ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵡⴰⵢⵏⴰⵙ ⴳ ⵕⵕⴱⴰⵟ, ⵢⴰⵏ ⵓⵏⵎⵓⵇⵇⴰⵔ ⵓⵙⵙⵏⴰⵏ (ⴰⵎⴰⵙⵙⴰⵏ) ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ ⵙⵉⵎⵔⴰⵡ ⴷ ⵙⵉⵏ ⵏ ⵜⵓⵙⵏⵜ ⵜⴰⵎⴰⴷⴷⵓⴷⵜ ⵙ ⵜⵡⵖⵏⴰ ⵏ ⵜⴼⵉⵏⴰⵖ, ⵓⵢⴰ ⴷⴷⵓ ⵜⵎⴰⵜⴰⵔⵜ » ⵜⵉⴼⵉⵏⴰⵖ ⵙⴳ ⵜⵥⵖⵓⵕⵜ ⵏ ⵓⵎⵣⵔⵓⵢ ⴰⵔ ⵉⵎⵏⵉⴷⵏ ⵏ ⵜⴻⵜⵔⴰⵔⵜ.
ⵉⵡⴰⵜⵜⵙ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵥⵍⵉⵏ ⵙ ⵜⵉⵍⵉⵜ ⵏ ⵢⴰⵜ ⵜⵓⴼⵔⵉⵏⵜ ⵏ ⵉⵎⵔⵣⵓⵜⵏ ⴷ ⵉⵎⵥⵍⴰⵢⵏ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⴷ ⵓⵙⵎⵏⵉⴷ ⵏ ⵜⵙⴽⵔⴰⵡⵉⵏ ⵉⵜⵜⵓⵙⴽⴰⵔⵏ ⴳ ⵢⵉⴳⵔⴰⵏ ⵎⵣⴰⵔⴰⵢⵏⵉⵏ, ⴳ ⵏⵉⵜ ⵜⵍⵍⴰ ⵜⵓⵜⵍⴰⵢⵜ ⴷ ⵓⵙⵍⵎⴷ ⴷ ⵓⵙⵏⴼⵍⵓⵍ ⴷ ⵜⴻⵜⵉⴽⵏⵓⵍⵓⵊⵉⵜ, ⴷ ⵓⵙⵏⵉⵎⴰⵍ ⵏ ⵢⵉⴷⵉⵔⵏ ⵉⵎⴰⵢⵏⵓⵜⵏ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⴳ ⴷⴷⵓ ⵏ ⵓⵙⵉⴷⴷ ⵏ ⵉⵙⴱⴷⴰⴷⵏ ⵉⴷⵙⵜⴰⵔⵏ ⵏ ⵖⵉⵍⴰⴷ.
ⴳ ⵢⴰⵜ ⵜⴳⵓⵔⵉ ⵙ ⵓⵣⵎⵣⵣⵓ ⴰⴷ, ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵍⵃⵓⵙⴰⵢⵏ ⵍⵎⵓⵊⴰⵀⵉⴷ, ⵎⴰⵙ ⴷ ⵜⴰⵎⴰⵜⴰⵔⵜ ⵏⵏⴰ ⵉⵜⵜⵢⴰⵡⵙⵜⴰⵢⵏ ⵉ ⵓⵏⵎⵓⵇⵇⴰⵔ ⴰⴷ ⴰⵎⴰⵙⵙⴰⵏ ⵉⴷⴷⴰⴷ ⴳ ⵓⵙⴰⵜⵉ ⵏ ⵓⵙⵙⴽⵜⵉ ⵏ ⵓⵎⵣⵔⵓⵢ ⵏ ⵜⵉⵔⵔⴰ ⵜⴰⵎⴰⵣⵉⵖⵜ, ⴷ ⵓⵙⴳⴰⵔ ⵏ ⵜⵉⴼⴰⵡⵜ ⵅⴼ ⵜⵥⵖⵓⵕⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⵙⴳ ⵜⵓⵜⵍⴰⵢⵜ ⵏⵏⵙ ⴷ ⵉⴷⵔⵉⵣⵏ ⵏⵏⵙ ⵉⴽⵎⴰⵎⵏ ⴷ ⵉⵔⴽⵎⴰⵎⵏ.
ⵉⵙⵎⴷ ⵉⵏⵏⴰ ⵎⴰⵙ ⴷ ⴰⵙⵏⵎⴰⵍⴰ ⵏ ⵜⵉⵏⴰⵡⵉⵏ ⵜⵉⵡⵏⴳⵉⵎⵉⵏ ⴷ ⵜⵖⵉⵎⴰ ⵜⵓⵙⵙⵏⴰⵏⵉⵏ (ⵜⵉⵎⴰⵙⵙⴰⵏⵉⵏ) ⵅⴼ ⵉⵎⵔⵙⵉ ⵏ ⵜⵉⵔⵔⴰ ⴷ ⵜⵍⵙⴰⵔⵉⵜ ⵏ ⵜⵎⴰⵣⵉⵖⵜ ⴷ ⵜⵡⵏⵏⵉⵜⵉⵏ ⵏⵏⵙ ⵜⵉⵙⴽⵍⴰⵏⵉⵏ ⴷ ⵜⵡⵏⴳⵉⵎⵉⵏ ⵙ ⵓⵙⴽⴽⵉⵍ ⵏⵏ ⵙ ⴰⵕⵚⵍⵉ » ⵉⴳⴰ ⴰⵙⴷⴷⵉⴷ ⵅⴼ ⵜⴷⵓⵙⵉ ⵏ ⵓⵙⵜⴰⵢ ⴷ ⵜⵏⵥⵓⵥⵜ ⵏ ⵓⵙⵡⴰⵍⴰ ⵖⵔ ⵓⵙⵎⵀⵍ ⵏ ⵜⵏⴰⵡⴰⵢⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴳⵎⵉ ⵏ ⵜⵣⵎⵎⴰⵔ ⵏⵏⵙ ⵏ ⵓⵡⵏⵏⵉ ⴷ ⵓⵏⵢⴰⵍⴽⴰⵎ, ⵍⵍⵉⵖ ⵜⴳⴰ ⵙ ⵢⵉⴱⴹⵉ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ.
ⵉⵣⵎⵎⵉⵎ ⵎⴰⵙⵙ ⵎⵓⵊⴰⵀⵉⴷ, ⴳ ⵓⵎⵏⵉⴷ ⴰⴷ, ⵎⴰⵙ ⴷ ⴰⵢⵍⵍⵉ ⴰⵖ ⴷ ⵉⵇⵇⴰⵏⵏ ⴳ ⵓⵎⵏⴰⴹ ⴰⴷ ⴰⵙⵉⵜⴳ ⵏⵏⵙ ⴷ ⵓⴱⵓⵔⵣ ⵙⵉⵙ, ⴷ ⴰⵙⵙⴽⵜⵉ ⵏ ⵡⴰⵢⴷⴰ ⴰⵅⴰⵜⴰⵔⵏ ⵉⵜⵜⵓⵙⴽⴰⵔⵏ ⴳ ⵢⵉⴳⵔ ⴰⴷ, ⵙⵍⴰⵡⴰⵏ ⴰⴽⴽⵯ ⵙⴳ ⵓⵙⴱⴷⴷⵉ ⵏ ⵓⵙⵉⵏⴰⴳ, ⵏⵏⴰ ⵉⵍⵍⴰⵏ ⴳ ⵜⵣⵡⴰⵔⵜ ⵏ ⵜⵙⵎⵉⴳⴰⵍ ⵏⵏⵙ ⵜⵉⵎⴰⵙⵙⴰⵏⵉⵏ ⴷ ⴰⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵏⴰⵡⴰⵢⵜ ⵏ ⵓⵙⴽⴽⵉⵍ ⵏⵏⵙ ⴷ ⵜⵓⵚⴽⵉⵡⵉⵏ ⵏⵏⵙ ⴷ ⵓⵎⴰⵡⴰⵍ ⵏⵏⵙ.
ⴳ ⵜⵙⴳⴰ ⵏⵏⵙ, ⵉⵙⴰⵡⵍ ⵓⵎⵔⵣⵓ ⵎⵓⵃⵎⵎⴰⴷ ⵣⵣⵡⵉⵏ, ⵅⴼ ⵜⵙⵏⵙⵉ ⵏ « ⵜⵓⵔⵜⵉⵜ ⵜⴰⵎⴰⵣⵉⵖⵜ » ⵏⵏⴰ ⵢⵉⵡⵉⵏ ⵜⴰⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵓⵙⵉⵏⴰⴳ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉ ⵓⵙⴳⴳⵯⴰⵙ ⴰⴷ ⴳ ⵡⴰⵏⴰⵡ ⵏ ⵜⵙⵏⵙⵉⵡⵉⵏ ⴷ ⵉⵙⵓⴳⴰⵎ ⵉⵎⵓⵟⵟⵓⵏⵏ, ⵉⵙⵙⵉⵙⴼⵉⵡ ⵎⴰⵙ ⴷ ⵜⵉⵙⵏⵙⵉ ⴰⴷ ⵉⴷⴷⴰ ⴷ ⴳ ⵓⵙⴰⵜⵉ ⵏ ⵜⵓⴳⴳⴰⵙ ⵏⵏⴰ ⵏⵏ ⵉⵍⵍⴰⵏ ⵉ ⵓⵙⴷⵓⵙ ⵏ ⵓⵙⵍⵎⴷ ⴰⵎⵓⵟⵟⵓⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵢⵍⵍⵉ ⵉⵎⵎⴰⵍⵏ ⵜⴰⵣⵣⵉⴳⵣⵜ ⵜⴰⵎⴰⵏⴰⵡⵜ ⴳ ⵢⵉⴳⵔ ⵏ ⵓⵙⵍⵎⴷ ⴰⵎⵓⵟⵟⵓⵏ ⵏ ⵜⵓⵜⵍⴰⵢⵉⵏ ⵜⵉⵏⴰⵎⵓⵔⵉⵏ.
ⵉⵙⵙⵉⵙⴼⵉⵡ ⵎⴰⵙⵙ ⵣⵣⵡⵉⵏ ⵎⴰⵙ ⴷ ⵜⵉⵙⵏⵙⵉ ⵜⵡⴰⵜⵜⵙ ⴰⵙⵍⵎⴷ ⵏ ⵉⵎⵥⵥⵢⴰⵏⵏ ⵉⵙⴽⴽⵉⵍⵏ ⵏ ⵜⴼⵉⵏⴰⵖ ⵙⴳ ⵢⴰⵜ ⵜⵎⵏⵉⴷⵜ ⵜⴰⵎⵢⴰⵖⵜ ⵏⵏⴰ ⵎⵉ ⵉⵔⵅⴰ ⵓⵙⵎⵔⵙ ⵏⵏⵙ ⴷ ⵜⵓⵎⴰⵢⵜ ⵏ ⵓⵙⵍⵎⴷ ⵉⵙⵎⴷⵏ ⵉ ⵓⵙⴱⵓⵖⵍⵓ ⵏ ⵜⵙⵏⵉⴳⵉⵜⵉⵏ ⵏ ⵓⵙⵉⵡⵍ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵙⵙⵎⵜⵔ ⵎⴰⵙ ⴷ ⵜⵉⵙⵏⵙⵉ ⵜⵏⵏⴰⵍ ⵅⴼ ⵜⵉⵜⵉⵇⵏⵉⵜⵉⵏ ⵜⵉⵎⴰⵢⵏⵓⵜⵉⵏ ⵜⵉⵙⴳⵎⴰⵎⵉⵏ ⴷ ⵜⴻⵜⵉⴽⵏⵓⵍⵓⵊⵉⵜⵉⵏ ⵉ ⵓⴹⴰⴽⴰⵍ ⵏ ⵜⵉⵔⵎⵉⵜ ⵏ ⵓⵙⵍⵎⴷ ⵜⵉⵎⵕⵡⵉⵜ ⴷ ⵖ ⵉⵍⵍⴰ ⵓⴼⵊⵊⵉⵊ ⵉ ⵉⵏⵍⵎⴰⴷⵏ.
ⴳ ⵜⵙⴳⴰ ⵏⵏⵙ, ⵉⵣⵎⵎⴻⵎ ⵓⵙⵍⵎⴰⴷ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⵓⴳⴰⴷⵉⵔ, ⵎⴰⵙⵙ ⵄⵢⵢⴰⴷ ⴰⵍⵃⵢⴰⵏ, ⵜⵉⵏⴷⵉ ⵏ ⵓⵙⴱⵓⵖⵍⵓ ⵏ ⵜⵓⵎⴰⵢⵜ ⵜⴰⵎⵓⵟⵟⵓⵏⵜ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵙⴷⴷⵉⴷ ⵎⴰⵙ ⴷ ⵜⵉⴼⵔⴽⵜ ⴷ ⵉⴷⴷⴰⵏ ⵜⵙⵖⴰⵡⵙⴰ ⵙ ⵓⵏⵓⴹⵓ ⵏ ⵜⵓⴳⴳⴰⵙ ⵉ ⵓⵙⵓⵊⴷ ⵏ ⵉⵙⵓⴳⴰⵎ ⵉⵏⵎⵍⴰⵏⵏ ⵉⵎⵓⵟⵟⵓⵏⵏ ⴹⴼⵕⵏⵉⵏ ⴰⵙⵙⴰⵔⵏ ⵏ ⵓⵣⵎⵣ ⴰⴷ.
ⵎⴽⵍⵍⵉ ⵢⵓⵎⵥ ⵅⴼ ⵓⵙⵓⵖⵏ ⵏ ⵓⵙⵙⴱⵖⵔ ⵏ ⵜⵉⵜⵉⵇⵏⵉⵜⵉⵏ ⵜⵉⵜⵔⴰⵔⵉⵏ, ⵙⵍⴰⵡⴰⵏ ⴰⴽⴽⵯ ⵜⵉⵖⵉⵙⵜ ⵜⴰⵙⵎⴳⵓⵔⵜ, ⴳ ⵓⵙⴱⵓⵖⵍⵓ ⵏ ⵜⵙⵏⵙⵉⵡⵉⵏ ⴷ ⵜⵕⵉⵕⴹⵉⵏ ⵜⵉⵏⵎⵍⴰⵏⵉⵏ ⵏⵏⴰ ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵓⴷⵖⴰⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⴰⵙⴳⵎⴰⵏ ⴷ ⵓⴷⵍⵙⴰⵏ ⴳ ⵜⴳⵍⴷⵉⵜ.
ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵀⵍⴰ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⴳ ⵓⴳⵔⵙⵉⴼ, ⴱⴰⴷⵔ ⴱⵓⴷⵀⴰⵏ, ⵉⵙⵎⴰⵏⴰⵔ ⵜⵉⵏⴷⵉ ⵜⴰⵎⵣⵔⴰⵢⵜ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⴳ ⵓⴼⵔⴰⴳ ⵏ ⵜⵎⴰⴳⵉⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.
ⵉⵙⴷⴷⵉⴷ ⵎⴰⵙⵙ ⴱⵓⴷⵀⴰⵏ, ⴳ ⵢⴰⵜ ⵜⵙⴳⵓⵔⵉ ⵏ ⵜⵡⵡⵓⵔⵜ ⵜⴰⵎⴰⵣⵉⵖⵜ ⵏ ⵜⵙⵏⵓⵔⴰⵢⵜ ⵏ ⵍⵎⵖⵔⵉⴱ ⴰⵎⵇⵇⵔⴰⵏ ⵏ ⵜⵏⵖⵎⴰⵙⵜ, ⵅⴼ ⵓⵙⵓⵖⵏ ⵏ ⵓⴹⴼⵓⵕ ⵏ ⵓⵙⴽⴽⵉⵍ ⴰⴷ ⵉ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵜⵖⵉⵙⵜ ⵜⴰⵙⵎⴳⵓⵔⵜ, ⵉⴼⴽ ⴰⵎⴷⵢⴰ ⵏ ⵜⵉⵔⵎⵉⵜ ⵉⵎⵓⵔⵙⵏ ⵏ ⵜⵎⵀⵍⴰ ⵏ ⵓⴳⵓⵔⵙⵉⴼ ⴳ ⵓⵜⴰⵔⴰⵙ ⵏ ⴽⵓⵕⵓⵏⴰ ⴳ ⵓⵙⵎⵔⵙ ⵏ ⵉⵙⵓⴳⴰⵎ ⵉⵎⵓⵟⵟⵓⵏⵏ ⵉ ⵓⵙⵍⵎⴷ ⵏ ⵉⵎⵥⵥⵢⴰⵏⵏ, ⴰⵢⵍⵍⵉ ⵉⵜⵜⵙⴷⴷⵉⴷⵏ ⴰⵣⵎⴰⵔ ⵏ ⵜⵏⴰⵎⵉⵜ ⵏ ⵓⵙⴽⴽⵉⵍ ⴰⴷ ⴷ ⵡⴰⵙⵙⴰⵔⵏ ⵏ ⵓⵣⵎⵣ ⴰⵜⵔⴰⵔ.
ⴰⴷ ⵏⵙⵙⵎⵜⵔ ⵎⴰⵙ ⴷ 10 ⴱⵕⴰⵢⵕ 2003, ⵉⴳⴰ ⴰⵙⵔⵙ ⴰⵏⴳⴰⵔⴰ ⴳ ⵓⵙⴰⴽⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉⵖ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⵎⵙⴰⵙⴰ ⵏ ⵓⵙⵖⵍⴼ ⵏ ⵓⵙⵇⵇⵉⵎ ⴰⵎⵙⵙⵓⴳⵓⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵙ ⵓⵙⵎⵔⵙ ⵏ ⵓⵙⴽⴽⵉⵍ ⵏ ⵜⴼⵉⵏⴰⵖ ⴰⴷ ⵙⵉⵙ ⵜⵜⵢⴰⵔⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
