ⵜⴰⵏⴱⴽⴰⴹⵜ ⵜⴰⵙⵏⵉⵍⵙⵜ ⵏ ⵍⵎⵖⵔⵉⴱ ⵙ ⵜⵡⵉⵙⵉ ⵏ ⴼⵕⴰⵏⵚⴰ ⵎⵏⵉⴷ ⵏ ⵜ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴷ ⵜⵎⵣⵡⴰⵔⵓⵜ ⵏ ⵓⵎⴰⵜⴰ ⵏ ⵉⵎⵣⴷⴰⵖⵏ

ⵕⵕⴱⴰⵟ, ⴰⵙⴰⵎⴰⵙ 21 ⴱⵕⴰⵢⵕ 2021/2971

ⵉ ⵎⴰⵙⵙⴰ ⵓⴷⵔⵉⵢ ⴰⵥⵓⵍⴰⵢ,

ⵜⴰⵎⵏⵀⴰⵍⴰⵜ ⵜⴰⵎⴰⵜⴰⵢⵜ ⵏ ⵢⵓⵏⵉⵙⴽⵓ

ⵉⵎⵔⵙⵉ: ⵜⴰⵏⴱⴽⴰⴹⵜ ⵜⴰⵙⵏⵉⵍⵙⵜ ⵏ ⵍⵎⵖⵔⵉⴱ ⵙ ⵜⵡⵉⵙⵉ ⵏ ⴼⵕⴰⵏⵚⴰ ⵎⵏⵉⴷ ⵏ ⵜ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴷ ⵜⵎⵣⵡⴰⵔⵓⵜ ⵏ ⵓⵎⴰⵜⴰ ⵏ ⵉⵎⵣⴷⴰⵖⵏ

ⵎⴰⵙⵙⴰ ⵜⴰⵎⵏⵀⴰⵍⵜ ⵜⴰⵎⴰⵜⴰⵢⵜ,

ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⴰⵎⴰⵢⵏⵓ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵔⵉⵖ ⴰⴷ ⴷⴰⵖ ⴷⵉⴷⵓⵏ ⵎⴹⵉⴽⵉⵕⵖ ⴼ ⵜⵙⵔⵜⵉⵜ ⵜⴰⵙⴳⵎⴰⵏⵜ ⵏ ⵜⵏⴱⴽⴰⴹⵜ ⵜⴰⵙⵏⵉⵍⵙⵜ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵎⵏⵉⴷ ⵏ ⵜⵓⵜⵍⴰⵢⵜ ⴷ ⵜⵎⵣⵡⴰⵔⵓⵜ ⵏ ⵓⵎⴰⵜⴰ ⵏ ⵉⵎⵣⴷⴰⵖⵏ ⵉⵎⵖⵔⵉⴱⵉⵢⵏ, ⴰⴷ ⵜⵜ ⵉⴳⴰⵏ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵢⵍⵍⵉ ⵉⴳⴰⵏ ⵜⴰⴳⵉⵜ ⵏ ⵓⵎⵇⵏ ⴰⴳⵔⴰⵖⵍⴰⵏ ⵏ ⵜⵎⵜⵜⴰ ⵉⵎⵓⵏⵏ ⴼ ⵉⵣⵔⴼⴰⵏⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏ ⵓⴽⵟⵓⴱⵕ 2015, ⴷ ⵓⵏⵇⵇⵉⵙ ⵏ ⵜⵎⵏⵇⵇⴰⵙⵜ ⵉⵥⵍⵉⵏ ⴼ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏ ⵜⵙⵙⴰⵥⵓⵕⵜ ⴷ ⵓⵙⵏⵓⵃⵢⵓ ⴰⵥⵓⵕⴰⵏ, ⴷ ⵜⴰⴳⵉⵜ ⵏ ⵡⵉⵢⵢⴰⴹ ⴷ ⵡⴰⵔⴰⵙⵓⵔⴼ ⵍⵍⵉ ⵉⵍⵍⴰⵏ ⴳ ⵓⴽⵟⵓⴱⵕ 2018 (https://amadalamazigh.press.ma/fr/lonu-demande-au-maroc-dintensifier-les-efforts-pour-que-les-amazighs-ne-soient-pas-victimes-de-discrimination-raciale/) ⵖⵎⴽ ⴰⵏⵏ ⴷ ⵜⵎⵔⵙⵍⵜ ⵏ ⵢⵓⵏⵉⵙⴽⵓ ⵎⵓ ⵜⴳⴰⵎ ⵜⴰⵎⵏⵀⴰⵍⵜ ⵙ ⵡⴰⴷⴷⵓⵔ.

ⵎⴰⴷ ⴰⴽⴽ ⴱⴰⵀⵔⴰ ⵉⵀⵔⵛⵏ, ⵜⵉⵕⵥⵉ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵍⵍⵉ ⵉⵙⵙⵉⵅⴼ ⴷ.ⵙⴰⵄⴷⴷⵉⵏ ⵍⵄⵓⵜⵎⴰⵏⵉ, ⵏ ⵓⵎⴰⴳⵔⴰⴷ ⵡⵉⵙ ⵙⵎⵎⵓⵙ ⵏ ⵜⵎⵏⴹⴰⵡⵜ ⵏ 1 ⵢⵓⵍⵢⵓⵣ 2011, ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⴼ ⵓⵙⵎⵀⵍ ⵏ ⵓⴼⵔⵉⵙ ⵓⵏⵚⵉⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵍⵍⵉ ⵉⵜⵜⵓⵙⵜⴰⵢⵏ ⵙ ⵓⵎⴰⴽⵕⴰⴹ ⵙⴳ ⵓⴱⵕⵍⴰⵎⴰⵏ , ⵢⵉⵍⵉ ⵓⵣⵓⵣⵣⵔ ⵏⵏⵙ ⴳ ⵓⵖⵎⵉⵙ ⴰⵎⴰⴷⴷⵓⴷ ⵓⵟⵟⵓⵏ 6816 ⴳ 16 ⵛⵓⵜⴰⵏⴱⵉⵔ 2019 ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 04.16 ⴼ ⵓⵙⴽⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ, ⵉⵜⵜⵓⵙⵣⴰⵏⵏ ⴳ 12 ⴱⵕⴰⵢⵕ 2020.

ⴰⵔ ⴰⵡⵏ ⴷⴰⵖ ⵙⵙⴽⵜⴰⵢⵖ ⵎⴰⵙ ⴷ ⵜⴰⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵜⵙⵜⵉ ⴰⴷ ⵜⴱⴷⴷ ⴼ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵜⴰⵇⴱⵓⵔⵜ, ⵜⵙⵉⵜⵜⵉ ⵙ ⵜⵖⴰⵔⴰⵙⵜ ⵉⵙⵎⴷⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ( ⴷ ⴷⴰⵔⵉⵊⴰ), ⴳ ⵓⵙⵍⵎⴷ ⴰⵎⵏⵣⵓ, ⵜⵙⵉⵜⵜⵉ ⵙ ⵖⵎⴽ ⴰⵏⵏ ⵉⵙⵖⵍⴰⴼ ⵏ ⵢⵓⵏⵉⵙⴽⵓ ⵏ 1962, ⵖ ⵉⵍⵍⴰ ⵓⵛⵛⵉⵍ ⵏ ⵓⵙⴽⵛⵎ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴳ ⵓⵙⵍⵎⴷ ⴰⵎⵣⵡⴰⵔⵓ ⵙⴳ ⵉⵙⴳⴳⵯⴰⵙⵏ ⵉⵎⵣⵡⵓⵔⴰ, ⴰⵢⵍⵍⵉ ⵉⴳⴰⵏ ⵜⵉⵕⵥⵉ ⵏ ⵉⵎⴰⴳⵔⴰⴷⵏ 7 ⴷ 8 ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵍⵍⵉ ⵉⵙⵖⵣⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵎⵓⵏⵏⵉⵏ ⴳ 20 ⵏⵓⵡⴰⵏⴱⵉⵔ 1989.

ⴷⴼⴼⵉⵔ ⵏ ⵜⴰⴳⵉⵜ ⵓⵔ ⵉⵜⵜⵓⵎⵔⴰⵙⵏ ⴷ ⵓⵔ ⵉⴳⵉⵏ ⵜⵓⵍⴳⵉⵏⵜ ⵏ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ , ⵎⴰⵙⵙ ⵄⴰⴱⴷⵍⵡⴰⴼⵉ ⵍⴼⵜⵉⵜ, ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴽⴽⵉⵍ ⵏⵏⵙ ⵜⵉⴼⵉⵏⴰⵖ, ⴳ ⵜⴽⵕⴹⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⵉⵙⵖⵣⵏ ⵓⵙⵇⵇⵉⵎ ⴰⵎⵖⵔⵉⴱ ⵏ ⵉⵎⴰⵡⵙⴰⵙⵏ,  ⵉⵙⵖⵣⵏ ⴳ 11 ⴱⵕⴰⵢⵕ ⵉⵣⵔⵉⵏ ⵢⴰⵜ ⵜⵎⵢⴰⵇⵇⴰⵏⵜ ⵜⴰⵙⵉⵏⵔⴰⵏⵜ ⴷ ⵜⵎⵙⵇⵇⴰⴷⵜ ⵏ ⵜⵏⴱⴰⴹⵜ ⵏ ⴼⵕⴰⵏⵚⴰ ⵉ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵜⵙⴽⵔ ⵣⵓⵏ ⵉⵖ ⵓⵔ ⵜⴳⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴷ ⵜⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.  ⵎⵇⵇⴰⵔ ⴰⴷ ⵏⵓⵣⵏ ⵙⵏⴰⵜ ⵜⴱⵔⴰⵜⵉⵏ ⵉ ⵎⴰⵙⵙⴰ ⵀⵉⵍⵉⵏ ⵍⵓⴳⴰⵍ ⴰⵙⵙ ⵏ 10 ⴷⵓⵊⴰⵏⴱⵉⵔ 2019 ⴷ 2020, ⴷ ⵓⵎⴰⵡⵙⴰⵙ ⵏ ⵓⵕⵓⴱⴱⴰ ⵉ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵎⴰⵙⵙ ⵊⵓⵏ ⵢⵉⴼ ⵍⴻⴷⵔⵉⵢⴰⵏ, ⵖⵎⴽ ⴰⵏⵏ ⴷ ⵓⵏⵙⵙⵉⵅⴼ   ⵣⵣⵉⴳⵣⵏ ⴳ ⵓⵜⵜⵓ ⵏ ⵡⴰⵜⵉⴳ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴳ ⵜⵎⵢⴰⵇⵇⴰⵏⵉⵏ ⵜⵉⵙⵉⵏⵔⴰⵏⵉⵏ, ⵜⵜⵓⵏ ⵓⵍⴰ ⵉⵙⵖⵍⴰⴼ ⵏ ⵓⵙⵏⵉⵍⵙ ⴰⵎⵇⵔⴰⵏ ⴰⵍⴰⵏ ⴱⵏⵟⵓⵍⵉⵍⴰ ⵍⵍⵉ ⵉⵏⵏⴰⵏ ⴳ ⵜⵉⵏⴰⵡⵜ ⵏⵏⵙ ⵏ 15 ⵏⵓⵡⴰⵏⴱⵉⵔ 2019 ⴳ ⴱⴰⵔⵉⵣ ⴳ ⵓⴳⵔⴰⵡ ⵏ ⵉⵎⴰⵡⵙⴰⵙⵏ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ ⵏ ⵜⴼⵕⴰⵏⴽⵓⴼⵓⵏⵉⵜ ⴳ ⵏⵉⵜ ⵉⵍⵍⴰ ⵍⵎⵖⵔⵉⴱ:” ⵡⴰⵅⵅⴰ ⵏⵉⵜ ⵖⵍⴰⵏ ⵉⵏⴳⵔⴰⵡⵏ ⵉⵙⴳⵡⴰⵏⵏ ⵏ ⴽⵔⴰ ⵏ ⵉⵡⴰⵏⴽⵏ, ⴳⴰⵏ ⴰⴽⴽⵯ ⵉⵎⴰⵙⵙⵏ ⵏ ⵓⵙⴽⵔ ⵏ ⵜⵄⴰⵎⵉⵜ ⴷ ⵡⴰⵔⴰⵎⵓⵔⵙ ⴰⵏⵎⵍⴰⵏ, ⴰⵛⴽⵓ ⵓⵔ ⵔⵉⵏ ⴰⴷ ⴼⵓⴽⴽⵓⵏ ⵜⵉⵎⵓⴽⵔⵉⵙⵉⵏ ⵍⵍⵉ ⵜⵏ ⵉⵙⴽⴰⵟⵟⴰⵢⵏ (ⵏⵖⴷ ⵉⵙ ⵓⵔ ⵔⵉⵏ): ⵜⵉⵏ ⵓⵙⵜⴰⵢ ⵏ ⵜⵓⵜⵍⴰⵢⵜ ⵏ ⵓⵙⵍⵎⴷ. ⴰⵔ ⵜⵜⴰⵡⵉⵏ ⵉⵏⵍⵎⴰⴷⵏ ⵙ ⵡⴰⵔⴰⵎⵓⵔⵙ ⵉⵀⵔⵛⵏ ⴰⵛⴽⵓ ⴰⵔ ⴰⵙⵏ ⵜⴰⴽⴽⴰ ⵜⵉⵏⵎⵍ ⵢⴰⵜ ⵜⵓⵜⵍⴰⵢⵜ ⵍⵍⵉ ⴰⵙⵏ ⵓⵔ ⵎⵍⵍⴰⵏⵜ ⵉⵎⵎⴰⵜⵜⵙⵏⵜ, ⵉⴳ ⵎⴰⴷ ⵉ ⵢⴰⵏ ⵡⴰⵔⵔⴰⵡ ⵢⴰⵜ ⴷⴷⴰⴼⵓⵏⵉⵢⵢⴰ ⵓⵔ ⵉⵍⵉⵏ ⴰⵎⵙⵓⵔⵓⵔⵓⴼ….ⵙ ⵜⵓⵜⵍⴰⵢⵜ ⵏⵏⵙⵏ ⵜⴰⵢⵎⵎⴰⵜ ⴰⵙ ⵔⴰⴷ ⴰⵙⵏ ⵏⴼⴽ ⴰⵣⵎⵣⵣⵓ ⴰⴷ ⵖⵔⵉⵏ ⴷ ⴰⵔⴰⵏ, ⴷ ⵓⵍⵎⵎⵓⴷ ⵉⵥⵉⵍⵏ ⵏ ⵜⵓⵜⵍⴰⵢⵉⵏ ⵜⵓⵏⵚⵉⴱⵉⵏ”. ⵙ ⵖⵎⴽ ⴰⴷ, ⵏⵥⴹⴰⵕ ⴰⴷ ⵏⵔⵎⵙ ⵓⴼⵓⵖ ⵙⴳ ⵜⵉⵏⵎⵍ ⵏ 3 ⵉⴷ ⵎⵍⵢⵓⵏ ⵏ ⵡⴰⵔⵔⴰⵡ ⴰⵎⵖⵔⵉⴱⵉ ⵏ ⵎⵔⵡⴰ ⵉⵙⴳⴳⵯⴰⵙⵏ, ⵙ ⴰⵢⵍⵍⵉ ⵜⵏⵏⴰ ⵜⵙⵎⵉⵔⵉⵜ ⵜⴰⵎⴰⵜⵜⵓⵢⵜ ⵏ ⵓⵙⵖⵉⵡⵙ !

ⵍⵍⵉⵖ ⵇⵔⴱⵏ ⵉⵙⵜⴰⵢⵏ ⵉⵣⵣⵔⴰⴼⵏ, ⵉⵣⵎⵎⵉⵎ ⵎⴰⵙⵙ ⵙⴰⵄⵉⴷ ⴰⵎⵣⴰⵣⵉ ⴰⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⵢⴰⵏ ⵓⵎⵙⴰⵛⴽⴰ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉ ⵓⵙⵎⵓⵜⴳ ⵏ 400 ⵏ ⵓⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴽⵔⴰⵢⴳⴰⵜ ⴰⵙⴳⴳⵯⴰⵙ ⵃⵎⴰ ⴰⴷ ⵏⵍⴽⵎ ⴰⵡⵜⵜⴰⵙ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⴰⴷ ⵙ 2026. ⵖⴰⵙ ⵉ ⵓⵙⵡⵉⵔ ⴰⵎⵣⵡⴰⵔⵓ ⵏ ⵜⴼⵔⴽⴰ ⵜⴰⵎⵣⵡⴰⵔⵓⵜ , ⵅⴰⵚⵚⵏ ⵎⴰⴷ ⵓⵔ ⵉⴷⵔⵓⵙⵏ ⴼ 5000 ⵏ ⵓⵙⵍⵎⴰⴷ ⵏ ⵜⵎⴰⵣⵉⵖⵜ, ⴰⵢⵍⵍⵉ ⵉⵙⵖⴰⵡⵙⴰⵏ ⵙ ⵜⵉⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⵉ ⵓⵙⵎⵓⵜⴳ ⵏ ⵎⴰⴷ ⴷ ⵉⵖⴰⵎⴰⵏ  ⴳ ⵉⵙⴳⴳⵯⴰⵙⵏ ⵏ ⵜⴼⵔⴽⴰ ⵜⴰⵎⵣⵡⴰⵔⵓⵜ, ⴰⵢⵍⵍⵉ ⵉⴳⴰⵏ 100.000 ⵏ ⵓⵙⵍⵎⴰⴷ, ⵅⴰⵚⵚⴰⵏⵜ ⴰⵖ ⵜⵉⵎⵉⴹⵉⵏⵡⵉⵏ ⵏ ⵉⵙⴳⴳⵯⴰⵙⵏ!!!

ⵎⴰⵙⵙⴰ ⵜⴰⵎⵏⵀⴰⵍⵜ ⵜⴰⵎⴰⵜⴰⵢⵜ,

ⴷⴰ ⵏⵙⵙⵉⵎⵖⵓⵔ ⵜⴰⵖⵜⴰⵙⵜ ⵏⵏⵓⵏ ⵜⵓⵏⵥⵉⵥⵜ ⵍⵍⵉ ⵜⵃⵉⵢⵢⴷⵜ ⵜⴰⴳⵏⵙⴰⵙⵜ ⵏ ⵢⵓⵏⵉⵙⴽⵓ ⴳ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⵜⴰⵍⵉⴱⴰⵏⵉⵜ ⵎⴰⵙⵙ ⴳⵓⵍⴷⴰ ⵍⵅⵓⵔⵉ, ⵍⵍⵉ ⵓⵔ ⵉⵔⵉⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵉⵎⵖⵔⵉⴱⵉⵢⵏ, ⴰⵎ ⴰⵎⵏⵀⴰⵍ ⵏ ⵓⵙⴰⵔⵓ ⵏ ⴼⵕⴰⵏⵚ24 ⵎⴰⵔⴽ ⵙⴰⵢⴽⴰⵍⵉ? ⴰⵎ ⵉⵏⵎⵓⵔⴰⵏ ⵏ ⵜⵎⵉⵣⴰⵔ ⵏ ⵍⵅⴰⵍⵉⵊ, ⵄⵎⴰⵏⵜ ⵜⵎⵏⵜⵍⵉⵏ ⵜⵉⴷⵢⵓⵍⵓⵊⵉⵢⵉⵏ ⵎⴰⵙⵙⴰ ⵍⵅⵓⵔⵉ ⴷ ⵎⴰⵙⵙ ⵙⴰⵢⴽⴰⵍⵉ ⵍⵍⵉ ⵜⵜⵉⵏⵉⵏ ⵉⵙ ⵓⵔ ⴳⵉⵏ ⵉⵎⵖⵔⵉⴱⵉⵢⵏ “ⴰⵄⵔⴰⴱⵏ ⴷⵓⵙⵏⵉⵏ”! ⵓⵔ ⵔⵉⵏ ⴰⴷ ⵙⵙⵏⵏ, ⴰⵎ ⵉⵎⵙⵔⵜⴰⵏⵏ ⵉⴼⵕⴰⵏⵚⴰⵡⵉⵢⵏ  ⴷ ⵓⵏⵙⵙⵉⵅⴼ ⴰⵡⴷ ⵏⵜⵜⴰⵏ, ⵎⴰⵙⴷ ⵉⵎⵖⵔⵉⴱⵉⵢⵏ ⵓⵍⴰ ⴰⵢⵜ ⵉⵥⵍⵎⴹ ⵏ ⵉⴼⵔⵉⵇⵢⴰ ⵓⵔ ⴳⵉⵏ ⴰⵄⵔⴰⴱⵏ ⴷⵓⵙⵏⵉⵏ ⵓⵍⴰ ⵡⵉⴷⴰ ⵓⵔ ⴷⵓⵙⵏⵉⵏ, ⴰⵛⴽⵓ ⵓⵔ ⴰⴽⴽⵯ ⴳⵉⵏ ⴰⵄⵕⴰⴱⵏ !

ⴳ ⵜⴳⵉⵔⴰ, ⵏⵔⴰ ⴰⴷ ⵜⴳⵜ ⴰⵎ ⴱⴰⴱⴰⵎ, ⵏⵔⴰ ⴰⴷ ⴷⴰⵔⵎ ⵢⵉⵍⵉ ⵡⴰⴷⴷⵓⵔ ⴰⴷ ⵜⵉⵍⵉⵜ ⴳ ⵜⵎⴰⴳⵉⵜ ⵜⴰⵎⴰⵣⵉⵖⵜ, ⵜⴳⵜ ⵏⵏ ⵜⵓⴳⴳⴰⵙ ⵃⵎⴰ ⴰⴷ ⵜⵇⴷⴷⵛⵜ ⵜⴰⵢⵎⵓⵏⵜ ⵜⴰⵙⵔⵜⴰⵏⵜ ⵙⵍⵡⴰⵏ ⴰⴽⴽⵯ ⵉⵎⵙⵜⴳⴳⴰⵔⵏ ⵉⵙⴳⵓⵎⴰⵏⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⴼⵕⴰⵏⵚⴰ ⵙ ⵡⴰⵜⵉⴳ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ. ⴷ ⴰⴷ ⵙⵙⵏⵏ ⵎⴰⵙ ⴷ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⴷ ⵉⵡⴰⵏⴽⵏ ⵏ ⵜⵎⴰⵣⵖⴰ ⴷ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵍⵍⴰⵏⵉⵏ ⴳ ⴼⵕⴰⵏⵚⴰ ⵍⵍⵉ ⵏⵏ ⴽⴽⴰⵏⵉⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⵓⵔ ⵜⵜ ⵜⴳⵉ ⵜⵓⵜⵍⴰⵢⵜ ⵜⴰⵄⵔⴰⴱⵜ ⴰⵜⵇⴱⵓⵔⵜ, ⵜⴳⴰ ⵜⵜ ⵜⵎⴰⵣⵉⵖⵜ ( ⴷ ⴷⴷⴰⵔⵉⵊⵉ ⵙ ⵉⵎⵉⴽⴽ) .

ⵏⴻⵏⵏⵓⵔⵣ ⴰⴷ ⴷⴰⵔⵎ ⵢⵉⵍⵉ ⵓⵅⵎⵎⴻⵎ ⵙ ⵜⵖⴰⵔⴰⵙⵜ ⵉⴼⵔⴽⵏ ⴳ ⵜⵎⵓⴽⵔⵉⵙⵉⵏ ⴰⴷ ⵜⵓⵍⴳⵉⵏⵉⵏ, ⵍⵍⵉ ⵍⵍⴰⵏⵉⵏ ⴳ ⵜⵎⵔⴰⵡⵜ ⵜⴰⴱⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵜⵉⵎⵣⵡⵓⵔⴰ (2022-2032) ⵍⵍⵉ ⵔⴰⴷ ⵜⵕⵣⵎⵎ ⴳ 2022.

ⴰⵔ ⴰⵎ ⵏⵜⵜⵉⵏ, ⵎⴰⵙⵙⴰ ⴰⵥⵓⵍⴰⵢ, ⵉⵣⵓⵍⵏ ⵏⵏⵖ ⵅⴰⵜⵔⵏⵉⵏ.

ⵕⴰⵛⵉⴷ ⵕⴰⵅⴰ

ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ