ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙ ⵓⴽⵯⵜⵜⴰⵢ ⵡⵉⵙ 21 ⵏ ⵓⵙⴼⵓⴳⵍⵓ ⵏ ⵉⵏⴰⵡ ⴰⴳⵍⴷⴰⵏ ⵏ ⵓⵊⴷⵉⵔ ⴷ ⵓⵙⴽⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵜⴰⵙⵎⵖⵓⵔⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵎⵏⵏⴰⵡ ⵉⴳⵔⴰⵏ ⵉⴷⵍⵙⴰⵏⵏ ⴷ ⵉⵏⴰⵥⵓⵕⵏ, ⴰⵙⵙ ⵏ ⵓⵙⵉⵎⵡⴰⵙ 21 ⴽⵟⵓⴱⵕ ⴳ ⵉⵍⵍⴰ ⵓⴱⵟⵟⵓ ⵏ ⵜⵙⵎⵖⵓⵔⵉⵏ.
ⵉⵍⵍⴰ ⵓⴱⵟⵟⵓ ⵏ ⵜⵙⵎⵖⵓⵔⵉⵏ ⴰⴷ ⴳ ⵓⵙⵖⵉⵎ ⵏ ⵓⵙⵉⵏⴰⴳ, ⴰⵡⵜⵜⴰⵙ ⴰⴷ ⵢⵉⵍⵉ ⵓⵙⵎⵖⵔ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵎⴰⵕⵕⴰ ⵏ ⵉⴳⵔⴰⵏ ⴷ ⵓⴼⵔⴰⴳ ⵏⵏⵙ, ⵙ ⵓⵙⵙⵔⵇⴱ ⵏ ⵉⵎⵙⵏⴼⵍⵓⵍⵏ ⴷ ⵉⵎⴰⵔⴰⵜⵏ ⴷ ⵉⴷ ⴱⴰⴱ ⵏ ⵓⵡⵙⵉⵏⴳⵎ.
ⴳ ⵓⵏⵏⵓⵕⵥⵎ, ⵉⵏⵏⴰ ⵎⴰⵙⵙ ⴰⵃⵎⴰⴷ ⴱⵓⴽⵓⵙ ⴰⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⴰⴳⵓⵔⵉ ⵏⵏⵙ, ⴷ ⵎⴰⵙⵙⴰ ⵄⵉⵛⴰ ⴰⵍⵃⵢⴰⵏ ⵜⴰⵏⵙⵙⵉⵅⴼⵜ ⵏ ⵜⵙⵓⵜⵍⵜ ⴷ ⵎⴰⵙⵙ ⵄⴰⴱⴷⵙⵙⵍⴰⵎ ⵅⴰⵍⴰⴼⵉ ⴰⵏⵙⵙⵉⵅⴼ ⵏ ⵜⵙⵎⵖⵓⵔⵜ ⵏ ⵓⵙⴳⴳⵯⴰⵙ ⴰⴷ. ⵜⴰⵙⵎⵖⵓⵔⵜ ⴰⴷ ⵜⴳⴰ ⵉⵎⵉⵙ ⵍⵍⵉ ⵙ ⵉⵙⵡⵓⵔⵉ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⵣⵉⵖⵜ ⴳ ⵓⵎⵏⵉⴷ ⵏ ⵓⵙⴽⵔ ⵏ ⵜⵙⵜⵔⴰⵜⵉⵊⵉⵜ ⵏⵏⵙ ⴳ ⵓⵙⵎⵖⵔ ⵏ ⵜⴷⵍⵙⴰ ⵜⴰⵎⴰⵣⵉⵖⵜ.
ⵜⵓⵎⴰ ⵜⵙⵎⵖⵓⵔⵜ ⴰⴷ ⵎⵏⵏⴰⵡ ⵡⴰⵏⴰⵡⵏ, ⴳⵉⵙⵏ ⵜⴰⵙⵎⵖⵓⵔⵜ ⵏ ⵓⵙⵓⵜⴷ ⵍⵍⵉ ⵉⵜⵜⵓⴼⴽⵉⵏ ⵉ ⵉⵏⵎⵖⵓⵔⵏ ⵉⵏⴰⵎⵓⵔⵏ ⴼⴽⴰⵏⵉⵏ ⵜⴰⵢⵢⴰⴼⵓⵜ ⵉⵙⵜⴰⵡⵀⵎⵎⴰⵏ ⴳ ⵓⵎⵏⵉⴷ ⵏ ⵓⵙⵎⵖⵔ ⵏ ⵜⴷⵍⵙⴰ ⵜⴰⵎⴰⵣⵉⵖⵜ, ⴳ ⵓⵙⴳⴳⵯⴰⵙ ⴰⴷ ⵉⵍⵍⴰ ⵓⵙⵎⵖⵔ ⵏ ⵓⵙⵍⵎⴰⴷ ⵎⴰⵙⵙ ⵄⵍⵉ ⴰⵎⴰⵀⴰⵏ ⵍⵍⵉ ⵉⵍⵓⵍⵏ ⴳ ⴰⵢⵜ ⵉⴽⵜⵍ ⴳ ⵉⵖⵊⴷⴰ ⴳ ⵡⴰⵟⵍⴰⵚ ⴰⵎⵇⵔⴰⵏ ⴰⵏⴰⵎⵎⴰⵙ ⴳ 1950, ⵉⴳ ⵖ ⵓⴷⵎⴰⴰⵡⵏ ⵜⵜⴰⵡⵙⵙⴰⵏⵏⵉⵏ ⴳ ⵢⵉⴳⵔ ⵏ ⵓⵔⵣⵣⵓ ⴰⵏⵜⵔⵓⴱⵓⵍⵓⵊⵉ ⴷ ⵢⴰⵏ ⴳ ⵉⵎⵙⴽⴰⵔⵏ ⵏ ⵜⵡⵡⵓⵔⵉ ⵜⴰⵎⴳⵔⵓⵜ ⵜⵓⵏⴳⵉⵎⵜ ⴳ ⵍⵎⵖⵔⵉⴱⵏ ⵉⵙⵡⵓⵔⵉ ⴳ ⵜⵓⴷⵔⵜ ⵏⵏⵙ ⵜⴰⵣⵣⵓⵍⴰⵏⵜ ⴳ ⵉⴳⵔⴰⵏ ⵏ ⵓⴼⵔⴰⴳ ⵏ ⵡⴰⵢⴷⴰ ⴷ ⵓⵙⵓⵜⴳ ⵏⵏⵙ ⴷ ⵓⵙⵡⵓⴷⴷⵓ ⵏ ⵜⴳⵎⵉ ⵜⴰⵏⴰⵎⵓⵏⵜ ⴷ ⵓⵙⵙⵍⵎⴷ ⵏ ⵜⵔⵓⵏⵜⵓⴱⵓⵍⵓⵊⵉⵜ ⴷ ⵜⵓⵙⵙⵏⴰ ⵏ ⵜⵙⵏⵏⵉⵖⵉⵏ, ⵖⵎⴽ ⵍⵍⵉ ⵉⵙⴽⵔ ⴽⵉⴳⴰⵏ ⵏ ⵜⵡⵡⵓⵔⵉⵡⵉⵏ ⴳ ⵓⵎⵏⵉⴷ ⵏ ⵓⵔⵣⵣⵓ ⴼ ⵜⴷⵍⵙⴰ ⵜⴰⵎⴰⵣⵉⵖⵜ.
ⵜⴰⵙⵎⵖⵓⵔⵜ ⵏ ⵓⵙⵏⴼⵍⵓⵍ ⴰⵙⴽⵍⴰⵏ ⵜⵚⴰⵃⴰ ⵉ ⵟⵟⴰⵢⵢⵉⴱ ⴰⵎⴳⵔⵓⴷ ⴳ ⵎⴰⴷ ⵉⵥⵍⵉⵏ ⵙ ⵜⵎⴷⵜⴰⵣⵉⵏ, ⴷ ⵀⵉⵛⴰⵎ ⴼⵓⴰⴷ ⴳⵓⵖⵍⵜ ⴳ ⵢⵉⴳⵔ ⵏ ⵡⴰⵍⵍⴰⵙ, ⵜⵚⵉⵃⵉ ⵜⵙⵎⵖⵓⵔⵜ ⵏ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ ⴳ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴷ ⵜⵏⴰⵎⵓⵏⵉⵏ ⵉ ⵃⴰⵏⴰⵏ ⵃⵎⵓⴷⴰ.
ⵔⴰⵙⵎⵖⵓⵔⵜ ⵏ ⵢⵔⵣⵣⵓ ⵜⵚⴰⵃⴰ ⵓⵍⴰ ⵉ ⵎⵉⵎⵓⵏ ⴰⵣⵉⵣⴰ, ⵢⴰⵡⵉ ⵃⵎⴰⴷ ⴱⵍⵄⴰ ⵜⴰⵙⵎⵖⵓⵔⵜ ⵏ ⵉⵙⵓⴳⴰⵎ ⵉⵎⵓⵟⵟⵓⵏⵏ ⴷ ⵄⵓⵎⴰⵕ ⵛⵓⴽⵔⵉ ⵜⴰⵙⵎⵖⵓⵔⵜ ⵏ ⵓⵙⵓⵖⵍ. ⵎⵓⵚⵟⴰⴼⴰ ⵄⵉⵢⵢⴰⵛ ⵢⵉⵡⵉ ⵜⴰⵙⵎⵖⵓⵔⵜ ⵏ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ, ⵜⴰⵡⵉ ⵎⵉⵏⴰ ⴰⴱⵍ ⴷ ⵙⵓⵍⴰⵢⵎⴰⵏ ⵄⵟⵟⵓ ⵜⴰⵙⵎⵖⵓⵔⵜ ⵜⵏⵖⵎⴰⵙⵜ ⵜⴰⵙⵍⵉⵥⵉⵕⵜ.
ⵜⵉⵙⵎⵖⵓⵔⵉⵏ ⵏ ⵓⵥⴰⵡⴰⵏ ⵏⵜⵜⵏⵜⵉ ⵚⴰⵃⵏⵜ ⵉ ⵕⵕⴰⵢⵙ ⵍⵃⵙⵏ ⴰⵅⵟⵟⴰⴱ ⴷ ⵙⴰⵄⵉⴷ ⵎⵓⵊⴰⵏ ⴷ ⵏⴰⵊⵉⵎ ⵍⵎⵔⵛⵓⵃⵉ ⴷ ⵄⵓⵎⴰⵔ ⵍⴳⴷⴰⵍⵉ.
ⵜⴰⵙⵎⵖⵓⵔⵜ ⵏ ⵉⵙⵓⵔⴰ ⵚⴰⵃⴰⵏⵜ ⵉ ⵍⵃⵓⵙⴰⵢⵏ ⵛⵛⴽⵉⵔⵉ ⴷ ⵄⴰⴱⵕⵕⴰⵃⵉⵎ ⵕⵕⴰⵢⵙ, ⴰⵎⵎⴰ ⵜⴰⵙⵎⵖⵓⵔⵜ ⵏ ⵓⵥⴰⵡⴰⵏ ⵜⵚⴰⵃⴰ ⵉ ⵜⵎⵙⵎⵓⵏⵜ ⵎⴰⵙⴰⵔⴰⵜ ⴷ ⵜⵔⴰⴱⴱⵓⵜ ⵏ ⵉⵥⵓⵕⴰⵏ ⵏ ⵣⵎⵎⵓⵔ.
ⵖⵎⴽ ⵍⵍⵉ ⵜⵚⴰⵃⴰ ⵜⵙⵎⵖⵓⵔⵜ ⵏ ⵓⴷⵔⴰⵣ ⴰⵎⴳⵔⵓ ⵉ ⵜⵔⴰⴱⴱⵓⵜ ⵏ ⴰⵊⵎⴰⴽ ⴷ ⵜⵎⵙⵎⵓⵏⵜ ⵏ ⵉⴱⵔⴷⴰⵏ ⴷ ⵜⵔⴰⴱⴱⵓⵜ ⵏ ⵓⵃⵉⴷⵓⵙ ⵏ ⴰⵢⵜ ⵄⵕⴼⴰ.
