ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⵙⵙ ⵏ ⵓⵙⵉⵏⴰⵙ ⴷ ⵡⴰⵙⵙ ⵏ ⵡⴰⴽⵕⴰⵚ 18 ⴷ 19 ⴱⵕⴰⵢⵕ 2025, ⵜⵙⵏⵎⴰⵍⴰ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵢⴰⵏ ⵓⵏⵎⵓⵇⵇⴰⵔ ⴰⵎⴰⵙⵙⴰⵏ ⴼ ⵓⵙⵏⵜⵍ: “ⴰⵙⵎⵖⵔ ⵉ ⵓⵙⵍⵎⴰⴷ ⵛⴰⴽⵉⵔ, ⵜⴰⵢⵙⵉ ⵏ ⵜⴳⵓⵔⵉⵡⵉⵏ ⴷ ⵜⵓⵙⵙⵏⵉⵡⵉⵏ”. ⴰⵏⵎⵓⵇⵇⴰⵔ ⴰⴷ ⴰⵅⴰⵜⴰⵔ ⵍⵍⵉ ⵓⵔ ⵉⵍⵉⵏ ⴰⵏⴰⵡ, ⴳ ⵓⵎⵏⴰⴹ ⴰⴷ ⴷ ⵓⵎⵣⵔⵓⵢ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ. ⵔⴰⴷ ⴷⵔⵓⵏ ⵉⵎⴰⵡⴰⵙⴰⵙⵏ ⴷ ⵉⵎⵔⵣⴰ ⵉⴽⵙⵡⴰⵜⵏ ⴼ ⵜⵡⵓⵔⵉⵡⵉⵏ ⵜⵉⴽⴰⴷⵉⵎⵉⵢⵉⵏ ⴳⴳⵓⵜⵏⵉⵏ ⵍⵍⵉ ⵉⵙⴽⵔ ⵓⵙⵍⵎⴰⴷ ⵎⴰⵙⵙ ⵙⴰⵍⵎ ⵛⴰⴽⵉⵔ ⴳ ⵜⵓⴷⵔⵜ ⵏⵏⵙ ⵜⴰⵎⴰⵙⵙⴰⵏⵜ ⵉⴽⴽⴰⵏ ⴽⵉⴳⴰⵏ ⵏ ⵉⵙⴳⴳⵯⴰⵙⵏ, ⵍⵍⵉⵖ ⵉⴳⴰ ⵙⴳ ⵉⵎⵔⵣⴰ ⵉⵎⵣⵡⵓⵔⴰ ⵍⵍⵉ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵜⴷⵍⵙⴰ ⴷ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⴳ ⵜⵙⴷⴰⵡⵉⵢⵏ ⴷ ⵉⵙⵉⵏⴰⴳⵏ ⵉⵎⴰⵙⵙⴰⵏⵏ ⵏ ⴼⵕⴰⵏⵚⴰ.
ⴰⵏⵎⵓⵇⵇⴰⵔ ⴰⴷ ⵉⵍⵍⴰ ⵙ ⵜⵎⵍⴷⴰ ⵏ ⵜⵉⴽⴽⵉ ⵏ ⵢⴰⵏ ⵓⴳⵣⵣⵓⵏ ⵏ ⵡⴰⵕⵛⵉⴼ ⴰⵏⵉⵎⴰⵏ ⵏ ⵓⵎⴰⵙⵙⴰⵏ ⴰⵎⴰⵣⵉⵖ ⴰⵎⵇⵔⴰⵏ ⵎⴰⵙⵙ ⵙⴰⵍⵎ ⵛⴰⴽⵉⵔ ⵉ ⵜⵙⴷⵍⵉⵙⵜ ⵜⴰⵏⵎⵓⵔⵜ, ⴰⵕⵛⵉⴼ ⴰⴷ ⴳ ⵍⵍⴰⵏⵜ ⵡⴰⵔⵔⴰⵜⵏ ⵉⵇⴱⵓⵔⵏ ⴷ ⵜⴻⵜⴳⴰⵔⵉⵏ ⴷ ⵉⴷⵍⵉⵙⵏ ⴷ ⵜⵣⵔⴰⵡⵉⵏ ⴷ ⵜⵙⵖⵓⵏⵉⵏ ⵜⵉⵇⴱⵓⵔⵉⵏ ⴷ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ ⵍⴰⵏⵉⵏ ⴰⵜⵉⴳ…
ⵙⴰⵍⵎ ⵛⴰⴽⵉⵔ ⵉⴳⴰ ⴰⵎⴰⵣⵉⵖ ⴰⵇⴱⴰⵢⵍⵉ ⵙⴳ ⵜⵖⵔⵎⵜ ⵏ ⴷⴷⵣⴰⵢⵔ, ⵎⴰⵛⵛ ⵏⵜⵜⴰⵏ ⴰⵔ ⵉⵜⵜⵉⵏⵉ: “ⵜⴰⵎⴰⵣⵖⴰ ⵜⴰⵎⵓⵔⵜ ⵉⵏⵓ ⵙⴳ ⵉⴷⵓⵔⴰⵔ ⵏ ⴼⵓⵙⴰ ⴳ ⵍⵉⴱⵢⴰ ⴰⵔ ⵜⵉⴳⵣⵉⵔⵉⵏ ⵏ ⴽⴰⵏⴰⵔⵢⴰ”. (تامازغا بلادي من جبال نفوسة إلى جزر كناريا)
ⴷⴰⵜ ⵏ ⵓⵙⵍⵎⴰⴷ ⵛⴰⴽⵉⵔ, ⵉⵣⵡⴰⵔ ⴷ ⵢⴰⴷ ⵓⵎⴰⵙⵙⴰⵏ ⴰⵎⵇⵔⴰⵏ ⵎⵓⵃⵎⵎⴰⴷ ⴰⵕⴽⵓⵏ (1928-2010) ⵉⵙ ⵉⴼⴽⴰ ⵜⴰⵙⴷⵍⵉⵙⵜ ⵏⵏⵙ ⵜⴰⵏⵉⵎⴰⵏⵜ ⴰⵡⴷ ⵏⵜⵜⴰⵏ ⵉ ⵚⴰⵃⴰ ⵏ ⵜⵙⴷⵍⵙⵉⵜ ⵜⴰⵏⴰⵎⵓⵔⵜ. ⴰⵡⴷ ⵏⵜⵜⴰⵏ ⵉⴳⴰ ⴰⵎⴰⵣⵉⵖ ⵙⴳ ⵜⵙⴳⴰ ⵏ ⵍⵇⴱⴰⵢⵍ, ⵉⵣⵣⵔⵉ ⵎⴰⴷ ⵓⵔ ⵉⴷⵔⵓⵙⵏ ⴳ ⵜⵓⴷⵔ ⵏⵏⵙ ⴳ ⵜⴳⵍⴷⵉⵜ ⵏⴳⵔ ⵓⵎⴰⴷⴰⵏ ⴰⵎⵖⵔⵉⴱⵉ.
ⴰⴽⴷ ⵎⴰⵙⵙ ⵛⴰⴽⵉⵔ ⴷ ⵎⴰⵙⵙ ⴰⵕⴽⵓⵏ, ⴰⴷ ⵓⵔ ⵏⵜⵜⵓ ⵓⵍⴰ ⵢⴰⵏ ⵓⵔⴳⴰⵣ ⵢⴰⴹⵏⵉⵏ ⴰⵎⴰⵣⵉⵖ ⵙⴳ ⴷⴷⵣⴰⵢⵔ ⵍⵍⵉ ⴷⴰⵔ ⵜⵄⵣⵣⴰ ⵜⵎⴰⵣⵉⵔⵜ ⵏⵏⵖ, ⵉⴳⴰ ⵜ ⵓⵎⴰⵙⵙⴰⵏ ⴰⵅⴰⵜⴰⵔ ⵎⵓⵍⵓⴷ ⵎⵄⵎⵎⵔⵉ (1917-1989), ⴷⴷⴰ ⵍⵎⵓⵍⵓⴷ ⵍⵍⵉ ⵉⵣⵣⵔⵉⵏ ⴰⵡⴷ ⵏⵜⵜⴰⵏ ⵎⴰⴷ ⵓⵔ ⵉⴷⵔⵓⵙⵏ ⴳ ⵜⵓⴷⵔⵜ ⵏⵏⵙ ⴳ ⵜⵎⴰⵣⵉⵔⵜ ⵏⵏⵖ ⴷⴰⵔ ⵄⵎⵎⵉⵙ ⵍⴼⵇⵉⵀ ⵎⵓⵃⵎⵎⴰⴷ ⵎⵄⵎⵎⵔⵉ ⵍⵍⵉ ⵜⵜ ⵏⵏ ⵉⴽⴽⴰⵏ ⵉⵙⵡⵓⵔⵉ ⴳ ⵓⴳⴰⴷⵉⵔ ⴰⴳⵍⴷⴰⵏ.
ⵕⴰⵛⵉⴷ ⵏⴰⵊⵉⴱ
