⴰⵙⴽⵓ, ⴷ ⵜⵎⴰⵡⵙⴰⵙⵜ ⵏ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴷⴰⵎⵙⴰ ⵜⴰⵢⵍⴰⵏⵜ ⴳ ⵜⴳⴷⵓⴷⴰⵏⵜ ⵏ ⴳⵉⵏⵢⴰ, ⵛⴰⵕⵍⵓⵜ ⴷⴰⴼⵉ, ⴷ ⵜⵎⴰⵡⵙⴰⵙⵜ ⵏ ⵡⴰⴳⵔⴰ ⴰⵏⵎⵓⴷⴰⵔ ⴷ ⵡⴰⵢⵍⴰⵏ ⴳ ⵍⴽⵓⵜ ⴷⵉⴼⵡⴰⵕ, ⵙⵉⴷⵉ ⵜⵉⵎⵓⴽⵓ ⵜⵓⵕⵉ, ⵙⵙⵓⵜⵍⵏ ⵉ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴷⵎⵙⴰ ⵜⴰⵥⵕⵡⴰⵍⵜ.
ⵉⴱⴷⵔ ⵓⴷⵉⵡⴹ ⵏ ⵜⵎⴰⵡⴰⵙⵜ ⵏ ⵜⴳⴰⵢⴽⴰ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴳⴰⵏⴰⵏⵉⵏ, ⵎⴰⵙ ⴷ ⵉⵏⵎⵓⵇⵇⴰⵔⵏ ⴰⴷ, ⵉⵏⵏⴰ ⵉⵜⵜⵓⵏⵎⴰⵍⴰⵏ ⴳ ⵜⵎⵔⴰ ⵏ ⵓⵏⵏⵓⵕⵥⵎ ⵏ ⵓⵎⵣⵉⵣⵣⵍ ⴰⵎⴰⵙⵙⴰⵏ ⵏⵏⴰ ⵉⵙⵙⵓⴳⵓⵔ ⵓⵖⵔⵔⴰⴱⵓ ⵏ ⵓⵔⵣⵣⵓ ⴰⵎⵖⵔⵉⴱⵉ ⵃⴰⵙⴰⵏ ⵍⵎⵕⵕⴰⴽⵛⵉ ⵉⴹⴼⵕⵏ ⵉ ⵓⵙⵉⵏⴰⴳ ⴰⵏⴰⵎⵓⵔ ⵏ ⵓⵔⵣⵣⵓ ⴳ ⵜⴳⵎⵔⵜ ⵜⴰⵢⵍⴰⵏⵜ, ⴳ ⵍⵉⴱⵉⵔⵢⴰ, ⴳ 26 ⵉⵏⵏⴰⵢⵔ 2024, ⵉⵙⵉⴽⵍ ⵅⴼ ⵜⵙⴳⵉⵡⵉⵏ ⵜⵉⵏⴼⵔⴰⵔⵉⵏ ⵏ ⵓⵎⵢⴰⵡⴰⵙ ⵉⴼⴼⵓⵙ – ⵉⴼⴼⵓⵙ ⴷ ⵓⵙⴽⴽⵉ ⵏ ⵜⵉⴼⴰⵡⵜ ⵅⴼ ⵉⵔⵉⵎ ⵄⵎⵓⵔⵙⵏ ⵏ ⵍⵎⵖⵔⵉⴱ ⴳ ⵜⵏⴽⵔⴰ ⵙ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ.
ⵉⵙⵙⵓⵎⵏ ⵓⵖⴱⴰⵍⵓ ⴰⴷ ⵏⵉⵜ, ⵎⴰⵙ ⴷ ⵜⴰⴷⵉⵏⴰⵎⵉⵜ ⴰⴷ ⵜⵙⵙⵣⵎⵔ ⵙⴳ ⵓⵙⵙⴳⵎⴹ ⵏ ⵓⵙⴷⴷⵉ ⴰⵎⵣⵡⴰⵔⵓ ⵏ ⵜⵙⵓⵎⴰⵔ ⵏⵏⴰ ⵢⵓⵎⴰⵏ ⵜⵉⵎⴳⴳⵉⵢⵉⵏ ⵉⵏⵎⴰⵍⴰⵏ ⴳ ⵢⵉⴳⵔⴰⵏ ⵉⴷⵙⵍⴰⵏⵏ ⵣⵓⵏ ⴷ ⴰⵙⵎⵓⵜⵜⴳ ⴰⵢⵍⴰⵏ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ.
ⵉⵔⵏⵓ ⵎⴰⵙ ⴷ ⵉⵎⴹⴰⴽⴰⵕⵏ ⴰⴷ ⵙⵎⴽⵍⵏ ⵓⵍⴰ, ⵜⵉⵙⵏⵜⴰⵢⵉⵏ ⵣⵓⵏ ⴷ ⴰⵙⵏⵎⴰⵍⴰ ⵏ ⵉⵔⵣⴰⴼⵏ ⵏ ⵜⵖⵓⵔⵉ ⵏ ⵉⵎⴰⵙⴰⵢⵏ ⵉⵎⵇⵇⵔⴰⵏⵏ ⵉⵜⵜⵓⵙⵎⴰⴳⴰⵍⵏ ⵙ ⵜⴳⵎⵔⵜ ⵜⴰⵢⵍⴰⵏⵜ, ⴷ ⵜⵙⴳⵎⵉⵍⵜ, ⴷ ⵓⵙⴷⵓⵙ ⵏ ⵜⵓⵛⵛⵕⴽⴰ ⵉⵥⵍⵉⵏ ⵙⴳ ⵓⵙⵏⴼⵍ ⵏ ⵉⵔⵣⴰⴼⵏ ⴳⵔ ⵉⵎⵙⴽⴰⵔⵏ ⵉⴷⵎⵙⴰⵏⵏ ⴳ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ.
ⵙ ⵓⵎⵙⴰⴷⴰⵖ ⴷ ⵓⵢⴰ, ⵉⵜⵜⵓⵙⴽⴰⵔ ⵓⵏⵏⵓⵕⵥⵎ ⵏ ⵓⵙⵡⵉⵏⴳⵎ ⵉⴷⵓⵙⵏ ⵅⴼ ⵓⵙⵓⵖⵏ ⵏ ⵓⵙⵏⵎⴰⵍⴰ ⵏ ⵜⵙⵓⵜⵍⵉⵏ ⵏ ⵜⵙⵇⵇⵉⵎⵉⵏ ⵙ ⵓⵡⵜⵜⴰⵣ ⵏ ⵜⵉⴽⴽⵉ ⵏ ⵓⵏⵜⵜⴰⵢ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⴳⵔ ⵜⵎⵉⵣⴰⵔ ⴰⴷ, ⵔⴰⴷ ⵜⴻⵜⵜⵓⵙⴽⴰⵔ ⵜⴹⴼⵕⵉ ⵏ ⵜⵙⵓⵜⴰⵍ ⴰⴷ, ⵍⵍⵉⵖ ⴳⴰⵏⵜ ⴰⵏⵙⵎⴰⵙⵙⵓ ⴰⴷⵙⵍⴰⵏ ⵏ ⵓⵙⵙⴷⵔ ⵏ ⵓⵎⵢⴰⵡⴰⵙ ⵉ ⵓⴹⴰⴽⴰⵍ ⵏ ⵓⵣⵣⴳⵉⵔ ⵉⵏⵎⴰⵍⴰⵏ ⴷ ⵉⵕⵡⴰⵏ ⵅⴼ ⵉⵍⵍⴰ ⵓⵎⵙⴰⵙⴰ.
ⵢⵉⵡⵉ ⴷ ⵓⵙⵉⵡⴹ ⵅⴼ ⵎⴰⵙⵙ ⵚⴰⴷⵉⵇⵉ ⴰⵙⴷⴷⵉⴷ ⵏⵏⵙ ⵎⴰⵙ ⴷ ⴰⵙⵏⵎⴰⵍⴰ ⵏ ⵡⴰⵏⴰⵡ ⴰⴷ ⵏ ⵉⵏⵎⵓⵇⵇⴰⵔⵏ ⵉⵙⵉⵏⵔⴰⵏⵏ ⴷⴰ ⵎⵎⴰⵍⵏ ⵜⴰⵎⵔⵉⵙⵜ ⵉⴷⵓⵙⵏ ⵏ ⵍⵎⵖⵔⵉⴱ ⵎⵏⵉⴷ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵜ ⴷ ⵜⵉⵔⵉⵜ ⵏⵏⵙ ⴳ ⵓⵙⵙⵕⵚⵓ ⵏ ⵓⵎⵢⴰⵡⴰⵙ ⵉⴼⴼⵓⵙ – ⵉⴼⴼⵓⵙ ⴰⵙⵓⵍⴰⵏ, ⴰⵢⵍⵍⵉ ⵔⴰⴷ ⵢⴰⵊⵊ ⴰⴷ ⵜⴻⵜⵜⵓⴼⴽⴰ ⵜⴷⵉⵏⴰⵎⵉⵜ ⵏ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ, ⵉⵜⵜⵢⴰⵙⴰⵢ ⵙ ⵜⴰⵏⵏⴰⵢⵜ ⵉⵎⵙⴰⵔⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵏ ⵢⵉⴳⵔ ⴷ ⵓⴼⵔⴰⴳ ⵏ ⵡⴰⴳⵍⴰ ⴰⵢⵍⴰⵏ ⴰⵎⴰⴷⴷⵓⵔ ⴷ ⵓⴼⵔⴰⴳ ⵏ ⵜⵡⵏⵏⴰⴹⵜ ⵜⴰⵢⵍⴰⵏⵜ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
