ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⵙⵉⵅⴼ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵜⴰⵎⵏⵓⴽⴰⵍⵜ ⵍⴰⵍⵍⴰ ⵃⴰⵙⵏⴰ ⵜⴰⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ, ⴰⵙⵙ ⵏ ⵓⵙⵉⵏⴰⵙ ⴳ ⴼⴰⵙ, ⴰⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵜⵎⵔⵙⵍⵜ ⵙ ⵜⵉⵍⵉⵜ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ.
ⴳ ⵢⴰⵜ ⵜⴳⵓⵔⵉ ⵙ ⵜⵎⵍⴷⴰ, ⵜⵙⴳⵔ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵜⵉⴼⴰⵡⵜ ⵅⴼ ⵜⵙⴽⵔⴰⵡⵉⵏ ⵜⵉⵅⴰⵜⴰⵔⵉⵏ ⴷ ⵜⵙⵏⵜⴰⵢⵉⵏ ⵜⵉⴷⵙⵍⴰⵏⵉⵏ ⵏ ⵜⵎⵔⵙⵍⵜ ⵏ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ ⵏ ⵓⵙⴳⴳⵯⴰⵙ 2023.
ⵜⴱⴷⵔ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵜⴰⵎⵏⵓⴽⴰⵍⵜ ⵍⴰⵍⵍⴰ ⵃⴰⵙⵏⴰ, ⴳ ⵓⵙⴰⵜⵉ ⴰⴷ, ⵙ ⵓⵙⵓⵖⵏ ⵏ ⵜⴰⵜⵜⵓⵢⵜ ⵏⵏⵙ ⴰⵙⵓⵍⴰⵏ ⵎⵏⵉⴷ ⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵙⴳ ⵜⵙⵏⵜⴰⵢⵜ ⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⵉ ⵉⵙⵏⴼⴰⵍ ⵏ ⵓⵏⴳⵉⴳⵜ(AYCH) ⴳ ⵢⴰⵜ ⵜⴳⵓⵔⵉ ⵏⵏⵙ ⵜⴰⵕⵥⵥⵓⵎⵜ ⵏ ⵜⵙⵎⵓⵏⵉ ⵜⴰⵙⴳⵯⵙⴰⵏⵜ ⵜⴰⵎⵣⵡⴰⵔⵓⵜ ⵖⵓⵔ ⴰⵙⵡⵉⵔ ⵢⵓⵍⵉⵏ » ⵏ ⵓⴷⵔⴰⵡ ⵉ ⵢⴰⵏ ⵓⵙⵍⵎⴷ ⴰⵣⴳⵣⴰⵡ », ⵏⵏⴰ ⵜⵙⵏⵎⴰⵍⴰ ⵍⵢⵓⵏⵉⵙⴽⵓ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴷ ⵓⵙⵍⵎⴷ ⴳ ⵓⵡⴰⵏⴽ ⵏ ⵍⵉⵎⴰⵕⴰⵜ ⵜⴰⵄⵕⴰⴱⵜ ⵉⵎⵓⵏⵏ, ⴳ ⵜⵎⵔⴰ ⵏ ⵓⴱⵔⴰⴳⵔⴰⵡ ⵏ ⵉⴳⵎⴰⵎⵏ (ⴽⵓⴱ 28).
ⵜⵙⴷⴷⵉⴷ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴳ ⵜⴳⵓⵔⵉ ⵏⵏⵙ ⵅⴼ ⵜⵉⵏⴷⵉ ⵏ ⵓⵙⴱⴼⵍ ⵏ ⵓⵎⵍⴰⵏ ⵙ ⵜⵡⵉⵍⴰ ⵜⴰⴳⴷⴰⵣⴰⵍⵜ ⴰⴽⴷ ⵉⵡⴰⵏⴽⵏ ⵏ ⵢⵉⴼⴼⵓⵙ, ⵜⵖⵔ ⵙ ⵢⵉⵎⵉⵥ ⵏ ⵜⵎⵙⴽⴰⵔⵉⵏ ⵜⵉⴽⵎⴰⵎⵉⵏ ⵃⵎⴰ ⴰⴷ ⵜⴻⵜⵜⵓⵇⵇⴰⵏ ⵜⵕⵥⵉ ⵜⴰⵎⵓⵟⵟⵓⵏⵜ ⴳ ⵓⵎⵏⵥⴰⵡ ⴰⴼⵔⵉⵇⵉ.
ⴷⴰⵜ ⵍⵍⵉⵖ ⵜⵙⴷⴷⵉⴷ ⵅⴼ ⵜⵎⵍⴰⵍⵜ ⵏⵏⵙ ⴰⵎ ⵜⵎⴰⵙⴰⵢⵜ ⵏ ⵓⵎⵓⵍⵍⵉ ⵏ ⵓⵙⵏⵎⴰⵍⴰ ⵏ ⵜⵎⵜⵜⴰ ⵉⵎⵓⵏⵏ ⵉ ⵜⵎⴰⵙⵙⴰⵏⵉⵏ ⵏ ⵉⴳⴰⵔⵓⵜⵏ ⵉ ⵜⴳⵎⵉ ⵜⴰⵙⵓⵍⴰⵏⵜ, ⵜⴳ ⵜⴰⵙⵏⵜⴰⵢⵜ ⵏⵏⴰ ⵜⴳⵍⵉ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⵜⴰⵔⵓⵏⴱⵉⴹⵜ ⵏ ⵜⵎⴰⵙⵙⴰⵏⵉⵏ ⵏ ⵉⴳⴰⵔⵓⵜⵏ ⵉⴹⴼⵕⵏ ⵉ ⵍⵢⵓⵏⵉⵙⴽⵓ, ⵜⵙⵎⴰⵍ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵅⴼ ⵜⵓⴳⵜⵜ ⵏ ⵉⵙⵏⵜⴰⵢ ⵏⵏⴰ ⵎⵉ ⵜⵕⵥⵎ ⵜⵎⵔⵙⵍⵜ ⵏ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵎⵙⴰⵡⴰⵍ ⵏ ⵜⵎⵔⵙⴰⵍ ⵡⵉⵙ ⴽⵕⴰⴹ, ⵏⵏⴰ ⵉⵜⵜⵓⵏⵎⴰⵍⴰⵏ ⴳ ⵎⵓⵏⴰⴽⵓ ⵢⵓⵏⵢⵓ 2023.
ⵡⴰⵜⵜⵙⵏ ⵉⵙⵏⵜⴰⵢ ⴰⴷ, ⵏⵏⴰ ⵉⵜⵜⵙⵎⴰⴷⵏ ⵉⵖⴰⵡⴰⵙⵏ ⵉⴱⴷⴷⵏ ⵙⴳ ⵉⵙⴳⴳⵯⴰⵙⵏ ⴰⵢⴰⴷ ⵣⵓⵏ ⴷ » ⵉⴼⵜⴰⵙ ⵣⴷⴷⵉⴳⵏⵉⵏ » ⵏⵏⴰ ⵙ ⴰⵔ ⵙⵏⴰⵍⵏⵜ » ⵜⵙⵎⵖⵓⵔⵉⵏ ⵏ ⵍⴰⵍⵍⴰ ⵃⵙⵏⴰ ⵏ ⵜⵖⴰⵔⵉⵏ ⵜⵉⵙⵓⵍⴰⵏⵉⵏ », ⴷ ⵜⵎⴳⴳⵉⵜ ⵏ » ⵢⵉⵍⵍ ⴱⵍⴰ ⴱⵍⴰⵙⵜⵉⴽ » ⵙ ⵡⴰⵏⵏⴰⵍ ⵏ ⵉⵎⵣⵔⴰⵡⵏ ⵏ ⵜⵙⴷⴰⵡⵉⵢⵉⵏ ⵜⵉⴼⵔⵉⵙⵉⵢⵉⵏ ⴳ ⵓⵙⴷⵓⴷ ⵏ ⵜⵓⵙⵙⵏⵉⵡⵉⵏ ⵉⵣⴷⵉⵏ ⴷ ⵉⴳⴰⵔⵓⵜⵏ.
ⴷⴰ ⵜⵜⴰⵊⵊⴰⵏ ⵉⵙⵏⵜⴰⵢⵏ ⴰⴷ, ⵉⵜⵜⵓⵙⴽⴰⵔⵏ ⵙ ⵜⵡⵉⵙⵉ ⴰⴽⴷ ⵡⴰⵎⵎⴰⵙ ⵏ ⵍⵃⴰⵙⴰⵏ ⵡⵉⵙ ⵙⵉⵏ ⴰⴳⵔⴰⵖⵍⴰⵏ ⵏ ⵓⵙⵎⵓⵜⵜⴳ ⴳ ⵜⵡⵏⵏⴰⴹⵜ, ⴰⵙⴽⴰⵔ ⵏ ⵉⵙⵓⴳⴰⵎ ⵏ ⵜⴰⵏⵏⴰⵏⵉⵏ, ⴳⵉⵏ ⵉⵍⵉⴽⵟⵕⵓⵏⵉⵢⵏ, ⵃⵎⴰ ⴰⴷ ⵢⵉⵍⵉ ⵓⵙⵎⵔⵙ ⵏⵏⵙⵏ ⴳ ⵓⵙⴰⵜⵉ ⵏ ⵓⵙⵏⵎⴰⵍⴰ ⵏ ⵉⴳⴰⵔⵓⵜⵏ.
ⵉⴳ ⵓⵙⵓⵖⵏ ⵏ ⵜⵎⵔⵙⵍⵜ ⵙ ⵜⵓⴽⴽⵙⴰ ⵏ ⵍⴽⴰⵕⴱⵓⵏ ⵙⴳ ⵜⴷⵎⵙⴰ ⵜⴰⵏⴰⵎⵓⵔⵜ ⵢⴰⵜ ⵜⵏⵇⵇⵉⴹⵜ ⵜⴰⴷⵙⵍⴰⵏⵜ ⵙⴳ ⵜⵏⵇⵇⴰⴹ ⵉⵜⵜⵢⴰⵡⴱⴷⴰⵔⵏ ⴳ ⵢⵉⵏⴰⵡ ⵏ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⵍⴰⵍⵍⴰ ⵃⴰⵙⵏⴰ, ⵍⵍⵉⵖ ⵜⵙⴰⵡⵍ ⵅⴼ ⵓⵙⵎⵓⵜⵜⴳ ⵉⵜⵜⵢⴰⵡⴼⴽⴰⵏ ⵉ ⵜⵎⵙⵙⵓⵔⵉⵏ ⵢⵉⵡⵙⵏⵉⵏ ⴳ ⵓⵙⵎⵔⵙ ⵏ ⵢⵉⵎⵉⵙ ⵏ ⵓⵙⵉⵟⵟⵏ ⵏ ⵓⴷⵔⵉⵣ ⴰⴽⴰⵕⴱⵓⵏ ⵉ ⵓⵙⵜⴰⵍ ⵏ ⵓⵙⵉⵍⴻⵍ ⵏⵏⵙⵏⵜ, ⴷ ⵓⵙⵎⵓⵜⵜⴳ ⵉⵥⵍⵉⵏ ⵙ ⵓⵙⵥⵕⴼ ⵏ ⵓⵏⴳⵉⴳⵜ ⵉ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ.
ⴰⵢⵍⵍⵉ ⵉⵅⴰⵜⵔⵏ ⴳ ⵜⴳⵓⵔⵉ ⵏ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴷ ⴰⵙⵎⴰⵍ ⵎⵏⵉⴷ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵅⴼ ⵓⵏⵏⵓⵕⵥⵎ ⵏ ⵜⵓⵔⵜⵉⵜ ⵏ ⵍⴰⵃⴱⵓⵍ ⵜⴰⵎⵣⵔⴰⵢⵜ ⴳ ⵎⴽⵏⴰⵙ, ⴷ ⴰⵙⵏⵜⵉ ⵏ ⵓⵎⵓⴽⵏ ⵉⵜⵜⵓⵙⴽⴰⵔ ⵙ ⵜⵡⵉⵙⵉ ⴰⴽⴷ ⵉⵎⴷⵔⴰⵡⵏ ⵏ ⵜⵎⵔⵙⵍⵜ.
ⵜⵙⵎⴷ ⵍⴰⵍ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴰⵡⴰⵍ ⵏⵏⵙ ⵙ ⵜⵉⴽⴽⵉ ⵏ ⵓⵙⵏⵉⵎⵎⵔ ⵉⵥⵉⵍⵏ ⵉ ⵉⵎⴷⵔⴰⵡⵏ ⴰⴽⴽⵯ ⵅⴼ ⵡⴰⵏⵏⴰⵍ ⵏⵏⵙⵏ ⴰⵙⵓⵍⴰⵏ ⴷ ⵓⵙⵓⵖⵏ ⵉⵣⴳⴰⵏ ⵙ ⵜⵙⵏⵜⴰⵢⵉⵏ ⵜⵉⵡⵏⴹⴰⵏⵉⵏ ⵏⵏⴰ ⵜⵙⴽⴰⵔ ⵜⵎⵔⵙⵍⵜ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵢⵉⵎⴰⵍ ⴰⵙⵓⵍⴰⵏ ⴷ ⵓⵏⵎⵢⴰⵙ.
ⵉⵙⵖⵣⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵜⵎⵔⵙⵍⵜ ⵅⴼ ⵜⵏⵎⵎⴰⵍⵉⵏ ⵜⵉⵥⵕⴼⴰⵏⵉⵏ, ⵙ ⵡⴰⵏⵏⴰⵍ ⵅⴼ ⵜⴰⵏⵏⴰⵢⵜ ⵏ ⵓⵎⴰⵜⵔ ⵏ ⵉⵎⵉⴹⴰⵏⵏ ⵓⵍⴳⵉⵏⵏ, ⵏⵏⴰ ⵉⵙⵖⵥⵏⵏ ⵎⴰⵙ ⴷ ⵜⵉⵏⵎⵎⴰⵍⵉⵏ ⵜⵉⵙⴳⵣⴰⵍⵉⵏ ⵏⵎⴰⵍⴰⵏⵉⵏ ⴷ ⵜⵓⵖⵣⵉⵏⵉⵏ ⵢⴰⴽⴽⴰⵏ ⵙⴳ ⵜⵖⵎⵔⵉⵏⵉⵏ ⵏⵏⵙ ⴰⴽⴽⵯ ⵙⵜⴰⵡⵀⵎⵎⴰⵏⵉⵏ, ⵢⴰⵜ ⵜⵡⵍⴰⴼⵜ ⵏ ⵜⵉⴷⵜ ⴷ ⵜⵎⵏⵖⵓⴷⵜ ⵅⴼ ⵜⵢⴰⴼⵓⵜⵉⵏ ⵏ ⵙⵉⵏ ⵉⵙⴳⴳⵯⴰⵙⵏ ⵉⵥⵕⴼⴰⵏⵏ 2022 ⴷ 2023.
ⵜⴰⵎⵔⵙⵍⵜ ⵏ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ ⵜⴻⵜⵜⵓⵙⴽⴰⵔ ⴳ ⵓⵙⴳⴳⵯⴰⵙ ⵏ 2001 ⵙ ⵜⵙⵏⵜⴰⵢⵜ ⵙⴳ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⵉ ⵜⴷⵔⴰⵡⵜ ⴳ ⵓⵙⴼⵔⴽ ⵏ ⵉⵏⵎⵓⵔⴰⵏ ⵙ ⵜⵎⵙⴰⵔⵉⵏ ⵜⵉⵡⵏⴹⴰⵏⵉⵏ.
ⵜⵙⵎⴷⵢⴰ ⵜⵎⵙⴽⵉⵔⵜ ⵜⴰⴷⵙⵍⴰⵏⵜ ⵏ ⵜⵎⵔⵙⵍⵜ ⴳ ⵓⵙⴳⵎⵉ ⴷ ⵓⵙⴼⵔⴽ ⵙ ⵜⴳⵎⵉ ⵜⴰⵙⵓⵍⴰⵏⵜ, ⵜⴰⵡⵜⵜⵙ ⵜⵎⵔⵙⵍⵜ ⴳ ⵜⵎⵙⴽⵉⵔⵜ ⵏⵏⵙ ⴰⴷ ⵉⴳⴷⵓⴷⵏ ⴰⴽⴽⵯ, ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ, ⵙⴳ ⵜⵎⵥⵉ ⵜⴰⵎⵏⵣⵓⵜ ⵙ ⵉⵎⵣⵔⴰⵡⵏ ⴷ ⵉⵏⵎⵓⵔⴰⵏ ⴷ ⵡⴰⵎⵓⵏ ⵓⵖⵔⵉⵎ ⴷ ⵜⵎⵙⵙⵓⵔⵉⵏ ⴷ ⵜⵎⵙⵙⵓⴳⵓⵔⵜ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⵜⵙⴷⴰⵡⵉⵢⵉⵏ ⴷ ⵓⵔⵣⵣⵓ.
ⵜⵓⵎⴰ ⵜⵎⵔⵙⵍⵜ, ⵜⵉⵔⵓⴱⴱⴰ ⵉⵜⵜⵢⴰⵡⵣⵍⴰⵢⵏ ⵙ ⵉⵖⴰⵡⴰⵙⵏ ⵏⵏⵙ ⴳⴳⵓⵜⵏⵉⵏ, ⴷ ⵡⴰⵎⵎⴰⵙ ⵏ ⵍⵃⴰⵙⴰⵏ ⵡⵉⵙ ⵙⵉⵏ ⴰⴳⵔⴰⵖⵍⴰⵏ ⵏ ⵓⵙⵎⵓⵜⵜⴳ ⴳ ⵜⵡⵏⵏⴰⴹⵜ, ⵉⵖⵉⵍ ⵏⵏⵙ ⴰⴽⴰⴷⵉⵎⵉ ⵏⵏⴰ ⵖⵓⵔ ⴰⵏⵙⴰ ⴰⵙⵜⵕⴰⵜⵉⵊⵉ, ⵉⵎⵙⴰⵙⴰⵏ ⴷ ⵜⵖⴰⵔⴰⵙⵜ ⵜⴰⵙⴳⵎⴰⵏⵜ ⵏ ⵜⵎⵔⵙⵍⵜ, ⵉ ⵢⴰⵜ ⵜⵡⵏⵏⴰⴹⵜ, ⴰⵢⵍⵍⵉ ⵉⵙⵙⵔⵓⵙⵏ ⴰⵙⴳⵎⵉ ⵉ ⵜⴳⵎⵉ ⵜⴰⵙⵓⵍⴰⵏⵜ ⴳ ⵡⴰⵎⵎⴰⵙ ⵏ ⵜⴰⵡⵉⵜⵉⵏ ⵏⵏⵙ.
ⴷⴰ ⵜⵣⵣⵉⴳⵉⵣ ⵜⵎⵔⵙⵍⵜ ⵉⵖⴰⵡⴰⵙⵏ ⵜⵜⵢⴰⵡⵙⵜⴰⵢⵏⵉⵏ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ ⵏⵏⴰ ⵅⴼ ⵎⵓⵏⵏ ⵜⵓⴳⵜⵜ ⵏ ⵉⵎⴷⵔⴰⵡⵏ ⵉⴷⵖⵔⴰⵏⵏ ⴷ ⵉⴳⵔⴰⵖⵍⴰⵏⵏ. ⴷⵍⵏ ⵉⵖⴰⵡⴰⵙⵏ ⴰⴷ ⵙⵎⵎⵓⵙ ⵉⴳⵊⴷⴰ ⵏⵏⴰ ⵉⵜⵜⵙⵎⴷⵢⴰⵏ ⴳ » ⵓⵙⴳⵎⵉ ⵉ ⵜⴳⵎⵉ ⵜⴰⵙⵓⵍⴰⵏⵜ », » ⴷ ⵓⴼⵔⴰⴳ ⵏ ⵉⴼⵜⴰⵙⵏ ⴷ ⵉⴳⴰⵔⵓⵜⵏ » ⴷ » ⵓⵖⵓⴷⵓ ⵏ ⵡⴰⴹⵓ ⴷ ⵓⵏⴳⵉⴳⵜ ⴷ ⵓⴼⵔⴰⴳ ⴷ ⵜⴳⵎⵉ ⵏ ⵓⵥⵏⴰⴳ ⵏ ⵉⴳⵊⵊⴰⴼ ⵏ ⵎⵕⵕⴰⴽⵛ » ⴷ » ⵜⵎⴰⵍⵍⴰⵢⵜ ⵜⴰⵙⵓⵍⴰⵏⵜ » ⴷ » ⵜⴽⵏⵏⴰⵡⵜ ⵏ ⵉⵙⵏⵢⵓⴷⴷⵓⵜⵏ ⴷ ⵜⵓⵔⵜⵉⵜⵉⵏ ⵜⵉⵎⵣⵔⴰⵢⵉⵏ ».
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
