ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵛⴰⵀⵉⴷ ⴰⵏⴷⵉⵛ ⵉⵊ ⵣⴳ ⵉⵎⴰⵔⵉⵜⵏ ⵉⵃⵓⴷⵔⵉⵢⵏ ⵉⵣⴷⵖ ⵉⵜ ⵓⵎⵏⵓⵙ ⵏ ⵜⵉⵔⴰ, ⴷ ⵎⴰⵎⴽ ⵖⴰ ⵜⴳ ⵜⴰⵎⴷⵢⴰⵣⵜ ⵜⴰⵎⴰⵣⵉⵖⵜ ⴰⴷ ⵜⴰⴼ ⴰⴱⵔⵉⴷ ⵉⵏⵙ ⵖⵔ ⵓⵎⴰⴹⴰⵍ, ⵉⵜⵜⴳ ⵜⵉⵣⵎⵎⴰⵔ ⵜⵉⵎⴰⵇⵔⴰⵏⵉⵏ ⴷⵉ ⵜⵉⵔⴰ ⵏ ⵓⵙⴼⵔⵓ ⴷ ⵓⵙⵓⵖⵍ, ⵏⵜⵜⴰ ⵓⵍ ⵉⵏⵙ ⴷⴰⴳⵙ ⵃⴰ ⵜⵎⴰⵣⵉⵖⵜ ⵡⴰⵀⴰ. ⵎⵉⵏⵣⵉ ⵏⵜⵜⴰⵜ ⴷ ⵉⵍⵙ ⵏ ⵜⵢⴽⴰⵜⵉⵏ, ⴷ ⵏⵜⵜⴰⵜ ⵉ ⵢⵜⵜⴹ ⵙⴳ ⵉⴼⴼⴰⵏ ⵏ ⵢⵎⵎⴰⵙ, ⵣⵣⴰⴳⵙ ⵉ ⵢⵜⵜⵔⵓ, ⵣⵣⴰⴳⵙ ⵉ ⵢⴹⵃⵃⴽ.
ⴷⴳ ⵓⵎⵙⴰⵡⴰⵍ ⴰ ⵢⵇⵇⴰⵔ ⴰⵏⴷⵉⵛ ⴱⵍⵍⵉ « ⵜⴰⵣⵍⴰⵡⵉⵜ ⵜⴰⵔⵉⴼⵉⵜ, ⵄⴰⴷ ⵓⵔ ⵜⵏⵏⵉ ⴰⵡⴰⵍ ⵏⵏⵙ, ⵏⵃⵡⴰⵊ ⵙ ⵡⴰⵟⵟⴰⵚ, ⴰⴷ ⵍⴻⵍⵍⵛⵏⵜ ⵜⵉⵔⴰ ⵏⵏⵙⵏⵜ, ⵎⵉⵏⵣⵉ ⵣⵣⴰⴳⵙⵏⵜ ⵉ ⵖⴰ ⵜⵓⴳⵓⵔ ⵜⵇⵙⵙⵉⵙⵜ ⵜⴰⵔⵉⴼⵉⵜ, ⴰⴷ ⵜⵡⵡⵜ ⵉⵥⵓⵕⴰⵏ ».
ⴰⵏⵣⵓⴼ ⵣⴰⴳⴽ ⵖⴰⵔ ⵜⵙⵏⵉⵡⵉⵏ ⵏ ⵓⵖⵎⵉⵙ “ⴰⵎⴰⴹⴰⵍ ⴰⵎⴰⵣⵉⵖ”, ⵎⵓⵅ ⵖⴰ ⵜⵙⵙⵉⴷⵙⴷ ⵉⵅⴼⵉⵏⴽ ⵉ ⵓⵎⵖⵔⵉ ⵏ ⵓⵖⵎⵉⵙ?
ⴷ ⴰⵎⵣⵡⴰⵔⵓ, ⵜⵜⵇⴰⴷⵉⵖ ⵛⴽ ⴰ ⵅⴰⵢⵔⴷⴷⵉⵏ ⵅ ⵜⵣⵎⵎⴰⵔ ⵉ ⵜⴻⵜⵜⴳⴳⴷ, ⵏⵛⵛ ⴷ “ⵉⵊⵊⵏ ⵡⴰⵀⴰ” ⵏⵉⵖ ⴷ “ⵛⴰ”. ⴰⵇⵇⴰ ⴰⵏⵖ ⴷⴰ ⴳⵉ ⴷⴷⵓⵏⵉⵢⵜ ⴰ, ⵏⵜⵜⵎⵅⵜⵡⴰⵢ, ⵏⵜⵜⵎⵙⴽⵙⵉ, ⴰⵜⴰⵖ ⴰⴷ ⵏⵊⵊ ⵛⴰ ⵏ ⵍⵉⵎⵔⵜ ⵉ ⵣⵉ ⴷⴰⵏⵖ ⵖⴰ ⴼⴽⴽⵔⵏⵜ ⵜⵙⴰⵜⴰⵍⵉⵏ ⵉ ⴷ ⵉⴳⴳⵓⵔⵏⵜ.
ⵎⴰ ⵜⵣⵎⵎⵔⴷ ⴰⴷ ⴰⵏⵖ ⵜⵙⵙⵉⵡⵍⴷ ⵅ ⵢⵉⵚⵓⵕⴰⴼ ⵉⵏⴽ ⵉⵎⵣⴳⵓⵔⴰ ⴳⵉ ⵜⵖⵔⵉ ⴷ ⵜⵉⵔⴰ ⵉ ⵜⴷⵢⴰⵣⵜ (poésie)?
ⵜⴰⵇⵙⵙⵉⵙⵜ ⵉⵍⴰ ⵜⵍⵍⴰ ⴷ ⵜⵏⵏⵉ ⴷ ⵜⴰⵡⵡⵓⵔⵜ ⵉ ⴷⴰⵏⵖ ⵉⵙⵙⵉⴷⴼⵏ ⵖⵔ ⵉⴳⵔ ⵏ ⵜⵉⵔⴰ. ⵣⴳⴳⴰ ⵏⵙⵙⵏ ⵎⵉⵏ ⵏⵄⵏⴰ ⵏⵛⵛⵉⵏ, ⵏⵙⵙⵏ ⵉⵅⴼ ⵏⵏⵖ, ⵉⵍⴰ ⵏⵇⵇⴰⵔ ⴰⵙ “ⵎⴰⵎⴽ ⵏⵣⵎⵎⵔ ⴰⴷ ⵏⵅⴷⵎ ⵜⵎⴰⵣⵉⵖⵜ?”, ⴰⵙⵇⵙⵉ ⴰ, ⵉⵡⵡⵉ ⴰⵏⵖ ⵖⵔ ⵜⵇⵙⵙⵉⵙⵜ, ⵖⵔ ⵜⵉⵔⴰ, ⵎⵉⵏⵣⵉ ⵉⵍⴰ ⵏⵜⵜⵡⴰⵍⴰ ⵎⴰⵏⴰⵢⴰ ⴷ ⴰⴱⵔⵉⴷ ⵉ ⵣⵉ ⵖⴰ ⵏⵅⴷⵎ ⵉⵍⵙ ⵏⵏⵖ, ⴷ ⵡⴰ ⴷ ⴰⵅⴰⵕⵕⵚ ⵉ ⴷⴰⵢⵉ ⵉⵄⵔⵏⴻⵏ ⵃⵎⴰ ⴰⴷ ⴰⵔⵉⵖ.
ⵄⵇⵍⵖ, ⵜⴰⵇⵙⵙⵉⵙⵜ ⵜⴰⵎⵣⵡⴰⵔⵓⵜ ⵉ ⵡⵡⴹⵖ ⴰⴷ ⵖⵔⵖ, ⵜⵜⵓⵖⴰ ⵜⵜ ⵏ ⵕⴰⵛⵉⴷⴰ ⵍⵎⵔⵔⴰⵇⵉ, ⵜⴻⵜⵜⵡⴰⴼⵙⵔ ⴳⵉ ⵜⵡⵉⵣⴰ, ⵉⵍⵍⴰ ⵓⴼⵉⵖ ⵉⵎⵅⵓⵎⴱⴰⵍ ⵃⵎⴰ ⴰⴷ ⵜⵜ ⴼⴽⴽⵖ, ⴰⴷ ⵜⵜ ⴼⵀⵎⵖ, ⵅⵏⵏⵉ ⵜⴳⴳⴰ ⴷⴰⵢⵉ ⵎⵣⵔⵉ ⵃⵎⴰ “ⴰⴷ ⴰⵔⵉⵖ”.
ⵇⵇⴰⵔⵏ ⵇⴰ ⴽⵓⵍ ⵜⴰⵔⵎⵉⵜ ⵖⴰⵔⵙ ⵜⵉⵎⵓⴽⵔⵉⵙⵉⵏ ⵉⵏⵙ… ⵎⵓⵅ ⴷ ⴰⵙ ⵉⴳⴰ “ⵛⴰⵀⵉⴷ ⴰⵏⴷⵉⵛ” ⵉⵚⵚⵓⵕⴼ ⵜⵉⵎⵓⴽⵔⵉⵙⵉⵏ ⵜⵉⵎⵣⴳⵓⵔⴰ ⵏ ⵜⴽⵍⵉ ⵉⵏⵙ ⴳⵉ ⵜⴷⵢⴰⵣⵜ?
ⵓⵔ ⴷⵉⵏ ⴱⵓ ⵛⴰ ⵏ ⵜⵎⵓⴽⵔⵉⵙⵉⵏ ⵙ ⵉⵅⴼ ⵏⵏⵙⵏⵜ, ⵃⵎⴰ ⴰⴷ ⵉⵏⵉⵖ ⵜⵉⴷⵜⵜ. ⴰⵎⵏⵓⵙ ⴰⵎⵇⵇⵔⴰⵏ ⵉ ⴷⴰⵏⵖ ⵉⵣⴷⵖⵏ, ⵎⴰⵎⴽ ⵖⴰ ⵏⴳⴳ ⴰⴷ ⵏⵙⵙⵉⵡⴹ ⵜⴰⵎⴷⵢⴰⵣⵜ ⵜⴰⵎⴰⵣⵉⵖⵜ ⵖⵔ ⵓⵎⴰⴹⴰⵍ, ⴰⴷ ⵜⴻⵜⵜⵡⴰⵙⵙⵏ, ⴰⴷ ⵜⴻⵜⵜⵡⴰⴼⵔⵣ, ⵎⴰⵍⴰ ⵏⴽⴽⵔ ⵏⵃⵙⴱ ⵎⴰⵏⴰⵢⴰ ⴷ “ⴰⵎⵓⴽⵔⵉⵙ”, ⵉⵡⴰ ⵇⴰ ⴷ ⵡⴰ ⴷ “ⴰⵎⵓⴽⵔⵉⵙ” ⵉ ⵉⵍⵍⴰ ⵄⴰⴷ ⵓⵔ ⴷⴰⵙ ⵏⵓⴼⵉ ⴰⴼⴽⴽⵉ.
ⵣⵖⵔⵉ, ⵏⵛⵛ, ⵇⴰ ⵜⵜⴳⴳⵖ ⵜⵉⵣⵎⵎⴰⵔ ⵄⴰⴷ, ⵃⵎⴰ ⴰⴷ ⴰⴼⵖ ⵉⵅⴼ ⵉⵏⵓ ⴳⵉ ⵜⵉⵔⴰ, ⴷⵉ ⵜⴱⵔⵉⴷⵜ ⵉ ⴹⴼⴰⵕⵖ, ⵃⵎⴰ ⴰⴷ ⵙⴰⵇⴰⵔⵖ ⵜⵎⴰⴳⵉⵜ ⵉ ⵖⵔⵉ ⵉⵇⵇⵏⵏ ⵏⵛⵛ, ⴰⴷ ⵣⵣⴰⴳⵙ ⵜⵜⵡⴰⴼⵔⵣⵖ, ⵎⴰⵏⴰⵢⴰ ⵄⴰⴷ ⴰⵇⵇⴰ ⵔⵣⵣⵓⵖ ⴳⵙ ⴰⵎ ⵎⴰⵎⴽ ⵔⵣⵣⵓⵏ ⵉⵣⵍⴰⵡⵉⵢⵏ ⵏ ⵓⵎⴰⴹⴰⵍ ⵅⴼ ⵉⵅⴼ ⵏⵏⵙⵏ ⵣⵣⴰⵜ ⵉ ⵓⴱⴷⴷⵍ ⴰ ⴰⵎⵇⵇⵔⴰⵏ ⵉ ⵏⵥⵕⵕ ⴽⵓⵍ ⵜⵡⴰⵍⴰⵜ.
ⴰⵎⵎⵓⴷ ⵉⵏⴽ ⵏ ⵜⵇⵙⵙⵉⵙⵉⵏ “ⵣⵉ ⵍⵡⴰⵛⵓⵏ ⵏ ⵜⵎⵓⵔⵜ” ⵉⴼⴼⵖ ⴳ ⵓⵙⴳⴳⵯⴰⵙ ⵏ 2024, ⴰⵎⵎⵏ ⵛⴽⴽ ⵜⵙⵙⵏⵜⵉⴷ ⵣⴷⴰⵜⵙ ⵙ ⵡⴰⵟⵟⴰⵚ ⵏ ⵢⵉⵙⴳⴳⵯⵓⵙⴰ, ⵎⴰ ⵜⵣⵎⵎⵔⴷ ⴰⴷ ⴰⵏⵖ ⵜⵙⵙⵉⵡⵍⴷ ⵛⵡⵉⵜ ⵅ ⵡⴰⵎⵎⵓⴷ ⴰ?
ⵢⵉⵀ, ⵙ ⵜⵉⴷⵜⵜ, “ⵣⵉ ⵍⵡⴰⵛⵓⵏ ⵏ ⵜⵎⵓⵔⵜ” ⵉⵍⴰ ⵉⵅⵚⵚ ⴰⵙ ⴰⵟⵟⴰⵚ ⵏ ⵡⴰⴽⵓⴷ ⵃⵎⴰ ⴰⴷ ⵉⵙⵙⵏⴹⵉ ⵅ ⵍⵅⴰⵟⵕ ⵏⵏⵙ, ⵓⵍⴰ ⴷ ⵏⵏⵛ ⵉⵍⴰ ⵓⵔ ⵅⴰⴼⵙ ⵎⴰⵔⵔⵖ ⵛⴰ.
ⴰⴷⵍⵉⵙ ⴰ, ⵉⵄⵉⵣⵣ ⵅⴰⴼⵉ ⵇⴱⴰⵍⴰ. ⵜⵜⵅⵙⵖ ⵜ. ⵎⵉⵏⵣⵉ ⵉⵡⵡⵉ ⴷ ⴰⴽⵉⴷⵉ ⵜⵉⴽⵍⵉ ⴷ ⵜⴰⵣⴳⵔⴰⵔⵜ, ⵙ ⵉⵅⵎⵎⵉⵎⵏ ⵏⵏⵙ, ⵙ ⵜⵕⵥⵥⵉⵜⵉⵏ ⵏⵏⵙ, ⴷ ⵉⵎⵓⵏⴰⵙ ⵏⵏⵙ, ⴷ ⵉⵙⵉⵜⴰⵎ ⵏⵏⵙ. ⴳⴳⵉⵖ ⴷⴰⴳⵙ ⵜⵉⵣⵎⵎⴰⵔ ⵃⵎⴰ ⴰⴷ ⴰⵔⵉⵖ ⵉⵛⵜ ⵜⵇⵙⵙⵉⵙⵜ “ⴷ ⵜⴰⵎⴰⵢⵏⵓⵜ”, ⴷⴰⴳⵙ ⵄⴰⵡⴷ ⵜⵉⵇⵙⵙⵉⵙⵉⵏ ⵎⵚⴱⴹⴰⵏⵜ ⴷⵉ ⵜⴱⵔⵉⴷⵜ ⵏ ⵜⵉⵔⴰ, ⵎⵉⵏⵣⵉ ⴰⴽⵓⴷ ⵉ ⴷ ⵡⵡⵉⵖ, ⵉⵍⴰ ⵔⵣⵣⵓⵖ ⴷⴰⴳⵙ ⵅ “ⵎⴰⵎⴽ” ⵉ ⵖⴰ ⴰⵔⵉⵖ, ⵙ ⵓⵢⵏⵏⵉ ⵉ ⵉⵍⵍⴰⵏⵜ ⵜⵉⵇⵙⵙⵉⵙⵉⵏ ⵙ ⵡⵓⴷⵎⴰⵡⵏ ⵉ ⵉⵥⵍⵉⵏ.
ⴷⵉ ⵎⴽⵓⵍ ⵜⴰⵇⵙⵙⵉⵙⵜ, ⵜⴽⵙⵙⵉ ⵉⵊⵊⵏ ⵓⵡⴰⵔⴷⵉ ⴷ ⵛⴰ ⵏ ⵜⵎⵏⵏⴰ, ⵙⴰⴷⵓ ⵉ ⵜⴰⵇⵙⵙⵉⵙⵜ ⴷⵉⵏ ⵜⵉⵣⵎⵎⵉⵎⵉⵏ, ⵙⵙⴰⵡⴰⵍⵖ ⴷⴰⴳⵙⵏⵜ ⵅ ⵓⵡⴰⵔⴷⵉ ⵏⵏⵉ ⴷ ⵜⵎⵏⵏⴰ ⵏⵏⵉ ⵉ ⵉⵇⵇⵏⴻⵏ ⵖⵔ ⵜⵇⵙⵙⵉⵙⵜ ⵙ ⵉⵊⵊⵏ ⵡⵓⴷⵎ ⵏⵉⵖ ⵙ ⵡⵏⵏⵖⵏⵉ, ⵎⴰⵏⴰⵢⴰ ⵄⵎⵎⵔⵙ ⵓⵔ ⵉⵜⵜⵡⴰⴳⴳ ⴷⵉ ⵛⴰ ⵏ ⵡⴰⵎⵎⵓⴷ ⴷ ⴰⵔⵉⴼⵉ, ⵅⵙⵖ ⵉⵎⵖⵔⵉ ⵓⵔ ⵉⵇⵇⴰⵔ ⴱⵓ ⵜⴰⵇⵙⵙⵉⵙⵜ ⵡⴰⵀⴰ, ⵎⴰⵛⴰ ⴰⴷ ⵉⵎⵎⵔⵙ ⴷⴳ ⵓⵎⵏⴰⴹ ⵏⵏⵙ.
ⵓⵔ ⵙⵙⵉⵏⵖ ⵎⵉⵏ ⴳⴳⵉⵖ ⴰⵎⵏⵏⵉ ⴷⴳ ⵡⴰⵎⵎⵓⴷ ⵏⵏⵉ, ⵎⴰ ⵄⴷⵍⵖ ⴰⵙ?, ⵎⴰ ⵛⵛⴰⵜⵖ ⵅⵟⵟⵉⵖ ⵡⴰⵀⴰ? ⵄⴰⴷ ⵜⵜⵔⴰⵊⵉⵖ ⵉⵡⴷⴰⵏ ⵉ ⵜ ⵉⵖⵔⵉⵏ ⴰⴷ ⵉⵏⵉⵏ ⵛⴰ.
ⵎⵉⵏ ⵛⴽⴽ ⵉⵊⵊⵉⵏ ⴰⴷ ⵜⴰⵔⵉⴷ ⵙ ⵜⵎⴰⵣⵉⵖⵜ, ⴰⴷ ⵜⵜ ⵜⵙⵙⴷⴷⵔⴷ ⵎⴰⴽⵏⴰⵡ ⴷ ⵜⵓⵜⵍⴰⵢⵜ ⵜⴰⵏⴷⵢⴰⵣⵜ (langue poétique)?
ⵓⵔ ⵣⵎⵎⵔⵖ ⴰⴷ ⵅⴰⵢⵍⵖ, ⵜⵜⴰⵔⵉⵖ ⵜⴰⵇⵙⵙⵉⵙⵜ, ⵙ ⵛⴰ ⵏ ⵜⵓⵜⵍⴰⵢⵜ ⴱⵍⴰ ⵜⵎⴰⵣⵉⵖⵜ. ⵜⴰⵇⵙⵙⵉⵙⵜ, ⵏⵜⵜⴰⵜ, ⵉⵣⵍⴰⵡⵉⵢⵏ, ⵜⵜⴰⵔⵉⵏ ⵜⵜ ⵙⴳ ⵡⵓⵍ; ⵓⵍ ⵉⵏⵓ ⵏⵛⵛ ⴷⴰⴳⵙ ⵃⴰ ⵜⵎⴰⵣⵉⵖⵜ ⵡⴰⵀⴰ. ⵎⵉⵏⵣⵉ ⵏⵜⵜⴰⵜ ⴷ ⵉⵍⵙ ⵏ ⵜⵢⴽⴰⵜⵉⵏ, ⴷ ⵏⵜⵜⴰⵜ ⵉ ⵜⵜⴹⵖ ⵙⴳ ⵉⴼⴼⴰⵏ ⵏ ⵉⵎⵎⴰ, ⵣⵣⴰⴳⵙ ⵉ ⵜⵜⵔⵓⵖ, ⴹⵃⵃⴽⵖ. ⵎⴰⵍⴰ ⵓⵔⵉⵖ ⵜⴰⵇⵙⵙⵉⵙⵜ ⵛⴰ ⵏ ⵜⵓⵜⵍⴰⵢⵜ ⵏⵏⴹⵏ, ⴰⵜⴰⴼ ⵙⵅⴰⵔⵔⵉⵇⵖ ⵅ ⵉⵎⵖⵔⴰ.
ⵉⵜⵜⵖⵉⵎⴰ ⴰⵎⴽ ⴰⵙ ⵜⵙⵎⵎⵉⴷ “ⵜⵓⵜⵍⴰⵢⵜ ⵜⴰⵏⴷⵢⴰⵣⵜ”, ⵜⴰ ⴰⵇⵇⴰ ⴷ ⴰⵙⵡⵉⵔ ⵢⵓⵄⵍⴰ, ⵏⵜⵜⴰⴽⴽⵯⴰⴹ ⵖⵔⵙ ⵙ ⵓⵙⵏⴹⵉ ⵏ ⵜⵉⵔⴰ, ⵙ ⵜⵉⴽⵍⵉ ⴳ ⵉⴳⵔ ⵉⵛⵛⵓⵔ ⵙ ⵉⵙⵏⵏⴰⵏⴻⵏ. ⵄⴰⵡⴷ, ⵃⵎⴰ ⴰⴷ ⵉⵏⵉⵖ ⵜⵉⴷⵜⵜ, ⵏⵛⵛⵉⵏ ⴰⵇⵇⴰ ⴰⵏⵖ ⴷⵉ ⴱⴷⴷⵓ, ⵎⴰⵛⴰ ⵉⵅⵚⵚ ⵉⵣⵍⴰⵡⵉⵢⵏ ⵏⵏⵖ ⴰⴷ ⵙⴳⵄⵄⴷⵏ ⴰⵙⵡⵉⵔ ⵏ ⵜⵉⵔⴰ, ⵃⵎⴰ ⴰⴷ ⵏⴰⵡⴹ ⴷⵖⵢⴰ ⴷⵖⵢⴰ, ⵎⴰⵍⵍⴰ ⴰⵎⵏⵏⵉ ⴰⴷ ⵏⵇⵇⵉⵎ ⵏⵜⵜⴹⴰⵡⴰⵄ ⴰⵣⵎⵎⴻⵎ ⵏ ⵡⴰⵡⴰⵍ, ⴰⵎⵏ ⵉ ⴷⴰⵏⵖ ⵉⵜⵜⵖⵉⵍ ⵇⴰ ⵏⵜⵜⴰⵔⵉ.
ⵎⵉⵏ ⵜⵄⵏⴰ ⵜⵇⵙⵙⵉⵙⵜ ⵉ ⵅⴰⴼⴽ ⵉⵄⵉⵣⵣⵏ ⴰⵟⵟⴰⵚ ⴷⴳ ⵡⴰⵎⵎⵓⴷ ⵉⵏⴽ “ⵍⵡⴰⵛⵓⵏ ⵏ ⵜⵎⵓⵔⵜ”, ⵎⴰⵖⴰⵔ ⵉ ⵅⴰⴼⴽ ⵜⵄⵉⵣⵣ?
ⵓⵔ ⴷⵉⵏ ⴱⵓ ⵛⴰ ⵏ ⵜⵇⵙⵙⵉⵙⵜ ⵜⵄⵉⵣⵣ ⴽⵜⵔ ⵣⵉ ⵜⵏⵏⵖⵏⵉ, ⴷ ⵜⵉⵡⵍⵜⵎⴰⵜⵉⵏ ⵉ ⵍⵍⴰⵏⵜ, ⵎⵇⵓⴷⴷⴰⵏⵜ ⴷⵉ ⵍⵎⵄⵉⵣⵣⵜ, ⵓⵍⴰ ⴷ ⵉⵊⵊⵏ ⵎⴰ ⵉⵣⵎⵎⵔ ⴰⴷ ⵉⵅⴹⵕ ⵊⴰⵔ ⵜⴰⵔⵡⴰ ⵏⵏⵙ.
ⵎⴰⵛⴰ, ⵊⵊ ⴰⵢⵉ, ⵓⵔ ⵜⵜⵎⵍⵍⵉⵖⴻⵖ ⵛⴰ ⴰⵟⵟⴰⵚ ⵄⴰⵡⴷ, ⴽⵓⵍ ⵜⴰⵇⵙⵙⵉⵙⵜ ⴷⵉⵏ ⵖⵔⵙ ⵜⵃⴰⵊⵉⵜ ⵉⵏⵙ, ⵎⵍⵎⵉ ⴷ ⵎⴰⵢⵎⵎⵉ ⵉ ⴷ ⵜⵓⵙⴰ. ⵜⵉⵇⵙⵙⵉⵙⵉⵏ ⵉ ⵅⴰⴼⵉ ⵉⵄⵉⵣⵣⵏⵜ ⴷ ⵜⵉⵏⵏⵉ ⵉ ⵓⵔⵉⵖ ⵙⴰⴷⵓ ⵉⵎⴰⵔⵔⵉⵣⵏ ⵏ ⵜⵓⴷⵔⵜ, ⵙ ⵜⵉⵇⵇⵙⵜ ⵏ ⵉⵡⵣⵡⵉⵣⵏ, ⴷ ⵏⵏⵛ ⵅⵢⵢⵇⵖ, ⴽⵔⵉⴱⴰⵖ.
ⵎⵉⵏ ⵄⵏⴰⵏ ⵢⵉⵙⵏⵜⴰⵍ ⵉ ⵛⴽⴽ ⴷⴷ ⵉⵊⴱⴱⴷⵏ ⵖⴰⵔ ⵜⵉⵔⴰ ⵏ ⵜⴷⵢⴰⵣⵜ ? ⵎⵉⵏ ⵜⴻⵜⵜⵕⴰⵊⵉⴷ ⵣⵉ ⵜⵉⵔⴰ ⵏ ⵓⵙⵏⴼⵍⵓⵍ?
ⵎⴰⵛⵉ ⴷ ⵏⵏⵛ ⵉⵔⵣⵣⵓⵏ ⵅ ⵉⵙⵏⵜⴰⵍ, ⵉⵙⵏⵜⴰⵍ ⵉ ⵅⴰⴼⵉ ⵉⵔⵣⵣⵓⵏ ⵏⵏⵉⵜ, ⵜⵜⴰⴼⵖ ⵉⵅⴼ ⵉⵏⵓ ⵜⵜⴰⵔⵉⵖ ⵜⵏ ⴱⵍⴰ ⵎⴰ ⴰⴷ ⴰⴽⵉⵖ, ⵉⵍⵉ ⵇⴰ ⵜⵏ ⴷⵉⵏ, ⵜⵜⵔⴰⵊⴰⵏ ⵖⵉⵔ ⴰⴷ ⵜⵏ ⴰⴽⵎⵖ ⵡⴰⵀⴰ, ⵓⵛⴰ ⵅⵎⵉ ⵜⵜⵅⵙⵖ ⴰⴷ ⴰⵔⵉⵖ ⴷ ⵏⵉⵜⵏⵉ ⵉ ⵅⴰⴼⵉ ⴷ ⵉⵙⵔⵓⵙⴰⵏ ⵉⵅⴼ ⵏⵏⵙⵏ..
ⵎⴰⵛⴰ ⵜⵇⵇⵉⵎ ⵉⵜⵜ ⵉⴷ ⴷⵉ ⵡⵉ ⵖⴰ ⵉⵣⵄⵎⵏ ⴰⴷ ⵉⵄⴷⴰ ⵉⴼⵉⵍⴰⵏ ⵉⵣⴳⴳⵯⴰⵖⵏ, ⴰⴷ ⵉⵚⵚⵓⵕⴼ ⵎⴰⵏⵉ ⵉⵍⵍⴰ ⵓⴱⵍⵍⴰⵄ ⴷ ⵓⴱⵕⵢⵓⴹ, ⵡⵉ ⵖⴰ ⴰⵔⵉⵏ ⴰⵙⴼⵔⵓ ⵙ ⵜⵍⴻⵍⵍⵉ, ⴱⵍⴰ ⵜⵉⴳⴳⵯⴷⵉ, ⴰⵣⴳⵏ ⴰⵎⵇⵇⵔⴰⵏ ⵏⵏⵖ, ⵄⴰⴷ ⵏⵜⵜⴳⴳⵯⴷ ⵅⵎⵉ ⵏⵅⵙ ⴰⴷ ⵏⴰⵔⵉ.
ⵙⴳ ⵉⵊⵊⵏ ⵓⵖⵣⴷⵉⵙ ⵏⵏⴹⵏⵉ, ⵎⵉⵏ ⵜⵜⵔⴰⵊⵉⵖ ⵣⵉ ⵜⵉⵔⴰ ⵏ ⵓⵙⵏⴼⵍⵓⵍ, ⴰⴷ ⵢⴰⵡⴹ ⵛⵡⴰⵢⵜ ⵏ ⵎⵉⵏ ⵏⵜⵜⴰⵔⵉ ⵖⵔ ⵓⵍⴰⵡⵏ ⵉⴹⴹⵔⵖⵍⵏ ⴷ ⵉⵎⵊⵊⴰⵏ ⵉⴹⴹⵓⵀⵛⴰⵔⵏ.
ⵎⵉⵏ ⵄⵏⴰⵏ ⵉⵎⵏⵉⴷⵏ ⵏ ⵜⴷⵢⴰⵣⵜ ⵉⴳ ⵉⵊⵊⵉⵏ ⴰⵔⴰⵇ ⵏⵙⵏ ⴳⵉ ⵜⵔⵎⵉⵜ ⵏ “ⵛⴰⵀⵉⴷ ⴰⵏⴷⵉⵛ”?
ⴷ ⵡⴰ ⴷ ⴰⵙⵇⵙⵉ ⵉ ⵡⵛⵉⵖ ⵉ ⴰⵅⵉⵏ ⵡⵉⵍⴰⵜ, ⵉⵛⵜ ⵜⵎⴷⴷⵓⴽⵍⵜ ⴷ ⵜⴰⵣⵍⴰⵡⵉⵜ ⵣⵉ ⴽⵓⵔⴷⵉⵙⵜⴰⵏ, ⵓⵛⴰ ⵜⵖⴱⴱⴰ ⵅⴰⴼⵉ ⵜⵉⵙⴹⵃⴰⴽ.
ⵍⵓⵅ, ⵏⵛⵛⵉⵏ ⴷ ⵉⵡⴷⴰⵏ, ⵎⵉⵏ ⵎⵎⴰ ⵏⵖⵔⴰ, ⵉⵜⵜⵊⵊⴰ ⴷⴰⴳⵏⵖ ⵍⵉⵎⵔⵜ ⵏⵏⵙ, ⵎⵉⵏ ⵎⵎⴰ ⵏⴼⵓⵕⵕⵊ, ⵏⵙⵍⴰ, ⵏⵜⵜⵔⴰⵃ ⵏⵜⵜⴱⴷⴷⴰⵍ, ⵜⵜⴱⴷⴷⴰⵍⵏ ⵉⵎⵏⵉⴷⵏ. ⵄⵎⵎⵔⵙ ⴰⵎⵏⵉⴷ ⵓⵔ ⵉⵜⵜⵖⵉⵎⵉ ⴷ ⵉⵊⵊⵏ, ⵏⵛⵏⵉⵏ, ⵓⵔ ⵏⵍⵍⵉ ⴷ ⵉⵥⵕⴰ ⵃⵎⴰ ⴰⴷ ⵏⵇⵇⵉⵎ ⴰⵎⵎⵏ.
ⵜⵜⵡⴰⵍⵉⵖ ⵜⵛⵓⵏⵉ ⵜⵍⵍⴰ ⴷⴳ ⵓⵎⴰⴹⴰⵍ, ⵜⵍⵍⴰ ⴷⵉ ⵜⵥⵓⵕⵉ ⵙ ⵓⵎⴰⵜⴰ, ⵉⵅⵚⵚ ⴰⵏⵖ ⵖⵉⵔ ⴰⴷ ⵜⵜ ⵏⵙⵙⵏ, ⴰⴷ ⵜⵜ ⵉⴷ ⵏⵥⵎⵎ ⴰⵏⵉⵛⵜ ⵏⵇⵇⵉⵎ ⵏⴷⴷⵔ.
ⴰⵎⵏⵉⴷ ⵏ ⵜⵉⴷⵜⵜ, ⴷ ⵜⵛⵓⵏⵉ, ⵓⵛⴰ ⵎⴰⵏⵉ ⵎⵎⴰ ⵜⵍⵍⴰ.
ⵎⵉⵏ ⴷ ⴰⵙ ⵜⵡⵛⴰ ⵜⴷⵢⴰⵣⵜ ⵜⴰⵎⴰⵣⵉⵖⵜ ⵉ ⵡⴰⵢⴷⴰ ⴰⵎⵉⵡⴰⵏ ⴷ ⵜⵎⵓⵙⵏⵉ ⵏ ⵜⴷⵍⵙⴰ ⵜⴰⵎⴰⵣⵉⵖⵜ?
ⵍⵓⵅ ⵜⴰⵙⴽⵍⴰ ⵜⴰⵎⴰⵣⵉⵖⵜ, ⵜⴷⴷⵔ ⵙ ⵜⵇⵙⵙⵉⵙⵉⵏ, ⴰⵣⴳⵏ ⴰⵎⵇⵇⵔⴰⵏ ⵏ ⵡⵉ ⵉⵜⵜⴰⵔⵉⵏ, ⵉⵜⵜⴰⵔⵉ ⴰⵎⵎⵓⴷⵏ. ⵊⴰⵔ ⴰⵢⵉ ⴷ ⴰⴽⵉⴷⴽ ⵏⵛ ⵓⵔ ⵃⵎⵎⵍⵖ ⵎⴰⵏⴰⵢⴰ. ⵜⵜⵔⴰⵊⵉⵖ ⵣⵉ ⵍⴱⴷⴰ ⴰⴷ ⵏⵙⵙⵉⵔⵉⵡ ⵣⵉ ⵍⵅⵣⵔⴰⵜ ⵏⵏⵖ, ⴷ ⵎⴰⵏⴰⵢⴰ ⵉ ⴷⴰⵢⵉ ⵉⵊⵊⵉⵏ ⵙⴳ ⵉⵊⵊⵏ ⵓⵖⵣⴷⵉⵙ ⴰⴷ ⵄⵟⵟⴰⵕⵖ ⵓⵔ ⴷ ⵙⵙⵓⴼⵓⵖⴻⵖ ⴰⵎⵎⵓⴷ ⴰ.
ⵜⴰⵙⴽⵍⴰ ⴷ ⵜⴰⵎⴰⵔⵉⵡⵜ, ⴷ ⴷⴷⵎⴰⵏⵉ, ⵉⵅⵚⵚ ⴰⴷ ⵏⵣⵄⵎ ⴰⴷ ⵏⵔⴰⴱⵄ ⴷⵉ ⴷⴷⵎⴰⵏⵉ ⵏⵏⵙ. ⴰⵔ ⵍⵓⵅ ⵄⴰⴷ, ⴷ ⴰⵢⴷⴰ ⴰⵎⵉⵡⴰⵏ ⵉ ⵉⵡⵛⵉⵏ ⵉ ⵜⵇⵙⵙⵉⵙⵜ ⵜⴰⵎⴰⵣⵉⵖⵜ, ⵄⴰⴷ ⵓⵔ ⵏⵡⵡⵉⴹ ⴰⴷ ⵏⵇⵍⴱ ⵍⴼⵉⵀⵎ ⴰ, ⵜⴰ ⴷ ⵜⴷⵉⵜⵜ.
ⵎⵓⵅ ⴷ ⴰⵙ ⵜⴻⵜⵜⴻⴳⴳⴷ ⵜⵙⵙⵖⵣⴰⵢⴷ ⵉⵜⵉⴳⵏ ⴷ ⵢⵉⵣⵔⴼⴰⵏ ⵉⵎⴰⵣⵉⵖⵏ ⴳⵉ ⵜⵇⵙⵙⵉⵙⵉⵏ ⵉⵏⴽ ? ⵎⵉⵏ ⵄⵏⴰⵏ ⵢⵉⵏⵉⴳⵍⵉⵡⵏ (symboles) ⵉⴷⵍⵙⴰⵏⵏ ⵉ ⵜⵙⵙⵅⴷⴰⵎⴷ ⵃⵓⵎⴰ ⴰⴷ ⵜⵙⵙⵉⵡⴹⴷ ⵜⵉⴱⵔⴰⵜⵉⵏ ⵉⵏⴽ ⴷ ⵜⴰⴽⴰⵢⵉⵏ ⵉⵏⴽ?
ⴰⵙⵇⵙⵉ ⴰ, ⵢⵓⵍⵍⵖ ⴰ ⵜⴰⵡⵎⴰⵜ. ⵎⴰⵍⴰ ⵜⵔⵔⵉⴷ ⵜⴰⵢⵏⵉⵜ, ⵜⵜⴰⵔⵉⵖ ⴰⵟⵟⴰⵚ ⵅ “ⵜⴰⵎⵓⵔⵜ”, ⵙ ⵓⵢⵏⵏⵉ ⵉ ⵉⵅⴹⴰⵕⵖ ⴷⴳ ⵓⵣⵡⵍ ⵏ ⵓⴷⵍⵉⵙ ⴰⴷ ⴷⴰⴳⵙ ⵜⵉⵍⵉ “ⵜⴰⵎⵓⵔⵜ”. ⴰⵎⵎⵓⴷ ⴰ, ⴰⵎⵏ ⵉⴽⵎⵍ, ⵡⴰ ⴷ ⴰⵙⴳⵓⵎ ⵏⵏⵙ. ⵅⵙⵖ ⴰⴷ ⴰⵙ ⵡⵛⵖ ⵜⴰⵢⵏⵉⵜ, ⵎⵉⵏⵣⵉ ⵏⵥⵕⴰ ⵎⴰⵎⴽ ⵉⵡⴷⴰⵏ ⵜⵜⵓⵏ ⵎⴰⵏⵉⵙ ⴷ ⵇⵇⴰⵔⵙⵏ, ⵎⴰⵏⵉⵙ ⴷ ⵓⵙⵉⵏ, ⵔⵔⵉⵏ ⵙ ⵍⵅⵣⵔⴰⵏ ⵏⵏⵙⵏ ⵖⵔ ⵓⵊⵏⵏⴰ.
ⴰⴷ ⵊⵊⵖ ⵉⵡⴷⴰⵏ ⴰⴷ ⴰⴼⵏ ⵏⵏⵉⵜ ⵉⵣⵓⵎⴰⵍ ⴰ ⵉⴷⵍⵙⴰⵏⴻⵏ, ⵎⴰⵛⴰ ⵎⵉⵏ ⵅⴼ ⵔⵣⵣⵓⵖ ⴰⴷ ⵙⵙⵉⵡⵍⵖ, ⵉⵇⵇⵏ ⵖⵔ ⵓⵙⵇⵙⵉ ⵏ “ⵎⴰⵎⴽ”. ⵎⵉⵏⵣⵉ ⵏⵙⵙⵏ ⵉⵍⴰ ⵜⴰⵢⵔⵉ ⴷ ⵍⵎⵡⵜ ⵍⵍⴰⵏ ⵖⵔ ⵉⵡⴷⴰⵏ ⵎⵕⵕⴰ, ⴷⵉⵏ ⵉⵊⵊⵏ ⵓⵙⵇⵙⵉ ⵏⵜⵜⴰ ⵎⴰⵎⴽ ⵏⵜⵜⴰⵔⵉ ⵅ ⵜⵎⵅⵙⴰ, ⵎⴰⵎⴽ ⵏⵜⵜⴰⴽⴰ ⵙ ⵍⵎⵡⵜ? ⴷⵉ “ⵎⴰⵎⴽ” ⵏⵏⵉ ⵉ ⴷ ⵢⵓⴷⴼ ⵓⴷⵍⵙⴰⵏ, ⴷⴰ ⵉ ⵏⵜⵜⵙⵙⵏ ⴰⵄⵔⴰⴱ ⵙⴳ ⵓⴼⴰⵔⵉⵙⵉ ⵙⴳ ⵓⴼⵔⴰⵏⵙⵉⵙ.
ⵜⴰⴷⵍⵙⴰ ⵜⴰⵎⴰⵣⵉⵖⵜ ⵜⴱⴱⵖⴱⵖ ⵙ ⵉⵣⵓⵎⴰⵍ ⵉⴷⵍⵙⴰⵏⴻⵏ, ⴱⵍⴰ ⵎⴰ ⴰⴷ ⴰⵙⵏ ⵏⵔⵔ ⵜⴰⵢⵏⵉⵜ. ⵉⵅⵚⵚ ⴰⵣⵍⴰⵡⵉ ⴰⵎⴰⵣⵉⵖ ⴰⴷ ⵉⵛⵎⵎⵕ ⵛⵡⴰⵢⵜ ⵅ ⵉⵖⴰⵍⵍⵏ ⵏⵏⵙ ⴰⴷ ⵉⵔⵣⵓ ⴷⵉ ⵜⴷⵍⵙⴰ ⵏⵏⵙ; ⴰⵎ ⵎⴰⵎⴽ ⵉⵔⵔⴰ “ⵀⵓⴱⵉⵕⵟⵓ ⴰⴽⴰⴱⴰⵍ” ⴽⵓⵍⵓⵔ ⵏ ⵉⵍⵎ ⵏⵏⵙ ⵖⵔ ⵍⵍⴰⵊⵓⵔ ⵉ ⵜⵛⵛⴰ ⵉⵎⵎⴰⵙ, ⴷ ⵏⵜⵜⴰ ⵉⵙⵙⴰⵡⴰⵍ ⵅ ⵜⴷⵍⵙⴰ ⵜⴰⵎⵉⵔⵉⵏⴷⵉⵜ, ⵏⵛⵛⵉⵏ ⵏⵣⵎⵎⴰⵔ ⴰⴷ ⵜⵉⵍⵉ ⴷ ⵜⴰⵎⵓⵔⵜ ⵉ ⵉⵍⵍⴰⵏ ⴷ ⵉⵎⵎⴰⵜⵏⵖ, ⴷ ⵏⵜⵜⴰⵜ ⵉ ⴷⵏⴰⵖ ⴷ ⵉⵊⵊⵉⵏ, ⵏⵜⵜⵄⵇⴰⴱ ⵖⵔⵙ ⵅⵎⵉ ⵏⵜⵜⵎⵜⵜⴰ, ⴰⴷ ⵏⵟⵟⵚ ⴳ ⵓⵃⵙⵉⵏ ⵏⵏⵙ. ⵜⴰ ⴷ ⵜⴰⴱⵔⵉⴷⵜ, ⵃⴰ ⵉⵎⵉⵖⵉⵙⵏ ⵉ ⵉⵙⵙⵏⵏ ⴰⴷ ⵜⵜ ⴰⵡⵉⵏ.
ⵎⵓⵅ ⵜⴻⵜⵜⵡⴰⵍⵉⴷ ⵜⴰⵔⵎⵉⵜ ⵜⴰⵏⴷⵢⴰⵣⵜ ⵜⴰⵔⵉⴼⵉⵜ ⵙ ⵡⵓⵙⵍⵉⴳ, ⴷ ⵜⵎⴰⵣⵉⵖⵜ ⵙ ⵓⵎⴰⵜⴰ?
ⵎⴰⵍⴰ ⵜⴽⴽⵔⴷ ⵜⴷⵡⵍⴷ ⵖⵔ ⵜⵉⵔⴰ ⵜⵉⵎⵣⵡⵓⵔⴰ, ⴰⴷ ⴷⴰⴳⵙⵏⵜ ⵜⴰⴼⴷ ⵉⵊⵊⵏ ⵍⵅⵉⵔ ⵏ ⵜⵛⵓⵏⵉ, ⵓⵔ ⵙⵙⵉⵏⵖ ⵎⴰⵏⴰ ⵍⵅⵉⵔ ⵏⵏⵉ, ⵎⴰⵛⴰ ⵜⴰⵥⵢⵓⴹⵉ ⵏ ⵓⵙⴼⵔⵓ, ⵜⴻⵜⵜⵔⴰⵃ ⵜⴻⵜⵜⵄⵇⴰⴱ ⴷ ⵜⴰⵎⵃⵜⴰⴷⵊⵓⵜ ⴷⴳ ⵉⵙⴳⴳⵓⵙⴰ ⵉⵎⴳⴳⵓⵔⴰ, ⵎⴰⵢⵎⵎⵉ? ⵓⵔ ⵙⵙⵉⵏⵖ.
ⵜⵜⵡⴰⵍⵉⵖ ⴷⵉ ⴰⵔⵔⵉⴼ, ⵉⵣⵍⴰⵡⵉⵢⵏ ⵄⴰⴷ ⵓⵔ ⵏⵏⵉⵏ ⴰⵡⴰⵍ ⵏⵏⵙⵏ, ⴰⵟⵟⴰⵚ ⵏ ⵉⵣⵍⴰⵡⵉⵢⵏ ⵉⵎⵇⵇⵔⴰⵏⵏ ⵉ ⵖⵔⵏⵖ ⵓⵔ ⴷ ⵙⵙⵓⴼⵖⵏ ⵛⴰ ⵄⴰⴷ. ⴷⵉⵏ ⵉⵏⵏⵉⴹⵏ, ⵉⵅⵚⵚ ⴰⴷ ⴰⵙⵏ ⵏⵄⴰⵡⴷ ⵜⵖⵓⵔⵉ ⵣⵉ ⵊⵊⴷⵉⴷ ⵎⵉⵏⵣⵉ ⵓⵔ ⴽⵙⵉⵏ ⵜⴰⵙⵖⴰⵔⵜ ⵏⵏⵙⵏ, ⴰⴷ ⵣⵣⴰⴳⵙⵏ ⵉⵢⴷⴰⵔⵖ ⴰⵎⴽⵏⴰⵡ “ⵕⴰⵛⵉⴷⴰ ⵍⵎⵔⵔⴰⵇⵉ, ⵙⴰⵄⵉⴷ ⴰⵇⵓⴹⴰⴹ ⴷ ⵉⵏⵏⵉⴹⵏ…”
ⵃⵎⴰ ⴰⴷ ⵏⵃⴽⵎ ⵅ ⵜⵇⵙⵙⵉⵙⵜ ⵜⴰⵔⵉⴼⵉⵜ, ⵉⵅⵚⵚ ⴰⵏⵖ ⵛⵡⴰⵢⵜ ⵏ ⵡⴰⴽⵓⴷ ⵄⴰⴷ, ⵎⴰ ⵜⵏⵏⵉ ⵜⴰⵎⴰⵣⵉⵖⵜ, ⵓⵔ ⵣⵎⵎⵔⵖ ⴰⴷ ⴰⴽ ⵉⵏⵉⵖ ⵡⴰⵍⵓ, ⵎⵉⵏⵣⵉ, ⵜⵉⴷⵜⵜ, ⵓⵔ ⵏⵇⵇⴰⵔ ⵛⴰ ⵉ ⵡⴰⵢⴰⵡⵢⴰ, ⵡⴰ ⴷ ⴰⵎⵅⵓⵎⴱⵍ ⵏⵏⴹⵏⵉ, ⴰⵡⴰⵍ ⵅⴰⴼⵙ ⴷ ⴰⵣⴳⵔⴰⵔ.
ⵉⵏⵏⴰ ⵚⴰⵎⵡⵉⵍ ⴱⵢⴰⵕⵏⴰⵢ (1915) ⴳ ⵓⵎⴰⴳⵔⴰⴷ ⵉⵏⵙ ⵅ ⵜⴷⵢⴰⵣⵜ ⵜⴰⵔⵉⴼⵉⵜ ⵇⴰ ⵜⵉⵎⵖⴰⵔⵉⵏ ⵜⵉⵔⵉⴼⵉⵢⵉⵏ ⵜⵓⵖⴰ ⵜⵏⵜ ⴷ ⵜⵉⵎⵙⵏⴼⵍⵓⵍⵉⵏ ⵏ ⵜⵉⴷⵜ ⴷⴳ ⵢⵉⴳⵔ ⵏ ⵜⴷⵢⴰⵣⵜ, ⵎⵉⵏ ⵜⵏⵜ ⵉⵊⵊⵉⵏ ⴰⴷ ⵅⵡⴰⵏⵜ ⵉⴳⵔ ⴰ?
ⵙ ⵜⵉⴷⵜⵜ, ⵖⵔⵙ ⵍⵃⵇⵇ ⵖⵔ ⴱⵉⵢⴰⵔⵏⴰⵢ, ⵅⵍⵍⵉ ⴰⵎⵏⵏⵉ, ⴷⵉ ⴰⵔⵔⵉⴼ ⵜⵉⵣⵍⴰⵡⵉⵢⵏ ⴰⵎⴰⴽⵏⴰⵡ ⴼⴰⴹⵎⴰ ⵍⵡⵕⵢⴰⵛⵉ, ⵕⴰⵛⵉⴷⴰ ⵍⵎⵕⵕⴰⵇⵉ ⴷ ⵏⴰⵄⵉⵎⴰ ⵍⴼⴰⵔⵙⵉ, ⴰⵙⵎⴰ ⴰⵡⵟⵟⴰⵃ… ⴷⴰⴳⵙⵏⵜ ⵍⵓⵍⵓⴼ ⵏ ⵜⵣⵍⴰⵡⵉⵢⵉⵏ ⵏⵏⴹⵏⵉ…
ⵎⴰⵛⴰ, ⵜⴰⵣⵍⴰⵡⵉⵜ ⵜⴰⵔⵉⴼⵉⵜ, ⵄⴰⴷ ⵓⵔ ⵜⵏⵏⵉ ⴰⵡⴰⵍ ⵏⵏⵙ, ⵎⴰⵍⴰ ⵏⴽⴽⵔ ⴰⴷ ⵏⵙⵙⵉⵡⵍ ⵅ ⵉⵙⵔⴰⴳⵏ ⵇⴰ ⵓⵔ ⵉⵇⵟⵟⵉ ⵡⴰⵡⴰⵍ, ⵎⴰⵛⴰ ⵏⵃⵡⴰⵊ, ⵙ ⵡⴰⵟⵟⴰⵚ, ⴰⴷ ⵍⴻⵍⵍⵛⵏⵜ ⵜⵉⵔⴰ ⵏⵏⵙⵏⵜ, ⵎⵉⵏⵣⵉ ⵣⵣⴰⴳⵙⵏⵜ ⵉ ⵖⴰ ⵜⵓⴳⵓⵔ ⵜⵇⵙⵙⵉⵙⵜ ⵜⴰⵔⵉⴼⵉⵜ, ⴰⴷ ⵜⵡⵡⵜ ⵉⵥⵓⵕⴰⵏ.
ⵉⵜⵄⵉⵏ ⴷ ⵎⴰⵏⴰⵢⴰ ⵉⵊⵊⵉⵏ ⵜⴰⵇⵙⵙⵉⵙⵜ ⵜⴰⵔⵉⴼⵉⵜ ⴷ ⵜⴰⵃⵉⴷⴰⵔⵜ, ⵎⵉⵏⵣⵉ ⵄⴰⴷ ⵜⴰⵎⵖⴰⵔⵜ ⵜⴰⵔⵉⴼⵉⵜ ⵓⵔ ⵜⵏⵏⵉ ⴰⵡⴰⵍ ⵏⵏⵙ, ⵓⵔ ⵜⵓⵔⵉ ⵜⴰⵇⵙⵙⵉⵙⵜ ⵏⵏⵙ, ⵏⵛⵛ ⵜⵜⴰⵎⵏⵖ ⵉⵍⴰ ⵎⴰⵏⴰⵢⴰ ⴰⴷ ⵢⵉⵍⵉ ⴽⵓⴷⴽⵓⴷ ⵡⴰⵀⴰ, ⵄⴰⴷ ⴰⴷ ⵍⴻⵍⵍⵛⵏⵜ ⵜⵉⵡⵜⵎⵉⵏ ⵙ ⵜⴰⵢⴽⴰⵜⵉⵏ ⴷ ⵜⵉⵍⵇⵇⴰⵖⵉⵏ, ⵣⵎⵎⵔⵏⵜ ⴰⴷ ⴱⴷⴷⵍⵏⵜ ⵓⴷⵎ ⵓ ⵜⵇⵙⵙⵉⵙⵜ ⴷ ⵜⵙⴽⵍⴰ ⵙ ⵓⵎⴰⵜⴰ. ⴰⵜⴰⵖ ⴰⵙⵉⵜⵎ ⵉⵏⵓ ⴰⴷ ⵢⴰⴼ ⴰⴱⵔⵉⴷ ⵖⵔ ⵜⵓⴷⵔⵜ ⴷⵉ ⵍⴰⴷⴰⵙ, ⵓⵔⵉⴷ ⴷⵉ ⵍⴰⴳⴳⵯⴰⵊ.
ⴰⵡⴰⵔⵏ ⵉ ⵓⵙⵓⴼⵖ ⵉⵏⴽ ⵏ ⵓⴷⵍⵉⵙ ⵏ “ⵜⴰⵇⵏⵓⵛⵜ ⵏ ⵡⵓⵔⵖ”, ⴷ “ⵉⵃⵡⵡⴰⵙⵏ” ⴷⴳ ⵢⵉⴳⵔ ⵏ ⵓⵎⴻⵣⴳⵓⵏ, ⴷ ⵜⵡⵓⵔⵉ ⵜⵉⵙ ⴽⵕⴰⵟ “ⵉⵔⵉⴼⵉⵢⵏ ⴰⵙⵙⴰ” ⵎⴰ ⵓⵔ ⵜⵅⵕⵕⵚⴷ ⴰⴷ ⵜⵙⵙⵔⵙⴷ ⵜⵉⵔⵎⵉⵜⵉⵏ ⵏ ⵜⵉⵔⴰ ⴳⵉ ⵜⵡⵙⴰⵜⵉⵏ ⵜⵉⵙⴽⵍⴰⵏⵉⵏ ⵏⵏⵖⵏⵉ ⴰⵎ ⵡⵓⵏⴳⴰⵍ ⵙ ⵓⵎⴷⵢⴰ?
ⵡⴰⵀ, ⵇⴰ ⴷⵉⵏ ⴰⵙⵏⴼⴰⵔ ⵏ ⵡⵓⵏⴳⴰⵍ, ⴷⴰⵢⵉ ⴰⵎⵏⵓⵙ ⵏ ⵜⵏⴼⴰⵙ ⵜⵉⵇⵓⴹⴰⴹⵉⵏ ⵄⴰⵡⴷ. ⵙ ⵓⵙⵉⵜⵎ ⴰⴷ ⴰⵏⵖ ⵙⵄⵄⴼⵏ ⵓⵙⵙⴰⵏ ⵉ ⴷⴰⵏⵖ ⵉⵇⵇⵉⵎⵏ ⴰⴷ ⵏⴰⵔⵉ ⴰⵏⵉⵛⵜ ⵎⵉⵏ ⵓⵎⵉ ⵏⵣⵎⵎⵔ, ⴰⴷ ⵏⵙⵙⴷⵍ ⵛⵡⴰⵢⵜ ⵙⴳ ⵉⴽⵍⵓⵙⵙⴰⵢ ⵏ ⵜⵙⴽⵍⴰ.
ⵓⵏⴳⴰⵍ ⴷ ⵉⵊⵊⵏ ⵍⵅⴷⵎⵜ ⵜⵇⵇⵙⵃ, ⵜⴻⵜⵜⵃⴰⴷⴰⵊ ⴰⵟⵟⴰⵚ ⵏ ⵜⵣⵎⵎⴰⵔ, ⵉⵜⵄⵉⵏ ⵉⵅⵚⵚ ⴰⵢⵉ ⵛⵡⴰⵢⵜ ⵏ ⵡⴰⴽⵓⴷ ⵃⵎⴰ ⴰⴷ ⵏⵛⵓⵇⵇ ⵉⴳⵔ ⴰ ⵡⴰ, ⵙⴳ ⵉⵊⵊⵏ ⵓⵖⵣⴷⵉⵙ, ⵜⵜⵡⴰⵍⵉⵖ ⵉⵍⴰ ⵉⵎⴰⵍ ⵏ ⵜⵙⴽⵍⴰ ⵏⵏⵖ ⵙ ⵓⵎⴰⵜⴰ, ⵉⵣⴷⵖ ⴷⴳ ⵡⵓⵏⴳⴰⵍ.
ⵜⵜⵓⵖⴰ ⵓⵔⵉⵖ ⵛⴰ ⵓⵔ ⴷⴰⵢⵉ ⵉⵙⵙⵇⵏⵄ ⵏⵛ, ⵎⴰⵎⵛ ⵜⴳⴳⴰ ⵛⴰ ⵏ ⵃⴰⵊⵜ ⵓⵔ ⴷⴰⵢⵉ ⵜⵇⵇⵏⵄ ⵏⵛ ⴰⴷ ⵜⵙⵙⵇⵏⵄ ⵉⵎⵖⵔⴰ?
ⵎⴰⵏ ⴰⵖⴰⵡⴰⵙ ⵉⴷ ⴰⵙ ⴷⴷ ⵜⵙⵡⵊⴷⴻⴷ ⵉ ⵢⵉⵎⴰⵍ ⵏ ⵜⵉⵔⴰ ⵉⵏⴽ, ⴷ ⵜⵉⵔⴰ ⵙ ⵜⵎⴰⵣⵉⵖⵜ?
ⵜⵜⴰⵔⵉⵖ ⵜⵜⵊⵊⵉⵊ ⴳ ⵓⵣⴳⵏ… ⴷⵉⵏ ⵉⵖⴰⵡⴰⵙⵏ, ⵎⴰⵛⴰ ⵡⵉ ⵅⴰⴼⵙⵏ ⵖⴰ ⵉⴽⵎⵎⵍⵏ? ⴷⵉ ⵍⵄⵇⵍ ⵉⵏⵓ ⵍⵓⵅⴰ, ⵖⵔⵉ ⵜⴰⵎⵣⴳⵓⵏⵜ, ⵓⵏⴳⴰⵍ, ⵜⴰⵏⴼⵓⵙⵜ, ⵜⴰⵇⵙⵙⵉⵙⵜ.. ⵡⵏⵏ ⵖⴰ ⵉⵙⴰⵍⴰⵏ ⴷ ⴰⵎⵣⴳⴰⵔⵓ, ⴰⴷ ⵜ ⵏⵙⵙⵓⴼⵖ.
ⵜⴰⵡⴰⵍⵜ ⵜⵉⵍⴻⵍⵍⵉⵜ…
ⵓⵔ ⵙⵙⵉⵏⵖ ⵎⵉⵏ ⴷⴰⴽ ⵖⴰ ⵉⵏⵉⵖ ⴰ ⵜⴰⵡⵎⴰⵜ ⵅⴰⵢⵔⴷⴷⵉⵏ, ⵎⴰⵍⴰ ⵜⵅⵙⴷ ⵉⵙⵉⵜⴰⵎ ⵉⵏⵓ, ⴰⴷ ⴰⴽ ⵉⵏⵉⵖ ⵙⵙⵉⵜⵉⵎⵖ ⵉⵎⴰⵣⵉⵖⵏ ⴰⴷ ⵛⴱⴱⵕⵏ ⴷⴳ ⵉⵍⵙ ⵏⵏⵙⵏ, ⴷⵉ ⵜⴷⵍⵙⴰ ⵏⵏⵙⵏ.
ⵙⵙⵓⵜⵓⵔⵖ ⵜⴰⵙⴽⵍⴰ ⵏⵏⵖ ⵄⴰⵡⴷ ⴰⴷ ⵜⵍⴻⵍⵍⵛ, ⴰⴷ ⵜⴰⵡⴹ ⵉⵊⵏⵡⴰⵏ.
ⵙⴳ ⵉⵊⵊⵏ ⵓⵖⵣⴷⵉⵙ ⵏⵏⴹⵏⵉ, ⵏⵔⵣⵣⵓ ⴰⴼⵔⴰ ⴷⴳ ⵓⵎⴰⴹⴰⵍ, ⴰⴷ ⴰⴼⵏ ⵉⵎⵖⴱⴰⵏ ⵜⵉⵍⴻⵍⵍⵉ ⵏⵏⵙⵏ.
ⴰⵎⵙⴰⵡⴰⵍ : ⵅⴰⵢⵔⴷⴷⵉⵏ ⵍⵊⴰⵎⵄⵉ
