ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⵙⵉⵜⴳ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎⵢⴰⵖ ⴰⵎⴷⵡⴰⵙ ⴷ ⵓⵎⵏⵉⴳ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ ⴷ ⵜⵎⴰⵡⴰⵙⵜ ⵏ ⵜⵣⵔⴼⵜ ⴰⴽⴷ ⵉⵙⵖⵍⴰⴼⵏ ⵏ ⵓⵙⵇⵇⵉⵎ ⴷ ⵉⵎⵉⵙ ⵏⵏⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷⴼⴼⵉⵔ ⵏ ⵉⵔⵣⴰⴼⵏ ⵏ ⵡⴰⵔⴰⵢ ⵏⵏⴰ ⵉⵙⴽⵔ ⵉⵎⵉⵙ ⵉ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⵉⴹⴼⴰⵕⵏ ⵉ ⵜⵎⵔⵙⴰⵍ ⴰⴷ. ⴰⵎⵢⴰⵖ ⴰⴷ ⵉⵖⵓⴷⴰⵏ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, « ⵍⴰ ⵉⵙⴷⵓⵙ ⴰⵔⴰⵢ, ⵉⵏⴼⵔⵓ ⴰⵣⵔⴰⴽ ⵏ ⵡⴰⴷⴷⵓⵔ ⵏ ⵓⴼⴳⴰⵏ ⴷ ⵜⵏⴱⴰⴹⵜ ⵏ ⵓⵙⵍⴳⵏ ».
ⵜⵉⴳⴳⵯⴰⵣ ⴰⴷ, ⵜⵔⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⴷⴰ ⵎⵎⴰⵍⵏⵜ ⵜⵉⵔⴰⵜ ⵉⵛⵛⴰⵔⵏ ⵏ ⵓⵙⵖⵣⵏ ⵏ ⵉⵏⴰⵡⴰⵢⵏ ⵉⵣⵣⵉⴳⵣⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴷⵓⵙⵏⵜ ⴰⵡⵇⵇⵔ ⵏ ⵉⵙⵖⵍⴰⴼ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵉⵙ ⵏⵏⵙ ⵏ ⵡⴰⵔⴰⵢ ⴷ ⵓⵙⵓⵖⵏ ⵙ ⵜⵡⵓⵔⵉ ⵅⴼ ⵓⵣⵣⴳⵉⵔ ⵏⵏⵙⵏ ⵙ ⵜⵡⵉⵍⴰ ⵉⵕⵡⴰⵏ.
ⵜⴽⴽⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵍⴰ ⵜⵙⴰⵡⴰⵍ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵉⵚⴰⵃⴰⵏ ⵉ ⵉⵎⵙⵖⴰⵏⵏ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ ⵅⴼ ⵓⵙⵏⵜⵍ « ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵉⵙⵓⵔⵙⵏ ⵏ ⵜⵎⵣⵡⴰⴳⵜ: ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⴰⵜⵉ ⴰⵏⴰⵎⵓⵔ ⵏ ⵓⴼⵔⴰⴳ », ⵏⵏⴰ ⵉⵙⵏⵓⴱⴳⵏ, ⴳ ⵉⵎⴰⵍⴰⵙⵙ ⴰⴷ, ⵓⵙⵉⵏⴰⴳ ⵏ ⵕⵕⴱⴰⵟ – ⴷⵔⵉⵙ ⴱⵏⵣⴽⵔⵉ – ⵉ ⵉⵣⵔⴼⴰⵏ ⵏ ⵓⴼⴳⴰⵏ. ⵜⴻⵜⵜⵓⵣⵣⴳⵉⵔ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵏⵏⴰ ⵉⵙⵎⵓⵏⵏ ⵜⵉⵎⵔⵙⴰⵍ ⵏ ⵉⵣⵔⴼⴰⵏ ⴷ ⵜⵏⴼⵔⵓⵜ, ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ.
ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵡⴰⴷⴷⵓⵔ ⵏ ⵉⵎⵢⴰⵖⵏ ⴰⴷ ⴳ ⵓⵙⴷⵓⵙ ⵏ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⴳ ⵓⵙⵡⵓⴷⴷⵓ ⵏ ⵡⴰⵎⵎⴰⵙⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ, ⵜⵙⵙⵎⵜⵔ ⵎⴰⵙ ⵖⴰⵢⴰ ⴷ ⵔⴰⴷ ⵢⴰⵡⵙ ⴳ ⵜⵏⴼⵍⵉⵜ ⵏ ⵜⵎⵙⴽⵔⵉⵏ ⵙ ⵎⴰⴷ ⵉⵎⵙⴰⵙⴰⵏ ⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵡⵓⵔⵉ ⵓⵙⵇⵇⵉⵎ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ ⵜⵉⵣⵉ ⵉⵣⵔⵉⵏ ⵅⴼ ⵓⵙⵎⵓⵜⵜⴳ ⵏ ⵉⵙⵎⴰⵜⵜⴰⴳⵏ ⴷ ⵜⵙⵎⴰⵜⵜⴰⴳⵉⵏ ⴳ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷⴼⴼⵉⵔ ⵎⴰ ⵉⵜⵜⵓⵖⵜⴰⵙ ⴰⴷ ⵙⵡⵓⵔⵉⵏ, ⵙⴳ ⵉⵎⴰⵍⴰⵙⵙ ⴰⴷ ⵅⴼ ⵜⵎⵣⵡⴰⴳⵜ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ ⴷ ⵉⵎⵣⵡⴰⴳⵏ.
