ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵎⵓⵃⵎⵎⴷ ⵍⴱⵓⵜⴽⵎⴰⵏⵜⵉ, ⴷ ⴰⵙⵍⵎⴰⴷ ⵏ ⵓⵙⵍⵎⴷ ⴰⵎⵏⵣⵓ, ⴷ ⴰⵎⵔⵣⵓ ⴷⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴷⵉⴷⴰⴽⵜⵉⵜ ⵏⵏⵙ ⵣⵉ ⴷⴰⵅⵍ ⵉ ⵜⵖⵉⵡⴰⵏⵜ ⵜⴰⴳⵜⵉⵥⵍⵉⵜ ⵏ ⵏⵏⴰⴹⵓⵕ. ⴷⴳ ⴰⵙⴳⴳⵯⴰⵙ ⵏ 2023, ⵉⴳⴳⴰ ⴰⵎⴷⴰⴽⴰⵔ ⵏⵏⵙ ⵅⴼ ⵜⴱⵔⴰⵜ ⵏ ⵓⵎⴰⵙⵜⵔ ⵙⴰⴷⵓ ⵓⵣⵡⵍ « ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵡⵏⵏ ⵓⵔ ⵣⵣⴰⴳⵙ ⵉⵙⵙⵉⵡⵉⵍⵏ ⴷⵉ ⵜⵉⵏⵎⵍ ⵜⴰⵎⵏⵣⵓⵜ », ⵎⴰⵏⵉ ⵉⵙⵙⵓⵎⵔ ⵖⴰⵔ ⵓⵎⴳⴳⴰⵔ ⴽⵔⴰ ⵏ ⵜⵎⴰⵎⴽⵉⵏ ⴷ ⵜⵙⵜⵔⴰⵜⵉⵊⵉⵜⵉⵏ ⵉ ⵣⵉ ⵉⵣⵎⵎⵔ ⵓⵏⵍⵎⴰⴷ ⴰⴷ ⵉⵚⵚⵓⵕⴼ ⵉⴳⵎⵉⵔⵏ ⵅⴼ ⵓⴱⵔⵉⴷ ⵏ ⵡⵍⵎⴰⴷ ⵏⵏⵙ.
ⴷⴳ ⵓⵎⵙⴰⵡⴰⵍ ⴰ ⵉⵇⵇⴰⵔ “ⴰⵙⵓⵖⵍ ⵖⵔ ⵜⵎⴰⵣⵉⵖⵜ ⵉⵃⴷⴰⵊ ⵜⴰⵔⵔⵉⵜ ⵏ ⵜⴰⵢⵏⵉⵜ ⴷⵉ ⵎⵉⵏ ⵉⵇⵇⵏⵏ ⵖⵔ ⵓⵔⵣⵣⵓ ⴰⴽⴰⴷⵉⵎⵉ ⴷ ⵓⵜⵉⵇⵏⵉ” ⵎⴰⵎⵛ ⵉⵙⵙⵉⵜⵉⵎ “ⴰⴷ ⵉⵍⵓⵍⵍⵛ ⵉⴳⵔ ⵏ ⵉⵎⴰⵡⴰⵍⴰⵏ ⵎⵉⵏⵣⵉ ⴷ ⵏⵉⵜⵏⵉ ⴷ ⵉⵎⴰⵍ ⵏ ⵓⵙⵓⵖⵍ ⵣⵉ/ⵖⵔ ⵜⵎⴰⵣⵉⵖⵜ”.
ⵎⴰⵙⵙ ⵎⵓⵃⵎⵎⴷ ⵍⴱⵓⵜⴽⵎⴰⵏⵜⵓ, ⴰⵏⵣⵓⴼ ⵣⵣⴰⵢⴽ ⵖⵔ ⵜⴼⵔⴰⵢ ⵏ « ⴰⵎⴰⴹⴰⵍ ⴰⵎⴰⵣⵉⵖ », ⵜⵣⵎⵎⴰⵔⴷ ⴰⴷ ⴰⵏⵖ ⵜⵉⵏⵉⴷ ⵅⴰⴼⴽ ⵛⵡⴰⵢⵜ ?
ⴰⵣⵓⵍ ⵉ ⵉⵎⵖⵔⴰ ⵏ ⵜⴼⵔⴰⵢ ⵏ «ⴰⵎⴰⴹⴰⵍ ⴰⵎⴰⵣⵉⵖ», ⴰⵇⴰⴷⵉ ⵉⵏⵓ ⵉ ⵛⴽⴽ ⴰ ⴰⵏⵖⵎⴰⵙ ⵅⵉⵔⴷⴷⵉⵏ ⵅⴼ ⵓⵙⵏⵡⵊⵓ.
ⵎⵓⵃⵎⵎⴷ ⵍⴱⵓⵜⴽⵎⴰⵏⵜⵉ, ⴷ ⴰⵙⵍⵎⴰⴷ ⵏ ⵓⵙⵍⵎⴷ ⴰⵎⵏⵣⵓ, ⴷ ⴰⵎⵃⴹⴰⵕ, ⴷ ⴰⵎⵔⵣⵓ ⴷⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴷⵉⴷⴰⴽⵜⵉⵜ ⵏⵏⵙ ⵣⵉ ⴷⴰⵅⵍ ⵉ ⵜⵖⵉⵡⴰⵏⵜ ⵜⴰⴳⵜⵉⵥⵍⵉⵜ ⵏ ⵏⵏⴰⴹⵓⵕ.
ⵜⴳⴳⵉⴷ ⴰⵎⴷⴰⴽⴰⵔ ⵏⵏⴽ ⵅⴼ ⵜⴱⵔⴰⵜ ⵏ ⵓⵎⴰⵙⵜⵔ ⴰⵙⴳⴳⵯⴰⵙ ⵏ 2023, ⵙⴰⴷⵓ ⵓⵣⵡⵍ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵡⵏⵏ ⵓⵔ ⵣⵣⴰⴳⵙ ⵉⵙⵙⵉⵡⵉⵍⵏ ⴷⵉ ⵜⵉⵏⵎⵍ ⵜⴰⵎⵏⵣⵓⵜ. ⵎⵉⵏ ⵉⵄⵏⴰ ⵓⴽⵔⴰⵙ ⵏⵏⵙ ? ⵎⵉⵏ ⵛⴽⴽ ⵉⵊⵊⴰⵏ ⴰⴷ ⵜⵙⵜⵉⴷ ⴰⵙⵏⵜⵍ ⴰ ?
ⴷ ⴰⵎⵣⵡⴰⵔ, ⵙⵏⵉⵎⵎⵉⵔⵖ ⵎⴰⵙⵙ ⵊⴰⵡⴰⴷ ⵣⵣⵓⴱⵄ ⵉ ⵉⴱⴷⴷⵏ ⵅⴼ ⵜⵔⵣⵣⵓⵜ ⵉⵏⵓ, ⴰⵎ ⵎⴰⵎⴽ ⵙⵏⵉⵎⵎⵉⵔⵖ ⵇⴰⵄ ⵉⵙⵍⵎⴰⴷⵏ ⵏ ⵓⵎⴰⵙⵜⵔ ⵏ ⵜⵓⵙⵙⵏⴰ ⴷ ⵜⵓⵜⵍⴰⵢⵜ ⵜⵉⵎⴰⵣⵉⵖⵉⵏ ⴷⵉ ⵏⵏⴰⴹⵓⵕ. ⴷ ⵜⵉⴷⵜ, ⴰⵙⵏⵜⵍ ⵏ ⵜⵔⵣⵣⵓⵜ ⵏⵏⵖ ⵉⵇⵇⵏ ⵖⵔ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵡⵏⵏ ⵡⴰⵔ ⵣⵣⴰⴳⵙ ⵉⵙⵙⵉⵡⵉⵍⵏ ⴷⵉ ⵜⵉⵏⵎⵍ ⵜⴰⵎⵏⵣⵓⵜ, ⴰⴽⵔⴰⵙ ⵜⵓⵖⴰ ⴷ ⴰⵛⵓⵛⵉ ⵅⴼ ⵜⵄⵏⴽⵔⴰⴼ ⵉ ⵍⵇⵇⴰⵏ ⵉⵏⵍⵎⴰⴷⵏ ⵉ ⵡⴰⵔ ⵉⵙⵙⵉⵡⵉⵍⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷⴳ ⵓⵍⵎⵎⵓⴷ ⵏⵙⵏ ⵉ ⵜⵓⵜⵍⴰⵢⵜ ⴰ, ⵏⴳⴳⴰ ⵜⵉⵣⵎⵎⴰⵔ ⴱⴰⵛ ⴰⴷ ⵏⵙⵙⵏ ⵎⴰⵏ ⵜⴰⵙⵓⴳⵔⵜ ⵜⵓⵜⵍⴰⵢⴰⵏⵜ ⵉ ⵜⵟⵟⴼⵏ ⵎⵙⵇⵇⵎ, ⵎⴰ ⵜⴰⵙⵓⴳⵔⵜ ⵜⴰⵎⵉⵡⴰⵏⵜ ⵎⴰ ⵜⵏⵏⵉ ⵜⴰⵎⵉⵔⴰⵢⵜ.
ⵙ ⵓⵢⴰ, ⵏⵙⵙⵓⵎⵔ ⵖⴰⵔ ⵓⵎⴳⴳⴰⵔ ⴽⵔⴰ ⵏ ⵜⵎⴰⵎⴽⵉⵏ ⴷ ⵜⵙⵜⵔⴰⵜⵉⵊⵉⵜⵉⵏ ⵉ ⵣⵉ ⵉⵣⵎⵎⵔ ⵓⵏⵍⵎⴰⴷ ⴰⴷ ⵉⵚⵚⵓⵕⴼ ⵉⴳⵎⵉⵔⵏ ⴰ ⵅⴼ ⵓⴱⵔⵉⴷ ⵏ ⵡⵍⵎⴰⴷ ⵏⵏⵙ.
ⵎⵉⵏ ⵜⴳⴳⵉⴷ ⴷⴳ ⵓⵖⵣⴷⵉⵙ ⵉⵎⵉⵥⵉⵕ ⵏ ⵜⵔⵣⵣⵓⵜ? ⵎⴰⵏ ⵉⵔⵎⵎⵓⵙⵏ ⵉⴷⵉⴷⴰⴽⵜⵉⴽⵢⵏ ⵉ ⵜⵙⵡⵓⵔⵉⴷ ?
ⴷⴳ ⵓⵖⵣⴷⵉⵙ ⵉⵎⵉⵥⵉⵕ, ⵏⵙⵙⵏⴽⴹ ⴷⴰⴳⵙ ⵉⵔⵎⵎⵓⵙⵏ ⵉⵙⵉⵍⴰⵏⵏ ⵏ ⵜⵔⵣⵣⵓⵜ ⵏⵏⵖ, ⴰⵎ ⴰⵙⵍⵎⴷ ⴷ ⵓⵍⵎⵎⵓⴷ, ⵜⵓⵜⵍⴰⵢⵜ ⵜⴰⵢⵎⵎⴰⵜ ⴷ ⵜⵏⵏⵉ ⵜⴰⵙⵉⵏⴰⵏⵜ ⴷ ⵡⵎⵣⴰⵔⴰⵢ ⵊⴰⵔ ⵓⵍⵎⴰⴷ ⴷ ⵓⵎⵄⴰⵏ ⵏ ⵜⵓⵜⵍⴰⵢⵜ. ⵓⵊⴰⵔ, ⵏⵉⴷⴰⵔ ⴷ ⴰⵙⴰⵜⴰⵍ ⴰⵎⵣⵔⵓⵢⴰⵏ ⵏ ⵓⵙⵙⵖⴰⵔ ⵏ ⵜⵎⴰⵣⵉⵖⵜ, ⵙ ⵉⵊⵊ ⵏ ⵡⴰⵡⴰⵍ ⵏⵏⵉⴹⵏ, ⴰⵎⵓⵜⵜⵉ ⵏ ⵓⵙⵍⵎⴷ ⵏⵏⵙ ⴰⴽⴷ ⵡⴰⴽⵓⴷ.
ⵏⵉⴷⴰⵔ ⴷ ⵓⵔⴰ ⴷ ⵜⵉⵙⵓⴳⴰⵔ ⵜⵓⵜⵍⴰⵢⴰⵏⵉⵏ ⵉ ⵉⵍⵍⴰⵏ ⴷⴳ ⵓⴷⵍⵉⵙ ⴰⵏⵎⵍⴰⵏ ⵏ ⵜⵎⴰⵣⵉⵖⵜ ⴷⵉ ⵜⵉⵏⵎⵍ ⵜⴰⵎⵖⵔⴰⴱⵉⵜ. ⵏⵇⵇⵏ ⴰⵙⵙⵖⴰⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴽⴷ ⵉⵏⵍⵎⴰⴷⵏ ⵉⵎⵥⵢⴰⵏⵏ, ⵏⵙⵙⵏ ⵎⴰⵖⴰⵔ ⴰⵙⵍⵎⴷ ⵏⵏⵙ ⵏⵃⵢⴰ ⵅⴼ ⵡⵏⵏⵉ ⵉ ⵏⵜⵜⴳ ⵉ ⵢⵉⵎⵇⵇⵔⴰⵏⵏ.
ⵎⴰⵎⴽ ⵜⵡⴰⵍⵉⴷ ⵜⴰⴱⵉⴷⴰⴳⵓⵊⵉⵜ ⵜⴰⵏⴱⴹⴰⵢⵜ ⴷ ⵡⴰⴷⴷⵓⵔ ⵏⵏⵙ ⴷⴳ ⵓⵙⵍⵎⴷ ⵏ ⵜⵎⴰⵣⵉⵖⵜ ⵉ ⵡⵏⵏ ⵡⴰⵔ ⵣⵣⴰⴳⵙ ⵉⵙⵙⵉⵡⵉⵍⵏ ?
ⵉⵙⵍⵎⴰⴷⵏ ⵙⵡⵓⵔⴰⵏ ⵎⴰⵛⵉ ⵉⵛⵜ ⵏ ⵜⴱⵉⴷⴰⴳⵓⵊⵉⵜ ⵡⴰⵀⴰ, ⴽⵔⴰ ⵣⵣⴰⴳⵙⵏ ⵙⵎⵓⵏⴰⵏ ⴰⵟⵟⴰⵚ ⵏ ⵜⴱⵉⴷⴰⴳⵓⵊⵉⵢⵉⵏ ⵎⴰⵃⵏⴷ ⴰⴷ ⵟⴼⴼⵏ ⴰⴱⵔⵉⴷ ⵉⵎⵇⵓⴷⴷⴰ ⴰⴽⴷ ⵡⴰⵏⴰⵡ ⴰ ⵏ ⵉⵏⵍⵎⴰⴷⵏ ⵉ ⵡⴰⵔ ⵉⵙⵙⵉⵡⵉⵍⵏ ⵜⴰⵎⴰⵣⵉⵖⵜ.
ⵇⴱⴰⵍⴰ ⵏ ⵉⵙⵍⵎⴰⴷⵏ ⵉⴷⴰⵔⵏ ⴷ ⴰⵙⵎⵔⵙ ⵏ ⵜⴱⵉⴷⴰⴳⵓⵊⵉⵜ ⵜⴰⵏⴱⴹⴰⵢⵜ, ⵜⴰ ⵜⴰⵎⴳⴳⴰⵔⵓⵜ ⵣⵉ ⵜⴱⵉⴷⴰⴳⵓⵊⵉⵢⵉⵏ ⵜⵉⵎⴰⵢⵏⵓⵜⵉⵏ ⵉ ⵡⴰⵔ ⵉⵜⵜⵡⵉⵍⵉⵏ ⵉⵏⵍⵎⴰⴷⵏ ⵇⴰⵄ ⴽⵉⴼ-ⴽⵉⴼ, ⵎⵉⵏⵣⵉ ⵎⴽⵓ ⴰⵏⵍⵎⴰⴷ ⴷ ⵜⵣⵎⵎⴰⵔ ⵏⵏⵙ ⴷ ⵍⴼⵙⴰⵙⵜ ⵏⵏⵙ ⴷⴳ ⵡⴰⵟⵟⴰⴼ ⵏ ⵜⵓⵙⵙⵏⴰ.
ⵜⴰⴱⵉⴷⴰⴳⵓⵊⵉⵜ ⵜⴰⵏⴱⴹⴰⵢⵜ ⵍⴱⴷⴰ ⵜⴰⵔⵔⴰ ⵜⴰⵢⵏⵉⵜ ⵉ ⵓⵎⵣⴰⵔⴰⵢ ⴰⴼⵔⵉⴷ ⵊⴰⵔ ⵓⵏⵍⵎⴰⴷ ⴷ ⵡⵏⵏ ⵏⵏⵉⴹⵏ, ⴰⵡⵜⵜⴰⵙ ⵏⵏⵙ ⴷ ⴰⵙⵔⵓⵙⵉ ⵏ ⵢⵉⵛⵜ ⵏ ⵜⴷⵉⵎⵓⵇⵔⴰⵜⵉⵜ ⴷ ⵜⴽⵙⵙⵉⵜ ⵏ ⵜⵎⵥⵍⵉⵜⵉⵏ ⵏ ⵎⴽⵓ ⴰⵏⵍⵎⴰⴷ ⴱⴰⵛ ⴰⴷ ⴰⵙ ⵜⵡⵛ ⴰⴼⵓⵙ, ⴰⴷ ⴽⵉⴷⵙ ⵜⵎⵢⴰⵡⴰⵙ ⴰⴷ ⵉⵄⴷⵓ ⵜⵉⵄⵏⴽⵔⴰⴼ ⵉ ⴷⵉ ⵉⵜⵏⵇⵔⴰⴹ ⵎⴽⵓ ⴰⵎⵓⵔ.
ⵎⴰ ⵜⵉⵍⵉⵜ ⵏ ⵓⴷⵍⵉⵙ ⴷ ⵉⵎⵥⵍⵉ ⵉ ⵓⵙⵍⵎⴷ ⵏ ⵜⵎⴰⵣⵉⵖⵜ ⵉ ⵡⵏⵏ ⵓⵔ ⵣⵣⴰⴳⵙ ⵉⵙⵙⵉⵡⵉⵍⵏ ⵉⵣⵎⵎⵔ ⴰⴷ ⵅⴰⴼⵙⵏ ⵉⵙⵙⵀⵡⵏ ? ⵎⴰⵖⴰⵔ ?
ⴷⴳ ⵓⵇⵡⵡⴰⵔ ⵏ ⵜⵉⵎⵓⵛⴰ ⵣⴳ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴽⵔⴰ ⵣⵣⴰⴳⵙⵏ ⵇⵇⴰⵔⵏ ⴰⵇⵇⴰ ⵉⴷⵍⵉⵙⵏ ⵉⵎⴰⵢⵏⵓⵜⵏ ⵉⴷ ⵉⴼⵖⵏ, ⵡⴰⵔ ⵜⵜⵉⵡⵙⵏ ⵡⵏⵏ ⵉⵙⵙⴰⵡⴰⵍⵏ ⵜⴰⵎⴰⵣⵉⵖⵜ ⵓⵍⴰ ⴷ ⵡⵏⵏ ⵡⴰⵔ ⵜⵜ ⵉⵙⵙⵉⵡⵉⵍⵏ, ⴷⴰⴳⵙⵏ ⴰⵟⵟⴰⵚ ⵏ ⵉⵎⵅⵓⵎⴱⴰⵍ, ⵢⵉⴼ ⴰⴷ ⴳⴳⵏ ⵙⵉⵏ ⵏ ⵡⴰⵏⴰⵡⵏ ⵏ ⵉⴷⵍⵉⵙⵏ, ⵉⵊⵊ ⵉ ⵢⵏⵏⵉ ⵉⵙⵙⴰⵡⴰⵍⵏ ⵜⴰⵎⴰⵣⵉⵖⵜ ⵡⵏⵏ ⵏⵏⵉⴹⵏ ⵉ ⵢⵏⵏⵉ ⵡⴰⵔ ⵜⵜ ⵉⵙⵙⵉⵡⵉⵍⵏ. ⴽⵔⴰ ⵣⵣⴰⴳⵙⵏ ⵙⵙⵓⵎⵓⵔⵏ ⴰⴷ ⵢⵉⵍⵉ ⵓⴷⵍⵉⵙ ⵉⴼⵙⵓⵙ ⵛⵡⴰⵢⵜ ⵅⴼ ⵉⵏⵍⵎⴰⴷⵏ ⵉ ⵡⴰⵔ ⵢⵙⵙⵉⵏⵏ ⵜⴰⵎⴰⵣⵉⵖⵜ, ⴰⴷ ⵢⴰⵔⵔ ⵜⴰⵢⵏⵉⵜ ⵉ ⵜⵡⵍⴰⴼⵉⵏ ⴰⵟⵟⴰⵚ, ⴰⴷ ⵉⵙⵙⵏⵇⵙ ⵣⴳ ⵉⴹⵕⵉⵚⵏ ⵉⵣⴳⵔⴰⵔⵏ ⵃⵎⴰ ⴰⴷ ⵉⵣⵎⵔ ⵓⵙⵍⵎⴰⴷ ⴰⴷ ⵉⵡⵛ ⴰⴽⵓⴷ ⵉ ⵇⴰⵄ ⵉⵏⵍⵎⴰⴷⵏ.
ⵎⴰⵎⴽ ⵜⵡⴰⵍⵉⴷ ⴰⵙⵖⴰⵔ ⵏ ⵜⵎⴰⵣⵉⵖⵜ ⴷⵉ ⵜⵉⵏⵎⵍ ⴷ ⵜⵙⴷⴰⵡⵉⵜ ⴰⵙⵙ ⴰ ? ⵎⴰⵏ ⵜⵄⵏⴽⵔⴰⴼ ⵉ ⵉⵍⵍⴰⵏ ?
ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴷⵉ ⵜⵙⴷⴰⵡⵉⵜ ⵜⴰⵎⵖⵔⴰⴱⵉⵜ ⵜⵡⵛⴰ ⵚⵚⴰⴱⵜ ⵏⵏⵙ, ⵜⵉⵏⴷⵉ ⵏⵏⵙ ⵜⴱⴰⵏ ⴷⴳ ⵡⵓⵟⵟⵓⵏ ⵏ ⵉⵎⵃⴹⴰⵕⵏ ⵉ ⵉⵜⵜⵣⵎⵎⴰⵎⵏ ⵎⴽⵓ ⴰⵙⴳⴳⵯⵡⴰⵙ, ⵜⵡⴰⵍⵉⵖ ⴰⵎⵅⵓⵎⴱⵍ ⴰⵎⵇⵔⴰⵏ ⴰⵇⵇⴰⵜ ⴷⴳ ⵡⵓⴼⵓⵖ ⵏ ⵉⵎⵃⴹⴰⵕⵏ ⵣⵉ ⵜⵙⴷⴰⵡⵉⵜ ⵖⵔ ⵓⴱⴰⵔⴰⵣ ⵏ ⵜⵡⵓⵔⵉ, ⵜⵜⴰⴼⵏ ⵉⵅⴼ ⵏⵙⵏ ⵇⵉⴱⴰⵍ ⵉ ⵜⵡⵡⵓⵔⴰ ⴱⵍⵄⵏⵜ, ⵓⵍⴰ ⴷ ⵉⴳⵔ ⵏ ⵓⵙⵍⵎⴷ ⵉ ⵜ-ⵜⵜⵔ ⴷⵔⵓⵙ ⵏ ⵉⵙⵍⵎⴰⴷⵏ, ⴰⵢⴰ ⵉⵙⵔⵓⵙⴰ ⴰⵏⵖ ⵇⵉⴱⴰⵍ ⵉ ⵓⵙⵇⵙⵉ ⵏ ⵓⵙⵎⴰⵜⴰ ⵉ ⵡⴰⵔ ⴷ ⵉⵜⴱⵉⵏⵏ ⴷⵉ ⵜⵉⵍⴰⵡⵜ, ⵉⴳⴳⵓⵔ ⵉⵜⵎⵓⵍⵍⵓⵖ.
ⵎⴰⵏ ⵜⵙⵜⵔⴰⵜⵉⵊⵉⵢⵉⵏ ⵉ ⵜⵡⴰⵍⵉⴷ ⵣⵎⵎⵔⵏⵜ ⴰⴷ ⵉⵍⵉⵏⵜ ⴷ ⵓⴼⵓⵖ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵣⴳ ⵡⴰⴷⴷⴰⴷ ⴷⵉ ⵜⵍⵍⴰ ?
ⵣⴳⴳⴰ ⵜⵓⴷⴼ ⵜⵎⴰⵣⵉⵖⵜ ⵖⵔ ⵓⵖⵔⴱⴰⵣ, ⵄⴰⴷ ⵓⵔ ⵉⵡⵡⵉⴹ ⵓⵙⵍⵎⴷ ⵏⵏⵙ ⵖⵔ ⵓⵙⵎⴰⵜⴰⴷⵉ ⵜⵉⵏⵎⴻⵍ ⴷⴳ ⵉⵙⵡⵉⵔⵏ ⵏⵏⵙ ⵎⴰⵕⵕⴰ, ⵓⵔ ⵏ ⵜ-ⵜⵜⵓ ⴰⵇⵇⴰ ⵓⵟⵟⵓⵏ ⵏ ⵉⵙⵍⵎⴰⴷⵏ ⵉ ⵉⵙⵖⵓⵔⴰⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷⵉ ⵜⵉⵏⵎⵍ ⵜⴰⵎⵖⵔⴰⴱⵉⵜ ⵢⵓⴷⵔⵓⵙ ⵎⴰⵍⴰ ⵏⵙⵙⵎⵇⵓⴷⴷⴰⵜ ⴰⴽⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵉⵏ ⵏⵏⵉⴹⵏ, ⴰⴷ ⵏⵔⵏⵉ ⵓⵎⵓⵎ ⵏ ⵓⵙⵎⵔⵙ ⵏ ⵡⴰⵎⵎⴰⴽⵏ ⵏ ⵜⵉⴽⵏⵓⵍⵓⵊⵉⵜ. ⵙ ⵓⵢⴰ, ⴱⴰⵛ ⴰⴷ ⵏⴰⵡⴹ ⵖⵔ ⵓⵙⵎⴰⵜⴰ ⵏ ⵓⵙⵍⵎⴷ, ⵉⵜⵅⵉⵙⵙ ⴰⴷ ⵏⵔⵏⵉ ⴷⴳ ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ, ⵉⵙⵍⵎⴰⴷⵏ ⵏ ⵜⵎⴰⵣⵉⵖⵜ ⴰⴷ ⵢⵉⵍⵉ ⵖⴰⵔⵙⵏ ⴰⵥⵍⴰⵢ ⴷⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴼⴼⵖⵏ ⴷ ⵣⵉ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴷⵉ ⵜⵙⴷⴰⵡⵉⵜ.
ⵎⴰⵏ ⵍⵅⵣⵔⴰⵜ ⵉ ⵖⴰⵔⴽ ⵖⵔ ⴰⵙⵡⵓⵔⵉ ⵏ ⵡⴰⵎⵎⴰⴽⵏ ⵏ ⵜⵉⴽⵏⵓⵍⵓⵊⵉⵜ ⴷⴳ ⵓⵙⵍⵎⴷ ⵏ ⵜⵎⴰⵣⵉⵖⵜ? ⵎⴰ ⴷⵉⵏ ⵎⴰⵏⴰⵢⴰ ⴷⵉ ⵜⵉⵍⴰⵡⵜ ?
ⵜⴰⵜⵉⴽⵏⵓⵍⵓⵊⵉⵜ ⵡⴰⵔ ⵜⵍⵍⵉ ⴷ ⴰⵙⵏⴼⵍ ⵏ ⵓⵙⵙⵖⴰⵔ ⴷⵉ ⵜⴷⴰⵍⴰ, ⵏⵉⵖ ⴰⴷ ⵜⴽⵙⵉ ⴰⵎⵛⴰⵏ ⵏ ⵓⵙⵍⵎⴰⴷ, ⵎⴰⵛⴰ ⴷ ⴰⵎⵎⴰⴽ ⵉ ⵉⵙⵙⵀⵡⴰⵏⵏ ⵜⴰⵡⵓⵔⵉ ⴷⵉ ⵜⴷⴰⵍⴰ, ⴰⴽⴷ ⵜⵣⵉⴳⴳⵣⵜ ⵉ ⵜ-ⵜⵜⵙⵏ ⵜⴰⵜⵉⴽⵏⵓⵍⵓⵊⵉⵜ, ⴰⴷ ⵜⵟⵟⴼ ⵉⵊⵊ ⵏ ⵡⴰⴷⴷⵓⵔ ⴷ ⴰⵏⴰⵎⵎⴰⵙ ⴷⴳ ⵓⵙⵍⵎⴷ-ⴰⵍⵎⴰⴷ ⵏ ⵜⵓⵜⵍⴰⵢⵜ, ⴰⵙⵡⵓⵔⵉ ⵏ ⵡⴰⵎⵎⴰⴽⵏ ⵏ ⵜⵉⴽⵏⵓⵍⵓⵊⵉⵜ ⴰⵎ ⵉⴱⵉⴷⵢⵓⵜⵏ ⵉⵇⵓⴹⴰⴹⵏ ⴷ ⵉⵊⵊ ⵏ ⵓⵚⵓⵕⵉⴼ ⵃⵎⴰ ⴰⴷ ⵉⵟⵟⴼ ⵓⵏⵍⵎⴰⴷ ⵉⵡⵜⵜⴰⵙⵏ ⵏ ⵜⵎⵙⵉⵔⵜ ⵎⵙⵇⵇⵎ, ⴷ ⵉⵛⵜ ⵏ ⵜⵎⴰⵎⴽⵜ ⵜⵙⵙⵀⵡⴰⵏ ⴰⵙⵉⵡⴹ ⵏ ⵜⵓⵙⵙⵏⴰ, ⴰⵟⵟⴰⵚ ⵏ ⵡⵓⵎⵍⴰⵏ ⵜⵜⴰⴽⴽⵡⴰⴹⵏ ⵙ ⵎⴱⵍⴰ ⵎⴰ ⴰⴷ ⵉⵙⵙⵉⵡⵍ ⵓⵙⵍⵎⴰⴷ, ⵜⵉⴼⴰⵡⵜ ⴷ ⵉⵎⵙⵍⵉⵜⵏ ⵏ ⵓⴱⵉⴷⵢⵓ ⵜⵊⵊⴰⵏ ⴰⵃⵏⵊⵉⵔ ⴰⵎⵥⵢⴰⵏ ⵉⴽⵙⵙⵉ ⵜⴰⵏⵏⴰⵢⵉⵏ ⵏⵏⵙ.
ⵜⴰⵙⴽⵍⴰ ⵜⴰⵎⴰⵣⵉⵖⵜ ⵜⵙⵔⵓⵙⴰ ⴰⵙⵇⵙⵉ ⵏ ⵓⵣⵖⴰⵏ, ⵎⴰ ⴷ ⵜⵉⴷⵜ ⵉⵍⵍⴰ ⴽⵔⴰ ⵏ ⵓⵣⵖⴰⵏ ⵉ ⵜⵙⴽⵍⴰ ⵜⴰⵎⴰⵣⵉⵖⵜ ?
ⴰⵡⴰⵍ ⵅⴼ ⵓⵣⵖⴰⵏ ⵉ ⵜⵙⴽⵍⴰ ⵜⴰⵎⴰⵣⵉⵖⵜ ⵉ ⵜ-ⵜⵜⵔ ⵣⵣⴰⴳⵏⵖ ⴰⴷ ⵏⵉⴷⴰⵔ ⴰⴼⴰⵔⵙ ⵏⵏⵙ, ⵎⵉⵏⵣⵉ ⴰⴼⴰⵔⵙ ⴰⵏⴽⵍⴰⵏ ⵉⵜⵖⵉⵎⴰ ⵢⵓⴷⵔⵓⵙ, ⵡⴰⵅⵅⴰ ⴷⴳ ⵓⵎⴳⴳⴰⵔⵓ ⴰ ⵏⵜⵜⴰⴼ ⴰⵟⵟⴰⵚ ⵏ ⵜⵡⵓⵔⵉⵡⵉⵏ ⵜⵉⵙⴽⵍⴰⵏⵉⵏ ⵉ ⴷ ⵉⴼⵖⵏ ⵎⴰⵛⴰ ⵉⵜⵅⵉⵙⵙ ⴰⵙ ⵓⵊⴰⵔ ⵃⵎⴰ ⴰⴷ ⵏⵙⵙⵉⵡⵍ ⵅⴼ ⵓⵣⵖⴰⵏ. ⵛⵃⴰⵍ ⵎⴰ ⵉⵎⵎⵔⵏⵉ ⵓⴼⴰⵔⵙ ⵏ ⵜⵙⴽⵍⴰ ⴷⵉ ⵇⴰⵄ ⴰⵏⴰⵡⵏ ⵏⵏⵙ, ⴰⴷ ⴽⵉⴷⵙ ⵎⵎⴰⵔⵏⵢⵏⵜ ⵓⵍⴰ ⴷ ⵜⵖⵓⵔⵉⵡⵉⵏ ⵜⵉⵣⵖⴰⵏⵉⵏ.
ⵎⵉⵏ ⵉⴱⴷⴷⵏ ⴷⴳ ⵓⴱⵔⵉⴷ ⵏ ⵓⵙⵓⵖⵍ ⵣⵉ/ⵖⵔ ⵜⵎⴰⵣⵉⵖⵜ ?
ⴷⵉⵏ ⵇⴱⴰⵍⴰ ⵏ ⵉⴳⵎⵉⵔⵏ ⵜⴱⴷⴷⴰⵏ ⴷⴳ ⵓⴱⵔⵉⴷ ⵏ ⵓⵙⵓⵖⵍ, ⵏⵣⵎⵎⴰⵔ ⴰⴷ ⵏⵙⵙⵏⵜⴰ ⵙ ⵎⵉⵏ ⵉⵍⵍⴰⵏ ⴷ ⴰⴽⴰⴷⵉⵎⵉ, ⵜⵓⵎⵓⵎⵜ ⵏ ⵉⵙⵎⵓⵜⵜⴳⵏ ⵓⵙⵏⵉⵍⵙ, ⵎⵉⵏⵣⵉ ⵉⴷⵍⵉⵙⵏ ⴷ ⵜⵖⵓⵔⵉⵡⵉⵏ ⵜⵖⵉⵢⵣⵏ ⴰⵖⵣⴷⵉⵙ ⴰⵎⵉⵥⵉⵕ ⵡⴰⵀⴰ, ⵔⵏⵉ ⵖⵔ ⵡⴰⵢⴰ, ⵉⵎⴰⵡⴰⵍⵏ ⵉⵎⵥⵍⴰⵏ ⵏ ⵓⵙⵓⵖⵍ ⵉⵜⵅⵉⵙⵙ ⴰⴷ ⵉⵍⵉⵏ. ⴰⵙⵓⵖⵍ ⵖⵔ ⵜⵎⴰⵣⵉⵖⵜ ⵉⵃⴷⴰⵊ ⵜⴰⵔⵔⵉⵜ ⵏ ⵜⴰⵢⵏⵉⵜ ⴷⵉ ⵎⵉⵏ ⵉⵇⵇⵏⵏ ⵖⵔ ⵓⵔⵣⵣⵓ ⴰⴽⴰⴷⵉⵎⵉ ⴷ ⵓⵜⵉⵇⵏⵉ ⵎⴰⵍⴰ ⵏⵅⵙ ⴰⴷ ⵏⵜⵡⴰⵍⴰ ⵜⵎⴰⵣⵉⵖⵜ ⵙ ⵡⴰⴷⴷⵓⵔ ⵏⵏⵙ ⴷⴳ ⵉⴳⵔⴰⵏ ⵏ ⵓⵙⵏⵖⵎⵙ, ⵜⴰⵎⵙⵙⵓⴳⵓⵔⵜ ⴷ ⵓⵣⵣⵔⴰⴼ…
ⵎⴰ ⵜⵡⴰⵍⵉⴷ ⴰⵇⵇⴰ ⵉⵎⴰⵡⴰⵍⵏ ⵉ ⵉⵍⵍⴰⵏ ⴰⵙⵙ ⴰ ⵣⵎⵎⵔⵏ ⴰⴷ ⴰⵡⵙⵏ ⴷⴳ ⵓⵙⵓⵖⵍ ⵎⴰ ⵉⵜⵅⵉⵙⵙⴰ ⴰⵙⵏ ⵓⵙⴱⵓⵖⵍⵓ ?
ⵓⵔ ⵅⴰⴼⵏⵖ ⵜⵏⵓⴼⵔⵏⵜ ⵜⵉⵣⵎⵎⴰⵔ ⵏ ⴽⵔⴰ ⵏ ⵜⵎⵔⵙⴰⵍ ⴷⵉ ⵎⵉⵏ ⵉⵇⵇⵏⵏ ⵖⵔ ⵓⵙⵓⴼⵖ ⵏ ⵓⵎⴰⵡⴰⵍⵏ ⵉ ⵖⵔ ⵍⵍⴰⵏ ⵜⵉⴼⵔⴰⵙ ⵏ ⵓⵙⵎⵓⵏⵉ ⵏ ⵜⵓⵜⵍⴰⵢⵜ ⵃⵎⴰ ⴰⴷ ⵏⴰⵡⴹ ⵖⵔ ⵉⵛⵜ ⵏ ⵜⵏⴰⵡⴰⵢⵜ ⵜⵓⴷⵙ ⵉ ⵜⵏⵜⴰⵍⴰⵜⵉⵏ ⵎⴰⵕⵕⴰ, ⵎⴰⵛⴰ ⵜⵉⵣⵎⵎⴰⵔ ⴰ ⵜⵖⵉⵎⴰⵏⵜ ⴷ ⵜⵉⵇⵓⴹⴰⴹⵉⵏ, ⵉⵏⵇⵙ ⴰⵙⵏⵜ ⵇⴱⴰⵍⴰ, ⵏⵜⵜⴰⴼ ⵓⵍⴰ ⴷ ⵜⵉⵣⵎⵎⴰⵔ ⵜⵓⴼⵔⵉⴷⵉⵏ ⵏ ⴽⵔⴰ ⵏ ⵉⵎⵓⵙⵙⵏⴰⵡⵏ ⴰⵎ ⵎⴰⵙⵙ ⴱⵏⵄⵇⵉⵢⵢⴰ ⵃⴰⵙⴰⵏ, ⴰⴼⵔⴰ ⵅⴼ ⵢⵉⵎⴰⵏ ⵏⵏⵙ, ⴷⴳ ⵓⵙⵡⵊⴷ ⵏ ⵉⵊⵊ ⵏ ⵓⵎⴰⵡⴰⵍ ⴷ ⵉⵎⵣⵍⵉ ⵉ ⵓⵙⵓⵖⵍ, ⵏⵙⵙⵉⵜⵉⵎ ⴰⴷ ⵉⵍⵓⵍⵍⵛ ⵉⴳⵔ ⵏ ⵉⵎⴰⵡⴰⵍⴰⵏ ⵎⵉⵏⵣⵉ ⴷ ⵏⵉⵜⵏⵉ ⴷ ⵉⵎⴰⵍ ⵏ ⵓⵙⵓⵖⵍ ⵣⵉ/ⵖⵔ ⵜⵎⴰⵣⵉⵖⵜ.
ⵎⴰⵏ ⴰⴷⴷⵓⵔ ⵖⴰⵔⵙ ⵖⴰ ⵓⵙⵓⵖⵍ ⴷⵉ ⵜⵉⵍⵉⵜ ⵏ ⵜⵎⴰⵣⵉⵖⵜ ⴷⴳ ⵓⵙⵏⵖⵎⵙ ⴷ ⵢⵉⴳⵔ ⴰⴽⴰⴷⵉⵎⵉ ?
ⴰⵙⵓⵖⵍ ⵢⴰⵔⵣⵣⵎ ⵜⴰⵡⵡⵓⵔⵜ ⵃⵎⴰ ⴰⴷ ⵏⵙⵏⵡⵊⵓ ⵜⴰⵙⴽⵍⴰ ⵏ ⵎⵉⴷⴷⵏ ⵖⴰⵔ ⵜⵎⴰⵣⵉⵖⵜ, ⵏⵉⵖ ⵃⵎⴰ ⴰⴷ ⵏⵙⵙⵥⵡⴰ ⵜⴰⵙⴽⵍⴰ ⵏⵏⵖ ⵖⵔ ⵜⵎⴰⴹⵍⴰⵏⵜ, ⵙ ⵓⵢⴰ ⵎⴰⵍⴰ ⵏⵡⵛⴰⵙ ⵜⵉⵏⴷⵉ ⴷⵉ ⵜⵔⵣⵣⵓⵜⵉⵏ ⵏⵉⵖ ⵜⵉⴽⴰⴷⵉⵎⵉⵢⵉⵏ ⴷ ⵜⵓⴳⴳⵉ ⵏ ⵜⵖⵓⵔⵉⵡⵉⵏ ⴰⴷ ⵜⴰⴼ ⴰⴷ ⵏⵙⵙⴰⵡⴰⵍ ⵅⴼ ⵓⵙⵉⵍⵉⵡ ⵏ ⵜⵙⴷⵍⵉⵙⵜ ⵜⴰⵎⴰⵣⵉⵖⵜ. ⴰⵙⵏⵖⵎⵙ ⵓⵍⴰ ⴷ ⵏⵜⵜⴰ ⵉⵜⵊⵊⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵎⵓⵜⵜⵓⵢ, ⵜⴷⴷⵔ ⵙ ⵜⵉⵔⵔⴰ ⴷ ⵢⵉⵍⵙ ⴷ ⵜⵎⵥⵕⴰ.
ⴰⵍ ⵎⴰⵏⵉ ⵉⵣⵎⵔ ⵓⵣⵖⴰⵏ ⴰⴷ ⵉⵙⴱⵓⵖⵍⵓ ⵜⵉⵔⵔⴰ ⵜⴰⵙⵏⴼⵍⵓⵍⵜ ⵏ ⵜⵎⴰⵣⵉⵖⵜ ?
ⴰⵙⵏⴼⵍⵓⵍ ⴰⵎⴰⵣⵉⵖ ⵣⵉ ⵍⴱⴷⴰ ⵉⵍⵍⴰ, ⵓⵊⴰⵔ ⵅⵎⵉ ⵏⵙⵙⴰⵡⴰⵍ ⵅⴼ ⵓⵙⴼⵔⵓ, ⵔⵓⵅ ⴰⵏⴰⵡⵏ ⵏⵏⵖⵏⵉ ⵏ ⵜⵙⴽⵍⴰ ⵓⴼⵉⵏ ⴰⴱⵔⵉⴷ ⵏⵙⵏ ⵖⵔ ⵜⴼⴰⵡⵜ, ⴰⵙⵏⴼⵍⵓⵍ ⵓⵔ ⵉⵇⵇⵉⵎ ⴷ ⴰⴼⵜⴰⵎ ⵏ ⵉⵣⵍⴰⵏ ⵡⴰⵀⴰ, ⵉⵏⵓⵔⵥⵎ ⵅⴼ ⵜⵉⵔⵔⴰ ⵜⵓⵏⴳⴰⵍⴰⵏⵜ, ⵜⵉⵎⵣⴳⵓⵏⵉⵏ ⴷ ⵜⵏⴼⴰⵙ… ⴰⵣⵖⴰⵏ ⵏⵜⵜⴰ ⵉⵇⵇⵏ ⵖⵔ ⵓⵙⴳⴷⵓⴷⵉ ⵏⵉⵖ ⴰⴽⵔⴽⵓⵔ ⵏ ⵓⵙⵏⴼⵍⵓⵍ, ⵎⵉⵏⵣⵉ ⴰⵏⵣⵖⴰⵏ ⵉⵅⵣⵣⴰⵔ ⵖⵔ ⵇⴱⴰⵍⴰ ⵏ ⵜⵔⵎⵉⵜⵉⵏ ⵜⵉⵎⵙⵏⴼⵍⵓⵍⵉⵏ.
ⵎⴰ ⵜⵡⴰⵍⵉⴷ ⴷⵉⵏ ⴽⵔⴰ ⵏ ⵓⵎⵣⴰⵔⴰⵢ ⵏⵉⵖ ⴷ ⴰⵎⵇⵓⴷⴷⵉ ⵊⴰⵔ ⵓⵣⵖⴰⵏ ⴰⵎⴰⵣⵉⵖ ⴷ ⵡⵏⵏ ⵏ ⵎⵉⴷⴷⵏ ?
ⵓⵔ ⵏⵣⵎⵎⴰⵔ ⴰⴷ ⵏⵙⵎⵎⵇⵓⴷⴰ ⵏⵉⵖ ⴰⴷ ⵏⴳⴳ ⴰⵎⵣⴰⵣⴰⵍ ⵊⴰⵔ ⵜⵙⴽⵍⴰ ⵜⴰⵎⴰⵣⵉⵖⵜ ⴷ ⵓⵣⵖⴰⵏ ⵏⵏⵙ ⴰⴽⴷ ⴽⵔⴰ ⵏ ⵜⵙⴽⵍⴰ ⵏⵏⵉⴹⵏ, ⵜⴰⵙⴽⵍⴰ ⵜⴰⵎⴰⵣⵉⵖⵜ ⴰⵇⵇⴰ ⵜ-ⵜⵜⵡⴰⵙⵏ ⵙ ⵜⴼⵔⵙⵜ ⵏ «ⵜⵓⵎⵥⵢⵜ», ⵏⵙⵙⵉⵜⵉⵎ ⴰⵙ ⵉⵎⴰⵍ ⵉⵛⵏⴰ, ⵉⵎⴰⵍ ⴰ ⵡⴰⵔ ⵉⵜⵜⵉⵍⵉ ⵎⵖⴰⵔ ⵙ ⵜⵉⵔⵔⴰ.
ⵜⴰⵡⴰⵍⵜ ⵏⵏⵛ ⵜⴰⵎⴳⴳⴰⵔⵓⵜ
ⴰⵇⴰⴷⵉ ⵉⵎⵖⴰⵔ ⵉ ⵛⴽⴽ ⴷ ⵓⵎⴰⴹⴰⵍ ⴰⵎⴰⵣⵉⵖ ⴷ ⵢⵉⵎⵖⵔⴰ ⵏⵏⵙ, ⵜⵎⴰⵣⵉⵖⵜ ⵜⵃⴷⴰⵊ ⵉⵎⴰⵔⵓⵜⵏ ⵉ ⵣⵣⴰⴳⵙ ⵖⴰ ⴰⵔⵉⵏ ⴰⵏⵉⵛⵜ ⵜⵃⴷⴰⵊ ⵉⵎⵖⵔⴰ ⵉ ⵜⵜ ⵖⴰ ⵉⵖⵔⵏ.
ⴰⵎⵙⴰⵡⴰⵍ : ⵅⴰⵢⵔⴷⴷⵉⵏ ⵍⵊⴰⵎⵄⵉ
