ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⴷⵔⴰ ⵜⵡⵖⵏⵉ ⵜⴰⵏⴰⵎⵓⵔⵜ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ « ⵜⵡⴰⴷⴰ ⵏ ⵓⴷⴷⵓⵔ » ⴰⵙⵙ ⴰⴷ 07 ⵏⵓⵡⴰⵏⴱⵉⵔ ⴳ ⵕⵕⴱⴰⵟ ⵙ ⵓⵖⵔⵉ ⵏ ⵓⵣⴷⴰⵢ ⴰⵏⴰⵎⵓⵔ ⴰⵎⴰⵜⵓ ⵏ ⵢⵉⴳⵔ ⵏ ⵓⵙⵙⵍⵎⴷ ⵏⵏⴰ ⴳ ⵉⵍⵍⴰ ⵓⵏⵎⴰⵍⵍⵓ ⴷ 21 ⵏ ⵜⵡⵖⵏⵉ ⵏ ⵓⵙⵙⵍⵎⴷ, ⴰⵡⴷ ⵜⴰⵡⵖⵏⵉ ⵜⴰⵎⵓⵏⴰⵏⵜ ⵏ ⵢⵉⴳⵔ ⵏ ⵓⵙⵙⵍⵎⴷ ⴳ ⵍⵎⵖⵔⵉⴱ.
ⵎⴽ ⵍⵍⵉ ⵙ ⵓⵍⵍⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵉⵎⴰⵜⴰⵔⵉⵏ ⵏⵏⴰ ⵢⴰⵇⵔⴰⵏ ⵙ ⵓⴼⵓⵖ ⵏ ⵓⵎⴰⵡⵙⴰⵙ ⵏ ⵓⵙⴳⵎⵉ ⵜⴰⵏⴰⵎⵓⵔⵜ ⴷ ⵓⵙⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⵛⴰⴽⵉⴱ ⴱⵏ ⵎⵓⵙⴰ ⴷ ⴰⴷ ⵉⴹⵀⵕ « ⵓⵏⵎⴰⵍⴰ ⴰⴷⵙⵍⴰⵏ » ⵉ ⵎⵙⵖⴰⵏⵏ ⵏ ⵢⵉⴳⵔ ⵏ ⵓⵙⴳⵎⵉ ⴰⵏⴰⵎⵓⵔ.
ⵎⴽ ⵍⵍⵉ ⵙ ⵜⵜⵔⵏ ⴰⵡⴷ ⴰⴷ ⵜⵉⵍⵉ ⵜⵎⵙⵙⴽⵯⵜⵉⵜ ⵜⴰⵎⴰⵡⴰⵙⵜ ⵉⴼⴰⵡⵏ ⵏⵏⴰ ⵔⴰⴷ ⵉⵙⵏⵎⴰⵍⴰ ⵜⴰⵥⵍⴰⵢⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵙⵍⵎⴷ ⴰⵎⵏⵣⵓ ⴷ ⴰⴷ ⵜⵉⵍⵉ ⵜⵡⵓⵔⵉ ⵙ ⵓⵙⵏⵎⴰⵍⴰ ⵉⴷⵓⵙⵏ ⵎⴽ ⵏⵏⴰ ⵉⵍⵍⴰⵏ ⴳ ⵜⵎⵙⵙⴽⵯⵜⵉⵜⵉⵏ ⵏⵏⴰ ⵉⵙⵏⵎⴰⵍⴰⵏ ⴰⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ 24 ⵏ ⵜⵙⴰⵔⴰⴳⵜ ⴷ ⵜⴰⵎ ⵜⵔⵔⵓⴱⴰ.
ⵎⵓⵏⵏ ⵉⵎⴰⴷⵔⴰⵡⵏ ⴳ ⵜⴰⵡⴰⴷⴰ ⴰⴷ ⵜⴰⵏⴰⵎⵓⵔⵜ ⵏⵏⴰ ⴳ ⵉⵍⵍⴰ ⵉⴼⴹⵏⵏ ⵏ ⵜⵡⵜⵎⵉⵏ ⴷ ⵉⵔⴳⴰⵣⵏ ⵏ ⵓⵙⵙⵍⵎⴷ ⵎⴰⵙ ⴷ ⴰⴷⴷⴰⴷ ⵏ ⵜⵎⴰⵣⵉⵖⵜ ⵉⵇⵇⵉⵎⵉ ⴳ ⵓⴷⵖⴰⵔ ⵏⵏⵙ, ⴷ ⵉⵙ ⴰⴽⴽⵯ ⵢⴰⵖⵓⵍ ⵙ ⴹⴰⵕⴰⵜ ⴳ ⵜⴰⵙⵓⵜ ⵏ ⵓⵎⴰⵡⵙⴰⵙ ⵏ ⵖⵉⵍⴰⴷ, ⵙⴷⴷⵉⴷⵏ ⵎⴰⵙ ⴷ » ⵜⵉⵔⵉⵜ ⵜⴰⵙⵔⵜⴰⵏⵜ » ⴰⵔ ⵜⵙⴰⵡⴰⵍ ⵖⴰⵙ ⵅⴼ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖⴰⵙ ⴳ ⵓⵙⵍⵎⴷ ⴰⵎⵏⵣⵓ .
ⵜⵙⴷⴷⵉⴷ ⵎⴰⵙⵙⴰ ⵃⴰⴼⵉⴹⴰ ⴱⵏⴽⴰⵀⵉⵢⴰ, ⵜⴰⵙⵍⵎⴰⴷⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵀⵍⴰ ⵏ ⵍⵃⵓⵣ ⵎⴰⵙ ⴰⵏⵎⴰⵍⴰ ⴰⴷⵙⵍⴰⵏ ⵏⵏⴰ ⵉⵙⴽⵔ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⵎⴰⵙ ⵉⵛⵇⵇⴰ ⴳ ⵓⵣⵔⴼ ⵏ ⵉⵙⵍⵎⴰⴷⵏ ⵏ ⵜⵙⵍⵎⴰⴷⵉⵏ, ⵜⵙⴷⴷⵉⴷ ⴰⵡⴷ ⵎⴰⵙ ⴰⵙ ⵙⵙⴰⵖⵏ ⵙ ⵢⵉⵙⵎ ⴰⵏⵎⴰⵍⴰ ⵏ ⵓⵖⵉⵍⵓⴼ. ⴳ ⵜⵙⴳⴰ ⵏⵏⵉⴹⵏ ⵉⵙⴷⴷⵉⴷ ⵎⵓⵃⵎⵎⴰⴷ ⴼⵓⴽⴰⵍ ⴰⵙⵍⵎⴰⴷ ⵏ ⵜⵎⴰⵣⵉⵖⵜ ⴳ ⵜⵎⵀⵍⴰ ⵏ ⵙⵉⴷⵉ ⵇⴰⵙⵎ ⵎⴰⵙ ⴷ ⵜⴰⵡⵖⵏⵉ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵎⵙⴰⵙⴰ ⴰⴽⴷ ⵜⵡⵏⵖⵉⵡⵉⵏ ⵏⵏⴰ ⵉⵍⵍⴰⵏ ⴳ ⵜⵡⴰⴷⴰ ⵎⴽ ⵍⵍⵉ ⵙ ⴷ ⴰⴽⴽⵯ ⵎⵙⴰⵙⴰⵏ ⵅⴼ ⵡⴰⵔ ⵜⵉⵔⵉⵜ ⵏ ⵓⵏⵎⴰⵍⴰ ⴰⴷⵙⵍⴰⵏ ⵏⵏⴰ ⵉⵏⵖⴰⵏ ⵉⴳⵔ ⵏ ⵓⵙⵙⵍⵎⴷ, ⴰⵡⴷ ⵉⵎⵓⴽⵔⵉⵙⵏ ⴷ ⵜⵏⵎⵎⴰⵔ ⵏⵏⴰ ⵉⵍⵍⴰⵏ ⵖⵓⵔ ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ .
ⵎⴽ ⵍⵍⵉ ⵉⴱⴷⵔ ⵎⴰⵙ ⵍⵍⴰⵏ ⵜⵓⴳⵜ ⵏ ⵜⵏⵎⵎⴰⵔ ⴷ ⵓⵔ ⵜⵍⵍⵉ ⵜⵉⵔⵉⵜ ⵜⴰⵙⵔⵜⴰⵏⵜ ⵖⵓⵔ ⵜⵏⴱⴰⴹⵜ ⴰⴼⴰⴷ ⴰⴷ ⵜⴼⴽ ⴰⵏⵣⵡⵉ ⵉⵎⵙⴰⵙⴰⵏ ⴰⴽⴷ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵙⵍⵎⴷ ⴰⵎⵏⵣⵓ, ⵎⴽ ⵍⵍⵉ ⵙ ⵉⵏⵏⴰ ⵎⴰⵙ ⴷ ⵙⴳ 2003 ⴰⵔ 2023 ⴰⴷ ⵉⵜⵜⴰⵖⵓⵍ ⵓⵙⴷⴰⵡ ⴰⴷ ⴹⴰⵕⴰⵜ, ⴷ ⵓⵔ ⵜⵍⵍⵉ ⴽⵔⴰ ⵏ ⵜⵎⵙⵙⴽⵯⵜⵉⵜ ⵜⴰⵎⵥⵍⴰⵢⵜ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵉⵏⵏⴰ ⵎⴰⵙ ⴷ ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ ⵖⵓⵔⵙⵏ ⵙⵉⵏ ⵉⵎⵓⴽⵔⵉⵙⵏ ⵏⵏⴰ ⵉⴳⴰⵏ ⴰⵏⵎⴰⵍⴰ ⴰⴷⵙⵍⴰⵏ ⴷ ⵜⵉⵏⵎⵎⴰⵔ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ.
ⵉⵖⵔⴰ ⴼⵓⴽⴰⵍ ⴰⴼⴰⴷ ⴰⴷ ⵉⵍⵉⵏ ⵉⴼⵙⵙⴰⵢⵏ ⵏ ⵢⵉⴳⵔ ⵏ ⵓⵙⵙⵍⵎⴷ ⴷ ⵎⴰⵙ ⴷ ⴰⴷⵖⴰⵔ ⵏ ⵓⵙⵍⵎⴰⴷ ⵉⴳⴰⵜ ⵜⴷⴰⵍⴰ ⵓⵔ ⴷ ⵜⴰⵙⵓⴽⵜ , ⵉⵙⴷⴷⵉⴷ ⴳ ⵓⵙⴰⵜⵉ ⴰⴷ ⵎⴰⵙ ⵓⵔ ⵜⵔⵉ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⴷ ⵜⴰⴼ ⴰⴼⵙⵙⴰⵢ ⵉ ⵓⵙⴷⴰⵡ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⵍ ⵜⴰⴳⴷⵓⴷⴰⵏⵜ.
ⴳ ⵜⵙⴳⴰ ⵏⵏⵉⴹⵏ ⵉⵙⴷⴷⵉⴷ ⵍⵃⵙⵏ ⵓⴱⴰⵙ ⵏⵏⴰ ⵉⴳⴰⵏ ⴰⵙⵍⵡⴰⵢ ⵏ ⵜⵎⵙⵎⵓⵏⵜ ⵜⴰⵙⴳⴰⵡⴰⵏⵜ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⴳ ⵜⵙⴳⴰ ⵏ ⴰⵏⴼⴰ ⵎⴰⵙ ⵜⵓⵜⵔⴰ ⵏ ⵉⵙⵍⵎⴰⴷⵏ ⵏⵏⴰ ⵉⵙⵖⵓⵢⵢⵓⵏ ⴷⴰⵔⵙⵏ ⵜⴰⵣⴷⴰⵢⵜ ⴰⴽⴷ ⵡⴰⵔ ⵜⵉⵔⵉⵜ ⵏ ⵓⵏⵎⴰⵍⴰ ⴰⴷⵙⵍⴰⵏ ⵙ ⵎⴽ ⵉⴳⴰ ⵖⵉⵍⴰ, ⵉⵙⴷⴷⵉⴷ ⴰⵡⴷ ⵎⴰⵙ ⵔⴰⵏ ⴰⴷ ⴰⵙ ⵣⴰⵢⴷⵏ ⴳ ⵜⵖⵔⴰⴷ.
ⵉⵏⵏⴰ ⴰⵡⴷ ⵎⴰⵙ ⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⵙⴰⵙⴰⵏ ⴰⴽⴷ ⵉⵙⵍⵎⴰⴷⵏ ⴰⴽⴽⵯ ⵏ ⵍⵎⵖⵔⵉⴱ ⴳ ⵜⵓⵜⵔⴰ ⴰⴷ, ⴷ ⵉⴱⴷⵔ ⵎⴰⵙ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵔⴰⵏ ⴰⵙⵙⵕⵚⵓ ⴷ ⴰⴷ ⵜⵉⵍⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵣⵓⵏⵉⵡⵉⵏ ⴰⴽⴽⵯ ⴳ ⵓⵙⵏⵎⴰⵍ ⴰⵙⴳⵎⴰⵏ, ⴰⵡⴷ ⵉⴱⴷⴷⵉ ⵅⴼ ⵜⵉⴷⵜ ⴷ ⵜⵉⵍⵍⴰⵡⵜ ⵏ ⵓⵙⵙⵍⵎⴷ ⵏ ⵜⵎⴰⵣⵉⵖⵜ ⵏⵏⴰ ⴳ ⵉⵍⵍⴰ ⵜⵓⴳⵜⵜ ⵏ ⵜⵏⵎⵎⴰⵔ.
ⵢⵓⵔⴰ ⵜ: ⵎⵓⵏⵜⴰⵚⵉⵕ ⵉⵜⵔⵉ
ⴰⵙⵓⵖⵍ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ: ⴰⵙⵎⴰ ⵎⵓⴷⵓⴱⴰⵀ
