ⵚⵚⴰⴼⵉ ⵎⵓⵎⵏ ⵄⵍⵉ: ⴰⵎⵖⵏⴰⵙ ⴷ ⵓⵎⵙⵡⵉⵏⴳⵉⵎ ⴰⵎⴰⵣⵉⵖ

ⵉⵍⵓⵍ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⴳ ⵡⵓⵙⵓⵏ ⵏ ⵡⴰⵎⵎⵍⵏ ⵏⵏⴰ ⵉⴹⴼⵕⵏ ⵉ ⵜⵇⴱⵉⵍⵜ ⵏ ⴰⵢⵜ ⵎⵣⴰⵍ ⴳ ⵓⴳⴰⴷⵉⵔ ⴰⵙⴳⴳⵯⴰⵙ ⵏ 1949, ⵍⵍⵉⵖ ⵢⵉⵡⴹ ⵙⵎⵎⵓⵙ ⵉⵙⴳⴳⵯⴰⵙⵏ ⴳ ⵓⵡⵜⴰⵢ ⵏⵏⵙ, ⵉⵎⵎⴰⵜⵜⵉ ⵙ ⵜⵖⵔⵎⵜ ⵏ ⵜⵎⵙⵏⴰ, ⵏⵏⴰ ⵖ ⵉⴹⴼⵕ ⵜⵉⵖⵔⵉ ⵏⵏⵙ ⵙⴳ ⵓⵙⵍⵎⴷ ⴰⵇⴱⵓⵔ ⴰⵔ ⴰⵙⵍⵎⴷ ⴰⵙⴷⴰⵡⴰⵏ ⴰⵎⴰⵜⵜⴰⵢ, ⵏⵜⵜⴰ ⴰ ⵖ ⵢⵓⵎⵥ ⴰⵙⵍⴽⵉⵏ ⵏ ⵜⵓⵔⴰⴳⵜ ⴳ ⵓⵙⵍⴳⵏ ⵙⴳ ⵜⵖⵉⵡⴰⵏⵜ ⵏ ⵉⵣⵔⴼⴰⵏ ⴰⵢⵍⵍⵉ ⵜ ⵢⵓⵊⵊⴰⵏ ⴰⴷ ⵢⴰⴷⴼ ⴰⵙⵉⵏⴰⴳ ⴰⵏⴰⴼⵍⵍⴰ ⵏ ⵜⵏⴱⴹⴰⵢⵜ ⴳ ⵜⵓⴳⴷⵜ ⵏ ⵜⵖⵔⵎⵉⵏ ⵉ ⵢⴰⵜ ⵜⵉⵣⵉ ⵢⴰⵥⵏ ⵎⵔⴰⵡ ⵉⵙⴳⴳⵯⴰⵙⵏ, ⵍⵍⵉⵖ ⵔⴰⴷ ⵉⵖⵜⵙ ⴹⴰⵕⵜ ⵏⵏⵙ ⴰⴷ ⵉⴼⴽ ⵜⴰⵥⵕⵥⵓⵎⵜ ⵙⴳ ⵓⵙⴰⴽⴰ ⵏ ⵜⵏⴱⴹⴰⵢⵜ, ⴰⴼⴰⴷ ⴰⴷ ⵢⴰⴷⴼ ⵜⴰⵣⵣⵓⵍⵜ ⵏ ⵜⵎⵙⵜⴰⵏⵜ.

ⵎⵇⵇⴰⵔ ⵉⵍⵍⴰ ⴷ ⵉⵣⴷⵖ ⴳ ⵜⵖⵔⵎⵜ ⵏ ⵕⵕⴱⴰⵟ, ⵓⵔ ⵉⵜⵜⵓ ⵜⴰⴳⵯⵎⴰⵏⵉⵜ ⵏⵏⵙ ⵙ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⵉⵖⴰⵎⴰ ⵉⵎⴰⵜⵔ ⴰⴷⴷⴰⴷ ⵏ ⵜⵓⵜⵍⴰⵢⵜ ⵏⵏⵙ ⴷ ⵜⴷⵍⵙⴰ ⵏⵏⵙ ⵜⴰⵎⴰⵣⵉⵖⵜ ⵙⵍⴰⵡⴰⵏ ⴰⴽⴽⵯ ⴰⵏⵎⵉⵍⴰ ⵏⵏⵙ ⴷⴰ ⴳⵉⵙ ⵉⵙⵎⵓⵇⵇⵓⵍ ⵉⵙ ⵉⴳⴰ ⴰⵕⴱⴰⵟⵉ ⵓⵔ ⴷ ⴰⵎⴰⵣⵉⵖ ⵉⵟⵟⴰⴼⵏ ⵜⵓⵥⵍⴰⵢⵉⵏ ⵜⵉⴷⵍⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵓⵔ ⵎⵎⵔⵡⴰⵙⵏⵉⵏ. ⵔⴰⴷ ⴷⴰⵔⵙ ⵉⵔⵏⵓ ⵓⵏⵣⴳⵓⵎ ⴰⴷ ⵏ ⵜⵎⴰⴳⵉⵜ ⵜⴰⵎⴰⴳⵉⵜ ⵜⴰⵎⴰⵣⵉⵖⵜ ⵍⵍⵉⵖ ⴰⵔ ⵢⴰⵇⵇⵔⴰ ⴳ ⵍⴱⴰⴽⴰⵍⵓⵕⵢⴰ, ⵍⵍⵉⵖ ⵉⵙⵡⵉⵔⵔⵉ ⵓⵙⵍⵎⴰⴷ ⵏ ⵜⵎⵜⵜⴰ ⵏ ⵜⴼⵍⵙⴰⴼⵜ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵢⴰⵜ ⵜⵓⵜⵍⴰⵢⵜ ⵜⴰⵎⵏⵣⵓⵜ (ⵓⵔ ⵜⵍⴽⵎ ⵢⴰⵜ, ⵓⵔ ⵜⴳⵉ ⵢⴰⵜ) ⴷ ⵓⵔ ⴷⴰⵔⵙ ⴽⵔⴰ ⵉⵎⴰⵍ, ⴰⴼⴰⴷ ⴰⴷ ⵉⵙⵙⵏⵥⵓ ⴰⵎⵏⴰⴷ ⵏⵏⵙ, ⵉⵙⵇⵙⴰ ⵓⵙⵍⵎⴰⴷ ⵏ ⵜⴼⵍⵙⴰⴼⵜ ⴰⵏⵍⵎⴰⴷ ⵏⵏⵙ ⵚⵚⴰⴼⵉ ⵎⵓⵎⵏ ⵄⵍⵉ ⵅⴼ ⵜⵓⴳⴷⵓⵜ (ⴰⵏⴳⵉⴱⴰⵍ) ⵏ ⵜⴳⵓⵔⵉ حدس ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵔⴰⵔ ⴰⵙ ⵓⵏⵍⵎⴰⴷ ⵎⴰⵙ ⵓⵔ ⵉⵙⵙⵉⵏ. ⵎⴰⵛⴰ ⵜⵉⵖⴰⵡⵙⵉⵡⵉⵏ ⵓⵔ ⴱⴷⴷⵏⵜ ⴳⵔ ⵉⵖⵔⴱⴰⵏ ⵏ ⵜⴷⴰⵍⴰ ⵜⴰⵏⵎⵍⴰⵏⵜ, ⵔⴰⴷ ⵉⵙⵙⴼⴰⵖ ⵓⵏⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⴰⵙⵇⵙⵉ ⵏ ⵓⵙⵍⵎⴰⴷ ⵏⵏⵙ ⵉ ⵜⵡⵊⴰ ⵏⵏⵙ ⴷ ⵡⵉⴷⴰ ⵉⵙⵙⵏ ⴷ ⵉⵎⵓⵙⵏⴰⵡⵏ ⵏ ⵜⵓⵜⵍⴰⵢⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ. ⵔⴰⵔⵏ ⴰⵙ ⵎⴰⵙ ⴷ ⵜⵓⴳⴷⵓⵜ ⵏ ⵜⴳⵓⵔⵉ حدس ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵍⵍⴰ ⴷ ⴰⵔ ⵉⵜⵜⵢⴰⵡⵏⵏⴰⵢ ⵉⴳⴰ ⵜ « ⴰⴳⵎⵎⴰⵏ ».

ⵜⴰⵎⵔⴰⵔⵓⵜ ⴰⴷ ⵜⵓⵊⵊⴰ ⴰⵏⵍⵎⴰⴷ ⴰⴷ ⵓⵔ ⵢⴰⴷⵉ ⵙ ⵓⵎⵏⴰⴷ ⵏ ⵓⵙⵍⵎⴰⴷ ⵏⵏⵙ ⴷ ⵓⵏⵥⵥⵓ ⵉⵙⵎⴷⵏ ⵎⴰⵙ ⵜⴰⵎⴰⵣⵉⵖⵜ ⵓⵔ ⵜⴳⵉ ⵜⵓⵜⵍⴰⵢⵜ ⵜⴰⵎⵏⵣⵓⵜ ⵎⴰⵛⴰ ⵏⵜⵜⴰⵜ ⴷ ⵜⵓⵜⵍⴰⵢⵜ ⵏ ⵓⵙⵅⵉⵏⴳⵎ ⴷ ⵜⵖⵔⵎⴰ, ⵣⵖ ⵜⵉⵣⵉ ⴰⵏⵏ ⵔⴰⴷ ⵉⵙⵡⵓⵔⵉ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⵅⴼ ⵉⵙⵇⵙⵉⵜⵏ ⴰⴽⴽⵯ ⵏⵏⴰ ⵉⵣⴷⵉⵏ ⴷ ⵜⵎⴰⵣⵉⵖⵜ ⵙ ⵎⴰⵙ ⵜⴳⴰ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵎⴰⵣⵉⵖⵜ ⴷ ⵓⵎⵣⵔⵓⵢ ⴷ ⵜⵎⵙⴰⵔⵜ, ⴰⵢⵍⵍⵉ ⵔⴰⴷ ⵜ ⵢⴰⵊⵊ ⴰⴷ ⵉⴳ ⴰⵎⵍⵜⴰⵖ ⵙⴳ ⵜⵉⵣⵉ ⵜⴰⵎⵏⵣⵓⵜ ⴳ ⵜⵙⵏⵜⴰⵢⵉⵏ ⴰⴽⴽⵯ ⵏ ⵜⵖⵏⵙⴰ ⵖⵓⵔ ⴰⵡⵜⵜⴰⵙ ⴰⴷ ⵢⴰⵖⵓⵍ ⵓⵙⴰⵜⵉⴳ ⵉ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ, ⵖ ⵉⴳⴰ ⵓⵍⵜⴰⵖ ⵏⵏ ⴳ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵜ ⵏ ⵓⵔⵣⵣⵓ ⴷ ⵓⴷⵏⴼⵍ ⴰⴷⵍⵙⴰⵏ ⴳ ⵕⵕⴱⴰⵟ, ⴷ ⵓⵙⴽⴰⵔ ⵏ ⵜⵓⴳⴷⵜ ⵏ ⵜⵉⵍⴰⵍ ⴳ ⵓⴳⵯⵏⵙ ⵏⵏⵙ ⴰⵢⵍⵍⵉ ⵢⵉⵡⵙⵏ ⴳ ⵜⵓⵚⴽⴰ ⵏ ⵢⴰⵏ ⵓⴼⵔⴰⴽ ⴰⵜⵔⴰⵔ ⵙ ⵜⵎⵙⴰⵔⵜ ⵏ ⵉⵣⵔⴼⴰⵏ ⵉⵙⵏⵉⵍⵙⴰⵏⵏ ⴷ ⵉⴷⵍⵙⴰⵏⵏ ⵉⵎⴰⵣⵉⵖⵏ ⴳ ⵍⵎⵖⵔⵉⴱ.

ⵜⴰⵎⵙⴰⵔⵜ ⴰⴷ ⵜⴰⵏⵎⵍⴰⵏⵜ ⵍⵍⵉ ⵎⵉ ⵉⴳⴰ ⵓⵙⵍⵎⴰⴷ ⵏ ⵜⵎⵜⵜⴰ ⵏ ⵜⴼⵍⵙⴰⴼⵜ ⴰⵏⴱⵔⴰⵣ ⵜⴳⴰ ⵉ ⵓⵏⵍⵎⴰⴷ ⴰⵙⵙⵏⵜⵉ ⵏ ⵓⵙⵡⵉⵏⴳⵎ ⴳ ⵓⵙⵇⵙⵉ ⵏ ⵜⵎⴰⴳⵉⵜ ⴳ ⵍⵎⵖⵔⵉⴱ, ⵓⵔ ⵜ ⵓⴳⵓⵎ ⴰⴷ ⵉⵔⵎⵙ ⴰⴷ ⴰⵙⵇⵙⵉ ⴰⴷ, ⵎⴰⵛⴰ ⵉⵙⵙⵏⵜⴰ ⵙ ⴰⵢⵍⵍⵉ ⵎⵉ ⵢⵓⴼⴰ ⴳ ⵜⵙⵏⵜⴰⵢⵉⵏ ⴷ ⵜⵡⵏⴳⵉⵎⵉⵏ ⴷ ⵜⵣⵎⵎⴰⵔ ⵙ ⵡⴰⴷⴰⴼ ⵙ ⵜⴷⵉⵏⴰⵎⵉⵜ ⵜⵓⵖⵔⵉⵎⵜ ⵏⵏⴰ ⵙ ⵜⵖⵔⴰ ⵣⵖ ⵜⴳⵉⵔⴰ ⵏ ⵚⴹⵉⵚⵜ ⵜⵎⵔⴰⵡⵉⵏ ⴰⴷ ⵢⴰⵖⵓⵍ ⵓⵙⴰⵜⵉⴳ ⵉ ⵜⵓⵜⵍⴰⵢⵜ ⴷ ⵜⴷⵍⵙⴰ ⴳ ⵍⵎⵖⵔⵉⴱ, ⵓⵢⴰ ⴰⴷ ⵉⵙⵙⵉⵙⴼⵉⵡ ⴰⵢⵍⵍⵉ ⵖ ⴰⴽⴽⵯ ⵉⵙⵏⴼⵍⵓⵍ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⴷ ⵉⴼⵍ ⴳⵉⵙ ⴰⴷⵔⵉⵣ ⵏⵏⵙ ⵉⴼⴰⵡⵏ.

ⴳ ⵢⵉⴳⵔ ⴰⵙⴽⵍⴰⵏ ⴷ ⵓⵡⵏⴳⵉⵎ, ⵉⴳⴰ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⵙⴳ ⵉⵏⴱⴷⴰⴷⵏ ⵏ ⵉⴳⴳⵉ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ ⴳ ⵜⴼⵔⴽⵜ ⵜⴰⵜⵔⴰⵔⵜ ⵙⵍⴰⵡⴰⵏ ⴰⴽⴽⵯ ⴳ ⵓⴱⴰⵔⴰⵣ ⵏ ⵜⵉⵔⵔⴰ ⵜⴰⵔⵉⵡⴰⵏⵜ ⴷ ⵜⵎⴰⵍⵍⴰⵙⵜ, ⵜⵉⵣⵉ ⵍⵍⵉⵖ ⴳⴳⵓⴷⵉⵏⵜ ⵜⵥⵕⵉⴳⵉⵏ ⵜⵉⵎⴷⵢⴰⵣⵉⵏ ⴳ ⵓⵙⵡⵉⵔ ⵏ ⵜⵉⵔⵔⴰ ⴰⴷ, ⴳ ⵓⵙⴰⵜⵉ ⴰⴷ, ⵉⴳⴰ ⵓⴹⵕⵉⵚ ⴰⵎⵣⴳⵓⵏ « ⵓⵙⵙⴰⵏ ⵚⵎⵎⵉⴹⵏⵉⵏ » ⴷ ⵉⴼⴼⵖⵏ ⴳ ⵓⵙⴳⴳⵯⴰⵙ ⵏ 1983 ⴰⴹⵕⵉⵚ ⴰⵎⴰⵍⵍⴰⵙ ⴷ ⵓⵎⵣⴳⵓⵏ ⴰⵎⵣⵡⴰⵔⵓ ⵉⴼⴼⵖ ⴷ ⴳ ⵢⵉⴳⵔ ⵏ ⵜⵙⴽⵍⴰ ⵜⴰⵎⵉⵔⴰⵢⵜ ⵙ ⵜⵎⴰⵣⵉⵖⵜ ⴳ ⵍⵎⵖⵔⵉⴱ, ⵉⴹⴼⵕ ⵜ ⵉⴷ ⵓⵙⵓⵖⵍ ⵏⵏⵙ ⵙ ⵜⵄⵕⴰⴱⵜ, ⴰⵙⴳⴳⵯⴰⵙ ⵏ 1984, ⵜⴳ ⵜⴰⵎⵣⴳⵓⵏⵜ ⵍⵍⵉ ⵎⵉ ⵉⵙⴽⵔ ⵉⴳⵍⵍⵉⵏ ⵄⴱⴹⵍⵍⴰⵀ ⴰⵡⵣⴰⴷ ⴰⵙⵓⴼⵖ.

ⵜⴳⴰ ⵜⵓⵍⵍⵉⵙⵜ ⵏⵏⵙ ⵖⵣⵣⵉⴼⵏ ⵉⵍⴰⵏ ⴰⵣⵡⵍ: « ⵜⵉⵖⵔⵉ ⵏ ⵜⴱⵔⴰⵜ » ⴷ ⵉⴼⴼⵖⵏ ⴳ ⵓⵙⴳⴳⵯⴰⵙ 1993 ⴰⵣⵡⵍ ⴰⵎⴰⵏⴰⵔ ⴳ ⵓⵙⴰⵢⵙ ⴰⴷ. ⴷ ⵉⵇⵇⴰⵏ ⴷ ⴰⴷ ⵏⵙⵙⵏ ⵎⴰⵙ ⴷⴰⵔⵙ ⵉⴹⵕⵉⵚⵏ ⵉⵔⵉⵡⴰⵏⵏ ⵓⵔ ⵜⴰ ⵥⵕⵉⵏ ⵜⵉⴼⴰⵡⵜ ⴳ ⵉⵍⵍⴰ: « ⵔⵉⵖ ⴰⴷ ⵥⵕⵖ ⴰⴳⵍⵍⵉⴷ » -ⵓⵏⴳⴰⵍ- « ⵜⴰⵎⴰⵡⴰⵢⵜ ⵏ ⵓⴷⵔⴰⵔ » ⵜⴰⵎⵣⴳⵓⵏⵜ ⵏⵏⴰ ⵜⵙⵎⴷⵢⴰ ⵜⵔⴰⴱⴱⵓⵜ ⵏ ⵜⴰⴼⵓⴽⵜ ⵏ ⵓⵎⵣⴳⵓⵏ ⴰⵎⴰⵣⵓⵖ.

ⵔⴰⴷ ⵉⵖⴰⵎⴰ ⵢⵉⴳⵔ ⴰⵡⵏⴳⵉⵎ ⴷ ⵓⵎⵙⵙⵏⵥⴰⵢ ⴷ ⵉⴳⵔ ⵖ ⴱⴰⵀⵔⴰ ⵉⴼⴽⴰ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⵜⵉⴷⵔⴰⵡⵉⵏ ⵜⵉⵎⴰⵏⴰⵡⵉⵏ, ⵓⵢⴰ ⵢⴰⵖⵓⵍ ⵙ ⵓⵙⵎⵓⵜⵜⴳ ⵏⵏⵙ ⵓⵍⴳⵉⵏ, ⴷ ⵙ ⵉⵏⵣⴳⵓⵎⵏ ⵏⵏⵙ ⵉⵡⵏⴳⵉⵎⵏ ⴷ ⵉⴼⵍⵙⴰⴼⵏ ⵙ ⵜⵖⵓⵔⵉⵡⵉⵏ ⵏⵏⵙ ⴷ ⵉⵙⴼⵙⵉⵜⵏ ⵏⵏⵙ ⵉ ⵜⵓⴳⵜⵜ ⵏ ⵡⴰⵔⵔⴰⵜⵏ ⴳ ⵢⵉⴳⵔ ⵏ ⵓⵙⵡⵉⵏⴳⵎ ⴰⴼⵍⵙⴰⴼ, ⵉⵎⵎⴰⵖ ⴰⴷ ⵉⵙⴰⵔⵡⴰ ⵉⵎⴰⵙⵙⵏ ⴰⴽⴽⵯ ⵏⵏⴰ ⵉⵙⵢⴰⴼⴰ ⵓⵙⵡⵓⵏⴳⵎ ⴰⴼⵍⵙⴰⴼ ⴰⵎⴰⴹⵍⴰⵏ ⵉ ⵓⵎⵣⴰⵖ ⵅⴼ ⵜⵎⵙⴰⵔⵜ ⵜⴰⵎⴰⵣⵉⵖⵜ, ⴳ ⵜⵉⵔⵔⴰ ⵏⵏⵙ ⴳ ⵓⵙⴰⵜⵉ ⴰⴷ: ⴰⴼⵔⴰⴽ ⵙ ⵜⵏⴽⴽⵉⵜ ⵏⵏⵖ ⵜⴰⵎⴰⵣⵉⵖⵜ (1996), ⵜⴰⵎⴰⵣⵉⵖⵜ ⴷⴰ ⵜⴻⵜⵜⵎⵙⴰⵡⴰⵍ ⴷ ⵓⵎⴰⵡⵙⴰⵙ ⴰⵎⵣⵡⴰⵔⵓ (1998) ⵉⵏⴰⵡⵏ ⵉ ⵓⵎⴰⴷⴰⵏ ⴰⵎⴰⵣⵉⵖ (2002), ⵡⵉⴷ ⴳⴰⵏ ⴳⴰⵏ ⴰⴽⴽⵯ ⵉⴷⵍⵉⵙⵏ ⵉⵡⵏⴳⵉⵎⵏ ⵉⵏⵏⴰⵍⵏ ⵅⴼ ⵜⵙⴰⵖⵓⵍⵜ ⵜⴰⴼⵍⵙⴰⴼⵜ ⵉⴼⴰⵡⵏ. ⵎⴽⵍⵍⵉ ⵉⴽⵛⵛⵎ ⴳ ⵓⵙⴰⵜⵉ ⴰⴷ ⴰⴷⵍⵉⵙ ⵏⵏⵙ ⴰⴽⵔⴱⴱⵓ « ⴰⵖⴰⵔⴰⵙ ⵏ ⵡⵓⵔⵖ » ⵉⵜⵜⵓⵥⵕⴰⴳⵏ ⵙ ⵙⵏⴰⵜ ⵜⵓⵜⵍⴰⵢⵉⵏ ⵜⴰⵎⴰⵣⵉⵖⵜ ⴷ ⵜⵄⵕⴰⴱⵜ ⵏⵏⴰ ⵢⵉⵡⵉⵏ ⵜⴰⵙⵎⵖⵓⵔⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ. ⴱⵍⴰ ⵏⵜⵜⵓ ⴰⴳⵓⴷⵉ ⵏ ⵜⵉⵔⵔⴰ ⴷ ⵉⵎⴰⴳⵔⴰⴷⵏ ⵏⵏⴰ ⵢⵓⵎⵥⵏ ⴰⵖⴰⵔⴰⵙ ⵏ ⵉⵏⵄⴰⵕⵏ ⵓⵙⵉⴳⵏ ⵙ ⵓⴷⵔⵉⵙ ⴰⵣⵔⴼⴰⵏ ⵉⴼⴰⵡⵏ, ⵉⵙⴰⵡⵍ ⴳⵉⵙⵏ ⵅⴼ ⵜⵓⴳⴷⵜ ⵏ ⵜⵎⵙⴰⵔⵉⵏ ⴷ ⵉⵙⵇⵙⵉⵜⵏ ⵏⵏⴰ ⵉⵣⴷⵉⵏ ⴷ ⵜⵎⴰⵣⵉⵖⵜ ⵙ ⵜⴳⴰ ⵜⴰⵎⴰⴳⵉⵜ ⴷ ⵜⴷⵍⵙⴰ ⴷ ⵜⵓⵜⵍⴰⵢⵜ ⴷ ⵓⵣⵔⴼ ⵏ ⵜⵎⴰⴳⵉⵜ ⴰⵚⴰⴹⴼⴰ, ⴳⵉⵏ ⵉⵎⴰⴳⵔⴰⴷⵏ ⵉⵜⵜⵢⴰⴼⵙⴰⵔⵏ ⴳ ⵜⵓⴳⴷⵜ ⵏ ⵡⴰⵏⵙⴰⵜⵏ ⵉⵏⵖⵎⴰⵙⵏ ⵉⵜⵜⵢⴰⵡⵙⵙⴰⵏⵏ.

ⴳ ⵢⵉⴳⵔ ⵏ ⵜⵥⵓⵕⵉ, ⴽⵉⴳⴰⵏ ⵓⵔ ⵙⵙⵉⵏⵏ ⵎⴰⵙ ⴷ ⴰⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⵉⴳⴰ ⴰⵏⴰⵥⵓⵕ ⴰⵎⵙⵉⵍⵖ, ⴷ ⵓⵎⵣⵓⵣⵉ ⴷ ⵓⵎⵥⵡⴰⵏ ⵉⵃⵕⵛⵏ، ⵖⵓⵔⵙ ⵉⴷⵔⵉⵣⵏ ⴼⴰⵡⵏⵉⵏ ⴳ ⵓⵙⵎⴰⵔ ⴷ ⵓⵙⵓⴼⵖ ⵏ « ⵜⴰⵏⵟⵓⵍⵓⵊⵉⵜ ⵏ ⵜⵥⵓⵕⵉ ⵏ ⵕⵕⵡⴰⵢⵙ ⴳ ⵙⵓⵙ » ⵙ ⵜⵡⵉⵙⵉ ⴳⵔ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵜ ⵉ ⵓⵔⵣⵣⵓ ⴷ ⵓⵙⵏⴼⵍ ⴰⴷⵍⵙⴰⵏ ⴷ ⴳⵔ ⵜⵎⴰⵡⴰⵙⵜ ⵏ ⵜⴷⵍⵙⴰ, ⵎⴽⵍⵍⵉ ⵉⵙⴽⵔ ⴰⵙⵍⴰⵍⴰⵢ ⵏ ⵜⵓⴳⴷⵜ ⵏ ⵜⵎⴷⵢⴰⵣⵉⵏ ⵏ ⵄⵍⵉ ⵚⵉⴹⵇⵉ ⴰⵣⴰⵢⴽⵓ ⴷ ⴱⵕⴰⵀⵉⵎ ⴰⵅⵢⵢⴰⵟ. ⴱⵍⴰ ⵏⵜⵜⵓ ⵜⴰⵎⵍⴰⵍⵜ ⵏⵏⵙ ⵉⵙⵎⵔⵖⴰⵏ ⴳ ⵓⵙⴱⴷⴷⵉ ⵏ ⵜⵔⴰⴱⴱⵓⵜ ⵏ ⵓⵙⵎⴰⵏ ⵜⴰⵎⵥⵡⴰⵏⵜ ⴷ ⵜⴷⵔⴰⵡⵜ ⴳ ⵓⵙⴰⵜⵉ ⵏⵏⵙ ⵃⵎⴰ ⴰⴷ ⵜⵜ ⵜⴰⵡⵉ ⴳ ⵜⵎⴰⵣⵉⵖⵜ ⴷ ⵡⴰⵍⴰⵢ ⵙ ⵜⵥⵓⵕⵉ ⴷ ⵓⵥⴰⵡⴰⵏ ⴰⵎⴰⵣⵉⵖ ⴷ ⵓⵙⴱⵓⵖⵍⵓ ⵏⵏⵙ. ⵉⴳ ⴰⵏⴰⵥⵓⵕ ⴰⵎⵙⵉⵍⵖ ⴷ ⵓⴽⴰⵔⵉⴽⴰⵜⵓⵔ, ⵉⵥⵕⴰ ⵓⵖⵎⵉⵙ ⵏ ⵓⴷⵔⴰⵔ ⵏ ⵉⴳⵍⵍⵉⵏ ⵃⵎⵣⴰ ⵄⴱⴹⵍⵍⴰⵀ ⵇⴰⵙⵉⵎ ⵜⵓⴳⴷⵜ ⵏ ⵡⵓⵏⵓⵖⵏ ⵉⴽⴰⵔⵉⴽⴰⵜⵓⵔⵉⵢⵏ ⵅⴼ ⵡⴰⴷⴷⴰⴷ ⵏ ⵜⵎⴰⵣⵉⵖⵜ. ⵉⵖⴰⵎⴰ ⵓⵏⵣⴳⵓⵎ ⵏ ⵓⵙⴱⵓⵖⵍⵓ ⵏ ⵜⵥⵓⵕⵉ ⵜⴰⵎⴰⵣⵉⵖⵜ ⵜⴰⵡⵓⵔⵉ ⵏⵏⴰ ⴰⵙ ⵉⵍⵍⴰⵏ ⴳ ⵢⵉⵅⴼ. ⴰⵢⵍⵍⵉ ⵜ ⵢⵓⵊⵊⴰⵏ ⴰⴷ ⵉⵙⵏⴼⵍⵓⵍ ⵢⴰⵜ ⵜⴼⵉⵍⵜ ⵜⴰⵥⵓⵕⴰⵏⵜ ⵏ ⵕⵕⵡⴰⵢⵙ ⴳ ⵜⵡⵉⵍⴰ ⵏ ⵜⵥⵓⴳⴰⵢⵜ ⵜⴰⵥⵓⵕⴰⵏⵜ, ⴷ ⵓⴱⴷⴷⵉ ⵏⵏⵙ ⴷ ⵓⴹⴼⵓⵕ ⵏⵏⵙ ⵉ ⵜⵓⴳⴷⵜ ⵏ ⵉⵏⵎⵓⵇⵇⴰⵔⵏ ⵏ ⵜⵓⵔⴰⵔⵜ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ.

ⴳ ⵢⵉⴳⵔ ⵏ ⵙⵙⵉⵏⵉⵎⴰ, ⵢⵉⵡⵙ ⴳ ⵓⴼⴰⵔⵙ ⵏ ⵓⵙⴰⵔⵓ ⴰⵎⴰⵣⵉⵖ ⵜⵉⵣⵡⵉⵔⵉ ⵏ ⵙⴰ ⵜⵏⵔⴰⵡⵉⵏ, ⵉⵍⴰ ⵙ ⵓⵣⵡⵍ « ⴱⵓⵜⵅⵣⵣⴰⵏⵜ » ⵎⴽⵍⵍⵉ ⵉⵙⵎⴰⵔ ⵜⵓⵍⵍⵉⵙⵜ ⴷ ⵓⵙⵉⵏⴰⵕⵢⵓ ⵏ ⵓⵙⴰⵔⵓ ⵉⵍⴰⵏ ⴰⵣⵡⵍ ⵏ « ⵉⵎⵉ ⵎⵇⵇⵓⵔⵏ ».

ⴳ ⵓⵙⵡⵉⵔ ⵏ ⵜⵖⵏⵙⴰ, ⵣⵖ ⵓⵍⵜⴰⵖ ⵏ ⵓⵙⵍⵎⴰⴷ ⵚⵚⴰⴼⵉ ⵎⵓⵎⵏ ⵄⵍⵉ ⵙ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵜ ⵏ ⵓⵙⵏⴼⵍ ⴰⴷⵍⵙⴰⵏ, ⵉⵙⵡⵓⵔⵉ ⴳ ⵜⵓⴳⴷⵜ ⵏ ⵉⵏⴳⵎⴰⵎⵏ ⵏ ⵜⵎⵙⵎⵓⵏⵜ ⵖ ⵓⵙⵡⵉⵔ ⵏ ⵓⵙⵉⵔⴰ ⵏⵏⵙ ⵏⵉⵖ ⵉⵙⵇⵇⵉⵎⵏ ⵏⵏⵙ ⵉⵏⴰⵎⵓⵔⵏ ⴷ ⵓⵍⴰ ⴳ ⵓⵙⵡⵉⵔ ⵏ ⵡⴰⵢⵢⴰⵡ ⵏⵏⵙ ⴳ ⵕⵕⴱⴰⵟ, ⵢⴰⵡⵙ ⴳ ⵜⵉⵍⴰⵍ ⴰⴽⴽⵯ ⴷ ⵉⵏⵎⵓⵇⵇⴰⵔⵏ ⵏⵏⴰ ⵉⵜⵜⵓⵙⵏⵎⴰⵍⴰⵢⵏ ⴳ ⵜⵎⵙⵎⵓⵏⵜ ⴰⴷ, ⵜⴰⵎⴰ ⵏ ⵜⴷⵔⴰⵡⵜ ⵏⵏⵙ ⴳ ⵜⵉⵍⴰⵍ ⵏ ⵓⵎⵓⵙⵙⵓ ⴰⵎⴰⵣⵉⵖ ⴳ ⵍⵎⵖⵔⵉⴱ, ⵣⵓⵏ ⴷ ⵜⵉⵍⴰⵍ ⴷ ⵜⵙⵎⵓⵏⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵣⴷⴷⵓⵢ ⴳⵔ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴷ ⵓⵍⴰ ⴳ ⵜⵉⵍⴰⵍ ⵜⵉⵎⵏⵏⴰⵡⵉⵏ ⵏ ⵜⵎⵙⵎⵓⵏⵜ ⵜⴰⴷⵍⵙⴰⵏⵜ ⵏ ⵙⵓⵙ ⴳ ⵡⴰⴱⴼⴰ. ⴷ ⵜⵉⵣⵉ ⵍⵍⵉⵖ ⵉⵜⵜⵓⵙⴽⴰⵔ ⵓⵙⴱⴷⴷⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⵜⵜⵢⴰⵡⵙⵜⴰⵢ ⴰⴷ ⵉⴳ ⴰⴳⵎⴰⵎ ⴳ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏⵏⵙ.

الترجمة إلى الأمازيغية: عبد الواحد بتبغ
النص الأصلي بالعربية: رشيد نجيب