ⵜⴰⴱⵔⴰⵜⵜ ⵏ ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵎⴰⵙⵙ ⴰⵏⵎⵀⴰⵍ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ

ⴰⵣⵓⵍ,

ⵙ ⵓⵖⵉⵍⴼ ⴰⵙ ⵔⴰⴷ ⵜⴳ ⵜⴱⵔⴰⵜⵜ ⵉⵣⵡⴰⵔⵏ ⴳⵔ ⵜⵎⵙⵎⵓⵏⵜ ⵏⵏⵖ ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ ⴷ ⵜⵎⵔⵙⵍⵜ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⴱⵔⴰⵜⵜ ⴰⴷ ⵉⵏⵏⵓⵕⵥⵎⵏ ⴰⴼⴰⴷ ⴰⴷ ⵏⴼⵙⵔ ⵜⴰⵏⵏⴰⵢⵜ ⵏⵏⵖ ⴳ ⵎⴰⴷ ⵉⵣⵍⵉⵏ ⵙ ⵓⴷⵖⴰⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵙⵜⵕⴰⵜⵉⵊⵉⵜ ⵏ ⵓⵎⵢⴰⵡⴰⴹ ⵏⵏⴰ ⵜⵙⴽⴰⵔ ⵜⵎⵔⵙⵍⵜ ⵏⵏⵓⵏ ⵏⵏⴰ ⵉⴳⴰⵏ ⵜⴰⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ .

ⵜⵙⵙⵏⵎ ⵎⴰⵙⵙ ⴰⵏⵎⵀⴰⵍ ,ⵎⴰⵙⴷ ⴰⴹⴰⵀⵉⵔ ⴰⵎⴰⵖⵓⴷ ⵓⵟⵟⵓⵏ ⵏ 1.03.200 ⵏⵏⴰ ⴷ ⵉⴼⴼⴰⵖⵏ ⴳ 16 ⵕⵎⴹⴰⵏ 1424 ⵏⵏⴰ ⵉⵎⵙⴰⵙⴰⵏ ⴷ 11 ⵢⵓⵡⴰⵏⴱⵉⵔ ⵏ ⵓⵙⴳⴳⵯⴰⵙ ⵏ 2003, ⵙ ⵓⵙⵎⵔⵙ ⵏ ⵓⵙⵍⴳⵏ ⵓⵟⵟⵓⵏ 67.99 ⵏⵏⴰ ⵉⵣⴷⵉⵏ ⴷ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵏⵏⴰ ⵉⵜⵜⵉⵏⵉⵏ ⵎⴰⵙⴷ ⵜⴰⵙⴷⵍⵉⵙⵜ ⵜⴰⵏⴰⵎⵓⵔⵜ ⵜⴳⴰ ⵢⴰⵜ ⵜⵎⵔⵙⵍⵜ ⵜⴰⵎⵓⵏⴰⵏⵜ ⵏⵏⴰ ⵉⵍⵍⴰⵏ ⴷⴷⵓ ⵏ ⵓⵜⵓⵢ ⵏ ⵓⵡⴰⵏⴽ , ⵎⴽ ⵍⵍⵉ ⵜⵙⵙⵏⵎ ⵎⴰⵙⴷ ⵜⴰⵏⴱⴰⴹⵜ ⵏⵏⴰ ⵉⴳⴰⵏ ⵜⴰⵎⵙⵜⴳⴳⴰⵔⵜ ⵅⴼ ⵜⴷⵍⵙⴰ ⴰⵔ ⵜⵙⴽⴰⵔ ⵜⵓⵎⵍⴰⵢⵉⵏ ⵏ ⵓⵡⴰⵏⴽ ⵅⴼ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵙⵎⵔⵙ ⵏ ⵜⵏⴰⴼⵓⵜⵉⵏ ⴷ ⵜⵏⴱⴱⴰⴹⵉⵏ ⴷ ⵉⵙⴰⴽⵓⴷⵏ ⵏⵏⴰ ⵉⵡⴰⵍⴰⵏ ⵉ ⵓⵏⵖⵍⴰⴼ ⵏ ⵓⵙⴼⵍⵙ ⵙ ⵓⵙⵎⵔⵙ ⵏ ⵉⵙⵍⴳⴰⵏⵏ ⴷ ⵉⵏⵎⴰⵍⴰⵜⵏ ⵏⵏⴰ ⵉⵜⵜⵓⴳⴰⵏ ⵅⴼ ⵜⵎⵔⵙⴰⵍⵉⵏ ⵜⵉⵎⴰⵜⴰⵢⵉⵏ .

ⵎⴽ ⵍⵍⵉ ⵜⵙⵙⵏⵎ ⵎⴰⵙⴷ ⵜⴰⵙⴷⵍⵉⵙⵜ ⵜⴰⵏⴰⵎⵓⵔⵜ ⵉⵇⵇⴰⵏⴷ ⴰⴷ ⵜⵙⵡⵡⵓⵔⵉ ⵜⵙⵎⵔⵙ ⵉⵜⴳⴰⵔⵏ ⵏ ⴷⴷⵓⵙⵜⵓⵔ ⵏⵏⴰ ⵉⴳⴰⵏ ⵙⴳ ⵜⵏⴰⴼⵓⵜⵉⵏ ⵏⵏⵙ, ⵜⵉⵏⵏⴰ ⵅⴼ ⵜⵙⴰⵡⵍ ⵜⵎⵜⵜⴰ ⵜⵉⵙⵙ ⵙⵏⴰⵜ ⵏ ⵓⵙⵍⴳⵏ ⵓⵟⵟⵓⵏ ⵏ 67.99 ⴷ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵉⵏⵏⴰ ⴳ ⵓⴳⵟⵟⵓⵎ ⵏⵏⵙ ⵡⵉⵙⵙ ⵙⵎⵎⵓⵙ ⵎⴰⵙⴷ ⵜⴰⵎⴰⵣⵉⵖⵜ ⵜⴳⴰ ⵜⵓⵏⵚⵉⴱⵜ,ⵜⵜⵓⵙⴽⴰⵔⵏⵜ ⵜⵓⵎⵍⴰⵢⵉⵏ ⵏ ⵓⵙⵏⵚⴱ ⵏⵏⵙ ⴳ ⵜⵎⴰⵎⴽⵉⵏ ⵏ ⵓⵙⴷⴷⵉⴷ ⴷ ⵓⵙⴷⴷⵔⴼⵉ ⵏ ⵓⵙⵍⴳⵏ ⴰⴷ .

ⵎⴰⵙⵙ ⴰⵏⵎⵀⴰⵍ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ.

ⵓⵔ ⵜⵜ ⵉⵏⵏ ⵏⴽⴽⵉ ⵔⴰⴷ ⴰⵡⵏ ⵏⴰⵏ ⵜⴰⴱⵔⴰⵜⵜ ⴰⴷ ⴰⵙⵙ ⴰⴷ, ⵎⴽ ⵜⵙⵎⵔⵙⵎ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⴷ ⵉⵙⵍⴳⴰⵏⵏ ⵏⵏⴰ ⴷ ⴷⴰⵔ ⵜⵉⵣⴷⴰⵢⵉⵏ ⵙ ⵎⴰ ⴰⵏⵏ ⵏⵏⴰ ⵉⵎⵙⴰⵙⴰⵏ ⴷ ⵜⵏⴰⴼⵓⵜⵉⵏ ⵏⵏⴰ ⵉⵍⵍⴰⵏ ⵅⴼ ⵜⵎⵔⵙⵍⵜ ⵏⵏⵓⵏ,ⵎⴽ ⵏⵏⴰ ⵓⵔ ⵜⵍⵍⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵏⵙⴰ ⴰⵍⵉⴽⵜⵕⵓⵏⵉ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵍⵍⵉⵖ ⵓⵔ ⵜⵍⵍⵉ ⴰⵡⴷ ⴳ ⵜⴷⴽⴽⵯⴰⵏⵜ-ⴽⵉⵜⴰⴱ- ⵏⵏⴰ ⵉⵏⵏⵓⵕⵥⵎⵏ ⴳ ⵜⴳⵉⵔⴰ ⴰⴷ ⵏⵉⵜ , ⵎⴽⵍⵍⵉ ⵜⵙⵙⵏⵎ ⵎⴰⵙⴷ ⵜⴰⵏⵖⵍⴰⴼⵜ ⵏ ⵜⴷⵍⵙⴰ ⵏⵏⴰ ⵢⴰⴽⴽⴰⵏ ⵜⵓⵎⵍⴰⵢⵉⵏ ⵉ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⴷⴰⵔⵙ ⵢⴰⵏ ⵡⴰⵏⵙⴰ ⴰⵍⵉⴽⵜⵕⵓⵏⵉ ⵏⵏⴰ ⵖ ⵍⵍⴰⵏ ⵉⵜⴳⴰⵔⵏ ⵏ ⵜⵎⵏⴹⴰⵡⵜ ⴷ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵍⵍⵉⵖ ⴰⵔ ⵜⵙⴽⴰⵔ ⴰⵎⵙⴰⵡⴰⴹ ⵙ ⵜⵓⵜⵍⴰⵢⵉⵏ ⵜⵓⵏⵙⵉⴱⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ ⵏⵏⴰ ⵉⴳⴰⵏ ⵙⵏⴰⵜ ⵜⵓⵜⵍⴰⵢⵉⵏ ⵜⵓⵏⵚⵉⴱⵉⵏ ⵏ ⵍⵎⵖⵔⵉⴱ.

ⵍⵍⵉⵖ ⵓⵔ ⵜⵍⵍⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⴷⴽⴽⵯⴰⵏⵜ -ⴽⵉⵜⴰⴱ- ⵏⵏⴰ ⵓⵏⵏⵓⵔⵥⵎⵏ ⴳ ⵜⴳⵉⵔⴰ ⴰⴷ ⵏⵉⵜ ⵏⵏⴰ ⵉⵡⴰⵍⴰⵏ ⵉ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵉⴳⴰ ⵉ ⴽⵉⴳⴰⵏ ⵏ ⵉⵏⵎⵓⵔⵉⵜⵏ ⵎⴰⵙⴷ ⵜⵍⵍⴰ ⵢⴰⵜ ⵜⴽⵏⴷⴰⵡⵜ ⵎⵏⵉⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵡⴰⵔ ⴰⵡⵇⵇⵕ ⵉ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵍⵍⵉⵖ ⵓⵔ ⵜⵍⵍⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵏⵙⴰ ⴰⵍⵉⴽⵜⵕⵓⵏⵉ ⴷ ⵜⴷⴽⴽⵯⴰⵏⵜ ⵏ -ⴽⵉⵜⴰⴱ- ⵏⵏⴰ ⴰⵙ ⵏⵉⵜ ⵉⵡⴰⵍⴰⵏ , ⵙⵍⴰⵡⴰⵏ ⴰⴽⴽⵯ ⵎⴰⵙⴷ ⴽⵉⴳⴰⵏ ⵏ ⵉⵏⵙⴰⵜⵏ ⵉⵍⵉⴽⵜⵕⵓⵏⵉⵏ ⵖⵉⵍⴰⴷ ⵏ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵡⴰⵏⴽ ⵙⵙⴰⴷⴼⵏⵜ ⵜⵓⵉⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵎⴰⴷ ⵉⵥⵍⵉⵏ ⵙ ⵜⵉⵔⵔⴰ ⴷ ⵓⵎⵢⴰⵡⴰⴷ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ , ⵉⵇⵇⴰⵏⴷ ⴰⴷ ⵜⴰⵡⵉ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵍⴼⴰⵢⵜⵜ ⴳ ⵜⵉⵔⵎⵉⵜⵉⵏ ⴰⴽⴽⵯ ⵏ ⵉⵏⵙⴰⵜⵏ ⴰⴷ ⵏⵏⴰ ⵙⵎⵔⵙⵏⵉⵏ ⵜⴰⵎⴰⵣⵉⵖⵜ ⴰⴼⴰⴷ ⴰⴷ ⵜⵉⵍⵉ ⴳ ⵓⵙⵡⵉⵔ ⵏ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⴷ ⵉⵙⵍⴳⴰⵏⵏ ⵏⵏⴰ ⴷⵉⵙ ⵉⵣⴷⵉⵏ ⴰⴼⴰⴷ ⴰⴷ ⵜⵙⴽⴰⵔ ⴰⵎⵙⴰⵡⴰⴷ ⵙ ⵜⵓⵜⵍⴰⵢⵜ ⴰⴷ ⵏⵏⴰ ⵉⴳⴰⵏ ⴰⵡⴷ ⵏⵜⵜⴰⵜ ⵜⵓⵏⵙⵉⴱⵜ ⴳ ⵍⵎⵖⵔⵉⴱ .

ⵎⴰⵙⵙ ⴰⵏⵎⵀⴰⵍ

ⵓⵔ ⵏⵔⵉ ⴳ ⵜⴰⵏⵏⴰⵢⵜ ⴰⴷ ⵏⵏⵖ ⴰⴱⵍⴰ ⴰⴷ ⵏⴰⵡⵙ ⴳ ⵓⵙⵖⵓⴷⵓ ⵏ ⵜⵡⵡⵓⵔⵉⵡⵉⵏ ⴷ ⵜⵏⴰⴼⵓⵜⵉⵏ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⴰⴷ ⵜⵔⴰⵔ ⵜⵎⵀⵍⴰ ⵏⵏⵙ ⵜⴰⵖⴹⴼⵜ ⵜⵙⴽⵔ ⵜⵓⵎⵍⴰⵢⵉⵏ ⵏⵏⴰ ⴷ ⵉⴷⴷⴰⵏ ⴳ ⵓⴷⵓⵙⵜⵓⵔ ⵏⵏⴰ ⵉⵣⴷⵉⵏ ⴷ ⵓⵙⵏⵚⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .

ⵙ ⵓⵣⵔⴰⴽ ⵏⵏⵖ ⵉⴷⵓⵙⵏ ⵎⴰⵙⵙ .

ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵜⵎⵏⴰⴳⴰⵔⵉⵏ ⵜⵉⵏⴰⵎⵓⵔⵉⵏ
ⴰⵙⵍⵡⴰⵢ
ⵄⴱⴷⵓⵍⵍⴰⵀ ⵃⵉⵜⵜⵓⵙ