ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⵙⵏⵖⵎⵙ ⴰⵎⴰⵣⵉⵖ ⴷⴰⵔⵙ ⴰⵎⵣⵔⵓⵢ ⴱⴰⵀⵔⴰ ⵢⴰⵜⵜⵓⵢⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵍⵍⴰⵏⵜ ⵜⵓⴳⵜⵜ ⵏ ⵜⵖⵎⵎⵉⵙⵉⵏ ⴷ ⵜⵙⵖⵓⵏⵉⵏ ⵙⴳ ⵓⵣⵎⵣ ⴰⵇⵇⴱⵓⵔ ⵏⵏⴰ ⵉⵏⵣⵣⵖⵏ ⵅⴼ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⵜⵉⵎⴰⵣⵉⵖⵉⵏ,ⵔⴰⴷ ⵙⴽⵔⵖ ⵢⴰⵜ ⵜⴰⵏⵏⴰⵢⵜ ⵜⴰⵎⴰⵜⴰⵢⵜ ⴼ ⵓⵙⵏⵖⵎⵙ ⴰⵎⴰⵣⵉⵖ ⵙⴳ ⵓⵙⵏⵜⵉ ⵏⵏⵙ ⴰⵔ ⴰⵙⵙ ⴰⴷ ,ⴰⴼⴰⴷ ⴰⴷ ⵜ ⵉⵙⵙⴰⵏⴻⵏⵉⵎⴹⴼⵕⵏ ⴷ ⵉⵎⵙⵜⴳⴳⴰⵔⵏ ⴷ ⵉⵎⴰⵔⴰⵜⵏ ⴰⴽⴽⵯ ⵓⵍⴰ ⵉⵏⵖⵎⴰⵙⵏ ⵏⵏⴰⵉⵙⵜⴰⵡⵀⵎⵎⴰⵏ ⵙ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ,ⵙⴳ ⵜⵙⵖⵓⵏⵉⵏ ⴷ ⵜⵖⵎⵎⵉⵙⵉⵏ ⵏⵏⴰ ⵉⵙⵙⵍⴽⵎⵏ ⴰⵖⵉⵢⵢⵉ ⴷⵓⵙⵡⵉⵏⴳⵎ ⵏ ⵓⴼⴳⴰⵏ ⴰⵎⴰⵣⵉⵖ ⵏⵏⴰ ⵉⵜⵜⵉⴷⵉⵔⵏ ⵜⴰⴽⵔⵔⴰⵢⵜ ⴷ ⵓⴱⴽⴽⵉⴹ ⵉⴷⵔⴰⵏ ⵎⵏⵉⴷ ⵏ ⵉⵎⵙⵜⴳⴳⴰⵔⵏ ⴷⵉⵏⴱⴱⴰⴹⵏ, ⵓⵔⵜⴰ ⵉⵍⵍⵉ ⵓⵙⵏⵚⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵔ ⵖⵉⵍⴰⴷ ⵍⵍⵉⵖ ⵜⴳⴰ ⵜⵓⵜⵍⴰⵢⵜ ⵜⵓⵏⵚⵉⴱⵜ ⴳ ⵜⵎⵏⴹⴰⵡⵜ ⵏ ⵍⵎⵖⵔⵉⴱ .
ⵜⵉⵙⵖⵓⵏⵉⵏ ⵜⵉⵎⴰⵣⵉⵖⵉⵏ :
1- ⵜⴰⵙⵖⵓⵏⵜ « ⵜⵉⴼⴰⵡⵜ »
ⵜⴽⴽⴰ ⵜⵜ ⵉⵏⵏ ⵜⵙⵖⵓⵏⵜ ⴰⴷ ⴰⵔ ⴷ ⵜⵜⴼⴼⴰⵖ ⵙⴳ ⵜⵖⵔⵎⵜ ⵏ ⴰⵎⴽⵏⴰⵙ ⴷⴷⵓ ⵓⵜⵓⵢ ⵏ ⵜⵓⴳⵜⵜ ⵏ ⵉⵏⵎⵎⴰⵙⵙⵓⵜⵏ ⵉⵎⴰⵣⵉⵖⵏ ⵙ ⵜⵣⵎⵎⴰⵔ ⵏⵏⵙ ⵉⵥⵍⵉⵏ ⵙⴳ ⵓⵙⴳⴳⴰⵙ ⵏ 1993 ⵙⴳ ⴳⵉⵙⵏ ⵎⴰⵙⵙ ⵎⵓⵃⵎⵎⴰⴷ ⴰⵊⵄⵊⴰⵄ ⵏⵏⴰ ⵉⴳⴰⵏ ⴰⵎⵏⵀⴰⵍ ⴰⵎⵙⵜⴳⴳⴰⵔ ⵏ ⵜⵙⵖⵓⵏⵜ ⴰⴷ ,ⵣⴹⴰⵕⵏ ⴰⴷ ⵙⵙⴼⴰⵖⵏ 11 ⵏ ⵓⵟⵟⵓⵏ ,ⵜⵙⵜⴰⵡⵀⵎⵎⴰ ⵜⵙⵖⵓⵏⵜ ⴰⴷ ⵙ ⵜⴷⵍⵙⴰ ⴷ ⵜⵓⵜⵍⴰⵢⵜ ⵜⵉⵎⴰⵣⵉⵖⵉⵏ,ⴰⵔ ⵜⵜⵓⵙⴽⴰⵔ ⵙ ⴽⵕⴰⴹⵜ ⵏ ⵜⵓⵜⵍⴰⵢⵉⵏ : ⵜⴰⵎⴰⵣⵉⵖⵜ ⴷ ⵜⵄⵕⴰⴱⵜ ⴷ ⵜⴼⵕⴰⵏⵙⵉⵙⵜ.
ⴰⵔ ⴰⴽⴽⵯ ⵜⵣⵓⵣⵣⵓⵔ ⵜⵙⵖⵓⵏⵜ ⴰⴷ ⵉⵏⵖⵎⵉⵙⵏ ⵏⵏⴰ ⵉⵣⴷⵉⵏ ⴷ ⵜⴷⵍⵙⴰ ⴷ ⵜⵙⵔⵜⵉⵜ ⴷ ⵡⴰⵎⵓⵏ ⴰⵎⴰⵣⵉⵖ …
2 – ⵜⴰⵙⵖⵓⵏⵜ « ⵜⵉⴼⵉⵏⴰⵖ »
ⵜⴳⴰ ⵜⵙⵖⵓⵏⵜ ⴰⴷ ⵜⴰⵍⵍⵉ ⵉⵜⵜⵢⴰⵔⴰⵏ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵙⵉⵙⵜ ⵙⴳ ⵓⵙⴳⴳⵯⴰⵙ ⵏ 1992 ⵜⵙⵜⴰⵡⵀⵎⵎⴰ ⴰⵡⴷ ⵏⵜⵜⴰⵜ ⵙ ⵜⴷⵍⵙⴰ ⴷ ⵜⵖⵔⵎⴰ ⴳ ⵉ ⵉⵣⵣⵍⵎⴹ ⵏ ⵉⴼⵔⵉⵇⵢⴰ,ⵜⵣⴹⴰⵕ ⵜⵙⵖⵓⵏⵜ ⴰⴷ ⴰⴷ ⵜⵙⵙⵍⴽⵎ ⵉ ⵉⵎⵖⵔⵉ ⵜⵓⴳⵜⵜ ⵏ ⵜⵓⵎⵍⴰⵢⵉⵏ ⵅⴼ ⵜⴰⵢⵙⵉ ⴷ ⵜⵓⵙⵙⵏⴰ ⵜⵉⵎⴰⵣⵉⵖⵉⵏ .
ⵓⵔ ⵙⵓⵍ ⵜⵙⵓⵍ ⵜⵙⵖⵓⵏⵜ ⴰⴷ ⵖⵉⵍⴰⴷ ⵙ ⵉⵙⵔⴰⴳⵏ ⵏⵜⵍⵏⵉⵏ ,ⵉⵖⵉ ⴰⴷ ⵉⴳ ⵡⴰⵏⵏⴰⵍ ⴰⴷⵔⵉⵎⴰⵏ ⵏⵏⴰ ⵓⵔ ⵉⵍⵍⵉⵏ ⵢⴰⵏ ⵙⴳ ⵉⵙⵔⴰⴳⵏ ⴰⴷ ,ⵉⴳⴰ ⵎⴰⵙⵙ ⵓⵣⵣⵉⵏ ⴰⵃⵕⴹⴰⵏ ⴰⵎⵙⵜⴳⴳⴰⵔ ⵏⵏⴰ ⵉⴱⵉⴷⴷⵏ ⵅⴼ ⵓⵙⴽⵓ ⵏⵏⵙ .
ⵜⴱⵓⵖⵍⴰ ⴱⴰⵀⵔⴰ ⵜⵙⵖⵓⵏⵜ ⴰⴷ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵍⴽⵎ ⵡⴰⵢⵏⵉⵏ ⵏ ⵜⵏⴼⵓⵍⵉⵏ ⵏ ⵢⴰⵏ ⵓⵟⵟⵓⵏ ⴳⵉⵙ 140 ⵏ ⵜⵏⴼⵓⵍⵜ ⵙ ⵢⴰⵏ ⵓⵙⵙⵓⴼⵖ ⵉⵀⵉⵢⵢⴰⵏ ,ⵜⵖⵉ ⴰⴷ ⵜⵍⴽⵎ ⵜⵓⴳⵜⵜ ⵏ ⵉⴳⴰⴷⴰⵣⵏ ⴳ ⵉⵣⵣⵍⵎⴷ ⵏ ⵉⴼⵔⵉⵇⵢⴰ ⴷ ⵓⵕⵓⴱⴱⴰ ,ⴰⵔ ⴳⵉⵙ ⵜⵜⴰⵔⴰⵏ ⵉⵎⴰⵔⴰⵜⵏ ⵏⵏⴰ ⴰⴽⴽⵯ ⵉⵍⵍⴰⵏ ⴳ ⵡⴰⴽⴰⵍ ⵏ ⵜⵎⴰⵣⵖⴰ .
3 – ⵜⴰⵙⵖⵓⵏⵜ « ⴰⵎⴰⵣⵉⵖ »
ⵜⴰⵙⵖⵓⵏⵜ »ⴰⵎⴰⵣⵉⵖ » ⵜⴳⴰ ⵢⴰⵜ ⵜⵙⵖⵓⵏⵜ ⵏⵏⴰ ⵎⵓ ⵉⵜⵜⵓⵙⴱⵉⴷⴷ ⵓⵎⵓⵙⵙⵓ ⵏⵏⵙ ⴰⵖⵎⵙⴰⵏ ⵙⴳ ⵍⵍⵉⵖ ⵜⵜⴰⵡⵙⴽⴰⵔ ⴳ ⵓⵙⴳⴳⵯⴰⵙ ⵏ 1982 ⴷⴼⴼⵉⵔ ⵏ ⵓⴼⵓⵖ ⵏ ⵓⵟⵟⵓⵏ ⵏⵏⵙ ⴰⵎⵣⵡⴰⵔⵓ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ,ⵍⵍⵉⵖ ⵢⴰⴷ ⴰⴷⵍⵍⵉ ⴼⴼⵓⵖⵏ 6 ⵏ ⵓⵟⵟⵓⵏⵏ ⴳⵉⵙ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵙⵉⵙⵜ , ⵜⵙⵜⵉ ⵜⵙⵖⵓⵏⵜ ⴰⴷ ⵉⵙⵏⵜⴰⵍ ⵏ ⵓⵎⵣⵔⵓⵢ ⴷ ⵜⵖⵔⵎⴰ ⴰⴼⴰⴷ ⴰⴷ ⴳⵉⵙⵏ ⵜⴻⵜⵜⴰⵔⴰ, ⴰⵎⵙⵜⴳⴳⴰⵔ ⵏⵏⵙ ⵉⴳⴰ ⵜ ⵎⴰⵙⵙ ⵓⵣⵣⵉⵏ ⴰⵃⵕⴹⴰⵏ .
ⵜⵜⵢⴰⵎⴰⵥⵏ ⵉⵎⴰⵔⴰⵜⵏ ⵏⵏⴰ ⵓⵔⴰⵏⵉⵄⵏ ⴳ ⵓⵟⵟⵓⵏ ⵏⵏⵙ ⴰⵎⴳⴳⴰⵔⵓ ⵏⵏⴰ ⵉⵜⵜⵓⵙⴽⴰⵔⵏ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵙⴳ ⴳⵉⵙⵏ ⵄⵍⵉ ⵙⵉⴷⵇⵉ ⴰⵣⴰⵢⴽⵓ ⵙ ⵓⵎⴰⴳⵔⴰⴷ ⵏⵏⵙ « ” في سبيل مفهوم حقيقي لثقافتنا الوطنية”
« ⵙ ⵓⵙⴳⴳⵯⴰⵙ ⵏ ⵓⴱⵏⵉⵇ,ⵜⵙⵙⴷⵔⴰ ⵜⵙⵖⵓⵏⵜ ⴰⴷⵉⵙⵇⵇⵙⵉⵜⵏ ⵏ ⵓⴼⵔⴰⴽ ⵙ ⵜⵎⴰⴳⵉⵜ ⴷ ⵓⴼⵔⴰⴽ ⵙ ⵉⵎⴰⵏ ⴷ ⵜⴷⵍⵙⴰ ⵜⴰⵏⴰⵎⵓⵔⵜ ,ⵜⵣⴹⴰⵕ ⴰⵡⴷ ⴰⴷ ⵜⵙⴰⵣⵣⴹ ⴰⵙⴽⴽⵉⵍ ⵏ ⵜⴼⵉⵏⴰⵖ ⵉ ⵜⵓⴳⵜⵜ ⵏ ⵎⵉⴷⴷⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵍⵍⴰⵏ ⴳ ⵓⴷⵎ ⴰⵎⵣⵡⴰⵔⵓ ⵏ ⵜⵙⵖⵓⵏⵜ ⴰⴷ .
ⵉⵖⵎⵎⵉⵙⵏ ⵏ ⵜⵎⴰⵣⵉⵖⵜ :
1 – ⴰⵖⵎⵉⵙ « ⵜⴰⵎⴰⴳⵉⵜ »
ⵜⵙⵙⵏⵜⴰ « ⵜⴰⵎⴰⴳⵉⵜ » ⴳ ⵜⵣⵡⵉⵔⵉ ⵙ ⵜⵙⵖⵓⵏⵜ ⵏⵏⴰ ⵉⵏⵏⵓⵕⵥⵎⵏ ⵉ ⴽⵓⵍⵍⵓ ⵉⵙⵏⴼⵍⵓⵍⵏ ⵏ ⵜⵉⵔⵔⴰ ⵉ ⵉⵡⴷⴰⵏ ⴰⴽⴽⵯ,ⴰⵔ ⵜⵜⵓⵥⵕⵉⴳ ⵢⴰⵜ ⵜⵉⴽⴽⵍⵜ ⴳ ⵡⴰⵢⵢⵓⵔ ⴰⵢⵍⵍⵉⵖ ⵜⵏⴼⵍ ⵜⴳ ⴰⵖⵎⵉⵙ. ⵜⴼⴼⴰⵖⴷ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ ⴰⵙⴳⴳⵯⴰⵙ ⵏ 1993 ⵜⵙⵜⴰⵡⵀⵎⵎⴰ ⴰⵡⴷ ⵏⵜⵜⴰⵜ ⵙ ⵜⵎⴰⴳⵉⵜ ⵜⴰⵎⴰⵣⵉⵖⵜ,ⴰⵙⵙⴰⵖ ⵏⵏⵙ ⵉⵙⵜⵉⵜ ⵓⵎⵏⵀⴰⵍ ⵏⵏⵙ ⵎⴰⵙⵙ ⵎⴱⴰⵕⴽ ⴱⵓⵍⴳⵉⴷ ⵏⵏⴰ ⵉⴳⴰⵏ ⴰⵎⵙⵜⴳⴳⴰⵔ ⵏ ⵓⵖⵎⵉⵙ ⴰⴷ ⴰⵎⴰⵣⵉⵖ ⵏⵏⴰ ⵜⵜ ⵉⵏⵏ ⵉⴽⴽⴰⵏ ⴰⵔⴷ ⵉⵜⵜⴼⴼⴰⵖ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵙⴳ ⵜⵖⵔⵎⵜ ⵏ ⵓⴳⴰⴷⵉⵔ,ⵎⴰⵛ ⵜⴱⵉⴷⴷ ⴳ ⵜⵥⵕⵉⴳⵉⵏ ⵏⵙⵏ ⵙ ⵉⵙⵔⴰⴳⵏ ⵉⴷⵔⵉⵎⴰⵏⵏ ⴷ ⵡⵉⵢⵢⴰⴹ
2 – ⵜⴰⵖⵎⵎⵉⵙⵜ « ⵜⴰⵎⵓⵏⵜ »
ⴰⵖⵎⵉⵙ ⴰⴷ ⵜⵙⴽⵔⵜ ⵜⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵏ ⵓⵙⵉⴳⴳⵍ ⴷ ⵓⵙⵏⴼⵍ ⵏ ⵜⵓⵙⵙⵏⴰ ⴳ ⵓⵙⴳⴳⵯⴰⵙ ⵏ 1992, ⴰⴼⴰⴷ ⴰⴷ ⵜⵙⵓⵙⵙⵏ ⵙ ⵉⵎⵓⵙⵙⵓⵜⵏ ⵏ ⵜⵎⵙⵎⵓⵏⵜ ⵏⵏⴰ ⵉⴳⴰⵏ ⵙⴳ ⵜⵎⵙⵎⵓⵏⵉⵏ ⵜⵉⵎⵣⵡⵓⵔⴰ ⵏⵏⴰ ⵉⵜⵜⵓⵙⴽⴰⵔⵏ ⴳ ⵓⵙⴳⴳⵯⴰⵙ ⵏ 1967, ⴷ ⴰⴼⴰⴷ ⴰⴷ ⵜⵕⵥⵎ ⴰⵎⵔⴰⵔⴰ ⵏ ⵡⴰⵡⴰⵍ ⵅⴼ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ, ⴰⵔ ⵜⵜⵢⴰⵔⴰ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⴽⵔⴰ ⵏ ⵜⵉⵔⵔⴰ ⵢⴰⴹⵏ ⵙ ⵜⵎⴰⵣⵉⵖⵜ ⵙ ⵓⵙⴽⴽⵉⵍ ⴰⵕⴰⵎⵉ ⴳ ⵜⵍⵍⴰ ⵜⵎⴷⵢⴰⵣⵜ ⴷ ⵜⵓⵍⵍⵉⵙⵉⵏ .. ⵎⴰⵛ ⴰⵡⴷ ⴰⵖⵎⵉⵙ ⴰⴷ ⵉⴱⵉⴷ ⴳ ⵜⵥⵕⵉⴳⵉⵏ ⵏⵏⵙ ⵙ ⵉⵙⵔⴰⴳⵏ ⵓⵔ ⵜⵜⴰⵡⵙⵙⴰⵏⵏⵉⵏ .
3 – ⵜⴰⵖⵎⵎⵉⵙⵜ « ⵜⴰⵙⴰⴼⵓⵜ »
ⵉⴳⴰ ⵓⵖⵎⵉⵙ ⴰⴷ ⴰⵡⴰⵍ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⴰⴽⵓⴷ ⴰⵏⵏ ⵏⵏⴰ ⵉⴳⴰⵏ ⵜⴰⵎⵙⵎⵓⵏⵜ ⵜⴰⵎⴰⵢⵏⵓⵜ ⵉ ⵜⴷⵍⵙⴰ ⴷ ⵜⵥⵓⵕⵉⵡⵉⵏ ⵜⵉⵏⴰⵎⵓⵏⵉⵏ, ⵏⵏⴰ ⵉⵜⵜⵓⵙⴽⴰⵔⵏ ⴳ ⵓⵙⴳⴳⵯⴰⵙ ⵏ 1978 , ⵜⴳⴰ ⵜⴰⵎⵙⵎⵓⵏⵜ ⵜⴰⵎⴰⵣⵉⵖⵜ ⵜⵉⵙⵙ ⵙⵏⴰⵜ ,ⴷⴰⵔⵙ ⵢⴰⵏ ⵡⴰⵜⵉⴳ ⴰⵎⴰⴷⴷⵓⴷ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵎⴰⴹⵍⴰⵏ, ⵜⴰⵙⴰⴼⵓⵜ ⵙⴳ ⵍⵍⵉⵖ ⵜⵜⵓⵙⴽⴰⵔ ⴳ ⵓⵙⴳⴳⵯⴰⵙ ⵏ 1991 ⴰⵔ ⵜⵙⴽⴰⵔ ⴰⵙⵓⵙⵙⵏ ⵉ ⵜⵡⵡⵓⵔⵉⵡⵉⵏ ⴷ ⵉⵎⵓⵙⵙⵓⵜⵏ ⵏ ⵜⵎⵙⵎⵓⵏⵜ ⵜⴰⵎⴰⵢⵏⵓⵜ,ⵎⴽⵍⵍⵉ ⵜⵕⵥⵎ ⵜⴰⴳⴳⵓⵔⵜ ⵉ ⵜⵓⴳⵜⵜ ⵏ ⵉⵎⴰⵔⴰⵜⵏ ⵉⵎⴰⵣⵉⵖⵏ ⴰⴼⴰⴷ ⴰⴷ ⴳⵉⵙ ⵜⵜⴰⵔⴰⵏ ⵉⵙⵡⵉⵏⴳⵉⵎⵏ ⵏⵏⵙⵏ ,ⵜⵣⴹⴰⵕ ⵜⵖⵎⵎⵉⵙⵜ ⴰⴷ ⴰⴷ ⵜⵏⵣⵖ ⵅⴼ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ ⵙ ⵜⵖⴰⵔⴰⵜ ⵏ ⵜⵉⵔⵔⴰ ,ⵜⴽⴽⴰ ⵜⵜ ⵉⵏⵏ ⴰⵔ ⵜⵜⵢⴰⵔⴰ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵙⵉⵙⵜ ⴷ ⵜⵄⵕⴰⴱⵜ ⴷ ⵜⵎⴰⵣⵉⵖⵜ ,ⴰⴷⴷⵓⵔ ⴰⵅⴰⵜⴰⵔ ⴳ ⵜⵡⵡⵓⵔⵉ ⴰⴷ ⵉⴳⴰ ⵡⵉⵏ ⵎⴰⵙⵙ ⴰⵎⵙⵜⴰⵏ ⵃⴰⵙⴰⵏ ⵉⴷⴱⵍⵇⴰⵙⵎ ⴷ ⵉⵎⵖⵏⴰⵙⵏ ⵢⴰⴹⵏⵉⵏ ⵣⵓⵏⴷ : ⵃⴰⵙⴰⵏ ⴰⵙⵎⵓⵏⵀⵓⵎ,ⴰⴼⵓⵍⴰⵢ,ⵉⵛⵛⵓ,ⵄⴱⴷⵓⵍⵍⴰⵀ ⵀⵉⵜⵜⵓⵙ,ⵎⵓⵏⵉⵔ ⴽⵊⵊⵉ,ⴱⵕⴰⵀⵉⵎ ⴱⴰⵡⵛ, ⴷ ⵡⵉⵢⵢⴰⴹ …
4 – ⵜⴰⵖⵎⵎⵉⵙⵜ « ⴰⵎⵣⴷⴰⵢ »
ⵉⴳⴰ ⵓⵖⵎⵉⵙ ⴰⴷ ⴰⵡⴰⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵎⵣⴷⴰⵢ ⴳⵔ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴳ ⵍⵎⵖⵔⵉⴱ, ⴰⵎⵙⵜⴳⴳⴰⵔ ⵏ ⵓⵖⵎⵉⵙ ⴰⴷ ⵉⴳⴰⵜ ⵉⴳⵍⵍⵉⵏ ⵏ ⵎⴰⵙⵙ ⴰⵎⵙⵜⴰⵏ ⵃⵎⴰⴷ ⴰⴷⵖⵉⵕⵏⵉ ⵜⴰⵎⵍⵍⴰ ⵏ ⴱⴰⴱ ⵏ ⵉⴳⵏⵡⴰⵏ ⴼⵍⵍⴰⵙ,ⵜⵜⵓⵙⴽⴰⵔ ⴳ ⵜⵖⵔⵎⵜ ⵏ ⵕⵕⴱⴰⵟ ⴰⵙⴳⴳⵯⴰⵙ ⵏ 1996 ⵜⵣⴹⴰⵕ ⴰⴷ ⵜⵙⴽⵔ ⴰⵙⵓⵙⵙⵏ ⵉ ⵜⵓⴳⵜⵜ ⵏ ⵉⵎⵓⵙⵙⵓⵜⵏ ⵏⴰⵏ ⵙⴽⴰⵔⵏⵜ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ,ⴷ ⵉⵎⵓⵙⵙⵓⵜⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵣⴷⴰⵢ ⴳⵔ ⵜⵎⵙⵎⵓⵏⵉⵏ ⴰⴷ ,ⵎⴰⵛ ⵜⴱⵉⴷ ⴳ ⵜⵥⵕⵉⴳⵉⵏ ⵏⵏⵙ ⵍⵍⵉⵖ ⵜⴱⵉⴷⴷ ⵜⵡⵡⵓⵔⵉ ⵏ ⵓⵙⵇⵇⵉⵎ ⴰⴷ .
5 – ⵜⴰⵖⵎⵎⵉⵙⵜ « ⵜⵉⴷⵎⵉ »
ⵜⴰⵖⵎⵎⵉⵙⵜ ⴰⴷ ⵜⴽⴽⴰ ⵜⵜ ⵉⵏⵏ ⴰⵔ ⵜⵜⵢⵓⵔⴰ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵙⵉⵙⵜ ⵙⴳ ⵓⵙⴳⴳⵯⴰⵙ ⵏ 1994 ⵙⴳ ⴷⴰⵔ ⵓⴽⴰⴱⴰⵕ ⵏ ⵓⵎⵓⵙⵙⵓ ⴰⵏⴰⵎⵓⵔ ⴰⵎⵓⵏⴰⵏ ,ⴷⴷⵓ ⵏ ⵓⵜⵓⵢ ⵏ ⵎⴰⵙⵙ ⵉⴳⵍⵍⵉⵏ ⵏ ⵍⵎⵃⵊⵓⴱ ⴰⵃⵕⴹⴰⵏ ,ⴰⵎⵙⵜⴳⴳⴰⵔ ⵏ ⵜⵉⵔⵔⴰ ⵉⴳⴰ ⵜ ⵎⴰⵙⵙ ⵎⵓⵃⴰ ⵎⵓⵅⵍⵉⵚ,ⵜⴽⴽⴰ ⵜⵜ ⵉⵏⵏ ⵜⵉⴷⵎⵉ ⴰⵔ ⵜⵙⴽⴰⵔ ⴰⵙⵓⵙⵙⵏ ⵉ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ , ⵜⵙⵓⵍ ⵜⵖⵎⵎⵉⵙⵜ ⴰⴷ ⴰⵔ ⴰⵙⴳⴳⵯⴰⵙ ⵏ 1996 ⵍⵍⵉⵖ ⵜⴱⴹⴰ ⵅⴼ ⵓⴽⴰⴱⴰⵕ ⵏⵏⵙ ⵎⴰ ⴰⵏⵏ ⴰⴷ ⴰⵙ ⵉⵙⴽⵔⵏ ⵜⵓⴳⵜⵜ ⵏ ⵉⵎⵓⴽⵔⵉⵙⵏ ⴳ ⵎⴰⴷ ⵉⵥⵍⵉⵏ ⵙ ⵓⵙⴼⵍⵙ ⴷ ⵡⴰⵏⵏⴰⵍ ⴰⴷⵔⵉⵎⴰⵏ , ⴰⵢⵍⵍⵉⵖ ⴰⴽⴽ ⴱⴷⴷⵏⵜ ⵜⵣⵕⵉⴳⵉⵏ ⵏⵏⵙ ⴰⴽⵓⴷ ⴰⵏⵏ ⵏⵉⵜ .
ⵜⵉⵡⵡⵓⵔⵉⵡⵉⵏ ⵏ ⵓⵖⵎⵎⵉⵙ ⴰⴷ ⵣⴹⴰⵕⵏⵜ ⴰⴷ ⵙⴽⵔⵏⵜ ⵢⴰⵏ ⵓⵙⵓⵙⵙⵏ ⵙ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ ,ⴰⵡⵙⵏⵜ ⵉ ⵜⵙⵖⵓⵏⵜ ⵏ « ⵜⵉⴼⵉⵏⴰⵖ » ⵏⵏⴰ ⵉⵙⴽⴰⵔⵏ ⴰⵡⵜⵜⴰⵙ ⴰⵏⵏ ⵏⵉⵜ .
6 – ⵜⴰⵖⵎⵎⵉⵙⵜ « ⵜⴰⵎⴰⵣⵉⵖⵜ »
ⴰⵖⵎⵎⵉⵙ ⴰⴷ ⵉⴽⴽⴰ ⵜⵜ ⵉⵏⵏ ⵉⵔⴰ ⴳⵉⵙ ⵉⴳⵍⵍⵉⵏ ⵏ ⵃⵎⴰⴷ ⴰⴷⵖⵉⵔⵏⵉ ⴰⴷ ⵢⴰⵡⵙ ⴳ ⵓⵙⴱⵓⵖⵍⵓ ⵏ ⵓⴱⵔⵉⴷ ⴰⴷⵍⵙⴰⵏ ⴰⵏⴰⵎⵓⵔ ⵙ ⵜⴰⵏⵏⴰⵢⵉⵏ ⴷ ⵉⵙⵡⵉⵏⴳⵉⵎⵏ ⵅⴼ ⵜⵖⵔⵎⴰ ⵜⴰⵎⴰⵣⵉⵖⵜ,ⵙⴳ ⵓⵙⴳⴳⵯⴰⵙ ⵏ 1998,ⵜⵖⵉ ⵜⵖⵎⵎⵉⵙⵜ ⴰⴷ ⴰⴷ ⵜⴷ ⵜⴰⵡⵡⵓⵔⴰⵏⵜ ⵙⴳ ⵍⵍⵉⵖ ⵜⵜⴰⵡⵙⴽⴰⵔ ⵍⵍⵉⵖ ⴳⵉⵙ ⵍⵍⴰⵏⵜ ⵓⴳⴳⴰⵔ ⵏ 15 ⵏ ⵜⴰⵙⵏⴰ,ⵜⵎⵎⴰⵜⵜⵉ ⵜⴳⴰ ⵉⵍⵙ ⵏ ⵓⴽⴰⴱⴰⵕ ⴰⴷⵉⵎⵓⵇⵕⴰⵜⵉ ⴰⵎⴰⵣⵉⵖ ,ⵜⵉⵣⵉ ⴰⵏⵏ ⴰⴷ ⵉⴹⵕ ⵓⵙⵡⵉⵔ ⵏⵏⵙ ⵙ ⵓⵙⵔⴰⴳ ⵍⵍⵉⵖ ⵉⵜⵜⵓⴳⴷⵍ ⵓⴽⴰⴱⴰⵕ ⴰⴷ ⵙⴳ ⴷⴰⵔ ⵜⵏⴱⴰⴹⵜ .
7 – ⵜⴰⵖⵎⵎⵉⵙⵜ « ⵜⵉⵍⴻⵍⵍⵉ »
ⵉⵜⵜⵓⵙⴽⴰⵔ ⴳⵉⵙ ⵓⵟⵟⵓⵏ ⵏⵏⵙ ⴰⵎⵣⵡⴰⵔⵓ ⵉⴳⴰⵏ ⴰⵡⵍⴰⵡⴰⵍ ⴰⵙⴳⴳⵯⴰⵙ ⵏ 1997,ⵜⴱⵉⴷⴷ ⴳ ⵜⵥⵕⵉⴳⵜ ⴰⵔ ⴰⵙⵙ ⴰⴷ ,ⴰⴷⵖⴰⵔ ⵏ ⵜⵥⵕⵉⴳⵜ ⵏⵏⵙ ⵜⵉⵖⵔⵎⵜ ⵏ ⴳⵍⵎⵉⵎⴰ ⴳ ⵓⵙⴰⵎⵎⵔ ⵏ ⵜⵎⴰⵣⵉⵔⵜ ⵏⵏⵖ , ⵙⴳ ⴷⴰⵔ ⵜⵎⵙⵎⵓⵏⵜ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ ⵜⵉⵍⴻⵍⵍⵉ ⵏⵏⴰ ⵉⵜⵜⵓⵙⵙⴰⵏⴻⵏ ⵙ ⵜⵖⵏⵙⴰ ⵏⵏⵙ ⵅⴼ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⵉⵎⴰⵣⵉⵖⵉⵏ .
ⵓⵟⵟⵓⵏ ⵏⵏⵙ ⴰⵎⵣⵡⴰⵔⵓ ⵉⴳⴰ ⵢⴰⵜ ⵜⵡⵡⵓⵔⵉ ⵉⵜⵜⵓⵙⵙⴰⵔⵏ ⴳⵔ ⵜⵓⴳⵜⵜ ⵏ ⵉⵎⵖⵏⴰⵙⵏ ⴳ ⵜⵎⵙⵎⵓⵏⵜ ⴰⴷ ⵙⴳ ⴳⵉⵙⵏ ⵎⴰⵙⵙ ⵄⵍⵉ ⵃⵕⵛ ⵕⵕⴰⵚ ⵏⵏⴰ ⵉⴳⴰⵏ ⴰⵎⵣⵡⴰⵔ ⵏ ⵜⵎⵙⵎⵓⵏⵜ ⴰⴷ , ⵎⴰⵛ ⵜⴰⵖⵎⵉⵙⵜ ⴰⴷ ⵓⵔ ⵜⵙⵓⵍ ⵙ ⵉⵙⵔⴰⴳⵏ ⵍⵍⵉ ⵏⵉⵜ ⵏⴻⵏⵏⴰ ⵙⴳ ⵜⵉⵣⵡⵉⵔⵉ ⴰⴷ ⵜ ⵉⴳⴰⵏ ⴷ ⵉⵎⵓⴽⵔⵉⵙⵏ ⵏ ⵓⵙⴼⵍⵙ ⴷ ⵜⵙⴷⵔⵉⵎⵜ .
8 – ⵜⴰⵖⵎⵎⵉⵙⵜ « ⴰⵥⵟⵟⴰ ⴰⵎⴰⵣⵉⵖ »
ⴰⵖⵎⵉⵙ ⴰⴷ ⵉⴳⴰ ⵡⵉⵏ ⵓⵥⵟⵟⴰ ⴰⵎⴰⵣⵉⵖ ⵉ ⵜⵏⴰⵎⵓⵔⵜ, ⵉⵜⵜⵓⵙⴼⴰⵖⴷ ⴳⵉⵙ ⵓⵟⵟⵓⵏ ⵏⵏⵙ ⴰⵎⵣⵡⴰⵔⵓ ⴳ ⵓⵙⴳⴳⵯⴰⵙ ⵏ 2005. ⴷⴷⵓ ⵏ ⵓⵜⵓⵢ ⵏ ⵓⵎⵙⵜⴰⵏ ⵃⵎⴰⴷ ⴰⵕⵃⵎⵓⵛ,ⵜⵙⴽⵔ ⵜⵖⵎⵎⵉⵙⵜ ⴰⴷ ⴳ ⵓⵟⵟⵓⵏ ⵏⵏⵙ ⴰⵎⵣⵡⴰⵔⵓ ⵢⴰⵏ ⵓⵙⵓⵙⵏ ⵙ ⵓⵥⵟⵟⴰ ⴰⵎⴰⵣⵉⵖ ⴷ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ ⵙ ⵓⵎⴰⵜⴰ ⵙⴳ ⵉⵎⴰⴳⵔⴰⴷⵏ ⵏⵏⵙ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⴼⵕⴰⵏⵉⵙⵜ,ⵎⴰⵛ ⵜⵉⵡⵡⵓⵔⵉⵡⵉⵏ ⵏⵙ ⵓⵔ ⵙⵓⵍⵏⵜ ⴰⵙⵙ ⴰⴷ ,ⵏⵙⵙⵓⵜⵔ ⴰⴽⴽⵯ ⴰⴷ ⵜⵡⵔⵔⵉ ⵙ ⵓⴱⴰⵔⴰⵣ ⵏ ⵜⵉⵔⵔⴰ .
9 – ⵜⴰⵖⵎⵎⵉⵙⵜ « ⴰⴳⵔⴰⵡ ⴰⵎⴰⵣⵉⵖ »
ⵜⵙⵙⵏⵜⴰ ⵜⵖⵎⵎⵉⵙⵜ ⴰⴷ ⵙⴳ ⵓⵙⴳⴳⵯⴰⵙ ⵏ 1996 ⴷⴷⵓ ⵏ ⵓⵜⵓⵢ ⵏ ⵎⴰⵙⵙ ⵓⵣⵣⵉⵏ ⴰⵃⵕⴹⴰⵏ ⵜⵣⴹⴰⵕ ⵜⵖⵎⵎⵉⵙⵜ ⴰⴷ ⴰⴷ ⵜⵙⵓⵙⵙⵏ ⵙ ⵓⵏⵣⴳⵓⵎ ⵏⵏⴰ ⵜⵜⵉⴷⵉⵔⵏ ⵉⵎⴰⵣⵉⵖⵏ ⴰⴽⴽⵯ ⴰⵔ ⵜⵜⵓⵙⴽⴰⵔ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⴼⵕⴰⵏⵙⵉⵙⵜ ⴷ ⵜⵎⴰⵣⵉⵖⵜ,ⵜⴼⴽⴰ ⵜⵖⵎⵎⵉⵙⵜ ⴰⴷ ⵜⴰⵎⵍⴷⴰ ⵉ ⵜⵓⴳⵜⵜ ⵏ ⵉⵎⴰⵣⵉⵖⵏ ⴰⴼⴰⴷ ⴰⴷ ⴰⵔⴰⵏ ⵙⵙⵍⴽⵎⵏ ⵉⵙⵡⵉⵏⴳⵉⵎⵏ ⵏⵏⵙⵏ ⴳ ⵉⴳⵔⴰⵏ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵉⴳⵔ ⴰⵣⵔⴼⴰⵏ ⴷ ⵓⵙⵔⵜⴰⵏ ⴷ ⵓⵎⵓⵏⴰⵏ .
10 – ⵜⴰⵖⵎⵎⵉⵙⵜ « ⴰⵎⴰⴹⴰⵍ ⴰⵎⴰⵣⵉⵖ »
ⵜⵍⴰⵍⵜ ⵜⵙⵡⵉⵏⴳⵎⵜ ⵏ ⵜⵖⵎⵉⵙⵜ ⵏ ⵓⵎⴰⴹⴰⵍ ⴰⵎⴰⵣⵉⵖ ⴳ ⵓⵙⴳⴳⵯⴰⵙ ⵏ 2001 ⵜⴳⴰ ⵙⴳ ⵜⵡⵡⵓⵔⵉⵡⵉⵏ ⵏ ⵜⴷⵔⴰⵡⵜ ⵏ ⵓⴼⴰⵔⵙ ⵉⴷⵉⵙⵢⵓⵏ ⴰⵎⴰⵣⵉⵖ,ⵜⴳⴰ ⵜⵉⵔⵎⵉⵜ ⴰⴷ ⵜⴰⵍⵍⵉ ⴷ ⵉⵍⵓⵍⵏ ⴳ ⵜⵖⵔⵎⵜ ⵏ ⵕⵕⴱⴰⵟ ⵜⵙⵓⵍ ⵓⴽⴰⵏ ⵙⵓⵍ ⴰⵔ ⴰⵙⵙ ⴰⴷ,ⵜⴳⴰ ⵢⴰⵜ ⵜⵍⴳⴳⵯⵉⵜ ⵏⵏⴰ ⵉⵕⵥⵎⵏ ⵜⵉⴳⴳⵓⵔⴰ ⵏⵏⵙ ⵉ ⵉⵎⴰⵔⴰⵜⵏ ⵉⵎⴰⵣⵉⵖⵏ ⴰⴼⴰⴷ ⴰⴷ ⵜⵡⵓⴷⴷⵓⵏ ⵜⴰⵏⵏⴰⵢⵉⵏ ⴷ ⵉⵙⵡⵉⵏⴳⵉⵎⵏ ⵏⵏⵙⵏ ,ⵜⴳ ⵙⴳ ⵜⵖⵎⵎⵉⵙⵉⵏ ⵉⴳⴰⵏ ⵡⴰⵥ ⵙⵍⴰⵡⴰⵏ ⴰⴽⴽⵯ ⵍⵍⵉⵖⵜⵍⵍⴰ ⴳ ⴷⴷⵓ ⵏ ⵓⵜⵓⵢ ⴷ ⵓⵙⵏⵢⵓⴷⴷⵓ ⵏ ⵜⵡⵜⵎⵜ ⵜⴰⵎⵖⵏⴰⵙⵜ ⵎⴰⵙⵙⴰ ⴰⵎⵉⵏⴰ ⴱⵏⵛⵛⵉⵅ,ⵏⵏⴰ ⵉⴳⴰⵏ ⵜⴰⵙⵍⵡⴰⵢⵜ ⵏ ⵜⵉⵔⵔⴰ ⴳ ⵓⵖⵎⵎⵉⵙ ⴰⴷ,ⴰⵖⵎⵎⵉⵙ ⴰⴷ ⴰⵔ ⴳⵉⵙ ⵜⵜⴰⵔⴰⵏ ⵉⵎⴰⵔⴰⵜⵏ ⵙ ⵜⵓⵜⵍⴰⵢⵉⵏ ⴳⴰⵏⵉⵏ ⵜⵉⵎⵏⵏⴰⵡⵉⵏ ⵅⴼ ⵓⵙⵏⵜⵍ ⵏ ⵜⵎⴰⴳⵉⵜ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳ ⴳⵉⵙⵏⵜ ⵜⴰⵄⵕⴰⴱⵜ ⵜⴰⴼⵕⴰⵏⵙⵉⵙⵜ ⴷ ⵜⵓⵜⵍⴰⵢⵜⵜⴰⵎⴰⵣⵉⵖⵜ.
11 – ⵜⴰⵖⵎⵎⵉⵙⵜ « ⵜⴰⵡⵉⵣⴰ »
ⵉⴳⴰ ⵓⵖⵎⵎⵉⵙ ⵏ ⵜⵡⵉⵣⴰ ⴰⵖⵎⵎⵉⵙ ⵡⵉⵙⵙ ⴽⵕⴰⴹ ⵏⵏⴰ ⵓⵍⴰⵏ ⵙⵓⵍ ⵉⵣⵣⵓⴳⴰⵣⵏ ⴳ ⵜⵡⵡⵓⵔⵉⵡⵉⵏ ⵏⵏⵙ ⴷ ⵜⵥⵕⵉⴳⵉⵏ ⵏⵏⵙ ⵣⵓⵏⴷ ⵜⵉⵏⴳⴳⵯⴰ ⵏⵏⵙ ,ⵜⴳ ⵜⴰⵖⵎⵎⵉⵙⵜ ⵏⵏⴰ ⵉⵙⵡⵓⴷⴷⵓⵏ ⵜⵉⵡⵡⵓⵔⵉⵡⵉⵏ ⵏⵏⵙ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵔ ⵜⵜⵉⵍⵉ ⴳ ⵓⴳⴰⴷⴰⵣ ⴳ ⵓⵙⵏⵜⵉ ⵏ ⴽⵓ ⴰⵢⵢⵓⵔ ,ⴳⵉⵏ ⵉⵎⴰⴳⵔⴰⴷⵏ ⵉⵏⵖⵎⴰⵙⵏ ⵏⵏⴰ ⵉⵜⵜⴰⵔⴰ ⵓⵎⵙⵜⴳⴳⴰⵔ ⵏⵏⵙ ⵎⴰⵙⵙ ⵎⵓⵃⵎⵎⴰⴷ ⴱⵓⴷⵀⴰⵏ ⵡⵉⵏⵏⴰ ⵉⵣⵣⵉⵡⵉⵣⵏ ⵉⵎⵙⵜⴳⴳⴰⵔⵏ ⴷ ⵉⵏⴱⴱⴰⴹⵏ,ⴰⵖⵎⵎⵉⵙ ⴰⴷ ⴰⵔ ⴷ ⵉⵜⵜⴼⴼⴰⵖ ⴳ ⵜⵖⵔⵎⵜ ⵏ ⵏⵏⴰⴹⵓⵕ ⵜⵙⵙⵏⵜⴰ ⵜⴰⵡⵡⵓⵔⵉ ⵏⵏⵙ ⵙⴳ ⵓⵙⴳⴳⵯⴰⵙ ⵏ 1997 ⵜⴳⴰ ⵙⴳ ⵜⵖⵎⵎⵉⵙⵉⵏ ⵜⵉⵎⴰⵣⵉⵖⵉⵏ ⵏⵏⴰ ⵢⵉⵡⵙⵏ ⴳ ⵓⵙⴱⵓⵖⵍⵓ ⵏ ⵓⵎⵓⵙⵙⵓ ⵏ ⵜⵉⵔⵔⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵎⴰⴷ ⵉⵥⵍⵉⵏⵙ ⵜⵓⵜⵍⴰⵢⵜ ⴷⵜⵓⵙⵙⵏⴰ ⵜⵉⵎⴰⵣⵉⵖⵉⵏ ,ⴰⵔ ⵜⵜⵢⴰⵔⴰ ⵙ ⴽⵕⴰⴹⵜ ⵏ ⵜⵓⵜⵍⴰⵢⵉⵏ ⵜⴰⴼⵕⴰⵏⵙⵉⵙⵜ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ,ⵜⵙⴽⵔ ⵜⴰⵙⵏⴰ ⵏⵏⵙ ⵜⴰⵍⵉⴽⵜⵕⵓⵏⵉⵜ,ⵏⵏⴰⵖ ⴰⴷ ⵣⵓⵣⵣⵓⵔⵏ ⴰⵎⵣⵔⵓⵢ ⵏ ⵉⵎⴰⴳⵔⴰⴷⵏ ⵏ ⵜⵖⵎⵎⵉⵙⵜ ⴰⴷ,ⵜⴳ ⵙ ⵎⴽ ⴰⴷ ⵢⴰⵜ ⵜⵖⵎⵎⵉⵙⵜ ⵜⴰⵎⵣⵡⴰⵔⵓⵜ ⵏⵏⴰ ⵉⵖⵉⵏ ⴰⴷ ⵜⵙⵎⵓⵏ ⴳⵔ ⵜⵉⵔⵔⴰ ⴳ ⵜⵖⵎⵎⵉⵙⵜ ⵜⴰⵏⴼⵓⵍⴰⵏⵜ ⴷ ⵜⴰⵍⵉⴽⵜⵕⵓⵏⵉⵜ,ⵏⵙⵙⵓⵜⵔ ⴰⴷ ⵜⵙⴱⵓⵖⵍⵓ ⵜⵖⵎⵎⵉⵙⵜ ⴰⴷ ⵜⵉⵡⵡⵓⵔⵉⵡⵉⵏ ⵏⵏⵙ ⵙ ⴷⴰⵜ ⴰⴼⴰⴷ ⴰⴷ ⵜⵉⵍⵉ ⴳ ⵓⵙⵡⵉⵔ ⴱⴰⵀⵔⴰ ⵢⴰⵜⵜⵓⵢⵏ .
ⴳ ⵓⵎⴰⴳⵔⴰⴷ ⴰⴷ ⵣⵓⵣⵣⵔⵖ ⴳⵉⵙ ⵙⴽⵔⵖ ⵢⴰ ⵓⵙⴰⴽⵓⴷ ⵏ ⵜⵖⵎⵎⵉⵙⵉⵏ ⴷ ⵜⵙⵖⵓⵏⵉⵏ ⵏⵏⴰ ⵉⵏⵣⵣⵖⵏ ⵢⵉⵡⵙⵏ ⴳ ⵓⵙⵓⵙⵙⵏ ⵙ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ,ⵏⵙⵙⵓⵜⵔ ⴳ ⵜⵖⵎⵎⵉⵙⵉⵏ ⵏⵏⴰ ⵙⵓⵍ ⵉⵙⵓⵍⵏ ⴳ ⵜⵡⵡⵓⵔⵉⵡⵉⵏ ⵏⵏⵙ ⴰⴷ ⵙⴱⵓⵖⵍⵓⵏⵜ ⵜⴰⵡⵡⵓⵔⵉ ⵏⵏⵙⵏⵜ ⴰⴼⴰⴷ ⴰⴷ ⵙⵙⵍⴽⵎⵏⵜ ⵜⵉⵔⵔⴰ ⵙ ⵜⵎⴰⵣⵉⵖⵜ ⵉ ⵓⵙⵡⵉⵔ ⵢⴰⵜⵜⵓⵢⵏ ,ⴰⵔⵉⵏⵜ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵙⴽⴽⵉⵍ ⵏⵏⵙ ⴰⵎⴰⴷⴷⵓⴷ ⵏ ⵜⴼⵉⵏⴰⵖ ⴰⴼⴰⴷ ⴰⴷ ⵜⵉⵍⵉ ⴳ ⵎⵏⵉⴷ ⵏ ⴽⵓ ⵎⴰⴷ ⵉⵔⴰⵏ ⴰⴷ ⵉⵖⵔ ⵉⵙⵏⵖⵎⵙ ⵙ ⵜⵓⵜⵍⴰⵢⵜ ⵏⵏⵙ ⵜⴰⵢⵎⵎⴰⵜ.
