ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⴳⵎⴹ ⵜⵎⵔⵙⵍⵜ ⵏ ⵜⵎⵃⴹⵉⵜ ⵏ ⵍⵎⵖⵔⵉⴱ ⴷ ⵜⵎⵃⴹⵉⵜ ⵜⴰⵏⴰⵎⵓⵔⵜ ⵜⴰⴱⵕⵉⵟⴰⵏⵉⵜ, ⴰⵙⵙ ⵏ ⵓⴽⵡⴰⵙ ⴳ ⵍⵓⵏⴹⵓⵏ, ⵜⴰⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵉⵡⴰⵜⵜⵙⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵜⵎⵔⵙⴰⵍ ⴰⴷ.
ⵜⵡⴰⵜⵜⵙ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ, ⵏⵏⴰ ⵉⵙⵙⴳⵎⴹ ⵙ ⵉⵙⴽⴽⵉⵍⵏ ⵉⵎⵣⵡⵓⵔⴰ ⴰⵏⵎⵀⴰⵍ ⵏ ⵜⵎⵃⴹⵉⵜ ⵏ ⵍⵎⵖⵔⵉⴱ, ⵊⴰⵎⵄ ⴱⴰⵢⴹⴰ, ⴷ ⵓⵏⵎⵀⴰⵍ ⴰⵎⴰⵜⴰⵢ ⴰⵏⴼⵔⴰⴳ ⵏ ⵜⵎⵃⴹⵉⵜ ⵜⴰⵏⴰⵎⵓⵔⵜ ⵜⴰⴱⵕⵉⵟⴰⵏⵉⵜ, ⵊⵉⴼ ⵊⵉⵎⵙ, ⴰⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵜⵎⵔⵙⴰⵍ ⴰⴷ, ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵓⵙⵏⴼⵍ ⵏ ⵜⵏⵜⴰⵎⵉⵏ ⴷ ⵓⴱⵟⵟⵓ ⵏ ⵜⵎⵓⵣⴰⵢ ⴷ ⵜⵣⵎⵎⴰⵔ.
ⵉⵙⵙⵉⵙⴼⵉⵡ ⵎⴰⵙⵙ ⴱⴰⵢⴹⴰ, ⴳ ⵢⴰⵜ ⵏⵏⵙ ⵙ ⵜⵎⵍⴷⴰ ⴰⴷ, ⵎⴰⵙ ⴷ ⴰⵙⴳⵎⴹ ⵏ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⴰⴷ, ⴰⵔ ⵉⵙⵙⴷⵓⵙ ⵢⴰⵏ ⵓⵎⵣⵔⵓⵢ ⴰⵣⴳⵔⴰⵔ ⵏⵏⴰ ⵉⵜⵜⴰⵖⵓⵍⵏ ⵙ ⵜⴰⵙⵓⵜ ⵜⵉⵙ 13 ⴳⵔ ⵜⴳⵍⴷⵉⵜ ⵉⵎⵓⵏⵏ ⴷ ⵍⵎⵖⵔⵉⴱ, ⵉⴼⴽⴰ ⵜⵓⵚⴽⴰ ⵏ ⵜⵓⴳⵜⵜ ⵏ ⵉⵎⴰⴳⴰⵥⵏ ⵏⵏⴰ ⵉⵙⵙⴷⵓⴷⵙⵏ ⵜⴰⴱⵖⵓⵔⵜ ⵏ ⵓⴷⵔⴰⵡ ⴰⴷ.
ⵉⵙⵙⵎⵜⵔ ⵎⴰⵙ ⴷ ⵜⵉⵎⵃⴹⵉⵜ ⵜⴰⵏⴰⵎⵓⵔⵜ ⵜⴰⴱⵕⵉⵟⴰⵏⵉⵜ ⵖⵓⵔⵙ ⵢⴰⵜ ⵖⵜⵎⵓⵣⴰⵢⵜ ⵜⴰⵅⴰⵜⴰⵔⵜ ⴳ ⵓⵙⵏⵎⴰⵍⴰ ⴷ ⵜⵎⵙⵙⵓⴳⵓⵔⵜ ⵏ ⵜⵎⵃⴹⵉⵜ, ⴰⵢⵍⵍⵉ ⵔⴰⴷ ⵉⴼⴰⵍⴽⵉ ⵉ ⵜⵎⵔⵙⵍⵜ ⵜⴰⵎⵖⵔⵉⴱⵉⵜ, ⵉⵔⵏⵓ ⵎⴰⵙ ⴷ ⵜⴰⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵜⵣⴷⵉ ⴰⵡⴷ ⵙ ⵓⵙⵏⴼⵍ ⵏ ⵜⵎⵃⴹⴰⵢ, ⵙⵍⴰⵡⴰⵏ ⴰⴽⴽⵯ ⵜⵉⵍⵍⵉ ⵉⵜⵜⵓⵙⵎⵓⵟⵟⴰⵏⵏ.
ⵉⵙⵙⵉⵙⴼⵉⵡ ⵎⴰⵙ ⵉⵣⴹⴰⵕ ⴰⴷ ⵜⴻⵜⵜⵓⴼⴽⴰⵏ ⵜⵏⵜⴰⵎⵉⵏ ⴰⴷ ⵉ ⵉⵎⵔⵣⵓⵜⵏ ⴷ ⵉⴽⴰⴷⵉⵎⵉⵢⵏ, ⵃⵎⴰ ⴰⴷ ⵢⵉⵍⵉ ⵓⵏⵣⴰⵍ ⵏ ⵓⵔⵣⵣⵓ ⴳ ⵜⵣⴷⴰⵢⵉⵏ ⵜⵉⵎⵖⵔⴰⴱⵉⵢⵉⵏ – ⵜⵉⴱⵕⴰⵟⵉⵏⵉⵢⵉⵏ ⵖⵓⵔ ⵜⴰⴱⵖⵓⵔⵜ ⵜⴰⵅⴰⵜⴰⵔⵜ.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵎⵙⵇⴰⴷ ⵏ ⵍⵎⵖⵔⵉⴱ ⴳ ⵜⴳⵍⴷⵉⵜ ⵉⵎⵓⵏⵏ, ⵃⴰⴽⵉⵎ ⵃⴰⵊⵡⵉ, ⵎⴰⵙ ⴷ ⴰⴷⵔⴰⵡ ⴰⴷ ⴰⵔ ⵉⴳⴳⵔ ⵜⴰⴷⵔⵓⵜ ⵏ ⵜⵣⴷⴰⵢⵉⵏ ⴳⵔ ⵜⴳⵍⴷⵉⵜⵉⵏ, ⴰⵛⴽⵓ ⴷⴰ ⵜⵜⵍⵓⵃ ⵜⵉⴼⴰⵡⵜ ⵅⴼ ⵜⴰⵙⵓⵜⵉⵏ ⵏ ⵓⵎⵢⴰⵡⴰⵙ ⴳ ⵜⵓⴳⵜⵜ ⵏ ⵉⴷⵖⴰⵔⵏ ⴳⵔ ⵙⵏⴰⵜ ⵜⴳⵍⴷⵉⵜⵉⵏ ⵜⵉⵇⴱⵓⵔⵉⵏ.
ⵉⵙⴷⴷⵉⴷ ⵎⴰⵙⵙ ⵃⴰⵊⵡⵉ ⵎⴰⵙ ⴷ ⴰⴷⴰⴼ ⵏ ⵓⵎⵣⵔⵓⵢ ⴰⴷ ⵉⵛⵛⴰⵔⵏ ⴷⴰ ⵢⴰⴽⴽⴰ ⵢⴰⵜ ⵜⵎⵍⴷⴰ ⵏ ⵓⵔⵎⴰⵙ ⵏ ⴳⴰⵎ ⵙ ⵜⵡⵉⵍⴰ ⵜⴰⵎⴷⵢⴰⵜ, ⵜⴰⵖⴰⵡⵙⴰ ⵏⵏⴰ ⵔⴰⴷ ⵢⴰⵡⵙ ⴳ ⵜⵓⵚⴽⴰ ⵏ ⵢⴰⵏ ⵢⵉⵎⴰⵍ ⴰⵎⵓⴼⴰⵢ.
ⵜⴻⵜⵜⵓⴼⵙⴰⵔⵏⵜ ⵜⵏⵜⴰⵎⵉⵏ ⵉⵣⴷⵉⵏ ⵙ ⵍⵎⵖⵔⵉⴱ ⴳ ⵓⵙⵖⵉⵎ ⵏ ⵜⵎⵃⴹⵉⵜ ⵜⴰⵏⴰⵎⵓⵔⵜ ⵜⴰⴱⵕⵉⵟⴰⵏⵉⵜ ⵙ ⵜⵎⵍⴷⴰ ⵏ ⵓⵙⴳⵎⴹ ⵏ ⵓⴷⵔⴰⵡ ⴰⴷ, ⵖ ⵏⵉⵜ ⵜⵍⵍⴰ ⵜⵎⵢⴰⵇⵇⴰⵏⵜ ⵏ ⵓⴼⵔⴰ ⴷ ⵓⵙⵖⵏⵣⵉ ⵏⵏⴰ ⵎⵉ ⵉⵜⵜⴰⵖⵓⵍ ⵓⵎⵣⵔⵓⵢ ⵏⵏⵙ ⵙ ⵓⴳⴳⴰⵔ ⵏ ⴽⵕⴰⴹⵜ ⵜⴰⵙⵓⵜⵉⵏ, ⴷ ⵜⴱⵔⴰⵜⵉⵏ ⵜⵉⵎⵢⴰⵖⵉⵏ ⴳⵔ ⵉⴳⵍⴷⴰⵏ ⵏ ⵙⵏⴰⵜ ⵜⵎⵉⵣⴰⵔ ⴰⴷ, ⵍⴰ ⵉⵜⵜⴰⵖⵓⵍ ⵓⵎⵣⵔⵓⵢ ⵏⵏⵙⵏⵜ ⵙ ⵜⴰⵙⵓⵜ ⵜⵉⵙ ⵚⴹⵉⵚⵜ ⴷ ⵎⵔⴰⵡ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
