ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵥⵍⵉⵏ ⵡⴰⵎⵎⴰⵙⵏ ⵉⵏⵎⵍⴰⵏⵏ ⵉⵚⴱⵍⵢⵓⵏⵏ ⴳ ⵍⵎⵖⵔⵉⵏ ⵢⴰⵏ ⵉⵎⴰⵍⴰⵙⵙ ⵉ ⵓⵙⴼⵓⴳⵍⵓ ⵙ ⵜⴷⵍⵙⴰ ⵜⴰⵎⴰⵣⵉⵖⵜ, ⵙ ⵓⴱⴷⴷⵉ ⵏ ⵜⵎⵛⵛⵉⵡⴰⵕⵜ ⵏ ⵓⵙⵍⵎⴷ ⴳ ⵜⵎⵙⵇⴰⴷⵜ ⵏ ⵚⴱⴰⵏⵢⴰ ⴳ ⵜⴳⵍⴷⵉⵜ, ⴳ ⵜⵉⵣⵉ ⵜⴰⵣⴳⵔⴰⵔⵜ ⵙⴳ 13 ⴰⵔ 17 ⵉⵏⵏⴰⵢⵔ 2025. ⵍⵍⵉⵖ ⵔⴰⴷ ⵢⵓⵎⵓ ⵢⵉⵎⴰⵍⴰⵙⵙ ⵉⵙⴼⵓⴳⵍⵓⵜⵏ ⵙ ⵢⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ 2975.
ⵉⴼⴽⴰ ⵓⵎⵙⵇⴰⴷ ⵏ ⵜⴳⵍⴷⵉⵜ ⵏ ⵚⴱⴰⵏⵢⴰ ⴳ ⵍⵎⵖⵔⵉⴱ ⵎⴰⵙⵙ ⴰⵏⵔⵉⴽⵉ ⵓⵅⵉⴷⴰ ⴱⵉⵍⴰ ⵢⴰⵜ ⵜⴳⵓⵔⵉ ⵉⵙⴷⴷⵉⴷ ⴳⵉⵙ ⵅⴼ ⵜⵉⵏⴷⵉ ⵏ ⵓⵎⵣⵔⵓⵢ ⴰⵎⴰⵣⵉⵖ ⴳ ⵜⵓⵚⴽⴰ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ, ⴷ ⵓⵎⵣⵔⵓⵢ ⵉⵛⵛⴰⵔⵏ ⴳⵔ ⵙⵏⴰⵜ ⵜⴳⵍⴷⴰⵢ ⴰⴷ, ⴷ ⵜⵉⵍⵉⵜ ⵏ ⵡⴰⵢⴷⴰ ⴰⵎⴰⵣⵉⵖ ⴳ ⵜⵖⵔⵎⵉⵏ ⵜⵉⵏⴷⴰⵍⵓⵙⵉⵏ, ⵓⵢⴰ ⵏⵏⴰ ⵉⵜⵜⵔⵏⵓⵏ ⵙⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵎⵖⵔⴰⴱⵉⵢⵉⵏ ⵜⵉⵚⴱⵍⵢⵓⵏⵉⵏ, ⵖⵉⴷ ⴰ ⵖ ⵉⵖⵔⴰ ⵙ ⴰⴷ ⵉⵜⵜⵓⵥⵍⴰⵢ ⵓⵙⴳⴳⵯⴰⵙ ⵏ 2025 ⵉ ⵜⴷⵍⵙⴰ ⵜⴰⵎⴰⵣⵉⵖⵜ ⴳⵔ ⵜⵎⵉⵣⴰⵔ ⴰⴷ, ⴷ ⴰⴷ ⵉⴳ ⴰⵙⴳⴳⵯⴰⵙ ⴰⵎⵣⵔⴰⵢ ⴷ ⵓⵖⵔⵎⴰⵏ ⵙ ⵜⵏⵓⴼⵍⴰⵢⵜ.
ⴳ ⵓⵏⵏⵓⵕⵥⵎ ⵏ ⵉⵎⵓⵙⵙⵓⵜⵏ ⵏ ⵢⵉⵎⴰⵍⴰⵙⵙ ⴰⴷⵍⵙⴰⵏ ⴰⵙⵙ ⵏ ⵓⵙⵉⵎⴰⵙ 10 ⵉⵏⵏⴰⵢⵔ 2025, ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵏⵏⴰ ⵉⵙⵙⵉⵙⴼⵉⵡⵏ ⴰⴳⴰⵔⴰⵣ ⵏⵏⵙ ⵙ ⵓⵙⵡⵉⵔ ⵏ ⵓⴼⵔⴰⴽ ⵙ ⵜⵎⵙⴰⵔⵜ ⵜⴰⵎⴰⵣⵉⵖⵜ ⵏⵏⴰ ⵉⵍⵍⴰⵏ ⵖⵓⵔ ⵉⵏⵍⵎⴰⴷⵏ ⴷ ⵉⵙⵍⵎⴰⴷⵏ ⵏ ⵜⵉⵏⵎⵍ ⵜⴰⵚⴱⵍⵢⵓⵏⵜ, ⴷ ⴳ ⵓⵎⵏⵉⴷ ⵏⵏⵙ ⵉⴼⴽⴰ ⵜⴰⵖⵓⵔⵉ ⵉ ⵓⴳⴷⵓⴷ ⴰⴷ ⵢⵓⵎⵓ ⴰⵡⴷ ⵏⵜⵜⴰ ⴳ ⵢⵉⵎⴰⵍⴰⵙⵙ ⴰⴷⵍⵙⴰⵏ ⵏⵏⴰ ⵔⴰⴷ ⵢⵉⵍⵉ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴷ ⵉⴱⴷⵔ ⴰⴽⵜⵜⵓⵢ ⵏ ⵜⵎⵖⵏⴰⵙⵜ ⵜⵉⴳⵍⵍⵉⵏⵜ ⵍⴰⵢⵍⴰ ⵎⵥⵢⴰⵏ, ⴷ ⵜⵉⵍⴰⵍⵜ ⵏⵏⵙ ⴷ ⵜⴷⵔⴰⵡⵜ ⵏⵏⵙ ⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵙⵙⵎⵏⵉⴷ ⵓⵏⵎⵀⴰⵍ ⵏ ⵜⵉⵏⵎⵍ ⵜⴰⵚⴱⵍⵢⵓⵏⵜ ⴳ ⵕⵕⴱⴰⵟ ⵎⴰⵙⵙ ⵅⵓⵍⵢⵓ ⴱⵉⵔⵉⵙ ⴼⵔⵉⵍⵉ ⵢⴰⵜ ⵜⴳⵓⵔⵉ ⵉⵙⴰⵡⵍ ⴳⵉⵙ ⵅⴼ ⵜⵉⵏⴷⵉ ⵏ ⵓⵏⵏⵓⵕⵥⵎ ⵏ ⵉⵏⵍⵎⴰⴷⵏ ⵅⴼ ⵜⵎⵙⴰⵔⵉⵏ ⵜⵉⵎⵣⵔⴰⵢⵉⵏ ⴷ ⵜⴷⵍⵙⴰⵏⵉⵏ, ⴷ ⵓⴷⵔⵉⵣ ⵏⵏⵙⵏⵜ ⵓⵎⵏⵉⴳ ⵅⴼ ⵜⵎⵀⵍⵜ ⵜⴰⵏⵎⵍⴰⵏⵜ ⵏⵏⴰ ⴳ ⵜⵜⴳⴳⵏ ⵉⵏⵍⵎⴰⴷⵏ ⵜⵉⵏⴷⵔⵜ ⵜⴰⴷⵙⵍⴰⵏⵜ.
ⵉⵙⴰⵡⵍ ⵓⵎⵛⵛⵉⵡⴰⵕ ⵏ ⵓⵙⵍⵎⴷ ⴰⵚⴱⵍⵢⵓⵏ ⴳ ⵍⵎⵖⵔⵉⴱ, ⵎⴰⵙⵙ ⵍⵓⵕⵉⵏⵥⵓ ⴽⴰⴱⵢⴰⵏ ⵟⵓⵕⵓ ⵅⴼ ⵓⴱⵓⵔⵣ ⵏⵏⵙ ⴰⴷ ⵉⵙⴽⵔ ⵜⵉⵙⵎⵉⴳⴰⵍ ⴰⴷ, ⵉⵙⵉⵡⵍ ⵅⴼ ⵜⵓⵎⵔⵜ ⵏⵏⵙ ⵙ ⵓⵙⵡⵉⵔ ⵏ ⵓⴼⵔⴰⴽ ⴰⴷⵍⵙⴰⵏ ⵏⵏⴰ ⴷ ⵢⵓⴼⴰ ⴳ ⴷⴰⵔ ⵉⵏⵍⵎⴰⴷⵏ ⵏ ⵜⵉⵏⵎⴰⵍ ⵜⵉⵚⴱⵍⵢⵓⵏⵉⵏ ⵙⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ.
ⵉⵡⴰⵜⵜⵙ ⵢⵉⵎⴰⵍⴰⵙⵙ ⴰⴷ, ⴰⴷ ⵢⴰⵡⵙ ⵉ ⵉⵎⵣⵔⴰⵡⵏ ⴷ ⵉⵙⵍⵎⴰⴷⵏ ⴰⴷ ⵙⵙⵏⵏ ⴰⵢⴷⴰ ⴰⴷⵍⵙⴰⵏ ⴰⵎⴰⵣⵉⵖ ⴰⵣⴰⵢⴽⵓ, ⵏⵏⴰ ⵉⵙⵎⴷⵢⴰⵏ ⵢⴰⵏ ⵓⴳⵣⵣⵓⵎ ⴰⴷⵙⵍⴰⵏ ⵙⴳ ⵓⵎⵢⴰⵏⴰⵡ ⴰⴷⵍⵙⴰⵏ ⴰⵎⵖⵔⴰⴱⵉ, ⴷ ⵓⵙⵎⴰⵏⴰⵔ ⵏ ⵓⴷⵔⵉⵣ ⵏⵏⵙ ⴳ ⵓⵎⵣⵔⵓⵢ ⴷ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ.
ⵎⴽⵍⵍⵉ ⵢⵓⵎⴰ ⵓⵖⴰⵡⴰⵙ ⵢⴰⵜ ⵜⴳⵔⵓⵎⵎⴰ ⵏ ⵜⵉⵍⴰⵍ, ⵜⴰⵅⴰⵜⴰⵔⵜ ⵏⵏⵙⵏⵜ ⴰⵙⵎⵏⵉⴷ ⵏ ⵉⵕⴽⴰⴹⵏ ⵉⵏⴰⵥⵓⵕⵏ ⵉⵎⴰⵣⵉⵖⵏ ⵙⴳ ⴷⴰⵔ ⵉⵏⵍⵎⴰⴷⵏ, ⴷ ⵉⴼⵙⴰⵔⵏ ⵉⵏⴰⵥⵓⵕⵏ, ⴷ ⵓⴼⵙⵔ ⵏ ⵜⵏⵉⴹⵉ ⴷ ⵓⵏⵡⴰⵍ ⴰⵎⴰⵣⵉⵖ, ⵡⴰⵜⵜⵙⵏ ⵉⵎⵓⵙⵙⵓⵜⵏ ⴰⴷ ⴰⵙⴷⵓⵙ ⵏ ⵓⵔⵎⴰⵙ ⵉⴷⵔⴰⵏ ⵉ ⵜⴷⵍⵙⴰ ⵜⴰⵎⴰⵣⵉⵖⵜ, ⴷ ⵓⵙⵎⴰⵏⴰⵔ ⵏ ⵜⵉⵏⴷⵉⵜⵉⵏ ⵏⵏⵙ ⴷ ⵡⴰⵢⴷⴰ ⵏⵏⵙ ⵉⴳⴰⵏ ⵡⴰⵥ ⵎⵏⵉⴷ ⵏ ⵜⴰⵙⵓⵜ ⵜⴰⵎⴰⵢⵏⵓⵜ, ⴰⵢⵍⵍⵉ ⵉⵙⵙⴷⵓⵙⵏ ⵉⵎⴰⵏ ⵏ ⵓⵎⵙⵓⵔⵓⴼ ⴷ ⵓⵏⵏⵓⵕⵥⵎ ⵅⴼ ⵜⴷⵍⵙⵉⵡⵉⵏ ⴰⴽⴽⵯ.
ⴰⵙⵓⵖⵍ – ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
