ⵜⴰⵙⵔⵜⵉⵜ ⵜⴰⴼⵔⵉⵇⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵜⴱⴷⴷ ⵅⴼ ⵜⴳⵯⵎⴰⵏⵉⵜ ⴷ ⵜⵙⵏⵜⴰⵢⵜ ⴷ ⵜⵏⵉⵍⴰ ⵖⵔ ⵜⵉⵎⵔⴰⵔⵓⵜⵉⵏ ⵜⵉⴼⵔⵉⵇⵉⵢⵉⵏ (ⵏⴰⵚⵉⵕ ⴱⵓⵕⵉⵟⴰ)

ⵉⵙⴷⴷⵉⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ, ⵏⴰⵚⵉⵕ ⴱⵓⵕⵉⵟⴰ, ⴰⵙⵙ ⵏ ⵓⵙⵉⵎⵡⴰⵙ ⴳ ⵕⵕⴱⴰⵟ, ⵎⴰⵙ ⴷ ⵜⴰⵙⵔⵜⵉⵜ ⵜⴰⴼⵔⵉⵇⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⴷ ⵢⴰⵜ ⵜⵙⵔⵜⵉⵜ ⵏ ⵜⴳⵯⵎⴰⵏⵉⵜ ⴷ ⵜⵙⵏⵜⴰⵢⵜ, ⴷ ⵜⵎⵔⵉⵙⵜ ⵉⴷⵓⵙⵏ ⵙ ⵓⵙⴼⴰⵍ ⴰⴼⵔⵉⵙⵉ, ⴷ ⴰⵔ ⵜⴻⵜⵜⵙⵉⴽⵍ ⵅⴼ ⵓⴼⴳⴰⵏ ⴷ ⵜⵏⵉⵍⴰ ⵖⵔ ⵜⵎⵔⴰⵔⵓⵜⵉⵏ ⵜⵉⴼⵔⵉⴷⵉⵢⵉⵏ ⵉ ⵉⵏⴰⵥⴰⵕⵏ ⵏ ⵜⵎⵏⵥⴰⵡⵜ.

ⵢⵓⵎⵥ ⵎⴰⵙⵙ ⴱⵓⵕⵉⵟⴰ, ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⵏ  » ⵡⴰⵙⵙ ⵏ ⵢⵉⴼⵔⵉⴷⵢⴰ » ⵉⵏⵎⴰⵍⴰⵏ ⴳ ⵓⵙⵖⵉⵎ ⵏ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⴷⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ, ⵎⴰⵙ ⴷ  » ⵉⵖ ⵉⴳⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉⵙⵔⵙ ⴰⴼⵔⵉⵇⵢⴰ ⴳ ⵡⴰⵎⵎⴰⵙ ⵏ ⵉⵙⵉⵣⵡⵉⵔⵏ ⵉⴳⵔⴰⵖⵍⴰⵏⵏ ⵏ ⵍⵎⵛⵔⵉⴱ, ⵎⴰⵢⴰ ⵏⵏ ⵢⴰⵖⵓⵍ ⵙ ⵜⴼⵍⵙⵜ ⵉⴷⵓⵙⵏ ⵏ ⴱⴰⴱ ⵏ ⵡⴰⴷⴷⵓⵔ ⵙ ⵢⵉⴼⵔⵉⵇⵢⴰ ».

ⵉⵣⵎⵎⴻⵎ ⵓⵎⴰⵡⵙⴰⵙ, ⴳ ⵓⴼⵙⵔ ⵏ ⵡⴰⵡⴰⵍ ⵏⵏⵙ ⵅⴼ  » ⵉⵎⴰⴹⵍⴰⵏⵏ ⵏ ⵜⴰⵏⵏⴰⵢⵜ ⵜⴰⴼⵔⵉⵇⵉⵜ ⵏ ⴱⴰⴱ ⵏ ⵡⴰⴷⴷⵓⵔ », ⵎⴰⵙ ⴷ  » ⵍⵍⵉⵖ ⵜⵜ ⵉⵏⵏ ⴽⴽⴰⵏ ⴽⵔⴰ ⵏ ⵡⵉⴷ ⴷⴰ ⵙⴰⵡⴰⵍⵏ ⵅⴼ ⵡⴰⵔ ⴰⵏⴰⵔⵓⵣ ⴳ ⵢⵉⴼⵔⵉⵇⵢⴰ, ⵉⴽⴽⴰ ⵜⵜ ⵉⵏⵏ ⴱⴰⴱ ⵏ ⵡⴰⴷⴷⵓⵔ ⴷⴰ ⵉⵜⵜⵍⵍⵉ ⵙ ⵜⵣⵎⵎⴰⵔ. ⴷ ⵍⵍⵉⵖ ⵜⵜ ⵉⵏⵏ ⴽⴽⴰⵏ ⴽⵔⴰ ⵏ ⵉⵡⴷⴰⵏ ⴷⴰ ⵉⵙⵜⵜⵉ ⵉⴼⵙⵙⴰⵢⵏ ⵔⵅⴰⵏⵉⵏ, ⵉⴽⴽⴰ ⵜⵜ ⵉⵏⵏ ⴱⴰⴱ ⵏ ⵡⴰⴷⴷⵓⵔ ⴷⴰ ⵢⴰⵇⵇⵔⴰ ⵙ ⵓⵙⴼⵙⵉ ⵉⴷⵔⴰⵏ ⵉ ⵢⴰⵏ ⵓⵙⴱⵓⵖⵍⵓ ⵏ ⵉⴼⵙⵙⴰⵢⵏ ⵉⵎⵖⵍⴰⵍⵏ. ⴷ ⵍⵍⵉⵖ ⵜⵜ ⵉⵏⵏ ⴽⴽⴰⵏ ⴽⵉⴳⴰⵏ ⴷⴰ ⵥⵕⵕⴰⵏ ⵉⵎⵓⴽⵔⵉⵙⵏ, ⵉⴽⴽⴰ ⵜⵜ ⵉⵏⵏ ⴱⴰⴱ ⵏ ⵡⴰⴷⴷⵓⵔ ⴷⴰ ⵉⵥⵕⵕⴰ ⵜⵉⵎⵍⴷⴰ.

ⵉⵙⵙⵉⵙⴼⵉⵡ, ⴳ ⵓⵎⵏⴰⴹ ⴰⴷ, ⵎⴰⵙ ⴷ ⴰⵙⴼⴰⵍ ⴰⴼⵔⵉⵇⵉ ⵉ ⵍⵎⵖⵔⵉⴱ ⴷ ⴰⵡⴷ ⵜⴰⴱⴰⵕⴰⴳⵎⴰⵜⵉⵜ ⵜⴰⴼⵔⵉⵇⵉⵜ, ⵜⴱⴷⴷ ⵅⴼ ⵜⵉⴷⵜ ⵜⴰⵙⴳⵓⵎⴰⵏⵜ ⴰⵏⴰⵎⴽ ⵏⵏⵙ ⵎⴰⵙ ⴷ ⵜⴰⵎⵏⵥⴰⵡⵜ ⵜⴽⵜⴰⵔ ⵙ ⵜⵥⵉⴹⴰⵕ ⵏ ⵓⵙⵎⴰⵏⴰⵔ ⴰⵎ ⵢⴰⵏ ⵙⴳ ⵉⴳⵊⴷⴰ ⵉⵅⴰⵜⴰⵔⵏ ⵏ ⵜⵎⵔⵏⵉⵡⵜ ⵜⴰⵎⵣⴹⵍⴰⵏⵜ, ⵉⵙⴷⴷⵉⴷ ⵎⴰⵙ ⴷ ⵉⴼⵔⵉⵇⵢⴰ ⵔⴰⴷ ⵜⵎⵓⵔⵙ ⴳ ⵓⵢⴰ ⴷ.

ⵉⴱⴷⵔ ⵎⴰⵙⵙ ⵏⴰⵚⵉⵕ ⴱⵓⵕⵉⵟⴰ ⵙ ⵜⴱⵔⴰⵜ ⵏⵏⴰ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⵉⵙⴷⴷⵉⴷ ⴳⵉⵙ ⵎⴰⵙ ⴷ  » ⵉⴼⵔⵉⵇⵢⴰ ⵏⵏⴰ ⵎⵉ ⵉⴳⴳⵓⵜ ⵓⵙⵙⵉⵏⴼ, ⵜⴰⵖⵓⵍ ⴰⵙⵙ ⴰⴷ ⴷ ⴰⵎⴳⴳⴰⵢ ⵓⵔ ⵉⵜⵜⵓⵣⵎⴰⵔ ⵓⵙⵙⵉⵏⴼ ⵏⵏⵙ. ⵉⴷⴷⴰ ⵓⵣⵎⵣ ⵍⵍⵉⵖ ⵜⵜ ⵉⵏⵏ ⵜⴽⴽⴰ ⵜⴳⴰ ⵖⴰⵙ ⵢⴰⵏ ⵓⵙⵏⵜⵍ ⵏ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ. ⵎⴰⵛⴰ ⵉⵙ ⵜⴰⵖⵓⵍ ⴷ ⵜⴰⵏⵥⴰⵡⵜ ⴷⴰ ⵉⵜⵜⵙⴷⴷⵉⴷⵏ ⵜⵉⵍⵉⵜ ⵏⴱⵙ, ⴷ ⴰⵔ ⵜⵣⵣⵉⴳⵉⵣ ⵜⴰⵙⵉ ⵜⴰⵎⴰⵙⴰⵢⵜ ⵏⵏⵙ ⴳ ⵓⴱⴰⵔⴰⵣ ⴰⴳⵔⴰⵖⵍⴰⵏ, ⴰⵎ ⵓⴳⵎⴰⵎ ⴰⵎⵙⴽⴰⵔ ⴷ ⵢⵓⴽⵍⴰⵍⵏ ⴰⵣⵔⴰⴽ ⴳ ⵓⵎⴹⴰⴽⴰⵕ ⵉⵙⵙⵓⵜⵍⵏ ⵉ ⵜⵏⵏⵓⴱⴹⴰ ⵜⴰⵎⴰⴹⵍⴰⵏⵜ ».

ⴳ ⵜⵙⴳⴰ ⵢⴰⴹⵏ, ⵉⵔⵏⴰ ⵓⵎⴰⵡⵙⴰⵙ ⵎⴰⵙ ⴷ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵏ ⵜⵙⵔⵜⵉⵜ ⵜⴰⴼⵔⵉⵇⵉⵜ ⵏ ⵍⵎⵖⵔⵉⴱ ⵜⴱⴷⴷ ⵅⴼ ⵜⴼⵍⵙⵜ ⴳ ⵓⵎⵢⴰⵡⴰⵙ ⵉⴼⴼⵓⵙ – ⵉⴼⴼⵓⵙ, ⵢⴰⵎⵥ ⵅⴼ ⵡⴰⵙⵙⴰⵔ ⵙ ⵜⵎⵔⴰⵔⵓⵜⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵏⴰⵥⴰⵕⵏ ⵉⴼⵔⵉⵇⵉⵢⵏ.

ⵉⵙⵙⵎⵜⵔ ⵎⴰⵙ ⴷ  » ⴳ ⵜⵍⵍⴰⵡⵜ, ⵙ ⵎⴰⴷ ⵉⵥⵍⵉⵏ ⵙ ⴱⴰⴱ ⵏ ⵡⴰⴷⴷⵓⵔ, ⴰⵙⴳⵏⴹ ⵏ ⵢⵉⴼⵔⵉⵇⵢⴰ ⵉⵣⴷⵉ ⵙ ⵜⵣⵎⵔⵜ ⵏⵏⵙ ⵅⴼ ⴰⴷ ⵜⴰⵎⵥ ⵜⵡⴰⵍⴰ ⴷ ⵓⵙⵎⵏⵉⴷ ⵏ ⵜⵎⵔⴰⵔⵓⵜⵉⵏ ⵥⵍⵉⵏⵉⵏ ⵙⵉⵙ ⴷ ⵉⵎⵙⴰⵙⴰⵏ ⴷ ⵉⵙⵍⵍⵡⵉⵏ ⴷ ⵉⵜⵜⵓⵙⵎⴰⵢⵏⵓⵏ ⵉ ⵉⵏⴰⵥⴰⵕⵏ ⵏⵏⵙ, ⴷ ⴳⵉⵏⵜ ⵜⵉⵎⵔⴰⵔⵓⵜⵉⵏ ⵏⵏⴰ ⵙ ⴷ ⵉⵇⵇⴰⵏ ⴰⴷ ⴳⵉⵙⵏⵜ ⵙⵡⵉⵏⴳⵎⵏ ⵉⴼⵔⵉⵇⵉⵢⵉⵏ ⵉ ⵉⴼⵔⵉⵇⵉⵢⵏ ».

ⴳ ⵓⵎⵏⴰⴹ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ ⵜⴰⵏⵏⴰⵢⵜ ⴰⴷ ⵜⴰⴳⵍⴷⴰⵏⵜ ⵖⵓⵔⵙ ⵢⴰⵏ ⵓⴷⵖⴰⵔ ⵉⵅⴰⵜⵔⵏ ⵉ ⵓⵎⵏⵣⴰⵢ ⵏ ⵜⴳⵎⵉ ⵉⵛⵛⴰⵔⵏ ⵉⴼⴼⵓⵙ – ⵉⴼⴼⵓⵙ, ⵉⵎⵢⴰⵡⴰⵙⵏ ⴷ ⵉⵙⵓⵍⵏ, ⴷ ⵜⵡⵉⵙⵉ ⵜⴰⴼⵔⵉⵇⵉⵜ, ⵉⵙⵙⴽⵜⵉ ⴷ ⵎⴰⵙ ⴷ ⵍⵎⵖⵔⵉⴱ ⵜⵙⵎⵓⵏⵜ ⴷ ⵉⴼⵔⵉⵇⵢⴰ ⴰⵥⵟⵟⴰ ⴰⵎⴰⵖⵓⵏ ⵉⴽⵜⴰⵔⵏ.

ⵉⵔⵏⵓ ⵎⴰⵙ ⴷ ⴰⵥⵟⵟⴰ ⴰⴷ ⵉⴱⴷⴷ ⵅⴼ ⵓⴳⴳⴰⵔ ⵏ 1500 ⵏ ⵢⵉⵎⵉⵙⵙ ⵏ ⵓⵎⵢⴰⵡⴰⵙ ⵉⵣⴷⵉ ⵜⴰⴳⵍⴷⵉⵜ ⵙ ⵓⴳⴳⴰⵔ ⵏ 80% ⵙⴳ ⵜⵎⵉⵣⴰⵔ ⵜⵉⴼⵔⵉⵇⵉⵢⵉⵏ, ⵉⴷⵍ ⵉⴳⵔⴰⵏ ⵉⵎⵢⴰⵏⴰⵡⵏ ⵣⵓⵏ ⴷ ⴰⵙⵍⵎⴷ ⴰⵎⴰⵜⴰⵢ ⴷ ⵓⵙⵎⵓⵜⵜⴳ ⵏ ⵉⵙⵓⵜⴰⵢ, ⴷ ⵜⴷⵓⵙⵉ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴷ ⵓⵙⵣⴷⴳⵉ ⵏ ⵡⴰⵎⴰⵏ ⵏ ⵜⵉⵙⵙⵉ.

ⵉⴱⴷⵔ ⵎⴰⵙⵙ ⴱⵓⵕⵉⵟⴰ ⵎⴰⵙ ⴰⵔ ⵉⵜⵜⵓⵙⴽⴰⵔ ⴳ ⵓⵙⵡⵉⵔ ⵏ ⵜⵎⵉⵣⴰⵔ ⵜⵉⴼⵔⵉⵇⵉⵢⵉⵏ ⵜⴰⵢⵜⵎⴰⵜⵉⵏ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⵎⵏⵥⴰⵡⵜ ⴰⵣⵣⴳⵉⵔ ⵏ ⵜⵓⴳⵜⵜ ⵏ ⵉⵙⵏⵜⴰⵢⵏ ⵉⵅⴰⵜⴰⵔⵏ ⵚⵓⵚⵢⵓ – ⵉⴷⵎⵙⴰⵏⵏ ⵏⵏⴰ ⵎⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ, ⵏⵏⴰ ⵉⵡⴰⵜⵜⵙⵏ ⵖⵔ ⵜⴳⵎⵉ ⵜⴰⵏⴼⴳⴰⵏⵜ.

ⵉⵙⵙⵎⵜⵔ ⵓⵎⴰⵡⵙⴰⵙ ⵎⴰⵙ ⵜⴰⵙⵔⵜⵉⵜ ⵜⴰⴼⵔⵉⵇⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵜⴱⴷⴷ ⵓⵍⴰ ⵅⴼ ⵜⴷⵉⵏⴰⵎⵉⵜ ⴷ ⵢⵉⵎⴰⵏ ⵏ ⵜⵙⵏⵜⴰⵢⵜ, ⵙⵍⴰⵡⴰⵏ ⴰⴽⴽⵯ ⴳ ⵓⵙⴰⵜⵉ ⵏ ⵜⴷⵉⴱⵍⵓⵎⴰⵙⵉⵜ ⵏ ⵜⵡⵓⵔⵉ ⴷ ⵓⵙⴳⵓⴷⵉ.

ⵎⴽⵍⵍⵉ ⵉⵙⴷⴷⵉⴷ ⵎⴰⵙⵙ ⴱⵓⵕⵉⵟⴰ ⵎⴰⵙ ⴷ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵜⵙⵏⴰⵍ ⵅⴼ ⴰⵡⴷ ⵜⵙⵔⵜⵉⵜ ⵏ ⵜⴳⵯⵎⴰⵏⵉⵜ ⵓⵔ ⴷ ⴰⵏⵎⵉⵍⴰ, ⴰⵛⴽⵓ ⴰⴼⵔⵉⵇⵢⴰ ⵖ ⴷⴰⵔⵙ, ⵓⵔ ⵜⴳⵉ ⵖⴰⵙ ⴰⵏⵎⵉⵍⴰ ⵉ ⵍⵎⵖⵔⵉⴱ, ⵎⴰⵛⴰ ⴰⴽⴰⵍ ⴰⵏⴳⵯⵎⴰⵏⵉ ⵏ ⵜⵎⴰⴳⵉⵜ ⴷ ⵜⵊⵢⵓⴳⵕⴰⴼⵉⵜ ⴷ ⵜⴷⵍⵙⴰ ⴷ ⵓⵎⵣⵔⵓⵢ.

ⴳ ⵓⴼⵙⵔ ⵏ ⵓⵙⴷⴷⵉⴷ ⵏⵏⵙ ⵅⴼ ⵜⵏⴰⵎⵎⴰⵙⵜ ⵏ ⵓⴼⵔⴷⵉⵙ ⴰⵏⴼⴳⴰⵏ ⴳ ⵜⵙⵔⵜⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵎⵏⵉⴷ ⵜⴰⴼⵔⵉⵇⵜ, ⵉⵙⴷⴷⵉⴷ ⵓⵎⴰⵡⵙⴰⵙ ⵎⴰⵙ ⴷ ⵜⴰⵏⴽⵔⴰ ⵏ ⵜⴼⵔⵉⵇⵜ ⵔⴰⴷ ⵜⵜ ⴰⵙⵉⵏ ⵉⴼⵔⵉⵇⵉⵢⵏ, ⴷ ⵓⴷⴳⴰⵔ ⴰⵏⴼⴳⴰⵏ ⵔⴰⴷ ⵉⴳ ⴰⴳⵍⴰ ⵉⵅⴰⵜⵔⵏ ⵉ ⵜⵎⵏⵥⴰⵡⵜ.

ⵉⵙⵎⴰⵏⴰⵔ ⵎⴰⵙⵙ ⴱⵓⵕⵉⵟⴰ, ⵙ ⵜⵎⵍⴷⴰ ⵏ ⵡⴰⵙⵙ ⵉⵏⵎⴰⵍⴰⵏ ⴷⴷⵓ ⵜⵎⴰⵜⴰⵔⵜ  » ⴰⵙⵍⵎⴷ ⴰⵎ ⵜⵎⵙⵙⵉⵍⵉⵜ ⵏ ⵜⵉⴷⵜ ⵉ ⵜⴳⵎⵉ ⴷ ⵓⵙⵏⴼⵍ ⴳ ⵜⴼⵔⵉⵇⵜ », ⵎⴰⵙ ⴷ ⵉⵎⴰⴹⴰⵍⵏ ⵏ ⵜⴰⵏⵏⴰⵢⵜ ⵜⴰⴼⵔⵉⵇⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵜⵎⵙⴰⵙⴰ ⵏⵉⵜ ⴷ ⵜⵎⵙⴰⵔⵜ ⵏ ⵓⵙⵍⵎⴷ ⴳ ⵜⴼⵔⵉⵇⵜ.

ⵉⵙⵙⵎⵜⵔ ⵎⴰⵙ ⵙ ⵜⴰⵎⵔⵉⴷⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵙⵍⵎⴷ ⵓⵔ ⴷ ⵜⴰⵎⵔⵉⵙⵜ ⵜⴰⵏⴰⵎⵓⵔⵜ, ⵎⴰⵛⴰ ⴷ ⵜⴰⵎⵔⵉⵙⵜ ⵜⴰⵎⵏⵥⴰⵡⵜ, ⵉⵙⵙⴽⵜⵉ ⴷ ⵎⴰⵙ ⴷ ⵜⴰⴳⵍⴷⵉⵜ ⵜⵙⵔⵙ ⵉⵖⴰⵡⴰⵙⵏ ⵏ ⵓⵙⵏⴼⵍ ⵉ ⵓⵙⴷⵓⵙ ⴷ ⵓⴱⵟⵟⵓ ⵏ ⵜⵓⵙⵙⵏⵉⵡⵉⵏ ⴷ ⵜⵎⵙⴽⴰⵔⵉⵏ ⵖⵓⴷⴰⵏⵉⵏ ⴳ ⵢⵉⴳⵔ ⴰⴷ.

ⵉⵙⴷⴷⵉⴷ ⵎⴰⵙⵙ ⴱⵓⵕⵉⵟⴰ, ⵎⴰⵙ ⴷ ⵍⵎⵖⵔⵉⴱ ⵉⵙⵢⴰⴼⴰ ⴳ ⵓⵙⴷⵓⵙ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵏ ⵓⵙⵍⵎⴷ ⴳ ⵜⴼⵔⵉⵇⵜ ⴷ ⵉⵙⵃⵉⵢⵢⵍ ⵉⵅⴼ ⵏⵏⵙ ⵃⵎⴰ ⴰⴷ ⵢⴰⵖⵓⵍ ⴰⵙⵙ ⴰⴷ ⵜⴰⵏⵉⵍⴰ ⵜⴰⵎⵓⴼⴰⵢⵜ ⵉ ⵉⵎⵣⵔⴰⵡⵏ ⵉⴼⵔⵉⵇⵉⵢⵏ, ⵉⴳ ⵎⴰⵢⴰ ⴷ ⵜⴰⵖⴰⵡⵙⴰ ⵏ ⵓⴱⵓⵔⵣ ⴷ ⵓⵎⴰⵏⵓⵣ ⴳ ⵢⴰⵜ ⵜⴽⴽⵍⵉⵜ.

ⵢⵉⵏⵉ ⵎⴰⵙ ⴷ  » ⴳ ⵓⵙⴳⴳⵯⴰⵙ ⴰⵎⵙⴷⴰⵡ 2023-2024 ⵉⴳⴰ ⴰⵖ ⵜⵓⵎⵔⵜ ⴰⴷ ⵙⴱⵔⵔⴽⵏⵜ ⵜⵎⵔⵙⴰⵍ ⵏⵏⵖ ⵜⵉⵙⴷⴰⵡⵉⵢⵉⵏ 1592 ⵏ ⵓⵎⵣⵔⴰⵡ ⴰⴼⵔⵉⵙⵉ ⵡⴰⵍⴰⵏ ⵎⴰⴷ ⵉⴳⴰⵏ 43 ⵏ ⵓⵡⴰⵏⴽ, ⴳⵉⵙⵏ ⵢⴰⵏ ⵡⵓⵟⵟⵓⵏ ⵉⴳⴳⵓⵜⵏ ⵜⴻⵜⵜⵓⴼⴽⴰ ⴰⵙⵏ ⵜⴰⴳⴳⴰⵥⵜ ⵙⴳ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵉⵙⵙⵉⵙⴼⵉⵡ ⵓⵎⴰⵡⵙⴰⵙ ⵎⴰⵙ ⴷ ⵉⵎⵣⵔⴰⵡⵏ ⵉⴼⵔⵉⵇⵉⵢⵏ ⵍⵍⴰⵏ ⴰⴽⴽⵯ ⴳ ⵜⵙⴳⴳⵉⵡⵉⵏ ⵏ ⵍⵎⵖⵔⵉⴱ, ⵖ ⵏⵉⵜ ⵜⵍⵍⴰ ⵍⵄⵢⵓⵏ ⴷ ⴷⴷⴰⵅⵍⴰ, ⵉⵙⵙⵎⵜⵔ ⵎⴰⵙ ⴷ ⵓⴳⴳⴰⵔ ⵏ 3000 ⵏ ⵓⵎⵣⵔⴰⵡ ⵙⴳ 36 ⵏ ⵓⵡⴰⵏⴽ ⴰⴼⵔⵉⵇⵉ ⵣⴷⵖⵏ ⵖⵉⵍⴰ ⴷ ⴳ ⵜⵓⴷⴷⵓⵔⵉⵏ ⵜⵉⵙⴷⴰⵡⵉⵢⵉⵏ ⴷ ⵜⴳⵯⵏⵙⴰⵏⵉⵏ ⴳ ⵍⵎⵖⵔⵉⴱ.

ⴳ ⵢⵉⴳⵔ ⴰⴷⵉⴱⵍⵓⵎⴰⵙⵉ, ⵉⵙⵙⴱⵖⵔ ⵎⴰⴷ ⵉⴳⴰⵏ 240 ⵏ ⵓⴷⵉⴱⵍⵓⵎⴰⵙⵉ ⴰⴼⵔⵉⵙⵉ, ⵙⴳ ⵓⵙⴳⴳⵯⴰⵙ 2014, ⵙⴳ ⵜⵙⵓⵜⵍⵜ ⵜⴰⴳⵔⴰⵖⵍⴰⵏⵜ ⴳ ⵜⴷⵉⴱⵍⵓⵎⴰⵙⵉⵜ ⵏⵏⴰ ⵜⵙⵙⵎⵏⵉⴷ ⵜⴽⴰⴷⵉⵎⵉⵜ ⵜⴰⵎⵖⵔⵉⴱⵉⵜ ⵉ ⵜⵣⵔⴰⵡⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ, ⵎⴽⵍⵍⵉ ⵉⵙⵙⴱⵖⵔ 83 ⵏ ⵓⴷⵉⴱⵍⵓⵎⴰⵙⵉ ⴰⴼⵔⵉⵇⵉ ⴳ ⵜⵙⵙⵓⵜⵍⵜ ⵏ ⵓⵙⵎⵓⵜⵜⴳ ⴰⵎⵣⵡⴰⵔⵓ.

ⵉⵥⵍⵉ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵎⵉ ⵉⵃⴰⴹⵕ ⵓⵎⴰⵡⵙⴰⵙ ⵏ ⵜⵣⵔⴼⵜ ⵜⴰⵣⴰⵎⴱⵉⵜ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵙ ⵜⴳⵏⵙⴰⵙⵜ, ⵎⵓⵍⴰⵎⴱⵓ ⵀⴰⵢⵎⴱⵉ, ⵏⵏⴰ ⵉⵙⴽⴰⵔⵏ ⴰⵔⵣⴰⴼ ⵏ ⵜⵡⵓⵔⵉ ⵉ ⵍⵎⵖⵔⵉⴱ, ⴷ ⵓⵍⴰ ⵜⵓⴳⵜⵜ ⵏ ⵉⵎⵙⵇⴰⴷⵏ ⵓⵖⵥⵉⵏⵏ ⴳ ⵕⵕⴱⴰⵟ ⴷ ⵉⵡⵔⵉⴽⵏ ⵙⴳ ⵢⵉⴷⵉⵔⵏ ⵎⵣⴰⵔⴰⵢⵏⵉⵏ, ⵙ ⵓⴼⵙⵔ ⵏ ⵢⴰⵜ ⵜⴰⵢⵜⵔⵜ ⵜⵓⵏⵜⵉⵎⵜ ⵉⵍⴰⵏ ⴰⵣⵡⵍ ⵏ  » ⵜⴰⵎⵔⵉⵙⵜ ⵏ ⵜⴳⵍⴷⵉⵜ, ⴷⴷⵓ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⵉ ⵜⵏⴰⴼⵓⵜ ⵏ ⵓⵙⵎⵓⵜⵜⴳ ⴷ ⵓⵙⴱⵓⵖⵍⵓ ⵏ ⵉⴼⵓⴽⴽⵙⵏ ⵏ ⵉⵄⵔⵔⵉⵎⵏ ⵉⴼⵔⵉⵇⵉⵢⵏ ⴷ ⵜⵣⵎⵔⵜ ⵏ ⵓⵙⵡⵓⵔⵉ ⵏⵏⵙⵏ ».

ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ