ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⵍⴰⵎⴷ, ⴰⵔ ⴰⵡⵏ ⴷⴰⵖ ⵜⵜⴰⵣⵏⵖ ⵜⴰⴱⵔⴰⵜ ⴰⴷ ⴼ ⵢⴰⵜ ⵜⵖⴰⵡⵙⴰ ⵉⵙⵜⴰⵡⵀⵎⵎⴰⵏ ⴼ ⵉⵎⴰⵍ ⵏ ⵓⵏⴳⵔⴰⵡ ⵏⵏⵖ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵉⵏⴰⵔⵓⵣⵏ ⵍⵍⵉ ⵔⴼⴽⴰⵎ ⴼ ⵓⵎⵓⴽⵏ ⵍⵍⵉ ⵔⴰⴷ ⵉⵙⴽⵔ ⴰⵏⴰⵡ ⴰⵎⴰⵢⵏⵓ ⵏ ⵜⴳⵎⵉ.
ⵜⴼⴽⴰⵎ ⵢⴰⴷ ⵢⴰⵏ ⵓⵎⵙⴰⵡⴰⵍ ⵉ ⵜⵙⵖⵓⵏⵜ ⵏ ⵜⵉⵍⴽⵉⵍ (1 ⵉⴱⵔⵉⵔ 2022), ⵎⴰⵛⵛ ⵓⵔ ⴰⴽⴽⵯ ⴳⵉⵙ ⵜⵙⴰⵡⵍⵎ ⴼ ⵓⵙⴰⵡⵓⵔ ⴰⵎⵇⵔⴰⵏ ⵉⴳⴰⵏ ⵡⵉⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉ ⵉⴳⴰⵏ ⵖⵉⵍⴰⴷ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⵉⵙ ⵙⵏⴰⵜ ⵏ ⵜⵎⴰⵣⵉⵔⵜ ⵏⵏⵖ.
ⵜⵏⵏⴰⵎ ⴳ ⵜⵉⵏⴰⵡⵜ ⵏⵏⵓⵏ ⵜⴰⵏⵖⵎⴰⵙⵜ ⵏ 6 ⵛⵓⵜⴰⵏⴱⵉⵔ ⵍⵍⵉ ⵉⵣⵔⵉⵏ ⵎⴰⵙ ⵔⴰⴷ ⵜⵙⵙⴽⵛⵎ ⵜⵎⴰⵡⴰⵙⵜ ⵏⵏⵓⵏ ⵎⴰⴷ ⵉⴳⴰⵏ 400 ⵏ ⵓⵙⵍⴰⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵜⵙⵔⵜⵉⵜ ⵏ ⵓⵙⵏⵓⵃⵢⵓ ⵏ ⵜⵏⴱⴰⴹⵜ ⵍⵍⵉ ⵉⵣⵔⵉⵏ ⵏ ⵓⴽⴰⴱⴰⵕ ⵏ ⵜⵣⵔⴼⵜ ⴷ ⵜⴳⵎⵉ ⴷ ⵓⵎⴰⵡⵙⴰⵙ ⵏⵏⵙ ⵙⴰⵄⵉⴷ ⴰⵎⵣⴰⵣⵉ ⵍⵍⵉ ⵉⵡⴰⵍⴰⵏ ⴰⴽⴰⴱⴰⵕ ⴰⵃⴰⵔⴰⴽⵉ, ⵎⵇⵇⴰⵔ ⵏⵉⵜ ⵜⵉⵡⵙⵎ ⴳ ⵓⵏⵎⵓⵇⵇⴰⵔ ⵍⵍⵉ ⵉⵙⴽⵔ ⵓⴽⴰⴱⴰⵕ ⵏⵏⵓⵏ ⴰⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ ⴳ ⴽⵟⵓⴱⵕ ⵏ ⵓⵙⴳⴳⵯⴰⵙ ⵍⵍⵉ ⵉⵣⵔⵉⵏ ⵍⵍⵉⵖ ⵜⵏⵏⴰⵎ ⵎⴰⵙ ⵉⵙⵖⴰⵡⵙⴰ ⵓⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵓⴳⴳⴰⵔ ⵏ 17000 ⵏ ⵓⵙⵍⵎⴰⴷ (ⵎⵇⵇⴰⵔ ⵜⵜⵜⵉⵏⵉ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⴳⵉⵏ 100 000 ⵏ ⵓⵙⵍⵎⴰⴷ), ⵉⵖ ⵏⴹⴼⵕ ⴰⵙⵎⴰⵇⵇⵍ ⵏⵏⵓⵏ, ⵉⵇⵇⴰⵏ ⴷ ⴰⴷ ⵏⵇⵇⵍ ⵎⴰⴷ ⵉⴳⴰⵏ 42 ⵏ ⵓⵙⴳⴳⵯⴰⵙ ⵃⵎⴰ ⴰⴷ ⵢⵉⵍⵉ ⵓⵙⵎⴰⵜⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖⴰⵙ ⴳ ⵓⵙⵡⵉⵔ ⵏ ⵓⵙⵙⵍⵎⴷ ⴰⵎⵏⵣⵓ !
ⵓⵔ ⴰⴽⴽⵯ ⵉⵎⴰⵟⵍ ⵍⵍⵉⵖ ⵜⵏⵏⴰⵎ ⴳ ⵏⵢⵓⵢⵓⵔⴽ ⴳ ⵓⵏⵎⵓⵇⵇⴰⵔ ⵏ ⵜⵎⵜⵜⴰ ⵎⵓⵏⵏⵉⵏ ⵉⵜⵜⵓⵙⴽⴰⵔⵏ ⴰⴽⴷ ⵍⵢⵓⵏⵉⵙⵉⴼ ⵙ ⵜⵍⵎⴷⴰ ⵏ ⵓⵏⵎⵓⵇⵇⴰⵔ ⵡⵉⵙ 77 ⵏ ⵓⴳⵔⴰⵡ ⴰⵎⴰⵜⴰⵢ ⵎⴰⵙ ⵉⵙⴽⵔ ⵍⵎⵖⵔⵉⴱ ⵜⴰⵣⵣⵉⴳⵣⵜ ⵉⴼⴰⵡⵉⵏ ⴳ ⵓⵙⴳⵎⵉ ⴷ ⵔⴰⴷ ⵉⵙⴽⵔ ⵢⴰⵏ ⵓⵙⵎⵖⵔ ⴰⵅⴰⵜⴰⵔ ⵏ ⵓⵙⴳⵎⵉ, ⵉⴳ ⴳ ⵓⴳⵯⵏⵙ ⵏ ⵓⵖⴰⵡⴰⵙ ⵍⵍⵉ ⵔⴰⴷ ⵉⵙⵏⴼⵍ ⴰⵙⴳⵎⵉ ⵙ ⵓⵎⵙⴰⵙ ⴷ ⵡⴰⵏⴰⵡ ⴰⵎⴰⵢⵏⵓ ⵏ ⵜⴳⵎⵉ ⵉⵍⵍⴰⵏ ⴳ 2021 ⵙ ⵉⵙⴰⵡⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ.
ⵎⵇⵇⴰⵔ ⵎⴰⵢⴰⴷ, ⵙⵙⵓⵔⴼ ⴰⵜ ⵉⵢⵉ ⴰⴷ ⴰⵡⵏ ⵉⵏⵉⵖ ⵎⴰⵙ ⴷ ⵉⵇⵇⴰⵏ ⵓⵙⵏⴼⵍ ⵏ ⵜⵙⵜⵔⴰⵜⵉⵊⵉⵜ ⵏⵏⵓⵏ ⵃⵎⴰ ⴰⵔ ⵢⵉⵍⵉ ⵡⴰⵔⴰⵎⵓⵔⵙ ⵏ ⵓⵓⵎⵓⴽⵏ ⵏⵏⵓⵏ ⵖⵎⴽ ⴰⵏⵏ ⵓⵎⴰ ⴰⵏⴰⵡⴰ ⵏⵏⵓⵏ ⵏ ⵜⴳⵎⵉ.
ⵉⵖ ⵓⴽⴰⵏ ⵜⵣⵣⵉⴳⵣⵎ ⴳ ⵓⵙⵉⵜⵜⵉ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉ ⵉⴳⴰⵏ ⵜⴰⵎⴰⴷⴷⵓⴷⵜ ⵙⴳ 2011, ⴷ ⵓⵙⵙⵍⵎⴷ ⴰⵎⵏⵣⵓ ⵢⵉⵍⵓ ⵓⵙⵓⵡⵓⵜⵜⵓ ⵏ ⵓⵙⵙⵍⵎⴷ ⵏⵏⵙ ⴷⴰⵔ ⵎⴰⴷ ⵉⴷⵔⵓⵙⵏ ⴳ 10% ⵏ ⵉⵏⵍⵎⴰⴷⵏ ⵏ ⵓⵙⵡⵉⵔ ⴰⵎⵏⵣⵓ, ⵔⴰⴷ ⵉⵣⵔⵉ ⵡⴰⵔⵓⵎⵓⵔⵙ ⴰⵏⵎⵍⴰⵏ ⵓⴳⴳⴰⵔ ⵏ 330000 ⵏ ⵓⵏⵍⵎⴰⴷ ⴳ ⴽⵔⴰⵢⴳⴰⵜ ⴰⵙⴳⴳⵯⴰⵙ, ⵔⴰⴷ ⵉⵣⵣⵉⴳⵣ ⵡⴰⵔⵓⵎⵓⵔⵙ ⵖⵎⴽ ⴰⵏⵏ ⵓⵍⴰ ⴰⵙⵖⵍ ⵏ ⵉⵏⵍⵎⴰⴷⵏ ⵍⵍⵉ ⵓⵔ ⵟⵟⴰⴼⵏⵉⵏ ⵜⵉⵙⵓⴳⴰⵔ ⵜⵉⵙⵉⵍⴰⵏⵉⵏ ⵏ ⵜⵖⵔⵉ ⴷ ⵜⵉⵔⵔⴰ, ⴰⵔ ⵉⵜⵜⵉⵏⵉ ⵓⴱⴰⵏⴽ ⴰⵎⴰⴹⵍⴰⵏ ⵎⴰⵙ ⴳⴰⵏ ⵙⵉⵏ ⵉⴼⴽⵕⴰⴹⵏ ⵏ ⵉⵏⵍⵎⴰⴷⵏ…
ⵉⵇⵇⴰⵏ ⴷ ⴰⴷ ⵜⵙⵙⵏⵎ ⵎⴰⵙ ⵉⴳⴰ ⴳ ⵡⴰⵔⵜⴰⵎⴰⵙⴰⵢⵜ ⵉⵖ ⵜⵣⵣⵉⴳⵣⵎ ⴳ ⵓⵙⵉⵜⵜⵉ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ ⵉⵏⵍⵎⴰⴷⵏ ⵏ ⴽⴽⵓⵥ ⴷ ⵙⵎⵎⵓⵙ ⵉⵙⴳⴳⵯⴰⵙⵏ ⵏ ⵓⵙⵙⵍⵎⴷ ⴰⵎⵏⵣⵓ, ⴷ ⵓⵙⴱⴷⴷⵉ ⵏ ⵓⵙⵎⴰⵜⴰ ⵏⵏⵙ ⴳ ⵜⵉⵏⵎⴰⵍ ⵏ ⵓⵙⵙⵍⵎⴷ ⴰⵎⵣⵡⴰⵔⵓ, ⵜⵙⴱⴷⴷⵎ ⵙ ⵖⵎⴽ ⴰⵏⵏ ⵎⴰⵢⴰⴷ:
ⵜⴰⵖⴰⵡⵙⴰ ⵜⴰⵎⵣⵡⴰⵔⵓⵜ, ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵍⵍⴰⵏⵉⵏ ⴳ ⵉⵏⴰⵡ ⴰⴳⵍⴷⴰⵏ ⵏ ⴰⵊⴷⵉⵔ ⵏ 17 ⴽⵟⵓⴱⵕ 2001 ⵍⵍⵉⵖ ⵉⵙⴰⵡⴰⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵜⵎⴰⵣⵉⵖⵜ.
ⵜⴰⵖⴰⵡⵙⴰ ⵜⵉⵙ ⵙⴰⵏⵜ, ⴰⵢⵍⵍⵉ ⴼ ⵉⵙⴰⵡⴰⵍ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ 1 ⵢⵓⵍⵢⵓⵣ 2011 ⵉⵙⴰⵡⵍⵏ ⴼ ⵓⵙⵉⵜⵜⵉ ⵏ ⵓⵙⵏⵓⵃⵢⵓ ⴳ ⵜⵣⵡⴰⵔⵜ ⵏⵏⵙ, ⵢⵉⵏⵉ ⵓⵍⴰ ⴳ ⵓⵎⵏⵏⵉ ⵏⵏⵙ ⵡⵉⵙ ⵙⵎⵎⵓⵙ ⵎⴰⵙ ⵜⴳⴰ ⵜⵓⵜⵍⴰⵢⵜ ⵜⴰⵎⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵔⵜ.
ⵜⴰⵖⴰⵡⵙⴰ ⵜⵉⵙ ⴽⵕⴰⴹⵜ, ⴰⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⵉⵥⵍⵉⵏ ⵙ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⴼⵔⴽⵉⵡⵉⵏ ⵏ ⵓⵙⵉⴷⴼ ⵏⵏⵙ ⴳ ⵉⴳⵔⴰⵏ ⵉⵎⵣⵡⵓⵔⴰ ⴷ ⵡⵉⵏ ⵓⵙⴳⵎⵉ ⴷ ⵜⵓⴷⵔⵜ ⵜⴰⵎⴰⵜⴰⵢⵜ, ⴰⵙⵎⴳⵏ ⵍⵍⵉ ⵉⵙⵖⵣⵏ ⵓⴱⵕⵍⴰⵎⴰⵏ ⴳ 2019 (ⴰⴷⴰⵀⵉⵔ ⵓⵟⵟⵓⵏ 1.19.121 ⵏ 12 ⵎⵓⵃⴰⵕⵕⴰⵎ 1441/ 12ⵛⵓⵜⴰⵏⴱⵉⵔ 2019).
ⵜⴰⵖⴰⵡⵙⴰ ⵜⵉⵙ ⴽⴽⵓⵥⵜ, ⵉⵙⵖⵍⴰⴼ ⵏ ⵜⵎⵎⵜⴰ ⵎⵓⵏⵏⵉⵏ, ⵡⵉⵍⵍⵉ ⵜⴱⴷⵔ ⵜⵙⵇⵇⵉⵎⵜ ⵏ ⵓⵎⵇⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⴳ ⴽⵟⵓⴱⵕ 2015, ⴷ ⵜⵙⵇⵇⵉⵎⵜ ⵏ ⵡⵓⵙ ⵚⴹⵉⵚ ⵉⵏⵇⵇⵉⵙⵏ ⴼ ⵓⵎⵇⵏ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵉⵖⵔⵎⴰⵏⵏ ⴷ ⵉⵙⵔⵜⴰⵏⵏ ⵏ 1 ⴽⵟⵓⴱⵕ 2016 ⴷ ⵜⵎⵏⵇⵇⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉⵥⵍⵉⵏ ⵙ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏ ⵓⵙⵏⵓⵃⵢⵓ ⴰⵥⵓⵕⴰⵏ ⴷ ⵡⴰⵔⴰⵎⵙⵓⵔⵓⴼ ⵎⴰⵙⵙⴰ ⵜⵉⵏⴷⴰⵢⵉ ⴰⵛⵏⵓⵎ ⵍⵍⵉ ⵜⵙⵓⵊⴰⴷ ⴳ ⵓⵙⵎⴰⴷ ⵏ ⵓⵔⵣⴰⴼ ⵏⵏⵙ ⵉ ⵜⴳⵎⴷⵉⵜ ⵏ ⵍⵎⵖⵔⵉⴱ ⴳ ⴷⵓⵊⴰⵏⴱⵉⵔ 2018.
ⵜⵉⵙ ⵙⵎⵎⵓⵙⵜ, ⵜⴰⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵏ 1989 ⵍⵍⵉⵖ ⵉⵙⴰⴰⵡⵍ ⵓⵎⵏⵏⵉ ⵏⵏⵙ ⵡⵉⵙ ⴼ ⵓⵣⵔⴼ ⴳ ⵓⵙⴳⵎⵉ ⵙⴳ ⵜⵉⵎⵥⵉ ⵜⴰⵎⵣⵡⴰⵔⵓⵜ ⴷ ⵓⵎⵏⵏⵉ ⵡⵉⵙ 8 ⵍⵍⵉ ⵉⵙⴰⵡⵍⵏ ⴼ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵎⴰⴳⵉⵜ ⵏⵏⵙ.
ⵜⵉⵙ ⵚⴹⵉⵚⵜ, ⵉⵙⵖⵍⴰⴼ ⵏ ⵜⵎⴰⴷⴷⴰⵙⵜ ⵏ ⵢⵓⵏⵉⵙⴽⵓ ⴼ ⵡⴰⵜⵉⴳ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵙⵍⴰⵡⴰⵏ ⴰⴽⴽⵯ ⵎⴰⵙⴷ ⵎⴰⵙⵙ ⵓⴷⵔⵉ ⴰⵥⵓⵍⴰⵢ, ⵜⴰⵏⵎⵀⴰⵍⵜ ⵏ ⵜⵎⴰⴷⴷⴰⵙⵜ ⵏ ⵢⵓⵏⵉⵙⴽⵓ, ⵜⵏⵏⴰ ⴳ 2019 ⵙ ⵜⵎⵍⴷⴰ ⵏ ⵓⵙⴳⴳⵯⴰⵙ ⴰⴳⵔⴰⵖⵍⴰⵏ ⵏ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ, ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⴳⵎⵉ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ ⵙ ⵜⵓⵜⵍⴰⵢⵜ ⵏⵏⵙⵏ ⵍⵍⵉ ⵙⵔⵏ ⵉⵥⵍⵉⵏ.
ⵜⵉⵙ ⵙⴰⵜ, ⴰⵙⵉⵡⴹ ⵏ ⵜⵎⵜⵜⴰ ⵎⵓⵏⵏⵉⵏ ⴼ ⵉⵣⵔⴼⴰⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ ⴷ ⵜⵎⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵜⵉⵎⵣⵡⵓⵔⴰ 2022-2032.
ⵜⵉⵙ ⵜⴰⵎⵜ, ⵉⵡⵜⵜⴰⵙⵏ ⵥⵍⵉⵏⵉⵏ ⵙ ⵓⵙⵙⵍⵎⴷ ⴰⵎⵏⵣⵓ ⵉ ⵜⴰⵣⵣⴰⵏⵉⵏ ⵏ 4 ⴷ 5 ⵉⵙⴳⴳⵯⴰⵙⵏ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⵙ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵎⴰⴷ ⵉⵥⵍⵉⵏ ⵜⵙⵓⴳⴰⵔ ⵜⵉⵎⵣⵡⵓⵔⴰ.
ⵜⵉⵙ ⵜⵥⴰⵜ, ⵉⵙⵡⴰⵍⴰⵢⵏ ⵙⵜⴰⵡⵀⵎⵎⴰⵏⵉⵏ ⵏ ⵉⵎⴰⵙⵙⴰⵏ ⵏ ⵓⵙⴳⵎⵉ ⴰⵙⵍⵎⴰⴷ ⴰⵍⴰⵏ ⴱⵏⵟⵓⵍⵉⵍⴰ ⵍⵍⵉ ⵉⴼⴽⴰⵏ ⵢⴰⵏ ⵜⵉⵏⴰⵡⵜ ⴳ 15 ⵏⵓⵡⴰⵏⴱⵉⵔ 2019 ⴳ ⴱⴰⵔⵉⵣ ⵙ ⵜⵎⵍⴷⴰ ⵏ ⵓⵏⵎⵓⵇⵇⴰⵔ ⵏ ⵉⵎⴰⵡⵙⴰⵙⵏ ⵏ ⵢⵉⴳⵔ ⴰⴼⵕⴰⵏⴽⵓⴼⵓⵏⵉ ⵍⵍⵉⵖ ⵉⵙⴰⵡⵍ ⴼ ⵓⵙⵜⴰⵢ ⵏ ⵜⵓⵜⵍⴰⵢⵜ ⴷ ⵢⵓⵙⴰⵏ ⵉ ⵓⵙⵙⵍⵎⴷ ⴳ ⵓⵏⴳⵔⴰⵡ ⵏ ⵓⵙⴳⵎⵉ.
ⵜⵉⵙ ⵎⵔⴰⵡⵜ, ⵉⵙⵖⵍⴰⴼ ⵏ ⵓⴱⴰⵏⴽ ⴰⵎⴰⴹⵍⴰⵏ ⵏ ⵏⵓⵡⴰⵏⴱⵉⵔ 2019 ⵍⵍⵉ ⵙⴰⵡⴰⵍⵏⵉⵏ ⴼ ⵡⴰⵜⵉⴳ ⴰⵏⴰⵎⵎⴰⵙ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴳ ⵓⵙⵙⵍⵎⴷ ⵏ ⵉⵎⵥⵢⴰⵏⵏ.
ⵜⵉⵙ ⵢⴰⵜ ⴷ ⵎⵔⴰⵡⵜ, ⵜⵉⵔⴰⵜ ⵜⴰⵙⵔⵜⴰⵏⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵎⵖⴰⵔ ⵄⴰⵣⵉⵣ ⴰⵅⵏⵏⵓⵛ ⵍⵍⵉ ⵉⵙⴰⵡⵍⵏ ⴼ ⵜⵎⴰⵣⵉⵖⵜ ⴳ ⵓⵕⵥⵥⵓⵎ ⵏ ⵓⴱⵕⵍⴰⵎⴰⵏ ⴷ ⵓⵙⵎⵏⵉⴷ ⵏ ⵓⵖⴰⵡⴰⵙ ⵓⵏⴱⵉⴹ ⴷ ⵓⵛⵛⵉⵍ ⵏ ⵓⵙⵔⵓⵙ ⵏ ⵜⵎⵙⴰⵙⵜⵍⵜ ⵉⵥⵍⵉⵏ ⵙ ⵓⵙⵎⵖⵔ ⵏ ⵜⵎⴰⵣⵉⵖⵜ. ⵜⵉⵔⴰⵜ ⵏⵉⵜ ⵍⵍⵉ ⴷⴰⵖ ⵉⵍⵍⴰⵏ ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵉⵄⵔⵔⵉⵎⵏ ⵏ ⵓⴽⴰⴱⴰⵕ ⵏⵏⵓⵏ ⴰⵙⵔⵜⴰⵏ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⴽⴽⵓⵥⵜ ⴳ ⵓⴳⴰⴷⵉⵔ ⵓⵙⵙⴰⵏ ⵏ 8 ⴷ 9 ⵛⵓⵜⴰⵏⴱⵉⵔ ⵉⵣⵔⵉⵏ.
ⵜⴰⵖⴰⵡⵙⴰ ⵜⵉⵙ ⵙⵏⴰⵜ ⴷ ⵎⵔⴰⵡⵜ, ⵜⴰⵙⴳⵓⵔⵉ ⵍⵍⵉ ⵏⵉⵜ ⵜⵏⵏⴰⵎ ⴳ 21 ⵉⵏⵏⴰⵢⵔ ⵉⵣⵔⵉⵏ ⵙ ⵜⵎⵍⴷⴰ ⵏ ⵓⵔⵣⴰⴼ ⵏⵏⵓⵏ ⵉ ⵜⵉⵏⵎⵍ ⵎⴷⵔⴰⵙⵜ ⴽⵓⵎ ⴳ ⵓⵙⵓⵏ ⵏ ⴱⵓⵙⴽⵓⵔⴰ ⵉⴹⴼⵕⵏ ⵜⵉⵎⵔⵙⵍⵜ ⵏ ⴱⵎⵙⴻ ⴱⴰⵏⴽ ⵉ ⵓⵙⴳⵎⵉ ⴷ ⵡⴰⵡⵏⴰⴷ ⵍⵍⵉⵖ ⵜⵙⴰⵡⵍⵎ ⴼ ⵜⵎⵣⵍⴰⵢ ⵏ ⵓⵥⵟⵟⴰ ⴰⴷ ⴰⵏⵎⵍⴰⵏ ⴳ ⵓⵙⵙⵍⵎⴷ ⵏ ⵜⵓⵜⵍⴰⵢⵉⵏ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴳ ⵜⴳⵉⵔⴰ, ⵉⵖ ⵜⵔⴰⵎ ⵎⴰⵙⵙ ⴰⵎⴰⵡⵙⴰⵙ ⴰⵎⵓⵔⵙ ⵏ ⵓⵖⴰⵡⴰⵙ ⴷ ⵓⵎⵓⴽⵏ ⵏⵏⵓⵏ ⵓⵏⴱⵉⴹ ⴳ ⵢⵉⴳⵔ ⵏ ⵓⵙⴳⵎⵉ ⴰⵏⴰⵎⵓⵔ, ⵉⵇⵇⴰⵏ ⴰⴷ ⵓⵙⵉⴷⴼ ⵓⵛⵛⵉⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵎⴰⵕⵕⴰ ⵜⵉⴷⴰⵍⵉⵡⵉⵏ ⵏ ⵓⵙⵙⵍⵎⴷ ⴰⵎⵏⵣⵓ ⴷ ⵓⵙⵎⴰⵜⴰ ⵏⵏⵙ ⴳ ⵓⵙⵙⵍⵎⴷ ⴰⵎⵣⵡⴰⵔⵓ, ⵉⵖ ⵓⵔ ⵉⵍⵍⵉ ⵔⴰⴷ ⵉⴽⵛⵎ ⵓⵎⵓⴽⵏ ⴰⴷ ⴷ ⵡⴰⵏⴰⵡ ⵏⵏⵓⵏ ⵓⵏⴳⵉⵎ ⵙ ⵜⵎⴽⵯⵜⵉⵜ ⴰⵎ ⴰⵖⴰⵡⴰⵙ ⴰⵖⴰⵡⴰⵍ ⵏ ⵓⵎⴰⵡⵙⴰⵙ ⵉⵣⵔⵉⵏ ⵃⵎⴰⴷ ⵅⵛⵉⵛⵉⵏ ⵙⴳ ⵓⴽⴰⴱⴰⵕ ⵏ ⵜⵣⵖⵕⵜ ⴷ ⵜⵎⴰⵜⵔⴰⵔⵜ ⴳ ⵅⵙⵔⵏ ⵉⴷⵔⵉⵎⵏ ⵉⵉⴳⴷⵓⴷⴰⵏⵏ, ⵎⴽ ⵍⵍⵉ ⵏⵉⵜ ⵉⵏⵏⴰ ⵎⴰⵙⵙ ⴷⵔⵉⵙ ⵊⵟⵟⵓ ⴰⵏⵙⵙⵉⵅⴼ ⵉⵣⵔⵏ ⵏ ⵜⵏⵙⴱⴹⴰⵢⵜ ⵏ ⵓⵙⵉⵟⵏ ⴳ ⵓⵏⵇⵇⵉⵙ ⵏⵏⵙ.
ⵎⴰⵙⵙ ⴰⵎⴰⵡⵙⴰⵙ, ⴰⵔ ⴰⵡⵏ ⵜⵜⴰⵣⵏⵖ ⴰⵣⵓⵍ ⵉⵏⵓ ⵉⵙⵎⴷⵏ
ⵕⴰⵛⵉⴷ ⵕⴰⵅⴰ
ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ
