ⵙ ⵓⵊⵎⵉⵍ ⵏ ⴱⴰⴱ ⵏ ⵡⴰⴷⴷⵓⵔ, ⵍⵎⵖⵔⵉⴱ ⵉⵣⵎⵔ ⴰⴷ ⵉⴳ ⴰⵎⵣⵡⴰⵔ ⴰⵎⵏⵥⴰⵡ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ (ⵎⴰⵙⵙ ⴰⵅⵏⵏⵓⵛ)

ⵉⵏⵏⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⴰⴷ ⵏ ⵓⵙⵉⵏⴰⵙ ⴳ ⵕⵓⵎⴰ, ⵎⴰⵙ ⴷ ⵍⵎⵖⵔⵉⴱ ⵉⵣⵎⵔ ⴳ ⵉⵙⴳⴳⵯⴰⵙⵏ ⴰⴷ ⵣⵔⵉⵏⵉⵏ, ⵙ ⵜⵡⵉⵙⵉ ⵏ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ, ⴰⴷ ⵉⴷⵡⵍ ⴷ ⴰⵎⵣⵡⵣⵔ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵎⵏⵥⴰⵡ.

ⵉⵙⵙⵉⵙⴼⵉⵡ ⵎⴰⵙⵙ ⴰⵅⵏⵏⵓⵛ ⴳ ⵜⴽⵛⵛⵓⵎⵜ ⵏⵏⵙ ⵉⴼⴽⴰ ⵜⵜ ⴳ ⵜⵉⵏⴰⵡⵜ ⵅⴼ ⵓⵙⵏⵜⵍ  » ⵜⴰⵥⴹⴰⵕⵜ, ⵜⴰⵏⴼⵔⵓⵜ, ⴷ ⵓⵎⵓⵜⵜⵉ » ⵜⴻⵜⵜⵓⵏⵎⴰⵍⴰ ⴳ ⵓⵙⴰⵜⵉ ⵏ ⵜⵉⵍⴰⵍ ⵏ ⵓⵏⵎⵓⵇⵇⴰⵔ ⵢⴰⵜⵜⵓⵢⵏ ⵉⵟⴰⵍⵢⴰ – ⵉⴼⵔⵉⵇⵢⴰ … ⵜⴰⵍⴳⴳⵯⵉⵜ ⵏ ⵜⵙⵔⵉ ⵉⵛⵛⴰⵔⵏ », ⵎⴰⵙ ⵍⵎⵖⵔⵉⴱ ⵉⴷⵡⵍ ⴰⵎⵣⵡⴰⵔ ⴳ ⵢⵉⴳⵔ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵎⵏⵥⴰⵡ ⵙⴳ ⵓⴳⴳⴰⵔ ⵏ 15 ⵏ ⵓⵙⴳⴳⵯⴰⵙ, ⵉⵙⵎⴰⵜⵔ ⵎⴰⵙ ⴷ ⵜⴰⵣⵡⴰⵔⵜ ⵜⴷⵓⵙ ⵙ ⵓⵍⵜⴰⵖ ⴳ ⵓⵙⴱⵓⵖⵍⵓ ⵏ ⵢⵉⴳⵔ ⵏ ⵓⵀⵉⴷⵕⵓⵊⵉⵏ ⴰⵣⴳⵣⴰⵡ ⴷ ⵓⵣⵣⴳⵉⵔ ⵏ ⵜⵙⵏⵜⴰⵢⵜ ⵏ ⵓⵊⵄⴱⵓⴱ ⵏ ⵓⴳⴰⵣ ⵏⵉⵊⵉⵔⵢⴰ – ⵍⵎⵖⵔⵉⴱ, ⵏⵏⴰ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵏⴼⵔⵓⵜ ⵜⴰⵥⴹⴰⵕⴰⵏⵜ ⵏ ⵓⵜⴰⵔⴰⵎ ⵏ ⵜⴼⵔⵉⵇⵜ ⵓⵍⴰ ⴷ ⵜⵎⵓⵏⵜ ⵜⴰⵡⵕⵓⴱⴱⵉⵜ.

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⴷ ⵙ ⵜⵡⵉⵙⵉ ⵏ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ, ⵉⵕⵥⵎ ⵍⵎⵖⵔⵉⴱ ⵉ ⵜⵙⵜⵕⴰⵜⵉⵊⵉⵜ ⵏⵏⵙ ⵜⴰⵎⵣⵡⴰⵔⵓⵜ ⵏ ⵜⴳⵎⵉ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴳ ⵓⵙⴳⴳⵯⴰⵙ ⵏ 2009, ⵍⵍⵉⵖ ⵉⵜⵜⵓⵙⴽⴰⵔ ⵓⵙⵡⵓⵔⵉ ⵏ ⵡⵓⴷⴷⵉⵙ ⵏ ⵜⵥⴹⴰⵕⵜ ⵏ ⵜⴰⴼⵓⴽⵜ ⴳ ⵡⴰⵔⵣⴰⵣⴰⵜ, ⵖⵉⵍⴰ ⴷ ⵜⵍⴽⵎ ⵜⵣⵎⵔⵜ 560 ⴽⵉⵍⵓ ⵡⴰⵟ/ ⵜⵙⵔⴰⴳⵜ, ⵙ ⵜⵎⵔⵏⵉⵡⵜ ⵏ ⴽⵕⴰⴹ ⵏ ⵉⵙⵖⵏⵓⵜⵏ ⵉⵅⴰⵜⴰⵔⵏ ⵏ ⵜⵥⴹⴰⵕⵜ ⵏ ⵜⴰⴼⵓⴽⵜ, ⵔⴰⴷ ⵜⴽⵛⵎ ⴰⵏⵙⴰ ⵏ ⵜⵡⵓⵔⵉ ⴳ ⵜⴽⵜⵓⵜ ⵏⵏⴰ ⵔⴰⴷ ⵏⵏ ⵓⵔ ⵉⵣⵣⵔⵉ ⴰⵙⴳⴳⵯⴰⵙ ⵏ 2027 ⴳ ⵜⵙⴳⴰ ⵏ ⵎⵉⴷⵍⵜ.

ⵙ ⴰⵢⵍⵍⵉ ⵙ ⵉⵏⵏⴰ ⵓⵅⵏⵏⵓⵛ, ⵎⴰⵙ ⴷ ⵜⵉⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴷⵡⵍⵏⵜ ⴰⵔ ⵙⵎⴷⵢⴰⵏⵜ ⵓⴳⴳⴰⵔ ⵏ 40% ⴳ ⵜⵔⴽⴽⵓⵙⵜ ⵜⴰⵥⴹⴰⵕⴰⵏⵜ ⴳ ⵍⵎⵖⵔⵉⴱ, ⵙ ⵓⵎⵏⵉⴷ ⴰⴷ ⵜⵉⵡⴹ 52% ⵙ ⵓⴽⵛⵛⵓⵎ ⵏ ⵓⵙⴳⴳⵯⴰⵙ 2030.

ⵉⵔⵏⵓ ⵎⴰⵙ ⴷ ⵜⴰⴳⵍⴷⵉⵜ ⵜⵎⵙⵙⵔⵓⵙ ⵅⴼ ⵉⵙⵓⴳⴰⵎ ⵏⵏⵙ ⵉⴳⴰⵎⴰⵏⵏ, ⴷ ⵡⴰⵏⵙⴰ ⵏⵏⵙ ⴰⵊⵢⵓⴳⵕⴰⴼⵉ ⴰⵙⵜⵕⴰⵜⵉⵊⵉ, ⴷ ⵓⴷⴳⴰⵔ ⴰⵏⴼⴳⴰⵏ, ⵃⵎⴰ ⴰⴷ ⵜⵙⴱⵓⵖⵍⵓ ⵉⴳⵔ ⵏ ⵓⵀⵓⴷⵕⵓⵊⵉⵏ ⴰⵣⴳⵣⴰⵡ, ⵉⵙⵙⵎⵜⵔ ⵎⴰⵙ ⴷ  » ⵍⵎⵖⵔⵉⴱ ⵉⵍⵍⴰ ⴳ ⵡⴰⴷⴷⴰⴷ ⵉⵖⵓⴷⴰⵏ ⴳ ⵜⴽⴰⵕⴹⴰ ⵏ ⵓⵀⵉⴷⵕⵓⵊⵉⵏ ⴰⵎⴰⴹⵍⴰⵏ ».

ⵉⵙⵙⵎⵜⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⴷ ⵍⵎⵖⵔⵉⴱ ⴷ ⴰⵎⵍⵜⴰⵖ ⴳ ⵜⵓⴳⴳⴰⵙ ⵉⵡⴰⵜⵜⵙⵏ ⴰⵙⵉⵜⵜⵉ ⵏ ⵓⴽⴰⵕⴱⵓⵏ ⵙⴳ ⵓⵎⴰⴹⴰⵍ ⵏ ⵓⵙⴽⴽⴰ ⴷ ⵜⴷⵔⴰⵡⵜ ⵖⵔ ⵜⴱⵔⵉⴷⵜ ⵜⵓⵎⵏⵉⴳⵜ ⴳ ⵓⵙⴷⵓⵙ ⵏ ⵜⵏⴼⵔⵓⵜ ⵜⴰⵥⴹⴰⵕⴰⵏⵜ ⴳ ⵜⵎⵏⵥⴰⵡⵜ ⵜⴰⴼⵔⵉⵇⵜ, ⵉⵣⵎⵎⴻⵎ ⴳ ⵓⵎⵏⵉⴷ ⴰⴷ ⵎⴰⵙ ⴷ ⴰⵙⵖⵏⵓ ⵏ ⵓⵊⵄⴱⵓⴱ ⵏ ⵓⴳⴰⵣ ⵏⵉⵊⵉⵔⵢⴰ – ⵍⵎⵖⵔⵉⴱ, ⵉⴳⴰ ⴰⵎⴷⵢⴰ ⵏ ⵓⵙⵎⴰⴷ ⴰⵙⴳⴰⵡⴰⵏ ⵏⵏⴰ ⵉⵏⵏⴰⵍⵏ ⵅⴼ ⵜⴰⵏⵏⴰⵢⵜ ⵉⵛⵛⴰⵔⵏ ».

ⵉⵔⵏⵓ ⵎⴰⵙ ⴷ ⴰⵙⵖⵏⵓ ⴰⴷ ⵖⵓⵔ ⴰⵜⵉⴳ ⵉⵥⴹⴰⵕ ⴰⴷ ⵉⵏⵣⵍ ⴰⴷ ⵉⴼⴽ ⵜⴰⵥⴹⴰⵕⵜ ⵉ ⵜⵓⴳⵜ ⵏ ⵜⵎⵉⵣⴰⵔ ⵏⵏⴰ ⴳ ⵔⴰⴷ ⵉⵣⵔⵉ, ⴷ ⵓⵙⴷⵓⵙ ⵏ Lyon ⵜⴰⴽⵔⵣⴰⵏⵜ ⴷ ⵜⵎⴳⵓⵔⴰⵏⵜ ⴳ ⵜⵙⴳⴰ, ⵙⴳ ⵓⵙⵉⴷⴼ ⵖⵔ ⵜⵥⴹⴰⵕⵜ ⵜⴰⵎⵣⵉⵣⵡⵔⵜ, ⵙ ⵓⵢⴰ ⵔⴰⴷ ⵢⵉⵍⵉ ⵓⵙⵖⵓⴷⵓ ⵏ ⵜⵎⵙⵓⵜⴰⵍ ⵏ ⵜⵓⴷⵔⵜ ⵏ ⵉⵎⵣⴷⴰⵖⵏ.

ⵉⵣⴳⵣⵍ ⵎⴰⵙⵙ ⴰⵅⵏⵏⵓⵛ ⵙ ⵓⵙⴷⴷⵉⴷ ⵎⴰⵙ ⴷ ⴳ ⵓⵎⵏⴰⴹ ⵉⵜⵜⵡⴰⵙⵙⴰⵏⵏ ⵙ ⵓⵙⴷⴷⵉ ⵏ ⵜⴰⵙⵙⴰⵙⵉⵏ, ⵉⵍⵍⴰ ⵡⴰⵙⵙⴰⵔ ⵓⴳⴳⵔ ⵏ ⵜⵓⵚⴽⴰ ⵏ ⵉⵎⵓⵍⵍⵉⵜⵏ ⴷⵓⵙⵏⵉⵏ ⴳⵔ ⵉⵎⴷⵔⴰⵡⵏ ⴼⵍⵙⵏⵉⵏ, ⵉⵙⵉⵡⵍ ⵅⴼ ⵓⴷⴳⵉ ⵏⵏⵙ ⵎⴰⵙ ⴷ ⵉⵟⴰⵍⵢⴰ ⵜⵣⵎⵔ ⴰⴷ ⵜⴰⵡⵙ ⴳ ⵜⴳⵎⵉ ⵏ ⵜⵎⵉⵣⴰⵔ ⵏ ⵜⵎⵏⵥⴰⵡⵜ, ⴷⵍⴰⵡⴰⵏ ⴰⴽⴽⵯ ⵙⴳ ⵓⵎⵢⴰⵡⴰⵙ ⴳ ⵢⵉⴳⵔⴰⵏ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ, ⴰⵙⵎⵓⵜⵜⴳ, ⵜⴰⵥⴹⴰⵕⵜ, ⵜⴰⵏⴼⵔⵓⵜ, ⴰⵙⵍⵎⴷ, ⵜⴰⴷⵓⵙⵉ, ⴷ ⵓⵣⵡⴰⴳ.

ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ