ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 17 ⵎⴰⵕⵚ 2023 ⴳ ⵕⵕⴱⴰⵟ, ⵢⴰⵏ ⵓⵎⵙⴳⵔⴰⵡ ⴰⴽⴷ ⵉⴳⵏⵙⴰⵙ ⵏ ⵜⵎⵔⵙⴰⵍ ⵜⵉⵙⵏⵖⵎⴰⵙⵉⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴰⴼⴰⴷ ⴰⴷ ⵙⵙⵏⴽⴷⵏ ⴰⵏⵎⵎⴰⵍ ⵏⵏⴰ ⴷ ⵙⵙⵓⴼⵖⵏ ⴷⴷⴰⵡ ⵓⵙⴳⵓⵎ ⵏ « ⴳ ⵓⵡⵜⵜⴰⵙ ⵏ ⵢⴰⵏ ⵓⵙⵏⵖⵎⵙ ⵉⵍⴻⵍⵍⵉ ⵙⴳ ⵜⵡⵍⴰⴼⵉⵏ ⵜⵉⵙⵍⴰⵡⴰⵢⵉⵏ ⵉⵚⴽⴰⵏ ⵅⴼ ⵡⴰⵏⴰⵡ ⴰⵏⴰⵎⵓⵏ ».
ⴰⵏⵎⵎⴰⵍ ⴰⴷ, ⵏⵏⴰ ⵜⵙⵙⴽⵔ ⵎⴰⵙⵙⴰ ⴰⵎⵉⵏⴰ ⵍⵎⵔⵉⵏⵉ ⵍⵡⴰⵀⵀⴰⴱⵉ, ⵜⴰⵎⵓⵣⴰⵢⵜ ⵜⴰⴳⵔⴰⵖⵍⴰⵏⵜ ⴳ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⵏⵙⵙⵉⵅⴼⵜ ⵜⴰⵇⴷⵉⵎⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⴳⴰ ⵢⴰⵏ ⵓⵙⵎⴰⵜⵜⴰⵔ ⵏ ⵉⵙⴰⴳⵎⵏ ⵉⵙⴰⵖⵓⵍⵏ, ⵉⵙⵖⴰⵔⴰⵙⵏ ⴷ ⵉⵎⵙⵡⵓⵔⴰ, ⵏⵏⴰ ⵉⵜⵜⵓⵙⵓⵊⴷⵏ ⵉ ⵉⵣⵣⵓⵍⴰⵏⵏ ⵏ ⵓⵙⵏⵖⵎⵙ ⴰⴼⴰⴷ ⴰⴷ ⵉⵙⵉⵏⵏ ⵓⴳⴰⵔ, ⴰⴷ ⵔⴷⵍⵏ ⴷ ⴰⴷ ⵙⴱⴷⴷⵏ ⴰⵏⵢⵓⴷⴷⵓ ⵏ ⵜⵡⵍⴰⴼⵉⵏ ⵜⵉⵙⵍⴰⵡⴰⵢⵉⵏ ⵉⵚⴽⴰⵏ ⵅⴼ ⵡⴰⵏⴰⵡ.
ⵉⵡⵏⴰⵏ ⵏ ⵜⴳⵓⵔⵉ ⵏⵏⵙ, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ « ⴰⵙⵓⴼⵖ ⵏ ⵓⵏⵎⵎⴰⵍ ⴰⴷ ⵉⵜⵜⵓⵣⵎⵎⴻⵎ ⴳ ⵜⵙⵎⵉⴳⵍⵜ ⴷ ⵜⴳⴰⵡⵜ ⵜⴰⵙⵓⵍⴰⵏⵜ ⵏ ⵜⵎⵔⵙⵍⵜ ⵏ ⵓⵙⵏⴰⵎ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⴳⵎⵉ ⵏ ⵜⴷⵍⵙⴰ ⵏ ⵉⵙⴽⵉⵍ ⴷ ⵓⵙⵉⴽⵙⵍ ⴳⵔ ⵉⵏⵎⵓⵔⵉⵏ ». « ⵜⴰⵏⵜⴰⵎⵜ ⴰⴷ ⵏⵏⴰ ⵔⴰⴷ ⵢⵉⵍⵉ ⵜⴰⵡⵓⵔⵉ ⵖⵓⵔⵙ ⴽⵉⴳⴰⵏ ⵏ ⵜⵕⵡⵉ ⵜⵚⴽⵓ ⵅⴼ ⵉⵎⵏⵣⴰⵢ ⵉⴷⵙⵍⴰⵏⵏ ⵏ ⵓⵙⵏⴰⵎ ⵉⵙⵉⵎⴰⵏⵏ ⵏ ⵓⵙⵏⵖⵎⵙ : ⵜⵉⵍⴻⵍⵍⵉ ⵏ ⵓⵡⵏⵏⵉ ⴷ ⵓⵙⵉⴽⵙⵍ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ, ⵙⵉⵏ ⵉⵎⵏⵣⴰⵢⵏ ⵖⵓⵔ ⵉⵍⵍⴰ ⵡⴰⵜⵉⴳ ⴰⴷⵙⵍⴰⵏ » ⴰⵢ ⵜⵔⵏⴰ ⴳ ⵓⵡⵏⵏⵉ ⵏⵏⵙ.
ⴳ ⵜⵙⴳⴰ ⵏⵏⵙ, ⵜⵏⵏⴰ ⵎⴰⵙⵙⴰ ⵍⵎⵔⵉⵏⵉ ⵍⵡⴰⵀⵀⴰⴱⵉ, ⵜⴰⵎⴰⵔⴰⵢⵜ ⵏ ⵓⵏⵎⵎⴰⵍ, ⵉⵙ « ⴰⵏⵎⵎⴰⵍ ⴰⴷ ⵓⵔ ⵉⴳⵉ ⴰⵙⵍⵎⴰⴷ ⵏⵖ ⴰⴷⵍⵉⵙ ⵏ ⵜⵎⵙⵉⵔⵉⵏ, ⵎⴰⵛⴰ ⴷⴰ ⵉⵙⵙⴽⵜⴰⵢ ⵉⵙⴼⴽⴰ, ⴰⵔ ⵉⵙⵙⴽⴰⵏ ⵉⵎⴰⵙⵙⵏ ⴰⵔ ⵉⵕⵥⵥⵎ ⵜⵉⵡⵡⵓⵔⴰ ⴰⴼⴰⴷ ⴰⴷ ⵉⵙⵙⵃⵎⵍ ⴰⵔⵣⵣⵓ ⵓⴳⴰⵔ, ⴰⵔ ⵉⵜⵜⴰⵜⴳ ⵅⴼ ⵜⴳⵣⵙⵉ ⵜⴰⵢⵉⵡⴰⵏⵜ ⴷ ⵜⵎⴳⵔⴰⵡⵜ ⵏ ⵉⵎⵙⵡⵓⵔⴰ ⴷ ⵜⵎⵙⵡⵓⵔⴰ ⴷ ⵡⴰⵜⵉⴳ ⴰⵎⵔⵏⵓ ⵏⵏⵙⵏ ». ⵜⵏⵏⴰ ⴷⵉⵖ ⵎⴰⵙⵙⴰ ⵍⵎⵔⵉⵏⵉ ⵉⵙ « ⴰⵙⵡⵓⵔⵉ ⴳ ⵓⵡⵜⵜⴰⵙ ⵏ ⵓⵙⵉⴽⵙⵍ ⴳⵔ ⵡⴰⵏⴰⵡⵏ ⵉⴳⴰ ⴰⵥⵟⵟⴰ ⴰⴷⵙⵍⴰⵏ ⵏ ⵓⵏⵎⵎⴰⵍ ⴰⴷ ».
ⴰⴷⵍⵉⵙ ⴰⴷ ⵏⵏⴰ ⵔⴰⴷ ⵉⴼⴼⵖ ⵖⵔ ⴰⴳⴷⵓⴷ ⵙ ⵓⴱⵔⵉⴷ ⵏ ⵓⵙⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ , ⵉⵚⴽⴰ ⵅⴼ ⵙⵉⵏ ⵉⴳⵣⵣⵓⵎⵏ ⵉⵣⴷⵉⵏ ⴳⵔⴰⵙⵏ. ⴰⴳⵣⵣⵓⵎ ⴰⵎⵣⵡⴰⵔⵓ ⴷⴰ ⵉⵙⵙⴽⵜⴰⵢ ⴽⵉⴳⴰⵏ ⵏ ⵉⵙⴼⴽⴰ ⵏ ⵜⵖⴰⵔⴰⵙⵉⵏ ⴷ ⴰⵔ ⵉⵙⵙⵎⵏⴰⴷ ⵜⵉⵖⵜⴰⵙⵉⵏ ⵜⵓⵣⵔⵉⴼⵉⵏ ⴷ ⵜⵙⴳⵍⴰⵏⵉⵏ ⵉⵣⴷⵉⵏ ⴷ ⵓⵎⵏⵏⵓⵖ ⵎⴳⴰⵍ ⵜⵉⵡⵍⴰⴼⵉⵏ ⵜⵉⵙⵍⴰⵡⴰⵢⵉⵏ ⵉⵣⴷⵉⵏ ⴷ ⵡⴰⵏⴰⵡ ⴰⴳⵓⵏⵙ ⵏ ⵓⵙⵏⵖⵎⵙ. ⴰⴳⵣⵣⵓⵎ ⵡⵉⵙⵙ ⵙⵉⵏ ⴷⵉⴳⵙ ⵙⴹⵉⵙ ⵏ ⵉⵍⵓⴳⵏ ⵉⵙⴳⵓⵎⴰⵏⵏ ⵉⵖⵉⵢⵏ ⴰⴷ ⵢⴰⵡⵙ ⴳ ⵓⵙⵉⴷⴼ ⵏ ⵡⴰⵏⴰⵡ ⴰⴳⵓⵏⵙ ⵏ ⴽⵉⴳⴰⵏ ⵏ ⵉⵙⵎⵉⵍⵏ ⵉⵙⵏⵖⵎⴰⵙⵏ ⴷ ⴰⵡⴷ ⴳ ⵓⵙⵡⵉⵔ ⵏ ⵓⵏⴱⴰⴹ ⵏ ⵜⵖⴰⵎⵙⴰ. ⵉⵙⴳⵓⵎⵏ ⴰⴷ, ⵣⴷⵉⵏ ⴷ ⵜⵓⵎⴰⵢⵉⵏ ⵏ ⵓⵙⵏⵖⵎⵙ ⴷ ⵉⵖⴰⵡⴰⵙⵏ ⵏ ⵡⵓⵔⴰⵔⵏ : ⵉⵖⵎⵉⵙⵏ ⵉⵕⴰⴷⵢⵓⴼⵓⵏⵉⵢⵏ ⴷ ⵉⵜⵍⴼⴰⵣⵏ ⴰⴽⴷ ⵉⵙⴰⵢⵙⵏ ⵏ ⵓⵎⵙⴳⴷⴰⵍ ⴷ ⵓⵎⴷⴰⴽⴰⵕ, ⴰⵙⵎⴽⵍ ⵏ ⵜⴽⵕⴹⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⵜⴰⴷⵓⵍⵉ ⵜⴰⵙⵖⵎⵙⴰⵏⵜ ⵏ ⵉⵙⵜⴰⵢⵏ, ⴰⵙⵎⴽⵍ ⵏ ⵏ ⵜⵎⵙⴰⵔⵜ ⵏ ⵓⵣⵡⴰⴳ ⴰⴽⴷ ⴰⵙⵓⵙⵙⵏ ⴷ ⵓⵙⵏⵓⵍⴼⵓ ⴰⵙⵉⵏⵉⵎⴰⵟⵓⴳⵔⴰⴼⵉ ⵉⵚⴽⴰⵏ ⵅⴼ ⵡⴰⵏⴰⵡ.
ⴰⵎⵓⵏ ⴳ ⵓⵎⵙⴳⵔⴰⵡ ⴰⴷ ⴽⵉⴳⴰⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⴳⵏⵙⴰⵙⵏ ⵏ ⵜⴳⵔⴰⵡⵉⵏ ⵏ ⵓⵙⵉⴽⵙⵍ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵓⵏⵣⵡⴰⵢ ⴷ ⵓⵜⵉⵍⵉⴼⵉⵣⵢⵓⵏ ⴰⴽⴷ 2ⵎ, ⵉⵏⵖⵎⴰⵙⵏ, ⴷ ⵉⴳⵏⵙⴰⵙ ⵏ ⵜⵎⵙⵎⵓⵏⵉⵏ ⵏ ⵉⵏⵖⵎⴰⵙⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ.
