ⵜⴰⵢⴰⴼⵓⵜ ⵜⴰⴼⵔⴽⴰⵏⵜ ⵏ ⵜⵡⵓⵔⵉ ⵏ ⵜⵏⴱⴰⴹⵜ ⵜⵙⵔⵙ ⵜⴰⵡⵊⴰ ⵜⴰⵎⵖⵔⵉⴱⵉⵜ ⴳ ⵡⴰⵎⵎⴰⵙ ⵏ ⵜⵙⵔⵜⴰⵢ ⴰⴽⴽⵯ ⵜⵉⴳⴷⵓⴷⴰⵏⵉ ( ⵎⴰⵙⵙ ⴰⵅⵏⵏⵓⵛ)

ⵢⵓⵍⵍⵖ ⴰⵙⵙ ⴰⴷ ⵏ ⵓⵚⵉⴹⵢⴰⵙ ⴳ ⵓⴳⴰⴷⵉⵔ, ⴰⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵍⴻⵍⵍⵉⵜⵏ (ⵉⵏⵙⵉⵎⴰⵏⵏ), ⵄⴰⵣⵉⵣ ⴰⵅⵏⵏⵓⵛ, ⵙ ⵜⵢⴰⴼⵓⵜ ⵜⴰⴼⵔⴽⴰⵏⵜ ⵏ ⵜⵡⵓⵔⵉ ⵏ ⵜⵏⴱⴰⴹⵜ, ⵉⵙⴷⴷⵉⴷ ⵎⴰⵙ ⵜⵙⵔⵙ ⵜⴰⵡⵊⴰ ⵜⴰⵎⵖⵔⵉⴱⵉⵜ ⴳ ⵡⴰⵎⵎⴰⵙ ⵏ ⵜⵙⵔⵜⴰⵢ ⴰⴽⴽⵯ ⵜⵉⴳⴷⵓⴷⴰⵏⵉⵏ.

ⵉⵏⵏⴰ ⴳ ⵢⴰⵜ ⵜⴳⵓⵔⵉ ⴳ ⵜⵉⵍⴰⵍ ⵏ ⵓⵙⴳⵔⴰⵡ ⴰⵏⴰⵎⵓⵔ ⴰⵏⵙⵎⴰⴷ ⵏ ⵜⴼⵉⴷⵉⵕⴰⵍⵉⵜ ⵜⴰⵏⴰⵎⵓⵔⵜ ⵏ ⵉⵎⵙⵜⵉⵢⵏ ⵉⵏⵙⵉⵎⴰⵏⵏ, ⵎⴰⵙ ⴷ ⵜⴰⵏⴱⴰⴹⵜ ⵜⵙⵡⵓⵔⵉ ⴳ ⵙⵉⵏ ⵉⵙⴳⴳⵯⴰⵙⵏ ⴰⴷ ⴷ ⵓⵣⴳⵏ ⵣⵔⵉⵏⵉⵏ, ⵅⴼ ⵉⵙⴼⴰⵡⵏ ⴰⴽⴽⵯ ⴷ ⵉⴷⴰⵡⵔⵏ ⴳ ⵏⵉⵜ ⵉⵍⵍⴰ ⵓⵙⵍⵎⴷ, ⵜⴰⴷⵓⵙⵉ, ⴰⵏⵏⴰⵍ ⴰⵏⴰⵎⵓⵏ ⵓⵙⵔⵉⴷ, ⴰⵖⵎⵎⵓⵙ ⵉ ⵜⴳⵔⵓⵎⵎⵉⵏ ⴰⴽⴽⵯ, ⴰⵏⵏⴰⵍ ⵏ ⵜⵣⴷⴷⵓⵖⵜ, ⴰⵙⵡⵓⴷⴷⵓ ⵏ ⵜⴰⵙⵙⴰⵙⵜ ⵏ ⵜⵣⴰⵡⴰ, ⴰⵙⵙⵉⵏⴼ ⵏ ⵡⴰⵔ ⴰⵎⵢⴰⵙ ⵏ ⵜⵙⵔⵜⵉⵜ ⵏ ⵡⴰⵎⴰⵏ, ⴰⵏⴷⵓⴷⵉ ⵏ ⵍⵃⴰⵡⵣ ⴷ ⵓⵎⵙⴰⵡⴰⵍ ⴰⵏⴰⵎⵓⵏ.

ⵉⵙⵙⵉⵙⴼⵉⵡ ⵎⴰⵙ ⴷ ⵜⵉⵙⴽⵔⴰⵡⵉⵏ ⵡⵉⵔⵔⵉⵏⵜ ⵙ ⵓⴼⵓⵍⴽⵉ ⵅⴼ ⵉⵏⵎⵓⵔⴰⵏ ⴳ ⵢⵉⴳⵔ ⴰⵎⵓⵔⴰⵏ ⴷ ⵓⴷⵖⴰⵔⴰⵏ, ⵉⵙⵙⵎⵜⵔ ⵎⴰⵙ ⴷ ⵜⵉⴼⵔⴽⵜ ⴷ ⵉⴷⴷⴰⵏ ⵖⵓⵔⵙ ⴰⴷⵔⵉⵣ ⵏ ⵉⵏⴰⵥⴰⵕⵏ ⵉⵅⴰⵜⴰⵔⵏ ⴳ ⵜⴳⵓⵔⵎⵎⴰ ⵏ ⵢⵉⴳⵔⴰⵏ ⵉⵔⵡⴰⵙⵏ ⵏⵉⵜ ⴰⵎⵓⴽⵔⵉⵙ ⵏ ⵡⴰⵎⴰⵏ, ⴰⵙⵙⵉⴷⵔ ⵏ ⵓⵙⵡⵓⵔⵉ ⵙⴳ ⵓⵙⴱⵓⵖⵍⵓ ⵏ ⵜⴷⵎⵙⴰ ⵜⴰⵏⴰⵎⵓⵔⵜ.

ⴳ ⵜⵙⴳⴰ ⵢⴰⴹⵏ, ⵉⴱⴷⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵅⴼ ⵢⴰⵜ ⵜⴳⵔⵓⵎⵎⴰ ⵏ ⵉⵏⴰⵥⴰⵕⵏ ⵏⵏⴰ ⵉⵜⵜⵎⵏⴰⵍⴰⵏ ⴷ ⵉⵎⵙⵜⵉⵢⵏ, ⵣⵓⵏ ⴷ ⴰⵙⵓⵔⵙ ⵏ ⵓⵙⴰⵜⵉⴳ ⴷ ⵉ ⵉⵎⵙⵜⵉⵢⵏ, ⴷ ⵓⵍⴰ ⵉⵏⴰⵥⴰⵕⵏ ⵣⴷⵉⵏⵉⵏ ⴷ ⵜⵓⵥⵍⴰⵢⵉⵏ ⴷ ⵜⵣⵎⵎⴰⵔ ⵜⵉⵥⵕⴼⴰⵏⵉⵏ ⴷ ⵜⵏⴼⴳⴰⵏⵉⵏ, ⴷ ⵜⵉⵢⵢⴰⴹ ⵣⴷⵉⵏⵜ ⵙ ⵜⵎⵍⵍⵉⵜ ⴳ ⵉⵖⴰⵡⴰⵙⵏ ⴷ ⵜⵡⵏⴰⵖⵉⵏ ⵜⵉⵏⴰⴽⴰⵍⵉⵏ ⴷ ⵓⵏⵢⴰⵍⴽⴰⵎ ⴷ ⵊⵙⵎⵓⵜⵜⴳ ⵉⵣⴷⵉⵏ ⴷ ⵉⵎⵙⵜⵉⵢⵏ.

ⵉⵙⵎⴰⵏⴰⵔ ⵎⴰⵙ ⴷ ⴰⵙⴳⵔⴰⵡ ⴰⴷ ⴰⵏⴰⵎⵓⵔ ⵢⵓⵛⴽⴰ ⴷ ⵜⴰⵢⴰⴼⵓⵜ ⵏ ⵉⵙⴳⵔⴰⵡⵏ ⵉⵏⵎⵏⴰⴹⵏ ⵏⵏⴰ ⵉⵙⵏⵎⴰⵍⴰ ⵓⴽⴰⴱⴰⵕ, ⵙ ⵜⴷⵔⴰⵡⵜ ⵏ ⵡⵓⴳⴳⴰⵔ ⵏ 10 ⵏ ⵢⵉⴼⴹⵏ ⵏ ⵜⵎⵙⵜⵉⵜ ⴷ ⵢⵉⵎⵙⵜⵉ ⴰⴳⵔⴰⵡⴰⵏ, ⵉ ⵓⴱⴷⴷⴰⴷ ⵅⴼ ⵓⵣⵓⴳⵣ ⵏ ⵉⵖⴰⵡⴰⵙⵏ ⵉⵅⴰⵜⴰⵔⵏ ⴷ ⵜⵡⵏⴳⵉⵎⵉⵏ ⵏⵏⴰ ⵉⵜⵜⵓⴼⴽⴰⵏ ⴳ ⵉⵏⵎⵓⵇⵇⴰⵔⵏ ⴰⴷ.

ⴳ ⵜⵙⴳⴰ ⵏⵏⵙ, ⵉⵏⵏⴰ ⵓⴳⵎⴰⵎ ⵏ ⵓⵙⵉⵔⴰ ⴰⵙⵔⵜⴰⵏ ⵏ ⵓⴽⴰⴱⴰⵕ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⵓⵃⵎⵎⴰⴷ ⵓⵊⴰⵕ, ⴳ ⵢⴰⵜ ⵜⵙⴳⵓⵔⵉ ⵉ ⵜⵙⵏⵓⵔⴰⵢⵜ ⵏ ⵎⴰⴱ ⵎⴰⵙ ⴰⵙⴳⵔⴰⵡ ⴰⴷ ⴰⵏⴰⵎⵓⵔ ⴰⵏⵙⵎⴰⴷ ⵏ ⵜⴼⵉⴷⵉⵕⴰⵍⵉⵜ ⵜⴰⵏⴰⵎⵓⵔⵜ ⵏ ⵉⵎⵙⵜⵉⵢⵏ ⵉⴳⵔⴰⵡⴰⵏⵏ, ⵉⴳⴰ ⵢⴰⵏ ⵓⵙⵔⵙ ⵉ ⵓⴱⴷⴷⴰⴷ ⵅⴼ ⵜⵙⴽⵔⴰⵡⵉⵏ ⵏⵏⴰ ⵜⵙⴽⵔ ⵜⵏⴱⴰⴹⵜ ⴳ ⵡⴰⵎⵎⴰⵙ ⵏ ⵜⵡⴰⵍⴰ ⵏⵏⵙ ⴳ ⵢⵉⴳⵔⴰⵏ ⴰⴽⴽⵯ ⵉⵣⵔⴼⴰⵏⵏ ⴷ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴷ ⵓⵎⵔⴰⵔⴰ ⵅⴼ ⵉⵏⴰⵥⴰⵕⵏ ⴷ ⵜⵎⵙⴰⵔⵉⵏ ⵉⵜⵜⵓⵙⵔⴰⵙⵏ ⴳ ⵢⵉⵎⴰⵍ.

ⵉⵜⵜⵓⵙⵎⴰⵜⴰⵔ ⵎⴰⵙ ⴷ ⴰⵙⵏⵎⴰⵍⴰ ⵏ ⵓⵏⵎⵓⵇⵇⴰⵔ ⴰⴷ ⵙⴳ ⴷⴰⵔ ⵜⴼⵉⴷⵉⵕⴰⵍⵉⵜ ⵜⴰⵏⴰⵎⵓⵔⵜ ⵏ ⵉⵎⵙⵜⵉⵢⵏ ⵉⵏⵙⵉⵎⴰⵏⵏ, ⵉⴷⴷⴰ ⴷ ⴹⴰⵕⵜ ⵏ ⵜⵙⵓⵜⴰⵍ ⵜⵉⵏⵎⵏⴰⴹⵉⵏ ⵏ ⵉⵎⵙⵜⵉⵢⵏ ⴳ ⵜⵎⵏⴰⴹⵉⵏ ⵏ ⵜⴳⵍⴷⵉⵜ ⵙ 12, ⵉⴳ ⵢⴰⵜ ⵜⵎⵍⴷⴰ ⵏ ⵓⵙⵙⵎⵏⵉⴷ ⵏ ⵜⴰⵏⵏⴰⵢⵜ ⵏ ⵓⴽⴰⴱⴰⵕ ⵙ ⵡⵓⵍⵓⵢ ⵙ ⵜⵡⵓⵔⵉ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵚⵕⴰⵢ ⵜⵉⵣⵣⵓⵍⴰⵏⵉⵏ, ⴷ ⵓⴱⴷⴷⴰⴷ ⵅⴼ ⵉⵙⵖⵍⴰⴼ ⵉⵅⴰⵜⴰⵔⵏ ⵏ ⵉⵙⵎⴷⴰⵢⵏ ⵏ ⵓⴽⴰⴱⴰⵕ ⴳ ⵜⴳⵔⴰⵡⵉⵏ ⴷ ⵉⵙⵇⵇⵉⵎⵏ ⴷ ⵜⵎⵏⴰⴹⵉⵏ ⴷ ⵜⵎⵚⵕⴰⵢ ⵜⵉⵣⵣⵓⵍⴰⵏⵉⵏ ⵉ ⵢⴰⵏ ⵓⵙⵖⵓⴷⵓ ⵏ ⵜⵡⵓⵔⵉ ⵜⴰⵎⵓⵔⴰⵏⵜ ⴷ ⵓⵙⴼⵓⵍⴽⵉ ⵏ ⵜⵎⵙⴽⵉⵔⵜ.

ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ