ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴽⴰⵜⵉ ⵀⵉⴽⵙ katie hicks ⵜⴰⵏⵎⵓⵔⵉⵜ ⵣⵖ ⴽⴰⵍⵉⴼⵓⵕⵏⵢⴰ, ⴷ ⵜⴰⵙⵍⵎⴰⴷⵜ ⵏ ⵓⵥⴰⵡⴰⵏ ⵉ ⵉⴼⵔⵅⴰⵏ ⵉⵎⵥⵢⴰⵏⵏ, ⵜⴹⵕ ⵅⴼ ⵜⴰⵢⵔⵉ ⵏ ⵓⵥⴰⵡⴰⵏ ⴰⵎⴰⵣⵉⵖ ⵜⴰⵣⴰⵢⴽⵓⵜ (ⵜⴰⵥⵓⵕⵉ ⵏ ⵕⵕⵡⴰⵢⵙ) ⵣⵖ ⴰⵙ ⵜⵙⵙⴼⵍⴷ ⵜⵉⴽⴽⵍⵉⵜ ⵜⴰⵎⵣⵡⴰⵔⵓⵜ, ⵜⵖⵜⵙ ⴰⴷ ⵜⵍⵎⴷ ⵢⴰⵏ ⵣⵖ ⵉⵎⴰⵙⵙⵏ ⵏ ⵓⵥⴰⵡⴰⵏ ⴰⵣⴰⵢⴽⵓ ⵏ ⵙⵓⵙ ⴱⴰⵀⵔⴰ ⵉⵎⵔⴰⵏ ⵍⵍⵉ ⵉⴳⴰⵏ ⵉⵎⵉⵙ ⵏ ‘’ⵕⵕⵉⴱⴰⴱ’’, ⵜⵃⵙⵓ ⵓⵍⴰ ⵜⵓⴳⵜⵜ ⵏ ⵜⵓⵔⴰⵔⵉⵏ ⵉⵇⴱⵓⵔⵏ ⴷ ⴰⵔ ⵜⵏⵜ ⵜⴻⵜⵜⵉⵔⵉ.
ⵜⵣⵎⵔ ⴽⵉⵜⵉ ⵀⵉⴽⵙ katie ⴰⴷ ⵜⵏⵔⵓ ⴰⵎⵙⴰⵔⴰⵙ ⴳ ⴽⵕⴰⴹ ⵉⵙⴳⴳⵯⴰⵙⵏ ⵙ ⵜⵡⵉⵙⵉ ⵏ ⵜⵏⴼⴽⵉⵜ ⴷ ⵜⵉⵔⵉⵜ ⵏⵏⵙ ⵉⴷⵓⵙⵏ ⴷ ⵜⴰⵢⵔⵉ ⵏⵏⵙ ⵉ ⵜⵥⵓⵕⵉⵡⵉⵏ ⵜⵉⴼⴰⵍⴽⴰⵢⵉⵏ. ⵎⴰⵛⵛ ⵓⵍⴰ ⵙ ⵜⵡⵉⵙⵉ ⵏ ⵢⴰⵏ ⵣⵖ ⵉⵏⴰⵥⵓⵕⵏ ⵉⵎⴰⵣⵉⵖⵏ ⵏⵏⴰ ⵉⴳⴰⵏ ⴰⵎⵙⵇⴰⴷ ⵏ ⵓⵥⴰⵡⴰⵏ ⴰⵎⴰⵣⵉⵖ ⴳ ⵎⵉⵔⵉⴽⴰⵏ ⵏⵜⵜⴰ ⴷ ⴼⵜⵜⴰⵃ ⵄⴱⴱⵉ, ⵉⵡⵉⵙ ⵏ ⵜⵙⴳⴰ ⵏ ⵉⵎⵉ ⵏ ⵜⴰⵏⵓⵜ, ⵏⵏⴰ ⵖⵓⵔ ⵢⴰⵜ ⵜⵎⵍⴰⵍⵜ ⵉⵅⴰⵜⵔⵏ ⴳ ⵓⵙⵉⵙⵏ ⵙ ⵓⵥⴰⵡⴰⵏ ⵏ ⵕⵕⵡⴰⵢⵙ ⴷ ⵜⵔⵓⴱⴱⴰ ⵏ ⵓⵥⴰⵡⴰⵏ ⴰⵎⴰⵣⵉⵖ ⴳ ⵜⵎⴰⵣⵉⵔⵜ ⵏ ⵓⵏⵜⵜⴰⵢ ⵚⴰⵎ (ⵎⵉⵔⵉⴽⴰⵏ).
ⵜⵍⵓⵍ ⴽⴰⵜⵉ ⴳ 12 ⵏⵓⵡⴰⵏⴱⵉⵔ 1986, ⵜⴻⵜⵜⵓⴼⴽⴰⵏⵜ ⴰⵙ ⵜⵎⵙⵉⵔⵉⵏ ⴳ ⵍⴱⵢⴰⵏⵓ ⴷ ⵜⵉⵔⵉⵔ ⵍⴽⵓⵕⴰⵍ ⵏⴳⵔ ⵓⵡⵜⴰⵢ ⵏ ⵚⴹⵉⵚ ⵉⵙⴳⴳⵯⴰⵙⵏ ⴰⵔ ⵡⵉⵙⵙ ⵜⴰⵎ ⴷ ⵎⵔⴰⵡ. ⵉⵙⵙⵓⵙⵎ ⵜⵜ ⵓⵥⴰⵡⴰⵏ ⵏ ⴼⵓⵍⴽ ⴰⵣⴰⵢⴽⵓ ⵏⵏⴰ ⵉⵜⵜⵎⴰⵜⵜⴰⵢⵏ ⵙ ⵓⵙⵙⴼⵍⴷ. ⵜⵎⵙⴰⴳⴰⵔ ⴽⵉⵜⵉ ⴷ ⵓⵏⴰⵥⵓⵕ ⴼⵜⵜⴰⵃ ⴳ ⵡⴰⵢⵢⵓⵔ ⵏ ⴱⵕⴰⵢⵕ ⵏ ⵓⵙⴳⴳⵯⴰⵙ 2017. ⵜⵎⵢⴰⵙⵙⴰⵏ ⵙ ⵜⴰⵎⵓⵏⵜ ⴰⴽⴷ ⵜⵓⴳⵜⵜ ⵏ ⵉⵎⵉⵔⴽⴰⵏⵏ ⵅⴼ ⴽⵉⴳⴰⵏ ⵏ ⵡⴰⵏⵢⴰⵜⵏ ⵉⵣⴰⵢⴽⵓⵜⵏ ⵏ ⵜⴰⵙⵓⵜ ⵏ ⵉⵎⵣⵡⴰⵔ ⵖ ⵉⴳⴰ ⵍⵃⴰⵊⵊ ⴱⵍⵄⵉⴷ ⴷ ⵓⵏⵛⵛⴰⴷ ⵙ ⴷⴷⵎⵙⵉⵔⵉ ⴷ ⵓⵎⵏⵜⴰⴳ ⴷ ⵡⴰⵀⵔⵓⵛ ⴷ ⵡⵉⵢⵢⴰⴹ. ⵜⵙⵙⵏ ⵓⵍⴰ ⵅⴼ ⵜⵔⵓⴱⴱⴰ ⵏ ⵉⵥⵏⵥⴰⵕⵏ ⴷ ⵓⵔⵛⴰⵛ. ⵜⵥⴹⴰⵕ ⵙⴳ ⵡⴰⵢⵢⵓⵔ ⵏ ⴽⵟⵓⴱⵕ ⵏ ⵓⵙⴳⴳⵯⴰⵙ 2018 ⴰⴷ ⴷⴰⵔⵙ ⵢⵉⵍⵉ ⵔⵔⵉⴱⴰⴱ ⵏⵏⵙ ⵙⵔⵙ ⵉⵥⵍⵉⵏ, ⵜⵙⵙⵏⵜⵉ ⴰⵍⵎⵎⵓⴷ ⵏⵏⵙ.
ⴰⵔ ⵜⵙⴰⵡⴰⵍ ⴽⴰⵜⵉ ⵜⴰⵎⴰⵣⵉⵖⵜ (ⵜⴰⵛⵍⵃⵉⵢⵜ) ⴰⵔ ⵜⵜⵉⵔⵉⵔ ⵙ ⵔⵔⵉⴱⴰⴱ ⵙ ⵜⴰⵢⵔⵉ ⴷ ⵜⵓⵙⵙⵏⴰ ⴷ ⵓⵖⵓⴷⵓ ⵉⴳⴳⵓⵜⵏ. ⵀⴰ ⵜⵜ ⵉⴷ ⵖⵉⵍⴰ ⴷ ⵜⵙⴽⵔ ⵢⴰⵏ ⵓⵔⵣⴰⴼ ⵉ ⵜⵎⴰⵣⵉⵔⵜ ⵏⵏⵖ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵓⵙⵎⴰⵔ ⵏ ⵢⴰⵜ ⵜⵣⵔⴰⵡⵜ ⵅⴼ ⵜⵥⵓⵕⵉⵡⵉⵏ ⵏ ⵓⵃⵡⴰⵛ, ⵙ ⵓⵢⴰ ⵜⵡⴰⵜⵙ ⵜⵉⵙⴳⴳⵉⵡⵉⵏ ⵏ ⵓⴼⴰⵔⴰ ⴷ ⵓⴷⵔⴰⵔ ⴰⴷ ⵜⵏⵢⴰⵍⴽⴰⵎ ⴰⴽⴷ ⵉⵎⵙⴽⴰⵔⵏ ⵏ ⵜⵥⵓⵕⵉ ⴰⴷ ⵖ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴷ ⵜⵓⴽⵣⴰ ⵙⴳ ⵉⴳⵉⵡⵔ ⴰⴽⴷ ⴷⵉⴷⵙⵏ ⵅⴼ ⵉⴼⵔⴷⵉⵙⵏ ⵏ ⵜⵥⵓⵕⵉ ⵏ ⵓⵃⵡⴰⵛ ⴷ ⵉⵙⴳⴰⵔ ⴷ ⵡⴰⵏⵢⴰⵜⵏ ⵏⵏⵙ.
ⵓⵔ ⵜⴳⵉ ⴽⴰⵜⵉ ⵜⴰⴱⵕⵕⴰⵏⵉⵜ ⵉⵣⵡⴰⵔⵏ ⵏⵏⴰ ⵉⵙⵡⵓⵔⵉⵏ ⵅⴼ ⵓⵥⴰⵡⴰⵏ ⴷ ⵜⵓⵔⴰⵔⵉⵏ ⵏ ⵕⵕⵡⴰⵢⵚ, ⵎⵏⵛⴽ ⴰⵢⴰ ⴷ ⵖ ⵙⵙⵏⵏ ⵉⵎⵖⵔⴰⴱⵉⵢⵏ ⵜⴰⵕⵕⴰⵢⵚⵜ ⴽⵉⵍⵉ (ⴽⴰⵕⵉⵏ ⴷⵓⵏⴼⵕ karen D’enfert) ⵏⵏⴰ ⵉⵙⵓⵙⵔⵏ (ⵉⵣⵎⵎⴻⵎⵏ) ⴽⵉⴳⴰⵏ ⵏ ⵜⴰⵙⴼⵉⴼⵉⵏ ⵙⵉⵙ ⵉⵥⵍⵉⵏ ⵙ ⵓⵙⴰⵜⵉ ⵏ ⵃⵎⴰⴷ ⵓⵟⵟⴰⵍⴱ ⵍⵎⵥⵓⴹⵉ ⴷ ⵃⴰⵙⴰⵏ ⴰⵔⵙⵎⵓⴽ ⴷ ⵢⵉⴳⵍⵍⵉⵏ ⵏ ⵃⴰⵙⴰⵏ ⴰⴳⵍⴰⵡⵡⵓ – ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ- ⵎⴽⵍⵍⵉ ⵙⵙⵏⵏ ⵊⵓⵏⵉⴼⵉⵕ ⴳⵕⵓⵜ (Jennifer Grout) ⵢⵉⵔⵉⵔⵏ ⵙ ⵜⵎⴰⵣⵉⵖⵜ ⴰⵡⴷ ⵏⵜⵜⴰⵜ. ⵎⴰⵛⵛ ⵜⵖⴰⵎⴰ ⵜⴰⴼⵔⴷⵉⵜ ⵏⵏⴰ ⵉⵜⵜⵉⵔⵉⵔⵏ ⴷ ⴰⵔ ⵜⵣⴼⵣⴰⴼ ⴳ ⵢⴰⵜ ⵜⵉⵣⵉ ⵅⴼ ⵢⵉⵎⵉⵙ ⵏ ⵕⵕⵉⴱⴰⴱ ⴳ ⵓⵣⵎⵣ ⴰⴷ. ⵉⵙ ⴰⴽⴽⵯ ⵏⵥⴹⴰⵕ ⴰⴷ ⵏⵉⵏⵉ ⵎⴰⵙ ⵜⴳⴰ ⵜⵓⵎⴰⵏⵜ ⵉⴳⴰⵏ ⵡⴰⵥ ⵉⵖ ⵏⵡⵉⵔⵔⵉ ⵏⵥⵕ ⵎⴰⵙ ⴷ ⵜⵉⵕⵕⴰⵢⵚⵉⵏ ⵜⵉⵣⴰⵢⴽⵓⵜⵉⵏ ⵙⴳ ⵜⴰⵙⵓⵜ ⵜⴰⵎⵣⵡⴰⵔⵓⵜ ⴽⴽⴰⵏ ⵜⵜ ⵉⵏⵏ ⴰⵔ ⴽⴽⴰⵜⵏⵜ ⵢⵉⵎⵉⵙ ⵏ ⵍⵓⵟⴰⴹ, ⴷ ⵢⵉⴷⵔⵓⵙ ⴱⴰⵀⵔⴰ ⵎⴰⴷ ⴳⵉⵙⵏⵜ ⵉⴼⴰⵡⵏ ⴳ ⴽⵔⴰ ⵏ ⵜⵡⵍⴰⴼⵉⵏ ⵓⵙⵉⵏⵜ ⵉⵎⵉⵙ ⵏ ⵔⵔⵉⴱⴰⴱ, ⵎⴰⴷ ⴰⴽ ⵉⴷⴷⴰⵏ ⵙ ⵎⴰⵙ ⵜⵜ ⵉⵏⵏ ⴽⴽⴰⵏⵜ ⴰⵔ ⵣⴼⵣⴰⴼⵏⵜ ⴰⵛⴽⵓ ⵜⵉⵔⵓⴱⴱⴰ ⵏ ⵜⵡⵜⵎⵉⵏ ⴽⴽⴰⵏⵜ ⵜⵜ ⵉⵏⵏ ⴰⵔ ⵜⴻⵜⵜⵉⵍⵉⵏⵜ ⴳ ⵜⵎⵚⵕⴰⵢ, ⴷ ⵉⵖⵔⵎⴰⵏ ⵏ ⵉⵏⵎⵖⵓⵔⵏ ⵏ ⵉⵎⴰⵡⴰⵢⵏ ⵉⵎⵇⵇⵔⴰⵏⵏ, ⵙ ⵎⴰⴷ ⵓⵔ ⵉⴳⴳⵓⵜⵏ ⵏ ⵜⵉⵣⵉ ⵃⴱⴰⵏⵜ ⵜⵉⵖⵔⴷⵉⵏ ⴷⴰⵜ ⵏ ⵢⵉⵙⵎⴰⵡⵏ ⵉⵅⴰⵜⴰⵔⵏ ⵏ ⵕⵕⵡⴰⵢⵚ ⵉⵎⵣⴼⵣⴰⴼ ⴹⴰⵕⵜ ⵖ ⵙⵙⵏⵜⵉⵏⵜ ⴰⵔ ⴷ ⵜⴻⵜⵜⴼⵖⵖⵏⵜ ⵙ ⵉⵡⵉⵣⵏ ⵓⵔ ⵏⵜⵍⵏⵉⵏ, ⵍⵍⵉⵖ ⵔⴰⴷ ⵉⵖⴰⵎⴰ ⵕⵕⵉⴱⴰⴱ ⵙⴳ ⵜⵉⵣⵉ ⴰⵏⵏ ⴳ ⵓⴼⵓⵙ ⵏ ⵉⵔⴳⴰⵣⵏ.
ⵜⵉⵔⵔⴰ: ⵃⵎⴰⴷ ⵄⴰⵚⵉⴷ
ⴰⵙⵓⵖⵍ: ⵄⴰⴱⴷⵍⵡⴰⵃⵉⴷ ⴱⵓⵜⴱⴰⵖⴰ
