ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵏⵏⴰ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ ⵎⴰⵙ ⵉⵇⵇⵕⴱ ⵓⵕⵥⵥⵓⵎ ⵏ ⵜⴰⵙⵉⵍⴰ ⵜⴰⵎⴰⵟⵟⵓⵏⵜ ⵏ ⵓⵙⵍⵎⴷ ⵜⴰⵎⴰⵣⵉⵖⵜ ⵙⴳ ⵓⴳⴳⵯⵓⴳ ⵍⵍⵉ ⵉⴷⴷⴰⵏ ⵉ ⵉⵏⵍⵎⴰⴷⵏ ⴰⴼⴰⴷ ⴰⵙⵙⵍⵎⴷ ⴷⵖⵢⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴷⵓⵙ ⵏ ⵜⵓⴳⴳⴰⵙ ⵏ ⵜⵏⴽⵔⴰ ⵏⵏⵙ.
ⵉⵙⴷⴷⵉⴷ ⵎⴰⵙⵙ ⴱⵏⵎⵓⵙⴰ ⴳ ⵜⵎⵔⴰⵔⵓⵜ ⵏⵏⵙ ⵅⴼ ⵉⵙⵇⵙⵉⵜⵏ ⵅⴼ “ ⴰⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ” ⵎⴰⵙ ⵜⵙⴽⵔ ⵜⵎⴰⵡⴰⵙⵜ ⵎⵏⵏⴰⵡⵜ ⵏ ⵜⵖⵡⵙⵉⵡⵉⵏ ⴰⴼⴰⴷ ⵜⵏⴽⵔⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⴳⵔⴰⵡ ⵏ ⵓⵙⵙⵍⵎⴷ ⵍⵍⵉ ⵉⵎⵙⴰⵙⴰⵏ ⴷ ⵜⵉⵔⴰⵜ ⵜⴳⵍⴷⴰⵏⵜ ⵢⴰⵜⵜⵓⵢⵏ ⴷ ⵓⵣⵣⵓⴳⵣ ⵏ ⵓⵣⵔⴼ ⴷ ⵓⵖⴰⵡⴰⵙ ⵏ ⵜⵏⴱⴰⴹⵜ .
ⵙ ⵖⵎⴽⴰⴷ ⵉⵏⵏⴰ ⵓⵎⴰⵡⵙⴰⵙ ⵎⴰⵙ ⵉⵖⵍⵉ ⴳ ⵉⴳⵔ ⵏ ⵉⵙⴰⴳⵎⵏ ⵉⵏⴼⴳⴰⵏⵏ ⵓⵟⵟⵓⵏ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⵣⵔⵉⵏ ⵙⴳ 200 ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⴳ 2021 ⴰⵔ 600 ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⴽⵓⵍⴰ ⴰⵙⴳⴳⵯⴰⵙ ⴷ ⵓⵙⵎⵓⵜⵜⴳ ⵏ ⵓⴽⴰⴱⴰⵔ ⴰⵎⵣⵡⴰⵔⵓ ⵏ ⵉⵎⴳⴳⵉⵡⵙⵏ ⴳ ⵓⵙⵙⵍⵎⴷ ⴰⵎⵣⵡⴰⵔⵓ ⵉⵥⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵔⵏⵓ ⵉⵏⵏⴰ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ ⵎⴰⵙ ⵎⴰⵙ ⵜⵕⵥⵎ ⵉⵎⴰⵍⴰⵙⵙ ⵉⵣⵔⵉⵏ ⵢⴰⵜ ⵜⵙⵙⵓⵜⵍⵜ ⵏ ⵓⵙⵎⵓⵜⵜⴳ ⴳ ⵜⵉⵙⴳⴳⵉⵡⵉⵏ ⵉ 4400 ⵏ ⵉⵙⵍⵎⴰⴷⵏ.
ⵉⵙⴷⴷⵉⴷ ⵎⴰⵙⵙ ⴱⵏⵎⵓⵙⴰ ⵓⵍⴰ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵢⴰⵏ ⵓⵙⵍⵎⴰⴷ ⵏ ⵜⵎⴰⵣⵉⵖⵜ ⴳ ⴽⵓⵍⴰ ⵜⵉⵏⵎⵍ ⴰⴼⴰⴷ ⴰⴷ ⵜⵢⴰⵍⵎⴰⵎ ⴳ ⵓⵙⴰⴳⵎ ⴰⵎⵣⵡⴰⵔⵓ 50 ⴳ 100 ⴳ ⵓⵙⴳⴳⴰⵙ ⵏ 2026 ⴷ ⴰⴽⴽⵯ ⵜⵉⵏⵎⴰⵍ ⴳ ⵓⵙⴳⴳⵯⴰⵙ ⵏ 2030.
ⵉⵙⵙⴽⵜⴷ ⵓⵎⴰⵡⵙⴰⵙ ⵓⵍⴰ ⵎⴰⵙ ⵜⵍⵍⴰ ⵢⴰⵜ ⵜⵡⵓⵔⵉ ⵏ ⵓⵙⵎⴰⵢⵏⵓ ⵏ ⵜⵖⴰⵔⴰⵙⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏ ⵓⵙⵡⵉⵔ ⵏ ⵓⵙⵙⵍⵎⴷ ⴰⵎⵣⵡⴰⵔⵓ ⵙ ⵓⵎⵢⴰⵡⴰⵙ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⴼⴼⵓⵖ ⵏ 7 ⵏ ⵉⴷⵍⵉⵙⵏ ⵉⵎⴰⵢⵏⵓⵜⵏ ⵏ ⵜⵉⵏⵎⵍ ⵏ ⵜⵓⵜⵍⴰⵢⵜ ⵜⴰⵎⵣⵉⵖⵜ ⵏ 6 ⵉⵙⴳⴳⵯⴰⵙⵏ ⵏ ⵓⵙⵙⵍⵎⴷ ⴰⵎⵣⵡⴰⵔⵓ.
