ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵉⵍⴰⵏⴷⵉ, ⵢⵓⵙⵉ ⴰⵍⴰ ⵓⵀⵓ, ⴰⵙⵙ ⴰⴷ ⵏ ⵓⴷⵉⵏⴰⵙ ⴳ ⵕⵕⴱⴰⵟ, ⵎⴰⵙ ⴷ ⵍⵎⵖⵔⵉⴱ ⵉⴳⴰ ⵢⴰⵏ ⵓⵎⴷⵔⴰⵡ » ⴱⴰⵀⵔⴰ ⵉⵅⴰⵜⵔⵏ » ⵉ ⵜⵎⵓⵏⵜ ⵜⴰⵡⵕⵓⴱⴱⵉⵜ, ⵉⵙⵎⴰⵏⴰⵔ ⵎⴰⵙ ⴷ ⵜⴰⴳⵍⴷⵉⵜ » ⴷ ⴰⵎⴷⵔⴰⵡ ⵙ ⵓⵏⵛⴽ ⵢⴰⴽⵙⵓⵍⵏ ⵏ ⵜⵉⵏⴷⵉ ⵉ ⴼⵉⵍⴰⵏⴷⴰ ⵍⵍⵉⵖ ⵜⴳⴰ ⴰⴳⵎⴰⵎ ⴰⵎⴰⵢⵏⵓ ⵏ ⵜⵎⵓⵏⵜ.
ⵉⵏⵏⴰ ⵎⴰⵙⵙ ⴰⵍⴰ ⵓⵀⵓ ⴳ ⵜⵙⴳⵓⵔⵉ ⵉ ⵜⵏⵖⵎⴰⵙⵜ ⴹⴰⵕⵜ ⵏ ⵉⵎⵙⴳⴷⴰⵍⵏ ⵉⵙⴽⵔ ⵜⵏ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵕⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ, ⵎⴰⵙ ⴷ ⵍⵎⵖⵔⵉⴱ » ⵖⵓⵔⵙ ⵢⴰⵜ ⵜⵎⵍⴰⵍⵜ ⵜⴰⴷⵙⵍⴰⵏⵜ ⴳ ⵓⴷⵔⴰⵡ ⴷ ⵜⵎⵓⵏⵜ ⵜⴰⵡⵕⵓⴱⴱⵉⵜ ⴳ ⵜⵓⴳⵜⵜ ⵏ ⵢⵉⴳⵔⴰⵏ, ⵙⵍⴰⵡⴰⵏ ⴰⴽⴽⵯ ⴰⵎⵓⵜⵜⵉ ⴰⵥⴹⴰⵕⴰⵏ, ⴷ ⵓⵙⴱⴷⴷⵉ ⵏ ⵜⵓⵎⴰⵏⵜ ⵏ ⵓⵙⵏⴼⵍ ⵏ ⵓⵏⴳⵉⴳⵜ, ⴷ ⵓⵣⵡⴰⴳ ⵓⵔ ⵉⵏⵎⴰⵍⴰⵏ ⴷ ⵓⴱⵔⵙⵉⵡⴷ, ⴷ ⵜⵟⵟⵓⵕⴼⴰ ⴷ ⵜⵎⵙⴰⵔⵉⵏ ⵢⴰⴹⵏⵉⵏ ⵏⵏⴰ ⵖⵓⵔ ⵜⵉⵏⴷⵉ ⵜⴰⵙⵜⵕⴰⵜⵉⵊⵉⵜ.
ⵉⵙⵎⴷ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵉⵍⴰⵏⴷⵉ ⴳ ⵓⵎⵏⴰⴹ ⴰⴷ, ⵎⴰⵙ ⴷ ⵜⴰⵎⴰⵣⵉⵔⵜ ⵏⵏⵙ » ⴷⴰ ⵜⵙⵏⴰⵍ ⵙ ⵜⴰⴳⴳⴰⵍⵜ ⴰⵙⴷⵓⵙ ⵏ ⵜⵣⴷⴰⵢⵉⵏ ⴳⵔ ⵜⵎⵓⵏⵜ ⵜⴰⵡⵕⵓⴱⴱⵉⵜ ⴷ ⵍⵎⵖⵔⵉⴱ ».
ⴳ ⵓⵙⵡⵉⵔ ⴰⵙⵉⵏⵔⴰⵏ, ⵉⵙⵏⵓⵎⵎⵍ ⵎⴰⵙⵙ ⴰⵍⴰ ⴰⵀⵓ ⵜⵉⵣⴷⴰⵢⵉⵏ ⴳⵔ ⵍⵎⵖⵔⵉⴱ ⴷ ⴼⵉⵍⴰⵏⴷⴰ ⵙ « ⵜⵏⵓⴼⵍⴰⵢⵉⵏ » ⵉⵙⵎⴰⵏⴰⵔ ⵎⴰⵙ ⵜⵉⵎⵉⵣⴰⵔ » ⴷⴰ ⴷⵔⵔⵓⵏⵜ ⴽⵉⴳⴰⵏ ⵏ ⵜⵉⵏⴷⵉⵜⵉⵏ ⴷ ⵜⴽⴰⵢⵍⴰⵍⵉⵏ ⵉⵛⵛⴰⵔⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵎⴽⵍⵍⵉ ⵙⵏⴰⵍⵏ ⴰⵏⴳⵔⴰⵡ ⴰⵎⴰⴹⵍⴰⵏ ⵉⴱⴷⴷⵏ ⵅⴼ ⵉⵙⵍⴳⵏⵏ ⵉⵣⵣⵔⴰⴼⵏ ⵉⴳⵔⴰⵖⵍⴰⵏⵏ ».
ⵉⵏⵏⴰ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⴼⵉⵍⴰⵏⴷⵉ ⵎⴰⵙ ⴷ ⴰⵔⵣⴰⴼ ⵏⵏⴰ ⵉⵙⴽⵔ ⵉ ⵍⵎⵖⵔⵉⴱ ⴳ ⵢⵉⵅⴼ ⵏ ⵢⴰⵏ ⵓⴽⴰⴱⴰⵕ ⴰⴱⵕⵍⴰⵎⴰⵏ ⵉⵅⴰⵜⵔⵏ » ⵉⵎⵎⴰⵍⵏ ⵜⴰⴽⴰⵢⵍⴰⵍⵜ ⵏ ⴼⵉⵍⴰⵏⴷⴰ ⴳ ⵓⵙⴷⵔⵓ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵍⴰ ⵏⵏⴰ ⵉⵙⵎⵓⵏⵏ ⵜⵉⵎⵉⵣⴰⵔ ⴰⴷ, ⵉⵙⵙⵎⵜⵔ ⵎⴰⵙ ⵉⴼⴽⴰ ⵜⴰⵖⵓⵔⵉ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵉⵙⴽⵔ ⴰⵔⵣⴰⴼ ⵉ ⵜⵎⴰⵣⵉⵔⵜ ⵏⵏⵙ ⴰⴽⴷ ⵢⴰⵏ ⵓⴽⴰⴱⴰⵕ ⴰⴱⵕⵍⴰⵎⴰⵏ ⴰⵎⵖⵔⵉⴱⵉ » ⵃⵎⴰ ⴰⴷ ⵢⵉⵍⵉ ⵓⴹⴼⵓⵕ ⵏ ⵓⵎⵙⴰⵡⴰⵍ ⴰⴷ ⵉⵥⵍⵉⵏ ».
ⵉⵙⵙⵉⵜⴳ ⴳ ⵓⵎⵏⴰⴹ ⴰⴷ, ⵉⵎⵙⴳⴷⴰⵍⵏ ⵖⵓⵔ ⵜⴰⵢⴰⴼⵓⵜ ⵏⵏⴰ ⵉⵙⴽⵔ ⴷ ⵜⵙⴳⴰ ⵜⴰⵎⵖⵔⵉⴱⵉⵜ, ⵉⵙⵙⵉⵎⵖⵓⵔ ⵎⴰⵙ ⵜⴳⴰ ⵜⴰⵎⵍⴷⴰ ⴰⴷ ⵉⵥⵕ ⵉⵎⵓⴽⵏⵏ ⵏⵏⴰ ⵉⵙⴽⵔ ⵍⵎⵖⵔⵉⴱ ⴷ ⵏⵏⴰ ⵉⵜⵜⵙⵎⴷⵢⴰⵏ ⵙⴳ ⵓⵙⴰⴽⴰ ⵏ ⵜⴳⵎⵉ ⵜⴰⵙⵓⵍⴰⵏⵜ ⵏⵏⴰ ⵜⴹⴼⵕ ⵜⵎⴰⵣⵉⵔⵜ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
