ⵎⴰⵢⴷ ⵏⴳⴰ?

ⴽⵓ ⵢⴰⵙⵙ ⵜⴼⵖ ⴷ ⵖⵉⴼ ⵏⵖ ⵢⴰⵜ ⵜⵎⵓⴽⵔⵉⵙⵜ, ⵙⵓⵎⴰⵜⴰ ⴳ ⵜⵙⴳⴰ ⵏ ⵜⵙⵔⵜⵉⵜ, ⴰⵎ ⵡⴰⵙⵙⵏⵏⴰ ⴰⵎ ⵡⴰⵙⵙ ⵜ ⵎⴰⵏⵉ ⵣⴳ ⴽⴽⴰⵏ ⵉⵙⵙⴳⵏⴰⵏ ⵡⵓⵙⵙⴰⵏ ⴰ ⴰⵖⴰ ⴽⴽⵉⵏ ⵉⴼⵉⵍⴰⵏ ⵏⵙⵏ. ⵎⵛ ⵏⵙⵔⵙ ⴷⴰⵜ ⴰⵖ ⵉⵎⵖⵏⴰⵏ, ⵎⵉ ⵓⵖⵏ ⵉⴼⵜⵜⵉⵡⵊⵏ ⵏⵙⵏ, ⵉⵏⴳⵔ ⵉ ⵙⵏⴰⵜ ⵏ ⵜⵏⴱⴱⴰⴹ, ⴷⵣⴰⵢⵔ ⴷ ⵎⵔⵔⵓⴽ, ⵓⵔ ⵉⴷ ⵉⵏⴳⵔ ⵉⵎⴰⴷⴰⵏ ⵏ ⵜⵎⵉⵣⴰⵔ ⴰ, ⴰⵎ ⵓⵢⵍⵍⵉ ⵙ ⴰⵔ ⵏⵜⵜⵓⵙⵙⵍⵀⵓ ⴽⵉⴳⴰⵏ ⵉⵙⴳⴳⵡⴰⵙⵏ ⴰⵢⴰ.

ⵎⵛ ⴷ ⵢⵓⵙⴰ ⵡⴰⵡⴰⵍ ⴰ ⵅⴼ ⵜⵙⵔⵜⵉⵜ, ⵍⵍⵉ ⵏⵏⴰⵏ ⵉⵎⵣⴳⵓⵔⴰ ⵅⴼ ⵜⵣⴷⴷⵓⵢⵜ ⵓⵔⴳⴰⵣ ⴷ ⵜⵎⵜⵜⵓⵜ : «ⵉⴹ ⴰⵎⵣⵡⴰⵔⵓ ⴰⵢⴷⴰ ⵢⵜⵜⵎⵜⴰⵜ ⵓⵎⵓⵛ» ⴰⵡⴰⵍ ⴰⵖⴰ ⴷ ⵢⴰⵙⵏ ⵅⴼ ⵜⵖⴰⵡⵙⴰ ⵏ ⵜⵣⵔⵓⴼⵜ, ⵏⵖⴷ ⴰⵡⴷ ⵎⵏⵉⴷ ⵏ ⵜⵙⴳⴰ ⵜⴰⵏⴰⴼⵍⵍⴰⵜ, ⵎⵉ ⵜⵡⴰⴱⴱⵉⵏ ⵉⵛⴷⵔⴰⵏ ⴰⵡⴷ ⵏⵜⵜⴰⵜ .ⴽⵉⴳⴰⵏ ⵉⵙⵇⵙⵉⵜⵏ ⴰⵢⴷ ⵉⵎⵎⵓⵜⵜⵔ ⵅⴼ ⵉⵎⵔⵔⵓⴽⵉⵢⵏ ⴰⵙⵙⴰ, ⵎⵉ ⵓⵔ ⵏⵏⵉⵏ ⴰⴷ ⵜⵏ ⵙⴼⵙⵉⵏ, ⵉⴷⴷⵖ ⴰⴷⴷⴰⵢ ⵏⴰⵖⵓⵍ ⴰⴷ ⵏⵙⵏⵥ ⴰⵙⴽⵙⵓ ⴳ ⵙⵙⵉⴼⵜ ⵍⵍⵉⴳ ⵜⵜⵉⴷⵉⵔ ⵜⵎⴰⵣⵉⵔⵜ, ⵓⵔ ⵉⵏⵏⵉ ⴰⴷ ⴰⵖ ⴷ ⵉⴱⴹ ⵅⴼ ⵜⵡⵏⴳⵉⵎⵜ ⵖⴰⵙ ⵎⴰⵢⴷ ⵉⵊⵔⴰⵏ ⵉⵙⴳⴳⵡⴰⵙⵏ ⵣⵔⵉⵏⵉⵏ, ⴷⴰⴷ ⴰⵖⴰ ⵏⴰⵖⵓⵍ ⵖⵔ ⵙ ⵉⵙⴳⴳⵡⴰⵙⵏ ⵍⵍⵉⴳ ⵢⵜⵜⵓⵙⵔⵙ ⵉⴽⵎⵣ ⵅⴼ ⵜⴰⵢⵙⵙⴰ ⵏ «ⵉⴽⵙ ⵍⵉⴱⴰⵏ»,ⵉⵜⵜⵓⵔⴰⵔ ⵡⴰⵡⴰⵍ ⵉⵔⴳⵣⵏ ⵏ ⵓⴷⴼⵔⵉⵔ ⴰⴷⵔⴼⴰⵏ ⴳ ⵉⴷⵉⵙ, ⵉⴷⴷⵖ ⵓⵔ ⵔⵉⵏ ⵜⴰⵙⴱⴱⴰⴱⵜ ⵎⵉ ⵙⵖⵉⵎⵏ «ⵉⵙⵔⵜⴰⵏ ⵓⵎⵙⵙⵓ ⴰⵖⵍⵏⴰⵡ», ⵃⵎⴰ ⴰⴷ ⴳⵔⵉⵏ ⵜⵉⵣⵔⴰ ⵉ ⵎⵓⵃⴰⵎⴷ ⵡⵉⵙ ⵙⵎⵓⵙ, ⴰⴷ ⵉⴼⵜⵉ ⴰⴷⴼⵔⵉⵔ ⴰⵔ ⵢⵓⵔⵣⵣⵓⵏ ⴰⴷ ⵉⵜⴰⵎⵎⴰ ⴳ ⵜⴳⵓⵔⵉ ⵏⵙ ⴰⵔ ⴷ ⵉⵔⴰⵔ ⵉⵛⴷⵔⴰⵏ ⵜⵡⴰⴱⴱⵉⵏⵉⵏ ⵉ ⵜⵎⴰⵣⵉⵔⵜ, ⵜⴽⴽⵙ ⵜⴰⵙⵏⵏⴰⵏ ⵉⵔⵓⵎⵎⵉⵢⵏ ⵣⴳ ⵜⵎⴰⵣⵉⵔⵜ ⵏ ⵜⴰⵎⴰⵣⵖⴰ ⵙ ⵓⵢⵏ ⵙ ⵜⵍⵍⴰ. ⵟⴰⵢⵙⵙⴰ ⵅⴼ ⵏⵙⵙⵉⵡⵍ ⵜⴳⴰ ⵜⵉⵔⵥⵉ ⵉ ⵉⵎⵓⵙⵙⵓⵜⵏ ⵉⴷⴼⵔⵉⵔⵏ, ⵜⴷⵣ ⵜⵉⴼⵓⵍⵉⵏ ⵉ ⵜⵙⵔⵜⵉⵜ ⵓⵔ ⵉⴳⵉⵏ ⵜⵉⵏ ⵉⵎⵣⴷⴰⵖ ⵏ ⵜⵎⴰⵣⵉⵔⵜ. ⴰⵡⴷ ⵎⵛ ⵏⴰⵖⵓⵍ ⴹⵔ ⵜⵎⵓⴽⵔⵉⵙⵜ ⵉⵡⵜⵜⴰⵏ ⵍⵍⵉ ⵢⵓⴷⵔⵏ ⴳ ⵜⵏⴱⴰⴷⵜ ⵏ ⵎⵔⵔⵓⴽ ⵙ ⵓⵙⵔⴰⵙ ⵓⴼⵓⵙ ⵏⵙ ⵅⴼ ⵜⴰⵢⵙⵙⴰ ⵏ «ⵍⴰⵍⵍⴰ ⵎⵖⵏⵉⵢⴰ» ⴰⵙⴳⴳⵡⴰⵙ ⵏ 1845, ⴰⴷ ⵏ ⵏⴰⴼ ⵉⵙⵙ ⴰⵙ ⵜⵡⴰⵡⵉⵏ ⴽⵉⴳⴰⵏ ⵉⵛⴰⵍⵍⵏ ⴳ ⵜⵙⴳⴰ ⵓⵏⵇⵇⵔ, ⵙⵓⵎⴰⵜⴰ ⵟⵉⵏⴷⵓⴼ, ⴱⵛⵛⴰⵔ, ⵜⵡⴰⵜ…. ⵍⵍⵉⴳ ⵜⵙⴽⵡⴰ ⵍⴱⵓⵔⵉⵣⴰⵔⵢⵓ ⴰⵙⵙⴰ ⵜⵉⵏⵓⵍⵉⵏ, ⵃⵎⴰ ⴰⴷ ⴰⵙ ⵎⵎⵓⵜⵉⵏ ⵡⴰⵍⵍⵏ ⵖⵔ ⵜⵙⴳⴰ ⵓⵖⵍⵍⵓⵢ, ⵜⴳ ⴰⴹⴰⴹ ⴳ ⵜⴱⵃⵃⵓⵜ ⵉ ⵜⵏⴱⴰⴷⵜ ⵜⴰⵎⵔⵔⵓⴽⵉⵜ, ⵃⵎⴰ ⴰⴷ ⵜⴳ ⴰⴼⵓⵙ ⴰⴼⴰⵙⵉ ⵙ ⵜⵜ ⵜⴽⴽⴰⵜ ⵜⵏⴱⴱⴰⵜ ⵏ ⴷⵣⴰⵢⵔ. ⴰⵙⵙⴰ ⵉ ⵎⴰⵏⵉⴳ ⴷ ⴽⵛⵎⵏⵜ ⵜⵎⵜⵜⵉⵜⵉⵏ ⵎⵓⵏⵏⵉⵏ ⴰⵃⵔⵉⵔⴰ, ⵢⴳⴰⵏ ⴽⵉⴳⴰⵏ ⵏ ⵜⵎⵙⵙⵓⵎⴰⵏⵉⵏ ⴱⴰⵔ ⴰⴷ ⵜⵜⵓⴼⵜⵉ ⵜⵎⵓⴽⵔⵉⵙⵜ, ⴱⵍⴰ ⵉⵔⵥⴰⵏ, ⵓⵔ ⵖⵉⵢⵏⵜ ⵜⵙⵏⴱⴰⴹ ⵏ ⴷⵣⴰⵢⵔ ⴷ ⵎⵔⵔⵓⴽ ⴰⴷ ⵃⴱⵓⴱⴹⵏ ⴰⵏⵏⵉⵔⵙ ⵉⴽⴽⴰⵏ ⵉ ⵢⵉⵜⵙ ⵉⵙⴳⴳⵡⴰⵙⵏ, ⵉⴷⴷⵖ ⵓⵔ ⴷⴰ ⵜⴷⵔⵏⵜ ⵖⴰⵙ ⵎⵛ ⵔⵡⵉⵏⵜ ⵜⴹⴰⵡⵙⵉⵡⵉⵏ ⵉⵎⵣⴷⴰⴳⴹ; ⴽⵓ ⵢⴰⵜ ⴳ ⵜⵏⴱⴱⴰⴹⴰ ⵜⵔⴰ ⴰⴷ ⵜⴼⵜⵉ ⵜⵉⵎⵓⴽⵔⵉⵙⵉⵏ ⵏ ⵓⴳⵏⵙ ⵙ ⴳ ⵜⵖⴰⵡⵙⴰ ⵉⵡⵜⵜⴰⵏ, ⴰⵎ ⴷⵣⴰⵢⵣ ⴰⵎ ⵎⵔⵔⵓⴽ, ⵉⴷⴷⴰⴷ ⴳ ⵜⵙⵏⴱⴰⴹ ⵏⵙⵏ ⵓⴽⵜⵛⴰ ⵏ ⵜⵔⵛⵉ ; ⴼⴼⵉⵔ ⵏ ⵎⴰⵢⴷ ⵓⵔ ⵖⵉⵢⵏⵜ ⴰⴷ ⵙⵏⵓⵛⴳⵏⵜ ⵜⵉⵎⵓⴽⵔⵉⵙⵉⵏ ⵉⵎⵣⴷⴰⵖ, ⴰⵔ ⵓⵔⵣⵣⵓⵏⵜ ⴰⴷ ⴼⵔⵏⵜ ⵜⵉⴼⵍⵡⵓⵜⵜ ⵏⵙⵏⵜ ⵙ ⵓⵎⵖⵏⴰⵏ ⵅⴼ ⵉⵡⵜⵜⴰ. ⴷⵣⴰⵢⵔ ⵓⵔ ⵜⵓⴼⵉ ⵎⴰⵢⴷⴰ ⵙⵔⵙⵉⵏ ⵉⴷⴼⵔⵉⵔ ⵏⵙ ⵉⴹⴰⵔ ⵉ ⵢⴱⴰⵇⵇⴰⵏ ⵏ «ⴰⵢⵜ ⵜⵎⵉⵔⴰ» ⵎⵉ ⵢⵏⵏⴰ ⵉⵙ ⴷ ⵜⵉⵙⵏⴱⴰⴹ ⵏ ⵎⵔⵔⵓⴽ ⴰⵎⵉ ⴷ ⵍⵍⴰⵏ ⵉⴼⴰⵙⵙⵏ ⵏⵙⵏⵜ ⴼⴼⵉⵔ ⴰⵙⵏ, ⵜⴰⵙⵏⴱⴰⵜ ⵏ ⵎⵔⵔⵓⴽ, ⵜⵔⴰ ⴰⴷ ⵜⵙⵙⵍⵀⵓ ⵉⵎⵔⵔⵓⴽⵉⵢⵏ ⵙ ⵜⵓⵍⵍⵉⵣⵜ ⵙ ⵎⴰⵙ ⵜⵓⵔⵣⵣⵓ ⵜⴷⴼⵔⵉⵔⵜ ⵏ ⴷⵣⴰⵢⵔ ⴰⴷ ⵜⴽⵛⵛⵎ ⵣⴳ ⵉⵡⵜⵜⴰ, ⴼⴼⵉⵔ ⵉ ⵎⴰⵢⴷ ⴷ ⵢⵉⵡⵉ ⵡⴰⴹⵓ ⴰⵏⵖⵎⵉⵙ ⵏ ⵎⵙⵉⵖⵜ ⵏⵙ ⵉ ⵢⵎⵔⵉⴳⵏ.

ⴳ ⵡⵓⵙⵙⴰⵏ ⴰ, ⴼⴳⵖⵏ ⴷ ⴽⵉⴳⴰⵏ ⵉⵏⴷⵍⵉⴱⵏ ⵏ ⵜⵓⴷⵔⵜ ⵣⴳ ⵉⴼⵔⴰⵏ ⵏⵙⵏ, ⵙⵓⵎⴰⵜⴰ ⵡⵉⵙ ⵎⵉ ⵢⵣⵎⵎⵉⵎ ⵓⵎⵣⵔⵓⵢ ⵉⵙ ⵓⴼⴰⵏ ⴳ ⵜⵙⴱⴱⴰⴱⵜ ⵏ ⵜⵖⴰⵡⵙⵉⵡⵉⵏ ⵜⴰⵢⴰⴼⵓⵜ ⵏⵙⵏ, ⴰⵔ ⵜⴱⵔⵔⴰⵃⵏ ⵙ ⵉⵎⵔⵉⴳⵏ, ⴰⵙⵉⵏ ⴳ ⵉⵎⴰⵡⵏ ⵏⵙⵏ ⵜⴰⴼⴰⵜ ⵏ ⵜⵉⵔⵉⵜ, ⵓⵔ ⵉⴷ ⵉⵙ ⵔⴰⵏ ⴰⴷ ⵇⵏⴻⵏ ⵜⴰⵎⵓⴽⵔⵉⵙⵜ ⵣⴳ ⵡⴰⴼⵍⵍⴰ, ⵎⴰⵛⴰ ⵉⴷⴷⵖ ⵔⴰⵏ ⴰⴷ ⵔⴰⵔⵉⵏ ⴰⴷⴷⵓⵔ ⵏⵙⵏ ⴰⵙⵏ ⵉⴱⴰⵣⵏ ⴽⵉⴳⴰⵏ ⵉⵙⴳⴳⵡⴰⵙⵏ ⴰⵢⴰ, ⵏⵖⴷ ⵉⵙ ⴳⴰⵏ ⵣⴳ ⵡⵉⵙ ⵢⵙⴽⵡⵉⵏ ⵜⴰⵙⵏⴱⴰⵜ ⵏ ⵍⴱⵓⵔⵉⵣⴰⵔⵢⵓ, ⴰⵖⵓⵍⵏ ⴷ ⴰⵙⵙⴰ ⵖⵔ ⵜⵉⵏ ⵎⵔⵔⵓⴽ, ⴼⴼⵉⵔ ⵏ ⵎⴰ ⵙⵏ ⵜⵇⵇⴰⵡⵍ ⵉⴱⵖⵓⵔ ⵓⵊⵏⵏⴰ ⴷ ⵡⴰⵛⴰⵍ ; ⵃⵎⴰ ⴰⴷ ⵖⵉⵔⵙⵏ ⵉⵙⵓⵍ ⵡⴰⴷⴷⵓⵔ ⵙ ⴼⵔⵔⵙⵏ ⴰⵢⴷⴷⴰ ⵏ ⵎⵔⵔⵓⴽ ⴷⴷⴰⵡ ⵓⵎⴰⵍⵓ ⵏ «ⵜⴰⵎⵓⵏⵜ ⵜⴰⵖⵍⵏⴰⵡⵜ», ⴰⵢⴰⴷ ⴰⵙ ⵓⵔ ⵜⵏ ⵜⴰⴷⵊⴰⵏ ⴰⴷ ⵣⴷⵉⴳⵏ, ⴽⵓ ⵜⵉⴽⴽⵍⵜ ⴳⵉⵏ ⴷ ⵣⵉⴳ ⵙⵏ ⵉⵃⵢⵢⴰⵃⵏ ⴷ ⵉⵎⵙⵖⵉⵎⴰⵏ,ⵡⵉⴷ ⴰ ⵅⴼ ⴷ ⵢⵓⵙⴰ ⵡⴰⵡⴰⵍ ⵏⵏⴰⵏ ⵉⵎⴰⵣⵉⵖⵏ : «ⵏⵏⴰⵏ ⴰⵙ ⵎⴰ ⵢⵜⵜⴰⵡⵉ ⴷ ⴰⵢ ⴰⵙⴱⴱⴰⴱ ;ⵉⵏⵏⴰⵙⵏ ⴰⵢⵍⵍⵉ ⴷ ⴰⵢⵍⵍⵉ ».

ⴳ ⵜⵉⵣⵡⵉⵔⵉ ⴷⴰⵜ ⵉ ⵎⴰⵖⴰ ⵏⵙⵙⵉⵡⵍ ⵅⴼ ⵜⵖⴰⵡⵙⴰ ⵏ ⵜⵏⵣⵔⵓⴼⵜ ⵉⵍⴰ ⴰ ⵏⵙⵔⵙ ⴰⵙⵇⵙⵉ : «ⵎⴰⵢⴷ ⵏⵎⵙ ⴷ ⵎⴰⵢⴷ ⵏⴳⴰ?»,ⵖⴰⵙⵙⵍⵍⵉ ⴳ ⵏⴼⴷⴷⴰ ⵣⴳ ⵉⵙⵇⵙⵉ ⵢⴰ ⵡⵏ ⴰⵢⴷ ⵉⴳⴰⵏ ⴰⴼⵜⵜⵓⴽ ⵉ ⵜⵖⴰⵡⵙⵉⵡⵉⵏ ⵏ ⵜⵎⴰⵣⵖⴰ.

ⵙⴰⵄⵉⴷ ⴱⴰⵊⵊⵉ