ⵉⵍⵜⵕⴰⵚ ⵉⵎⴰⵣⵉⵖⵏ: ⵜⴳⵉⵜ ⴰⵎⵖⵔⵉⴱⵉ, ⵀⵉⵢⵢⴰ ⵜⴳⵉⵜ ⴰⵎⴰⵣⵉⵖ

ⵉⵏⵏⴰ ⵓⴳⴷⵍ ⵏ ⵉⵍⵜⵕⴰⵚ ⵉⵎⴰⵣⵉⵖⵏ ⵉⵍⵍⴰⵏ ⴷ ⵜⵔⴰⴱⴱⵓⵜ ⵏ ⵃⴰⵙⴰⵏⵉⵢⵢⴰⵜ ⴰⴳⴰⴷⵉⵔ, ⴳ ⵢⴰⵏ ⵓⵙⵉⵙⴼⵉⵡ ⵍⵍⵉ ⵉⵣⵓⵣⵣⵔ ⴳ ⵜⴼⵔⵜ ⵏⵏⵙ ⵉⵥⵍⵉⵏ ⴳ ⵓⵙⵉⵜ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⵅⴼ ⵜⵜⵉⴼⵓ ⵏⵏⵙ “ⵜⴰⵎⴰⴳⵉⵜ ⵏ ⵜⵎⴰⵣⵉⵔⵜ” ⵍⵍⵉ ⵢⵓⵍⵍ ⴳ ⵓⵎⵃⵉⵣⴰⵡⵔ ⵉⵙⵎⵓⵏⵏ ⵜⴰⵔⴱⴱⵓⵜ ⵏ ⵃⴰⵙⴰⵏⵉⵢⵢⴰⵜ ⴰⴳⴰⴷⵉⵔ ⴷ ⴷ ⵓⵏⴱⴳⵉ ⵏⵏⵙ ⵓⵍⴰⵎⴱⵉⴽ ⵅⵔⵉⴱⴳⴰ, ⴰⵙⵙ ⵏ ⵓⵙⴰⵎⴰⵙ 11  ⵛⵓⵜⴰⵏⴱⵉⵔ, ⵙ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵎⵃⵉⵣⵡⴰⵔ ⴰⵏⴰⵎⵓⵔ ⴰⵅⴰⵜⵔⴰ ⵏ ⵜⵓⵡⵊⵊⴰ ⵏ ⵓⴹⴰⵕ, ⵉⵜⵜⵓⵙⵎⴰⴷⵏ ⵙ ⵜⵏⴳⴰⴷⴷⴰⵢⵜ, ⵉⵏⵏⴰ ⵎⴰⵙ ⴷ ⵎⵍⵍⵉⵖ ⵉⵜⵜⵓⵙⴽⴰⵔ ⵉⵍⵜⵕⴰⵚ ⴰⴷ ⵉⵎⵎⴰⵖ ⴼ ⵜⵎⵙⴰⵔⵉⵏ  ⵏ ⵓⴼⴳⴰⵏ ⴷ ⵡⴰⴽⴰⵍ ⴷ ⵜⵓⵜⵍⴰⵢⵜ ⵏ ⵉⵎⴰⵣⵉⵖⵏ, ⵍⵍⵉ ⴳⴰⵏⵉⵏ ⴽⵕⴰⴹⵜ ⵜⵖⴰⵡⵙⵉⵡⵉⵏ ⵜⵓⵎⵙⴼⴼⵓⵥⵥⵕⵏⵉⵏ ⴷⴰⵜ ⵏ ⵜⵖⴰⵡⵙⴰ ⵢⴰⴹⵏⵉⵏ.

ⵢⵓⵏⵉ ⵉⵍⵜⵕⴰⵚ ⴳ ⵓⵙⵉⵙⴼⵉⵡ ⴰⴷ ⵏⵏⵙ, ⵎⴰⵙ ⵎⵓⵏⵏⵜ ⴽⵕⴰⴹⵜ ⵜⵖⴰⵡⵙⵉⵡⵉⵏ ⴰⵏⵏ ⴳ ⵢⴰⵜ ⵜⴳⵓⵔⵉ ⵉⴳⴰⵏ ⵜⴰⵎⴰⵜⴰⵢⵜ, ⵜⵉⵏ “ⵜⵎⴰⴳⵉⵜ”, ⵙ ⵜⵖⴰⵔⴰⵙⵜ ⴰⴽⴽⵯ ⴱⴰⵀⵕⴰ ⵉⵥⵍⵉⵏ ⵜⴰⵎⴰⴳⵉⵜ ⵜⴰⵎⵖⵔⵉⴱⵉⵜ. ⵢⵉⵏⵉ ⵓⴳⴷⵍ ⵏ ⵉⵍⵜⵕⴰⵚ ⵉⵎⴰⵣⵉⵖⵏ, ⴳ ⵎⴰⴷ ⵉⵥⵍⵉⵏ ⴷ ⵡⴰⴽⴰⵍ, ⵎⴰⵙ ⵜⴳⴰ ⵜⵙⴳⴰ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴰⵏⴰⵎⵓⵔ ⴰⵎⵣⵔⴰⵢ ⵏ ⵉⵎⴰⵣⵉⵖⵏ.  ⵖ ⵎⴰⴷ ⵉⵥⵍⵉⵏ ⵙ ⵜⵓⵜⵍⴰⵢⵜ, ⵉⵏⵏⴰ ⵉⵍⵜⵕⴰⵚ ⵉⵎⴰⵣⵉⵖⵏ, ⵎⴰⵙ ⵜⴳⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵡⴰⵍ ⵏ ⵉⵎⵖⵔⵉⴱⵉⵢⵏ ⵉⵇⴱⵓⵔⵏ ⵓⵍⴰ ⵉⵎⴰⵢⵏⵓⵜⵏ, ⵎⵇⵇⴰⵔ ⴰⴷⵍⵍⵉ ⵜⴷⴷⵔ ⴷ ⵜⵓⵜⵍⴰⵢⵉⵏ ⵜⵜⴰⵡⵙⵙⴰⵏⵏⵉⵏ ⴰⵎ ⵜⴰⵀⵉⵔⵓⵖⵍⵉⴼⵉⵜ ⴷ ⵜⵢⵓⵏⴰⵏⵉⵜ ⴷ ⵜⵕⵓⵎⴰⵏⵉⵜ, ⵖⵉⵍⴰⴷ ⵜⵓⵜⵍⴰⵢⵉⵏ ⴰⴷ ⴰⴽⴽⵯ ⵏⵖⵓⴱⴰⵏⵜ, ⵜⵖⴰⵎⴰ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵔ ⵙⵔⵙ ⵓⴽⴰⵏ ⵙⴰⵡⴰⵍⵏ ⵜⴰⵔⵡⴰ ⵏⵏⵙ. ⵢⵉⵏⵉ ⵓⵍⴰ ⵎⴰⵙ ⵜⵙⵖⴰⵡⵙⴰ ⵜⵓⵜⵍⴰⵢⵜ ⴰⴷ ⵜⴰⵎⴰⵣⵉⵖⵜ ⴰⵙⵙ ⴰⴷ ⵉ ⴽⵓ ⵜⴰⵔⵡⴰ ⵏⵏⵙ ⵓⴳⴳⴰⵔ ⵏ ⵎⴰⴷ ⵉⵣⵔⵉⵏ, ⵍⵍⵉⵖ ⵜⴳⴰ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵎⵇⵇⴰⵔ ⵜⵙⵎⴰⵜⵜⵉ ⵜⴰⵏⴰⴱⴰⴹⵜ ⵜⴰⵎⴰ ⵏ ⵜⴰⵢⵢⴰⴹ ⴰⵙⵀⵍ ⵏⵏⵙ, ⴰⵢⵍⵍⵉ ⵉⵎⴰⵍⵍⴰⵏ ⵜⴰⵣⵣⵉⴳⵣⵜ ⵏ ⵜⵙⵔⵜⵉⵜ ⵏ ⵓⵙⵉⵜⵜⵉ ⵏ ⵜⴷⵍⵙⴰ ⴷ ⵜⵎⴰⴳⵉⵜ ⵏ ⵜⵎⴰⵣⵉⵔⵜ.

ⴳ ⵎⴰⴷ ⵉⵥⵍⵉⵏ ⵙ ⵓⴼⴳⴰⵏ, ⵉⵏⵏⴰ ⵉⵍⵜⵕⴰⵚ ⵉⵎⴰⵣⵉⵖⵏ, ⵎⴰⵙ ⴷ ⴰⵎⴰⵣⵉⵖ ⴳ ⵍⵎⵖⵔⵉⴱ ⵉⴳⴰ ⵜ ⴰⵙⵙ ⴰⴷ ⴽⵓ ⴰⵎⵖⵔⵉⴱⵉ ⵉⵟⵟⴰⴼⵏ ⵜⴰⴽⵕⴹⴰ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ, ⵉⴳⴰⵏ ⵏⵉⵜ ⵜⴰⴽⵕⴹⴰ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⴷ ⴽⵓ ⴰⵎⵖⵔⵉⴱⵉ ⵉⵟⵟⴰⴼⵏ ⵜⴰⵏⵎⵓⵔⵉ ⵜⴰⵖⵎⵔⵉⴱⵉⵜ ⴰⵔⵓⵏ ⵜ ⵙⵉⵏ ⵉⵎⵖⵔⵉⴱⵉⵢⵏ, ⵢⵉⵏⵉ ⵓⵍⴰ ⵎⴰⵙ ⵜⵣⴷⵉ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ ⴷ ⵡⴰⴽⴰⵍ ⴷ ⵜⴰⵎⵓⵔⵜ, ⵉⵙⴰⵡⵍ ⵓⵎⵖⵔⵉⴱⵉ ⴷⴷⴰⵔⵉⵊⴰ ⵏⵖ ⵜⴰⵔⵉⴼⵉⵜ ⵏⵖ ⵜⴰⵛⵍⵃⵉⵜ ⵏⵖ ⵜⴰⵎⴰⵣⵉⵖⵜ ⵏⵖ ⵜⴰⵃⵙⵙⴰⵏⵉⵜ.

ⵢⵉⵏⵉ ⵎⴰⵙ ⵉⵙⴰⵍⵍⴰ ⴼ ⵎⴰⵕⵕⴰ ⵎⴰ ⴰⵏⵏ ⴳ ⵜⵜⵉⴼⵓ ⵏ ⵡⴰⵙⵙ ⵏ ⵓⵙⴰⵎⴰⵙ ⵍⵍⵉ ⵉⵣⵔⵉⵏ, ⵖ ⵍⵍⴰⵏ ⴽⵕⴰⴹ ⵉⵙⴽⴽⵉⵍⵏ ⵏ “ⵢⴰⵥ” ⵍⵍⵉ ⵉⴳⴰⵏ ⵜⴰⵎⴰⵜⴰⵔⵜ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ.

ⵙ ⵖⵎⴽ ⴰⴷ, ⴰⵙ ⵉⵖⵔⴰ ⵉⵍⵜⵕⴰⵚ ⵉⵎⴰⵣⵉⵖⵏ ⵉ ⵓⴳⴷⵓⴷ ⴰⵎⵖⵔⵉⴱⵉ ⵉ ⵓⵎⵙⵓⵔⵓⴼ ⴰⴽⴷ ⵜⴰⵎⴰⴳⵉⵜ ⵏⵏⵙ ⵜⴰⵎⵣⵡⴰⵔⵓⵜ, ⵉⵖⵔ ⵓⵍⴰ ⵉ ⵜⵎⴰⵣⵉⵔⵜ ⵏ ⵍⵎⵖⵔⵉⴱ ⴰⴼⴰⴷ ⴰⴷ ⵜⵙⴱⴷⴷ ⵜⴰⵣⵣⵉⴳⵣⵜ ⵏ ⵓⵙⵉⵜⵜⵉ ⵏ ⵜⵎⴰⴳⵉⵜ ⵜⴰⵎⵣⵡⴰⵔⵓⵜ ⵏ ⵜⵎⴰⵣⵉⵔⵜ ⵖ ⵓⵣⵎⵎⵣ ⴳ ⵜⴳⴰ ⵜⵎⴰⵣⵉⵖⵜ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴳ ⵓⴷⵓⵙⵜⵓⵔ ⵏ ⵜⵎⴰⵣⵉⵔⵜ.

ⴳ ⵜⴳⵉⵔⴰ, ⵉⵏⵏⴰ ⵉⵍⵜⵕⴰⵚ ⵉⵎⴰⵣⵉⵖⵏ, ⵎⴰⵙ ⵜⴳⴰ ⵜⵔⴰⴱⴱⵓⵜ ⵏ ⵍⵃⴰⵙⴰⵏⵉⵢⵢⴰ ⵢⴰⵜ ⵜⵔⴰⴱⴱⵓⵜ ⵜⴰⵎⴰⵣⵓⵖⵜ ⴰⵎ ⵎⴰⵕⵕⴰ ⵜⵉⵔⵓⴱⴱⴰ ⵜⵉⵎⵖⵔⵉⴱⵉⵢⵉⵏ, ⴰⴳⴷⵓⴷ ⵏⵏⵙ ⵉⴳⴰ ⴰⵎⴰⵣⵉⵖ ⴰⵎ ⵎⴰⵕⵕⴰ ⴰⴳⴷⵓⴷ ⴰⵎⵖⵔⵉⴱⵉ, ⵜⴰⵔⴰⴱⴱⵓⵜ ⴷ ⵓⴳⴷⵓⴷ ⵏⵏⵙ ⵓⵙⵉⵏ ⴰⵏⵣⴳⵓⵎ ⵏ ⵓⵙⵎⵖⵔ ⵏ ⵜⵎⴰⴳⵉⵜ ⵜⴰⵎⵣⵡⴰⵔⵓⵜ ⴷ ⵜⵉⵏ ⵜⵉⴷⵜ ⵏ ⵜⵎⴰⵣⵉⵔⵜ ⵍⵍⵉ ⵉⴳⴰⵏ ⵜⴰⵎⴰⵣⵉⵖⵜ.