ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵏⵃⵎⴷ ⵉⵕⴱⴱⵉ ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵔⵇⵇⴰⵙ ⵏⵏⵙ
ⴰⴳⴷⵓⴷ ⵉⵏⵓ ⵉⵄⵣⵣⴰⵏ
ⵜⴳⴰ ⵜⴼⴼⵓⴳⵍⴰ ⵏ ⵓⴷⴰⴱⵓ, ⵜⴰⵍⵍⵉ ⴷ ⵉⵎⵎⴰⴳⴰⵔⵏ ⴷ ⵉⵅⴼ ⵏ ⵓⵙⴳⴳⵯⴰⵙ ⴰⵀⵉⵊⵔⵉ, ⵜⴰⵎⵍⴷⴰ ⵜⴰⵙⴳⵯⵙⴰⵏⵜ ⵏ ⵓⵙⵎⴰⵢⵏⵓ ⵏ ⵜⵣⴷⴰⵢⵉⵏ ⵏ ⵜⵉⵏⵣⵉ ⵜⴰⵎⵢⴰⴳⴳⴰⵜ ⵏⴳⵔ ⵓⴷⴰⴱⵓ ⴷ ⵓⴳⴷⵓⴷ.
ⵏⵃⵎⴷ ⵉⵕⴱⴱⵉ ⵍⵍⵉ ⴰⵖ ⵉⴼⴽⴰⵏ ⵜⴰⵎⵓⵏⵜ ⴰⴷ ⵉⴷⵓⵙⵏ ⵖ ⵓⵎⵣⵔⵓⵢ ⴰⴽⴽⵯ , ⵖ ⵜⵎⵕⵥⵉⴳⵉⵏ ⵓⵍⴰ ⵜⵉⵎⵉⵎⵉⵏ.
ⵜⵓⵛⴽⴰ ⴷ ⵜⴼⴼⵓⴳⵍⴰ ⵏ ⵓⵙⴳⴳⵯⴰⵙ ⴰⴷ , ⵙ ⵓⴽⵯⵜⵜⴰⵢ ⴰⴷ ⵍⵍⵉ ⵃⵎⵍⵏ ⵉⵎⵖⵔⵉⴱⵉⵢ, ⵖ ⵜⵎⵙⵓⵜⴰⵍ ⵜⵜⵏⴼⴰⵍⵏⵉⵏ, ⵏⵏⴰ ⵖ ⵙⵓⵍⵏⵜ ⵜⵎⵉⵜⴰⵔ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⴷ ⵜⵢⵓⴼⴰ ⵏ ⵜⵏⴼⴰⵍⵉⵏ ⵜⵉⴳⵔⵖⵍⴰⵏⵉⵏ ⵅⴼ ⵜⴷⵎⵙⴰ ⵜⴰⵏⴰⵎⵓⵔⵜ ⴷ ⵜⵎⴰⴹⵍⴰⵏⵜ
ⵓⵔ ⵏⵥⴹⴰⵕ ⴰⴷ ⵏⵙⴱⵉⴷⴷ ⵉⵏⴰⵥⴰⵕⵏ ⵏ ⵓⴳⵏⵙ ⵓⵍⴰ ⵡⵉⵏ ⴱⵕⵕⴰ, ⴰⴱⵍⴰ ⵙ ⵓⵙⵎⵓⵏ ⵏⴳⵔ ⵢⵉⵎⴰⵏ ⵏ ⵜⵙⵏⵜⴰⵢⵜ ⴷ ⵜⵉⵔⵙⴰⵍ ⵏ ⵜⴱⴷⴷⵉ, ⵉ ⵓⵙⵙⴷⵓⵙ ⵏ ⵓⵣⴳⴰ ⴰⵏⴰⵎⵓⵏ, ⴷ ⵜⵏⴽⵔⴰ ⵙ ⵡⴷⴷⴰⴷ ⵏ ⵜⵎⵖⴰⵔⵜ ⴷ ⵜⵡⵊⴰ; ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ.
ⴰⴳⴷⵓⴷ ⵉⵏⵓ ⵉⵄⵣⵣⴰⵏ,
ⴰⵙⴽⵓ ⵏ ⵍⵎⵖⵔⵉⴱ ⴰⵙⴰⵜⵜⵓⵢ ⴷ ⵉⵎⵉⵣⵉ, ⵍⵍⵉ ⵏⵔⴰ ,ⵓⵔ ⴰⴷ ⵢⵉⵍⵉ ⴰⴱⵍⴰ ⵙ ⵜⴷⵔⴰⵡⵜ ⵏ ⵉⵎⵖⵔⵉⴱⵉⵢⵏ ⴰⴽⴽⵯ, ⵉⵔⴳⴰⵣⵏ ⵓⵍⴰ ⵜⵉⵎⵖⴰⵔⵉⵏ ⵖ ⵜⵉⴳⴳⵉⵜ ⵏ ⵜⴳⵎⵉ.
ⵖⴰⵢ ⴰⵏⵏ ⴰ ⴼ ⵔⴰⴷ ⵏⵙⴷⴷⵉⴷ ⵜⵉⴽⴽⵍⵜ ⵢⴰⴹⵏⵉⵏ, ⵅⴼ ⵓⵛⵛⵉⵍ ⵏ ⵜⴷⵔⴰⵡⵜ ⵢⵓⵎⴰⵏ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⵖ ⵢⵉⴳⵔⴰⵏ ⴰⴽⴽⵯ.
ⵏⵎⵎⴰⵖ ⵙⴳ ⵎⴰⴷ ⵏⵍⵍⴰ ⵖ ⵓⴷⴰⴱⵓ, ⴼ ⵜⵏⴽⵔⴰ ⵏ ⵡⴰⴷⴷⴰⴷ ⵏ ⵜⵎⵖⴰⵔⵜ, ⴷ ⵓⵏⵏⵓⵕⵥⵎⵏ ⵏ ⵉⵎⵏⴰⴷⵏ ⵏ ⵡⴰⵍⴰⵢ ⵎⵏⵉⴷ ⵏⵏⵙ, ⴷ ⴰⴷ ⴰⵙ ⵉⵜⵜⵓⴼⴽⴰ ⵓⴷⵖⴰⵔ ⵍⵍⵉ ⵜⵓⴽⵍⴰⵍ.
ⵙⴳ ⵉⵎⵓⴽⵏⵏ ⵍⵍⵉ ⵏⵙⴽⵔ, ⵓⴼⵓⵖ ⵏ ⵓⵙⵍⴳⵏ ⵏ ⵜⵡⵊⴰ ⴷ ⵓⵙⵖⵥⵏ ⵏ ⵜⵎⵏⴹⴰⵡⵜ 2011, ⵍⵍⵉ ⴷ ⵢⵉⵡⵉⵏ ⴰⵏⴳⵉⴷⴷⵉ ⴳⵔ ⵓⵔⴳⴰⵣ ⴷ ⵜⵎⵖⴰⵔⵜ ⵖ ⵉⵣⵔⴼⴰⵏ ⴷ ⵉⵎⴰⴼⵍⵍⴰⵖⵏ, ⵢⴰⵡⵉ ⴷ ⵓⵍⴰ ⵉⵎⵏⵣⵉ ⵏ ⵓⵎⵙⴰⵙⴰ ⵍⵍⵉ ⵉⴳⴰⵏ ⴰⵡⵜⵜⴰⵙ ⵏ ⵓⵡⴰⵏⴽ ⴰⴷ ⵜ ⵉⵙⵎⴷ.
ⵓⵔ ⵉⴳⵉ ⵉⵙ ⴽⴰ ⵖⵉⴷ ⵏⴽⴼⴰ ⵜⴰⴱⵖⵓⵔⵜ ⵉ ⵜⵎⵖⴰⵔⵜ ⵖⵎⴽ ⴰⵏⵏ ⴽⴰ, ⵎⴰⵛⴰ ⴰⴷ ⴰⵙ ⵜⵜⵓⴼⴽⵉⵏ ⵉⵣⵔⴼⴰⵏ ⵏⵏⵙ ⵓⵙⵍⵉⴳⵏ ⴷ ⵜⵍⵍⵓⴳⵏⴰ. ⵖ ⵍⵎⵖⵔⵉⴱ ⵏ ⵡⴰⵙⵙ ⴰⴷ, ⵓⵔ ⵉⵜⵜⵓⵎⴽⴰⵏ ⴰⴷ ⵜⵜⵓⴽⴽⵉⵙⵏ ⵉⵣⵔⴼⴰⵏ ⵉ ⵜⵎⵖⴰⵔⵜ..
ⵖ ⵖⵉⴷ, ⴰⵔ ⵏⴰⵇⵇⵔⴰ ⵉ ⵓⵙⵎⵀⵍ ⵏ ⵜⵎⵔⵙⴰⵍⵉⵏ ⵜⵉⴷⵙⵜⴰⵔⵉⵏ, ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵜⵡⵊⴰ ⴷ ⵜⵎⵖⴰⵔⵜ, ⴷ ⵓⵙⵎⴰⵢⵏⵓ ⵏ ⵏ ⵡⴰⵎⵎⴰⴽⵏ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ, ⵉ ⵜⵏⴽⵔⴰ ⵙ ⵡⴰⴷⴷⴰⴷ ⵏⵏⵙ.
ⵉⵖ ⵉⴳⴰ ⵓⵙⵍⴳⵏ ⵏ ⵜⵡⵊⴰ ⵢⴰⵏ ⵓⵣⵎⵎⵓⵥⵥⵍ ⵙ ⴷⴰⵜ, ⵀⴰ ⵏⵏ ⵓⵔ ⵙⵓⵍ ⵜⴳⵓⵎ; ⴰⵛⴽⵓ ⵜⵓⵔⵎⵉⵜ ⵜⵙⴱⴰⵢⵏ ⴷ ⴽⵉⴳⴰⵏ ⵏ ⵉⴱⴰⵢⵟⵟⴰⵕⵏ, ⵖ ⵓⵎⵏⵉⴷ ⵏ ⵓⵙⵎⴰⴷ ⵏ ⵜⵡⴰⴷⴰ ⴰⴷ, ⴰⵢⵍⵍⵉ ⵜⵜ ⵢⵓⵊⵊⴰⵏ ⴰⴷ ⵓⵔ ⵜⵙⵎⴷ ⵉⵡⵜⵜⴰⵙⵏ ⵏⵏⵙ.
ⵣⵣⵖ ⴳⵉⵙⵏ, ⵜⴰⵔ ⴰⵙⴽⴽⵉⵔ ⴰⵎⴷⴷⴰⴷ, ⵙ ⵉⵙⵔⴰⴳⵏ ⵉⵙⵓⵙⵢⵓⵍⵓⵊⵉⵏ ⴳⴰⵏⵉⵏ ⵉⵎⵏⵏⴰⵡⵏ, ⵙⵍⴰⵡⴰⵏ ⴰⴽⴽⵯ, ⵎⴰⵙ ⴷ ⵢⴰⵜ ⵜⴳⵔⵓⵎⵎⴰ ⵏ ⵉⵎⵙⵡⵓⵔⵉⵜⵏ ⴷ ⵉⵔⴳⴰⵣⵏ ⵏ ⵜⵣⵔⴼⵉ, ⵙⵓⵍⵏ ⵓⴽⴰⵏ ⵖⴰⵍⵏ ⵎⴰⵙ ⴷ ⵜⵓⴳⵔⵉⵡⵜ ⴰⴷ ⵜⵥⵍⵉ ⵙ ⵜⵎⵖⴰⵔⵉⵏ.
ⵜⵉⵍⴰⵡⵜ ⵉⴳⴰ ⵜⵜ, ⴰⵙⵍⴳⵏ ⵏ ⵜⵡⵊⴰ ⵓⵔ ⵉⴳⵉ ⴰⵙⵍⴳⵏ ⵏ ⵓⵔⴳⴰⵣ, ⵖⵎⴽ ⵍⵍⵉ ⵓⵔ ⵉⵥⵍⵉ ⵙ ⵜⵎⵖⴰⵔⵜ; ⵎⴰⵛ ⵉⴳⴰ ⴰⵙⵍⴳⵏ ⵏ ⵜⵓⵡⵊⴰ ⴰⴽⴽⵯ. ⵜⵓⴳⵔⵉⵡⵜ ⴰⵔ ⵜⵙⴽⴰⵔ ⴰⵎⵢⴰⵙ, ⴰⵛⴽⵓ ⴰⵔ ⵜⴰⴽⴽⴰ ⵉ ⵜⵎⵖⴰⵔⵜ ⵉⵣⵔⴼⴰⵏ ⵏⵏⵙ, ⵜⴽⴼ ⵉ ⵓⵔⴳⴰⵣ ⵉⵣⵔⴼⴰⵏ ⵏⵏⵙ, ⵜⵇⵇⵉⵍ ⵏⵏ ⵚⴰⵃⴰ ⵏ ⵡⴰⵣⵣⴰⵏⵏ.
ⵖⴰⵢ ⴰⵏⵏ ⴰⴼ ⵔⴰⴷ ⵏⵙⴷⴷⵉⴷ ⵅⴼ ⵓⵛⵛⵉⵓⵍ ⵏ ⵓⵡⵇⵇⵔ ⵏ ⴽⵓⵢⴰⵏ ⵉ ⵓⵙⴽⴽⵉⵔ ⴰⵎⴷⴷⴰⴷ ⴷ ⵉⵙⵎⴷⵏ, ⵉ ⵉⵙⴱⴷⴰⴷⵏ ⵏⵏⵙ ⵓⵙⵍⵉⴳⵏ.
ⵖⵎⴽ ⵍⵍⵉ ⴷ ⵉⵇⵇⴰⵏ ⴰⴷ ⵏⵣⵔⵉ ⵉⵏⴷⵍⴰⴼ ⴷ ⵜⵡⵉⵖⴰ, ⵍⵍⵉ ⴷ ⵜⵎⵍⴰ ⵜⵉⵔⵎⵉⵜ, ⴷ ⵓⵙⵖⵓⴷⵓ ⵏ ⴽⵔⴰ ⵏ ⵉⵎⵏⵏⵉⵜⵏ, ⵍⵍⵉ ⵙⵙⵉⵏⴼⵏ ⵉ ⵉⵙⵓⵖⴰⴷ ⵏⵏⵙⵏ, ⵎⴽ ⴷ ⵉⵇⵇⴰⵏ ⵎⴰⵢ ⴰⵏⵏ.
ⵍⵍⵉⵖ ⴳⵉⵖ ⴰⴳⵍⴷⵓⵏ ⵏ ⵉⵎⵓⵎⵏⵏ, ⵖⵎⴽ ⵍⵍⵉ ⵙ ⵏⵏⵉⵖ ⵖ ⵜⵉⵏⴰⵡⵜ ⵏ ⵓⵙⵏⴽⴷ ⵏ ⵜⵓⴳⵔⵉⵡⵜ ⴷⴰⵜ ⵏ ⵓⴱⴰⵕⵍⴰⵎⴰⵏ, ⵀⴰ ⵏⵏ ⵓⵔ ⵔⴰⴷ ⵙⵃⵍⵍⵓⵖ ⴰⵢⵍⵍⵉ ⵉⵙⵙⵃⵕⵎ ⵕⴱⴱⵉ, ⵓⵍⴰ ⵔⴰⴷ ⵙⵙⵃⵕⵎⵖ ⴰⵢⵍⵍⵉ ⵉⵙⵃⵍⵍⴰ ⵕⴱⴱⵉ, ⵙⵍⴰⵡⴰⵏ ⴰⴽⴽⵯ ⵖ ⵜⵖⴰⵡⵙⵉⵡⵉⵏ ⵍⵍⵉ ⴼ ⵉⵜⵜⵓⴱⴱⴰⵢ ⵡⴰⵡⴰⵍ ⵖ ⵍⵇⵇⵕⴰⵏ.
ⵙⴳ ⵖⵉⴷ, ⵏⵎⵎⴰⵖ ⴰⴷ ⵢⵉⵍⵉ ⵎⴰ ⴰⵏⵏ, ⵖ ⵢⴰⵏ ⵓⵙⴰⵜⵉ ⵏ ⵉⵡⵜⵜⴰⵙⵏ ⵅⴰⵜⵔⵏⵉⵏ ⵏ ⵛⵛⵔⵄ ⵏ ⵍⵉⵙⵍⴰⵎ, ⴷ ⵜⵉⵥⵍⴰⵢⵉⵏ ⵏ ⵡⴰⵎⵓⵏ ⴰⵎⵖⵔⵉⴱⵉ, ⵙ ⵓⵙⴽⵔ ⵙ ⵜⵖⵢⴰⵙⵜ ⴷ ⵜⵎⴰⴳⵍⴰⵢⵜ ⵉⵏⵏⵓⵕⵥⵎⵏ, ⴷ ⵓⵎⵛⴰⵡⴰⵕ ⴷ ⵓⵎⵙⴰⵡⴰⵍ, ⴷ ⵜⴷⵔⴰⵡⵜ ⵏ ⵜⵎⵔⵙⴰⵍ ⴷ ⵉⵎⵙⵜⴳⴳⴰⵔ ⵉⵎⵏⵜⴰⵢⵏ.
ⴳ ⵓⵙⴰⵜⵉ ⴰⴷ ⵏⵉⵜ, ⴰⵔ ⵏⴰⵇⵇⵔⴰ ⵉ ⵜⵡⵡⵓⵔⵉ ⵅⴼ ⵓⵙⵎⴰⵜⴰ ⵏ ⵜⵙⵏⴱⴹⴰⵢⵉⵏ ⵏ ⵜⵡⵊⴰ, ⵖ ⴽⵓ ⵜⴰⵙⴳⴰ, ⵜⵜⵓⴼⴽⵉⵏ ⴰⵙⵏⵜ ⵉⵙⵓⴳⴰⵎ ⵉⵏⴰⴼⴳⴰⵏⵏ ⵎⵖⵔⴰⵜⵏⵉⵏ, ⴷ ⵉⵎⴰⵙⵙⵏ ⵉⵎⴰⵜⵜⵉⵡⵏ ⵍⵍⵉ ⵔⴰⴷ ⵜⵏⵜ ⵢⴰⵊⵊ ⴰⴷ ⵙⴽⴰⵔⵏⵜ ⵜⴰⵡⵡⵓⵔⵉ ⵏⵏⵙⵏⵜ ⵖⵎⴽ ⵍⵍⵉ ⵙ ⴷ ⵉⵇⵇⴰⵏ.
ⵉⵇⵇⴰⵏ ⴷ ⴰⴷ ⵉⵙⵙⵏ ⴽⵓ ⵢⴰⵏ, ⵉⵣⴷ ⵉⵖ ⵜⵓⵎⵥ ⵜⵎⵖⴰⵔⵜ ⵉⵣⵔⴼⴰⵏ ⵏⵏⵙ, ⵓⵔ ⵉⴳⵉ ⵉⵙ ⵔⴰⴷ ⵉⴳ ⵎⴳⴰⵍ ⵏ ⵓⵔⴳⴰⵣ; ⵓⵍⴰ ⵉⴳⴰ ⵉⵙ ⵔⴰⴷ ⵉⴳ ⵎⴳⴰⵍ ⵏ ⵜⵎⵖⴰⵔⵜ.
ⵜⴰⵣⵣⵉⴳⵣⵜ ⵏ ⵍⵎⵖⵔⵉⴱ, ⵔⴰⴷ ⵜⵖⴰⵎⴰ ⵜⵣⴷⵉ ⴷ ⵓⴷⵖⴰⵔ ⵏ ⵜⵎⵖⴰⵔ, ⴷ ⵜⴷⵔⴰⵡⵜ ⵏⵏⵙ ⵉⵕⵡⴰⵏ, ⴳ ⵎⴰⵕⵕⴰ ⵉⴳⵔⴰⵏ ⵏ ⵜⴳⵎⵉ.
ⴰⴳⴷⵓⴷ ⵉⵏⵓ ⵉⵄⵣⵣⴰⵏ,
ⵖⵎⴽ ⵍⵍⵉ ⵜⵙⵙⵏⵎ, ⴰⴷⴷⴰⴷ ⵖ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ, ⵉⴽⵜⴰⵔ ⵙ ⵉⴷⵔⵉⵣⵏ ⵏ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⴽⵓⴼⵉⴷ 19, ⵖ ⵉⴳⵔⴰⵏ ⵉⵎⵏⵏⴰⵡⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ.
ⵖⵎⴽ ⵍⵍⵉ ⵏⵏ ⵜⴳⴳⵔ ⵜⴰⵙⵙⴰⵙⵜ ⴰⴷ ⵉ ⴽⵉⴳⴰⵏ ⵏ ⵎⵉⴷⴷⵏ, ⵙⵍⴰⵡⴰⵏ ⴰⴽⴽⵯ ⴷⴷⵔⴰⵡⵛ ⴷ ⵉⵎⵥⵍⴰⴹ, ⵍⵍⵉ ⴱⴰⵀⵔⴰ ⵜⵜⵓⴹⵕⵕⴰⵏⵉⵏ ⵖ ⵓⵙⵡⵉⵔ ⴰⴷⵎⵙⴰⵏ ⴷ ⵓⵏⴰⵎⵓⵏ.
ⵎⴰⵛⴰ ⵏⵃⵎⴷ ⵉⵕⴱⴱⵉ, ⵏⵎⵓⵔⵙ ⵖ ⵓⵙⵡⵓⴷⴷⵓ ⵏ ⵜⴼⵔⴽⵜ ⴰⴷ ⵉⵛⵇⵇⴰⵏ ⵙ ⵢⴰⵜ ⵜⵖⴰⵔⴰⵙⵜ ⵉⴳⴰⵏ ⵡⴰⵥⵥ, ⵙ ⵜⴰⵎⵓⵏⵜ ⴷ ⵜⵡⵉⵣⵉ ⵏ ⵉⵏⴰⵎⵓⵔⵏ ⴷ ⵜⵏⴱⴰⴹ.
ⵉⵙⴽⵔ ⵓⵡⴰⵏⴽ ⴰⵢⵍⵍⵉ ⴼⵍⵍⴰⵙ ⵉⵍⵍⴰⵙ, ⵜⴰⵙⵉ ⵜⴰⵎⴰⵙⴰⵢⵜ ⵏ ⵜⴷⵔⵉⵎⵜ ⵡⴰⵅⵅⴰ ⵜⴳⴳⵓⵜ, ⵃⵎⴰ ⴰⴷ ⵜⵎⵏⴰⵍⴰ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴰⴷ, ⴰⵛⴽⵓ ⵜⵉⵡⵙ ⵙ ⵜⴷⵔⵉⵎⵜ ⵍⵍⵉ ⵜⴽⴼⴰ ⵉ ⵜⴰⵡⵊⵉⵡⵉⵏ ⵍⵍⵉ ⵙⵔⵙ ⵉⵙⵖⴰⵡⵙⴰⵏ, ⵙ ⵢⴰⵜ ⵜⵖⴰⵔⴰⵙⵜ ⵉⴳⴰⵏ ⵜⵓⵙⵔⵉⴷⵜ, ⴷ ⵜⵏⵏⵉⵍ ⵉⴳⵔⴰⵏ ⵜⵜⴰⵡⴹⵕⵕⴰⵏⵉⵏ.
ⵖⵎⴽ ⵍⵍⵉ ⵜⵎⵎⴰⵖ ⴰⴷ ⵜⵙⵙⵓⵊⴷ ⵜⵉⵎⵜⵜⵉⵡⵉⵏ ⵜⵉⴷⵙⵍⴰⵏⵉⵏ, ⴰⴷ ⵓⵔ ⴱⴱⵉⵏⵜ, ⵙ ⴰⵏⵛⴽ ⵍⵍⵉ ⵉⴳⵓⵎⵏ, ⵖ ⵜⵙⴳⴳⵉⵡⵉⵏ ⴽⵓⵍⵍⵓ ⵏ ⵜⵎⴰⵣⵉⵔⵜ.
ⵉⴳ ⵍⵎⵖⵔⵉⴱ, ⵙ ⵜⵓⴳⴳⴰ ⵏ ⵎⴰⵕⵕⴰ, ⵙⴳ ⵉⵡⴰⵏⴽⵏ ⵉⵎⵣⵡⵓⵔⴰ ⵍⵍⵉ ⵉⵙⵖⴰⵏ ⴰⴳⵣⵣⴰⵢ, ⵉⵙⵙⵓⵊⴷ ⵜ ⵙ ⴱⴰⵟⵍ, ⵉ ⵎⴰⵕⵕⴰ ⵉⵏⴰⵎⵓⵔⵏ ⴷ ⵉⴱⵕⵕⴰⵏⵉⵢⵏ ⵉⵣⴷⵖⵏ ⴳ ⵍⵎⵖⵔⵉⴱ, ⵡⴰⵅⵅⴰ ⵜⵖⵍⴰ ⵜⴷⵔⵉⵎⵜ ⵏⵏⵙ.
ⵖ ⵜⵎⵙⵙⵓⵜⴰⵍ ⴰⴷ ⵏⵉⵜ, ⵏⵙⵙⵏⵜⵉ ⴰⵙⴽⵔ ⵏ ⵓⵙⵏⴼⴰⵕ ⴰⵎⵇⵇⵔⴰⵏ, ⵉ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ, ⴷ ⵓⵙⵎⵖⵔ ⵉ ⵓⵏⴰⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ.
ⵏⴻⵏⵏⵓⵕⵥⵎ ⵜⵓⴳⵜⵜ ⵏ ⵉⵙⵏⴼⴰⵕ, ⵍⵍⵉ ⵔⴰⴷ ⵉⵙⵎⴷ ⵜⵉⵅⵅⵓⵜⵔⴰ ⵜⴰⵎⴷⴷⴰⴷⵜ, ⴷ ⵓⴹⴰⴽⴰⵍ ⵏ ⵜⵏⴼⵔⵓⵜ ⴷ ⵓⴼⵔⴰ ⵏ ⵉⵏⴰⵎⵓⵔⵏ.
ⵙ ⵖⵎⴽ ⴰⴷ, ⴷ ⵖ ⵜⵉⵣⵉ ⵏⵏⴰ ⵉⵛⵃⴰⵏ ⴼ ⵓⵙⴳⴳⵯⴰⵙ,ⵉⵍⴽⵎ ⵡⵓⵟⵟⵓⵏ ⵏ ⵉⵎⵍⵜⴰⵖⵏ ⵖ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⵅⴼ ⵜⵎⴰⴹⵓⵏⵜ, ⵓⴳⴳⴰⵔ ⵏ ⵚⴹⵉⵚ ⵏ ⵉⴷ ⵎⵍⵢⵓⵏ ⵙⴳ ⵉⵎⵙⵡⵓⵔⵉⵜⵏ ⵉⴷ ⵡⴰⵔ ⵜⵉⵖⵔⴰⴹ ⴷ ⵜⴰⵡⵊⵉⵡⵉⵏ ⵏⵏⵙⵏ.
ⵔⴰⴷ ⵉⵜⵜⵓⵙⵎⵉⴷ ⵓⵙⵎⴷⵍ ⴰⴷⵓⵙⴰⵏ ⵓⵛⵛⵉⵍ, ⵖ ⵜⴳⵉⵔⴰ ⵏ ⵓⵙⴳⴳⵯⴰⵙ ⴰⴷ, ⵙ ⵓⵙⵎⴰⵜⴰ ⵏⵏⵙ ⵅⴼ ⵉⵎⵙⴱⵖⵔⵏ ⵏ ⵓⵏⴳⵔⴰⵡ “ⵕⴰⵎⵉⴷ/RAMED”
ⵖⵎⴽ ⵍⵍⵉ ⵏⵎⵖⵜⴰⵙ ⵙ ⵜⵡⵉⵙⵉ ⵏ ⵕⴱⴱⵉ ⴷ ⵓⵎⵓⵔⵙ ⵏⵏⵙ, ⵅⴼ ⵓⵙⴽⵔ ⵏ ⵓⵙⵎⴰⵜⴰ ⵏ ⵡⴰⵔⵔⴰⵣⵏ ⵏ ⵜⴰⵡⵊⴰ, ⵉⵎⵉⴽⴽ ⵙ ⵉⵎⵉⴽⴽ, ⵙⴳ ⵜⵉⴳⵉⵔⴰ ⵏ 2023, ⵙ ⵓⵡⵇⵇⵔ ⵏ ⵓⵖⴰⵡⴰⵙ ⵍⵍⵉ ⴰⵙ ⵉⵜⵜⵓⵙⴽⴰⵔⵏ.
ⵔⴰⴷ ⵉⵎⵙⴱⵖⵔ ⴳ ⵓⵙⵏⴼⴰⵔ ⴰⴷ ⴰⵏⴰⵎⵓⵔ ⵏ ⵜⵡⵉⵣⵉ, ⵎⴰⴷ ⵉⵜⵜⴳⴳⴰⵏ ⵙⴰ ⵏ ⵉⴷ ⵎⵍⵢⵓⵏ ⵏ ⵡⴰⵣⵣⴰⵏ, ⵙⵍⴰⵡⴰⵏ ⴰⴽⴽⵯ ⵙⴳ ⵜⴰⵡⵊⵉⵡⵉⵏ ⵏ ⴷⴷⵔⴰⵡⵛ ⴷ ⵉⵎⵥⵍⴰⴹ, ⴷ ⴽⵕⴰⴹ ⵉⴷ ⵎⵍⵢⵓⵏ ⵏ ⵜⵡⵊⴰ ⵉⴷ ⵡⴰⵔ ⵜⴰⵣⵣⴰⵏⵉⵏ ⵖ ⵓⵡⵜⵜⴰⵢ ⵏ ⵜⵉⵖⵔⵉ.
ⵉ ⵡⴰⵡⵜⵜⴰⵙ ⴰⴷ, ⴰⵔ ⵏⴰⵇⵇⵔⴰ ⵉ ⵡⴰⵣⵣⴰⵣ ⵙ ⵓⵙⵓⴼⵖ ⵏ ⵡⴰⵔⵔⴰ ⴰⵏⴰⵎⵓⵏ ⴰⵎⵙⵢⵉⵡⵏ, ⴰⵛⴽⵓ ⵉⴳⴰ ⵢⴰⵏ ⵉⵎⵉⵙⵙ ⴰⴷⵙⵍⴰⵏ ⵉ ⵜⵉⴽⴽⵉ ⵏ ⵡⴰⵏⵏⴰⵍ, ⴷ ⵓⴹⴰⴽⴰⵍ ⵏ ⵜⵉⵕⵡⵉ ⵏⵏⵙ.
ⴰⴳⴷⵓⴷ ⵉⵏⵓ ⵉⵄⵣⵣⴰⵏⵏ,
ⵙ ⵜⵓⴳⴳⴰⵙ ⵍⵍⵉ ⵏⵏ ⵉⴳⴰ ⵓⵡⴰⵏⴽ ⴷ ⵢⵉⴳⵔⴰⵏ ⴰⵎⴰⵜⴰⵢ ⴷ ⵓⵙⵍⵉⴳ,ⵜⵥⴹⴰⵕ ⵜⴷⵎⵙⴰ ⵜⴰⵏⴰⵎⵓⵔⵜ ⴰⴷ ⵜⵥⵥⵉⴹⵕ, ⵖ ⵓⵎⵏⵉⴷ ⵏ ⵜⴰⵙⵙⴰⵙⵉⵏ ⴷ ⵉⵙⵏⴼⴰⵍ, ⴷ ⵜⵍⴽⵎ ⵜⵉⵢⵓⴼⴰ ⴼⵓⵍⴽⵉⵏⵉⵏ ⵖ ⵉⴳⵔⴰⵏ ⵉⵎⵏⵏⴰⵡⵏ ⵏ ⵉⵙⵢⴰⴼⵓⵜⵏ.
ⵎⴰⵛⴰ ⵜⵉⴼⵔⴽⵜ ⵏ ⵓⴱⵓⵖⵍⵓ, ⵓⵔ ⵜⴽⴽⵉ ⴽⵉⴳⴰⵏ, ⵙ ⵓⵙⵔⴰⴳ ⵏ ⵜⵎⵙⵓⵜⴰⵍ ⵜⵉⵎⴰⴹⵍⴰⵏⵉⵏ ⵏ ⵖⵉⵍ ⴰⴷ.
ⵙⵔⴳⵏⵜ ⵜⵎⵙⴽⴰⵔⵉⵏ ⵏ ⴱⵕⵕⴰ, ⴷ ⵜⵢⴰⴼⵓⵜⵉⵏ ⴷⵔⵓⵙⵏⵉⵏ ⵏ ⵓⵙⴳⴳⵯⴰⵙ ⴰⴷ ⴰⵏⴼⵍⴰⵃ, ⵖ ⵡⵓⵍⵓⵢ ⵏ ⵡⴰⵜⵉⴳ ⵏ ⴽⵔⴰ ⵏ ⵜⵎⵜⵜⵉⵡⵉⵏ ⵜⵉⴷⵙⵍⴰⵏⵉⵏ, ⵏⵜⵜⴰ, ⴷ ⴰⵎⵓⴽⵔⵉⵙ ⵏⵏⴰ ⵖ ⴷⴷⵔⵏ ⵉⵡⴰⵏⴽⵏ ⴰⴽⴽⵯ.
ⵍⵍⵉⵖ ⵏⴼⵔⴽ ⵙ ⵉⴷⵔⵉⵣⵏ ⵏ ⵉⵙⵔⵓⵙⵏ ⴰⴷ, ⴼ ⵡⴰⴷⴷⴰⴷ ⵏ ⵜⵓⴷⵔⵜ ⵏ ⵜⵓⴳⵜ ⵏ ⵉⵏⴰⵎⵓⵔⵏ, ⵏⴻⵏⵏⵓⵕⵥⵎ ⵢⴰⵏ ⵓⵖⴰⵡⴰⵙ ⴰⵏⴰⵎⵓⵔ ⵍⵍⵉ ⵔⴰⴷ ⵉⵙⵙⵉⴼⵙⵓⵙ ⴳ ⵉⴷⵔⵉⵣ ⵏ ⵜⴰⵖⴰⵔⵜ ⴼ ⵉⴼⵍⵍⴰⵃⵏ, ⴷ ⵓⵍⴰ ⵉⵎⵣⴷⴰⵖⵏ ⵏ ⵓⵎⴰⴹⴰⵍ ⴰⴼⴰⵔⴰⵏ.
ⵖⵎⴽ ⵍⵍⵉ ⵏⵙⵏⵎⵍ ⵉ ⵜⵏⴱⴰⴹⵜ ⴰⴷ ⵜⵥⵍⵉ ⵜⴰⴷⵔⵉⵎⵜ ⵉⴼⵓⵍⴽⵉⵏ, ⵉ ⵓⵙⵏⴰⵍ ⵏ ⵡⴰⵜⵉⴳ ⵏ ⴽⵔⴰ ⵏ ⵜⵎⵜⵜⵉⵡⵉⵏ ⵜⵉⴷⵙⵍⴰⵏⵉⵏ, ⴷ ⵓⴹⴰⴽⴰⵍ ⵏ ⵓⵙⵓⵊⴷ ⵏⵏⵙⵏⵜ ⴳ ⵉⴳⴰⴷⴰⵣⵏ.
ⵓⵔ ⵉⴳⵉ ⵎⴰ ⴰⴷ ⵢⴰⵜ ⵖ ⵓⵣⵔⴼ ⵏ ⵉⵎⵖⵔⵉⴱⵉⵢⵏ.
ⴳ ⵓⵙⴰⵜⵉ ⴰⴷ, ⵉⵜⵜⵓⵙⴽⴰⵔ ⵓⵏⵓⴹⵓ ⵏ ⵜⴷⵔⵉⵎⵜ ⵏ ⵓⴼⵏⵉⵇ ⵏ ⵡⴰⵔⵔⴰⵣ, ⴰⵔ ⵉⵍⵍⵉⵖ ⵜⵣⵔⵉ 32 ⵎⵍⵢⴰⵕ ⵏ ⴷⵔⵀⵎ, ⴳ ⵓⵙⴳⴳⵯⴰⵙ 2022.
ⴳ ⵓⵏⴳⵉⴱⴰⵍ ⵏ ⵎⴰ ⴰⵏⵏ, ⴰⵔ ⵏⴰⵇⵇⵔⴰ ⵉ ⵓⵙⵙⴷⵓⵙ ⵏ ⵉⵎⴰⵙⵙⵏ ⵜⵡⵉⵣⵉ ⵜⴰⵏⴰⵎⵓⵔⵜ, ⴷ ⴰⴷ ⵏⴰⵙⵉ ⵜⴰⵎⴰⵙⴰⵢⵜ ⵏⴱⵉⴽⴽⵙ ⴰⴷ ⵏⵙⴱⵉⴷⴷ ⵉⵎⵡⴰⵜⵏ ⴷ ⵉⵙⵃⴷⵓⴷⵉⵢⵏ ⵏ ⵉⵜⵉⴳⵏ.
ⵎⵇⵇⴰⵔ ⵍⵍⴰⵏ ⵉⵙⵏⴼⵍⵏ ⵖ ⵓⵙⵔⵓⵙ ⴰⴳⵔⴰⵖⵍⴰⵏ, ⵉⵍⵍⴰ ⴼⵍⵍⴰⵖ ⴰⴷ ⵏⵖⴰⵎⴰ ⵏⵙⴼⴰⵍⴰ, ⵏⵙⵉⴽⵍ ⴼ ⵜⵏⵇⵇⴰⴹ ⵏ ⵓⴷⵡⴰⵙ ⵏⵏⵖ.
ⵉⵇⵇⴰⵏ ⴷ ⴰⵏ ⵏⵎⵎⴰⵖ ⴰⴷ ⴷⴰⵔⵏⵖ ⵢⵉⵍⵉ ⵚⴰⵃⴰ ⵙⴳ ⵡⴰⵏⵏⴰⵣ ⴷ ⵉⴷⵉⵔⵏ, ⵍⵍⵉ ⴰⴽⴽⴰⵏ ⵉⵙⵏⴼⵍⵏ ⴰⴷ, ⵙⵍⴰⵡⴰⵏ ⴰⴽⴽⵯ ⵖ ⵢⵉⴳⵔ ⵍⵍⵉ ⵔⴰⴷ ⴷ ⵢⴰⵡⵉ ⵉⵙⵙⴰⵔⵓⵜⵏ, ⴷ ⵓⵙⵙⵔⵇⴱ ⵏ ⵉⵙⵉⴼⵉⴹⵏ, ⴷ ⵓⵙⵎⵖⵔ ⵏ ⵓⵢⴰⴼⵓ ⴰⵏⴰⵎⵓⵔ.
ⵖ ⵖⵉⴷ, ⴰⵔ ⵏⴰⵇⵇⵔⴰ ⵉ ⵜⵏⴱⴰⴹⵜ ⴷ ⵉⵎⵙⵜⴳⴳⴰⵔⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ,ⵙ ⵜⵡⵡⵓⵔⵉ ⴼ ⵓⵙⵙⵔⵅⵓ ⵏ ⵓⴽⵛⵓⵎ ⵏ ⵉⵙⵙⴰⵔⵓⵜⵏ ⵏ ⴱⵕⵕⴰ, ⵍⵍⵉ ⵙⵜⵉⵏⵉⵏ ⵜⴰⵎⴰⵣⵉⵔⵜ ⵏⵏⵖ ⵖ ⵉⵙⵔⵓⵙⵏ ⴰⴷ ⵉⵎⴰⴹⵍⴰⵏⵏ, ⴷ ⵓⵙⵉⵜⵜⵉ ⵏ ⵉⴱⴰⵢⵟⵟⴰⵕⵏ ⴳ ⵓⵎⵏⵉⴷ ⵏⵏⵙⵏ.
ⴰⵛⴽⵓ ⵉⵎⵉⵣⵉ ⴰⵎⵇⵇⵔⴰⵏ ⴷⴰⵜ ⵏ ⵜⴳⵎⵉ ⵏ ⵜⵎⴰⵣⵉⵔⵜ ⵏⵏⵖ, ⴷ ⵓⵙⵎⵖⵔ ⵏ ⵉⵙⵙⴰⵔⵓⵜⵏ, ⴳⴰⵏ ⵜⵏ ⵉⴱⴰⵢⵟⵟⴰⵕⵏ ⵜⵜⵓⵇⵚⴰⴹⵏⵉⵏ, ⵍⵍⵉⵖ ⵔⴰⵏ ⵉⴷⴱⴰⴱ ⵏⵏⵙⵏ ⴰⴷ ⵙⵉⵙⵏ ⵙⵙⵔⴱⵃⵏ ⵉⵅⴼⴰⵡⵏ ⵏⵏⵙⵏ, ⴷ ⴰⵢⵏⵏⴰ ⵖ ⴰⵙⵏ ⵉⵍⵍⴰ ⵚⴰⵃⴰ, ⴰⵢⵍⵍⵉ ⵙ ⴷ ⵉⵇⵇⴰⵏ ⴰⴷ ⵜ ⵏⵙⴱⵉⴷⴷ.
ⴰⴳⴷⵓⴷ ⵉⵏⵓ ⵉⵄⵣⵣⴰⵏ,
ⴰⵙⵖⵓⵏ ⵏⵏⵖ ⵙ ⵓⵙⵎⵖⵔ ⵏ ⵡⴰⴷⴷⴰⴷⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵓⵔ ⴷⵉⴷⵙ ⵉⵏⴳⴰⴷⴷⴰⵏ ⴰⴱⵍⴰ ⵉⵡⵉⵣ ⵏⵏⵖ ⵉⵙⵓⵍⵏ, ⴼ ⵓⵙⵎⴽⵍ ⵏ ⵜⵎⵣⵡⵓⵔⴰ ⵏ ⵍⵎⵖⵔⵉⴱ, ⴳ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵎⴰⴹⵍⴰⵏ.
ⴳ ⵓⵙⴰⵜⵉ ⴰⴷ, ⴰⵔ ⵏⵜⵜⵉⵏⵉ ⵜⵉⴽⴽⵍⵜ ⵢⴰⴹⵏⵉⵏ, ⵎⴰⵙ ⴷ ⵉⵡⵜⵜⴰ ⵍⵍⵉ ⵉⴱⴹⴰⵏ ⵏⴳⵔ ⵉⵎⴰⴷⴰⵏⵏ ⴰⵢⵜⵎⴰⵜⵏ, ⴰⵎⵖⵔⵉⴱⵉ ⴷ ⵓⴷⵣⴰⵢⵔⵉ, ⵓⵔ ⵙⴰⵔ ⵔⴰⴷ ⴳⵉⵏ ⵉⵡⵜⵜⴰ ⵍⵍⵉ ⵔⴰⴷ ⵉⵇⵇⵏ ⴰⵏⵢⴰⵍⴽⴰⵎ ⴷ ⵓⵏⵔⴰⵎⴰⵙ ⴳⵔⴰⵜⵙⵏ.
ⵎⴰⵛ ⵏⵔⴰ ⵜⵏ ⴰⴷ ⴳⵉⵏ ⵜⵉⵍⴳⴳⵯⵉⵜ ⵍⵍⵉ ⵔⴰⴷ ⵢⴰⵙⵉ ⴳⵔ ⵉⴼⴰⵙⵙⵏ ⵏⵏⵙ ⵉⵎⴰⵍ ⵏ ⵍⵎⵖⵔⵉⴱ ⴷ ⴷⴷⵣⴰⵢⵔ, ⵜⴳ ⴰⵎⴷⵢⴰ ⵉ ⵉⵎⴰⴷⴰⵏⵏ ⵉⵎⵖⴰⵔⴱⵉⵢⵏ ⵢⴰⴹⵏⵉⵏ.
ⵙ ⵜⵎⵍⴷⴰ ⴰⴷ, ⴰⵔ ⵜⵜⵓⵚⵚⵓⵖ ⵉⵎⵖⵔⵉⴱⵉⵢⵏ, ⵙ ⵓⵣⵣⵉⴳⵣ ⵖ ⵍⵍⴰⵏⵜ ⵜⵉⵏⴷⵉⵜⵉⵏ ⵏ ⵜⴰⴳⵯⵎⴰⵜ ⴷ ⵜⵡⵉⵣⵉ, ⴷ ⵜⵉⴷⵊⵓⵕⴰ ⵉⴼⵓⵍⴽⵉⵏ, ⵍⵍⵉ ⴰⵖ ⵉⵣⴷⵉⵏ ⴷ ⵡⴰⵢⵜⵎⴰⵜⵏ ⵏⵏⵖ ⵉⴷⵣⴰⵢⵔⵉⵏ,ⵍⵍⵉ ⵎⵉ ⵏⵙⵙⵉⵖⵥⵉⵏ ⵎⴰⵙ ⵔⴰⴷ ⴱⴷⴷⴰ ⴰⴼⵏ ⵍⵎⵖⵔⵉⴱ ⴷ ⵉⵎⵖⵔⵉⴱⵉⵢⵏ ⵖ ⵜⴰⵎⴰ ⵏⵏⵙⵏ, ⵖ ⵎⴰⵕⵕⴰ ⵉⵎⵙⵓⵜⴰⵍ ⴷ ⵡⴰⴷⴷⴰⴷⵏ.
ⴰⵎⵎⴰ ⵙ ⵎⴰⴷ ⵉⵥⵍⵉⵏ ⵙ ⵉⵡⵏⵏⴰⵏ ⵍⵍⵉ ⵉⵜⵜⴰⵙⵉⵏ ⵜⴰⵏⴰⵎⵓⵍⵜ ⵉ ⵉⵎⵖⵔⵉⴱⵉⵢⵏ ⵙ ⵓⵙⵔⴰⴳ ⵏ ⴷⴷⵣⴰⵢⵔ ⴷ ⵉⴷⵣⴰⵢⵔⵉⵏ, ⵀⴰ ⵏⵏ ⵡⵉⵍⵍⵉ ⵜⵜ ⵉⵙⴽⴰⵔⵏ, ⵙ ⵢⴰⵜ ⵜⵖⴰⵔⴰⵙⵜ ⵖ ⵓⵔ ⵜⵍⵍⵉ ⵜⵎⴰⵙⴰⵢⵜ, ⵔⴰⵏ ⴰⴷ ⵙⵙⵔⵖⵏ ⵜⴰⴽⴰⵜ ⵏ ⵜⵎⵏⵜⴳⴳⴰⵢⵜ ⴳⵔ ⵉⴳⴷⵓⴷⵏ ⴰⴷ ⴰⵢⵜⵎⴰⵜⵏ.
ⴷ ⴰⵢⵍⵍⵉ ⵉⵜⵜⵓⵡⵏⵏⴰⵏ ⵅⴼ ⵜⵣⴷⴰⵢⵉⵏ ⵜⵉⵎⵖⵔⵉⴱⵉⵢⵉⵏ ⵜⵉⴷⵣⴰⵢⵔⵉⵢⵉⵏ, ⵓⵔ ⵉⴷⵓⵙ ⴷ ⴰⵔ ⴳⵉⵖ ⵉⵜⵜⵖⴰⵎⴰ. ⴷ ⵏⴽⴽⵏⵉ ⵓⵔ ⵏⵓⵊⵊⵉ ⵓⵍⴰ ⵔⴰⴷ ⵏⴰⵊⵊ ⴰⵡⴷ ⵢⴰⵏ ⴰⴷ ⵉⵜⵜⵉⵏⵉ ⵎⴰⴷ ⵉⵀⵔⵛⵏ ⵖ ⵡⴰⵢⵜⵎⴰⵜⵏ ⵏⵏⵖ ⴷ ⵡⴰⴷⵊⴰⵕⵏ ⵏⵏⵖ.
ⵙ ⵎⴰⴷ ⵉⵥⵍⵉⵏ ⵙ ⵓⵎⴰⴷⴰⵏ ⴰⵎⵖⵔⵉⴱⵉ, ⵏⴽⴽⵏⵉ ⵏⵎⵎⴰⵖ ⴰⴷ ⵏⵏ ⵏⴼⴼⴰⵖ ⵖ ⵡⴰⴷⴷⴰⴷ ⴰⴷ, ⵏⵙⵙⴷⵓⵙ ⴰⵎⵢⴰⴷⴰⵙ ⴷ ⵓⵎⵢⴰⵡⴰⴹ ⴷ ⵓⵎⵛⴰⵛⴽⴰ ⴳⵔ ⵉⵎⴰⴷⴰⵏⵏ.
ⴷ ⵏⴽⴽⵯⵏⵉ ⵏⴻⵏⵏⵓⵔⵣ ⴰⴷ ⵏⵙⵡⵡⵓⵔⵉ ⴷ ⵜⵏⵙⵙⵉⵅⴼⵜ ⵏ ⴷⴷⵣⴰⵢⵔ, ⴱⴰⵛ ⴰⴷ ⵉⴳ ⵍⵖⵔⵉⴱ ⴷ ⴷⴷⵣⴰⵢⵔ ⴰⴼⵓⵙ ⴳ ⵓⴼⵓⵙ, ⵃⵎⴰ ⴰⴷ ⵏⵙⴽⵔ ⵜⵉⵣⴷⴰⵢⵉⵏ ⵃⵃⵓⵕⵕⵉⵏⵉⵏ ⴳⵔ ⵉⵎⴰⴷⴰⵏⵏ ⴰⵢⵜⵎⴰⵜⵏ, ⵏⵏⴰ ⵙⵎⵓⵏⵏ ⵉⵙⵖⵓⵏⵏ ⵉⵎⵣⴰⵔⴰⵢⵏ ⴷ ⵉⵏⴰⴼⴳⴰⵏⵏ ⴷ ⵜⵓⴳⴰⵔⵜ ⵉⵛⵛⴰⵔⵏ.
ⴰⴳⴷⵓⴷ ⵉⵏⵓ ⵉⵄⵣⵣⴰⵏ
ⵀⴰ ⵏⵏ ⴰⵎⵣⵔⵓⵢ ⵏ ⵍⵎⵖⵔⵉⴱ ⵉⴽⵜⴰⵔ ⵙ ⵜⵎⵙⵉⵔⵉⵏ ⴷ ⵜⵎⴳⴳⴰ, ⵍⵍⵉ ⵉⵙⵙⵉⵖⵥⵉⵏⵏ ⵎⴰⵙ ⴰⵔ ⴱⴷⴷⴰ ⵏⵣⵣⵔⴰⵢ ⵜⴰⵙⵙⴰⵙⵉⵏ, ⵙ ⵍⴼⴹⵍ ⵏ ⵓⵎⵛⴰⴱⴱⴰⴽ ⵍⵍⵉ ⴱⴷⴷⴰ ⵉⵍⵍⴰⵏ ⵏⴳⵔ ⵓⴷⴰⴱⵓ ⴷ ⵓⵎⴰⴷⴰⵏ, ⴷ ⵍⴼⴹⵍ ⵏ ⵉⵙⴼⴰⵙⴽⴰⵜⵏ ⵏ ⵉⵎⵖⵔⵉⴱⵉⵢⵏ ⵉⴷⵔⴼⵉⵢⵏ.
ⵖ ⴰⵙⵙ ⴰⴷ, ⴰⴳⴷⵓⴷ ⵉⵏⵓ ⵉⵣⵣⴰⵏ, ⵔⵉⵖ ⴰⴷ ⴽ ⵙⵏⵉⵎⵎⵔⵖ ⵙⵙⵉⵎⵖⵓⵔⵖ ⵙⵉⴽ, ⴼ ⴰⵢⵍⵍⵉ ⴽⵓⵍⵍⵓ ⵜⵙⴽⵔⵜ ⵖ ⵉⵣⵎⴰⵣ ⴷ ⵜⵎⵙⵙⵓⵜⴰⵍ, ⴳ ⵜⴰⵢⵔⵉ ⵉ ⵡⴰⵎⵓⵔ ⵏⵏⴽ ⴷ ⵜⵓⴳⴳⴰⵙ ⴼ ⵜⴰⵎⵓⵏⵜ ⵏⵏⴽ ⵜⴰⵏⴰⵎⵓⵔⵜ ⴷ ⵜⴽⴰⵍⴰⵏⵜ, ⴷ ⵓⵙⵖⵓⵏ ⵙ ⵓⵎⵣⴰⵖ ⵅⴼ ⵜⵎⵉⵜⴰⵔ ⵏⵏⴽ ⴷ ⵜⵎⵙⴼⵓⵥⵥⴰⵕ ⵏⵏⴽ.
ⴳⵎⵔⵖ ⵜⴰⵡⵀⴰⵍⵜ ⵖ ⵜⵎⵍⴷⴰ ⴰⴷ ⵉⴼⵓⵍⴽⵉⵏ, ⵃⵎⴰ ⴰⴷ ⴰⵣⵏⵖ ⵢⴰⵏ ⵡⴰⵣⵓⵍ ⴰⵅⴰⵜⴰⵔ ⴷ ⵓⵙⵎⵖⵔ, ⵉ ⵎⴰⵕⵕⴰ ⵉⴼⵔⴷⵉⵙⵏ ⵏ ⵜⴰⴳⴳⴰⵍⵉⵏ ⵏⵏⵖ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴷ ⵜⴰⴳⴳⴰⵍⵉⵏ ⵏ ⵜⵊⴷⵕⵎⵜ ⵜⴰⴳⵍⴷⴰⵏⵜ, ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴷ ⵜⴰⴳⴳⴰⵍⵉⵏ ⵏ ⵜⵡⵉⵙⵉ ⴷ ⵡⴰⵔⴰⵢ ⵓⵖⵔⵉⵎ, ⴼ ⵓⵙⵎⵓⵙⵙⵓ ⵏⵏⵙⵏ ⴰⵙⵓⵍⴰⵏ ⵖ ⵙ ⵜⵏⴰⵔⴰ ⵏⵏⵖ, ⵉ ⵓⵎⵣⴰⵖ ⴼ ⵜⴰⵎⵓⵏⵜ ⵜⴰⵏⴰⵎⵓⵔⵜ ⴷ ⵜⵏⴼⵔⵓⵜ ⵏⵏⵙ ⴷ ⵓⵣⴳⴰ ⵏⵏⵙ.
ⵖⵎⴽ ⵍⵍⵉ ⴷ ⵏⴽⵯⵜⵜⵉ ⵙ ⴽⵉⴳⴰⵏ ⵏ ⵓⵡⵇⵇⵔ, ⵉⵎⴰⵏⵏ ⵖⵓⵙⵏⵉⵏ ⵏ ⵉⵅⴰⴼⵓⵔⵏ ⵏ ⵍⵎⵖⵔⵉⴱ, ⵖ ⵜⵣⵡⵉⵔⵉ ⵏⵏⵙⵏ ⴱⴰⴱⴰⵜⵏⵖ ⴰⵎⵇⵇⵔⴰⵏ ⴷ ⴱⴰⴱⵜⵏⵖ, ⴱⴰⴱ ⵏ ⵡⴰⴷⴷⵓⵔ ⵉⴳⵍⵍⵉⴷⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⴷ ⵍⵃⴰⵙⴰⵏ ⵡⵉⵙⵙ ⵙⵉⵏ, ⴰⴷ ⵉⵙⵓⵏⴼⵓ ⵢⵉⵎⴰⵏ ⵏⵏⵙⵏ ⴳ ⵓⴼⵔⴰ.
ⵍⵅⵢⴰⵔ ⵏ ⵎⴰⵙ ⵏⵜⵜⵙⵎⴰⴷ ⵜⵉⵏⴰⵡⵜ ⴰⴷ , ⴰⵡⴰⵍ ⵏⵕⴱⴱⵉ :
“ فإن مع العسر يسرا، إن مع العسر يسرا، فإذا فرغت فانصب وإلى ربك فارغب ». صدق الله العظيم
والسلام عليكم ورحمة الله تعالى وبركاته.
ⴰⵙⵓⵖⵍ: ⵉⵃⵢⴰ ⵍⴽⴰⴱⵓⵙ
