ⵎⵓⵃⵎⵎⴷ ⵍⵀⴰⵛⵎⵉ: ⴰⵙⵓⵖⵍ ⴷ ⴰⴱⵔⵉⴷ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵖⴰⵔ ⵜⵎⴰⴹⵍⴰⵏⵜ

ⵎⵓⵃⵎⵎⴷ ⵍⵀⴰⵛⵎⵉ ⵉⵊⵊ ⵣⴳ ⵉⵎⴰⵔⵓⵜⵏ ⵏ ⴰⵔⵔⵉⴼ ⵉⵜⵜⴳ ⵜⵉⵣⵎⵎⴰⵔ ⴷⵉ ⵜⵉⵔⴰ ⵏ ⵜⵓⵍⵍⵉⵙⵉⵏ ⵙ ⵜⵎⴰⵣⵉⵖⵜ, ⴷⵉ ⵜⵎⵥⵉ ⵏⵏⵙ ⵜⵓⵖⴰ ⵉⵙⵃⵙⵙⴰ ⵉ ⵓⵙⴷⴷⵉ ⵏ “ⵉⵡⴰⵍⵏ ⴷⵉ ⵍⵎⵉⵣⴰⵏ” ⵉ ⵉⵍⵍⴰⵏ ⴷ ⵜⴰⵡⵡⵓⵔⵜ ⵏⵏⵙ ⵖⴰⵔ ⵉⵎⵣⵍⵉ ⵏ ⵜⵉⵔⵔⴰ, ⴷⴳ ⵓⵙⴳⴳⵯⴰⵙ ⵏ 2012, ⵉⵙⵙⵓⴼⵖⴷ ⴰⴳⵎⵎⵓⵎ ⵏ ⵜⵓⵍⵍⵉⵙⵉⵏ ⵓⵎⵉ ⵉⴳⴳⴰ ⴰⵣⵡⵍ “ⵎⴰⵔⵜⵛⵉⴽⴰ”, ⴰⴷⵍⵉⵙ ⴰ ⵉⵙⵎⵓⵏ ⴰⵟⵟⴰⵙ ⵏ ⵜⵖⴰⵡⵙⵉⵡⵉⵏ ⴰⵎⴰⴽⵏⴰⵡ ⵜⴰⵎⵣⵡⴰⴳⵜ ⴷ ⵓⵄⵔⴰⵇ, ⵜⴰⵢⵔⵉ ⴷ ⵜⵎⵅⵙⴰ ⵏ ⵜⵎⵓⵔⵜ ⴷ ⴰⵢⵜ ⴱⴰⴱ ⵏⵏⵙ, ⵉⵙⵙⵏⵜⴰⵜ ⵙ ⵜⴱⵔⴰⵜ ⵉ ⵓⵎⴰⵔⵉ ⴰⵎⴰⴹⵍⴰⵏ ⵎⵓⵃⵎⵎⴷ ⵛⵓⴽⵔⵉ.

ⴷⴳ ⵓⵎⵙⴰⵡⴰⵍ ⴰ ⵉⵇⵇⴰⵔ “ⵜⵉⵎⵔⵙⴰⵍ ⵄⴰⴷ ⵅⵣⵣⴰⵔⵏⵜ ⵙ ⵓⵖⵣⴷⵉⵙ ⵖⴰⵔ ⵜⵎⴰⵣⵉⵖⵜ ⵡⴰⵅⵅⴰ ⵏⵜⵜⴰⵜ ⴷ ⵜⴰⵏⴰⵎⵓⵔⵜ” ⵎⴰⵎⵛ ⵉⵙⵙⵉⵜⵉⵎ “ⵉⵎⵖⵏⴰⵙ ⵉⵎⴰⵣⵉⵖⵏ ⴰⴷ ⵜⵜ ⵙⴱⴷⴷⵏ ⵛⵡⴰⵢ ⵅⴼ ⵉⴹⴰⵕⵏ ⵏⵏⵙ, ⴰⵇⵇⴰ ⵣⵣⴰⵢⵙⵏ ⵉ ⵖⴰ ⵜⴰⵡⴹ ⵜⵎⴰⵣⵉⵖⵜ ⵖⴰⵔ ⵓⵎⴰⴹⴰⵍ”.

ⴰⵏⵙⵓⴼ ⵣⴰⵢⴽ ⵅ ⵜⴼⵔⴰⵢ ⵏ “ⵓⵎⴰⴹⴰⵍ ⴰⵎⴰⵣⵉⵖ” ⴷⴳ ⵉⵎⵙⴰⵡⴰⵍⵏ ⵏⵏⵙ ⵏ ⴽⵓⵍ ⴰⵢⵓⵔ. ⴷ ⴰⵎⵣⵡⴰⵔⵓ ⵎⵉⵏ ⵉⵄⵏⴰ ⵎⵓⵃⵎⵎⴷ ⵍⵀⴰⵛⵎⵉ?

ⴰⵣⵓⵍ, ⴰⵇⴰⴷⵉ ⴰⵎⵣⵡⴰⵔⵓ ⵉ ⵓⵏⵖⵎⴰⵙ ⵅⵉⵔⴷⴷⵉⵏ ⵍⵊⴰⵎⵄⵉ ⴷ “ⵓⵎⴰⴹⴰⵍ ⴰⵎⴰⵣⵉⵖ” ⵅⴼ ⵓⵙⵏⵡⵊⵓ. ⵎⵓⵃⵎⵎⴷ ⵍⵀⴰⵛⵎⵉ ⴷ ⴰⵎⴰⵣⵉⵖ ⵣⵉ ⴰⵔⵔⵉⴼ ⵉⵜⵜⴳ ⵜⵉⵣⵎⵎⴰⵔ ⴷⵉ ⵜⵉⵔⴰ ⵏ ⵜⵓⵍⵍⵉⵙⵉⵏ ⵙ ⵜⵎⴰⵣⵉⵖⵜ, ⴷ ⴰⵎⵃⴹⴰⵔ ⴷ ⴰⵎⵔⵣⵓ ⴷⵉ ⵜⵖⵉⵡⴰⵏⵜ ⵏ ⵏⵏⴰⴹⵓⵔ ⵜⴰⵙⴷⴷⴰⵡⵉⵜ ⵏ ⵎⵓⵃⵎⵎⴷ ⴰⵎⵣⵡⴰⵔⵓ, ⵎⵓⵃⵎⵎⴷ ⵍⵀⴰⵛⵎⵉ ⴷ ⵎⴰⵣⵉⵖ ⵉⵜⵜⵅⵙ ⵜⵉⵔⴰ ⵙ ⵜⵎⴰⵣⵉⵖⵜ.

ⵎⵍⵎⵉ ⵜⴱⴷⴰ ⵜⴰⵏⴼⵓⵙⵜ ⵏⵏⵛ ⴰⴽⴷ ⵜⵉⵔⴰ? ⵎⵉⵏ ⵛⴽ ⵉⵊⵊⵉⵏ ⴰⴷ ⵜⵅⴹⴰⵔⴷ ⵜⴰⵙⴽⵍⴰ ⴷ ⴰⴱⵔⵉⴷ ⵏⵏⵛ?

ⴷⵉ ⵜⵎⵥⵉ ⵜⵓⵖⴰ ⵙⵃⵙⵙⵉⵖ ⵉ ⵓⵙⴷⴷⵉ “ⵉⵡⴰⵍⵏ ⴷⵉ ⵍⵎⵉⵣⴰⵏ” ⵣⵣⴰⵢⵙ ⵉ ⵅⴰⵕⵕⵚⵖ ⴷⵉ ⵜⵉⵔⴰ, ⵜⵓⵖⴰ ⵜⵙⵇⵙⵉⵖ ⵉⵣⵍⴰⵏ ⵎⴰⵎⴽ ⵜⵜⴰⵔⵉⵏ? ⵎⴰ ⴷ ⵜⵉⵔⴰ ⵎⴰ ⴷ ⴰⵡⴰⵍ? ⴰⵏⴰⵡ ⵏ ⵜⵙⴽⵍⴰ ⵉⵜⵜⵊⵊⴰ ⴰⵎⴰⵔⵓ ⴰⴷ ⵉⵙⵙⵓⴼⵖ ⵜⴰⵢⵛⵉⵜⵉⵏ ⵏⵏⵙ ⵏ ⵓⵏⴰⵎⵓⵏ ⴷ ⵜⵡⴰⵏⵏⴰⴹⵜ ⵏⵏⵙ, ⵜⴰⵙⴽⵍⴰ ⵎⴰⵏⵉ ⵏⵣⵎⵎⵔ ⴰⴷ ⵏⵙⵎⵓⵏ ⴳⵔ ⵜⵉⵍⴰⵡⵜ ⴷ ⵜⵓⵔⵊⵉⵜ.

ⵎⴰⵎⵛ ⵉ ⵜⵜⵓⵖⴰ ⵉⵔⵉⵎ ⵏⵏⵛ ⴰⵎⵣⵡⴰⵔⵓ ⴷⵉ ⵜⵉⵔⴰ? ⵎⴰ ⵜⵜⵓⵖⴰ ⴷⵉⵏⵏⵉ ⵛⴰ ⵏ ⵉⵎⵅⵓⵎⴱⴰⵍ ⴷⵉ ⵜⵎⵣⵡⵓⵔⴰ ⵏⵏⵛ?

ⵜⵉⵔⵎⵜ ⵉⵏⵓ ⵜⴰⵎⵣⵡⴰⵔⵓⵜ ⵜⵓⵖⴰⵜ ⴰⴽⴷ ⵜⵉⵔⴰ ⵏ ⵓⵙⴼⵔⵓ, ⵡⴰⵔ ⵓⴼⵉⵖ ⴱⵓ ⵉⵎⵅⵓⵎⴱⴰⵍ ⵎⵉⵏⵣⵉ ⵡⴰⵔ ⵓⵔⵉⵖ ⴰⵔ ⵓⵎⵉ ⵙⵍⵉⵖ ⵉ ⵡⴰⵟⵟⴰⵚ ⵏ ⵉⵣⵍⴰⵡⵉⵢⵢⵏ ⴰⵎ ⵙⴰⵄⵉⴷ ⵍⵎⵓⵙⴰⵡⵉ, ⴰⵃⵎⴷ ⵣⵣⵉⵢⴰⵏⵉ, ⵄⴱⴷⵔⵔⴰⵃⵉⵎ ⴼⴰⵡⵣⵉ, ⵎⴰⵎⴽ ⵉ ⵜⵓⵖⴰ ⵖⵔⵉⵖ ⵉ ⵛⵡⴰⵢ ⵏ ⵉⵣⵍⴰⵡⵉⵢⵢⵏ ⴰⵄⵄⵔⴰⴱⵏ ⴰⵎ ⵏⵉⵣⴰⵔ ⵇⴱⴱⴰⵏⵉ, ⵎⴰⵃⵎⵓⴷ ⴷⵔⵡⵉⵛ ⴷ ⴽⵔⴰ ⵏ ⵡⵓⵏⴳⴰⵍⵏ ⵙ ⵢⵉⵍⵙ ⵏ ⵜⴰⵄⵔⴰⴱⵜ, ⴷⵉ ⵜⵡⴰⵛⵓⵎⵜ ⵉⵏⵓ ⵡⴰⵔ ⵓⴼⵉⵖ ⴽⵔⴰ ⵏ ⵜⵎⵓⴽⵔⵉⵙⵉⵏ ⵎⵉⵏⵣⵉ ⵏⴽⴽ ⴷ ⴰⵎⵏⵣⵓ ⴷⵉ ⴰⵢⵜⵎⴰ, ⵉⵣⵡⴰⵔ ⴷⵉⵏ ⴰⵏⴰ (ⵅⴰⵍⵉ) ⴷ ⴰⵣⵍⴰⵡⵉ ⵓⵛⴰ ⵜⵉⵔⴰ ⵏ ⵓⵙⴼⵔⵓ ⵜⵓⵙⴷ ⵜⴼⵙⵓⵙ.

ⵎⴰⵢⵎⵎⵉ ⵜⵎⴰⵣⵉⵖⵜ ⴷⴳ ⵓⵎⴽⴰⵏ ⵏ ⵜⵄⵔⴰⴱⵜ ⴷ ⵜⴼⵔⴰⵏⵙⵉⵙⵜ ⴷⵉ ⵜⵉⵔⴰ?

ⴳⴳⵉⵖ ⴽⵔⴰ ⵏ ⵜⵣⵎⵎⴰⵔ ⵙ ⵜⴰⵄⵄⵔⴰⴱⵜ ⴷⵉ ⵜⵎⵥⵉ, ⵎⴰⵛⴰ ⵏⵏⵉⵖ ⴰⴽⴷ ⵉⵅⴼ ⵉⵏⵓ: ⵜⴰⵄⵔⴰⴱⵜ ⵖⴰⵔⵙ ⴰⵢⵜ ⴱⴰⴱ ⵏⵏⵙ! ⵎⴰⵢⵎⵎⵉ ⵡⴰⵔ ⵜⵜⴰⵔⵉⵖ ⵙ ⵜⵎⴰⵣⵉⵖⵜ ⵉⵏⵓ? ⴰⴷ ⵉⵍⵉⵖ ⴷ ⵉⵅⴼ ⵉⵏⵓ ⵙ ⵜⵓⵜⵍⴰⵢⵜ ⵉⵏⵓ ⵡⴰⵔ ⵜⵜⵉⵍⵉⵖ ⴷ ⵎⴰⵣⵉⵖ ⵙ ⵜⵓⵜⵍⴰⵢⵜ ⵏ ⵎⵉⴷⴷⵏ. ⵎⴰⵍⴰ ⵏⴽⴽ ⵉ ⵉⵍⵍⴰⵏ ⴷ ⵎⴰⵣⵉⵖ ⵡⴰⵔ ⵓⵔⵉⵖ ⵙ ⵜⵓⵜⵍⴰⵢⵜ ⵉⵏⵓ? ⵡⵉ ⵣⵣⴰⵢⵙ ⵖⴰ ⵢⴰⵔⵉⵏ? ⴰⵎⵎⵓ ⵉ ⵜⵓⵖⴰ ⵜⵜⵎⵏⵖⵉⵖ ⴰⴽⴷ ⵉⵅⴼ ⵉⵏⵓ, ⵓⵛⴰ ⵙⵜⵉⵖ ⴰⴷ ⴰⵔⵉⵖ ⵙ ⵜⵎⴰⵣⵉⵖⵜ.

ⴷⴳ ⵓⵙⴳⴳⵯⴰⵙ ⵏ 2012, ⵜⵙⵙⵓⴼⵖ ⴷ ⴰⴷⵍⵉⵙ ⵏ ⵜⵓⵍⵍⵉⵙⵉⵏ ⵏⵏⵛ ⴰⵎⵣⵡⴰⵔⵓ, ⵎⴰⵢⵎⵎⵉ ⵉ ⴷⴰⵙ ⵜⴳⴳⵉⴷ ⵉⵙⵎ ⵏ “ⵎⴰⵔⵜⵛⵉⴽⴰ”? ⵎⵉⵏ ⵉⵅⵙ ⴰⴷ ⵢⵉⵏⵉ?

ⵎⴰⵔⵜⵛⵉⴽⴰ ⴷ ⵉⵛⵜ ⵣⵉ ⵓⴳⵎⵎⵓⵎ ⵏ ⵜⵓⵍⵍⵉⵙⵉⵏ ⵉ ⵙⵙⵓⴼⵖⵖ ⴷⵉ 2012, ⵢⵓⵙⴷ ⴷ ⴰⵣⵡⵍ ⵏⵙⵏⵜ, ⵅⴰⵕⵕⵚⵖ ⴰⵟⵟⴰⵙ ⴷⴳ ⵓⵣⵡⵍ ⵓⴼⵉⵖ ⵎⴰⵔⵜⵛⵉⴽⴰ ⴷ ⵉⵊⵏ ⵢⵉⵙⵎ ⵢⵓⴳⵔ ⴷⵉ ⵜⵡⵏⴳⵉⵎⵜ ⵏ ⵓⵏⴰⵎⵓⵏ, ⴷ ⵉⵊⵊ ⵏ ⵡⴰⵢⴷⴰ ⵣⵉ ⵜⴼⵔⴽⵜ ⵏ ⵓⵃⵡⵡⴰⵙ ⴰⵙⴱⴱⴰⵏⵢⵓ ⴷⵉ ⵜⵎⵏⴰⴹⵜ ⵏ ⴰⵔⵔⵉⴼ. ⵎⴰⵔⵜⵛⵉⴽⴰ ⵉⵙⵎⵓⵏ ⵙⵉⵏ ⵏ ⵜⴳⵓⵔⵉⵡⵉⵏ ⴷ ⵜⵉⵙⴱⴱⵓⵏⵢⴰ “Mar” ⴷ “Chica” ⵉⵍⵍ ⴰⵎⵥⵥⵢⴰⵏ ⴷⴳ ⵉⵍⵙ ⵏ ⴰⵔⵔⵉⴼ ⵏⵉⵖ “ⵍⴱⵃⴰⵕ ⴰⵎⵥⵥⵢⴰⵏ” ⵉ ⵉⵍⵍⴰⵏ ⴷ ⴰⴳⵍⵎⴰⵎ ⴷⵉ ⵜⵎⴷⵉⵏⵜ ⵏ ⵏⵏⴰⴹⵓⵕ ⵢⴰⵔⵥⵎ ⵖⵔ ⵢⵉⵍⵍ ⴰⵛⵎⵍⴰⵍ.

ⵓⵎⵉ ⴰⵔⵔⵉⴼ ⴷⴰⵢⵙ ⴰⵟⵟⴰⵚ ⵏ ⵜⴼⵔⴰⵙ ⵓⵙⴱⴱⴰⵏⵢⵓ ⵙⵜⵉⵖ ⴰⵣⵡⵍ ⵏ ⵎⴰⵔⵜⵛⵉⴽⴰ ⵉ ⵙⵙⵏⵏ ⵜⴰⵔⵡⴰ ⵏ ⴰⵔⵔⵉⴼ ⵎⵉⵏ ⵜⵄⵏⴰ, ⵎⴰⵎⴽ ⵉⵜⵜⵊⵊⴰ ⵓⵣⵡⵍ ⴰ ⵉⵎⵖⵔⵉ ⴰⴷ ⵉⵙⵙⵇⵙⴰ ⵎⵉⵏ ⵉⴼⴼⴰⵔⵏ ⴰⵡⴰⵔⵏ ⴰⵙ.

ⵎⵉⵏ ⵄⵏⴰⵏⵜ ⵜⵖⴰⵡⵙⵉⵡⵉⵏ ⵎⵉⵏ ⵅⴼ ⵜⵙⵙⵉⵡⵍⴷ ⴷⴳ ⵓⴷⵍⵉⵙ ⴰ? ⵎⴰ ⴷⵉⵏ ⵛⴰ ⵏ ⵓⴼⵉⵍⵓ ⵉⵙⵎⵓⵏⴰⵏ ⵊⵔ ⵜⵓⵍⵍⵉⵙⵉⵏ ⵏⵏⵛ?

ⵙⵙⵏⵜⵉⵖ ⵜⵓⵍⵍⵉⵙⵉⵏ ⵙ ⵜⴱⵔⴰⵜ ⵉ ⵛⵓⴽⵔⵉ, ⵉⵛⵜ ⵏ ⵜⴱⵔⴰⵜ ⵅⴼ ⵜⵏⵜⵜⵉⵜ ⵏ ⵓⵎⴰⵔⵓ ⴷ ⴰⵖⵎⵎⵓⵢ ⵣⵉ ⵜⵎⵓⵔⵜ ⵏ ⴰⵔⵔⵉⴼ, ⵃⴰⴷⵉⵖ ⵜⵖⴰⵡⵙⴰ ⵏ ⵜⵎⵣⵡⴰⴳⵜ ⴷ ⵓⵄⵔⴰⵇ ⵉ ⵢⵉⵡⵢⵏ ⵜⵉⵙⵇⵇⴰⵔ ⵎⵖⴰⵔⵏⵜ ⵣⵉ ⵜⴰⵔⵡⴰ ⵏ ⵜⵎⵓⵔⵜ, ⴰⵔⴳⴱⵖ ⵅⴼ ⵜⵙⵔⵜⵉⵜ ⴷ ⵡⴰⴷⴷⵓⵔ ⵏ ⵓⵡⴰⵏⴽ ⵖⵔ ⵡⴳⴷⵓⴷ ⵙ ⵍⵅⵣⵔⴰⵜ ⵏⵙⵏ ⵖⵔ ⵓⵊⴰⵔⵔⴰⵢ “ⵍⵎⵇⴷⴷⵎ”, ⴷⴰⵢⵙ ⵜⴰⵢⵔⵉ ⴷ ⵜⵎⵅⵙⴰ ⵏ ⵜⵎⵓⵔⵜ ⴷ ⴰⵢⵜ ⴱⴰⴱ ⵏⵏⵙ.

ⴳⴳⵉⵖ ⵜⵉⵣⵎⵎⴰⵔ ⴰⴷ ⵙⵎⵓⵏⵖ ⴰⵟⵟⴰⵚ ⵏ ⵜⵖⴰⵡⵙⵉⵡⵉⵏ ⵇⵇⵏⵏⵜ ⵎⴰⵕⵕⴰ ⵖⵔ ⵉⵛⵜ ⵏ ⵜⵖⴰⵡⵙⴰ ⵏⵜⵜⴰⵜ: ⵜⴰⵏⵜⵜⵉⵜ ⴷ ⵜⵎⵅⵙⴰ ⵏ ⵜⵎⵓⵔⵜ ⴷ ⵡⴼⴳⴰⵏ.

ⵎⴰⵎⵛ ⵜⵜⵡⴰⵍⵉⴷ ⴰⴷⴷⴰⴷ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⴰⵙⵙ ⴰ? ⵎⴰ ⵜⵜⵉⵛⵛⵏ ⴰⵙ ⵜⴰⵢⵏⵉⵜ ⵉ ⵉⵙⵜⴰⵀⵍⵍ?

ⵜⴰⵙⴽⵍⴰ ⵜⴰⵎⴰⵣⵉⵖⵜ ⵄⴰⴷ ⵡⴰⵔ ⴷⴰⵙ ⵜⵉⵛⵛⵏ ⵜⴰⵢⵏⵉⵜ ⴰⵎ ⵜⵙⴽⵍⴰ ⵙ ⵜⵓⵜⵍⴰⵢⵉⵏ ⵏⵏⵉⴹⵏ, ⵉⵎⵖⵏⴰⵙ ⵉⵎⴰⵣⵉⵖⵏ ⵣⵣⴰⵢⵙⵏ ⵉ ⵜⵉⵡⴹ ⵜⵎⴰⵣⵉⵖⵜ ⴰⴷ ⵜⴱⴷⴷ ⵛⵡⴰⵢ ⵅⴼ ⵉⴹⴰⵕⵏ ⵏⵏⵙ, ⵎⴰⵛⴰ ⵜⵉⵎⵔⵙⴰⵍ ⵄⴰⴷ ⵅⵣⵣⴰⵔⵏⵜ ⵙ ⵓⵖⵣⴷⵉⵙ ⵖⴰⵔ ⵜⵎⴰⵣⵉⵖⵜ ⵡⴰⵅⵅⴰ ⵏⵜⵜⴰⵜ ⴷ ⵜⴰⵏⴰⵎⵓⵔⵜ, ⵙ ⵓⵢⴰ ⵏⵙⵙⵉⵜⵉⵎ ⵣⴳ ⵉⵎⵙⵙⵓⴳⵓⵔⵏ ⴷⵉ ⵜⵎⵔⵙⴰⵍ ⵏ ⵓⵡⴰⵏⴽ ⴰⴷ ⵓⵛⵏ ⵜⴰⵢⵏⵉⵜ ⵏⵙⵏ ⵓⵊⴰⵔ ⵉ ⵜⵎⴰⵣⵉⵖⵜ ⴷⵉ ⵇⴰⵄ ⵉⵖⵣⴷⵉⵙⴰ ⵏ ⵜⵓⴷⴰⵔⵜ.

ⵎⴰⵎⵛ ⵜⴳⴳⴰ ⴼⵓⵙ ⵏ ⵜⵖⵓⵔⵉ ⵏⵏⵛ ⵉ ⵉⵍⵙ ⴷ ⵜⵙⴽⵍⴰ ⵏ ⵜⵎⴰⵣⵉⵖⵜ ⵃⵎⴰ ⴰⴷ ⵎⵖⵔⵏⵜ ⵜⵣⵎⵎⴰⵔ ⵏⵏⵛ ⵜⵉⵙⴽⵍⴰⵏⵉⵏ?

ⴷⵉ ⵜⵎⵣⵡⵓⵔⴰ ⵉⵏⵓ ⵜⵓⵖⴰ ⵜⵜⴳⴳⵖ ⵜⵉⵣⵎⵎⴰⵔ ⴷⵉ ⵜⵉⵔⴰ ⵏ ⵉⵣⵍⴰⵏ ⴷ ⵜⵎⴷⵢⴰⵣⵜ, ⵜⵓⵖⴰ ⵡⴰⵔ ⵜⵜⵅⴰⵕⵕⵚⵖ ⴰⴷ ⴰⵔⵉⵖ ⵜⵓⵍⵍⵉⵙⵉⵏ, ⵉⵣⵍⴰⵏ ⴷⵉ ⴰⵔⵔⵉⴼ ⵜⵓⵖⴰⵢⵏ ⴷⵉ ⵜⵓⴷⴰⵔⵜ ⵏⵏⵖ ⵉⵜⴰⵙⴷ ⵅⴰⴼⵉ ⵉⵀⵡⵏ ⴰⴷ ⴰⵔⵉⵖ ⴰⵙⴼⵔⵓ, ⵎⴰⵛⴰ ⵓⵎⵉ ⵖⵔⵉⵖ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵙⴽⵍⴰ ⵏⵏⵙ, ⵓⵊⴰⵔ ⴷⵉ ⵜⴱⵔⵉⴷⵜ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴷⵉ ⵜⵙⴷⴷⴰⵡⵉⵜ ⵏ ⵎⵓⵃⵎⵎⴷ ⴰⵎⵣⵡⴰⵔⵓ ⴷⵉ ⵡⵊⴷⴰ, ⴷ ⵓⵎⴰⵚⵟⵕ ⵏ ⵜⵙⴽⵍⴰ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷⵉ ⵏⵏⴰⴹⵓⵕ ⵎⴰⵏⵉ ⴰⵔⵏⵉⵖ ⴰⵙⴱⵓⵖⵍⵓ ⴷⵉ ⵜⵖⵓⵔⵉⵡⵉⵏ ⵏ ⵜⵙⴽⵍⴰ ⴷ ⵜⵓⵜⵍⴰⵢⵜ ⵜⴰⵎⵣⵉⵖⵜ ⵉⵊⵊⴰⵢ ⴰⴷ ⴰⵕⵕⵚⵖ ⴰⴷ ⵙⵙⵓⴼⵖⴻⵖ ⵉⴷⵍⵉⵙⵏ ⵏⵏⵉⴹⵏ ⴷⵉ ⵜⵙⴽⵍⴰ ⴷⴳ ⵉⵙⴳⴳⵯⵓⵙⴰ ⵉⴷ ⵖⴰ ⵢⴰⵙⵏ.

ⴰⴷⵍⵉⵙ ⵏⵏⵛ ⵜⴱⴷⴷ ⵅⴰⴼⵙ ⵜⴰⵎⵙⵎⵓⵏⵜ ⵏ ⴰⵢⵜ ⵙⵄⵉⴷ, ⵎⵉⵏ ⵜⵄⵏⴰ ⵍⵀⵉⵎⵎⵜ ⵏ ⵜⵎⵙⵎⵓⵏⵉⵏ ⴷⴳ ⵓⵙⵡⵉⵣⵉ ⴰⴽⴷ ⵜⵙⴽⵍⴰ ⵜⴰⵎⴰⵣⵉⵖⵜ?

ⵉⵊⵊ ⵏ ⵡⴰⵢⵢⵓⵣ ⵉⵎⵖⴰⵔ ⴰⵟⵟⴰⵚ ⵉ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵏ, ⵣⵣⴰⵢⵙⵏⵜ ⵉ ⵜⵓⵢⴰⵔ ⵜⵎⴰⵣⵉⵖⵜ ⵏⵏⵖ ⵖⴰⵔ ⵣⴷⴰⵜ, ⴽⵙⵉⵏⵜ ⴰⵎⵏⵓⵙ ⵣⵉ ⵣⵉⵛ ⵉ ⵜⵖⴰⵡⵙⴰ ⵏ ⵜⵎⴰⵣⵉⵖⵜ, ⴳⴳⵉⵏⵜ ⵜⵉⵡⵓⵔⵉⵡⵉⵏ ⵏ ⵜⵎⵙⵎⵓⵏⵉⵏ ⴷ ⵜⵉⵏⵎⴰⵍ ⴷⴳ ⵓⵙⵍⵎⴷ ⵏ ⵜⵓⵜⵍⴰⵢⵜ, ⵏ ⵓⴽⴰⴱⴰⵔ ⴷⴳ ⵓⵏⵄⴰⵔ ⵏⵙⵏⵜ ⵅ ⵜⵎⴰⵣⵉⵖⵜ ⴷⴳ ⵓⵖⵣⴷⵉⵙ ⴰⵙⵔⵜⴰⵏ, ⵏ ⵜⵙⴷⵍⵉⵙⵉⵏ ⴷ ⵜⵎⵔⵙⴰⵍ ⴷⴳ ⵓⵙⵓⴼⵖ ⴷ ⵜⵉⵔⴰ ⵏ ⵜⵙⴽⵍⴰ… ⵎⴰⵕⵕⴰ ⵎⵉⵏ ⵖⴰ ⵏⵉⵏⵉ ⵅⴼ ⵜⵣⵎⵎⴰⵔ ⵏ ⵜⵎⵙⵎⵓⵏⵉⵏ ⵉⵜⵖⵉⵎⴰ ⴷⵔⵓⵙⵜ ⵅⴰⴼⵙⵏⵜ, ⴰⵢⵢⵓⵣ ⵉ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴷⵉ ⵜⵎⵓⵔⵜ ⵏⵏⵖ ⵅⴼ ⵓⴱⴷⴷⵉ ⵏⵙⵏⵜ ⵅⴼ ⵓⵙⵓⴼⵖ ⵏ ⵡⴰⵟⵟⴰⵙ ⵏ ⵉⴷⵍⵉⵙⵏ ⵉⵙⴽⵍⴰⵏⵏ, ⴷ ⵉⵎⵙⴰⴳⴰⵔⵏ ⵃⵎⴰ ⴰⴷ ⵙⵙⵉⵙⵏⵏ ⵙ ⵉⵎⴰⵔⵓⵜⵏ.

ⵎⴰⵎⵛ ⵉ ⵜⵜⵉⵔⴰⵔ ⵜⵙⴽⵍⴰ ⴷⴳ ⵓⵃⵟⵟⵓ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴷ ⵓⵙⵎⵖⵔ ⵏⵏⵙ?

ⵜⴰⵙⴽⵍⴰ ⴷ ⵉⵊⵊ ⵏ ⵔⵎⴰⵔⵙ ⵏ ⵜⵙⵔⴰⴼⵉⵏ, ⵏⵉⵖ ⴷ ⵉⵊⵊ ⵏ ⵓⴳⴰⴷⵉⵔ ⵎⴰⵏⵉ ⵏⵣⵎⵎⴰⵔ ⴰⴷ ⵏⴼⴼⴰⵔ ⵜⵉⴳⵓⵔⵉⵡⵉⵏ ⵏ ⵜⵎⴰⵣⵉⵖⵜ ⵙ ⵓⵣⵎⵎ ⵏⵏⵙ, ⴰⴽⴷ ⵓⵙⴱⵓⵖⵍⵓ ⴰⵜⵉⴽⵏⵓⵍⵓⵊⵉ ⵎⴰⵔⴰ ⵡⴰⵔ ⵏⵓⵔⵉ ⵜⵎⴰⵣⵉⵖⵜ ⵡⴰⵔ ⵜⵜⵉⴼⵏ ⵜⴰⵔⵡⴰ ⵏⵏⵖ ⵜⵓⵜⵍⴰⵢⵏ ⵉ ⵃⴹⴰⵏⵜ ⵜⵢⵎⵎⴰⵜⵉⵏ ⵏⵏⵖ ⵣⵉ ⵣⵣⵎⴰⵏ ⵏ ⵡⴰⵎⴰⵏ. ⵜⴰⵙⴽⵍⴰ ⵜⵣⵎⵎⴰⵔ ⴰⴷ ⵜⴽⵙⵉ ⵉⵡⵏⵏⵉⵜⵏ ⴷ ⵜⴳⵓⵔⵉⵡⵉⵏ ⵏⵏⵖ ⴰⴷ ⵜⵏ ⵜⵚⵚⵉⵡⴹ ⵉ ⵡⴰⵢⵢⴰⵡⵏ ⵏⵏⵖ, ⵎⴰⵎⴽ ⵜⵣⵎⵎⴰⵔ ⵜⵙⴽⵍⴰ ⵙ ⵓⵙⵎⵔⵙ ⵏ ⵜⵉⵔⴰ ⴰⴷ ⵜⵎⵖⴰⵔ ⴷⵉ ⵜⵎⴰⵎⴽⵜ ⵏⵏⵙ ⴰⴷ ⵜⵎⵇⵓⴷⴷⴰ ⴰⴽ ⵜⵓⵜⵍⴰⵢⵉⵏ ⵜⵉⵎⵇⵇⵔⴰⵏⵉⵏ ⵏ ⵓⵎⴰⴹⴰⵍ, ⵣⵎⵎⴰⵖ ⴰⴷ ⵉⵏⵉⵖ ⵉ ⵎⴰⵕⵕⴰ ⵉⵎⴰⵣⵉⵖⵏ ⵉ ⵉⵜⴰⵔⵉⵏ ⵙ ⵜⵓⵜⵍⴰⵢⵉⵏ ⵏⵏⴹⵏ: ⵉⵇⵇⵏ ⵅⴰⵡⵎ ⴰⴷ ⵜⴰⵔⵉⵎ ⵙ ⵢⵉⵍⵙ ⵏⵡⵎ!.

ⵎⴰ ⵜⵉⵔⴰ ⵣⵎⵎⵔⵏⵜ ⴰⴷ ⵉⵍⵉⵏⵜ ⴷ ⴰⴱⵔⵉⴷ ⵏ ⵓⴱⴷⴷⵍ ⴰⵏⴰⵎⵓⵏ? ⵎⴰⵎⵛ?

ⵜⵉⵔⴰ ⵣⵎⵎⴰⵔⵏⵜ ⴰⴷ ⴱⴷⴷⵍⵏⵜ ⴰⵏⴰⵎⵓⵏ ⵎⴰⵔⴰ ⴰⵏⴰⵎⵓⵏ ⵉⵇⵇⴰⵔ! ⵎⴰⵔⴰ ⵡⴰⵔ ⴷⵉⵏ ⵜⵖⵓⵔⵉ ⵓⵎⵉ ⵖⴰ ⵏⴰⵔⵉ ⴷ ⵎⴰⵎⵛ ⵉ ⵖⴰ ⵉⵜⵜⵡⴰⴱⴷⴷⵍ ⵓⵏⴰⵎⵓⵏ? ⵜⵉⵔⴰ ⵣⵎⵎⴰⵔⵏⵜ ⴰⴷ ⴽⵙⵉⵏⵜ ⵜⵉⴱⵔⴰⵜⵉⵏ ⵉ ⵣⵉ ⵖⴰ ⵉⵙⴼⴰⵡ ⵓⵏⴰⵎⵓⵏ, ⴰⴷ ⵣⵣⴰⵢⵙⵏⵜ ⵉⵔⵎⵙ ⵎⵉⵏ ⵡⴰⵔ ⵉⵥⴰⵕⵕ ⵙ ⵜⵉⵟⵟⴰⵡⵉⵏ ⵏⵏⵙ.

ⵎⴰ ⵜⵣⵎⵎⵔ ⵜⴰⵙⴽⵍⴰ ⵜⴰⵎⴰⵣⵉⵖⵜ ⴰⴷ ⵜⴰⵡⴹ ⵖⵔ ⵓⵎⴰⴹⴰⵍ? ⵎⴰⵎⵛ?

ⵜⴰⵙⴽⵍⴰ ⵜⴰⵎⴰⵣⵉⵖⵜ ⴰⵎ ⵜⵙⴽⵍⵉⵡⵉⵏ ⵏ ⵓⵎⴰⴹⴰⵍ, ⵜⵣⵎⵎⴰⵔ ⴰⴷ ⵜⴰⵡⴹ ⵎⴰⵎⵛ ⴷⴰⵏⵖ ⵉⵡⴹⵏⵜ ⵜⵉⵏⵏⵉⴹⵏ, ⵃⵎⴰ ⴰⴷ ⵜⴰⵡⴹ ⵉⵇⵇⵏ ⵅ ⵉⵎⴰⵣⵉⵖⵏ -ⵉⵏⵏⵉ ⵉ ⵉⵜⴰⵔⵉⵏ ⵓⵊⴰⵔ ⴰⴷ ⴳⴳⵏ ⵜⵉⵣⵎⵎⴰⵔ ⵎⵖⴰⵔⵏⵜ ⴰⴷ ⵙⵙⵉⵡⴹⵏ ⵜⴰⵙⴽⵍⴰ ⵏⵙⵏ ⵖⴰⵔ ⵜⵎⴰⴹⵍⴰⵏⵜ, ⵙ ⵓⵙⵉⵙⵙⵏ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵉ ⵍⴳⵏⵓⵙ ⵏ ⴱⴰⵕⵕⴰ ⵙ ⵓⵙⵓⵖⵍ ⵏ ⵜⵙⴽⵍⴰ ⵖⴰⵔ ⵜⵓⵜⵍⴰⵢⵉⵏ ⵜⵉⵎⴰⴹⵍⴰⵏⵉⵏ ⴷ ⵓⵙⵓⵖⵍ ⵏ ⵜⵙⴽⵍⴰ ⵜⴰⵎⴰⴹⵍⴰⵏⵜ ⵖⴰⵔ ⵜⵎⴰⵣⵉⵖⵜ.

ⵣⵎⵎⴰⵔⵖ ⴰⴷ ⵉⵏⵉⵖ ⴰⵙⵓⵖⵍ ⴷ ⴰⴱⵔⵉⴷ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵖⴰⵔ ⵜⵎⴰⴹⵍⴰⵏⵜ.

ⴰⵡⵔⵏⵉ ⵉ “ⵎⴰⵔⵜⵛⵉⴽⴰ” ⵜⵜⵅⴰⵔⵔⵙⴷ ⴷⵉ ⵛⴰ ⵏ ⵍⵅⴷⵎⵜ ⵏⵏⴹⵏⵉ ⴷ ⵜⴰⵎⴰⵢⵏⵓⵜ? ⵎⴰⵎⵛ ⵜⴳⴳⴰ ⵍⵅⴷⵎⵜ ⴰ ⵎⵉⵏ ⵅⴼ ⵜⵅⵙⴷ ⴰⴷ ⵜⵅⴷⵎⴷ?

ⵎⴰⵎⵛ ⵉ ⴷⴰⴽ ⵏⵏⵉⵖ ⵣⴷⴰⵜ, ⵜⵉⵔⴰ ⵉⵏⵓ ⵜⵉⵎⵣⵡⵓⵔⴰ ⵜⵓⵖⴰⵢⵏⵜ ⴷⴳ ⵉⴳⵔ ⵏ ⵓⵙⴼⵔⵓ, ⵎⴰⵛⴰ ⵡⴰⵔ ⴷ ⵙⵙⵓⴼⵖⵖ ⵓⵍⴰ ⴷ ⵉⵊⵊ ⵏ ⵜⴰⴷⵍⴰ, ⴰⵅⴰⵕⵕⵚ ⵉⵏⵓ ⴰⴷ ⵙⵙⵓⴼⵖⵖ ⵜⴰⴷⵍⴰ ⵏ ⵓⵙⴼⵔⵓ, ⵎⴰⵎⵛ ⵉ ⵙⵙⵏⵜⵉⵖ ⴷⵉ ⵜⵉⵔⴰ ⵏ ⵓⵏⴳⴰⵍ ⵏ ⵉⵎⵥⵥⵢⴰⵏⵏ, ⴽⵔⴰ ⵏ ⵜⵓⵍⵍⵉⵙⵉⵏ ⵄⴰⴷ ⵡⴰⵔ ⴷ ⴼⴼⵉⵖⵏⵜ, ⴷⵉⵏ ⵜⵉⵔⴰ ⵉ ⵙⵙⵉⵜⵉⵎⵖ ⴰⴷ ⴼⴼⵖⵏⵜ ⵖⴰⵔ ⵉⵎⵖⵔⵉ.

ⵎⵉⵏ ⵜⵄⵏⴰ ⵜⴰⴱⵔⴰⵜ ⵏⵏⴽ ⵉ ⵉⵃⵓⴷⵔⵉⵢⵏ ⵉⵎⴰⵣⵉⵖⵏ ⵉ ⵉⵜⵜⵅⵙⵏ ⴰⴷ ⴰⴷⴼⵏ ⵜⴰⵙⴽⵍⴰ?

ⴰⴷ ⴰⵙⵏ ⵉⵏⵉⵖ ⵎⴰⵎⵛ ⵉ ⵜⵓⵖⴰ ⵉⵇⵇⴰⵔ ⵎⴰⵙⵙ ⵃⴰⵙⴰⵏ ⴱⵏⵄⴰⵇⵉⵢⵢⴰ ⴰⴼⵔⴰ ⵅ ⵢⵉⵎⴰⵏ ⵏⵏⵙ: “ⴰⵔⵉⵎ ⵡⴰⵀ! ⵎⵉⵏ ⵎⵎⴰ ⵉⴷ ⵢⵓⵙⵉⵏ ⴷⴳ ⴷⵡⵏⴳⵉⵎⵜ ⴰⵔⵉⵎ” ⵖⴰⵔ ⴰⴷ ⵜⴳⴳⵎ ⵚⵓⵕⵉⴼ ⴰⵎⵣⵡⴰⵔⵓ; ⵉⵚⵓⵔⴰⴼ ⵏⵏⵉⴹⵏ ⴰⴷ ⵀⵡⵏⵏ, ⴰⴷⴼⵎ ⵜⵉⵔⴰ ⵏ ⵜⵙⴽⵍⴰ ⵣⵣⴰⵢⵙ ⵉ ⵖⴰ ⵜⵙⵙⵎⵖⴰⵔⵎ ⵉⵅⴼ ⵏⵡⵎ ⴷ ⵜⵓⵜⵍⴰⵢⵜ ⵏⵡⵎ

ⴰⵡⴰⵍ ⴰⵎⴳⴳⴰⵔⵓ ⵜⵅⵙⴷ ⴰⴷ ⵜⵉⵏⵉⴷ ..

ⴰⵇⴰⴷⵉ ⵉ ⵛⴽ ⵜⴰⵡⵎⴰⵜ ⴷ ⵓⵎⴰⴹⴰⵍ ⴰⵎⴰⵣⵉⵖ ⵅⴼ ⵓⵙⵏⵡⵊⵉ ⵏⵡⵎ ⴷ ⵜⴰⵢⵏⵉⵜ ⵉ ⵜⵙⴽⵍⴰ ⵜⴰⵎⴰⵣⵉⵖⵜ, ⴰⴼⵔⴰ ⵅ ⵢⵉⵎⴰⵏ ⵏ ⵎⴰⵕⵕⴰ ⵉⵏⵏⵉ ⵉ ⵜⵉⵡⵉ ⵜⵎⵏⴰⵡⵜ ⴰⵎⵏ ⵜⵅⴰⵕⵕⵚⵏ ⴷⵉ ⵜⵎⴰⵣⵉⵖⵜ, ⵙ ⵜⵓⵣⵣⴳⴳⴰⵔⵜ ⵏ ⵜⵓⴷⴰⵔⵜ ⴷ ⵜⵛⵓⵏⵉ ⵏⵏⵙ ⵉ ⵎⴰⵕⵕⴰ ⵉⵎⴰⵣⵉⵖⵏ ⵏ ⵓⵎⴰⴹⴰⵍ.

ⴰⵎⵙⴰⵡⴰⵍ: ⵅⴰⵢⵔⴷⴷⵉⵏ ⵍⵊⴰⵎⵄⵉ