ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⴰⴱⵔⴰⵜ ⵉ ⵎⴰⵙⵙ ⴰⵎⴰⵡⵙⴰⵙ ⵎⵓⵃⴰⵎⵎⴰⴷ ⵎⵀⴷⵉ ⴱⵏⵙⵄⵉⴷ
ⴰⵎⴰⵡⵙⴰⵙ ⵏ ⵓⵎⵢⴰⵡⴰⴹ ⴷ ⵜⴷⵍⵙⴰ ⴷ ⵜⵄⵄⵓⵔⵎⴰ
ⵉⵎⵔⵙⵉ: ⴰⵙⵏⵓⵃⵢⵓ ⵎⴳⴰⵍ ⵏ ⵜⵏⵖⵎⴰⵙⵜ ⵜⴰⵎⴰⵣⵉⵖⵜ.
ⵎⴰⵙⵙ ⴰⵎⴰⵡⵙⴰⵙ,
ⵜⵕⵥⵎⵎ ⴰⵙⴳⴳⵯⴰⵙ ⵏ 2022 ⵙ ⵢⴰⵏ ⵓⵏⵎⵓⵇⵇⴰⵔ ⵉⵙⵜⴰⵡⵀⵎⵎⴰⵏ ⵖ ⴷⵔⵓⵏ ⴽⵉⴳⴰⵏ ⵏ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⵏⵖⵎⴰⵙⵜ ⵜⴰⵏⴰⵎⵓⵔⵜ (ⴰⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ, ⵜⴰⴼⵉⴹⵉⵕⴰⵍⵉⵜ ⵜⴰⵎⵖⵔⵉⴱⵉⵜ ⵏ ⵉⵎⵣⵔⵉⴳⵏ ⵏ ⵉⵖⵎⵉⵙⵏ, ⵜⴰⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵉⵎⵣⵔⵉⴳⵏ, ⵜⴰⴼⵉⴹⵉⵕⴰⵍⵉⵜ ⵜⴰⵎⵖⵔⵉⴱⵉⵜ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ, ⴰⵏⵎⴰⵍⵍⵓ ⴰⵏⴰⵎⵓⵔ ⴷ ⵜⵏⵖⵎⴰⵙⵜ ⵜⴰⵖⵔⵉⴱⵉⵜ, ⴰⴽⵕⴰⵙ 5 ⵉⵏⵏⴰⵢⵔ ⴼ ⵉⵎⴰⵍ ⵏ ⵜⵎⵙⵙⵏⵜⴰⵢⵜ ⵜⴰⵏⵖⵎⴰⵙⵜ, ⵍⵍⵉ ⵉⵜⵜⵓⵙⴽⴰⵔⵏ ⴳ ⵓⵣⵎⵣ ⴳ ⵜⵍⵍⴰ ⴳ ⵜⴰⵙⵙⴰⵙⵜ ⴳ ⵜⵉⵡⵙ ⵜⵎⵓⵟⵟⵓⵏⵜ ⴷ ⵓⴱⴰⵢⵢⵓⵕ ⵏ ⴽⵓⴼⵉⴷ 19.
ⵙⵙⵓⵔⴼⴰⵜ ⵉⵢⵉ ⴰⴷ ⴰⵡⵏ ⵉⵏⵉⵖ ⵎⴰⵙ ⵉⵜⵜⵓⵙⴽⴰⵔ ⵓⵏⵎⵓⵇⵇⴰⵔ ⴰⴷ ⵙ ⵓⵙⵏⵓⵃⵢⵓ ⴰⵥⵓⵕⴰⵏ ⵎⴳⴰⵍ ⵏ ⵜⵏⵎⴰⵙⵜ ⵜⴰⵎⴰⵣⵉⵖⵜ, ⵜⴰⵏⵖⵎⴰⵙⵜ ⴰⴷ ⵍⵍⵉ ⴷⴷ ⵓⵔ ⴱⴷⴷⵏ ⵉⵎⴰⵡⵙⴰⵙⵏ ⵉⵎⵣⵡⵓⵔⴰⵎⵓⵃⴰⵎⵎⴰⴷ ⵍⵄⵕⵊ ⴷ ⵄⵓⵜⵎⴰⵏ ⵍⴼⵉⵔⴷⴰⵡⵙ (ⵎⵇⵇⴰⵔ ⵜⵜⵉⵏⵉⵏ ⵎⴰⵙ ⴳⴰⵏ ⵉⵎⴰⵣⵉⵖⵏ ⴷ ⴰⵔ ⵙⴰⵡⴰⵍⵏ ⵜⴰⵎⴰⵣⵉⵖⵜ) ⴰⵡⵙⵏ ⴳ ⵜⵎⵓⴽⵔⵉⵙⵉⵏ ⵏⵏⵙ ⵜⵉⵥⵕⴼⴰⵏⵉⵏ ⴳ ⵓⵣⵎⵣ ⴳ ⵜⵍⵍⴰ ⴳ ⵜⴰⵙⵙⴰⵙⵜ ⵙⵉⵏ ⵉⵙⴳⴳⵯⴰⵙⵏⴰ ⴰⴷ ⴳ ⵉⵍⵍⴰ ⵓⴱⴰⵢⵢⵓⵕ, ⵍⵍⵉⵖ ⵜⵜⵓⴱⴱⴰⵢ ⵜⵡⵉⵙⵉ ⵜⴰⵙⴳⴳⵯⵙⴰⵏⵜ ⵉⵜⵜⵓⴼⴽⴰⵏ ⵉ ⵜⵏⵖⵎⴰⵙⵜ ⴰⴷ ⵜⴰⵎⵣⵡⴰⵔⵓⵜ ⵎⵇⵇⴰⵔ ⵜⵜⴰⵡⵙ ⴳ ⵓⵙⵎⵖⵔ ⵏ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ, ⵜⴰⴷ ⵏ ⵜⵎⴰⵣⵉⵖⵜ, ⴷ ⵓⵙⵎⵖⵔ ⵏ ⵡⴰⵎⵓⵏ ⴰⴷⵉⵎⵓⵇⵔⴰⵟ ⴰⵎⵏⵏⴰⵡ ⴷ ⴰⵜⵔⴰⵔ.
ⵎⴰⵙⵙ ⴰⵎⴰⵡⵙⴰⵙ,
ⵔⴰⴷ ⴰⵡⵏ ⵏⴼⴽ ⵜⴰⵏⵏⴰⵢⵢⵉⵏ ⵏⵏⵖ ⵏ ⵓⴼⵔⴰⵏ ⵍⵍⵉⵖ ⵜⵡⴰⵍⴰⵎ ⵜⴰⵎⴰⵡⵙⴰⵙⵜ ⴰⴷ ⴳ ⵜⵏⴱⴰⴹⵜ ⵜⴰⵎⴰⵢⵏⵓⵜ ⵏ ⵓⵎⵖⴰⵔ ⵄⴰⵣⵉⵣ ⴰⵖⵏⵏⵓⵛ, ⵜⴰⵏⵏⴰⵢⵢⵉⵏ ⵍⵍⵉ ⴰⴷ ⵏⴼⴽⴰ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ:
ⵎⵇⵇⴰⵔ ⵜⵙⴰⵡⵍ ⵜⵎⵏⴹⴰⵡⵜ ⵜⴰⵎⵖⵔⵉⴱⵉⵜ ⵏ 1 ⵢⵓⵍⵢⵓⵣ 2011 ⴼ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⵢⵉⵏⵉ ⴳ ⵓⵎⴰⴳⵔⴰⴷ ⵏⵏⵙ ⵡⵉⵙ 5 ⵎⴰⵙ ⵜⴳⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵏ ⵜⵎⴰⵣⵉⵔⵜ, ⵎⴰⵛⵛ ⵜⴰⵏⵖⵎⴰⵙⵜ ⵜⴰⵎⵖⵔⵉⴱⵉⵜ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⵏⴰⵎⵓⵔⵏ ⴷ ⵓⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ, ⴰⵔ ⵓⴽⴰⵏ ⵙⵓⵍ ⵙⴽⴰⵔⵏ ⴰⵙⵏⵓⵃⵢⵓ ⵎⴳⴰⵍ ⵏ ⵉⵎⴰⵣⵉⵖⵏ ⴷ ⵜⵎⴰⵣⵉⵖⵜ ⴷ ⵜⵏⵎⴰⵙⵜ ⵏⵏⵙⵏ ( ⴳ 2001, ⴽⴽⴰ ⵏⵏ ⵜⵜ ⵏⵏ ⵓⴳⴳⴰⵔ ⵏ ⵜⵎⵔⴰⵡⵉⵏ ⵏ ⵉⵖⵎⵉⵙⵏ, ⵎⴰⵛⵛ ⵖⵉⵍⴰⴷ ⵓⵔ ⴷ ⵉⵖⴰⵎⴰ ⴰⴱⵍⴰ ⵢⴰⵏ ⵓⵣⵡⵍ ⵉⵎⵎⴰⵖⵏ ⴷ ⵓⵣⵎⵣ !)
ⵎⵇⵇⴰⵔ ⵉⵍⵍⴰ ⵓⵙⵖⵏⵙ ⵏ ⵓⵙⵍⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⴳ ⵓⴱⵕⵍⴰⵎⴰⵏ ⴼ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵜⵜⵓⵥⵕⴰⴳⵏ ⴳ ⵓⵖⵎⵉⵙ ⴰⵎⴰⴷⴷⵓⴷ ⴳ 26 ⵛⵓⵜⴰⵏⴱⵉⵔ 2019, ⵜⴰⵏⵖⵎⴰⵙⵜ ⵜⴰⵎⵖⵔⵉⴱⵉⵜ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵓⵙⵏⵖⵎⵙ (ⴳ ⵜⵍⵍⴰ ⵜⴱⴰⴷⵓⵜ ⵜⴰⵎⵣⵡⴰⵔⵓⵜ, 2ⵎ, ⵎⵉⴷⵉ 1…) ⴰⵔ ⵓⴽⴰⵏ ⵙⴽⴰⵔⵏ ⴰⵙⵏⵓⵃⵢⵓ ⵎⴳⴰⵍ ⵏ ⵉⵎⴰⵣⵉⵖⵏ ⴷ ⵜⵏⵖⵎⴰⵙⵜ ⵏⵏⵙⵏ, ⴰⵢⵍⵍⵉ ⵎⵎⴰⵍⴰⵏ ⵉⵙⵎⵓⵙⵙⵓⵜⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ ⵖ ⵓⵔ ⵜⵍⵍⵉ ⵜⵎⴰⵣⵉⵖⵜ , ⵎⵇⵇⴰⵔ ⵙⵔⵙ ⵜⵙⵙⵏ ⵜⵎⴰⵡⴰⵙⵜ ⵏ ⵓⵎⵢⴰⵡⴰⴹ ⵙⴳ 2006 !
ⴰⵢⵍⵍⵉ ⵉⴳⴰⵏ ⴰⵖⵉⵍⵓⴼ ⵎⵇⵇⵓⵔⵏ ⵉⴳⴰⵜ ⵍⵍⵉⵖ ⵉⴳ ⴳ ⵡⴰⵡⵜⵜⴰⵙ ⵏ ⵉⵙⵎⵓⵙⵙⵓⵜⵏ ⴰⴷ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵉⵏⵖⵎⵉⵙⵏⴳⴰⵏⵉⵏ ⵜⵉⴽⵔⴽⴰⵙ, ⵎⴰⵛⵛ ⴰⵔ ⵓⴽⴰⵏ ⵙⵎⵔⵙⴰⵏ ⵢⴰⵜ ⵜⴽⵔⴽⴰⵙ ⵉⴳⴰⵏ ⵜⵉⵏ “ⵍⵎⵖⵔⵉⴱ ⵍⵄⴰⵕⴰⴱⵉ”, ⴰⵢⵍⵍⵉ ⵉⴳⴰⵏ ⵎⴳⴰⵍ ⵏ ⵜⵎⵏⴹⴰⵡⵜ ⵜⴰⵎⵖⵔⵉⴱⵉⵜ.
ⵉⵎⴰⵙⵙⵏ ⴰⴷ ⵏ ⵓⵙⵏⵖⵎⵙ ⴰⵔ ⵓⴽⴰⵏ ⵙⵓⵍ ⵙⵡⵓⵔⵉⵏ ⵣⵓⵏ ⵉⵖ ⵓⵔ ⵙⵙⵏⵏ ⵎⴰⵙ ⵓⵔ ⵉⴳ ⵍⵎⵖⵔⵉⴱ ⴰⵄⵕⴰⴱ, ⴷ ⵉⵙ ⵓⵔⵉ ⴰⵥⵓⵕ ⵏ ⵓⴼⴳⴰⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ( ⴷ ⵡⴰⵄⵕⴰⴱⵏ ⵏ ⵍⵇⴱⵍⵜ ⵜⴰⵏⴰⵎⵎⴰⵙⵜ), ⵉⵍⵍⴰ ⴳ ⵍⵎⵖⵔⵉⴱ ⴳ ⵓⴷⵖⴰⵔ ⵏ ⵓⴷⵔⴰⵔ ⵏ ⵉⵖⵓⴷ ⵉⵍⵍⴰⵏ ⴳ 70 ⴽⵎ ⵙⴳ ⴰⵎⵓⵔ ⵏ ⵡⴰⴽⵓⵛ ⵉⵟⵟⴰⴼⵏ 315 ⵏ ⵉⴼⴹ ⵏ ⵓⵙⴳⴳⵯⴰⵙ, ⵜⵉⴷⵜ ⵜⴰⵎⴰⵙⵙⴰⵏⵜ ⴼ ⵙⴰⵡⵍⵏⵜ ⵜⵎⴰⵙⵙⴰⵏⵉⵏ ⵏ ⵓⴼⴳⴰⵏ ⴷ ⵜⵉⵏ ⵉⴷⵔⵉⵣⵏ.
ⵙ ⵉⵙⴼⵉⴼⵡⵏ ⴰⴷⵏ ⴰⵔ ⴰⵡⵏ ⵏⴰⵇⵔⴰ , ⵎⴰⵙⵙ ⴰⵎⴰⵡⵙⴰⵙ, ⵖⵎⴽ ⵍⵍⵉ ⴰⴷ ⵏⵔⴰ ⵉ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵉ ⵜⵏⵖⵎⴰⵙⵜ ⵍⵍⵉ ⴰⵖ ⴷ ⵉⵔⵓⵔⵏ ⴰⵙⵙ ⵏ 28 ⵎⴰⵢⵢⵓ 2021 ⴷ ⴽⵓ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⵏⵖⵎⴰⵙⵜ ⵜⴰⵏⴰⵎⵓⵔⵜ:
- ⵜⴰⵖⴰⵡⵙⴰ ⵜⴰⵎⵣⵡⴰⵔⵓⵜ, ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⴳⵓⵔⵉⵡⵉⵏ ⴳⴰⵏⵉⵏ ⵜⵉⵏ ⵓⵙⵏⵓⵃⵢⵓ ⵎⴳⴰⵍ ⵉⵏⵎⵓⵔⴰⵏ ⴳⴰⵏ ⵉⵎⴰⵣⵉⵖⵏ ⵏⵖ ⴰⵄⵕⴰⴱⵏ ⵏⵖ ⵓⴷⴰⵢⵏ ⵏⵖ ⵉⴼⵕⴰⵏⴽⵓⴼⵓⵏⵉⵢⵏ, ⴰⵎ: ⵉⵎⴰⴷⴰⵏⵏ ⴰⵄⵕⴰⴱⵏ, ⴰⵎⴰⴹⴰⵍ ⴰⵄⵕⴰⴱ, ⵜⴰⵎⵓⵔⵜ ⵜⴰⵄⵕⴰⴱⵜ, ⵜⴰⵙⴳⴰ ⵜⴰⵄⵕⴰⴱⵜ, ⵜⴰⵎⵜⵜⵉ ⵜⴰⵄⵕⴰⴱⵜ, ⵜⴰⴼⵙⵓⵜ ⵜⴰⵄⵕⴰⴱⵜ…ⵏⵙⵏⵏ ⴳ ⵓⵎⵏⵉⴷ ⴰⴷ ⵎⴰⵙ ⴰⵄⵕⴰⴱⵏ ⵏ ⵜⵉⴷⵜ ⴰⵔ ⵙⵎⵔⴰⵙⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⵃⵎⴰ ⴰⴷ ⵢⵉⵍⵉ ⵓⵙⵉⵙⵙⵏ ⵏ ⵜⵎⴰⵣⵉⵖⵜ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⵎⴽ ⵉⵊⵕⴰⵏ ⴳ ⵍⴽⴰⵙ ⴰⵄⵕⴰⴱ ⵏ ⴼⵉⴼⴰ 2021 ⵉⵜⵜⵓⵙⴽⴰⵔⵏ ⴳ ⵇⴰⵟⴰⵕ !
- ⵜⴰⵖⴰⵡⵙⴰ ⵜⵉⵙ ⵙⵏⴰⵜ, ⴰⴷ ⵢⵉⵍⵉ ⵓⵙⵎⵔⵙ ⵏ ⵜⴳⵓⵔⵉ ⵏ “ⵍⵎⵖⵔⵉⴱ ⴰⵎⵇⵔⴰⵏ” ⵏⵖ “ⵉⵥⵥⵍⵎⴹ ⵏ ⵉⴼⵔⵉⵇⵢⴰ” ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⴷ ⵎⴰⴷ ⵉⵍⵍⴰⵏ ⴳ ⵜⵎⵏⴹⴰⵡⵜ ⵏ ⵍⵎⵖⵔⵉⴱ ⵏ ⵢⵓⵍⵢⵓⵣ
- ⵜⵉⵙ ⴽⵕⴰⴹⵜ, ⴰⴷ ⵜⴱⴷⴷⵎ ⴼ ⵓⵙⵏⴼⵍ ⵏ ⵡⴰⵙⵙⴰⵖ ⵏ ⵜⵙⵏⵓⵔⴰⵢⵜ ⵏ ⵍⴰⵎⴰⴱ ⵃⵎⴰ ⴰⴷ ⵜⴳ: “ⵜⴰⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵜⵏⵖⵎⴰⵙⵜ”.
ⵎⴰⵙⵙ ⴰⵎⴰⵡⵙⴰⵙ,
ⵏⴻⵏⵏⵓⵔⵣ ⴰⴷ ⵜⴰⵡⵙⵎ ⴳ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⴷ, ⴷ ⴰⴷ ⵜⵖⵔⵎ ⵉ ⵉⵏⵖⵎⴰⵙⵏ ⵉⵎⵖⵔⵉⴱⵉⵢⵏ ⵃⵎⴰ ⴰⴷ ⵙⵎⵔⵙⵏ ⵜⵉⴳⵓⵔⵉⵡⵉⵏ ⵍⵍⵉ ⴷ ⵢⵉⵡⵉ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵍⵍⵉⵖ ⵉⵙⴽⵔ ⵜⴰⵏⴳⴰⴷⴷⴰⵢⵜ ⵊⴰⵔ ⵙⵏⴰⵜ ⵜⵓⵜⵍⴰⵢⵉⵏ ⵜⵓⵏⵚⵉⴱⵉⵏ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ, ⵎⴰ ⴰⴷ ⵉⵍⵍⴰ ⵏⵉⵜ ⴳ ⵉⵙⵖⵍⴰⴼ ⵏ ⵜⵎⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵜⵉⵎⵣⵡⵓⵔⴰ (2022-2032), ⵏ ⵜⵎⵜⵜⴰ ⵎⵓⵏⵏⵉⵏ ⴷ ⵢⵓⵏⵙⵉⴽⵓ, ⴰⵔ ⵏⵉⵜ ⵏⴰⵇⵔⴰ ⵉ ⵜⵎⴰⵡⴰⵙⵜ ⵏⵏⵓⵏ ⵃⵎⴰ ⴰⴷ ⴳⵉⵙ ⴷⵔⵓ ⵙ ⵜⵖⴰⵔⴰⵙⵜ ⵉⵕⵡⴰⵏ.
ⴳ ⵜⴳⵉⵔⴰ, ⵎⴽ ⵉⵏⵏⴰ ⵓⵎⴰⵡⵙⴰⵙ ⵉⵣⵔⵉⵏ ⵏ ⵓⵎⵢⴰⵡⴰⴹ ⵎⴰⵙⵙ ⵎⵓⵃⴰⵎⵎⴰⴷ ⵏⴰⴱⵉⵍ ⴱⵏⵄⴰⴱⴷⵍⵍⴰⵀ ⵎⴰⵙ ⵉⴳⴰ ⵉⴳⴰ ⵓⵙⵎⵖⵔ ⵏ ⵜⵏⵖⵎⴰⵙⵜ ⵜⴰⵎⴰⵣⵉⵖⵜ ⵉⵜⵜⵢⵓⵔⴰⵏ ⵢⴰⵏ ⵓⵛⵛⵉⵍ ⴰⵏⴰⵎⵓⵏ, ⵖⵎⴽ ⴰⵏⵏ ⴰⴼ ⵏⴻⵏⵏⵓⵔⵣ ⴰⴷ ⵜⵙⴽⵔⵏ ⵜⵉⵎⵙⴽⴰⵔ ⵥⵍⵉⵏⵉⵏ ⵏ ⵓⵙⵏⵓⵃⵢⵓ ⵉⵥⵉⵍⵏ ⵉ ⵚⴰⵃⴰ ⵏ ⵜⵏⵖⵎⴰⵙⵜ ⴰⴷ. ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵜⵣⵣⵉⴳⵣⵜ ⵏⵏⵙ ⴷ ⵓⵙⵎⵖⵔ ⵏⵏⵙ ⴷ ⵜⵎⵏⵏⴰⵡⵜ ⵏ ⵉⵣⵡⵉⵍⵏ ⵏⵏⵙ, ⴰⴷ ⵏⵏⵙⵏ ⵎⴰⵙ ⴷ ⴳ 6 ⵏⵖ 7 ⵏ ⵉⴷⵎⵍⵢⴰⵕ ⵏ ⵙⴰⵏⵜⵉⵎ ⵍⵍⵉ ⵜⴼⴽⴰ ⵜⵎⴰⵡⴰⵙⵜ ⵏⵏⵓⵏ ⵉ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⴷⴰⵜ ⵏ ⵓⴱⴰⵢⵢⵓⵕ, ⵉⵚⴰⵃⴰ ⵉ ⵜⵏⵖⵎⴰⵙⵜ ⵜⴰⵎⴰⵣⵉⵖⵜ ⵢⵏⴰ ⵓⵏⵛⴽⴽ ⵉⴳⴰⵏ ⴰⵎⵥⵍⵓⴷ ⵉⵍⴽⵎⵏ 0.005 % ⵎⵇⵇⴰⵔ ⵜⴳⴰ ⵜⴰⵏⵖⵎⴰⵙⵜ ⵏ ⵜⵓⴳⵜ ⵏ ⵉⵎⵣⴷⴰⵖⵏ ⵉⵎⵖⵔⵉⴱⵉⵢⵏ !
ⵖ ⵓⵡⵇⵍⵍ ⵙ ⵢⴰⵏ ⵓⵏⵎⵓⵇⵇⴰⵔ ⴰⴽⴷ ⴷⵉⴷⵓⵏ ⵉ ⵓⵙⴼⵔⵓ ⵏ ⵜⵎⵓⴽⵔⵉⵙⵜ ⴰⴷ, ⴰⵔ ⴰⵡⵏ ⵏⵜⵜⴰⵣⵏ ⵎⴰⵙⵙ ⴰⵎⴰⵡⵙⴰⵙ ⵉⵣⵓⵍⵏ ⵏⵏⵖ ⵥⵉⵍⵏⵉⵏ.
ⵕⴰⵛⵉⴷ ⵕⴰⵅⴰ
ⴰⵎⵙⵡⵓⴷⴷⵓ ⵏ ⵜⵎⵙⵙⵓⵔⵓⵜ ⵉⴷⵉⵙⵢⵓⵏ ⴰⵎⴰⵣⵉⵖ,
ⵜⴰⵎⵣⵔⵉⴳⵜ ⵏ ⵓⵖⵎⵉⵙ ⴰⵎⴰⴹⴰⵍ ⴰⵎⴰⵣⵉⵖ
